Author: N.T.

Golden State Warriors dhuruan një përmbysje spektakolare ndaj Los Angeles Clippers, duke triumfuar 126:121 në play-in e NBA, pasi rikuperuan një disavantazh prej 13 pikësh në çerekun e fundit.

Ndeshja dukej se po shkonte në favor të Clippers, të cilët kryesonin 98:85 në mesin e periodës së katërt. Por Warriors reaguan fuqishëm me një seri mbresëlënëse, duke përmbysur gjithçka në minutat vendimtare. Momenti kulmor erdhi 50 sekonda para fundit, kur Stephen Curry realizoi një treshe vendimtare, e shtata e tij në këtë sfidë, për t’i dhënë epërsinë ekipit të tij. Në të njëjtën kohë, mbrojtja e Warriors neutralizoi Kawhi Leonard, duke e mbajtur pa pikë në çerekun e fundit deri në sekondat e fundit.

Curry ishte i jashtëzakonshëm me 35 pikë, ku 27 prej tyre i realizoi vetëm në pjesën e dytë. Ai pati mbështetje të fortë nga Kristaps Porziņģis me 20 pikë dhe Al Horford, i cili goditi disa treshe vendimtare në momentet finale. Në anën tjetër, për Clippers u dalluan Bennedict Mathurin me 23 pikë, si dhe Leonard e Darius Garland me nga 21 pikë secili.

Warriors tani udhëtojnë drejt Phoenix Suns për një tjetër duel vendimtar, ku fituesi do të përballet me kampionët në fuqi, Oklahoma City Thunder, në raundin e parë të play-off-it.

Në Lindje, Philadelphia 76ers siguruan një vend në play-off pas fitores 109:97 ndaj Orlando Magic. Protagonist ishte Tyrese Maxey me 31 pikë, duke udhëhequr ekipin drejt vendit të shtatë. Paraqitje të shkëlqyer pati edhe i riu VJ Edgecombe me 19 pikë dhe 11 kërcime.

Pas një sezoni zhgënjyes një vit më parë, Philadelphia rikthehet fuqishëm, por tani përballet me një sfidë të madhe ndaj Boston Celtics, skuadër ndaj së cilës kanë humbur gjashtë seritë e fundit të play-off-it. Ndeshja e parë e kësaj serie zhvillohet të dielën në Boston.

Gara për Pichichi Trophy ka hyrë në fazën më të nxehtë të sezonit, me një duel të fortë mes Vedat Muriqi dhe Kylian Mbappé që po mban të hapur gjithçka deri në fund.

Sulmuesi i Real Madrid, Mbappé, aktualisht kryeson listën me 23 gola dhe konsiderohet favorit nga bastet për të rrëmbyer çmimin për të dytin vit radhazi. Megjithatë, pas tij qëndron shumë pranë Muriqi, ylli i RCD Mallorca, me 21 gola dhe në formë të shkëlqyer në javët e fundit.

Me edhe shtatë xhiro për t’u zhvilluar në La Liga, diferenca mbetet minimale dhe gjithçka mund të ndryshojë. Interesant është fakti se Mbappé nuk ka shënuar që nga fillimi i shkurtit, duke i dhënë më shumë shpresë rivalëve për ta kapur.

Në anën tjetër, Muriqi po kalon një moment fantastik, duke realizuar dopietë në fundjavë dhe duke hyrë në histori si golashënuesi më i mirë i klubit të tij në La Liga.

Në këtë garë përmendet edhe talenti i ri Lamine Yamal, por me gjasa më të vogla për të sfiduar dyshen kryesore.

Fundjava dhe javët e mbetura pritet të sjellin emocione të mëdha, teksa dy sulmuesit synojnë të lënë gjurmë dhe të kurorëzohen si më të mirët në elitën e futbollit spanjoll.

Atlético Madrid ka festuar në mënyrë të zjarrtë kualifikimin në gjysmëfinalet e UEFA Champions League, duke mos kursyer as ironinë në rrjetet sociale pas eliminimit të rivalit katalanas.

Menjëherë pas ndeshjes, klubi madrilen publikoi një seri postimesh me tone humoristike, duke përfshirë meme dhe mesazhe të shkurtra si “Jemi pikërisht tani”, “Epo, mirë” dhe “Si jeni”, që u shpërndanë gjerësisht për miliona ndjekësit e tyre.

Një nga postimet që mori më shumë vëmendje ishte një kolazh i lojtarëve të Atlético-s me syze dielli dhe kufje, i frymëzuar nga një foto e LeBron James, e cila më herët ishte përdorur në mënyrë simbolike nga Lamine Yamal.

