Shqipe Mehmeti-Selimi, deputete e Vetëvendosjes dhe bashkëshorte e Rexhep Selimit, vizitoi urën e re mbi lumin Ibër dhe përmes një postimi në Facebook theksoi se urat janë për të bashkuar brigjet.
“Urat janë për të bashkuar brigje, prandaj kjo urë e re do të duhej të pagëzohet: URA E BASHKIMIT”, shkroi ajo./ATVLIVE/
Derisa më 15 shtator mbrojtja e ish-presidentit Thaçi pritet të fillojë me paraqitjen e provave dhe dëshmitarëve të saj, zhvillimet e fundit në Gjykatën Speciale në Hagë tregojnë rolin vendimtar të Shteteve të Bashkuara të Amerikës. Përveç funksionit të tyre si vëzhgues, zyrtarë të SHBA-së do të jenë në gjykatore për të garantuar kushtet mbi të cilat dëshmitarët kyçë japin dëshmi, për të siguruar mbështetje shtesë për integritetin dhe transparencën e procesit gjyqësor, shkruan RTK.
Në procesin gjyqësor ndaj katërshes të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, nga 15 shtatori nis një fazë e re. Mbrojtja e ish-presidentit Hashim Thaçi pritet të fillojë me paraqitjen e provave dhe dëshmitarëve të saj.
Në rastin e mbrojtjes dhe paraqitjen e dëshmitarëve është paralajmëruar një zhvillim që do ta përcjellë këtë proces, dëshmitarët nuk do të jenë të rëndomtë, ata janë ish-zyrtarë të lartë të Shteteve të Bashkuara të Amerikës, që dëshmitë e tyre do të përcillen nga përfaqësues të Qeverisë së Shteteve të Bashkuara të Amerikës në sallën e gjyqit.
Më 18 gusht, avokatët e ish-presidentit Hashim Thaçi morën miratimin nga Shtetet e Bashkuara të Amerikës për dëshminë e dëshmitarit të koduar “1DW-003”. Për Trupin Gjykues, identiteti i tij është zbuluar, por ende jo për publikun.
Zyrtarët amerikanë kanë vendosur disa kushte për mënyrën se si ky dëshmitar do të japë dëshminë e tij, duke përfshirë :
Prezencën e përfaqësuesve amerikanë gjatë marrjes në pyetje;
Kufizimin e pyetjeve të drejtpërdrejta vetëm në temat e përcaktuara;
Kufizimin e pyetjeve të kryqëzuara në fushën e pyetjeve të drejtpërdrejta;
Mundësinë që dëshmitari të refuzojë pyetje për arsye konfidencialiteti.
Avokati Luka Misetiq njoftoi se një kërkesë zyrtare për këto masa do të paraqitet sa më shpejt të jetë e mundur.
Sipas dokumentit të avokatit të Hashim Thaçit, Luka Misetiq, SHBA-ja ka kufizuar fushën e pyetjeve që mund t’i bëhen dëshmitarit, kanë lejuar refuzimin e përgjigjeve për arsye konfidencialiteti, si dhe kanë kërkuar të jenë vetë prezentë gjatë marrjes në pyetje.
Në të njëjtën kohë, mbrojtja e Thaçit ka konfirmuar se është në pritje të miratimit edhe për katër dëshmitarë të tjerë. Për “W04174” tashmë është dhënë drita e gjelbër nga amerikanët, ndërsa për “1DW-007” dhe “1DW-008” po vazhdojnë diskutimet. Miratimi për “1DW-010” mbetet ende i bllokuar.
Këto zhvillime theksojnë rolin kyç të Shteteve të Bashkuara të Amerikës në procesin e Gjykatës Speciale në Hagë, jo vetëm si vëzhgues i jashtëm, por edhe si garantues i kushteve mbi dëshminë e dëshmitarëve kyçë. Një situatë e tillë siguron mbështetje shtesë ligjore dhe procedurale për integritetin e procesit.
Ish-komandanti NATO-s, Wesley Clark, ish-kryeadministratori i UNMIK-ut, Bernard Kouchner, ish-shefi i Misionit Vëzhgues në Kosovë, William Walker, si dhe zyrtarë të tjerë ndërkombëtarë.
Në gjykatore do të jenë dëshmitarë të thirrur nga ekipet e Jakup Krasniqit dhe Hashim Thaçit, kurse Kadri Veseli e Rexhep Selimi nuk kanë paraqitur asnjë emër.
Kuvendi i Kosovës nuk ka arritur të zgjedh nënkryetarin nga komuniteti serb.
