Category: KURIOZITETE

Dizajneri grafik nga Prizreni, Erti Krasniqi, ka realizuar një projekt kreativ përmes të cilit ka konceptuar pamjen e mundshme të banknotave të Kosovës, në rast se vendi do të kishte valutën e vet.

Në projektin me titull “Kosovo Banknote Design (Concept) 2026”, Krasniqi ka ndërthurur elemente të identitetit kombëtar, simbolikës vendore dhe koncepteve moderne të sigurisë së kartëmonedhave.

Krasniqi ka bërë të ditur se projekti nuk përbën propozim institucional apo zyrtar, por është një ide kreative që synon të eksplorojë mundësinë e një identiteti të ri vizual për monedhën e Kosovës.

“Së fundmi kam realizuar një projekt personal të quajtur ‘Kosovo Banknote Design (Concept) 2026’, ku kam konceptuar se si mund të dukeshin banknotat e Kosovës nëse vendi do të kishte valutën e vet”, ka deklaruar Krasniqi, raporton Telegrafi.

Ai ka theksuar se për secilën prerje të konceptuar ka zhvilluar një identitet të veçantë vizual, duke përfshirë simbolikën, elementet e sigurisë dhe arsyetimin e zgjedhjeve të dizajnit.

“Për secilën prerje kam zhvilluar identitetin vizual, simbolikën, elementet e sigurisë dhe arsyetimin e zgjedhjeve të dizajnit. I gjithë procesi është dokumentuar në Behance”, ka thënë ai.

\Sipas Krasniqit, qëllimi i këtij projekti është të sjellë një qasje kreative mbi mënyrën se si dizajni grafik mund të kontribuojë në paraqitjen e identitetit të një shteti.

Projekti përfshin konceptimin e elementeve të ndryshme të banknotave, duke u fokusuar në kombinimin e trashëgimisë kulturore, simboleve kombëtare dhe standardeve bashkëkohore të dizajnit të kartëmonedhave.

Krasniqi ka bërë të ditur se puna e tij është publikuar në platformën për dizajn Behance, ku është prezantuar i gjithë procesi krijues, nga ideja fillestare deri te realizimi final i konceptit.

Një çift nga Brazili ka hyrë në histori me një rekord të pazakontë, pasi realizoi plot 195 puthje brenda vetëm 30 sekondash.

Renato Bayma Gaia, 32 vjeç, e puthi në fytyrë partneren e tij, Naiara Roberta Ribeiro de Marins, 33 vjeçe, me një shpejtësi mbresëlënëse, duke vendosur rekordin për numrin më të madh të puthjeve të realizuara në gjysmë minute.

Momenti u kthye menjëherë në një ngjarje virale, ndërsa çifti tërhoqi vëmendjen për kombinimin e shpejtësisë, koordinimit dhe humorit.

Ndryshe nga rekordi i tyre, një puthje e zakonshme nuk ka një kohëzgjatje të përcaktuar. Ajo mund të zgjasë vetëm disa sekonda ose disa minuta, në varësi të situatës, ndjenjave dhe afërsisë mes dy personave.

Studime të ndryshme sugjerojnë se një puthje mesatare zgjat rreth 12 sekonda. Megjithatë, puthjet romantike dhe më emocionale shpesh zgjasin më shumë, pasi shërbejnë si mënyrë për të shprehur intimitet, dashuri dhe lidhje emocionale.

Për disa çifte, një puthje e gjatë dhe e ngadaltë mund ta forcojë ndjenjën e afërsisë, ndërsa për të tjerë edhe një puthje e shkurtër mund të ketë po aq kuptim.

Më shumë sesa kohëzgjatja, rëndësi ka që puthja të jetë e natyrshme, e ndërsjellë dhe në përputhje me ndjenjat e momentit.

Ajo duhet gjithmonë t’i respektojë kufijtë emocionalë dhe fizikë të të dy personave, ndërsa në një marrëdhënie intime mund të shërbejë si një nga mënyrat më të thjeshta për ta forcuar lidhjen.

