Author: N.T.

Presidenti i FIFA-s, Gianni Infantino, ka vizituar dhomat e zhveshjes së Kombëtares së Iranit pas ndeshjes së parë të Kupës së Botës 2026, ku iranianët barazuan 2-2 me Zelandën e Re.

Kreu i futbollit botëror u takua me lojtarët dhe stafin teknik të Iranit, duke u dhënë mbështetje dhe duke vlerësuar paraqitjen e tyre në fushë. Infantino theksoi se skuadra tregoi karakter dhe se mesazhi i saj ka shkuar përtej rezultatit sportiv.

“E di që kjo ndeshje ishte e vështirë. Me pak më shumë fat mund të kishit marrë edhe fitoren, por ajo që treguat ishte pozitive. Po luani futboll të mirë dhe keni ende dy ndeshje përpara për të treguar edhe më shumë”, u shpreh Infantino.

Ai gjithashtu foli për situatën e vështirë me të cilën është përballur skuadra iraniane dhe vlerësoi forcën e saj për të vazhduar garën.

“E kuptoj se çfarë po kaloni, por ju jeni më të fortë se çdo sfidë. Ajo që po bëni po dërgon një mesazh të rëndësishëm për të gjithë botën. Sot e bashkuat stadiumin rreth jush”, tha presidenti i FIFA-s.

Infantino i falënderoi lojtarët iranianë për paraqitjen dhe për mënyrën se si e përfaqësuan vendin e tyre në skenën botërore.

Vizita e tij erdhi menjëherë pas përfundimit të sfidës, ku Irani arriti të marrë një pikë të vlefshme ndaj Zelandës së Re. Ky rezultat e mban skuadrën ende në garë për një vend në fazën eliminatore, me dy ndeshje të tjera për t’u luajtur në grup.

Irani tani synon të shfrytëzojë maksimalisht ndeshjet e ardhshme për të siguruar kualifikimin në raundin tjetër të Kupës së Botës.

Lionel Messi vazhdon të shkruajë histori në skenën më të madhe të futbollit. Kapiteni i Argjentinës është vetëm një asist larg vendosjes së një rekordi të ri në historinë e Kupës së Botës.

Ylli argjentinas aktualisht ndan vendin e parë për numrin më të madh të asistimeve në historinë e Botërorit me legjendën Diego Maradona. Të dy kanë nga 8 asistime në këtë kompeticion, por një pasim final i Messit në një ndeshje të radhës do ta vendoste atë të vetëm në krye të listës.

Përveç golave dhe trofeve, Messi ka qenë gjithmonë i njohur edhe për aftësinë e tij për të krijuar raste për bashkëlojtarët. Në disa edicione të Kupës së Botës, ai ka luajtur një rol vendimtar jo vetëm si realizues, por edhe si organizator i lojës së Argjentinës.

Në Botërorin e Katarit, ku udhëhoqi Argjentinën drejt titullit të tretë botëror, Messi ishte një nga protagonistët kryesorë të turneut, duke shënuar gola, duke dhënë asistime dhe duke drejtuar ekipin në momentet më të rëndësishme.

Tani, në atë që pritet të jetë pjesëmarrja e tij e fundit në një Kampionat Botëror, Messi ka mundësinë të thyejë edhe një tjetër rekord të madh dhe të lërë pas një prej figurave më të mëdha të futbollit argjentinas, Diego Maradonën.

Nëse arrin asistimin e nëntë në një ndeshje të Botërorit, “pleshti” do të bëhet lojtari me më së shumti asistime në historinë e këtij kompeticioni, duke shtuar edhe një kapitull tjetër në një karrierë tashmë legjendare.

Lewis Hamilton më në fund ka shijuar triumfin e parë me Ferrarin, duke triumfuar në garën e zhvilluar në Barcelonë dhe duke i dhënë fund pritjes së gjatë që prej transferimit të tij te skuadra italiane.