Asnjëri nga 8 kandidatët që u tërhoqën me short, nuk ka arritur të zgjidhet nënkryetar i Kuvendit.
Pas kësaj, kryetari i Kuvendit, Dimal Basha ka mbyllur seancën, ndërsa tha se moszgjidhja e nënkryetarit nga komuniteti serb, nuk është pengesë që Kuvendi të vazhdojë punën e tij, transmeton Zeri.info.
“Janë ezauruar të gjitha opsionet për zgjedhjen e nënkryetarit të pesetë nga komuniteti serb, asnjëhrri nuk është zgjedhur nënkryetar. Ne si Kuvend nuk kemi mundësi tjetër se si të vazhdojmë, prandaj me këtë rast konsideroj që kemi ezauruar edhe pikën e 4 të rendit të ditës. Konsideroj se kjo seancë konstituive të mbyllet”.
“Konsideroj që moszgjidhjen e njërit nga 5 nënkryetarët, apo 6 anëtarët e kryesisë, nuk mund të bëhet pengesë që mund të bllokojë konstituimin e Kuvendit të Republikës së Kosovës”
“Konsideroj që Kuvendi i republikës sonë të vazhdojë punën siç parashihet me Kushtetutë”, tha Basha.
Ai njoftoi se do të mbajë një mbledhje me nënkryetarët e zgjedhur të hënën e ardhshme, për të vendosur si të vazhdohet tutje.
“Ndërkaq si të veprohet tutje si Kuvend, do t’i konsultojë anëtarët e kryesisë së Kuvendit në një mbledhje që do të mbahet të hënën në ora 13:00”, tha Basha
Eksperti i sigurisë, Fatmir Çollaku, ka deklaruar për KTV se moskonstituimi i Kuvendit të Kosovës mund të ketë pasoja edhe në sektorin e sigurisë, pavarësisht se gjendja aktuale nacionale dhe rendi kushtetues mbeten stabile.
Ai tha se aspekti operativ i Policisë dhe Agjencisë së Inteligjencës nuk pengohet, por theksoi se mungon mbikëqyrja parlamentare, e cila është e domosdoshme për raportime të rregullta dhe për menaxhimin e rasteve që mund të cenojnë sigurinë kombëtare.
Çollaku paralajmëroi se vonesat në formimin e institucioneve kanë pasoja shumëdimensionale – në zhvillim, politikë, diplomaci dhe siguri. Ai shtoi se rastet e fundit kriminale janë të pashmangshme si ngjarje sporadike dhe nuk e cenojnë seriozisht rendin kushtetues, por përfaqësojnë tregues të intensitetit të krimit.
Ai kritikoi gjithashtu liderët dhe institucionet që, sipas tij, japin deklarata për gjendjen e sigurisë pa u bazuar në verifikime të mirëfillta.
Policia e Kosovës ka kryer bastisje në shtëpinë e serbes A.M., që së bashku me të dashurin e saj, J.I, pjesëtar i forcave ajrore kroate, u arrestuan në Kroaci nën akuza për spiunazh për Serbinë. Zëvendësdrejtori i Policisë së Kosovës për rajonin e Veriut, Veton Elshani, i tha Radios Evropa e Lirë se bastisjet u kryen më 27 gusht rreth orës 20:00, pas publikimit të informacioneve se A.M., ishte arrestuar në Kroaci. Elshani tha se menjëherë autoritetet kosovare kanë verifikuar adresën e të dyshuarës A.M., në Mitrovicë të Veriut.
“Kemi gjetur lokacionin e shtëpisë, kemi pranuar informacione se në atë shtëpi mund të ketë armë, kemi hyrë kemi bastisur këtë shtëpi, kemi gjetur një sprej, disa gëzhoja, fishekë dhe jemi larguar nga ai vend”, u shpreh Elshani. Sipas Elshanit, autoritetet e Kosovës janë në koordinim të ngushtë me autoritetet kroate për këtë rast. Më 28 gusht, Prokuroria e Qarkut në Split njoftoi se ndaj të dyshuarve ka caktuar masën e paraburgimit. Sipas medias kroate, Index, J.I., që në Kosovë ka shërbyer në kuadër të misionit paqeruajtës të NATO-s, KFOR, i ka dhënë informacione konfidenciale partneres së tij, të cilat ajo më pas ua ka përcjellë anëtarëve të Listës Serbe.