Në rastin e çiftit brazilian, megjithatë, fokusi nuk ishte te romantika e një puthjeje të gjatë, por te një sfidë e shpejtësisë që përfundoi me një rekord të ri.

Ethet e Kupës së Botës 2026 dhe forma fantastike e Erling Haalandit kanë shkaktuar një fenomen të pazakontë në Peru, ku qindra prindër kanë vendosur t’u japin fëmijëve të tyre emrin e sulmuesit norvegjez.

Sipas Regjistrit Kombëtar të Identifikimit dhe Gjendjes Civile të Perusë (Reniec), 468 foshnja të porsalindura janë regjistruar me mbiemrin “Haaland”, ndërsa 91 të tjera kanë marrë emrin e plotë “Erling Haaland”.

Zëdhënësi i Reniec, Ivan Torres, tha se yjet e futbollit vazhdojnë të jenë burim frymëzimi për shumë familje peruane.

“Haalandi është gjithashtu peruan. Yjet e mëdhenj të futbollit shërbejnë si frymëzim që peruanët t’u vendosin fëmijëve emra të njohur dhe të veçantë”, deklaroi Torres.

Ai shtoi se shumica e këtyre regjistrimeve janë bërë pas fillimit të Kupës së Botës, veçanërisht pasi Norvegjia siguroi kualifikimin historik në çerekfinale.

Sulmuesi 25-vjeçar i Manchester Cityt, i njohur me nofkën “Androidi”, ka qenë një nga protagonistët e turneut. Ai realizoi dy gola në fitoren ndaj Brazilit, sukses që i siguroi Norvegjisë çerekfinalen e parë në histori të Kupës së Botës.

Ky fenomen nuk është i ri në Peru. Sipas të dhënave zyrtare, 3.402 persona mbajnë emrin “Messi”, prej të cilëve 292 janë regjistruar si “Lionel Messi”. Po ashtu, 1 mijë e 185 persona quhen “Cristiano Ronaldo”, 1 mijë e 241 “Yamal”, 238 “Mbappe”, ndërsa plot 33 mijë e 809 mbajnë emrin “Neymar”.

“Nuk mund t’i ndalojmë njerëzit t’i përdorin këta emra”, shtoi Torres.

Nëse Norvegjia vazhdon rrugëtimin në Kupën e Botës, pritet që “Haalandmania” të marrë përmasa edhe më të mëdha. Aktualisht, Haalandi ka shënuar shtatë gola në turne, vetëm një më pak se Lionel Messi dhe Kylian Mbappe, të cilët kryesojnë listën e golashënuesve me nga tetë realizime.

Autoritetet e Varenës, një prej fshatrave më të njohur turistikë në brigjet e Liqenit të Komos në Itali, kanë vendosur masa të reja për të frenuar sjelljet e papërshtatshme të vizitorëve dhe për të mbrojtur cilësinë e jetës së banorëve.

Sipas rregullave të reja, turistët që ecin nëpër rrugët e fshatit pa bluzë ose vetëm me rroba banje jashtë zonave të plazhit do të gjobiten me shuma nga 50 deri në 200 euro.

Lëvizja me këtë veshje do të lejohet vetëm në plazhet e liqenit dhe gjatë udhëtimeve me varkë.

Varena, me rreth 650 banorë të përhershëm, përballet çdo vit me një numër gjithnjë e më të madh turistësh. Për këtë arsye, bashkia ka vendosur edhe kufizime të tjera, duke lejuar grupet turistike të organizuara me maksimumi 25 persona dhe duke ndaluar përdorimin e altoparlantëve nga guidat turistike, në mënyrë që të shmanget mbipopullimi dhe zhurma në rrugicat karakteristike të fshatit.

Kryebashkiaku Mauro Manzoni deklaroi se, megjithëse Varena mirëpret qindra mijëra vizitorë çdo vit, mirëqenia e banorëve nuk mund të sakrifikohet për shkak të turizmit masiv.

