Category: Lajme

Shumë rrjete sociale kanë hequr qasjen për rreth 4.7 milionë profile të identifikuara si të fëmijëve në Australi, që nga hyrja në fuqi e ndalimit të përdorimit të rrjeteve sociale për personat nën 16 vjeç.

Kjo masë historike hyri në fuqi në dhjetor për të adresuar shqetësimet rreth mjediseve potencialisht të dëmshme online për të rinjtë.

Ministrja e Komunikimit, Anika Wells, tha se qeveria u përball me shumë kritika dhe sfida nga kompanitë e mëdha teknologjike, por tani prindërit australianë mund të jenë të sigurt se fëmijët e tyre mund të shijojnë fëmijërinë pa ndikimin e rrjeteve sociale.

Sipas ligjit australian, platforma si Facebook, Instagram, TikTok, X, YouTube, Snapchat, Reddit, Threads, Kick dhe Twitch përballen me gjoba deri në 49.5 milionë dollarë australianë nëse nuk marrin masa për të hequr përdoruesit nën moshën 16 vjeç. Për të verifikuar moshën e përdoruesve, platformat mund të kërkojnë dokumente identifikimi, të përdorin teknologji të vlerësimit të moshës ose të nxjerrin përfundime nga të dhëna të tjera të disponueshme.

Komisionerja për sigurinë online, Julie Inman Grant, tha se masat synojnë parandalimin e kompanive të rrjeteve sociale që të kenë qasje te fëmijët. Ajo shtoi se dhjetë kompanitë kryesore nën ndalesë kanë respektuar ligjin dhe kanë raportuar në kohë të dhënat e kërkuara.

Përveç mbështetjes nga prindërit dhe organizatat për sigurinë e fëmijëve, aktivistë të privatësisë online dhe disa grupe të rinjsh kanë kritikuar masën, duke argumentuar se ndalimi mund të shtyjë përdorimin e rrjeteve në platforma më pak të rregulluara ose të kufizojë qasjen në komunitete ku ndihen të mbështetur.

Ligji australian mbi ndalimin e përdorimit të rrjeteve sociale nga fëmijët nën 16 vjeç është parë si një hap historik në mbrojtjen e sigurisë online të të rinjve dhe ka nxitur diskutime edhe në vende të tjera për masa të ngjashme.

Qendra e Numërimit dhe Rezultateve është duke vazhduar numërimi i fletëvotimeve sipas listës së vendvotimeve, sipas përditësimit të fundit në faqen e KQZ-së, 312 nga 914 vendvotime janë numëruar.

Nga ky proces verifikimi disa kandidatëve brenda partive i janë hequr votat e disa të tjerëve janë shtuar ato.

Kandidatët e Lëvizjes Vetëvendosje me më së shumti vota të zbritura:

Ejup Maqedonci – 250 vota

Vendenis Lahu – 238 vota

Filiz Mustafa – 226 vota

Adelina Stublla – 165 vota

Albin Kurti – 152 vota

Dafina Alishani – 141 vota

Glauk Konjufca – 86 vota

Kandidatët e PDK-së me më së shumti vota të zbritura:

Fetah Paçarizi – 1,336 vota

Nait Hasani – 669 vota

Arianit Çollaku – 506 vota

Xhavit Haliti – 477 vota

Luljeta Veselaj Gutaj – 451 vota

Kujtim Gashi – 440 vota

Enver Hoxhaj – 430 vota

Kandidatët e LDK-së me më së shumti vota të zbritura:

Xhavit Uka – 358 vota

Visar Azemi – 193 vota

Driton Selmanaj – 175 vota

Anton Quni – 146 vota

Alban Zogaj – 38 vota

Florian Dushi – 28 vota

Lumir Abdixhiku – 27 vota

Sot shënohet 44-vjetori i vrasjes së veprimtarëve të çështjes kombëtare, Jusuf e Bardhosh Gërvalla dhe Kadri Zeka.

Më 17 janar 1982, ata u vranë në një atentat në Untergruppenbach të Gjermanisë. Edhe pas 44 vjetësh, kjo ngjarje mbetet e freskët në kujtesën e familjarëve dhe të gjithë atyre që ishin të lidhur me ta shpirtërisht dhe veprimtarisht.

