Një ekspozitë e re kushtuar piktorit të famshëm holandez Vincent van Gogh është hapur në Galerinë Kombëtare në Londër, duke sjellë për publikun një koleksion të gjerë veprash të artistit.
Ekspozita përfshin disa nga pikturat dhe skicat më të njohura të Van Gogh, si dhe dokumente që tregojnë zhvillimin e stilit të tij artistik gjatë viteve të fundit të jetës.
Organizatorët kanë bërë të ditur se ekspozita do të qëndrojë e hapur për vizitorët deri në verën e këtij viti.
Ngjarja pritet të tërheqë mijëra turistë dhe studiues të artit nga vende të ndryshme të botës.
Në Bibliotekën Kombëtare të Kosovës do të hapet më 13 mars, nga ora 19:00, ekspozita me titull “Butësia kontrollon fortësinë”, e realizuar nga artistet vizuale Anaïs Horn dhe Verena Walzl, ndërsa e kuruar nga Blerta Hoçia.
Hapja solemne do të mbahet në hollin e ekspozitave të Bibliotekës Kombëtare, duke sjellë para publikut një projekt artistik që ndërthur qasje bashkëkohore të artit vizual dhe reflektime mbi raportin mes butësisë dhe forcës.
Ekspozita do të qëndrojë e hapur për vizitorët deri më 15 maj 2026, duke u ofruar të interesuarve mundësinë të njihen nga afër me punimet e dy artisteve dhe konceptin kuratorial të projektit.
Filmi horror Sinners ka fituar çmimin për Skenarin më të Mirë Origjinal në Writers Guild of America Awards 2026, duke u konsideruar tashmë një nga favoritët kryesorë për sezonin e çmimeve dhe për Academy Awards.
Ceremonia e ndarjes së çmimeve u zhvillua më 8 mars në New York City. Çmimi u pranua nga aktori Miles Caton në emër të skenaristit dhe regjisorit Ryan Coogler, i cili kishte dërguar një mesazh falënderues për organizatorët.
Në kategorinë e Skenarit më të Mirë të Adaptuar, çmimi shkoi për filmin One Battle After Another. Skenari është shkruar nga regjisori i njohur Paul Thomas Anderson. Meqenëse ai nuk ishte i pranishëm në ceremoni, çmimin e pranoi aktorja Shayna McHayle, duke lexuar edhe deklaratën e përgatitur nga autori.
Në kategoritë televizive, seriali dramatik The Pitt ishte ndër fituesit kryesorë, duke marrë disa çmime, përfshirë serialin më të mirë dramatik, serialin më të mirë të ri dhe dramën më të mirë. Ndërkohë, The Studio u shpall seriali më i mirë komedi, ndërsa Dying for Sex fitoi çmimin për mini-serialin më të mirë.
Ngjarja u moderua nga komediani Roy Wood Jr. dhe u zhvillua në sallën Edison në New York. Ceremonia u mbajt në një atmosferë të veçantë pasi ndodhi gjatë një greve të stafit të Writers Guild of America West, e cila çoi në anulimin e eventit të planifikuar në Los Angeles.
Gjatë fjalës së tij, Roy Wood Jr. theksoi rëndësinë e njohjes së punës së skenaristëve dhe inkurajoi krijuesit të vazhdojnë të sjellin histori që shtyjnë kufijtë e tregimit në film dhe televizion.
Këngëtarja me origjinë shqiptare Dua Lipa pritet të zgjerojë edhe më tej karrierën e saj në industrinë e filmit. Sipas burimeve nga Hollywood, artistja është në bisedime për një rol në një projekt të ri kinematografik që mund të nisë xhirimet gjatë këtij viti.
Pas paraqitjes së saj në filmin shumë të suksesshëm Barbie, ku interpretoi personazhin “Mermaid Barbie”, emri i saj ka filluar të përmendet gjithnjë e më shumë në projekte filmike që ndërthurin muzikën dhe aktrimin.
Producentë të ndryshëm në Hollywood e shohin Dua Lipën si një figurë tërheqëse për projekte të mëdha, sidomos në zhanre që lidhen me filma muzikorë dhe komedi romantike.
Edhe pse detajet për projektin e ri nuk janë bërë ende publike, mediat e industrisë si Variety raportojnë se këngëtarja është duke shqyrtuar disa oferta të ndryshme për role të mundshme në filma që pritet të realizohen në të ardhmen e afërt.
Nëse marrëveshja finalizohet, ky do të ishte një tjetër hap i rëndësishëm për Dua Lipën në rrugëtimin e saj drejt Hollywoodit, duke dëshmuar se suksesi i saj po shtrihet përtej muzikës edhe në botën e kinemasë.