Masat janë mirëpritur edhe nga banorët vendas. Një pronar dyqani u shpreh se vizitorët mund të vishen si të dëshirojnë në plazh, por kur lëvizin nëpër fshat, hyjnë në dyqane, restorante, kisha apo sheshe publike, duhet të respektojnë një kod të përshtatshëm veshjeje.

Varena nuk është destinacioni i vetëm italian që po vendos rregulla më të rrepta për turistët. Vitet e fundit, disa qytete dhe fshatra në Itali kanë ndërmarrë masa për të menaxhuar pasojat e turizmit të tepërt. Në vitin 2022, Sorrento vendosi gjoba për personat që lëviznin në qendër me rroba banje ose pa bluzë, ndërsa në vitin 2023 Portofino kufizoi qëndrimin në zona të caktuara dhe vendosi masa për të reduktuar grumbullimet e turistëve.

Dhurimi i spermës është një proces që përdoret për të ndihmuar çiftet apo individët që nuk mund të kenë fëmijë natyrshëm, ndërsa për donatorët ofron edhe kompensim financiar.

Sipas Donatesperm.com, në botë donatorët e spermës mund të përfitojnë deri në 1,400 dollarë në muaj, plus 300 dollarë shtesë për raste të suksesshme, varësisht nga frekuenca e vizitave dhe kohëzgjatja e angazhimit në program.

Gjatë fazës së përzgjedhjes, kandidatët mund të marrin një bonus një herë pas pranimit në program, ndërsa pagesa zakonisht bëhet përmes çekut apo formave të tjera të rimbursimit.

Donatorëve u kërkohet zakonisht të paraqiten në klinikë të paktën dy herë në javë për një periudhë minimale prej rreth gjashtë muajsh, ndërsa shuma totale e përfituar varet nga numri i dhurimeve dhe cilësia e tyre.

Megjithatë, theksohet se për shumë donatorë, motivi kryesor mbetet ndihma për çiftet që dëshirojnë të krijojnë familje.

Së fundi, në Kosovë ish banorja e BBVK-së, Xhuliana Nura ka ndjekur trajtim me IVF (fertilizim in vitro), duke realizuar endrrën për t’u bërë nënë vetushqyese.

Në hapësira ku gjithçka ndahet me të tjerët, një veprim i pakujdesshëm mund ta prishë gjithë atmosferën

Lundrimi turistik është një nga mënyrat më të këndshme të udhëtimit, por qëndrimi në anije ka edhe rregullat e veta të sjelljes. Hapësira është e kufizuar, njerëzit vijnë nga kultura të ndryshme dhe qëndrimi në një ambient të përbashkët kërkon pak më shumë kujdes sesa në tokë. Respektimi i rregullave bazë të mirësjelljes në anije nuk nënkupton kufizime të rrepta, por thjesht respekt për udhëtarët e tjerë, për ekuipazhin dhe për hapësirën ku ndodheni.

Respektoni hapësirat e përbashkëta dhe udhëtarët e tjerë

Në anije, shumica e hapësirave dhe shërbimeve ndahen me udhëtarët e tjerë – nga vendet për rrezitje, deri te restorantet dhe pishinat. Prandaj është e rëndësishme të keni kujdes për sjelljen në hapësirat e përbashkëta.

Mos i lini gjërat personale për orë të tëra në shezlongë nëse nuk i përdorni. Në shumë anije, kjo konsiderohet sjellje e pahijshme, sepse udhëtarët e tjerë mund të mbeten pa vend për t’u ulur. Gjithashtu, shmangni bisedat me zë të lartë ose dëgjimin e muzikës pa kufje, sidomos në hapësirat më të qeta të pushimit.

Rregulli në restorante dhe në bufetë

Një nga rregullat më të rëndësishme të mirësjelljes gjatë një lundrimi turistik lidhet me ushqimin. Në bufetë vlen një parim i thjeshtë: merrni vetëm aq sa mund të hani dhe, nëse keni nevojë, mund të ktheheni sërish për të marrë më shumë.

