Category: Lajme

Zyra e Prokurorit të Specializuar në Hagë ka vazhduar ditën e dytë të deklaratave përfundimtare në gjyqin ndaj katër ish-eprorëve të Ushtrisë Çlirimtare të Kosovës, përfshirë Hashim Thaçin, Kadri Veselin, Rexhep Selimin dhe Jakup Krasniqin.

Pas fjalës për Thaçin dhe Veselin, prokurori Matthew Howling ka nisur prezantimin e rolit të Rexhep Selimit. Ai ka përmendur planifikimin e sulmit të vitit 1997 ndaj stacionit të Policisë, duke theksuar se Selimi veproi me qëllim të kontribuonte për “qëllimin e përbashkët kriminal” të UÇK-së.

“Rexhep Selimi ishte jashtëzakonisht i qartë në planifikimin e sulmit. Ai konfirmoi pjesëmarrjen e tij dhe u caktua përgjegjës për goditjen më të madhe të koordinuar që UÇK kishte bërë deri atëherë. Selimi veproi përmes pozitave që mbante gjatë periudhës së mbuluar nga aktakuza, duke ndarë qëllimin e përbashkët kriminal”, tha prokurori Howling.

Një 74-vjeçar ka ndërruar jetë pas një aksidenti të rëndë në Durrës, ku dyshohet se është rrëzuar nga shkallët e banesës së tij.

Policia Shqiptare njofton se i moshuari, identifikuar me inicialet H.D., ndërroi jetë gjatë transportimit me autoambulancë nga spitali i Durrësit drejt Spitalit të Traumës në Tiranë.

Sipas njoftimit zyrtar: “Më 09.02.2026, ka humbur jetën gjatë transportimit me autoambulancë shtetasi H.D., 74 vjeç, i cili dyshohet se u dëmtua pas rrëzimit nga shkallët e banesës.”

Policia e Kosovës, përkatësisht Sektori i Hetimeve të Kryeqytetit, me autorizim nga Prokuroria kompetente, ka kërkuar bashkëpunimin e qytetarëve për identifikimin e një personi të dyshuar për përfshirje në veprën penale “Vjedhje”.

Sipas njoftimit zyrtar, personi i dyshuar shihet në një fotografi të publikuar nga Policia dhe kërkohet çdo informatë që mund të ndihmojë në identifikimin ose lokalizimin e tij.

Autoritetet policore u bëjnë thirrje qytetarëve që, nëse kanë njohuri apo informacione relevante lidhur me këtë rast, t’i raportojnë ato në numrin emergjent 192 ose përmes adresës elektronike [email protected].

Policia e Kosovës falënderon qytetarët për bashkëpunimin dhe thekson se kontributi i tyre është i rëndësishëm për zbardhjen e rasteve penale dhe ruajtjen e rendit dhe sigurisë publike.

Ministrja për Europën dhe Punët e Jashtme, Olta Spiropali, zhvilloi një takim në Washington me Zëvendëssekretaren e Shtetit për Çështjet Politike, Allison Hooker, e cila përgjigjet për marrëdhëniet e SHBA-ve me aleatët globalë.

Në fokus të bisedimeve ishin çështjet që lidhen drejtpërdrejt me interesat e Shqipërisë, përfshirë sigurinë në kuadër të NATO-s dhe stabilitetin në Ballkanin Perëndimor. Gjithashtu u diskutuan hapat konkretë për thellimin e partneritetit ekonomik dhe strategjik mes dy vendeve, si garanci që zëri i Shqipërisë të dëgjohet aty ku merren vendimet.

Spiropali theksoi se Shqipëria konsiderohet një aleate e besueshme, e angazhuar për sigurinë dhe stabilitetin e rajonit, dhe se marrëdhënia me SHBA-të nuk është vetëm protokoll apo formale, por mbështetet mbi interesa, vlera dhe përgjegjësi të përbashkëta.

“Tifozat Kuq e Zi” u kanë bërë thirrje të gjithë shqiptarëve, kudo që ndodhen, të marrin pjesë në Marshin “Drejtësi, jo politikë”, të organizuar nga platforma “Liria ka Emër”, që do të mbahet më 17 shkurt në Prishtinë nga ora 14:00.

Në një njoftim të lëshuar nga ky grup, theksohet se ata do të marshojnë në mbështetje të udhëheqësve të Ushtrisë Çlirimtare të Kosovës që po gjykohen padrejtësisht në Hagë.

“UÇK-ja është vlera më e shenjtë dhe më domethënëse e historisë sonë kombëtare, simbol i lirisë, sakrificës dhe rezistencës së popullit shqiptar. Ky proces është përpjekje për të rishkruar historinë dhe për të barazuar agresorin me viktimën. Drejtësia e vërtetë nuk mund të ekzistojë pa u ndëshkuar krimet serbe. Më 17 shkurt, ora 14:00, Prishtina flet në emër të gjithë shqiptarëve. UÇK-ja është liria jonë”, thuhet më tej në njoftimin e grupit “Tifozat Kuq e Zi”.

