Kryetari i LDK-së, Lumir Abdixhiku, ka mbërritur në Kuvendin e Kosovës për të zhvilluar një takim me kryeministrin Albin Kurti.
Ai para mediave u tregua i rezervuar, pasi nuk u prononcua fare.
Temë mes Kurtit dhe Abdixhikut pritet të jetë çështja e presidentit.
Për shkak të përkeqësimit të situatës së sigurisë në Meksikë, Ministria e Punëve të Jashtme dhe Tregtisë së Jashtme e Maqedonisë së Veriut u bën thirrje qytetarëve të vendit që ndodhen në territorin e Meksikës ta lënë atë sa më shpejt të jetë e mundur dhe në mënyrë të sigurt.
Nga MPJ e Maqedonisë së Veriut rekomandojnë që të shtyhen të gjitha udhëtimet në Meksikë që nuk janë të natyrës urgjente dhe të nevojshme.
“Ministria vë në dispozicion të gjitha kapacitetet e saj për ndihmë qytetarëve të Republikës së Maqedonisë së Veriut, përmes linjës telefonike SOS 24-orëshe: +389 75 268 736, adresës së email-it: [email protected], si dhe përmes linjës telefonike të Misionit Diplomatik dhe Konsullor të Republikës së Maqedonisë së Veriut në Uashington: +1 (202) 758-7798 ose adresës së email-it: [email protected].
Ministria po e monitoron vazhdimisht situatën dhe do ta informojë publikun në kohën e duhur”, thonë nga MPJ.
Besnik Bislimi, dikur zëvendëskryeministër me përgjegjësi për integrim evropian dhe zhvillim ekonomik, degradohet në udhëheqës të Zyrës për Ekspertizë, Zbatim dhe Mbikëqyrje Strategike, sipas vendimit të fundit të Kurtit.
Kryeministri i Kosovës, Albin Kurti, ka vendosur të ndryshojë rolin e njërit nga bashkëpunëtorët e tij më të afërt, Besnik Bislimi, duke e autorizuar për një pozitë më administrative në kuadër të Zyrës së Kryeministrit.
Sipas dokumentit zyrtar të siguruar nga Demokracia.com, Bislimi do të udhëheqë Zyrën për Ekspertizë, Zbatim dhe Mbikëqyrje Strategike, një strukturë që funksionon nën drejtimin e Kryeministrit.
Në vendim thuhet se mandati i tij në këtë pozitë do të zgjasë për aq kohë sa zgjat mandati i Kryeministrit, ndërsa Bislimi obligohet të deklarojë pasurinë sipas legjislacionit në fuqi.
“Autorizohet z. Besnik Bislimi, të udhëheqë me Zyrën për Ekspertizë, Zbatim dhe Mbikëqyrje Strategjike. Mandati i të autorizuarit nga pika 1 e këtij Vendimi, zgjat për aq sa zgjatë mandati i Kryeministrit. I autorizuari nga pika 1 e këtij Vendimi, obligohet të deklarojë pasurinë sipas legjislacionit në fuqi. Obligohen Zyra e Kryeministrit për zbatimin e këtij Vendimi. Ky Vendim hyn në fuqi ditën e nënshkrimit”, thuhet në këtë vendim.
Dokumenti, i nënshkruar nga Kurti më 20 shkurt 2026, detyron gjithashtu Zyrën e Kryeministrit të zbatojë këtë vendim, i cili hyn në fuqi menjëherë pas nënshkrimit.
Vendimi është dërguar edhe te vetë Bislimi, Sekretari i Përgjithshëm i ZKM-së dhe Arkivi i Qeverisë.
Bislimi ka shërbyer si Ministër i Financave dhe Transfereve gjatë qeverisë së parë të Albin Kurtit në vitin 2020, ku mbikëqyri buxhetin, financat publike dhe politikat fiskale të vendit.
Nga 2021 deri më tani, Bislimi ka qenë Zëvendëskryeministër i Kosovës, përgjegjës për integrimin evropian, zhvillimin ekonomik dhe koordinimin e dialogut me Serbinë. Ai ka udhëhequr gjithashtu projekte strategjike qeveritare dhe ka përfaqësuar Kosovën në takime ndërkombëtare për çështje ekonomike dhe politike.