Sipas autoriteteve gjermane, atentati u cilësua si pjesë e luftës së fshehtë mes shërbimeve sekrete jugosllave dhe kundërshtarëve politikë në mërgatë. Sulmi ndodhi derisa viktimat po dilnin me veturë nga garazhi, kur dy persona të armatosur hapën zjarr nga afër dhe më pas u larguan nga vendi i ngjarjes.

Bardhosh Gërvalla u vra me gjashtë plumba, Kadri Zeka me dy, ndërsa Jusuf Gërvalla u plagos rëndë dhe më pas vdiq. Para se të ndërronte jetë, Jusuf Gërvalla kishte deklaruar se pas atentatit qëndronte UDB-ja.

Si Big Brother VIP Pushtoi Hapësirën Digjitale në Shqipëri dhe Kosovë

Sot, mediat digjitale dhe rrjetet sociale luajnë një rol kyç në formësimin e opinionit publik. Publiku nuk i ndjek më emisionet televizive vetëm përmes televizionit apo portaleve informative, por edhe në platforma si Facebook, Instagram, TikTok dhe YouTube. Monitorimi i këtyre kanaleve u mundëson brendeve, institucioneve dhe mediave të kuptojnë se për çfarë flitet, si reagon audienca dhe cilat tema tërheqin vëmendjen më të madhe.

Përmes platformës së saj të inteligjencës mediatike në kohë reale, analytics.live, Pikasa ka analizuar praninë online dhe ndikimin mediatik të Big Brother VIP Albania dhe Big Brother VIP Kosova, duke përfshirë kanalet zyrtare në rrjete sociale dhe mbulimin nga mediat në të dy shtetet.

Periudha e Monitorimit
Periudha e monitorimit për këtë analizë ishte 5–11 janar 2026. Gjatë kësaj kohe, Big Brother VIP në të dy vendet dominoi plotësisht të gjitha platformat sociale, duke tejkaluar çdo medium, influencues apo lider politik për nga dukshmëria dhe angazhimi.

Çfarë u Monitorua
Analiza u fokusua në:
• Llogaritë zyrtare të Big Brother VIP Albania dhe Kosova në rrjete sociale
• Mediat në të dy shtetet, përfshirë portalet online, faqet e televizioneve dhe media të tjera digjitale
• Përmendjet, postimet, komentet, pëlqimet, shpërndarjet dhe angazhimin total
• Të dhëna në kohë reale, të përditësuara vazhdimisht

Statistikat e Performancës në Rrjete Sociale
Facebook: Motor pjesëmarrjeje, jo vetëm kanal shpërndarjeje
Gjatë javës së monitoruar, Big Brother VIP Albania gjeneroi 481 mijë angazhime, tre herë më shumë se influencuesit dhe liderët politikë kryesorë në vend. Faqja publikoi 2,015 postime, duke tejkaluar vëllimin e publikimeve të 10 faqeve më të angazhuara në Facebook.
Ndërkohë, Big Brother VIP Kosova regjistroi 405 mijë angazhime, katër herë më shumë se performanca e kombinuar e influencuesve, mediave dhe liderëve politikë. Faqja publikoi 982 postime, më shumë se 20 faqet e tjera më aktive në treg.

Instagram: Bastioni kryesor i angazhimit të show-t
E njëjta tendencë vërehet edhe në Instagram, ku diferenca mes faqes udhëheqëse dhe faqeve të tjera kryesore është së paku 2.5 herë më e lartë, duke dëshmuar dominancë absolute.
Në Shqipëri, Big Brother VIP gjeneroi 2.8 milion angazhime dhe publikoi 1,999 postime dhe reels, ndërsa në Kosovë arriti 1.9 milion angazhime me 929 postime dhe reels. Këto shifra konfirmojnë lidershipin e fortë të Big Brother VIP në Instagram, si në angazhim ashtu edhe në intensitet publikimi.