Suksesi i shtatë herë kampionit të botës ka marrë vlerësime edhe nga ish-shefi i tij te Mercedes, Toto Wolff, i cili nuk e fshehu kënaqësinë për fitoren e britanikut.

“E kam thënë gjithmonë se kur ne nuk fitojmë, dua që të fitojë Lewis. Jam shumë i lumtur për të dhe për Ferrarin”, deklaroi Wolff.

Drejtuesi i Mercedesit beson se triumfi në Barcelonë është një sinjal i fortë për rivalët dhe e konsideron Hamiltonin si një nga pretendentët kryesorë për titullin e kampionit këtë sezon.

“Pa asnjë dyshim, ai është në mesin e favoritëve. Lewis ka shpejtësi, përvojë dhe një forcë mendore të jashtëzakonshme. Kam punuar me të për 12 vite dhe e di shumë mirë se çfarë është në gjendje të bëjë”, shtoi austriaku.

Megjithatë, Wolff nuk kishte të njëjtin humor kur foli për paraqitjen e Mercedesit. Ai shprehu zhgënjimin e tij pas problemeve që i kushtuan skuadrës pikë të rëndësishme, veçanërisht pas tërheqjes së Andrea Kimi Antonellit nga gara.

“Humbja e pikëve në këtë mënyrë është e papranueshme. George Russell humbi 25 pikë në Montreal, ndërsa Antonelli 18 pikë sot. Nëse dëshiron të luftosh për titullin, duhet të përfundosh garat. Shpejtësia e vetme nuk mjafton”, theksoi ai.

Wolff kritikoi gjithashtu mënyrën se si u menaxhuan disa situata gjatë garës, duke pranuar se skuadra bëri gabime që ndikuan drejtpërdrejt në rezultat.

“Jam shumë i zhgënjyer me mënyrën si i menaxhuam gjërat. Në fund humbëm dy herë gjatë kësaj gare. Ne nuk përdorim urdhra ekipi, por duhet të gjejmë zgjidhje më të mira për situata të tilla në të ardhmen”, përfundoi shefi i Mercedesit.

Fitorja në Barcelonë mund të jetë një pikë kthese për Hamiltonin dhe Ferrarin, të cilët tani duken më të gatshëm se kurrë për t’u përfshirë seriozisht në betejën për titullin botëror.

E ardhmja e Marcus Rashford ka marrë një kthesë të re. Sulmuesi anglez është rikthyer zyrtarisht te Manchester United pasi Barcelona vendosi të mos aktivizojë klauzolën e blerjes prej 30 milionë eurosh që kishte në marrëveshjen e huazimit.

Sipas gazetarit të njohur Fabrizio Romano, afati për aktivizimin e opsionit ka skaduar dhe Rashford do të jetë sërish pjesë e skuadrës së United, të paktën për momentin.

Barcelona vazhdon ta vlerësojë lart 28-vjeçarin dhe nuk e ka përjashtuar mundësinë e një bashkëpunimi të ri, por drejtuesit katalanas nuk janë të gatshëm të investojnë 30 milionë euro për transferimin e tij të përhershëm. Opsioni i preferuar i klubit mbetet një huazim i ri për sezonin e ardhshëm.

Kjo situatë e vendos Manchester United përpara një vendimi të rëndësishëm. Klubi nga “Old Trafford” duhet të përcaktojë nëse Rashford do të jetë pjesë e projektit për sezonin e ri, do të shitet përfundimisht ose do të huazohet sërish.

Rikthimi i sulmuesit anglez vjen në një moment kur United po planifikon ndryshime të rëndësishme në repartin ofensiv, ndërsa e ardhmja e disa lojtarëve mbetet ende e paqartë.

Rashford është produkt i akademisë së Manchester United dhe për shumë vite ka qenë një nga figurat kryesore të skuadrës. Megjithatë, forma e luhatshme në sezonet e fundit ka bërë që pozita e tij në klub të vihet në diskutim.

