Author: N.T.

Presioni ndaj presidentit të FIFA-s, Gianni Infantino, po rritet dita-ditës, ndërsa mbështetja për rizgjedhjen e tij po zbehet pas kritikave të shumta ndaj drejtimit të organizatës.

Kontestimet u intensifikuan pas dështimit të planit të Infantinos për të shitur pjesë të të drejtave komerciale të turneve madhore të FIFA-s, përfshirë Kupën e Botës, te investitorë privatë – një ide që hasi në kundërshtime të forta nga komuniteti i futbollit.

UEFA ka bërë të ditur se ka humbur besimin te 56-vjeçari, i cili drejton FIFA-n që nga viti 2016. Të njëjtin qëndrim e ka mbështetur edhe Federata Angleze e Futbollit, ndërsa vende si Anglia, Uellsi, Suedia dhe Finlanda kanë tërhequr përkrahjen për të.

Megjithatë, sipas gazetarit të The Athletic, Adam Crafton, Infantino vazhdon të ketë mbështetjen e disa federatave, mes tyre Katari, Emiratet e Bashkuara Arabe, Butani, Sri Lanka, Libani dhe Kuvajti. Në anën e tij janë rreshtuar edhe disa shtete afrikane dhe aziatike, përfshirë Marokun dhe Egjiptin.

Fati i Infantinos do të bëhet i qartë në mars të vitit të ardhshëm, kur do të vendoset nëse ai do të sigurojë një mandat të ri në krye të FIFA-s.

Sipas statutit të organizatës, nëse 20 për qind e anëtarëve të FIFA-s, ose 43 federata, kërkojnë mbledhjen e një kongresi të jashtëzakonshëm, mund të iniciohet edhe një votim për shkarkimin e presidentit.

Fulhami ka konfirmuar zyrtarisht transferimin e sulmuesit spanjoll Gonzalo García nga Real Madridi, duke siguruar shërbimet e njërit prej talenteve më premtues të futbollit spanjoll.

22-vjeçari ka firmosur një kontratë pesëvjeçare me klubin londinez, e vlefshme deri në verën e vitit 2031, me mundësi vazhdimi edhe për një sezon tjetër. Edhe pse shuma e transferimit nuk është bërë publike nga klubet, raportimet bëjnë të ditur se Fulhami do të paguajë mes 40 dhe 42 milionë euro për 70 për qind të kartonit të lojtarit, ndërsa Real Madridi do të mbajë 30 për qind të të drejtave ekonomike. Në total, marrëveshja vlerësohet të arrijë rreth 60 milionë euro.

Pas prezantimit zyrtar, Gonzalo García u shpreh i emocionuar për hapin e ri në karrierën e tij, duke falënderuar drejtuesit e Fulhamit dhe trajnerin Álvaro Arbeloa për mbështetjen dhe besimin e treguar. Sulmuesi theksoi se mezi pret të provojë veten në Ligën Premier.

I lindur në Madrid, García është një produkt i akademisë së famshme të Real Madridit. Ai iu bashkua klubit në moshën 10-vjeçare, ndërsa pas një periudhe të shkurtër te grupmoshat e Mallorcës u rikthye në akademinë madrilene në vitin 2019, duke vazhduar zhvillimin e tij drejt futbollit elitar.

Sezoni 2023/24 ishte ai që e vendosi përfundimisht në qendër të vëmendjes. Me ekipin U-19 të Real Madridit ai realizoi 35 gola, duke qenë një nga protagonistët kryesorë në fitimin e tripletës. Forma e tij mbresëlënëse vazhdoi edhe me Real Madrid Castilla, ku shënoi 25 gola dhe dhuroi katër asistime në 36 paraqitje.

Performancat e shkëlqyera i siguruan vendin në ekipin e parë të Real Madridit. Gjatë sezonit të kaluar, García zhvilloi 39 ndeshje me skuadrën madrilene, duke kontribuar me tetë gola dhe tre asistime.

Sulmuesi spanjoll shkëlqeu edhe në Kupën e Botës për Klube, ku u shpall golashënuesi më i mirë i turneut me katër gola dhe një asistim, edhe pse Real Madridi e mbylli aventurën në gjysmëfinale.

Tashmë, Gonzalo García nis një sfidë të re në Angli, ku Fulhami pret që ai të jetë një nga figurat kyçe të repartit ofensiv në sezonet e ardhshme.

Ajax ka konfirmuar zyrtarisht transferimin e portierit gjerman Marc-Andre ter Stegen, i cili i është bashkuar klubit holandez në formë huazimi nga Barcelona për sezonin 2026/27.

