Author: N.T.

UEFA ka konfirmuar edhe një herë besimin ndaj arbitrave nga Kosova, duke deleguar dy ekipe gjyqtarësh për ndeshjet e raundit të dytë kualifikues të Ligës së Konferencës.

Njëri nga delegimet i është besuar gjyqtarit me stemën e FIFA-s, Mervan Bejtullahu, i cili do të ndajë drejtësinë në përballjen mes Ilves dhe Stjarnan. Takimi do të zhvillohet më 30 korrik në stadiumin “Tammelan Stadion” në Tampere, me fillim nga ora 18:00.

Bejtullahu do të ketë në krah asistentët Edmond Zeqiri dhe Bashkim Hyseni, ndërsa rolin e gjyqtarit të katërt do ta kryejë Alban Shala.

Ndërkohë, një tjetër delegim i rëndësishëm i është besuar edhe gjyqtarit ndërkombëtar Genc Nuza, i cili do të drejtojë ndeshjen ndërmjet Gent dhe LNZ Cherkasy. Kjo sfidë do të luhet më 30 korrik në “KAA Gent Arena”, me fillim nga ora 20:30.

Nuza do të ndihmohet nga asistentët Fatmir Sekiraqa dhe Pashtrik Burrniku, ndërsa gjyqtar i katërt do të jetë Erdall Zasella.

Federata e Futbollit e Kosovës e ka cilësuar këtë si një tjetër vlerësim të rëndësishëm nga UEFA për arbitrat kosovarë. Sipas FFK-së, delegimet dëshmojnë besimin e vazhdueshëm të shtëpisë evropiane të futbollit në profesionalizmin, përgatitjen dhe standardin e lartë që gjyqtarët e Kosovës po shfaqin në arenën ndërkombëtare.

LeBron James do të jetë pjesë e Philadelphia 76ers nga sezoni i ardhshëm, në atë që konsiderohet si një nga transferimet më të mëdha në historinë e NBA-së.

Klubi nga Filadelfia e konfirmoi zyrtarisht marrëveshjen përmes kanaleve të tij zyrtare, ndërsa presidenti i operacioneve të basketbollit, Mike Gansey, mirëpriti afrimin e një prej emrave më të mëdhenj që ka njohur ndonjëherë ky sport. Megjithatë, detajet financiare të kontratës nuk janë bërë publike.

Me transferimin e katër herë kampionit të NBA-së dhe katër herë fituesit të çmimit MVP, Philadelphia 76ers forcon ndjeshëm skuadrën në synimin për t’u rikthyer në garën për titullin kampion.

LeBron do të ndajë parketin me yje si Joel Embiid, Tyrese Maxey, Jaylen Brown dhe VJ Edgecombe, duke formuar një nga skuadrat më të forta në ligë.

Në moshën 41-vjeçare, James vazhdon të mbetet një prej basketbollistëve më të mirë në botë. Ai është shënuesi më i mirë në historinë e NBA-së me 43,440 pikë, ndërsa gjatë karrierës ka fituar katër tituj kampion, katër çmime MVP të sezonit dhe është shpallur MVP i finaleve në secilin prej katër triumfeve të tij.

Në 23 sezonet e zhvilluara në NBA me Cleveland Cavaliers, Miami Heat dhe Los Angeles Lakers, LeBron ka regjistruar mesatare prej 26.8 pikësh, 7.5 kërcimesh dhe 7.4 asistimesh për ndeshje.

Edhe sezonin e fundit me Lakers ai tregoi se vazhdon të performojë në nivel të lartë, duke e mbyllur edicionin me mesatare prej 20.9 pikësh, 7.2 asistimesh dhe 6.1 kërcimesh për takim.

Në aventurën e tij të re me Philadelphia 76ers, James do të mbajë fanellën me numrin 23, ndërsa klubi shpreson që përvoja dhe cilësitë e tij të jenë çelësi për rikthimin e trofeut të kampionit në Filadelfia.

FIFA ka zyrtarizuar golin më të bukur të Kupës së Botës 2026, ndërsa çmimi prestigjioz i ka takuar reprezentuesit të Kepit të Gjelbër, Sidny Lopes Cabral.

Mbrojtësi i majtë shkroi historinë, pasi u bë futbollisti i parë nga një përfaqësuese afrikane që fiton këtë vlerësim në një Kampionat Botëror.

Momenti që i siguroi këtë çmim erdhi në përballjen e 1/8 së finales ndaj Argjentinës. Gjatë kohës shtesë, Cabral zhvilloi një aksion të jashtëzakonshëm individual, duke kaluar fillimisht Alexis Mac Allister me një driblim elegant, përpara se të lëshonte një goditje të fuqishme dhe të saktë nga skaji i zonës, e cila përfundoi në rrjetë, pa i lënë asnjë mundësi reagimi portierit Emiliano Martínez.

