Për nder të Ditës së Presidentit, Vlora Çitaku e PDK-së ka bërë një postim për ish-kreun e vendit, Hashim Thaçi, duke ia uruar këtë ditë dhe që beteja me të cilën ai po përballet tani, të jetë e fundit.

Në Facebook ajo shkroi se për aq sa do të ketë Kosovë, do të ketë edhe presidentë, ministra e deputetë. Por se sipas saj, të rrallë janë ata që ndryshojnë kahjen e historisë.

“Të paktë janë ata që shënojnë epoka. Edhe pse i mbyllur padrejtësisht mes katër muresh, aura e Presidentit Thaçi mbetet e njëjtë, e fuqishme, e pathyeshme”.

“Le të jetë kjo beteja e fundit, President. Urime Dita e Presidentit!”, shkroi tutje Sekretarja e Përgjithshme e PDK-së, Vlora Çitaku.

Ish-presidenti i Republikës së Kosovës, Hashim Thaçi ndodhet prej më shumë se katër vjetësh në paraburgim në Hagë.

Çmimet e energjisë elektrike vazhdojnë të jenë një ndër shqetësimet kryesore për qytetarët dhe bizneset në Kosovë, teksa deputetja e Lidhjes Demokratike të Kosovës, Hykmete Bajrami, ka ngritur një alarm të ri mbi keqmenaxhimin në sektorin energjetik.

Përmes një postimi në Facebook, Bajrami ka thënë se sipas disa raportimeve, qytetarëve iu faturua transporti i energjisë me çmim marramendës – duke kaluar nga vetëm 1.11 euro në blerje, në 798 euro në faturim.

“Veç mendojeni, janë këta ‘profesionistë të pavarur’ që caktojnë çmime për energjinë që ne detyrohemi t’i paguajmë”, ka shkruar ajo.

Deputetja opozitare thekson se kjo nuk ka të bëjë me vetë energjinë, por vetëm me transportin, dhe sipas saj, këto janë ndër shkaqet kryesore të rritjes së ndjeshme të çmimeve në katër vitet e fundit.

“Këto janë arsyet pse në katër vitet e fundit çmimi i energjisë është rritë 128% dhe pse 200 prodhues vendor e 1100 kompani shërbyese e tregtare janë duke u shty drejt mbylljes ose rritjes çmimeve.”

Në deklaratën e saj, Bajrami ka përmendur me emra përgjegjësit institucionalë, duke theksuar:
“Shihni Ligjin për Energjinë Elektrike, drejtëpërdrejtë përgjegjës janë KOSTT dhe ZRrE”.

KFOR-i ka bërë të ditur se ushtarë bullgarë nga Batalioni i Forcave Rezervë zhvilluan trajnime për fobinë nga zjarri dhe kontrollin e turmave dhe trazirave.

KFOR-i në një postim në Facebook shkruan se trajnimi ishte planifikuar qëllimisht që të ishte sa më real, për t’u dhënë pjesëmarrësve një perceptim të plotë të mjedisit të tillë.

“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.

KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si reagues të sigurisë”, thuhet tutje në njoftim

24 maji në Kosovë shënon Ditën e Presidentit. Këtë ditë e caktoi ish-presidenti Ibrahim Rugova dhe nderon 24 majin e vitit 1992 kur u mbajtën zgjedhjet e para demokratike për Presidentin e Kosovës, në të cilat fituesi doli Presidenti Rugova.

Në Ditën e Presidentit, presidentin historik të Kosovës, Rugovën e përkujtoi presidentja aktuale, Vjosa Osmani.

“Sot ecim hapave të tij, në përpjekje të vazhdueshme për ta bërë Kosovën atë që e deshën e për të cilën sakrifikuan breza të tërë”, tha ajo.

Policia në Pejë ka arrestuar katër persona të dyshuar për një grabitje të ndodhur më 21 maj, në një pompë derivatesh në rrugën “KFOR” në këtë qytet.

Sipas njoftimit zyrtar, rreth orës 23:36, tre persona të armatosur kanë zbritur nga një veturë e tipit “Golf” dhe kanë kërcënuar punëtorin e pikës së karburantit, duke i kërkuar paratë e arkës. Viktima u detyrua t’u dorëzonte rreth 900 euro – para se të dyshuarit të largoheshin nga vendi i ngjarjes në drejtim të panjohur.

Pas një pune intensive hetimore, më 24 maj, policia arriti të identifikojë dhe të arrestojë katër persona të përfshirë në këtë rast. Gjatë bastisjes janë sekuestruar vetura e përdorur në grabitje, një pushkë gjysmë automatike, 570 euro para të gatshme, si dhe dëshmi të tjera që lidhen me rastin.