Gardiani 34-vjeçar kompletoi me sukses vizitat mjekësore gjatë fundjavës, përpara se të firmoste kontratën që e dërgon në Amsterdam për një vit.

Sipas marrëveshjes mes dy klubeve, Ajax do të mbulojë rreth 15 për qind të pagës së portierit gjerman gjatë periudhës së huazimit.

“Ajax ka arritur marrëveshje me FC Barcelona dhe Marc ter Stegen. Portieri 34-vjeçar do të luajë për klubin tonë në formë huazimi për një sezon nga skuadra spanjolle”, thuhet në njoftimin zyrtar të klubit.

Drejtori teknik i Ajaxit, Jordi Cruyff, e cilësoi afrimin e Ter Stegen si një lëvizje të rëndësishme për skuadrën.

“Marc ka një karrierë të jashtëzakonshme dhe cilësitë e tij njihen në të gjithë botën. Ai është një përforcim i menjëhershëm për ekipin tonë. Njihemi prej kohësh dhe mezi pres të bashkëpunojmë sërish. Kemi punuar për një kohë të gjatë që ta sjellim në Ajax dhe jemi shumë të lumtur që gjithçka u finalizua me sukses”, u shpreh Cruyff.

Me këtë transferim, Ajax siguron përvojën dhe cilësinë e një prej portierëve më të spikatur të futbollit evropian, ndërsa Ter Stegen do të synojë të rikthehet në formën e tij më të mirë me fanellën e klubit nga Amsterdami.

Kosova do të paraqitet me delegacionin më të madh në historinë e saj në Lojërat Mesdhetare, të cilat do të zhvillohen në Taranto të Italisë nga 21 gushti deri më 3 shtator 2026.

Komiteti Olimpik i Kosovës (KOK) ka njoftuar se vendi do të përfaqësohet nga gjithsej 163 sportistë, përkatësisht 87 meshkuj dhe 76 femra, të cilët do të garojnë në 21 disiplina sportive, me synimin për të arritur rezultate sa më të mira dhe për ta përfaqësuar Kosovën denjësisht në arenën ndërkombëtare.

Një tjetër moment historik për sportin kosovar është debutimi në katër sporte ekipore. Për herë të parë, Kosova do të marrë pjesë në futboll me ekipin U21 të meshkujve dhe U19 të femrave, në volejboll me ekipet e të dyja kategorive, në hendboll me meshkuj dhe femra, si dhe në basketbollin 3×3 në konkurrencën e meshkujve dhe të femrave.

Kosova e pret këtë edicion me optimizëm, pas paraqitjeve të suksesshme në dy Lojërat e fundit Mesdhetare, ku ka fituar gjithsej 10 medalje, nëntë në xhudo dhe një në boks.

Ceremonia e mbylljes së Lojërave Mesdhetare Taranto 2026 do të ketë një simbolikë të veçantë për Kosovën. Gjatë saj, flamuri i Lojërave Mesdhetare do t’i dorëzohet zyrtarisht vendit tonë, i cili do të jetë organizator i edicionit të ardhshëm, Prishtina 2030, duke shënuar një tjetër kapitull të rëndësishëm në historinë e sportit kosovar.

Mauricio Pochettino do të vazhdojë të jetë në krye të përfaqësueses së Shteteve të Bashkuara të Amerikës edhe për katër vitet e ardhshme. Federata Amerikane e Futbollit ka konfirmuar se trajneri argjentinas ka nënshkruar një kontratë të re, e cila e mban në detyrë deri pas përfundimit të Kupës së Botës 2030.

Vendimi vjen pas paraqitjes së SHBA-së në Botërorin 2026, turne që u zhvillua në tokën amerikane, ku skuadra e drejtuar nga Pochettino arriti deri në fazën e 1/16-ës së finales.

54-vjeçari mori drejtimin e kombëtares në vitin 2024, menjëherë pas largimit nga Chelsea, me objektivin për të ndërtuar një ekip konkurrues për Botërorin e organizuar në shtëpi. Paraqitjet dhe progresi i ekipit kanë bindur drejtuesit e federatës që t’i besojnë vazhdimësinë e projektit.

“Duke punuar me Mauricion dhe stafin e tij gjatë dy viteve të fundit, kemi parë një vizion të qartë dhe një potencial të madh për zhvillimin e futbollit amerikan. Besojmë se ky projekt do të vazhdojë ta çojë përpara kombëtaren tonë”, deklaroi drejtori ekzekutiv i U.S. Soccer, JT Batson.