Aktorja amerikane Jennifer Runyon ka ndërruar jetë më 6 mars në moshën 65-vjeçare, pas një beteje të gjatë me kancerin. Lajmi për vdekjen e saj u konfirmua nga familjarët përmes rrjeteve sociale.
Runyon u bë e njohur për publikun për rolet e saj në filmin kult Ghostbusters dhe në serialin televiziv Charles in Charge, duke qenë një nga fytyrat e njohura të ekranit gjatë viteve 1980 dhe 1990.
Miqtë dhe kolegët e kanë kujtuar atë si një person të dashur dhe shumë pozitiv. Aktorja Erin Murphy e përshkroi Runyon si “një person të jashtëzakonshëm që do të mungojë shumë”, ndërsa vajza e saj, Bayley Corman, i dha lamtumirën me një mesazh emocional në rrjetet sociale.
Jennifer Runyon lindi më 1 prill 1960 në Chicago. Ajo ishte e martuar me trajnerin e basketbollit Todd Corman, me të cilin kishte dy fëmijë.
Karrierën e saj në aktrim e nisi në vitin 1980 me filmin To All a Good Night. Më pas ajo u shfaq në disa projekte të njohura si Up the Creek dhe në seriale televizive si The Fall Guy, Quantum Leap dhe A Very Brady Christmas.
Në vitin 2014, Runyon u tërhoq pjesërisht nga aktrimi për t’iu përkushtuar mësimdhënies. Megjithatë, ajo do të mbahet mend nga publiku si një nga aktoret e dashura të televizionit dhe filmit të periudhës së saj.
Edicioni i këtij viti i New York International Children’s Film Festival po vazhdon me projeksionet e tij në disa kinema dhe qendra kulturore në New York City, duke sjellë për publikun e ri një përzgjedhje të pasur filmash nga vende të ndryshme të botës.
Aktiviteti, që zhvillohet kryesisht në zonën e Manhattan, do të zgjasë deri më 15 mars dhe përfshin një program të larmishëm me filma të animuar, dokumentarë dhe filma artistikë të dedikuar për fëmijë dhe adoleshentë.
Organizatorët synojnë të ofrojnë përmbajtje cilësore për grupmoshat nga 3 deri në 18 vjeç, duke prezantuar histori kreative, edukative dhe frymëzuese nga kultura të ndryshme.
Shfaqjet zhvillohen në disa nga hapësirat më të njohura kulturore të qytetit dhe festivali konsiderohet një nga ngjarjet më të rëndësishme të pranverës për familjet dhe dashamirësit e kinemasë për fëmijë. Përveç filmave, programi përfshin edhe aktivitete interaktive dhe diskutime që synojnë të afrojnë më shumë të rinjtë me botën e kinemasë.
Edicioni i 79-të i Cannes Film Festival do të zhvillohet nga 12 deri më 23 maj në qytetin francez Cannes, duke rikthyer në një vend disa nga emrat më të njohur të industrisë së filmit.
Organizatorët kanë konfirmuar se juria e këtij viti do të drejtohet nga regjisori koreanojugor Park Chan-wook, një nga figurat më të vlerësuara të kinemasë bashkëkohore.
Një nga momentet më të rëndësishme të festivalit pritet të jetë ndarja e Palmës së Artë të Nderit për regjisorin nga Zelanda e Re Peter Jackson, i njohur në mbarë botën për trilogjinë ikonike The Lord of the Rings.
Lista zyrtare e filmave që do të garojnë për çmimin kryesor pritet të publikohet në fillim të muajit prill. Ndërkohë, producentë, distributorë dhe profesionistë të industrisë nga e gjithë bota kanë nisur përgatitjet për tregun e filmit që zhvillohet paralelisht me festivalin.
Prej dekadash, Festivali i Kanës konsiderohet një nga ngjarjet më prestigjioze të kinemasë botërore. Pikërisht në këtë skenë shpesh prezantohen premierat e disa prej filmave më të rëndësishëm të vitit dhe lindin projekte që më pas dominojnë sezonin e çmimeve në industrinë e filmit.
Festivali Ndërkombëtar i Teatrove – Prishtina International Theater Festival “Burbuqe Berisha” (PITF) ka hapur thirrjen për aplikime për edicionin e radhës që do të mbahet nga 18 deri më 23 maj 2026 në Prishtinë. Ky vit shënon një moment të veçantë për festivalin, pasi bëhet fjalë për edicioni jubilar të 10-të, një përvjetor që simbolizon një dekadë promovimi të artit skenik dhe bashkëpunimit ndërkombëtar në teatër.
Festivali organizohet nga Teatri AAB “Faruk Begolli” dhe fton teatrot profesionale, kompanitë teatrore, kompanitë e pavarura dhe format e tjera të prodhimeve teatrore që të aplikojnë për pjesëmarrje në programin e festivalit.