Po ashtu, nuk mungoi as një postim ironik me një luan pranë logos së FC Barcelona, i cili në pamje të parë shfaqej si i fuqishëm, por më pas zbulohej si një qen, një tjetër thumbim i drejtpërdrejtë për katalanasit.

Atlético Madrid shfrytëzoi rastin edhe për të prekur sloganin historik të Barcelonës “Më shumë se një klub”, duke publikuar një video festimi me tifozët dhe lojtarët e vet, si kundërpërgjigje simbolike.

Klubi madrilen nuk la pa komentuar as polemikat para ndeshjes, pasi trajneri i Barcelonës Hansi Flick kishte shprehur pakënaqësi për gjendjen e barit në stadiumin Estadio Metropolitano. Në përgjigje, Atlético publikoi një mesazh ironik: “Na pëlqen aroma e barit të sapo kositur në mëngjes”.

Ndërkohë, ankesa e katalanasve drejt UEFA u hodh poshtë, duke i dhënë fund polemikave, ndërsa Atlético vazhdon festën me kualifikimin e madh në gjysmëfinale.

Kampionia olimpike dhe bartësja e parë, Distria Krasniqi, do të garojë këtë të enjte në Tbilisi të Gjeorgjisë, në ditën e parë të European Judo Championships 2026, ku synon një tjetër medalje në karrierën e saj të jashtëzakonshme.

Xhudistja kosovare hyn në këtë Evropian si favorite e madhe në kategorinë deri në 52 kilogramë, një divizion ku Kosova ka pasur dominim të gjatë. Krasniqi është një nga emrat më të mëdhenj të xhudos botërore, kampione olimpike në Tokio 2020 dhe nënkampione olimpike në Paris 2024, duke e konfirmuar vazhdimisht statusin e saj në elitën botërore.

Në Kampionatet Evropiane, ajo ka një bilanc mbresëlënës: medalje ari në 2021, 2024 dhe 2025, argjend në 2018 dhe 2023, si dhe bronz në 2020 dhe 2022. Forma e saj e qëndrueshme është një nga armët kryesore, pasi ka arritur medalje në 15 garat e fundit radhazi, shumica prej tyre me paraqitje në finale.

Në kategorinë deri në 52 kilogramë garojnë 24 xhudiste, ku ndër rivale kryesore për medaljen e artë vlerësohen Reka Pupp dhe Roza Gyertyas nga Hungaria, italiania Odette Giuffrida dhe francezja Amandine Buchard. Megjithatë, Krasniqi mbetet emri kryesor për t’u mposhtur në këtë kategori.

Në ditën e parë të Evropianit zhvillohen edhe kategoritë deri në 48 kg për femra dhe deri në 60 kg e 66 kg për meshkuj.

Në 48 kg, Kosovën e përfaqëson Erza Muminoviq, e cila po rikthehet pas një pauze dhe synon një paraqitje sa më të mirë, me kualifikimin në tetëshen më të mirë si rezultat të rëndësishëm.

Në 52 kg garon gjithashtu Fatjona Kasapi, e cila po rikthehet pas një dëmtimi të gjatë, por ka dhënë sinjale pozitive me vendin e shtatë në Grand Slamin e Parisit.

Të premten në garë hyjnë edhe Laura Fazliu në kategorinë deri në 63 kg, si dhe Akil Gjakova e Dardan Cena në 73 kg. Fazliu shihet si pretendente për medalje, ndërsa Gjakova, si bartës i pestë, pritet të ketë konkurrencë të fortë në një kategori shumë të ngarkuar me 41 garues.

Në Kampionatin e 75-të Evropian të xhudos marrin pjesë gjithsej 402 garues nga 46 shtete, duke e bërë këtë një nga edicionet më të forta në historinë e garës.

Real Madrid përballet sonte me një mision të vështirë në Mynih, teksa synon të përmbysë humbjen 2-1 nga ndeshja e parë dhe të sigurojë një vend në gjysmëfinalet e UEFA Champions League.

Megjithatë, përpara sfidës vendimtare ndaj Bayern Munich, madrilenët nuk kanë pasur një natë të qetë. Në orët e para të mëngjesit, pranë hotelit ku ishte akomoduar skuadra, janë ndezur fishekzjarre dhe mjete piroteknike, në një tentativë të tifozëve vendas për të prishur qetësinë dhe përqendrimin e “Los Blancos”.

Sipas raportimeve të gazetarëve spanjollë që ndodhen në Gjermani, shpërthimet e fuqishme kanë zgjuar lojtarët e Realit rreth orës 01:00, ndërsa forcat e sigurisë kanë reaguar menjëherë duke kërkuar autorët e incidentit. Ende nuk ka konfirmim nëse përgjegjësit janë identifikuar.

