Osmani, Basha e Kurti bëjnë homazhe te Monumenti i Personave të Zhdukur
Presidentja e vendit, Vjosa Osmani, kryeparlamentari i ri Dimal Basha dhe kryeministri në detyrë, Albin Kurti, kanë bërë homazhe te Monumenti i Personave të Zhdukur, në shënim të Ditës Ndërkombëtare të të Zhdukurve me Dhunë.
Homazhe bënë edhe ambasadorë të akredituar në Kosovë, familjarë të të zhdukurve dhe qytetarë.
Forca e Sigurisë së Kosovës (FSK) ka njoftuar se nga data 31 gusht deri më 5 shtator 2025 do të zhvillojë ushtrimin fushor “Ujku Shigjetë”, në kuadër të përgatitjeve për validimin e Regjimentit të Tretë.
Gjatë kësaj periudhe priten lëvizje të konvojeve ushtarake nga vendbanimet e FSK-së drejt rajonit të Gjakovës, konkretisht në Aeroportin e Gjakovës dhe Poligonin ushtarak në Babaj të Bokës.
Njoftimi i plotë:
Njoftojmë gjithë qytetarët e Republikës së Kosovës, se nga data 31 gusht deri më 05 shtator 2025 ,Forca e Sigurisë së Kosovës do të realizoi ushtrimin fushorë “ Ujku Shigjetë”, në kuadër të përgatitjeve për validimin e Regjimentit të tretë.
Gjatë kësaj periudhe do ketë lëvizje të konvojeve nga vendbanimet e Forcës së Sigurisë së Kosovës në drejtim të rajonit të Gjakovës, saktësisht Aeroportit të Gjakovës dhe Poligonit ushtarak në Babaj të Bokës.
E gjithë kjo lëvizje do bëhet me qëllim të realizimit të ushtrimit, andaj kërkojmë mirëkuptim nga qytetarët./ATVLIVE/
Sot, në orën 23:59 përfundon afati 38 ditor për regjistrimin e votuesve jashtë Kosovës për votim me postë në Zgjedhjet Lokale për Kryetarë të Komunave dhe për Kuvende Komunale.
Ky lajm është bërë i ditur nga Zëdhënësi i KQZ-së, Valmir Elezi, i cili ka shtuar se deri në përfundim të ditës së sotme, shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës: (1) përmes platformës elektronike të KQZ-së https://diaspora.kqz-ks.org ose (2) përmes postës duke dërguar aplikimin në kutinë postare të KQZ-së në Kosovë.
Sipas Elezit, “vetëm shtetasit e Kosovës që janë regjistruar për votim nga jashtë vendit do të mund të votojnë përmes postës në periudhën e cila do të fillojë më 17 shtator dhe do të përmbyllet më 11 tetor 2025”.
Më tej, ai ka sqaruar se shtetasit e Kosovës që janë regjistruar për votim jashtë vendit, do të largohen nga Lista e Votuesve brenda në Kosovë.
“Është detyrim ligjor për KQZ-në që shtetasit e Kosovës që janë regjistruar për të votuar nga jashtë Kosovës, t’i largojë nga Lista e Votuesve brenda Kosovës e cila shpërndahet në vendvotime, në ditën e zgjedhjeve. Pra, një shtetas që regjistrohet për të votuar jashtë Kosovës, do ta gjejë emrin e tij për votim vetëm në Listën e Votuesve jashtë Kosovës”, sqaroi Elezi.
Por, çfarë ndodh me shtetasit që nuk regjistrohen për votim jashtë Kosovës?
“Shtetasit e Kosovës që jetojnë jashtë vendit dhe që nuk janë regjistruar për votim me postë, janë në Listën e Votuesve brenda Kosovës, e cila shpërndahet në vendvotime në ditën e zgjedhjeve. Të dhënat për adresën e Qendrës së Votimit mund të shikohen këtu: https://qv.kqz-ks.org”, ka sqaruar Elezi.
Kuvendi i Kosovës ka njoftuar se vazhdimi i seancës konstituive do të bëhet të shtunën nga ora 11:00.
Kryetari i Kuvendit, Dimal Basha, sot ndërpreu seancën pasi deputeti serb Nenad Rashiq nuk mori votat e nevojshme për t’u bërë nënkryetar nga minoriteti serb.
