Category: Lajme

Tre persona janë arrestuar nga Policia në Ferizaj, pasi dyshohet se të njëjtit kanë sulmuar fizikisht tre persona të tjerë pas një mosmarrëveshjeje.

Gjatë përleshjes së dhunshme, njëri nga të dyshuarit ka ekspozuar një armë zjarri, duke e drejtuar atë nga viktimat me qëllim kanosjeje serioze.

Sipas njoftimit zyrtar të policisë, tre viktimat kanë pranuar tretmanin e nevojshëm mjekësor për shkak të lëndimeve të marra gjatë sulmit. Në vendin e ngjarjes, njësitet policore kanë konfiskuar armën e zjarrit, një pistoletë, së bashku me një karikator me katër fishekë dhe një leje për poligon qitjeje.

Pas përfundimit të intervistimit dhe në konsultim me Prokurorin kompetent, ndaj dy prej të dyshuarve është caktuar masa e mbajtjes ndërkohë, i dyshuari i tretë është liruar për të vazhduar rastin në procedurë të rregullt ligjore.

Kryeministri në detyrë, Albin Kurti, gjatë vizitës së tij në Shtetet e Bashkuara është takuar me kongresistin amerikan Ritchie Torres.

Në qendër të diskutimit ishin ambiciet strategjike të Kosovës për anëtarësim në NATO dhe Bashkimin Evropian, për të cilat Kurti kërkoi mbështetje të vazhdueshme.

Gjatë bisedës u diskutua edhe për potencialin ekonomik të Kosovës, me theks të veçantë te teknologjia, si dhe për mundësinë e investimeve të reja amerikane në infrastrukturën e vendit.

Kurti e vlerësoi kongresistin Torres si një zë të fuqishëm dhe aleat të rëndësishëm për avancimin demokratik dhe ekonomik të Kosovës.

Presidenti Donald Trump ka njoftuar vendosjen e tarifave të reja mbi produktet e drurit dhe mobiliet e importuara, duke rritur shqetësimet për çmime më të larta në ndërtim dhe rinovim banesash.

Sipas vendimit të ri, që hyn në fuqi më 14 tetor, SHBA do të aplikojë: 10% tarifë mbi drurin e butë ndërtimor, si dërrasa dhe trarët, 25 për qind tarifë mbi mobiliet prej druri, dollapët e kuzhinës dhe mobiliet me tapiceri.

Nga 1 janari 2026, tarifat do të rriten sërish, deri në 50 për qind për dollapët dhe 30 për qind për mobiliet me tapiceri, shkruan CNN.

Trump tha se kjo masë synon të mbrojë prodhuesit amerikanë dhe të forcojë sigurinë kombëtare, duke akuzuar shtete si Kanadaja, Kina dhe Vietnami për “furnizim të tepruar” në tregun amerikan.

Por ekspertët paralajmërojnë se tarifat do të ndikojnë në rritjen e kostove të ndërtimit dhe mobilimit, në një kohë kur çmimet e banesave janë në nivele rekord dhe industria amerikane nuk ka kapacitet të plotë për të zëvendësuar importet.

Sipas të dhënave zyrtare, çmimet e mobilieve janë rritur me 4.7 për qind gjatë vitit të fundit, ndërsa mobiliet e dhomës së ndenjës dhe ngrënies kanë pësuar rritje mbi 9 për qind.

Vladimir Putin, president i Rusisë, ka lëshuar një urdhër për rekrutimin e më shumë se 100 mijë rusëve në Ushtri – që paraqet rekrutimin më të madh vjeshtor që prej vitit 2016.

Kremlini po planifikon t’i rekrutojë 135 mijë të rinj të moshave 18 deri 30 vjeç, në shërbimin e rregullt mes tetorit dhe dhjetorit. Shërbimi ushtarak zakonisht zgjat një vit qëndrimi në një bazë brenda Rusisë.

Edhe pse shërbimi i rregullt nuk nënkupton zyrtarisht dërgimin në fushëbetejën me Ukrainën – që konsiderohet mobilizim nën ligjet luftarake ruse. Ata që kompletojnë stërvitje ushtarake janë të prirë të dërgohen në luftë.

Rusia raportohet se po përjeton humbje të mëdha në njerëz në Ukrainë, në vijën e frontit 1000-kilometërshe.

Sekretari i Përgjithshëm i NATO-s, Mark Rutte, ka bërë thirrje të martën për përpjekje shtesë për ta mbrojtur më mirë hapësirën ajrore të aleatëve, pas një sërë shkeljesh të hapësirës ajrore dhe shfaqjes së dronëve.

“Ne duhet ta mbajmë qiellin tonë të sigurt”, tha Rutte, duke folur përkrah presidentes së Komisionit Evropian, Ursula von der Leyen, para një takimi me komisionarët e BE-së.