Prokurori Matt Halling ka deklaruar se ka prova për përfshirjen e Kadri Veselit në krimet e përshkruara në aktakuzë, duke theksuar se mungesa e tij në Kosovë nuk ndryshon situatën ligjore.

Halling bëri të ditur se Veseli kishte ndikuar personalisht në transferimin e një personi nga Kleçka, i cili ishte ndaluar më pas, duke u referuar te rasti i Milan Mitroviqit. “Ne mund të vërejmë përfshirjen e Kadri Veselit edhe në lidhje me ndalimin e Mitroviqit. Dokumentet tregojnë se ai e transferoi personalisht këtë individ në Kleçkë”, tha prokurori. Ai gjithashtu prezantoi një dokument ku përmendet ndalimi i Mitroviqit dhe referimi “Shtabi Kryesor (Luli)”.

Halling theksoi se edhe vetë Veseli kishte pranuar të jetë afër Kleçkës gjatë transferimit të Mitroviqit. Një dëshmitar që ishte mbajtur së bashku me Mitroviqin ka dëshmuar për keqtrajtimin e tij. “Kadri Veseli ka informacion të mëtejshëm mbi krimet e kryera, edhe përtej rasteve ku ishte personalisht i përfshirë”, shtoi prokurori.

Në korrik të vitit 1998, dëshmitari 2144 u takua me Veselin dhe Thaçin dhe informoi për rrëmbimet dhe ndalimet e kryera nga UÇK-ja. Ai deklaroi se Thaçi kishte pohuar se UÇK-ja vepronte si ushtri e rregullt dhe respektonte Konventën e Gjenevës.

Halling u shpreh se mosangazhimi i Veselit për të parandaluar krimet në rolin e tij në Shtabin e Përgjithshëm përbën një kontribut drejt akuzave të ngritura, duke mos përmbushur detyrat si epror. Ai shtoi se mungesa e Veselit në Kosovë nuk e zmbraps përgjegjësinë, pasi ai mund të kishte ushtruar kompetencat e tij nga çdo vend ku ndodhej.

Prokurori gjithashtu deklaroi se Veseli kishte rol në udhëheqje dhe veprimtari inteligjence, duke bashkëpunuar me Hashim Thaçin në emërime të komandantëve.

Mijëra njerëz u mblodhën në brigjet e liqenit Mar Chiquita të Argjentinës të dielën e kaluar, për të provuar një rekord të ri botëror Guinness për numrin më të madh të njerëzve që notojnë njëkohësisht.

Eventi, i mbajtur si pjesë e “Festival de la Planchita” të dytë vjetor në Miramar, synon të mbledhë më shumë se 1,941 pjesëmarrës për të tejkaluar një moment historik të vendosur gati një dekadë më parë.

Rekordi aktual u vendos në vitin 2017 në liqenin Epecuén, një tjetër lagunë e kripur në Argjentinë, ku 1,941 njerëz formuan me sukses një zinxhir masiv lundrues, transmeton Telegrafi.

Për të thyer rekordin, organizatorët duhet të koordinojnë një grup prej të paktën 1,942 personash për të notuar pa ndihmë për një periudhë të caktuar kohore.

Përqendrimi i lartë i kripës në Mar Chiquita e bën atë një vend ideal për këtë sukses, pasi uji ofron lundrueshmëri natyrore që u lejon edhe notarëve fillestarë të qëndrojnë mbi ujë me lehtësi. /Telegrafi/

Policia e Kosovës ka raportuar për tri raste të ndara që lidhen me blerje, posedim të paautorizuar dhe shpërndarje të narkotikëve, të ndodhura në Pejë, Rahovec dhe Mitrovicë të Jugut gjatë ditëve të fundit.

Në Pejë, më 26 janar 2026 rreth orës 19:40, pas vendimit të prokurorit është kryer kontroll në shtëpinë e një të dyshuari mashkull kosovar.

Gjatë kontrollit janë gjetur dhe konfiskuar tetë qese të vogla me substancë të dyshuar të llojit heroinë me peshë totale rreth 2.0 gramë, dy peshore digjitale, një mulli për bluarje, një shufër me talke, një sprej si dhe tri pajisje USB.

Rasti po hetohet nga ekipet relevante policore.

Ndërkohë, në Rahovec, më 8 shkurt 2026 rreth orës 22:30, është arrestuar një tjetër i dyshuar mashkull kosovar, pasi gjatë kontrollit i është gjetur në posedim një sasi e substancës së dyshuar narkotike. Me vendim të prokurorit, i dyshuari është dërguar në mbajtje.

Rasti i tretë është regjistruar në Mitrovicë të Jugut, më 9 shkurt 2026 rreth orës 12:26.

Gjatë kontrollit trupor, policia ka gjetur dhe konfiskuar 15 qese me substancë të dyshuar të llojit marihuanë, me peshë totale 15.31 gramë. I dyshuari mashkull kosovar është arrestuar dhe, pas intervistimit, me vendim të prokurorit është dërguar në mbajtje.

Policia e Kosovës ka bërë të ditur se hetimet për të gjitha rastet janë duke vazhduar në koordinim me Prokurorinë e Shtetit. /Telegrafi/