Lista Serbe është partia kryesore e serbëve në Kosovë, që gëzon mbështetjen e Beogradit zyrtar. Transmetuesi publik kroat, HRT ka raportuar se sipas informacioneve joyzrtare A.M., dyshohet se për tre vjet ka mbledhur informacione konfidenciale nga partneri i saj, piloti kroat, i cili i kishte këto informacione për shkak të punës së tij si pjesëtar i kontigjentit kroat të KFOR-it. Këto informacione lidhen, për shembull, me lëvizjet dhe planet e KFOR-it. Ndërkaq, NATO-ja ka thënë për Radion Evropa e Lirë se trajton me “seriozitet” pretendimet se piloti kroat ka zbuluar tek e dashura e tij informacione për lëvizjet e serbëve në veri, si dhe të pjesëtarëve të këtij misioni. “Ne i marrim shumë seriozisht këto pretendime. Siguria e personelit të KFOR-it dhe integriteti i informacionit të klasifikuar janë parësore”, ka deklaruar më herët një zyrtar i NATO-s për Radion Evropa e Lirë. Lidhur me këtë rast, Radio Evropa e Lirë ka kontaktuar edhe Ministrinë e Mbrojtjes të Kroacisë. Por, ky institucion iu referua komunikatës së Prokurorisë së Qarkut në Split lidhur me paraburgosjen e të dyshuarve. Ndërkaq, mediat në Kroaci aluduan se në hetimet për këtë rast është përshirë edhe EUROPOL-i. Por, një zëdhënës i këtij institucioni ka konfirmuar për Radion Evropa e Lirë se kjo agjenci e Bashkimit Evropian për Zbatim të Ligjit nuk është përfshirë në hetimet për këtë rast. Pas publikimit të lajmeve për arrestimin e dy të dyshuarve për spiunazh për Serbinë, nga Qeveria në detyrë e Kosovës kanë shprehur gatishmëri që të bashkëpunojnë me autoritetet kroate për këtë rast, pasi “veprimtaria e të arrestuarve është zhvilluar në Kosovë”. Deputeti i Listës Serbe, Igor Simiq, tha më 28 gusht se as ai dhe as ndonjë eksponent tjetër i Listës Serbe nuk e njeh A.M., duke mohuar që ndokush prej tyre të ketë pasur lidhje me të.
Ministri në detyrë i Kulturës, Hajrulla Çeku, ka njoftuar se ka filluar restaurimi i Xhamisë së Burojës, e ndërtuar më 1722 dhe e cilësuar si një nga më të vjetrat në Drenicë.
Ai ka bërë të ditur se për restaurimin e saj janë ndarë mbi 400 mijë euro.
“Xhamia e Burojës, e ndërtuar më 1722, një nga më të vjetrat në Drenicë po restaurohet. Ajo ishte vatër e patriotizmit të Mulla Ilaz Brojës, shkollë shqipe dhe më vonë bazë e UÇK-së ku ruheshin armët për luftën çlirimtare. E granatuar nga forcat serbe më 1999, xhamia ishte në gjendje të rënduar. Për restaurimin e saj kemi ndarë mbi 400 mijë euro, ndërsa pas restaurimit do të bëhet muzealizimi, një hapësirë ku historia, besimi dhe rezistenca bashkohen për brezat që vijnë”, ka deklaruar Çeku.
Seanca konstituive e Kuvendit të Kosovës do të vazhdojë sot, duke filluar nga ora 11:00. Kjo do të jetë përpjekja e 60-të me qëllim të kompletimit të konstituimit të legjislaturës së nëntë të Kuvendit.
Seanca konstituive sot do të vazhdojë në tentimin e radhës për të zgjedhur nënkryetarin e pestë të Kuvendit, pozicion që i takon komunitetit serb të përfaqësuar në Kuvend.
Në dy seancat e fundit, atë të 26 gushtit, kur u zgjodh kryetari dhe katër nënkryetarët, dhe në seancën e 28 gushtit, dështoi zgjedhja e nënkryetarit të komunitetit serb.
Lista Serbe, si parti me 9 deputetë, ka insistuar në emrin e Slavko Simiqit për këtë pozitë. Emri i tij doli për votim tri herë, por nuk mori votat e mjaftueshme. Derisa Lista Serbe kishte të vetmin emër Slavko Simiqin, kryekuvendari Basha sqaroi se ai nuk mund të dilte më në votim bazuar në aktgjykimin e ri të Kushtetueses.
Bazuar në Rregulloren e Kuvendit të Kosovës, kryetari i Kuvendit vendosi që zgjedhja e nënkryetarit serb të bëhej përmes shortit, por as me këtë formë nuk arriti të zgjidhej ai.