Edhe pse Kepi i Gjelbër u eliminua në fund të takimit pas një autogoli dramatik në minutat e fundit të vazhdimeve, kombëtarja afrikane la gjurmë në debutimin e saj historik në Kupën e Botës. Arritja deri në mesin e 16 ekipeve më të mira të turneut u konsiderua një nga surprizat më të mëdha të edicionit.

Ndërkohë, supergoli i Cabral është përjetësuar tashmë në historinë e Kampionateve Botërore, pasi FIFA e shpalli zyrtarisht si golin më të bukur të Botërorit 2026, duke i dhënë mbrojtësit afrikan një vend të veçantë mes momenteve më të paharrueshme të turneut.

Zinedine Zidane është prezantuar zyrtarisht si përzgjedhësi i ri i Kombëtares së Francës, duke nisur një epokë të re në karrierën e tij si trajner. Legjenda franceze e cilësoi këtë moment si realizimin e ëndrrës më të madhe, duke zbuluar se stoli i “Les Bleus” ishte i vetmi që kishte pritur gjatë gjithë këtyre viteve.

Gjatë ceremonisë së prezantimit, Zidane tregoi se kishte refuzuar oferta të shumta nga klube dhe kombëtare, pasi synimi i tij kishte qenë gjithmonë drejtimi i Francës.

“Ishte e vetmja bankinë që e doja. Kam refuzuar shumë oferta ndër vite, sepse e prisja këtë moment. Nuk mund ta humbisja mundësinë për ta drejtuar Kombëtaren e Francës”, deklaroi ai.

Ish-trajneri i Real Madridit e përshkroi këtë detyrë si privilegjin më të madh të karrierës së tij, duke theksuar se është plotësisht i vetëdijshëm për përgjegjësinë që sjell drejtimi i një prej kombëtareve më të forta në botë.

“Është një privilegj i jashtëzakonshëm. E njoh peshën e kësaj fanele dhe përgjegjësinë që sjell ky rol. Do të jap gjithçka për ta rikthyer Francën në majën e futbollit botëror”, u shpreh 54-vjeçari.

Zidane rikthehet në bankinë pas pesë vitesh mungesë, duke pasuar Didier Deschamps në krye të Francës. Ai ka nënshkruar kontratë deri në vitin 2030 dhe do ta nisë zyrtarisht aventurën e tij në muajin shtator, kur Franca do të zhvillojë ndeshjet e para në Ligën e Kombeve. Me përvojën e fituar te Real Madridi dhe objektiva të mëdha përpara, Zidane do të synojë ta udhëheqë Francën drejt sukseseve të reja në arenën ndërkombëtare.

Drita rikthehet sonte në aksion në arenën evropiane, ku do të përballet me Florianan në ndeshjen e kthimit të raundit të dytë kualifikues të Ligës së Konferencës.

Pas barazimit 1-1 në sfidën e parë të zhvilluar në Maltë, skuadra gjilanase ka gjithçka në duart e saj për të siguruar kalimin në raundin e tretë. Bardhekaltërit lanë përshtypje të mira në takimin e parë dhe krijuan mjaft raste shënimi, duke qenë pranë një fitoreje që do t’ua lehtësonte ndjeshëm punën para duelit të kthimit.

Liridon Balaj kishte kaluar Dritën në epërsi në minutat shtesë, por Floriana reagoi në çastet e fundit dhe barazoi në minutën e 102-të. Takimi u zgjat për shkak të ndërprerjes së energjisë elektrike në stadium, duke sjellë një fund dramatik të sfidës.

Tashmë gjithçka vendoset në stadiumin “Fadil Vokrri”, ku Drita do të ketë në anën e saj përkrahjen e tifozëve dhe avantazhin e fushës vendëse. Ekipi kosovar synon të përsërisë paraqitjen e mirë të ndeshjes së parë, por kësaj radhe të jetë më konkret para portës kundërshtare.

Objektivi është i qartë, kualifikimi në raundin e tretë të Ligës së Konferencës. Nëse eliminon Florianan, Drita do të përballet me Tre Fiorin nga San Marino në fazën e ardhshme të garës.

Takimi mes Dritës dhe Florianas zhvillohet sonte me fillim nga ora 20:00 në stadiumin “Fadil Vokrri” në Prishtinë.

Federata e Futbollit e Kosovës ka hedhur sot shortin për edicionin 2026/27 të ALBI Mall Superligës, ndërsa java e parë premton duele interesante që në startin e kampionatit.

Kampionia në fuqi, Drita, sezonin e ri do ta nisë në shtëpi përballë Llapit, në një përballje mes dy skuadrave që tradicionalisht synojnë kreun e tabelës.