“Ne e kemi parë gjatë javëve të fundit se çfarë ka ndodhur me dronët në Poloni, MiG-31 [avionët luftarakë) në Estoni, por edhe çfarë po ndodh tani në Danimarkë”, tha Rutte.

Në fillim të shtatorit, tre avionë luftarakë rusë hynë në hapësirën ajrore të Estonisë pasi një numër i madh dronësh rusë depërtuan në hapësirën ajrore polake. Pamje të përsëritura të dronëve në Danimarkë shkaktuan pengesa të mëdha në trafikun ajror danez.

“Në Danimarkë, ne ende po vlerësojmë se çfarë fshihet pas kësaj, por kur bëhet fjalë për Poloninë dhe Estoninë, është e qartë se janë rusët. Megjithatë, ne ende po vlerësojmë nëse është e qëllimshme apo jo. Por, edhe nëse nuk është e qëllimshme, është pakujdesi dhe e papranueshme”, theksoi Rutte.

Rutte mbështeti idenë e ndërtimit të ashtuquajturit “murit të dronëve” për ta mbrojtur më mirë hapësirën ajrore evropiane, duke e cilësuar atë si gjënë “e duhur dhe domosdoshme”.

“Ne nuk mund të shpenzojmë miliona euro ose dollarë për raketa për të rrëzuar dronë që kushtojnë vetëm disa mijëra dollarë”, tha Rutte.

Nisma, e promovuar nga von der Leyen, pritet të diskutohet nga liderët e Bashkimit Evropian të mërkurën në Kopenhagë.

Von der Leyen premtoi “veprime të menjëhershme për krijimin e murit të dronëve”.

“Evropa duhet të japë një përgjigje të fortë dhe të bashkuar ndaj depërtimeve të dronëve rusë në kufijtë tanë”, tha ajo.

Paneli Zgjedhor për Ankesa dhe Parashtresa (PZAP) ka refuzuar ankesën e Partisë Demokratike të Kosovës ndaj Lëvizjes Vetëvendosje.

PZAP thotë se më datë 28.09.2025 ka pranuar një ankesë nga subjekti politik Partia Demokratike e Kosovës (PDK), me të cilën pretendon se më datë 27.09.2025, kandidatja për Kryetare të Drenasit, Egzona Tërdevci, nga subjekti politik “Lëvizja Vetëvendosje”, në rrjetin social Facebook, në profilin e saj ka postuar një shkrim se PDK ka dy kandidatë në garë për kryetar të Drenasit, duke aluduar në Petrit Hajdari dhe Ramiz Lladrovci.

Në vendimin e PZAP-it thuhet se paneli pas shikimit të shkresave të lëndës dhe përgjigjes në ankesë, vlerësoj se pretendimet në ankesë se kandidatja për kryetare të Komunës së Drenasit, Egzona Tërdevci për subjektin politik Lëvizja Vetëvendosje, me postimin e saj në rrjetin social facebook “Sonte nga ora 20:20 debati për Drenasin në RTK. Të sinkronizuar si në çdo veprim tjetër, edhe sot dy kandidatët e PDK-së nuk ishin prezent në këtë debat. Ju ftoj të na ndiqni!”, janë të paqëndrueshme dhe si të tilla i refuzoj për faktin se veprimet e përshkruara në ankesë nuk paraqesin shkelje të dispozitës së nenit 32 të Ligjin Nr. 08/L-228 Për zgjedhjet e përgjithshme në Republikën e Kosovës -së, me të cilën përcaktohet se: “Kodi i Sjelljes për subjektet politike dhe mbështetësit e tyre dhe kandidatët ka për qëllim krijimin e kushteve në të cilat populli i Kosovës mund të zgjedhë përfaqësuesit e tij përmes zgjedhjeve të lira, të drejta dhe të mirë informuara në një atmosferë të tolerancës demokratike, paqes dhe respektit për sundimin e ligjit”.

Një person ka vdekur në QKUK, ku ishte duke u trajtuar.

Viktima ishte duke u trajtuar që nga 31 gushti i këtij viti, pasi ishte goditur nga një veturë në Mitrovicën e Jugut, transmeton Zeri.info.

“Viktima mashkull kosovar, derisa ka qenë në rrugë, ishte goditur nga një veturë në lëvizje, drejtuar nga i dyshuari mashkull kosovar. Viktima kishte pësuar lëndime trupore dhe ishte dërguar në QKUK për trajtim mjekësor. I njëjti si pasojë e lëndimeve të marra, më 29.09.2025 ka vdekur. Rasti në procedurë hetimore”, thuhet në raportin e Policisë.