Ai e ndërpreu seancën me arsyetimin se Rashiq “ka gjasat më të mëdha” që të zë këtë pozitë meqë, sipas tij, mori më shumë vota sesa kandidatët tjerë të Listës Srpska.
Kjo e fundit s’ka marrë pjesë në votim meqë tha se zgjedhja me short, që u përcaktua nga Basha pasi i propozuari i Listës Srpska për nënkryetar, Slavko Simiq, s’mori votat për të tri herë radhazi nga Kuvendi, është jokushtetuese./ATVLIVE/
Kryetari i Aleancës për Ardhmërinë e Kosovës, Ramush Haradinaj, e ka konsideruar jokushtetuese ndarjen e votimit për zgjedhjen e nënkryetarëve të Kuvendit të Kosovës nga komunitetet joshumicë. Sipas tij, zgjedhja e nënkryetarëve nga komunitetet joshumicë është dashur të bëhet në pako.
Haradinaj i cili doli nga seanca e sotme para se të hidhen në votim kandidatët për nënkryetar të Kuvendit nga radhët e komunitetit serb, tha se Kurti qëllimshëm po tenton të vazhdojë zvarritjen e konstituimit të Kuvendit, në mënyrë që të vazhdojë të jetë si kryeministër në detyrë.
“Ne kemi ardhë në seancë që të zbatohet procedura e njohur. Ka ndodhur ndërhyrje në procedurë në mënyrën e votimit për kandidatët për Kryesi të Kuvendit nga komunitetet jo shumicë. Ndërhyrja në procedurë është jokushtetuese. Pra, ne kemi përvojë paraprake që na obligoi Gjykata Kushtetuese me u kthye në procedurë dhe që me respektu Rregulloren e Kuvendi. Është problem me u bë pjesë e kësaj loje në vazhdimësi. Qëllimi është vetëm me e humbë kohën me shkelje kushtetuese, qoftë edhe me rezultat jokushtetues në mënyrë që me i fitu edhe dy-tre muaj kohë që Kurti me vazhdu me mbetë ushtrues detyre i kryetarit të Qeverisë. Ai e ka në dorë ai po e bën këtë”, tha ai.
Ai adresoi kritika sërish për Lidhjen Demokratike të Kosovës dhe kryetarin e saj, Lumir Abdixhiku.
“Nuk ka fajësi Aleanca, me numrin e votave që ka i ka kryer detyrat e veta. I është drejtuar gjykatës dhe ka marrë veprimet e veta. Kanë fajësi ata që po vendnumërojnë dhe ata që janë bërë shkaktar që opozita të mos jetë e bashkuar dhe mos të kenë një shumicë të vetën”, tha Haradinaj.
Ndërkaq, për një hulumtim në bashkautorësi të kryetarit të ri të Kuvendit, Dimal Basha, i cili fliste kundër UÇK-së, Haradinaj tha se e ka thënë me kohë që Vetëvendosje s’i shërben agjendës së Kosovës.
“Sa i përket shkrimeve të Dimalit dhe atyre, ju e dini se qëndrimet i kam të qarta se nuk i shërbejnë agjendës së Kosovës këta njerëz, e kam deklaruar me kohë. Ka edhe shumë tjerë që në momente të caktuara kanë sulmuar UÇK-në, ju e dini sa i sulmuar kam qenë dhe jam kohë pas kohe. T’ju them të drejtën nuk më bëjnë shumë përshtypje këto më. Nuk mund të ankohemi pasi të ndodhë. Ne duhet më herët të marrim masat që të mos lejohen njerëz të tillë. P.sh pse të certifikohet dikush që ka thye një vlerë kombëtare. Është dashur herët këto procedura, pasi s’mund të thuash tash është deputet, po s’bën me qenë kryetar Kuvendi. Si i ka kaluar të gjitha këto procedurat ligjore”, tha ai./EO/
Deputeti i AAK-së, Bekë Berisha, ka folur për kritikat që janë drejtuar në adresë të kryetarit të Kuvendit, Dimal Basha, duke thënë se ato janë të padrejta dhe të papranueshme.
Berisha deklaroi se situata politike në të cilën gjendet Kosova po reflektohet edhe në reagimet e ndryshme që po bëhen kundër Bashës.
“Kjo çka ka ndodhë është rezultat, produkt, reflektim dhe monument i kësaj situate në të cilën gjendet Kosova sot. Tash që paska folë diçka kundër UÇK-së, goxha do njerëz kanë folë keq kundër UÇK-së. Tashti po dalin kundër Dimal Bashës, sikur po e mbrojnë UÇK-në” – tha Berisha.