Nën drejtimin e Pochettinos, SHBA-ja përfundoi në krye të grupit në Botërorin 2026, duke lënë pas Australinë, Paraguajin dhe Turqinë. Me gjashtë pikë të grumbulluara, amerikanët regjistruan paraqitjen e tyre më të mirë ndonjëherë në fazën e grupeve të një Kampionati Botëror.

Më pas eliminuan Bosnjën në fazën e 1/32-ës, por aventura e tyre mori fund në raundin pasues pas humbjes 4-1 ndaj Belgjikës, rezultat që i dha fund ëndrrës për një ecuri më të gjatë para tifozëve vendas.

Edhe vetë Pochettino shprehu entuziazmin për vazhdimin e bashkëpunimit, duke theksuar se përvoja e fituar gjatë dy viteve të fundit dhe mbështetja e jashtëzakonshme e tifozëve e kanë bindur se futbolli amerikan ka potencial të madh për t’u zhvilluar edhe më tej.

KF Dukagjini ka konfirmuar rikthimin e Armend Dallkut në postin e kryetrajnerit, duke i besuar edhe një herë drejtimin e skuadrës nga Klina.

Klubi bardhekaltër ka bërë të ditur se ka arritur marrëveshje me ish-trajnerin e tij, i cili nis një tjetër kapitull në pankinën e Dukagjinit me synimin për të vazhduar projektin sportiv dhe për të çuar ekipin drejt objektivave të reja.

Dallku është një nga emrat më të respektuar të futbollit kosovar dhe e njeh mirë ambientin e klubit, pasi edhe më parë ka drejtuar Dukagjinin. Drejtuesit e klubit besojnë se përvoja, profesionalizmi dhe aftësitë e tij do të jenë vendimtare në konsolidimin e skuadrës dhe në arritjen e rezultateve të synuara.

Bashkë me Dallkun është prezantuar edhe stafi teknik që do ta shoqërojë në këtë aventurë të re. Artan Luzi dhe Agon Ramadani do të ushtrojnë detyrën e ndihmëstrajnerëve, ndërsa Rinor Xhemaj do të jetë përgjegjës për përgatitjen e portierëve.

Me këtë strukturë teknike, Dukagjini synon të krijojë stabilitet dhe vazhdimësi në punë, duke ndërtuar një skuadër konkurruese për sfidat e sezonit të ri.

Në fund të njoftimit, klubi i ka uruar mirëseardhje Armend Dallkut dhe stafit të tij, duke shprehur besimin se rikthimi i tyre do të shënojë fillimin e një periudhe të suksesshme për ekipin nga Klina.

Chelsea ka zyrtarizuar afrimin e mesfushorit me përvojë Jordan Henderson, i cili do të jetë pjesë e skuadrës londineze për dy sezonet e ardhshme.

36-vjeçari i bashkohet “Bluve” si lojtar i lirë, pasi arriti marrëveshje me Brentfordin për ndërprerjen e kontratës me pëlqim të dyanshëm, edhe pse kishte ende një vit të mbetur në marrëveshjen e tij.

Afrimi i ish-kapitenit të Liverpoolit ishte një kërkesë e trajnerit të ri të Chelseat, Xabi Alonso, i cili synon t’i shtojë skuadrës më shumë eksperiencë, personalitet dhe mentalitet fitues në prag të sezonit të ri.

Henderson sjell me vete një karrierë të jashtëzakonshme, të mbushur me suksese. Gjatë viteve te Liverpooli ai fitoi tetë trofe madhorë, mes tyre titullin e Premier League dhe trofeun e Ligës së Kampionëve, duke u shndërruar në një nga liderët më të rëndësishëm të klubit anglez.

Sezonin e kaluar, mesfushori anglez ishte pjesë e Brentfordit, ku regjistroi 34 paraqitje në të gjitha garat, duke kontribuar me një gol dhe tri asistime.

Me transferimin e Hendersonit, Chelsea synon të forcojë repartin e mesfushës me një futbollist që ofron përvojë, qetësi dhe cilësi drejtuese, ndërsa Xabi Alonso beson se anglezi do të ketë një rol kyç në ndërtimin e projektit të ri të klubit nga “Stamford Bridge”.

Drita tashmë e di se kë mund ta ketë përballë në rast se siguron kalimin në fazën e play-offit të Ligës së Konferencës. Kampionia e Kosovës do të përballet me fituesin e çiftit mes Flora Tallinn nga Estonia dhe Inter Escaldes nga Andorra.

Skuadra nga Gjilani ka mbetur shpresa e vetme e futbollit kosovar në garat evropiane këtë edicion, pasi Ballkani, Malisheva dhe Dukagjini u eliminuan në raundin e dytë kualifikues.