Tani mbetet të shihet nëse ai do të ketë një tjetër mundësi për të dëshmuar vlerat e tij në “Old Trafford”, apo nëse rikthimi i tij do të jetë vetëm i përkohshëm përpara një aventure të re në një klub tjetër.

Portieri i Kepit të Gjelbër, Vozinha, është kthyer në një nga historitë më të bukura të Kupës së Botës 2026, jo vetëm për paraqitjen e tij në fushë, por edhe për popullaritetin e jashtëzakonshëm që ka fituar në rrjetet sociale.

Pas barazimit surprizues 0-0 ndaj Spanjës, veterani i portës së kombëtares afrikane u shndërrua në heroin e ndeshjes falë disa pritjeve spektakolare që i mohuan golin favoritëve spanjollë.

Performanca e tij e shkëlqyer nuk kaloi pa u vënë re. Brenda vetëm 24 orëve, llogaria e Vozinhas në rrjetet sociale përjetoi një rritje të pabesueshme. Nga rreth 50 mijë ndjekës që kishte para ndeshjes, ai tani numëron mbi 5 milionë followers, duke u bërë një nga figurat më të përfolura të momentit në futbollin botëror.

Miliona tifozë nga e gjithë bota kanë vërshuar në profilin e portierit për ta përgëzuar për paraqitjen heroike kundër Spanjës, në një ndeshje ku ai ishte padyshim protagonisti kryesor.

Ky është një tjetër shembull i fuqisë së futbollit dhe ndikimit që Kupa e Botës ka në krijimin e historive të jashtëzakonshme. Brenda pak orësh, Vozinha kaloi nga një emër i njohur kryesisht në vendin e tij në një yll global që po fiton admirimin e miliona tifozëve.

Për Kepin e Gjelbër, pika e fituar ndaj Spanjës mund të ketë vlerë të madhe në luftën për kualifikim, ndërsa për Vozinhan kjo ndeshje do të mbahet mend si momenti që i ndryshoi jetën, si në fushë, ashtu edhe jashtë saj.

Barazimi 1-1 ndaj Katarit në ndeshjen e parë të Kupës së Botës ka vënë Kombëtaren e Zvicrës nën presion të madh. Ajo që para pak javësh dukej si një grup i kalueshëm, tani është kthyer në një sfidë serioze për zviceranët.

Sipas mediave zvicerane, atmosfera në kampin e Zvicrës është larg asaj optimiste që mbizotëronte para fillimit të turneut. Ndërsa tifozët e Bosnjës dhe Hercegovinës e presin me entuziazëm përballjen e radhës, zviceranët janë të vetëdijshëm se nuk kanë më vend për gabime.

Ndeshja e së enjtes ndaj Bosnjës shihet si vendimtare. Një fitore do t’i afronte drejt fazës tjetër, ndërsa çdo rezultat tjetër do ta komplikonte ndjeshëm situatën para përballjes së fundit me Kanadanë.

Para nisjes së Botërorit, në kampin zviceran mbretëronte optimizmi. Skuadra nuk kishte probleme me lëndime, atmosfera ishte pozitive dhe Grupi B konsiderohej ndër më të favorshmit. Megjithatë, barazimi ndaj Katarit ndryshoi gjithçka.

Tani Zvicra ka nevojë për të paktën katër pikë në dy ndeshjet e mbetura për të siguruar kalimin në fazën eliminatore. Tre barazime mund të mos jenë të mjaftueshme për të vazhduar tutje.

Kapiteni i skuadrës, Granit Xhaka, nuk e fshehu zhgënjimin pas ndeshjes së parë.

“Ne nuk jemi në nivelin që mendonim se ishim para fillimit të turneut”, deklaroi Xhaka.

Brenda ekipit ka shqetësime për paraqitjen e deritanishme, veçanërisht për mungesën e efikasitetit në sulm dhe gabimet në mbrojtje, të cilat duhet të korrigjohen sa më shpejt.

