Author: N.T.

Arsenali merr një tjetër goditje të rëndësishme vetëm pak orë para ndeshjes së sotme ndaj Club Brugge në Ligën e Kampionëve. Mesfushori kyç Declan Rice është konfirmuar jashtë skuadrës për shkak të një sëmundjeje, duke e lënë ekipin e Artetës pa një nga lojtarët më të rëndësishëm në mesfushë.

Lajmi është bërë i ditur sot, ku raportohet se Rice është i sëmurë dhe nuk ka mundur të stërvitet me ekipin, duke mos qenë i gatshëm për sfidën e mbrëmjes.

Mungesa e tij shtohet listës së problemeve për Mikel Artetën, i cili tashmë po përballet me disa dëmtime dhe duhet të gjejë alternativa për një ndeshje vendimtare në fazën e grupeve të Ligës së Kampionëve.

Arsenali udhëton sonte në Belgjikë për t’u përballur me Bruggen, në një duel ku “Topçinjtë” synojnë të sigurojnë pikë të rëndësishme për vazhdimin e rrugëtimit evropian. Pa Rice në mesfushë, përgjegjësia bie mbi lojtarë si Jorginho, Partey ose Kai Havertz, varësisht zgjedhjes taktike të Artetës.

Ndeshja pritet të nisë me intensitet të lartë, ndërsa mungesa e Rice e bën misionin e Arsenalit edhe më të vështirë.

Kupa e NBA-së solli spektakël gjatë natës, ku Orlando Magic dhe New York Knicks siguruan biletat për gjysmëfinale pas dy paraqitjeve mbresëlënëse, duke treguar se janë seriozisht pretendentë për trofeun e ri të ligës më të fortë të basketbollit në botë.

 

Orlando realizoi surprizën e madhe të mbrëmjes duke mposhtur Miami Heat me rezultat 117:108, pavarësisht mungesës së yllit Franz Wagner.

Në skenë u ngjit Desmond Bane, i cili shpërtheu me 37 pikë, duke marrë mbi supe krejt ofensivën e ekipit dhe duke u shpallur heroi i padiskutueshëm i sfidës.

Edhe Jalen Suggs kontribuoi me 20 pikë, ndërsa Paolo Banchero, i rikthyer pas një lëndimi, realizoi 18 pikë të vlefshme për këtë fitore të madhe.

Miami u mbajt në lojë nga 20 pikët e Tyler Herro, si dhe 19 pikët e Bam Adebayo e Andrew Wiggins, por këto nuk mjaftuan për të shmangur eliminimin.

 

 

Në ndeshjen tjetër çerekfinale, New York Knicks treguan forcë dhe disiplinë duke mposhtur Toronto Raptors me shifrat 117:101.

Jalen Brunson ishte thjesht i pandalshëm me 35 pikë, duke udhëhequr Knicks drejt një fitoreje të sigurt.

Ndërkohë, Josh Hart shtoi 21 pikë, duke plotësuar një performancë të shkëlqyer ekipore.

Për Raptors, Brandon Ingram u përpoq t’i mbante gjallë shpresat me 31 pikë, por pa mundur të ndryshojë fatin e ndeshjes.

 

Tashmë gjithçka është gati për gjysmëfinalet, ku Orlando do të përballet me New York-un në një duel që premton intensitet, energji dhe basketboll të nivelit më të lartë.

Përballja tjetër do të përcaktohet nga fituesit e ndeshjeve të sotme: Oklahoma City – Phoenix dhe LA Lakers – San Antonio.

Kupa e NBA-së po sjell emocion pas emocioni, dhe gjysmëfinalet premtojnë edhe më shumë dramë dhe spektakël.

Trajneri i Juventusit, Luciano Spalletti, ka konfirmuar se ylli kosovar Edon Zhegrova do të jetë titullar në ndeshjen e nesërme kundër Pafos FC, në kuadër të Ligës së Kampionëve.

“Zhegrova do të luajë nga minuta e parë kundër Pafos FC. Ai është duke stërvitur shumë mirë”, deklaroi Spalletti në konferencën e sotme për media, duke konfirmuar plotësisht besimin e tij tek anësori kreativ.

Juventusi e pret sfidën me rëndësi të madhe, pasi kërkon të sigurojë pozitat në grup dhe të vazhdojë ecurinë pozitive në Evropë. Aktivizimi i Zhegrovës nga minuta e parë shihet si një sinjal i qartë se trajneri italian llogarit shumë te 25-vjeçari për të sjellë kreativitet dhe depërtim në krahë.

