Kryesuesi i seancës, Avni Dehari, i ka ftuar në konsultim përfaqësuesit e partive politike në nisje të seancës së sotme të Kuvendit.
“E shoh të arsyeshme të ftoj përfaqësuesit e subjekteve politike për një konsultim shumë të shkurtër”, tha Dehari në nisje të seancës, duke mos treguar se për çka ishte fjala.
Presidenti francez, Emmanuel Macron, gjatë vizitës së tij sot në Tiranë, ka komentuar mbi situatën e ngrirë të dialogut mes Kosovës dhe Serbisë, duke shprehur shpresën për rifillimin e këtij procesi në një të ardhme të afërt.
Në deklaratën e tij për media, Macron theksoi se Bashkimi Evropian ka një rol legjitim në nxitjen e progresit dhe se ka ardhur koha që të kapërcehet bllokada aktuale.
“Udhërrëfyesi është shumë i qartë dhe kemi kaluar shumë kohë me dialogun ndërmjet Beogradit dhe Prishtinës. BE është legjitime për të kërkuar që të ketë avancime konkrete në çështjen politike mbi zgjedhjet e komunave që s’kanë qenë të kënaqshme, për sigurinë. Kjo është e njohur s’ka asgjë të re. Mendoj që ekzigjenca nuk është humbje besueshmërie. Duhet të dalë nga kjo ballëpërballje që bllokon situatën. Uroj që javët e ardhshme të rifillojmë dialogun edhe me Prishtinën edhe me Beogradin sepse secili vend është përballur me vështirësi politike sociale”, tha Macron.
Ai shtoi se ka kaluar shumë kohë që kur palët janë ulur në tavolinë për të biseduar me seriozitet dhe theksoi rëndësinë që ky proces të mos mbetet i ngrirë.
Kryeministri i Shqipërisë, Edi Rama, ka bërë të ditur se po shqyrtohet mundësia që Franca të përfshihet në ndërtimin e linjës hekurudhore që do të lidhë Durrësin me Prishtinën. Deklarata u bë gjatë konferencës së përbashkët për media me presidentin francez, Emmanuel Macron, i cili ndodhet për një vizitë zyrtare në Shqipëri.
Rama theksoi gjithashtu se bashkëpunimi me Francën do të zgjerohet edhe në fusha të tjera kyçe, përfshirë administrimin e ujërave dhe menaxhimin e mbetjeve urbane.
“Ne duam të fuqizojmë marrëdhënien edhe në drejtim të administrimit të ujërave ku Franca është kampione e inovacionit, e eksperiencës dhe ka kompani që operojnë në të gjithë botën. Kemi folur edhe për mbetjet dhe jemi duke punuar për të pasur një plan të përgjithshëm dhe strategji që bazohet në hapat e punës për procesin e negociatave. Dhe këtu ne kemi shumë për të bërë. Nëse arrijmë të kemi deri në fund bashkëpunimin me ekselencën franceze do të jemi shumë të fituar”, tha ai.
Ai konfirmoi se një nga temat e diskutimit me presidentin Macron ka qenë edhe hekurudha Durrës–Prishtinë.
“Kemi folur edhe për përfshirjen e Francës në ndërtimin e hekurudhës Durrës –Prishtinë dhe në fund më vjen mirë që kur presidenti erdhi këtu herën e kaluar, ishim në ish-shtëpinë e diktatorit Enver Hoxha ku po fillonte puna për ta transformuar në qendër kulturore”.
Kreu i qeverisë shqiptare vlerësoi gjithashtu mbështetjen që Franca po i jep Shqipërisë në rrugën drejt integrimit evropian.
Vetëm një ditë pas pjesëmarrjes në Samitin e Komunitetit Politik Evropian që u zhvillua në Tiranë, presidenti i Francës, Emmanuel Macron, mëngjesin e kësaj të shtune, u prit në ambientet e Kryeministrisë nga kryeministri Edi Rama.
Kjo shënon vizitën e dytë të Macron në Shqipëri brenda një kohe të shkurtër, por është hera e parë që e shoqëron bashkëshortja e tij, Brigitte Macron.
Në orën 09:30 është paraparë nënshkrimi i një sërë marrëveshjesh bilaterale që përfshijnë fushat e mbrojtjes, turizmit dhe energjisë.
Më pas, rreth orës 10:00-10:15, është planifikuar deklarata e përbashkët për mediat nga dy udhëheqësit.
Agjenda do të vazhdojë me pjesëmarrjen e Ramës dhe Macron në forumin ndërkombëtar “Iniciativa e Investimeve të së Ardhmes”, ku pritet të marrin pjesë edhe figura të njohura ndërkombëtare si Jared Kushner, dhëndri i presidentit amerikan Donald Trump, dhe ish-kryeministri italian Matteo Renzi.