TikTok: Arritja algoritmike që riformëson sjelljen e audiencës
Në TikTok, audienca kosovare dominoi qartë, me dyfish më shumë shikime dhe angazhime krahasuar me Shqipërinë. Big Brother VIP Kosova arriti 5.6 milion shikime dhe 116 mijë angazhime, ndërsa Big Brother VIP Albania regjistroi 2.8 milion shikime dhe 59 mijë angazhime.
Kjo diferencë lidhet kryesisht me kufizimet dhe bllokimet e përkohshme të TikTok-ut në Shqipëri, të cilat ndikuan drejtpërdrejt në shtrirjen e përmbajtjes dhe aktivitetin e audiencës.

YouTube: Gati 40 milion shikime në dy tregje
Big Brother VIP vazhdon të dominojë edhe në YouTube. Big Brother VIP Kosova regjistroi 27.6 milion shikime dhe 160.7 mijë angazhime, ndërsa Big Brother VIP Albania arriti 11.4 milion shikime dhe 48.3 mijë angazhime.
Edhe në platformat video, kanalet zyrtare të Big Brother VIP tejkalojnë të gjitha mediat e tjera digjitale, duke përqendruar vëmendjen kryesore të audiencës. Kjo dëshmon jo vetëm popullaritetin e show-t, por edhe nivelin e lartë të ndërveprimit të publikut.

Kur Mediat Ndjekin Vëmendjen, Jo Anasjelltas

Audienca e madhe në rrjete sociale është shfrytëzuar edhe nga mediat, të cilat përdorin shpesh inserte video nga show-i për të rritur shikueshmërinë dhe klikimet. Në Shqipëri, përmbajtja e Big Brother VIP përbënte 2.66% të gjithë përmbajtjes mediatike, ndërsa në Kosovë 2.77%.
Në aspektin numerik, lajmet për Big Brother VIP dominojnë dukshëm mbi shumë kategori të tjera lajmesh, duke konfirmuar fuqinë dhe ndikimin e këtij formati në ekosistemin digjital.
________________________________________
Ndikimi është i Matshëm — Kur Dihen të Lexohen të Dhënat

Performanca digjitale e Big Brother VIP nxjerr në pah rëndësinë gjithnjë e më të madhe të rrjeteve sociale dhe platformave online në formësimin e sjelljes së audiencës, trendeve mediatike dhe diskutimeve publike.

Të dhënat tregojnë edhe dy ekosisteme digjitale të ndryshme: Shqipëria karakterizohet nga angazhim i lartë social i përforcuar nga amplifikimi mediatik, ndërsa Kosova nga konsum i lartë i videove dhe shtrirje e gjerë në platformat video. Ky kontrast dëshmon se si Pikasa Analytics, përmes analytics.live, e shndërron aktivitetin digjital të fragmentuar në inteligjencë strategjike të qartë.

Përmes monitorimit në kohë reale, analizës së thelluar të tregjeve dhe krahasimeve ndër-shtetërore, Pikasa ofron insight-e të zbatueshme për vendimmarrësit, jo thjesht tabela apo dashboard-e.

Link to original article: www.pikasa.ai

Inspektorati Policor i Kosovës ka dalë me njoftim lidhur me denoncimin e një qytetari, i cili kishte akuzuar Policinë e Kosovës për keqtrajtim. Pas verifikimeve, rasti ka rezultuar të jetë lajm i rremë, ndërsa për këtë është iniciuar edhe rast përkatës.

Në njoftimin e IPK-së thuhet se incidenti është raportuar para mesnatës së 13 janarit, në afërsi të Urës së Bistricës.

“Pas analizimit të provave dhe video-incizimeve është vërtetuar se të njëjtat nuk pasqyronin pretendimet e palës dhe se zyrtarët policorë me asnjë veprim nuk dyshohej se kishin tejkaluar autorizimet e tyre apo përdorur forcën. Nga procesi i analizimit të video incizimeve hetuesit e IPK-së kanë vërejtur se  pretendimet e ankuesit janë të sajuara dhe të njëjtat i janë paraqitur prokurorit të Prokurorisë Themelore në Mitrovicë i cili ka kërkuar që ndaj ankuesit tani i dyshuar të  iniciohet rast  dhe hetim penal  me dyshimin për veprën penale “Lajmërim i rremë apo kallëzim i rremë.”, njoftoi IPK.