Pavarësisht kësaj situate, vëmendja tani zhvendoset te fusha, ku në Allianz Arena do të zhvillohet përballja e madhe që nis në orën 21:00. Fituesi i këtij dueli do të përballet në gjysmëfinale me Paris Saint-Germain, duke e rritur edhe më shumë peshën e kësaj nate vendimtare.

Liverpool FC është goditur rëndë nga një lajm shqetësues, pasi sulmuesi Hugo Ekitike pritet të mungojë rreth nëntë muaj për shkak të një dëmtimi serioz.

Futbollisti i kombëtares së Francës u largua me barrelë gjatë ndeshjes çerekfinale të UEFA Champions League kundër Paris Saint-Germain, duke ngritur menjëherë shqetësime për gjendjen e tij. Sipas raportimeve nga L’Équipe, 23-vjeçari ka pësuar këputje të tendinit të Akilit në këmbën e djathtë, një dëmtim që zakonisht kërkon kohë të gjatë rikuperimi.

Ekitike u rrëzua në dhimbje gjatë pjesës së parë të humbjes 2-0 ndaj PSG-së, ndeshje që përfundimisht vulosi eliminimin e Liverpoolit me rezultat të përgjithshëm 4-0. Lëndimi i tij detyroi një ndryshim të hershëm në formacion, me Mohamed Salah që u aktivizua më herët se sa ishte planifikuar.

Ky dëmtim i rëndë jo vetëm që i jep fund sezonit aktual të francezit, por gjithashtu e përjashton atë nga pjesëmarrja në Botërorin e kësaj vere dhe një pjesë të mirë të sezonit të ardhshëm, duke e kthyer investimin prej 69 milionë eurosh në një goditje të madhe për klubin anglez.

Lëndimi ndërpret një sezon debutues shumë premtues për ish-sulmuesin e Eintracht Frankfurt, i cili kishte realizuar 17 gola dhe 6 asistime në 45 ndeshje në të gjitha garat.

Mungesa e tij lë një boshllëk të ndjeshëm në repartin ofensiv të Liverpoolit, gjë që u pa qartë edhe ndaj PSG-së, ku skuadra nuk arriti të shënojë pavarësisht 21 goditjeve drejt portës, një statistikë negative që rikthen kujtimet e finales së humbur ndaj Real Madrid në vitin 2022.

Sonte rikthehet magjia e UEFA Champions League, me dy përballje të mëdha që do të vendosin emrat e fundit të gjysmëfinalistëve për sezonin 2025/2026.

Vëmendja kryesore do të jetë në Allianz Arena, ku Bayern Munich pret Real Madrid në një duel të zjarrtë. “Los Blancos” hyjnë në këtë sfidë me detyrën e vështirë për të përmbysur humbjen 2-1 nga ndeshja e parë në Santiago Bernabéu Stadium. Për madrilenët, kjo sfidë ka marrë përmasa “finaleje”, pasi shpresat për trofe në La Liga dhe Copa del Rey janë zbehur ndjeshëm.

Në Londër, në Emirates Stadium, Arsenal do të synojë të mbrojë epërsinë minimale 1-0 ndaj Sporting CP. Edhe pse “Topçinjtë” kanë pasur luhatje në Premier League, skuadra e Mikel Arteta mbetet favorite për të prerë biletën e gjysmëfinales.

Ndërkohë, dy emrat e parë që kanë siguruar një vend në katërshen më të mirë janë Atlético Madrid dhe Paris Saint-Germain, të cilat eliminuan respektivisht FC Barcelona dhe Liverpool FC.

Të dyja përballjet e sontme pritet të nisin në orën 21:00, duke premtuar spektakël dhe emocione deri në sekondën e fundit.

Basketbollistët e Portlandit siguruan një vend në play-offin e NBA-së pas një fitoreje dramatike 114:110 ndaj Phoenix-it.

Në një përballje plot ritëm dhe emocione, skuadra e udhëhequr nga fantastiku Deni Avdija dominoi në momentet vendimtare të fazës play-in. Avdija ishte protagonisti absolut i mbrëmjes me një paraqitje brilante prej 41 pikësh, të shoqëruara me 7 kërcime dhe 12 asistime, duke e çuar ekipin e tij drejt raundit të parë të play-offit, ku do të përballet me San Antonion. Kontribut të rëndësishëm dha edhe Jrue Holiday me 21 pikë, ndërsa në anën tjetër nuk mjaftuan 35 pikët e Jalen Green dhe 22 të Devin Booker.