Shtetet e Bashkuara të Amerikës do të fillojnë diskutimet me aleatët evropianë për të reduktuar trupat amerikanë në Evropë më vonë këtë vit, tha të premten ambasadori i SHBA-së në NATO, Matthew Whitaker.
I pyetur për të komentuar një raport se administrata Trump po shqyrton tërheqjen e trupave nga Evropa, Whitaker tha se “asgjë nuk është përcaktuar”, shkruan Reuters, transmeton Klankosova.tv.
“Por, sapo t’i bëjmë, këto biseda do t’i bëjmë në strukturën e NATO-s”, tha Whitaker.
“Sigurisht që do të jetë pas samitit, diku më vonë gjatë vitit, ne do të fillojmë ato biseda… Të gjithë aleatët tanë janë të gatshëm ta bëjnë këtë”, shtoi ai, duke iu referuar samitit të NATO-s në Hagë që do të mbahet në qershor.
Duke iu drejtuar një konference sigurie në Estoni, Whitaker tha se SHBA do të bisedojë për çdo ndryshim trupash me aleatët për të shmangur çdo boshllëk sigurie.
“Është më shumë se 30 vjet dëshirë e SHBA-së (për të reduktuar trupat në Evropë), Presidenti Trump tha, ‘mjaft, kjo do të ndodhë dhe do të ndodhë tani’”, tha Whitaker.
Një burrë është arrestuar gjatë pasdites të së premtes në pikën kufitare në Vërmicë.
Sipas policisë, i dyshuari i ofroi një zyrtari policor 10 euro ryshfet, gjë për të cilën edhe u arrestua.
Me vendim të prokurorit, i dyshuari është dërguar në mbajtje.
“Është arrestuar i dyshuari mashkull kosovar, pasi që i njëjti i ka ofruar 10 euro zyrtarit policor. Me vendim të prokurorit, i dyshuari është dërguar në mbajtje”, thuhet në njoftimin e policisë.
Në kuadër të forcimit të kapaciteteve profesionale dhe bashkëpunimit ndërinstitucional, Policia e Kosovës, përkatësisht Njësia për Trajtimin e Mjeteve Eksploduese (NJTME), në bashkëpunim me njësinë e KFOR-it amerikan (US EOD), kanë realizuar një trajnim të përbashkët në Bazën e Njësive Speciale në “Vrellë”.
Ky trajnim ka përfshirë temat: “Ndërhyrja në pakot e dyshuara për bombë”, “Hapja e veturës së dyshuar për bombë”.
Qëllimi i këtij aktiviteti ka qenë rritja e kapaciteteve teknike dhe operacionale për identifikimin dhe çaktivizimin e mjeteve të improvizuara shpërthyese (IED), si dhe përmirësimi i reagimit të koordinuar ndaj situatave emergjente.
“Ky bashkëpunim operacional ndihmon në forcimin e aftësive të përbashkëta, shkëmbimin e përvojave praktike dhe ngritjen e gatishmërisë për përballje me sfida të përbashkëta në fushën e sigurisë publike.”, thuhet në njoftim të Policisë.
Deputetët e zgjedhur të Kuvendit të Kosovës do të mblidhen sot për të 17-ën herë me radhë në përpjekje për ta konstituuar Kuvendin, proces ky që po vazhdon prej më shumë se një muaji. Vazhdimi i seancës së nisur më 15 prill pritet të zhvillohet nga ora 10:30.
Kuvendi ka lëshuar njoftim zyrtar për mbajtjen e kësaj seance, që vjen pasi një ditë më parë dështoi miratimi i komisionit për votimin e fshehtë të Albulena Haxhiut nga VV si kandidate për kryeparlamentare, çka bëri që seanca të ndërpritet.
Po atë ditë, Presidentja e Kosovës, Vjosa Osmani, thirri në takim liderët e katër partive më të mëdha parlamentare: PDK, LDK, VV dhe AAK, për të diskutuar rreth bllokadës së krijuar.
Megjithatë, takimi nuk prodhoi asnjë marrëveshje konkrete mes partive.
Kreu i PDK-së, Memli Krasniqi, tha se kishte kërkuar nga kryetari i VV-së, Albin Kurti, që të tërheqë kandidaturën e Albulena Haxhiut, duke e quajtur këtë si një hap të nevojshëm për të dalë nga kriza: “Në emër të PDK-së, kërkova që kryetari i VV-së, deputeti Kurti, ta ndryshojë kandidaten. Një gjë e tillë nuk pres që do të ndodh. Jemi në situatën e njëjtë ku jemi,” u shpreh Krasniqi.