Mos e prekni ushqimin me duar dhe mos i ktheni në tabaka ushqimet që tashmë i keni marrë. Nëse jeni duke pritur në radhë, tregohuni të durueshëm dhe të kujdesshëm ndaj të tjerëve. Në anije shpesh shërbehet një numër i madh njerëzish brenda një kohe të shkurtër, ndaj sjellja e rregullt ndihmon që gjithçka të funksionojë më lehtë.

Respektoni ekuipazhin e anijes

Ekuipazhi i anijes bën një punë intensive dhe të përgjegjshme për ta bërë udhëtimin të sigurt dhe të këndshëm. Mirësjellja dhe durimi ndaj stafit janë pjesë themelore e qëndrimit të duhur në anije.

Nëse keni ndonjë kërkesë ose problem, drejtohuni qetësisht dhe qartë. Të bërtiturit ose shfaqja e padurimit konsiderohen sjellje të papërshtatshme. Po ashtu, në shumë udhëtime me anije turistike bakshishet janë pjesë e kulturës dhe e pritshmërive, prandaj është mirë të informoheni paraprakisht për rregullat e kompanisë me të cilën udhëtoni.

Veshja dhe rregullat gjatë mbrëmjes

Në shumicën e lundrimeve turistike ka rregulla të ndryshme veshjeje, varësisht nga koha e ditës dhe hapësira ku ndodheni. Gjatë ditës, veshja zakonisht është më e lirshme, por në restorante, e sidomos në mbrëmje, shpesh pritet një paraqitje më e rregullt.

Nuk është e nevojshme të vishni rroba formale nëse kjo nuk kërkohet, por shmangni hyrjen në restorante me rroba banje ose pa bluzë. Në të ashtuquajturat mbrëmje formale, shumë udhëtarë zgjedhin të vishen më elegantë, gjë që i jep udhëtimit një atmosferë më të veçantë.

Higjiena dhe siguria në anije

Për shkak të numrit të madh të njerëzve në një hapësirë të mbyllur, higjiena është jashtëzakonisht e rëndësishme. Larja e rregullt e duarve dhe përdorimi i dezinfektuesve, të cilët shpesh vendosen në pjesë të ndryshme të anijes, ndihmojnë në parandalimin e përhapjes së baktereve dhe viruseve.

Gjithashtu, respektoni udhëzimet e sigurisë që jepen nga ekuipazhi, sidomos gjatë ushtrimeve të sigurisë dhe sqarimeve për evakuim. Edhe pse mund të duken si procedura rutinë, ato ekzistojnë për sigurinë tuaj.

Mirësjellja në kuvertë

Hapësira rreth pishinës dhe vendet për rrezitje shpesh janë pjesët më të gjalla të anijes, por edhe vendet ku mund të lindin më së shumti keqkuptime. Muzika e lartë, kërcimi në pishinë ose zënia e më shumë shezlongëve sesa ju nevojiten mund t’i bezdisë udhëtarët e tjerë.

Respektoni hapësirën personale të të tjerëve dhe kujdesuni për nivelin e zhurmës. Nëse udhëtoni me fëmijë, sigurohuni që ata të mos i shqetësojnë mysafirët e tjerë në hapësirat e qeta të pushimit.

Në fund, rregullat e mirësjelljes në anije nuk kanë të bëjnë me formalitete të tepruara, por me kujdesin ndaj të tjerëve. Pak mirësjellje, durim dhe respekt mjaftojnë që lundrimi turistik të jetë më i këndshëm për ju, për udhëtarët e tjerë dhe për njerëzit që kujdesen për udhëtimin tuaj.

Shumë prej nesh e kujtojnë autoshkollën mes mjegullës, si dhe maturën, udhëtimet e maturës dhe kohën kur nuk duhej të mendonim për shpenzimet e jetesës.

Pjesën më të madhe të njohurive i përsërisim çdo ditë në praktikë duke vozitur makinë, motor, kamion etj., por ndoshta edhe kemi harruar diçka. Prandaj ju pyesim për kuptimin e këtij shenje, e cila është e rrallë në rrugët tona, por mund të haset.