Ndërkohë, një tjetër ndeshje spektakolare u zhvillua mes Charlotte dhe Miami, ku vendasit triumfuan me rezultat të ngushtë 127:126 pas kohës shtesë.

Heroi i mbrëmjes ishte LaMelo Ball, i cili realizoi koshin vendimtar vetëm 4.7 sekonda para fundit të vazhdimeve, duke i dhënë epërsinë ekipit të tij. Miami pati mundësinë e fundit për të përmbysur rezultatin, por tentativa e Davion Mitchell u ndal nga një bllokim vendimtar i Miles Bridges, duke vulosur kështu fitoren e Charlotte.

Me këtë sukses, Charlotte vazhdon garën në play-in dhe për një vend në play-off do të përballet me humbësin e ndeshjes mes Philadelphia dhe Orlando.

Kombëtarja e Kosovës në konkurrencën e femrave ka shënuar një fitore të rëndësishme në transfertë, duke mposhtur Bullgarinë me rezultat 3-1 në Sofje, në kuadër të kualifikimeve për Kampionatin Botëror.

Ndeshja nisi më mirë për vendaset, të cilat kaluan në epërsi që në minutën e 9-të me golin e Aleksandra Yanevës. Megjithatë, reagimi i “dardaneve” ishte i menjëhershëm dhe plot karakter. Kapitenia Erëleta Memeti barazoi shifrat në minutën e 15-të me një gol spektakolar direkt nga goditja e këndit.

Kosova vazhdoi me ritëm të lartë dhe vetëm gjashtë minuta më vonë arriti përmbysjen. Blerta Smaili realizoi një gol të bukur për 2-1, rezultat me të cilin u mbyll pjesa e parë.

Në pjesën e dytë, skuadra e drejtuar nga Sami Sermaxhaj tregoi pjekuri dhe kontroll të lojës, duke menaxhuar avantazhin deri në fund. Fitorja u vulos në minutën e 89-të, kur Arjeta Fejza shënoi për 3-1, duke i dhënë goditjen përfundimtare vendasve.

Me këtë sukses, Kosova vazhdon formën e shkëlqyer në Grupin 2, duke regjistruar tri fitore në po aq ndeshje dhe duke u renditur në krye të tabelës me 9 pikë. Kroacia dhe Bullgaria kanë nga 3 pikë, ndërsa Gjibraltari mbetet pa asnjë pikë.

Edhe pse nga Liga C nuk sigurohet kualifikimi direkt për në Kampionatin Botëror, vendi i parë në grup mbetet objektivi kryesor, pasi garanton pjesëmarrjen në play-off dhe ngjitjen në Ligën B për edicionin e ardhshëm të Ligës së Kombeve.

Federata e Futbollit e Kosovës ka shtuar presionin për përfundimin sa më të shpejtë të punimeve në stadiumin “Adem Jashari” në Mitrovicë, një projekt i rëndësishëm për infrastrukturën sportive në vend.

Përmes një reagimi publik, presidenti i FFK-së, Agim Ademi, i ka bërë thirrje Ministrisë së Sportit dhe Rinisë që të mos ketë më vonesa në këtë investim, duke theksuar nevojën urgjente për një stadium të dytë që plotëson standardet ndërkombëtare.

Aktualisht, Kosova ka në dispozicion vetëm stadiumin “Fadil Vokrri” për ndeshje ndërkombëtare, një situatë që sipas Ademit paraqet rrezik serioz nëse nuk gjenden alternativa.

Kjo çështje u diskutua edhe në takimin që Ademi zhvilloi me kryetarin e Komunës së Mitrovicës, Faton Peci, ku në fokus ishte ecuria e projektit të rinovimit.

Ademi theksoi se stadiumi “Adem Jashari” duhet të përfundojë sa më shpejt dhe të pajiset me licencë të UEFA-s si stadium i kategorisë së katërt, në mënyrë që të mund të presë ndeshje ndërkombëtare të nivelit të lartë.

Ai paralajmëroi se çdo neglizhencë apo shtyrje e mëtejshme mund ta detyrojë Kosovën të zhvillojë ndeshjet jashtë vendit, si për klubet ashtu edhe për përfaqësuesen.

Rinovimi i plotë i stadiumit kishte rifilluar në shkurt të vitit 2024, me një afat përfundimi prej 22 muajsh. Megjithatë, punimet kanë pësuar vonesa dhe, sipas gjendjes aktuale, nuk pritet të përfundojnë brenda afateve të parashikuara, duke shtuar shqetësimet për të ardhmen e ndeshjeve ndërkombëtare në vend.