Në garë për nënkryetar në dy seancat e fundit ishte edhe Nenad Rashiq, i cili e propozoi vetën për këtë post dhe emri i tij u tërhoq edhe përmes shortit, por as ai nuk arriti të merrte votat e mjaftueshme. Nenad Rashiq ka vetëm edhe një mundësi, meqë ka dështuar dy herë të marrë këtë mandat.
Një ditë më parë, presidentja Vjosa Osmani kërkoi që urgjentisht të konstituohet Kuvendi dhe të zgjidhet Qeveria.
Kryeministri në detyrë, Albin Kurti, ende nuk i është përgjigjur ftesës së Prokurorisë Speciale për rastin e rezervave shtetërore përkundër që është i urdhëruar nga gjykata që të paraqitet atje.
Që të zbatojë këtë urdhër Kurtit i është kërkuar edhe përmes disa grafiteve që janë vendosur në disa pjesë të kryeqytetit e që duket se lidhen me këtë çështje.
“Albin dorëzohu në prokuori”, shkruhet në to.
Kurti refuzon të shkojë në Prokurori me arsyetimin se nuk dëshiron të bëhet “lajm botëror”, që kinse kryeministri po dyshohet për një rast korrupsioni.
Ai ka kërkuar që Prokuroria e Shtetit të shkojë te ai në zyre.
Sot, më 29 gusht 2025, shënohet 35-vjetori i një prej ngjarjeve më të rëndësishme në historinë e re të Kosovës – vizita e delegacionit të senatorëve amerikanë të kryesuar nga miku i madh i shqiptarëve, Senator Bob Dole.
Ky delegacion, që mbërriti në Prishtinë më 29 gusht 1990, përbëhej edhe nga senatorët John W. Warner, Jake Garn, Don Nickles, Alfonse D’Amato, Steve Symms dhe Connie Mack. Vizita e tyre u zhvillua në një periudhë të errët të shtypjes dhe mohimit të të drejtave themelore të shqiptarëve, duke u bërë një dritë shprese dhe një mesazh i fuqishëm se zëri i Kosovës po dëgjohej në botën demokratike.
Prania e senatorëve amerikanë i dha legjitimitet ndërkombëtar aspiratave të shqiptarëve për liri dhe vetëvendosje. Vizita e tyre përforcoi strategjinë e rezistencës paqësore të udhëhequr nga Presidenti historik Ibrahim Rugova dhe rriti besimin e qytetarëve të Kosovës në të ardhmen.
“Vizita e senatorëve amerikanë në Prishtinë ishte një dëshmi se demokracia amerikane dhe populli shqiptar ndajnë të njëjtat vlera të lirisë, paqes dhe drejtësisë,” u theksua sot në mesazhet përkujtimore.
Në këtë përvjetor u nënvizua edhe roli i pazëvendësueshëm i veprimtarëve shqiptarë në Shtetet e Bashkuara, si Jim Xhema, kongresmeni Joseph DioGuardi dhe shumë të tjerë, të cilët ngritën çështjen e Kosovës në qendrat vendimmarrëse të politikës amerikane. Përkushtimi i tyre bëri që Kosova të trajtohej në arenën ndërkombëtare si një çështje e drejtësisë dhe të drejtave të njeriut.
Në emër të Federatës Panshqiptare të Amerikës “VATRA” dhe të mbarë komunitetit shqiptar në SHBA, kryetari i saj, Dr. Elmi Berisha, shprehu mirënjohjen e thellë për Shtetet e Bashkuara të Amerikës, për senatorin Bob Dole dhe kolegët e tij, si dhe për të gjithë ata që ndihmuan që zëri i Kosovës të dëgjohej.
“Ky përvjetor na kujton se miqësia shqiptaro-amerikane është një lidhje historike dhe e pathyeshme – një aleancë që mbetet themeli i paqes, stabilitetit dhe demokracisë në rajonin tonë. Lavdi kujtesës së atyre që punuan për lirinë e Kosovës! Mirënjohje të përjetshme miqve tanë amerikanë,” u shpreh Berisha.
Deputeti i AAK-së, Lahi Brahimaj ka shpjeguar arsyet pse partia e tij nuk e mbështeti Nenad Rashiqin.
Ai theksoi se Rashiq nuk dallon nga përfaqësuesit e Listës Serbe.
“Po flitet shumë herë, se shumë njerëz kanë bërë dëme të mëdha ndaj UÇK-së, por edhe zoti Rashiq nuk është më i mirë se sa të tjerët nga Lista Serbe. Zoti Rashiq, është një serb që e keni parë para disa muajsh me ato përshëndetje me tre gishta” – ka thënë Brahimaj.