PITF ka karakter garues, ku shfaqjet do të vlerësohen nga një juri profesionale, si dhe nga dy juri të veçanta: juri e studentëve dhe juri e medias. Në kuadër të festivalit do të ndahen disa çmime kryesore, përfshirë Çmimin për aktorin ose aktoren më të mirë dhe Çmimin për shfaqjen më të mirë, ndërsa festivali nuk vendos kufizime për zhanrin e shfaqjeve.
Qëllimi i festivalit është të prezantojë projekte teatrore me cilësi të lartë nga e gjithë bota, si dhe të krijojë një hapësirë për shkëmbim idesh, përvojash dhe bashkëpunimesh të reja ndërkombëtare mes artistëve dhe institucioneve kulturore.
Të gjitha palët e interesuara mund të aplikojnë deri më 30 prill 2026 përmes formularit online:
Me edicionin jubilar të dhjetë, PITF synon të vazhdojë traditën e tij të sjelljes në Prishtinë të produksioneve teatrore nga vende të ndryshme të botës, duke e kthyer qytetin për disa ditë në një qendër të rëndësishme të dialogut artistik dhe kulturor.
Në emisionin “LIBERO” u diskutua gjerësisht për Gjeneratën Z, duke u ndalur te karakteristikat dhe prioritetet që e dallojnë këtë brez nga brezat e mëparshëm. Gjatë debatit u përmendën edhe disa fakte të bazuara në studime ndërkombëtare, të cilat tregojnë ndryshimet në mënyrën se si të rinjtë e kësaj gjenerate e shohin jetën, karrierën dhe marrëdhëniet.
Sipas këtyre studimeve, për Gjeneratën Z stabiliteti financiar është më i rëndësishëm se ndjekja e pasionit në karrierë. Të rinjtë e këtij brezi priren të kërkojnë siguri ekonomike dhe mundësi të qëndrueshme pune, duke e vendosur këtë si një nga prioritetet kryesore në jetën e tyre profesionale.
Gjithashtu, u theksua se Gen Z është më pak e interesuar për martesë të hershme krahasuar me brezat e mëparshëm. Shumë të rinj të kësaj gjenerate preferojnë të fokusohen fillimisht në arsimim, zhvillim personal dhe stabilitet financiar para se të marrin vendime të rëndësishme për jetën familjare.
Një tjetër veçori e theksuar ishte mënyra se si ky brez konsumon informacionin. Studimet tregojnë se Gen Z kalon më shumë kohë duke parë video sesa duke lexuar tekst, gjë që reflekton edhe ndikimin e madh të platformave digjitale dhe rrjeteve sociale në përditshmërinë e tyre.
Po ashtu, në emision u përmend se të rinjtë e Gjeneratës Z përdorin aplikacione për njohje dhe krijim marrëdhëniesh më shumë se çdo brez tjetër, duke treguar një ndryshim të qartë në mënyrën se si krijohen lidhjet dhe komunikimi ndërpersonal.
Pavarësisht këtyre ndryshimeve, një fakt tjetër i rëndësishëm është se Gen Z konsiderohet brezi më i arsimuar deri më tani. Akses i madh në informacion, mundësi më të shumta studimi dhe zhvillimi profesional kanë ndikuar që ky brez të ketë nivele më të larta arsimimi krahasuar me brezat e mëparshëm.
Diskutimi në “LIBERO” solli në vëmendje se Gjenerata Z po formëson një mënyrë të re të të menduarit dhe të jetesës, duke reflektuar ndryshimet sociale, ekonomike dhe teknologjike të kohës moderne.
Për ta dëgjuar diskutimin e plotë për këtë temë, klikoni në linkun e mëposhtëm:
Të shtunën nga ora 21:05 në emisionin “Infinity me Virusin”, mysafir ishte Denis Gafurri, agjenti i shitjes, me të cilin u zhvilluan shumë tema te ndryshme, duke filluar nga jeta personale e Denisit e deri tek ajo profesionale por edhe shumë më shumë…
Ndër këto temat që u folën, Denisi tregoi se ndër momentet më të mira për të është kur pjesmarrësit në trajnimet e tij, kanë sukses në qëllimet e tyre, të cilat ia vendosin ata vetës bashkë me Denisin.
Ai përmend nje shembull specifik dhe shumë motivues ku thotë se “Neve shumë shpesh na dergojnë foto t’makinës t’re, tu na thanë: “Faleminderit Denis, falë njohurive qe i kam marrë prej teje, e kam ble Mercedesin!”, ajo Zonja është Frizere” pastaj shton edhe “Tjetra ma dërgon Audi Q5 të ri në foto, ajo ka lulishte”…
Pra Gafuri pohon se sukses mund të kesh në secilën fushë e profesion, nëse i vë qëllimet e qarta vetës dhe biznesit apo produktit që do ta rrisësh!