Ai përmendi edhe deklaratat e disa figurave publike, përfshirë Mehmet Krajen dhe ish-kryeministrin Isa Mustafa, duke thënë se kërkesat e tyre për shkarkime janë të tepruara.
“Kqyreni çka ka folë ky Mehmet Kraja i Akademisë së Shkencave. Isa Mustafa që po thotë duhet me i shkarku krejt ata që e kanë zgjedh Bashën… Edhe Dimal Basha është qytetar i Kosovës edhe duhet me mbajt gojën pak, nuk duhet me bullizu deri në atë formë. Është deputet i zgjedhur i Kosovës” – u shpreh ai.
Ndërkohë, i pyetur nëse deputeti Adem Hoxha është pjesë e grupit parlamentar të AAK-së, Berisha u përgjigj shkurt:
“Herë është, herë nuk është. Në seancën e fundit nuk ke.”
Ka shkuar në 17 numri i të vdekurve si pasojë e sulmeve masive ruse mbi Kiev të enjten në mëngjes, kanë bërë të ditur autoritetet ukrainase.
Në mesin e të vdekurve janë katër fëmijë.
Rusia ka sulmuar me dronë dhe raketa në disa zona të Kievit, duke lënë po ashtu rreth 50 të plagosur.
Sulmet përveq dëmeve në njerëz, kanë shkaktuar edhe dëme të mëdha materiale, përfshirë dëmtimin e ndërtesës së Këshillit të Britanisë dhe po ashtu atë të delegacionit të BE-së në Kiev.
Për këtë arsye Komisioni Evropian ka njoftuar se do të thërras të dërguarin e Rusisë në BE.
Ndërkaq edhe ministria e Jashtme britanike ka bërë të ditur se ka thirru ambasadorin e Rusisë në Londër.
Kremlini ka deklaruar ndërkohë se ka sulmuar infrastrukturën ushtarake dhe ka shtuar se vazhdon të jetë i interesuar për bisedimet e paqes
Deputeti i Listës Serbe, Igor Simiq, ka deklaruar se është ndërprerë seanca konstituive e Kuvendit të Kosovës, pasi sipas tij, janë shkelur të drejtat themelore të popullit serb dhe dispozitat kushtetuese e rregullorja e Kuvendit.
“Është ndërprerë seanca, seanca konstituive e Kuvendit, siç e dini. Arsyeja është, para së gjithash, sepse po shkelen të drejtat themelore të njeriut të popullit serb, po shkelet rendi kushtetues, po shkelet edhe rregullorja në punën e Kuvendit. Ata janë të vetëdijshëm për atë që po bëjnë. Në seancën e kaluar disa herë kam biseduar me përfaqësuesin e Kuvendit, i kam tërhequr vërejtjen për lëshimet dhe për gjithçka që po shkelin. Po shkelin nenin 67, paragrafin 4 të Kushtetutës, po shkelin rregulloren e Kuvendit, nenin 12, paragrafin 6.1, i cili qartë thotë se nënkryetari, kushdo që kandidohet për vendin e nënkryetarit që i takon popullit serb, duhet të ketë mbështetjen e shumicës së deputetëve serbë,” ka thënë Simiq.
Ai ka theksuar se kandidati i Listës Serbe, Slavko Simiq, ka fituar mandat të ligjshëm me 12.355 vota dhe gëzon mbështetjen e nëntë nga dhjetë deputetët serbë, ndërsa ka akuzuar pushtetin se po synon vendosjen e Nenad Rašić në këtë post në kundërshtim me rregullat.
“Në këtë rast është zoti Slavko Simiq, i cili ka mandat të ligjshëm dhe legjitim të fituar në zgjedhjet demokratike dhe këtë rast e ka fituar me 12.355 vota. Për fat të keq, po shkelet rregullorja, po shkelen rregullat, gjithçka me qëllim që, falë mbështetjes së partisë në pushtet dhe regjimit të Albin Kurtit, në atë vend të vendoset Nenad Rashiq dhe këtë të gjithë duhet ta dinë mirë. Në kundërshtim me të gjitha rregullat, njëkohësisht duhet të dihet se ai Nenad Rashiq nuk ka mbështetjen as të deputetëve serbë, e as të popullit serb, sepse ka fituar më shumë se pesë herë më pak vota sesa që ka fituar kandidati Slavko Simiq,” është shprehur ai.