Ndeshja Juventus – Pafos FC zhvillohet nesër, në një duel ku “Zonja e Vjetër” synon vetëm fitoren, ndërsa Zhegrova kërkon të tregojë edhe një herë vlerën e tij në skenën më të madhe të futbollit evropian.

Lionel Messi vazhdon të dominojë edhe në Shtetet e Bashkuara. Superylli argjentinas është shpallur zyrtarisht MVP i MLS për sezonin 2025, duke e fituar këtë çmim për të dytin vit radhazi, një arritje që nuk e ka realizuar asnjë lojtar tjetër në historinë e ligës.

Messi pati një sezon spektakolar me Inter Miamin, duke regjistruar statistika mbresëlënëse, ku në 49 ndeshje ka shenuar 43 gola dhe ka bërë 28 asistime.

Këto shifra jo vetëm që e dërguan Inter Miamin drejt një sezoni të jashtëzakonshëm, por i siguruar Messit edhe dominim absolut në garën për lojtarin më të mirë të vitit.

Me këtë sukses, kapiteni i Argjentinës bëhet lojtari i parë ndonjëherë që fiton çmimin MVP në dy sezone të njëpasnjëshme, duke vulosur edhe një herë statusin e tij si një nga futbollistët më të mëdhenj të të gjitha kohërave, tani edhe në futbollin amerikan.

Messi pritet të jetë figura qendrore edhe në sezonin e ardhshëm, pasi Inter Miami synon të vazhdojë ngritjen dhe të luftojë për trofetë më të mëdhenj të MLS.

Sulmuesi belg Romelu Lukaku po afrohet drejt rikthimit në fushë pas ndërhyrjes kirurgjikale në këmb që e mbajti jashtë për disa muaj. Lukaku zhvilloi sot një seancë stërvitore individuale dhe u përshëndet shkurtimisht me gazetarët, duke thënë: “Shihemi së shpejti”.

Ylli i Napolit pritet të rikthehet në lojë para fundit të muajit dhe mund të debutojë në sezonin 2025–26 të Serie A kundër Udineses ose në gjysmëfinalen e Superkupës së Italisë ndaj Milanit. Ai nuk do të jetë i gatshëm për sfidën e së nesërmes në Ligën e Kampionëve ndaj Benficas, por sipas mediave italiane, mund të grumbullohet për njërën nga dy ndeshjet e ardhshme.

Lukaku u detyrua të operohej pas një dëmtimi serioz të këmbës gjatë një miqësoreje verore, gjë që çoi Napolin të aktivizonte Rasmus Hojlund nga Manchester United, duke kompletuar sulmin e skuadrës së re, ku më herët ishte transferuar edhe Lorenzo Lucca.

Në sezonin e tij të parë me Napolin, 2024–25, Lukaku shënoi 14 gola në 38 paraqitje, duke kontribuar në fitimin e Scudettos dhe duke u bërë një nga elementët kyç të skuadrës. Rikthimi i tij pritet të rrisë ndjeshëm forcën sulmuese të Napolit në këtë sezon.

FC Drenica ka konfirmuar sot emërimin e trajnerit gjerman Thomas Brdarić, vetëm pak ditë pas shkarkimit të ish-trajnerit Bylbyl Sokoli. Brdarić, ish-lojtar i Bundesligës dhe trajner me eksperiencë në disa kampionate evropiane, ka nënshkruar një kontratë afatgjatë dhe pritet të sjellë standarde të reja profesionale dhe një vizion modern në klubin kuqezi.

Klubi ka theksuar se kjo lëvizje shënon fillimin e një epoke të re për futbollin drenicas, duke u fokusuar jo vetëm te rezultatet e ekipit të parë, por edhe në zhvillimin e talenteve të rinj përmes akademisë dhe projekteve të tjera sportive. Projekti udhëhiqet nga presidenti Dr. Thomas Wüstefeld dhe nënkryetari Faton Seferi, të cilët synojnë të ndërtojnë një identitet të ri për klubin, që përfaqëson bashkimin e shpirtit drenicas me profesionalizmin gjerman.