I njëjti ka potencuar para hetuesve të IPK-së se si pasojë e këtij keqtrajtimi kishte pësuar lëndime prapa në qafë, në bërrylin e majtë, në dorën e djathtë dhe në këmbë nga zyrtari policor i cili e kishte bërë kontrollin sipërfaqësor në trup dhe për këtë ka kërkuar trajtim mjekësor në Spitalin Rajonal në Mitrovicë – Veri.

Hetuesit e IPK-së në kuadër të veprimeve hetimore dhe të procesit të verifikimit të pretendimeve të ankuesit kanë siguruar prova duke përfshirë edhe video incizim nga kamerat e sigurisë që kanë mbuluar me pamje vendin ku është kryer ndalesa në pikën e kontrollit nga zyrtarët policorë.

“Nga procesi i analizimit të video incizimeve hetuesit e IPK-së kanë vërejtur se pretendimet e ankuesit janë të sajuara dhe të njëjtat i janë paraqitur prokurorit të Prokurorisë Themelore në Mitrovicë i cili ka kërkuar që ndaj ankuesit tani i dyshuar të iniciohet rast dhe hetim penal me dyshimin për veprën penale “Lajmërim i rremë apo kallëzim i rremë”, përfundon njoftimi.

Prokuroria Themelore në Gjakovë, Departamenti i Krimeve të Rënda ka ngritur aktakuzë kundër të pandehurit N.Sh., shtetas i Shqipërisë i cili pa autorizim dhe në bashkëkryerje edhe me dy të pandehur tjerë, kultivojnë bimë të hashashit, shkurren e kokainës ose bimën e kanabisit me qëllim të prodhimit të narkotikëve ose substancave psikotrope”.

I pandehuri në bashkëpunim me të pandehurin O.Sh., shtetas i Shqipërisë, dhe një i dyshuar i tretë i pa identifikuar deri më tani, kanë mbjellë dhe kultivuar narkotikë të llojit Kanabis Sativa në tri parcela”.

“Në këto tri lokacione janë gjetur gjithsej 1592 bimë narkotike të llojit Kanabis Sativa”, tha Prokuroria.

Parcelat janë identifikuar përmes vëzhgimit me dron nga ajri, ndërsa veprimet e të pandehurve, shihen në foto dhe video të nxjerra nga masa e fshehtë e vëzhgimit.

Lajmi se fituesja e Çmimit Nobel për Paqen, Maria Corina Machado, ia dorëzoi medaljen e saj presidentit amerikan Donald Trump ka shkaktuar një valë reagimesh të forta dhe mosbesimi në mediat norvegjeze dhe qarqet profesionale.

Trump, i cili prej kohësh ka shprehur dëshirën për këtë vlerësim, e mori medaljen nga udhëheqësja e opozitës venezuelase gjatë një takimi në Shtëpinë e Bardhë.

Machado e konsideroi këtë dorëzim si “një vlerësim për përkushtimin e tij të jashtëzakonshëm ndaj lirisë sonë”.

Ky veprim ka ngjallur shumë diskutime, veçanërisht pasi Machado është përjashtuar nga procesi i tranzicionit të pushtetit në Venezuelë që prej 3 janarit, kur forcat amerikane rrëzuan presidentin Nicolás Maduro, megjithatë regjimi i tij mbeti në pushtet.

Presidenti amerikan, i cili pretendon se e meriton Çmimin Nobel për Paqen pasi, sipas tij, gjatë mandatit të dytë ka kontribuar në zgjidhjen e disa konflikteve, më herët kishte shprehur pakënaqësi ndaj vendimeve të Komitetit Norvegjez të Nobelit,

“Kjo është krejtësisht e papranueshme”, deklaroi për televizionin publik NRK Janne Haaland Matlary, profesoreshë në Universitetin e Oslos dhe ish-politikane. “Ky veprim përbën mungesë të plotë respekti ndaj çmimit”, tha ajo, duke e cilësuar atë si “të pakuptimtë” dhe “patetik”.

Ndërkohë, Komiteti Norvegjez i Nobelit theksoi javën e kaluar, përmes një deklarate zyrtare, se Çmimi Nobel nuk mund të ndahet dhe as të transferohet.