Vëmendja më e madhe pritet të jetë te sfida mes Prishtinës dhe Ballkanit, një duel mes dy emrave të mëdhenj të futbollit kosovar, që pritet të japë tonin e garës që në javën hapëse.

E rikthyer në elitë, Vushtrria do ta nisë aventurën përballë Malishevës, me synimin për të dëshmuar se rikthimi në Superligë nuk do të jetë i përkohshëm.

Në Skenderaj, Drenica do të presë Dukagjinin, në një ndeshje ku të dyja skuadrat do të kërkojnë ta nisin sezonin me tre pikë dhe me besim për vazhdimësinë.

Ndërkaq, Feronikeli 74 do të përballet me Gjilanin, në një sfidë ku mysafirët do të tentojnë ta nisin kampionatin me fitore, ndërsa vendasit do të kërkojnë ta shfrytëzojnë faktorin fushë.

Kujtojmw qw sezoni i ri i ALBI Mall Superligës pritet të nisë më 15 gusht, ndërsa shorti i hedhur sot ka zbuluar vetëm aktin e parë të një kampionati që premton rivalitet të madh nga java e parë e deri në fund.

Manchester United ka shtuar ndjeshëm interesimin për Aurelien Tchouamenin, me mesfushorin francez që është kthyer në një nga prioritetet kryesore të klubit anglez në këtë afat kalimtar.

Sipas raportimeve të fundit, “Djajtë e Kuq” janë të gatshëm të investojnë mbi 80 milionë euro për të bindur Real Madridin të heqë dorë nga shërbimet e 26-vjeçarit, të cilin e shohin si përforcimin ideal për mesfushën.

Trajneri dhe drejtuesit e United kërkojnë të shtojnë cilësi dhe stabilitet në repartin defensiv të mesfushës, ndërsa profili i Tchouamenit konsiderohet perfekt falë eksperiencës së tij në La Liga, Ligën e Kampionëve dhe me Kombëtaren e Francës.

Megjithëse interesi është konkret, deri më tani nuk ka një ofertë zyrtare dhe as një marrëveshje mes dy klubeve. Negociatat pritet të vazhdojnë në ditët e ardhshme për të kuptuar nëse transferimi mund të marrë formë.

Nga ana tjetër, Real Madridi nuk ka ngutje për ta shitur francezin. Tchouameni është i lidhur me klubin madrilen me kontratë deri në verën e vitit 2028, çka i jep “Los Blancos” një pozitë të fortë në bisedime. Drejtuesit mund të refuzojnë ofertën, të kërkojnë një shifër më të lartë ose të pranojnë shitjen vetëm nëse ajo ndihmon në financimin e përforcimeve të tjera.

Mesfushori iu bashkua Real Madridit në verën e vitit 2022 nga Monaco në një transferim që i kushtoi klubit spanjoll 80 milionë euro, plus 20 milionë euro të tjera në bonuse.

Që prej mbërritjes në “Santiago Bernabéu”, Tchouameni ka qenë një nga lojtarët më të rëndësishëm të skuadrës, duke luajtur si mesfushor mbrojtës, por edhe si qendërmbrojtës sa herë që ekipi ka pasur nevojë. Vetëm sezonin e kaluar ai regjistroi 49 paraqitje në të gjitha garat, shënoi dy gola dhe grumbulloi plot 3.940 minuta në fushë.

Ndërkohë, Manchester United synon ta përforcojë urgjentisht mesfushën, veçanërisht pas ndryshimeve në skuadër dhe nevojës për një lojtar me karakteristikat e Tchouamenit. Javët e ardhshme pritet të jenë vendimtare, pasi ky operacion mund të kthehet në një nga transferimet më të bujshme të merkatos verore.

Fisnik Asllani vazhdon të jetë një nga sulmuesit më të përfolur në këtë afat kalimtar, ndërsa e ardhmja e tij mbetet ende e hapur. Interesimi për 24-vjeçarin po rritet, por deri tani ai nuk ka marrë një vendim përfundimtar mbi klubin ku do të vazhdojë karrierën.

Sipas raportimeve të mediave spanjolle, RB Leipzig ka shfaqur interes konkret për transferimin e sulmuesit kosovar dhe është gati të bëjë lëvizjen e radhës. Megjithatë, Asllani ka zgjedhur të mos nxitohet, pasi shpreson të marrë një sinjal nga Barcelona.

Klubi katalanas e ndjek prej kohësh zhvillimin e tij dhe, sipas të njëjtave burime, drejtuesit sportivë janë bindur nga paraqitjet që Asllani ka bërë në sezonet e fundit. Trajneri Hansi Flick thuhet se e vlerëson lart profilin e tij, veçanërisht aftësinë për të finalizuar me të dyja këmbët dhe instinktin për gol.