Po ashtu, FC Drenica ka bërë thirrje për mbështetje të gjerë nga tifozët, institucionet dhe komuniteti lokal, duke theksuar se vetëm me bashkëpunim mund të realizohen objektivat ambicioze të klubit. Synimi i klubit është të rikthehet në majat e futbollit kosovar, të forcojë akademinë e futbollit, të zhvillojë brezat e rinj dhe të bëhet një shembull i profesionalizmit dhe modernizimit në rajon.

Me ardhjen e Thomas Brdarić, Drenica synon të ndërtojë një ekip konkurrues, të afrimit ndërkombëtar të klubit dhe të krijojë një vizion të qartë për të ardhmen.

E ardhmja e Karim Benzemas nuk lidhet më me një rikthim në futbollin evropian. Sulmuesi francez, një nga figurat më të mëdha të Real Madridit në dekadën e fundit, duket se do ta përfundojë karrierën e tij në Ligën Profesionale Saudite, ku tashmë ndihet plotësisht i adaptuar.

Sipas ish-futbollistit saudit Hamad Al-Montashari, Benzema ka nënshkruar tashmë një zgjatje kontrate për edhe dy vite me klubin e tij aktual, Al Ittihad, marrëveshje që pritet të zyrtarizohet brenda ditëve të ardhshme.

Ky rinovim konsiderohet si një lëvizje strategjike e klubit saudit, i cili kërkon të mbajë liderët kryesorë të ekipit, ndërsa paralelisht synon përforcime të reja gjatë afatit kalimtar të verës. Investimet e mëdha pritet të vazhdojnë, me qëllim që Al Ittihad të rrisë konkurrencën dhe të sfidojë dominimin e klubeve kryesore evropiane në arenën ndërkombëtare.

Benzema, i cili u largua nga Real Madridi në verën e vitit 2023 pas një periudhe të artë me klubin mbretëror, duket se e ka gjetur veten në Arabinë Saudite. Pavarësisht thashethemeve për rikthim në Evropë, sulmuesi francez ka zgjedhur të vazhdojë aventurën e tij në kampionatin saudit, që është duke u zhvilluar me shpejtësi dhe po tërheq emra gjithnjë e më të mëdhenj.

Me një karrierë të pasur në nivel evropian, Benzema tani po shkruan një kapitull të ri në Lindjen e Mesme, duke kombinuar suksesin e madh që pati në Evropë me sfidat dhe mundësitë e reja që i ofron futbolli saudit.

Federata e Volejbollit të Kosovës (FVK) ka zyrtarizuar sot pjesëmarrjen e Kombëtareve të Kosovës, si në konkurrencën e meshkujve, ashtu edhe atë të femrave, në CEV Ligën e Evropës 2026, një format i ri garues që shënon hapin e parë drejt kualifikimeve për Kampionatin Evropian 2028.

CEV ka prezantuar për herë të parë këtë sistem të ri, i cili sjell mënyra të reja të grumbullimit të pikëve, rrit më shumë konkurrencën dhe u jep mundësi shteteve në zhvillim të rritin prezencën e tyre në arenën ndërkombëtare.

Në kuadër të këtij formati, Kosova do të ketë nderin të organizojë xhiron e tretë si në konkurrencën e meshkujve, ashtu edhe tek femrat, duke sjellë në vend ndeshje të rëndësishme që mund të përcaktojnë renditjet dhe rrugëtimin drejt fazës së dytë të kualifikimeve në vitin 2027.

 

KALENDARI – MESHKUJT

Xhiro 1 – Letoni | 5–7 Qershor 2026

Pjesëmarrës: Letonia – Kosova – Rumania

Xhiro 2 – Estoni | 12–14 Qershor 2026

Pjesëmarrës: Estonia – Kosova – Austri

Xhiro 3 – Kosovë | 19–21 Qershor 2026

Pjesëmarrës: Kosova – Maqedonia e Veriut – Izrael

 

KALENDARI – FEMRAT

Xhiro 1 – Bosnje | 5–7 Qershor 2026

Pjesëmarrës: Bosnja – Kosova – Spanja

Xhiro 2 – Greqi | 12–14 Qershor 2026

Pjesëmarrës: Greqia – Portugalia – Kosova

Xhiro 3 – Kosovë | 19–21 Qershor 2026

Pjesëmarrës: Kosova – Hungaria – Mali i Zi

Rrugëtim i ri për volejbollin kosovar në arenën evropiane

 

Pjesëmarrja në CEV Ligën e Evropës 2026 konsiderohet një mundësi e artë për kombëtaret e Kosovës, të cilat synojnë të ndërtojnë përvojë, të grumbullojnë pikë të vlefshme dhe të hedhin hapa të rëndësishëm drejt ëndrrës së kualifikimit për EuroVolley 2028.