Të dyshuarit janë intervistuar dhe janë ndaluar për 48 orë nën dyshimet për kryerjen e veprës penale “Grabitje e armatosur”.

Kryeqyteti i Ukrainës, Kiev, është goditur mëngjesin e së shtunës nga një sulm masiv rus, duke përdorur dronë dhe raketa, të cilat shkaktuan zjarre dhe shpërndarje mbetjesh në disa lagje të qytetit.

Sipas kryebashkiakut të Kievit, deri tani janë raportuar të paktën 15 persona të plagosur gjatë këtyre sulmeve. Kjo është një situatë shqetësuese që ka ndodhur pas një periudhe intensifikimi të sulmeve të Ukrainës, ku rreth 800 sulme janë realizuar në territorin rus, duke përfshirë edhe kryeqytetin Moskë.

Ministri i Jashtëm rus, Sergei Lavrov, ka paralajmëruar se Rusia do të përgjigjet në mënyrë të fuqishme ndaj këtyre veprimeve.

Ndërkohë, presidenti ukrainas, Volodymyr Zelensky, ka akuzuar presidentin rus, Vladimir Putin, për vonesën në përgjigjen ndaj thirrjeve për armëpushim, pas një shkëmbimi masiv të të burgosurve ndërmjet dy vendeve.

Ky shkëmbim ka përfshirë kthimin e 390 të burgosurve ukrainas, ndërkohë që pritet që të tjerë të vazhdojnë të kthehen gjatë fundjavës.

Zelensky theksoi: “Është qartë koha për të rritur presionin mbi Rusinë, për të arritur jo vetëm një rezultat, por gjithçka që është e nevojshme.”

Kosova do jetë nikoqire e ushtrimit më të madh ndërkombëtar, të drejtuar nga ushtria e Shteteve të Bashkuara të Amerikës për Evropë dhe Afrikë “Defender Europe 2025”.

Ky ushtrim mbahet nga datat 26 maj deri më 9 qershor.

Të premten, Ministria e Mbrojtjes doli me një njoftim për këtë organizim.

“Gjatë kësaj periudhe kohore, do ketë lëvizje të konvojeve nga vendbazimet e Forcës së Sigurisë së Kosovës në drejtim të rajonit të Gjakovës, saktësisht Aeroportit të Gjakovës dhe poligonit ushtarak në Babaj të Bokës”.

“Kjo lëvizje do të realizohet me qëllim të ekzekutimit të ushtrimit ndërkombëtar “Defender Europe 25”, prandaj kërkojmë mirëkuptimin e qytetarëve gjatë periudhës së zhvillimit të ushtrimit”.

“Forca e Sigurisë së Kosovës përmes ekzekutimit të këtij ushtrimi do të tregojë gatishmërinë operacionale dhe shkallën e ndërveprueshmërisë luftarake me vendet partnere dhe të rajonit, përfshirë Shtetet e Bashkuara të Amerikës, Shqipërinë, Kroacinë, Maqedoninë e Veriut dhe Bullgarinë”, u tha në njoftim.

Kosova në vitin 2023 ishte përjashtuar nga “Defender Europe 2023” si masë e Shteteve të Bashkuara të Amerikës pas tensioneve në veri të vendit.

Grupi i parë i besimtarëve nga Kosova është nisur sot nga Aeroporti Ndërkombëtar “Adem Jashari” drejt vendeve të shenjta për ta kryer Haxhin.

Njoftimi u bë i ditur nga Bashkësia Islame e Kosovës.

“297 haxhilerë nga komuna e Prishtinës dhe Fushë Kosovës do të nisën rreth orës 08:00 të mëngjesit, ndërkohë që grupet e tjera pritet të udhëtojnë gjatë ditëve të ardhshme”, thuhet në njoftim.

Ndër të tjera BIK bën me dije se Haxhiu më i ri për këtë vit është një 15-vjeçar nga Prishtina, kurse më e vjetra është një 84-vjeçare po ashtu nga Prishtina.

“Nga Drejtoria për Haxh dhe Umre e Bashkësisë Islame të Kosovës thonë se gjithçka është duke shkuar mbarë ashtu siç është paraparë. Kryesia e Bashkësisë Islame të Kosovës njofton se këtë vit nga Kosova për ta kryer haxhin do të udhëtojnë 1576 besimtarë”, përfundon njoftimi i BIK-ut.