Kryeministri i Kosovës, Albin Kurti, ka pritur në takim Përfaqësuesin e Përhershëm të Programit të Kombeve të Bashkuara për Zhvillim (UNDP), Nuno Queiros.
Në këtë takim të parë prej formimit të qeverisë së re, z. Queiros e uroi kryeministrin Kurti për mandatin e tij dhe të kabinetit qeveritar.
Sipas njoftimit të Kryeministrisë, Kurti e falënderoi z. Queirós për urimet dhe për bashkëpunimin e vazhdueshëm dhe profesional ndërmjet Qeverisë së Republikës së Kosovës dhe UNDP-së, duke theksuar se UNDP mbetet një partner i besueshëm dhe strategjik në forcimin e institucioneve dhe në zbatimin e reformave me rezultate konkrete për qytetarët.
Në takim u rikonfirmua, siç thuhet, gatishmëria për vazhdim të bashkëpunimit në fusha prioritare si lufta kundër korrupsionit dhe sundimi i ligjit, mbrojtja e trashëgimisë kulturore, dokumentimi dhe adresimi i krimeve të luftës, mbrojtja e mjedisit dhe tranzicioni i gjelbër, si dhe reforma në arsim dhe ngritja e kapaciteteve institucionale.
“Kryeministri theksoi se reforma në prokurimin publik mbetet një nga prioritetet kryesore të Qeverisë, me fokus në rritjen e transparencës, digjitalizimin e proceseve dhe forcimin e mekanizmave mbrojtës kundër keqpërdorimit të fondeve publike. Në këtë drejtim, do vazhdojmë me miratimin e strategjisë anti korrupsion dhe ligjin për Byronë Shtetërore për Konfiskimin e Pasurisë së Pajustifikueshme. Të dy palët u pajtuan se bashkëpunimi i deritanishëm ka dhënë rezultate të prekshme dhe shprehën përkushtimin për ta thelluar më tej partneritetin në funksion të zhvillimit të qëndrueshëm dhe forcimit të institucioneve të Republikës së Kosovës”, thuhet në njoftimin e ZKM-së.
Një ngjarje e rëndë shënon prej dy ditësh (21 shkurt), në Kypseli, Greqi, kur një 64-vjeçar shqiptar, është futur në shtëpinë e një 25-vjeçarje, e cila është me aftësi të kufizuara, duke tentuar abuzimin seksual me këtë të fundit.
Sipas mediave greke, shqiptari kishte njohje me familjen e vajzës prej 18-vitesh, madje konsiderohej si një person i besueshëm për ta.
Ka qenë nëna e 25-vjeçares, e cila ka denoncuar rastin në polici, pasi siç shprehet ajo, e gjeti autorin në shtëpinë e saj duke tentuar t’i përdhunonte vajzën.
“Shkova në farmaci për të marrë syze dhe sapo hapa derën, pashë atë mbi fëmijën tim. Ai vrapon dhe fshihet në tualet dhe unë e godas me gjëra. Më pas ai fillon të më godasë, të më shajë me fraza të pakuptueshme dhe të godasë vajzën time”, u shpreh e ëma e së resë për mediat greke.
Pas gjithë kësaj, nëna e vajzës shprehet se ka sulmuar autorin me tigan.
Në mediat greke, janë shpërndarë dhe pamjet nga kamerat e sigurisë që fiksojnë momentin kur shtetasi shqiptar hyn në shtëpinë e 25-vjeçares teksa e ëma e kësaj të fundit nuk ndodhej në banesë në ato momente.
Intervista e nënës së 25-vjeçares për Mega.gr. Në video shfaqen momentet e shkëputura nga kamerat e sigurisë lidhur me ngjarjen.
64-vjeçari është shpallur në kërkim nga autoritetet helene. Nga ekspertiza mjeko-ligjore, rezulton që nuk ka pasur abuzim tek vajza me aftësi të kufizuara.
Çfarë dihet për 64-vjeçarin
Sipas mediave greke, shtetasi shqiptar, i cili njihej nga familja e vajzës 25-vjeçare prej 18 vitesh, ishte një person i besueshëm për ata, madje i ndihmonte për blerjet. Ai dhe nëna e vajzës ishin njohur në kafenenë e kishës.
Raportohet se ai është baba i dy fëmijëve, jeton në Nea Smyrni me djalin e tij, por ata të dy nuk kanë marrëdhënie shumë të mira.