FVK ka theksuar se Kosova hyn në këtë format me ambicie të qarta dhe me vizion të fuqishëm për progres, duke synuar të rrisë konkurrencën dhe prezencën në skenën evropiane.

Ky format i ri pritet të sjellë më shumë barazi dhe hapësira zhvillimi për shtetet në rritje, duke e bërë pjesëmarrjen e Kosovës edhe më domethënëse në këtë kapitull të ri të volejbollit ndërkombëtar.

AC Milan është përballur me një goditje të rëndë gjatë ndeshjes së fundit kundër Torinos, ku sulmuesi kryesor Rafael Leao u detyrua të largohej para kohe për shkak të një problemi muskulor. Incidenti ndodhi në stadiumin “Olimpico Grande Torino”, në një mbrëmje ku Rossonerët fituan 3-2.

Leao pësoi lëndimin në momentin kur goditi topin me forcë nga skaji i zonës. Sulmuesi ndjeu menjëherë dhimbje të mprehta në kofshën e djathtë, u ndal, dhe pas pak çaloi drejt vijës anësore. Pavarësisht tentativës për të vrapuar disa hapa, portugezi kuptoi se nuk mund të vazhdonte.

Leao u ul në stol pa pritur as zëvendësimin, duke ndezur shqetësime të mëdha te stafi dhe tifozët. Në vend të tij u fut Samuele Ricci, ish-mesfushori i Torinos, i cili u aktivizua kundër ish-skuadrës së tij.

Pas ndeshjes, Leao u pa me një pako akulli të lidhur mbi zonën e aduktorëve në këmbën e djathtë, një sinjal që sugjeron një dëmtim muskulor potencialisht serioz. AC Milan pritet të kryejë ekzaminime të detajuara ditët e ardhshme për të përcaktuar shkallën e dëmtimit.

Lajmet nuk janë pozitive për skuadrën e Stefano Piolit, e cila tashmë po përballet me mungesën e Santiago Gimenez dhe rrezikon të humbasë edhe yllin e saj kryesor. Leao ka qenë vendimtar këtë sezon, me gjashtë gola dhe një asist mes Serie A dhe Kupës së Italisë.

Mungesa e tij, edhe për një periudhë të shkurtër, do të ndikojë ndjeshëm në fuqinë sulmuese të kuqezinjve, të cilët tashmë po luftojnë për të ruajtur pozicionet e para në kampionat.

AC Milan pritet të publikojë një njoftim zyrtar sapo të kryhen testet mjekësore.

Barcelona ka marrë një lajm të jashtëzakonshëm para fazës vendimtare të sezonit. Portieri gjerman Marc-André ter Stegen është rikthyer zyrtarisht në skuadrën e parë pas një mungese prej katër muajsh, duke i dhënë ekipit një shtysë të madhe në repartin defensiv.

Klubi katalanas ka konfirmuar se gardiani 31-vjeçar ka kaluar plotësisht fazën e rikuperimit dhe është i gatshëm t’i bashkohet grupit në stërvitje. Ter Stegen ishte jashtë fushave që nga nëntori, kur iu nënshtrua një ndërhyrjeje kirurgjikale në shpinë, e cila e detyroi të mungojë në disa prej ndeshjeve më të rëndësishme të Barcelonës.

Me kthimin e ter Stegen, trajneri Hansi Flick fiton stabilitet të madh në mbrojtje, duke qenë se portieri gjerman është një ndër figurat kyçe të skuadrës dhe lider i padiskutueshëm në vijën e fundit të fushës. Rikthimi i tij mund të ndikojë drejtpërdrejt në paraqitjet e Barcelonës në La Liga dhe në garat evropiane.

Në klub shpresojnë që forma fizike e portierit të rikthehet gradualisht, por rikthimi i tij në stërvitje është sinjal i qartë se koha e pritjes ka përfunduar dhe gjermani mund të jetë i gatshëm të luajë së shpejti ndeshjet zyrtare.

Rikthimi i ter Stegen ndaj skuadrës vjen si një injeksion besimi për Barcelonën, në një periudhë ku çdo pikë dhe çdo ndeshje ka peshë të madhe për objektivat sezonalë.