Megjithatë, para se të mendojë për play-offin, Dritën e pret një tjetër sfidë e rëndësishme. Kampionët e Kosovës do të ndeshen me Tre Fiorin e San Marinos në raundin e tretë kualifikues, ndërsa vetëm një kualifikim do t’i çojë përballë fituesit të duelit Flora Tallinn – Inter Escaldes.

Drita ka krijuar tashmë një emër në arenën evropiane, duke siguruar pjesëmarrjen në fazën e grupeve në dy sezonet e fundit. Objektivi mbetet i njëjtë edhe këtë edicion, ndonëse skuadra do ta ndjekë këtë rrugëtim me një ndryshim të rëndësishëm në pankinë, pas largimit të trajnerit Zekirija Ramadani.

Ndeshja e parë ndaj Tre Fiorit do të zhvillohet të enjten e ardhshme, ndërsa takimi i kthimit është planifikuar për një javë më vonë. Vetëm pas këtij dueli do të mësohet nëse Drita do të ketë mundësinë të luftojë për një tjetër kualifikim historik në fazën e grupeve.

KF Dukagjini ka konfirmuar zyrtarisht përfundimin e bashkëpunimit me trajnerin Arsim Thaçi, duke i dhënë fund një periudhe të suksesshme që kulmoi me fitimin e Kupës së Kosovës.

Nën drejtimin e Thaçit, skuadra nga Klina shkroi një nga faqet më të rëndësishme të historisë së saj, duke triumfuar në finalen e Kupës ndaj Ferizajt dhe duke siguruar një vend në kualifikimet e Ligës së Konferencës. Megjithatë, aventura evropiane përfundoi shpejt, pasi Dukagjini u përball me një kundërshtar të fortë si Lugano, që e eliminoi në raundin e dytë kualifikues.

Përmes një komunikate zyrtare, klubi bëri të ditur se ndarja me trajnerin është bërë me marrëveshje të dyanshme. Bashkë me Thaçin largohen edhe ndihmëstrajnerët Valmir Bytyqi, Ahmet Haliti dhe Lekë Termkolli.

“Drejtuesit e klubit shprehin mirënjohjen më të thellë për profesionalizmin, përkushtimin dhe kontributin e stafit teknik gjatë periudhës së bashkëpunimit, duke vlerësuar rolin e tyre në sukseset e arritura nga skuadra.”

Në fund të njoftimit, Dukagjini i ka falënderuar trajnerët për punën e bërë dhe u ka uruar suksese në vazhdimin e karrierës së tyre, si në aspektin profesional ashtu edhe në atë personal.

Ndërkohë, sipas informacioneve të fundit, drejtimin e skuadrës pritet ta marrë Armend Dallku. Ish-mbrojtësi i Kombëtares së Kosovës e njeh mirë ambientin e klubit, pasi edhe më parë ka qenë në krye të pankinës së Dukagjinit.

Kalimi i mundshëm i Mirlind Dakut te Spartak Moska ka ngjallur polemika të mëdha në Rusi, madje ende pa u zyrtarizuar marrëveshja mes palëve.

Grupi ultras i Spartakut, “Crazy North”, ka reaguar publikisht kundër transferimit të sulmuesit të Rubin Kazanit, duke publikuar në rrjetet sociale një deklaratë dhe një pankartë me mesazhe fyese të drejtuara ndaj shqiptarëve dhe kosovarëve.

Në postimin e publikuar në kanalin e tyre në Telegram, tifozët shprehin kundërshtimin e plotë ndaj afrimit të Dakut, duke deklaruar se mbështesin popullin serb dhe duke përdorur gjuhë denigruese ndaj shqiptarëve dhe kosovarëve.

Reagimi i tyre u shoqërua edhe me një pankartë që përmbante një mesazh ofendues kundër shqiptarëve, duke shkaktuar reagime të shumta në opinion.

Megjithatë, kundërshtimi i një pjese të tifozëve nuk pritet ta pengojë realizimin e transferimit. Sipas raportimeve të mediave ruse, Spartak Moska dhe Mirlind Daku kanë arritur marrëveshje për kushtet personale, ndërsa zyrtarizimi i transferimit pritet të ndodhë në ditët në vijim.

Sulmuesi 28-vjeçar pritet t’i japë fund aventurës së tij te Rubin Kazan, ku kaloi një periudhë shumë të suksesshme. Gjatë qëndrimit me klubin rus, Daku zhvilloi 93 ndeshje dhe realizoi 38 gola, duke u konfirmuar si një nga sulmuesit më efikas të kampionatit rus.