Ndërkohë, stafi teknik i drejtuar nga Murat Yakin ka zgjedhur një program të veçantë përgatitor. Pas ndeshjes me Katarin, lojtarët që luajtën nuk zhvilluan stërvitje intensive, ndërsa një pjesë e seancave u anuluan për t’u dhënë futbollistëve më shumë kohë për rikuperim.

Zvicra do të zhvillojë vetëm një stërvitje të plotë taktike para ndeshjes me Bosnjën dhe Hercegovinën, përpara se të udhëtojë drejt Los Angelesit, ku e pret një nga sfidat më të rëndësishme të këtij Botërori.

Për zviceranët, mesazhi është i qartë: ndaj Bosnjës nuk ka alternativë tjetër përveç fitores.

Kupa e Botës 2026 vazhdon me emocione të mëdha, ndërsa sot në fushë zbresin dy finalistët e edicionit të kaluar në Katar – Franca dhe Argjentina. Dy gjigantët e futbollit botëror e nisin aventurën e tyre në SHBA, Kanada dhe Meksikë me të njëjtin objektiv: të arrijnë finalen e 19 korrikut dhe të ngrejnë trofeun më të çmuar në futboll.

Vëmendja fillimisht do të jetë e përqendruar në New York, ku Franca do të përballet me Senegalin në stadiumin “MetLife”, duke nisur rrugëtimin e saj në Grupin I. Francezët konsiderohen ndër favoritët kryesorë për triumfin final, falë një skuadre të mbushur me talent dhe përvojë.

Të udhëhequr nga yje si Kylian Mbappe, Ousmane Dembélé dhe Michael Olise, “Gjelat” synojnë ta nisin turneun me fitore. Në stol do të jetë për herë të fundit në një Kampionat Botëror trajneri Didier Deschamps, i cili kërkon ta mbyllë epokën e tij me një tjetër sukses të madh.

“Objektivi ynë është të shkojmë deri në fund dhe të luftojmë për titullin. E dimë se rruga nuk do të jetë e lehtë, por kemi një grup me shumë cilësi dhe potencial”, deklaroi Deschamps para ndeshjes.

Megjithatë, trajneri francez paralajmëroi se Senegali mbetet një kundërshtar i rrezikshëm.

“Është një nga kombëtaret më të forta afrikane dhe meriton respekt maksimal. Për ne është shumë e rëndësishme ta nisim turneun me fitore”.

Në Francë ende kujtohet humbja tronditëse ndaj Senegalit në Botërorin e vitit 2002, kur afrikanët fituan 1-0 në ndeshjen hapëse dhe shkaktuan një nga surprizat më të mëdha të turneut.

Nga ana tjetër, selektori i Senegalit, Pape Thiaw, është optimist se skuadra e tij mund të rivalizojë me favoritët.

“Respektojmë Francën dhe lojtarët e saj të jashtëzakonshëm, por edhe ne kemi cilësi. Futemi në fushë me besimin se mund të arrijmë rezultat pozitiv”, u shpreh ai.

Në ndeshjen tjetër të Grupit I, Norvegjia do të përballet me Irakun në Boston. Norvegjezët rikthehen në Kupën e Botës pas 28 vitesh mungesë dhe shihen si favoritë, falë formës së shkëlqyer të sulmuesit Erling Haaland.

Ndërkohë, në orët e para të mëngjesit, kampionia në fuqi Argjentina do të nisë mbrojtjen e titullit me sfidën ndaj Algjerisë në Kansas City, në kuadër të Grupit J.

Takimi do të ketë një domethënie të veçantë për Lionel Messin. Kapiteni legjendar argjentinas pritet të luajë ndeshjen e 200-të me fanellën e kombëtares, duke shtuar një tjetër rekord në karrierën e tij të jashtëzakonshme. Për më tepër, ky pritet të jetë Botërori i fundit i 39-vjeçarit, i cili katër vite më parë udhëhoqi Argjentinën drejt kurorës botërore në Katar.

“Jemi të përgatitur dhe e dimë përgjegjësinë që kemi si kampionë në fuqi. Respektojmë çdo kundërshtar, por fokusi ynë është te loja jonë dhe te objektivat që kemi vendosur”, deklaroi trajneri Lionel Scaloni.