A e dini çfarë do të thotë kjo shenjë? Bëhet fjalë për një trekëndësh me skaj të kuq që tregon kryqëzim rrugësh me rëndësi të njëjtë.

Kjo është një shenjë paralajmëruese për një kryqëzim ku duhet t’u jepni përparësi automjeteve që vijnë nga ana e djathtë. Pra, kur e shihni këtë shenjë, duhet të jeni të kujdesshëm, sepse zbatohet rregulli i anës së djathtë.

Rregulli i anës së djathtë thotë se në një kryqëzim rrugësh me rëndësi të njëjtë, ose kur takohen dy automjete, shoferi është i detyruar t’i japë përparësi automjetit që vjen nga ana e djathtë e tij.

Gjithashtu, shoferi që kthen majtas duhet t’i japë përparësi automjetit që vjen përballë dhe vazhdon drejt ose kthen djathtas, përveç nëse shenjat e trafikut tregojnë ndryshe.

Si çdo rregull, edhe këto kanë përjashtime: në kryqëzim ose kur takoheni me një mjet që lëviz në shina, shoferi duhet t’i japë përparësi atij mjeti pavarësisht nga cila anë vjen, përveç nëse shenjat e trafikut përcaktojnë ndryshe.

Kur këndohet himni i Bosnje e Hercegovinës, lojtarët shpesh qëndrojnë në heshtje, jo në shenjë proteste, por sepse himni nuk ka tekst.

Arsyeja lidhet me ndarjet politike dhe etnike të pasluftës. Por, Bosnja nuk është rasti i vetëm në rajon: edhe Kosova, që nga shpallja e pavarësisë më 2008, ka një himn zyrtar pa fjalë, të zgjedhur si simbol i karakterit shumetnik të shtetit.

Në Evropë, edhe Spanja është ndër vendet e pakta me himn instrumental. Por, ndryshe nga Kosova dhe Bosnja, rasti i saj lidhet më shumë me historinë e himnit sesa me ndarjet e brendshme politike.

Japonia po përgatit rritjen më të madhe të tarifës së vizave në gati gjysmë shekulli, duke i bërë vizat turistike pesë herë më të shtrenjta për shumicën e vizitorëve të huaj që hyjnë në vend.

Vendimi u miratua në një mbledhje të kabinetit qeveritar më 19 qershor 2026 dhe do të hyjë në fuqi më 1 korrik 2026. Është rishikimi i parë i tarifave të vizave të Japonisë që nga viti 1978.

Ndikimi më i menjëhershëm do të ndihet nga turistët dhe udhëtarët e biznesit nga vendet që kërkojnë vizë për të hyrë në Japoni. Sipas strukturës së re të çmimeve, tarifa për viza me një hyrje do të rritet nga 3,000 ¥ në 15,000 ¥.

Një vizë me shumë hyrje, e cila u lejon udhëtarëve të vizitojnë Japoninë disa herë gjatë një periudhe të caktuar, do të rritet nga 6,000 ¥ në 30,000 ¥. Shumat janë ekuivalente me afërsisht 87 euro dhe 175 përkatësisht.

Zyrtarët japonezë thonë se rritja pasqyron gati pesë dekada inflacion dhe ndryshime të mëdha në kurset e këmbimit. Ministri i Jashtëm, Toshimitsu Motegi tha se qeveria i rishikoi tarifat sepse sistemi ekzistues nuk pasqyronte më koston e vërtetë administrative të lëshimit të vizave dhe menaxhimit të procedurave të imigracionit.

Qeveria argumenton se edhe pas rritjes, tarifat e imigracionit në Japoni mbeten përgjithësisht të krahasueshme me ato të ngarkuara nga disa vende perëndimore.

Zyrtarët kanë përmendur tarifat e vizave dhe imigracionit në vende si Shtetet e Bashkuara dhe Gjermania si shembuj të sistemeve që ngarkojnë dukshëm më shumë sesa ka pasur Japonia historikisht.