Çmimi Nobel për Paqen konsiderohet një nga vlerësimet më prestigjioze në botë për përpjekjet në fushën e diplomacisë dhe paqes.

“Kjo është jashtëzakonisht e turpshme dhe e dëmshme për një nga çmimet më të njohura dhe më të rëndësishme në botë”, shkroi në një postim në Facebook, Raymond Johansen, ish-kryetar i bashkisë së Oslos nga Partia Laburiste në pushtet.

“Dhënia e çmimit është tani aq e politizuar dhe potencialisht e rrezikshme, saqë mund të legjitimojë lehtësisht zhvillime që bien ndesh me vetë idenë e paqes”, shkroi ai.

Ai është një nga pesë Çmimet Nobel të themeluara me testamentin e Alfred Nobelit, shpikësit suedez të dinamitit, i cili vdiq në vitin 1896.

Banorët në rrugën “Ferid Curri” në lagjen Arbëria në Prishtinë, tash e disa ditë po përballen me mungesë të ujit, e cila po ua vështirëson jetën e përditshme.

Një banor i kësaj lagjeje, tha për Sinjalin se uji në lagje ku jeton ai më shumë janë pa ujë se me të.

Sipas tij ujë kanë vetëm dy orë në ditë, e që kjo mungesë po shkakton shumë telashe.

Ai për Sinjalin madje ka dyshime se KRU Prishtina ua ka ndërprerë atyre furnizimin e rregullt në mënyrë që banorët e Fushë Kosovës të kenë ujë pasi që furnizohen me ujë nga i njëjti liqen, nga ai i Batllavës.

“Kohët e fundit, KRU Prishtina po furnizon vetëm Fushë Kosovën përmes Batllavës ndërkohë që ata janë të siguruar me ujë, pasi ka pasur një rregullim të situatës atje”, ka thënë ai.

Në lidhje me këtë çështje, Sinjali ka kontaktuar KRU Prishtinën për të marrë një sqarim në lidhje me ankesat e banorëve të kësaj lagjeje dhe në një përgjigjje  të tyre ata janë justifikuar se shkak është situata e fundit me vërshime.

“Kjo situatë është krijuar si pasojë e turbullirave të shtuara në burimin e ujit, të cilat kanë ndikuar drejtpërdrejt në procesin e trajtimit, si dhe për shkak të kapacitetit të zvogëluar të impiantit të trajtimit. Për rrjedhojë, sasia e ujit të trajtuar dhe e shpërndarë është më e ulët se nevojat reale të konsumatorëve”, kanë thënë nga KRU Prishtina.

Nga Ujësjellësi kanë thënë se ekipet e tyre janë duke  punuar në stabilizimin e situatës dhe rikthimin e furnizimit normal sa më shpejt që të jetë e mundur, duke kërkuar mirëkuptim nga qytetarët që të kursejnë ujin deri në përmirësimin e furnizimit me ujë.

“Për shkak të mungesës së ujit nga Batllava, jemi duke u munduar të shpërndajmë ujë në mënyrë të kufizuar nga Shkabaj, pasi situata është e tillë aktualisht”, thuhet në sqarimin e Ujësjellësit Rajonal Prishtina.

Pavarësisht këtyre sqarimeve, banorët që jetojnë në lagjen Arbëria, dyshojnë se mos furnizimi i tyre i rregullt me ujë dhe e kundërta që po ndodh me komunën e Fushë Kosovës është për shkak të afërsisë që kryeshefi i KRU Prishtina Arsim Fetahu ka me kryetarin e Fushë Kosovës Valon Prebreza.

Sinjali ka tentuar të kontaktojë edhe komunën e Fushë Kosovës lidhur me këtë problematikë.

Prebreza është përgjigjur duke thënë se qytetarët e Fushë Kosovës, nuk kanë pengesa me furnizimin e ujit dhe ka demantuar miqësin me kryeshefin e KRU Prishtina, Arsim Fetahu.

“Furnizimi me ujë nuk shkon me miqasi kujt me i’a lëshu ujin e kujt jo”, deklaroi ai.