Me vajzën e tij, thuhet se nuk ka aspak kontakt, e as me gruan e tij.
Sakaq, identiteti i 64-vjeçarit është mbajtur i fshehtë nga autoritetet./tvklan/
Ka nisur mbledhja e Komisionit të Posaçëm për Shqyrtimin e Kandidatëve për Emërim në Gjykatën Kushtetuese, raporton Ekonomia Online.
Në këtë mbledhje pjesë po merr edhe Avokati i Popullit, Naim Çelaj.
Në rend dite janë dy pika:
1. Emërimi i dy zëvendëskryesueseve të Komisionit,
2. Marrja e vendimit për publikimin e thirrjes/ftesës publike për zgjedhjen dy (2) gjyqtarëve në Gjykatën Kushtetuese të Republikës së Kosovës.
Ndërkaq mbledhja është e mbyllur për media.
Ka ndërruar jetë luftëtari dhe invalidi i UÇK-së, Rifat Shala.
I ndjeri gjatë luftës shërbeu në Brigadën 112 “Arben Haliti” të Zona Operative e Drenicës, ku dha kontribut të jashtëzakonshëm për çlirimin e vendit.
Ai ishte pjesë e Brigada 112 “Arben Haliti”, duke u dalluar për përkushtim dhe sakrificë në shërbim të atdheut.
Pas përfundimit të luftës, Shala vazhdoi angazhimin e tij në TMK, duke mbetur gjithmonë në shërbim të vendit.
Varrimi i të ndjerit do të bëhet nesër (24.02.2026) në ora 13:00, në fshatin Leçinë, Komuna Skenderaj.
Gjykata Themelore në Prishtinë ka dënuar më 13 vjet burgim Dushko Arsiq për krime lufte.
Vendimi është marrë të hënën.
Dushko Arsiqit akuzohej për krime lufte në fshatin Butovc të Prishtinës, në periudhën janar-qershor të vitit 1999
Dosja e prokurorisë thotë se grupi ku ishte pjesëtar Arsiq fillimisht kishin plagosur e vrarë viktima, në mesin e të cilëve i ndjeri Brahim Shala i cili u vra me pushkë automatike e më pas për bartjen e trupit të tij e urdhëruan Artan Krasniqin atë kohë 15-vjeçar.
Presidentja e Kosovës, Vjosa Osmani ka ndarë disa sekuenca të disa intervistave të dhëna për mediat ndërkombëtare.
Ajo thotë se në çdo intervistë qëllimi ishte mbrojta e Kosovës dhe fuqizimi i popullit.
“Në çdo intervistë ndërkombëtare, me një qëllim të qartë: mbrojtjen e Kosovës dhe fuqizimin e zërit të popullit tonë!”, ka shkruar Osmani teksa ka shpërnda dhe video.
Me rastin e shënimit të 28 vjetorit të Epopesë së Ushtrisë Çlirimtare të Kosovës, Qeveria e Kosovës të premten ka miratuar themelimin e Këshillit Shtetëror për këtë përvjetor. Në këtë këshill nuk janë përfshirë kategoritë e dala nga lufta e UÇK-së.
Si rrjedhojë, Organizata e Veteranëve të Luftës OVL-UÇK, së bashku me kategoritë tjera, ka themeluar këshillin organizues për organizimin dhe koordinimin e aktiviteteve përkujtimore dhe ceremoniale në kuadër të kësaj ngjarjeje historike.
Sipas OVL-së, edhe në rast se do të kishin marrë ftesë nga Qeveria e Kosovës, nuk do të merrnin pjesë për shkak të, siç thonë, fyerjeve dhe moskujdesit ndaj tyre për gjashtë vite me radhë.
Nënkryetari i Organizatës së Veteranëve të Luftës OVL-UÇK, Gazmend Syla tha për KosovaPress, se ishin të obliguar të krijonin këtë këshill në mënyrë që të mos mbesin jashtë organizimeve.
“Meqenëse ne nuk u përfshimë në këshillin shtetëror që e krijoi Qeveria e Republikës së Kosovës, në njëfarë forme ne u obliguam si shoqata të dala nga lufta, që të kemi kujdes të veçantë në këto ditë historike. Prandaj e kemi menduar që të edhe ne të krijojmë një këshill, në këtë rast me disa personalitete, domethënë që kanë kontribuar, në fakt janë edhe themelues të Ushtrisë Çlirimtare të Kosovës, pastaj luftëtarë të UÇK-së. Sigurisht që emrat e tyre janë më shumë ndoshta për simbolikën e tyre, për aktivitetin e tyre që e kanë pasur për çlirim të vendit”, tha Syla.