Ditën e gjashtë të Kupës së Botës do ta mbyllë dueli mes Austrisë dhe Jordanisë. Austriakët, të drejtuar nga Ralf Rangnick, konsiderohen favoritë për të marrë tri pikët në këtë përballje.

Një ditë e mbushur me ndeshje interesante, ku favoritët nisin rrugëtimin e tyre drejt ëndrrës së madhe – fitimit të Kupës së Botës 2026.

Mbrëmja e Kupës së Botës nuk ishte e lehtë për Marc Cucurellan. Mbrojtësi i majtë i Spanjës u përball me reagime të ashpra nga një pjesë e tifozëve të “La Roja”-s gjatë barazimit pa gola ndaj Kepit të Gjelbër, por arriti të ruajë qetësinë dhe të japë një paraqitje të nivelit të lartë.

Sa herë që prekte topin, nga tribunat dëgjoheshin vërshëllima, ndërsa disa tifozë nuk kursyen as thirrjet ofenduese, duke e cilësuar atë si “tradhtar”. Atmosfera e tensionuar shoqëroi Cucurellan gjatë gjithë takimit, megjithatë ai nuk lejoi që presioni të ndikonte në lojën e tij.

Pakënaqësia e një pjese të tifozëve lidhet me transferimin e fundit të futbollistit nga Chelsea te Real Madridi. Duke qenë se Cucurella është rritur në akademinë e Barcelonës, kalimi te rivali i madh i katalanasve ka shkaktuar reagime të forta, veçanërisht nga mbështetësit blaugrana.

Pavarësisht kritikave, 27-vjeçari ishte ndër futbollistët më aktivë të Spanjës. Ai kontribuoi si në fazën mbrojtëse ashtu edhe në atë sulmuese, krijoi mundësi për bashkëlojtarët dhe ishte vazhdimisht i përfshirë në aksionet e skuadrës së tij.

Spanja dominoi takimin dhe kontrolloi ritmin e lojës, por nuk arriti të gjejë rrugën drejt golit. Një meritë të madhe për këtë rezultat pati portieri me përvojë i Kepit të Gjelbër, Vozinha, i cili realizoi disa pritje vendimtare dhe u shndërrua në heroin e mbrëmjes për kombëtaren afrikane.

Edhe pse u vu në qendër të polemikave dhe u përball me një atmosferë armiqësore nga tribunat, Cucurella tregoi karakter dhe profesionalizëm, duke mbetur i fokusuar te objektivat e Spanjës në turne.

Transferimi i tij në “Santiago Bernabeu” vazhdon të ndezë debatet në futbollin spanjoll, ndërsa reagimet e tifozëve tregojnë se kjo lëvizje ende nuk është pranuar nga të gjithë.

Grupi J i Kupës së Botës do të nisë me përballjen mes Argjentinës dhe Algjerisë, e cila zhvillohet në orët e para të së mërkurës. Pas këtij takimi, në kuadër të raundit të parë të grupit do të luhet edhe ndeshja mes Austrisë dhe Jordanisë.

Megjithatë, vëmendja para sfidës së shumëpritur është zhvendosur jashtë fushës së lojës. Atmosfera e zjarrtë mes tifozëve të Argjentinës dhe Algjerisë ka degjeneruar në incidente të pakëndshme në New York.

Dy grupet e tifozëve u përballën në Times Square, ku situata doli jashtë kontrollit dhe përfundoi me përleshje fizike. Pamjet e publikuara në rrjetet sociale tregojnë skena kaotike, ndërsa në turmën e madhe ndodheshin edhe gra dhe fëmijë, duke rritur shqetësimin për sigurinë para ndeshjes.

Pavarësisht incidenteve, fokusi sportiv mbetet te dueli që pritet të tërheqë vëmendjen e miliona tifozëve në mbarë botën. Për Argjentinën, kjo ndeshje ka një rëndësi të veçantë, pasi kapiteni legjendar, Lionel Messi, pritet të regjistrojë paraqitjen e tij të 200-të me fanellën e kombëtares.