Pavarësisht rritjes së ndjeshme, Tokio thotë se nuk pret një ndikim të madh në turizmin hyrës. Japonia ka përjetuar një rritje rekord të vizitorëve ndërkombëtarë në vitet e fundit, të ndihmuar nga një jeni i dobët dhe kërkesa e fortë globale për udhëtime në destinacione të tilla si Tokio, Kioto dhe Osaka. Zyrtarët besojnë se kërkesa do të mbetet e fortë edhe me kosto më të larta të vizave.

Rritja e vizave është vetëm një pjesë e një pakete shumë më të madhe reformash të imigracionit. Më 29 maj, dhoma e lartë e Japonisë miratoi rishikime të Aktit të Kontrollit të Imigracionit dhe Njohjes së Refugjatëve. Legjislacioni i jep qeverisë autoritetin për të rritur ndjeshëm një gamë tarifash të lidhura me imigracionin përtej vizave turistike. Ligji rrit kufirin ligjor për ndryshimet e statusit të qëndrimit dhe rinovimin e vizave nga 10,000 ¥ (58 euro) në 100,000 ¥ (583 euro). Ai gjithashtu rrit tarifën maksimale të lejueshme për aplikimet për qëndrim të përhershëm nga 10,000 ¥ (58 euro) në 300,000 ¥ (1,750 euro). Tarifat aktuale do të përcaktohen më vonë përmes urdhrave të Kabinetit dhe procedurave të konsultimit publik.

Propozimet e qeverisë tregojnë se banorët afatgjatë mund të paguajnë përfundimisht midis 10,000 ¥ (58 euro) dhe 70,000 ¥ (408 euro), varësisht nga kohëzgjatja e rinovimit të statusit të tyre.

Aplikantët për qëndrim të përhershëm mund të përballen me një tarifë prej 200,000 ¥ (1,167 euro), një rritje dramatike nga tarifa aktuale prej 10,000 ¥ (58 euro). Këto ndryshime pritet të zbatohen para fundit të vitit fiskal 2026, më 31 mars 2027.

Autoritetet japoneze thonë se të ardhurat shtesë do të ndihmojnë në financimin e administrimit të popullsisë së huaj në rritje të vendit: numri i banorëve të huaj arriti një rekord prej 4.13 milionësh në fund të vitit 2025. Shërbimet e imigracionit kanë nevojë për më shumë staf, teknologji dhe infrastrukturë për të menaxhuar kërkesën në rritje.

Një pjesë e financimit të ri pritet të mbështesë programet e edukimit në gjuhën japoneze për banorët e huaj. Qeveria gjithashtu planifikon të forcojë masat kundër tejkalimit të paligjshëm të qëndrimit dhe të përmirësojë sistemet e përdorura për të ndjekur statusin e imigracionit dhe për të përpunuar aplikimet.

Legjislacioni gjithashtu krijon një program të ri autorizimi udhëtimi online të njohur si Sistemi Elektronik i Japonisë për Autorizimin e Udhëtimit, ose JESTA.

Ngjashëm me sistemet që përdoren tashmë në vende si Shtetet e Bashkuara dhe Mbretëria e Bashkuar, do t’u kërkojë udhëtarëve nga vendet e përjashtuara nga vizat të paraqesin informacion para nisjes. Sistemi pritet të lançohet në vitin fiskal 2028.

Sipas JESTA-s, udhëtarët nga 74 vende dhe territore të heqjes së vizave do të japin detaje të tilla si identiteti i tyre, qëllimi i udhëtimit dhe destinacioni para se të hipin në bord.

Autoritetet japoneze do ta kontrollojnë informacionin me bazën e të dhënave të imigracionit dhe krimit. Udhëtarëve që konsiderohen me rrezik të lartë për të tejkaluar afatin e qëndrimit mund t’u mohohet leja për të hipur në avionë ose anije që shkojnë në Japoni.

Pas mureve të një rezidence gjigante në periferi të Jerevanit, kryeqytetit të Armenisë, lëvizin tigra, luanë e madje edhe aligatorë. Brenda kompleksit gjenden gjithashtu dhjetëra kafshë të balsamosura, trofe gjuetie dhe dekorime luksoze që pasqyrojnë stilin ekstravagant të pronarit të tyre, biznesmenit dhe politikanit armen Gagik Tsarukyan.