Ai u shpreh se organizimet do të ishte e rëndësishme të bëheshin së bashku me institucionet, ani pse është e papranueshme për ta që të marrin pjesë në një vend ku anëtarë është Mimoza Kusari-Lila që kishte kërkuar largimin e veteranëve nga rritja e pagës minimale apo fyerjeve tjera nga pjesëtarë të Qeverisë, përfshi edhe kryeministrin e Kosovës Albin Kurti.
Syla tha se të njëjtit duhet të kuptojnë se në karrigat ku ata ulën sot, është ndërtuar mbi sakrificat e çlirimtarëve.
Ai kërkon një reflektim nga ana e institucioneve shtetërore.
“Do të ishte tepër e rëndësishme që këto organizime të bëhen së bashku, edhe shoqatat e dala nga lufta, edhe qeveria, po qoftë edhe presidenca. Fatkeqësisht po bëhen gjashtë vite që ne nuk kemi fare komunikim me institucionet tona. Edhe për neve është goxha e papranueshme me marrë pjesë në një ngjarje shtetërore ku prej anëtarëve të qeverisë në këtë rast mund të jetë për shembull Mimoza Kusari-Lila, njëra prej atyre personazheve në atë kohë që fliste me Radojiçiq dhe Simiq, e i thonte më duhen votat e tuaja për të larguar veteranët nga rritja e pagës minimale në Kosovë në atë kohë… Fyerjet e vazhdueshme që i kemi pasur, ju e dini edhe me zotin Basha, me atë punimi akademik, pastaj edhe Kurti nuk është që u soll mirë as me çështjen e Gjykatës Speciale ku po trajtohen padrejtësisht bashkëluftëtarët tanë atje.. Përderisa nuk do të ketë një reflektim nga ana e qeverisë që ata me kuptuar që ky shtet, mbi të cilin ata tani më janë ulur në ato karrige, u ndërtua mbi sakrificën e këtyre djemve e vajzave e atyre që do t’i kujtojmë më 5, 6 e 7 dhe ditëve të tjera në vijim, është goxha e rëndë për neve që ne me vazhdu me shku me marrë një fotografi duke vendosur kurora lulesh”, u shpreh ai.
“Po mendojmë homazhe me bë me datën pesë, se këto do të jenë propozime prej këshillit, këshilli do të vendosë, me datën gjashtë me bë vizita tek familjet e dëshmorëve, pastaj edhe të pranojmë vizita nëpër zyrat tona që i kemi edhe këtu në nivel qendror por edhe nëpër qendra të tjera, sepse kemi vizitorë, veç kemi marrë konfirmim që do të vijnë edhe nxënës të shkollave atë ditë na vizitojnë nëpër zyrat tona. Tani me datën shtatë është nata e zjarreve, do të organizojmë nëpër shtatë zonat operative që në atë kohë kanë qenë si zona të luftës, të ndezim zjarret”, tha ai.
Në Këshillin Shtetëror për shënimin e 28 vjetorit të Epopesë së UÇK-së, në krye do të jetë ministri i Mbrojtjes Ejup Maqedonci, bashkëkryesues ministri i Familjes dhe Mbrojtës së Vlerave të Luftës, Andin Hoti, kurse anëtar kryetari i komunës së Skenderajt, Sami Lushtaku.
Ndërsa, në Këshillin Organizues të kategorive të dala nga lufta, do të përbehet nga kryetari i OVL-UÇK-së Hysni Gucati, Fadil Shurdhaj, Xhavit Jashari, Ali Ahmeti, Shefket Musliu, Sokol Poga, Agim Çeku, Lahi Brahimaj, Shukri Buja, Ahmet Isufi, Rahman Rama, Nuredin Lushtaku, Abdyl Mushkolaj, Latif Gashi dhe Rrustem Berisha.
Epopeja e UÇK-së shënohet më 5, 6 dhe 7 mars, në ditët kur u vranë nga forcat serbe familja Jashari në Prekaz.