Messi, një nga futbollistët më të mëdhenj në historinë e sportit, ka fituar pothuajse çdo trofe të mundshëm gjatë karrierës së tij të jashtëzakonshme. Kulmi erdhi në vitin 2022, kur ai udhëhoqi Argjentinën drejt triumfit botëror, duke realizuar ëndrrën e shumëpritur të tifozëve argjentinas.

Tani, në prag të një tjetër aventure botërore, të gjitha sytë janë te Messi dhe Argjentina, të cilët synojnë ta nisin turneun me fitore, ndërsa Algjeria kërkon të befasojë një nga favoritët kryesorë për titullin.

Trajneri i Kombëtares së Iranit, Amir Ghalenoei, ka shprehur pakënaqësi të madhe ndaj organizimit të ekipit të tij gjatë Kupës së Botës, duke zbuluar se skuadra u detyrua të largohej menjëherë nga Shtetet e Bashkuara dhe të kthehej në kampin stërvitor në Tijuana të Meksikës, vetëm pak orë pas barazimit 2-2 ndaj Zelandës së Re në Inglewood.

Sipas Ghalenoeit, ekipi kishte planifikuar të qëndronte gjatë natës në Kaliforni për të kryer procesin e zakonshëm të rikuperimit pas ndeshjes së parë të turneut. Megjithatë, menjëherë pas përfundimit të takimit, lojtarët u njoftuan se duhej të niseshin pa vonesë drejt Meksikës.

“Ata nuk na lanë as kohë për rikuperim. Pas ndeshjes na thanë se duhet të largoheshim menjëherë. Për ne është jetike që lojtarët të kenë kohë të rikuperohen, por në vend të kësaj po detyrohemi të udhëtojmë drejt kampit tonë në Tijuana. Kjo është shumë shqetësuese”, deklaroi trajneri iranian.

Kombëtarja iraniane po kalon një periudhë të vështirë që nga tensionet e fundit mes Iranit, SHBA-së dhe Izraelit. Pavarësisht kërkesës së Federatës Iraniane që ndeshjet e grupit të zhvendoseshin jashtë territorit amerikan, FIFA e refuzoi këtë kërkesë dhe Irani vendosi të marrë pjesë normalisht në turne.

Edhe kapiteni Mehdi Taremi kritikoi kushtet me të cilat është përballur skuadra. Ai zbuloi se ekipi kaloi rreth pesë orë në udhëtim dhe kontrolle sigurie për të përshkuar distancën mes Tijuanës dhe zonës së Los Angelesit, një rrugë që zakonisht kërkon shumë më pak kohë.

Përveç kësaj, Taremi dhe Ghalenoei ngritën shqetësime edhe për mungesën e disa anëtarëve të rëndësishëm të delegacionit iranian, përfshirë presidentin e Federatës, pjesë të stafit teknik dhe zyrtarë të medias, të cilëve autoritetet amerikane nuk u kanë dhënë viza hyrëse.

“Besoj se FIFA duhet të bëjë më shumë për ne. Situata që po përjetojmë është pothuajse katastrofike”, u shpreh Taremi.

Në aspektin sportiv, Irani arriti të shmangte humbjen në ndeshjen hapëse ndaj Zelandës së Re. Elijah Just i dha dy herë epërsinë skuadrës oqeanike, duke shënuar në fillim të secilës pjesë, por iranianët reaguan përmes Ramin Rezaeian dhe Mohammad Mohebi, i cili vulosi rezultatin përfundimtar 2-2 në minutën e 64-të.

Pas raundit të parë, situata në grup mbetet plotësisht e hapur, me Iranin që do të përballet me Belgjikën në Inglewood dhe më pas me Egjiptin në Seattle. Të katër kombëtaret e grupit kanë nga një pikë secila pas ndeshjeve të para.