Deputeti i Listës Serbe ka njoftuar se partia e tij do të paraqesë ankesë në Gjykatën Kushtetuese.
“Dua t’ju njoftoj se Lista Serbe do të paraqesë ankesë në Gjykatën Kushtetuese, sepse rregullat janë shkelur. E shfrytëzoj rastin që t’i ftoj deputetët e partive të tjera shqiptare dhe të komuniteteve të tjera jo shumicë që të mos votojnë kundër një vendimi kushtetues,” ka theksuar Simiq.
Ai ka shtuar se Slavko Simiq gëzon mbështetjen e nëntë nga dhjetë deputetët serbë dhe se vendi i nënkryetarit i takon atij.
“Pra, edhe një herë, ne do të vazhdojmë me qëndrimin që është i qartë. Zoti Slavko Simić ka nëntë nënshkrime mbështetjeje nga dhjetë dhe e meriton atë vend. Ka edhe një gjë që duhet ta dini. Në momentin kur është zgjedhur nënkryetari i dytë që i takon një komuniteti jo shumicë, jo serb, gjithashtu është shkelur,” ka përfunduar deputeti i Listës Serbe./ATVLIVE/
Qendra Klinike Universitare e Kosovës ka njoftuar se në Klinikën Emergjente të QKUK-së, është pranuar një fëmijë 5-vjeçar nga fshati Brod, komuna e Shtërpcës, që sipas familjarëve është sulmuar nga një ujk dhe është tërhequr zvarrë disa metra nga oborri i shtëpisë.
Sipas njoftimit, ajo ka lëndime në gjoks dhe shpinë.
Gjendja e saj thuhet se është stabile, por se do të vazhdojë të trajtohet në QKUK.
“Pas pranimit në Klinikën Emergjente, ka marrë trajtimin e parë mjekësor dhe janë kryer ekzaminimet e nevojshme fillestare. Aktualisht, fëmija është pranuar dhe po merr trajtim në Klinikën e Kirurgjisë Torakale, ku gjendja vlerësohet stabile. Janë dhënë vaksinat, sipas protokollit, si dhe është konsultuar Psikologu Klinik për vlerësimin dhe mbështetjen e gjendjes emocionale të fëmijës. Pavarësisht gjendjes stabile, për arsye të monitorimit dhe mundësisë së ndryshimeve eventuale, pacientja do të qëndrojë për disa ditë në klinikë”, thuhet në njoftim.
Kryetari dhe deputeti i Partisë Demokratike të Kosovës, Memli Krasniqi, ka adresuar deklaratat e kryetarit të Lidhjes Demokratike të Kosovës, Lumir Abdixhikur, pasi ky i fundit i cilësoi si ‘’gabim trashanik’’ votat e PDK dhe AAK për zgjedhjen e Dimal Bashës si kryetar i Kuvendit.
Krasniqi ka thënë se do të ishte mirë që Abdixhiku dhe partia që ky i fundit drejton të bëhen pjesë e zhbllokimit.
‘‘Partitë politike funksionojnë ndamas. E mira kish me qenë edhe zoti Abdixhiku edhe LDK me qenë pjesë e zgjidhjes edhe pjesë e zhbllokimit’’, ka thënë ai.
Tutje, i pari i PDK-së ka përmendur si mundësi të mirë lutjen që ai ia ka bërë Abdixhikut për krijimin e një qeverie të ish-opozitës.
Krasniqi ka thënë se nëse kjo do të ndodhte atëherë pagat e pensionet do të rriteshin dhe se bizneset s’do të përballeshin me rritje të tarifave të energjisë.
‘‘Një mundësi ideale e kemi pas prej 10 shkurtit, të cilin e kom lut ‘’hajde e bojmë qeverinë e ish opozitës’. Deri tash ju garantojë që e kishit pas Bedri Hamzën kryeministër, dhe katër muajt e fundit i kishin pas qytetarët pagat e rrituna, pensionet e rrituna, nuk kish pas shanse me u rritë tarifat e energjisë 300% për bizneset, edhe shumë prej probleme tjera ishin zgjidh deri tash. Vendimet e partive politike janë individuale, por pastaj edhe përgjegjësia ndaj qytetarëve është individuale apo edhe grupore’’, ka thënë ai./ATVLIVE/