Barcelona është në kërkim të një sulmuesi që mund të jetë pjesë e projektit afatgjatë, duke pasur parasysh se Robert Lewandowski po i afrohet fundit të karrierës së tij në “Camp Nou”. Në këtë kuadër, Asllani konsiderohet një alternativë interesante dhe me potencial të madh.

Raportimet bëjnë të ditur se klauzola e lirimit të futbollistit është rreth 29 milionë euro, një shumë që shihet si e përballueshme për klubet e interesuara. Tashmë mbetet për t’u parë nëse Barcelona do të vendosë të hyjë në garë për shërbimet e tij, ndërsa RB Leipzig vazhdon të presë zhvillimet.

Asllani vjen pas një sezoni të suksesshëm me Hoffenheimin, ku u dallua me gola, asistime dhe paraqitje bindëse në Bundesligë, duke konfirmuar potencialin e tij si një nga sulmuesit më premtues të momentit.

Çaykur Rizespor ka hedhur hapin e parë për transferimin e Milot Rashicës, duke i paraqitur Beşiktaşit një ofertë zyrtare për huazimin e sulmuesit të Kombëtares së Kosovës.

Sipas raportimeve të mediave turke, drejtuesit e klubit e kanë vendosur 30-vjeçarin në krye të listës së prioriteteve për këtë afat kalimtar, duke e konsideruar përforcimin ideal për repartin ofensiv në prag të sezonit të ri.

Tashmë, gjithçka mbetet në dorën e Beşiktaşit, i cili pritet të vendosë nëse do t’i japë dritën jeshile largimit të Rashicës në formë huazimi.

Përvoja e sulmuesit kosovar në futbollin turk dhe cilësitë e tij në fazën sulmuese kanë bindur Rizesporin ta bëjë objektivin kryesor të merkatos verore.

Megjithatë, klubi nuk ka lënë gjithçka në dorë të këtij operacioni. Sipas mediumit turk Takagazete, drejtuesit kanë përgatitur edhe një alternativë në rast se negociatat me Beşiktaşin nuk përfundojnë me sukses.

Opsioni rezervë është rikthimi i Jesurun Rak-Sakyi, i cili sezonin e kaluar u aktivizua te Rizespori si i huazuar nga Crystal Palace.

Milot Rashica është aktualisht nën kontratë me Beşiktaşin deri në verën e vitit 2027, ndërsa te Rizespori aktivizohet edhe mesfushori i Kombëtares së Shqipërisë, Qazim Laçi.

Barcelona ka marrë një lajm të hidhur në prag të sezonit të ri, pasi mesfushori Frenkie de Jong ka pësuar një këputje të ligamentit medial kolateral në gjurin e djathtë. Dëmtimi do ta mbajë reprezentuesin holandez larg fushave për disa javë.

Klubi katalanas konfirmoi se 29-vjeçari nuk do t’i nënshtrohet operacionit. Në vend të kësaj, ai do të ndjekë një program të specializuar rehabilitimi nën mbikëqyrjen e stafit mjekësor, me synimin për t’u rikthyer sa më shpejt në dispozicion të skuadrës.

Problemet fizike të De Jong u shfaqën gjatë paraqitjeve me Holandën në Kupën e Botës 2026. Pas shqetësimeve në gju, ai iu nënshtrua ekzaminimeve të detajuara, ndërsa në ndeshjet e fundit të turneut u pa duke luajtur me një mbrojtëse në gju.

Ky zhvillim përbën një goditje të madhe për trajnerin Hansi Flick, i cili do ta nisë sezonin pa një nga shtyllat kryesore të mesfushës.

Pavarësisht mungesës së De Jong, mediat spanjolle raportojnë se Barcelona nuk ka ndërmend të ndryshojë planet në merkaton e verës dhe nuk do të transferojë një zëvendësues për holandezin.

Drejtuesit e klubit besojnë se skuadra ka alternativa të mjaftueshme për të mbuluar boshllëkun e krijuar. Pedri, Gavi, Dani Olmo, Fermín López dhe Marc Bernal pritet të marrin më shumë përgjegjësi në mesfushë, ndërsa edhe Eric García dhe Andreas Christensen mund të aktivizohen në atë repart nëse situata e kërkon.

Vlen të theksohet se De Jong ishte paraqitur në qendrën stërvitore “Joan Gamper” disa ditë përpara rikthimit zyrtar të ekipit, për t’iu nënshtruar kontrolleve mjekësore lidhur me gjurin që e kishte shqetësuar gjatë Botërorit.

Ky është një tjetër dëmtim për mesfushorin holandez, i cili gjatë dy sezoneve të fundit është përballur vazhdimisht me probleme fizike, duke i penguar vazhdimësinë në formën e tij më të mirë.