Tsarukyan, një nga njerëzit më të pasur dhe më të debatueshëm në Armeni, ka vendosur të lërë një gjurmë të përhershme në historinë e vendit me një projekt ambicioz: ndërtimin e statujës më të lartë të Jezus Krishtit në botë.

Monumenti, që do të arrijë lartësinë 101 metra, është planifikuar të ngrihet në malin Hatis, rreth 25 kilometra në lindje të Jerevanit. Për shkak të pozicionit të tij, ai do të jetë i dukshëm nga pjesa më e madhe e kryeqytetit armen.

Sipas Tsarukyanit, statuja do të bëhet simboli i ri i Armenisë.

“Kjo do të jetë kartolina e Armenisë. Krishtërimi do të bëhet marka jonë e re”, deklaroi ai gjatë një interviste në fshatin Arinj, vendlindjen e tij.

Biznesmeni, i cili në të kaluarën ka qenë sportist dhe kampion në mundje krahu, ndërtoi pasurinë e tij në sektorët e lojërave të fatit, alkoolit dhe minierave gjatë viteve të vështira që pasuan shpërbërjen e Bashkimit Sovjetik. Ai thotë se projekti synon të tërheqë jo vetëm besimtarët, por edhe turistë nga e gjithë bota. Madje ai ka deklaruar se shpreson që monumenti të vizitohet nga rreth 10 milionë turistë në vit.

“Ne jemi kombi më i vjetër i krishterë në botë. Ka kuptim që të kemi statujën më të madhe të Jezusit në botë”, shprehet ai.

Megjithatë, projekti ka hasur në kundërshtime të forta.

Kisha Apostolike Armene është shprehur vazhdimisht kundër ndërtimit të monumentit, duke argumentuar se përmasat dhe stili i tij nuk përputhen me traditat fetare dhe arkitekturore të Armenisë.

Përfaqësuesit e kishës theksojnë se identiteti i krishterë armen është shprehur historikisht përmes manastireve, kishave dhe kryqeve prej guri të gdhendur, të njohura si “khachkar”, dhe jo përmes statujave gjigante.

Edhe ambientalistët kanë ngritur shqetësime, duke paralajmëruar se ndërtimi mund të dëmtojë peisazhin natyror të malit Hatis.

Por Tsarukyan i ka hedhur poshtë këto kritika. Ai thotë se ka marrëdhënie të mira me Kishën Apostolike Armene dhe kujton se ka financuar ndërtimin e tetë kishave në vend.

Në këtë fazë, monumenti nuk është ende përfunduar. Pjesët e statujës po montohen në një kantier pranë Jerevanit, ndërsa më pas do të transportohen në majën e malit.

Fillimisht ishte planifikuar që segmentet e monumentit të transportoheshin me helikopter, por ideja u braktis për shkak të vështirësive logjistike. Tani ato do të ngjiten në mal me kamionë dhe do të montohen në vend.

Ndërkohë, ambiciet e Tsarukyanit nuk ndalen vetëm te statuja e Jezusit.

Ai ka nisur edhe një tjetër projekt gjigant: ndërtimin e një Arke të Noes. Sipas planit, struktura do të jetë 134 metra e gjatë, 24 metra e gjerë dhe 18 metra e lartë. Në të do të ndërtohen një muze, një hotel dhe një kafene.

“Kjo është mënyra ime për të hyrë në histori. Dua që këto projekte të mbeten për brezat që do të vijnë”, thotë ai.

Ndërsa puna vazhdon, opinioni publik në Armeni mbetet i ndarë.

Disa e shohin monumentin si një mundësi për të promovuar vendin në arenën ndërkombëtare dhe për të tërhequr turistë, ndërsa të tjerë e konsiderojnë atë një projekt të tepruar dhe pa lidhje me traditën fetare të vendit.

Për momentin, statuja më e madhe e Jezusit në botë mbetet ende në ndërtim, ndërsa debati rreth saj vazhdon.