Edhe Ramush Haradinaj nga AAK e mbështeti ftesën e Presidentes dhe theksoi rëndësinë e një kandidature unifikuese për drejtimin e Kuvendit: “E kemi mirëpritur këtë mundësi të bisedës me presidenten,” deklaroi ai.
Ndërkaq, lideri i LDK-së, Lumir Abdixhiku, shprehu zhgënjimin e tij për mungesën e vullnetit nga partia në pushtet për të zhbllokuar procesin: “Nga partia e parë nuk ka brengë, as urgjencë që kjo çështje të zgjidhet sa më parë,” theksoi ai.
Pas përfundimit të takimit, kryeministri në detyrë, Albin Kurti, nuk dha asnjë deklaratë për mediat.
Po ashtu, presidentja Osmani ka pritur në takim përfaqësuesit e partive jo shumicë të Kuvendit të Kosovës.
Tutje, Osmani ka vlerësuar pozitivisht qëndrimin e përfaqësuesve të partive politike që morën pjesë në takimin e thirrur nga ajo për të diskutuar situatën aktuale politike në vend.
Në një konferencë për media pas takimit, Osmani përgëzoi liderët për qasjen konstruktive që, sipas saj, treguan gjatë diskutimeve, pavarësisht dallimeve në qëndrime.
“Dua t’i përgëzojë liderët për qasjen konstruktive përgjatë këtij takimi, sado që kishin qëndrime të ndryshme në shumicën dërmuese të temave. Pra, në qoftë se mund ta them, ekziston një disponim minimal që jam e bindur se do të rritet me kalimin e kohës”, u shpreh ajo.
Ndërkohë, paralajmëroi mundësinë e dërgimit të çështjes në Gjykatën Kushtetuese në rast se zvarritja vazhdon: “Dërgimin në Gjykatë Kushtetuese e kemi diskutuar për herën e parë,” tha ajo, duke shtuar se ka parë vetëm një “disponim minimal” nga liderët për zgjidhje.
Sindikata “Punëtori” e kompanisë rajonale të mbeturinave “Pastrimi” ka paralajmëruar një protestë që do të mbahet të hënën, më 19 maj, nga ora 10:00, përpara objektit të Komunës së Prishtinës. Protesta vjen si reagim ndaj mungesës së përgjigjes institucionale për një sërë shqetësimesh që lidhen me trajtimin e ndërmarrjes publike dhe punëtorëve të saj.
Në njoftimin zyrtar të sindikatës thuhet se protesta është e pashmangshme, pasi Komuna e Prishtinës nuk ka reaguar ndaj kërkesës së dorëzuar më 15 maj.
Ndër shqetësimet kryesore të ngritura nga sindikata përfshihen: diskriminimi në pagesa, pasiguria në punësim, mungesa e transparencës, mosdorëzimi i mjeteve të punës, si dhe dyshimet për favorizim të kompanive private, pavarësisht kapaciteteve dhe përvojës së gjatë të KRM “Pastrimi”.
“Politikëbërja dhe përplasjet institucionale po i kushtojnë punëtorëve me pasiguri dhe mundësi humbjeje të vendeve të punës”, thekson sindikata në njoftim.
Përmes protestës paqësore, punëtorët synojnë të kërkojnë trajtim të barabartë për ndërmarrjen publike, siguri dhe dinjitet në vendin e punës, transparencë dhe zbatim të ligjit nga Komuna e Prishtinës.
Ata gjithashtu kërkojnë publikimin e kontratave dhe vendimeve që ndikojnë në funksionimin e ndërmarrjes, si dhe ndaljen e qasjeve të dëmshme politike dhe institucionale ndaj punëtorëve.
Një muaj paraburgim, ia ka caktuar Gjykata Themelore të Prishtinës Ish-komandantit të Njësisë së Policisë në kuadër të Ministrisë së Punëve të Brendshme të Serbisë, Millojko Gjorgjeviq.
Ai është arrestuar dje nën dyshimet për përfshirje në krime lufte kundër popullatës civile gjatë viteve 1998-1999 në komunën e Zveçanit.
Sipas Prokurorisë, ai dyshohet se në cilësinë e komandantit të Njësisë së Policisë në kuadër të MUP-it të Serbisë ka marrë pjesë në vrasje, dëbime me forcë, plaçkitje, tortura dhe rrahje sistematike të civilëve shqiptarë.
Në veçanti, ai dyshohet për përfshirje në një operacion ushtarako-policor gjatë muajit prill të vitit 1999 në fshatin Zhazhë, ku sipas hetimeve, janë vrarë shtatë civilë shqiptarë. Trupat e tyre janë gjetur më pas në varrezat e fshatit Suhodoll në komunën e Mitrovicës.