Author: N.T.

Mesfushori uruguaian i Real Madridit, Fede Valverde, nuk do të udhëtojë për t’u bashkuar me kombëtaren e Uruguayt për ndeshjet e radhës. Lajmi u konfirmua nga klubi dhe përfaqësuesit e lojtarit, të cilët bënë të ditur se vendimi është marrë për t’i dhënë lojtarit një periudhë pushimi pas një sezoni të ngarkuar me angazhime.

Valverde ka luajtur rregullisht si titullar me Real Madridin këtë sezon, duke kontribuar me gola, asistime dhe lojë të qëndrueshme, ndaj trajneri ka vendosur ta ruajë për sfidat e ardhshme të klubit. Ky pushim synon rikuperimin e plotë të energjive dhe parandalimin e ndonjë dëmtimi, duke e mbajtur mesfushorin në formë optimale.

Mungesa e tij do të ndikojë në përbërjen e Uruguait, por trajneri ka disa alternativa në mesfushë për të kompensuar boshllëkun dhe për të siguruar vazhdimësinë e lojës ekipore në ndeshjet e ardhshme.

Fituesi i Kupës së Botës me Italinë, Fabio Cannavaro, është zyrtarisht trajneri i ri i kombëtares së Uzbekistanit, pak muaj para pjesëmarrjes së parë historike të këtij vendi në finalet e Kupës së Botës 2026.

Trajneri 52-vjeçar italian do të zëvendësojë Timur Kapadzen, i cili e udhëhoqi skuadrën drejt kualifikimit pas largimit të Srecko Katanec për arsye shëndetësore. Nën drejtimin e Kapadzes, Uzbekistani arriti suksesin më të madh në historinë e tij duke siguruar vendin në turneun me 48 ekipe, pasi humbi vetëm një ndeshje në 15 takime dhe përfundoi i dyti në Grupin A me 21 pikë nga 10 ndeshje.

Cannavaro, që si futbollist ngriti trofeun e Botërorit 2006 me Italinë dhe regjistroi 136 paraqitje ndërkombëtare, ka një karrierë të pasur edhe si trajner. Ai ka drejtuar skuadra si Dinamo Zagreb, Udinese, Benevento, Al Nassr, si dhe klubet kineze Tianjin Quanjian dhe Guangzhou Evergrande. Po ashtu, ka qenë për një periudhë të shkurtër edhe trajner i kombëtares së Kinës.

Në stafin e tij teknik do të jenë edhe Eugenio Albarella (ndihmës trajner), Francesco Troise (trajner përgatitjeje fizike) dhe Antonio Chimenti (trajner portierësh).

Uzbekistani, që për herë të parë do të marrë pjesë në një Kampionat Botëror, shpreson që përvoja dhe autoriteti i ish-kapitenit legjendar të Italisë ta ndihmojnë ekipin të paraqitet denjësisht në “USA–Kanada–Meksikë 2026”.

Mesfushori kosovar me tipare sulmuese, Bersant Celina, ka reaguar ashpër ndaj gjyqtares kryesore Tess Olofsson, pas humbjes së papritur të skuadrës së tij AIK ndaj IFK Varnamo.

Celina, që si zakonisht ishte titullar, u ndëshkua me karton të verdhë në minutën e fundit të ndeshjes, për shkak të ankesave ndaj vendimeve të arbitres. Ky ishte kartoni i dytë i verdhë radhazi, që do ta detyrojë atë të mungojë në ndeshjen e ardhshme të ekipit.

Pas ndeshjes, lojtari 28-vjeçar shpërtheu me kritika ndaj gjyqtares suedeze, duke thënë se ajo gaboi rëndë në një ndërhyrje që sipas tij duhej ndëshkuar me karton të kuq.

“Nuk e di çfarë ndodhi. Di vetëm që kishte një ndërhyrje shumë lart, mbi gju. Për mua është karton i kuq 100 për qind”, tha Celina.

“Në fund përfundoi situata duke marrë unë karton të verdhë – është e pabesueshme. Nuk mund t’i ndërhysh një lojtari mbi gju dhe të mos ndëshkohesh. Ajo duhet të kuptojë pse reagova në atë mënyrë”.

“Mora kartonin e dytë të verdhë dhe do të mungoj në ndeshjen e ardhshme sepse ajo nuk di si të referojë”, shtoi ai me zhgënjim.

Kjo do të jetë mungesa e parë e Celinës që prej ardhjes së tij te AIK, dhe për ironi ndodh pikërisht para derbit të rëndësishëm ndaj Hammarbyt.

“Nuk ndjehem mirë. Nuk kam munguar në asnjë ndeshje që kur erdha këtu. Jam shumë i zhgënjyer”, u shpreh Celina.

Ndërkohë, mesfushori nuk është përfshirë në listën e përzgjedhësit Franco Foda për dy ndeshjet e tetorit me Slloveninë dhe Suedinë, duke u renditur vetëm si rezervë.

Federata e Futbollit të Serbisë (FSS) ka njoftuar se ndeshja mes Serbisë dhe Shqipërisë, e cila do të zhvillohet më 11 tetor në stadiumin “Dubocica” të Leskovacit, do të luhet pa bileta në shitje për publikun.

Ky vendim është marrë nga Komiteti i Emergjencave i FSS-së, pas vlerësimeve të FIFA-s, udhëzimeve të Ministrisë së Punëve të Brendshme të Serbisë, si dhe pas konsultimeve me UEFA-n, duke marrë parasysh edhe përvojën e hidhur nga ndeshja e ndërprerë në vitin 2014.

Sipas njoftimit, pjesëmarrja në stadium do të jetë e kufizuar vetëm për përfaqësues të komunitetit të futbollit – federatat rajonale, klubet, nxënësit e shkollave të futbollit dhe prindërit e tyre, sponsorët, mediat e akredituara, si dhe stafet mjekësore e organizative.

Në hyrje të stadiumit do të ketë masa të rrepta sigurie, ndërsa çdo person do të duhet të paraqesë dokument identifikimi (kartë identiteti ose pasaportë), në përputhje me standardet më të larta të sigurisë.

Federata serbe ka kujtuar se ndeshja e vitit 2014 mes dy vendeve në Beograd u ndërpre dhe solli pasoja të rënda për Serbinë, përfshirë humbjen e një vendi në Kampionatin Evropian 2016.

Për këtë arsye, ndeshja e ardhshme është shpallur me rrezik të lartë sigurie nga FIFA, Ministria e Brendshme e Serbisë dhe FSS-ja. FIFA do të dërgojë dy oficerë sigurie në Leskovac, ndërsa nuk do të ketë tifozë mysafirë në tribuna.

“Federata e Futbollit të Serbisë u bën thirrje të gjithë pjesëmarrësve që përmes sjelljes së tyre të kontribuojnë në një atmosferë të drejtë dhe sportive, në mënyrë që kombëtarja jonë të ketë kushtet më të mira për rezultat pozitiv në fushë”, thuhet në fund të komunikatës së FSS-së.

Përzgjedhësi i Kombëtares së Kosovës, Franco Foda, ka folur hapur për situatën e Emir Sahitit dhe Bersant Celinës, duke sqaruar se kërkon respekt dhe profesionalizëm nga të gjithë lojtarët e tij.

Foda theksoi se Sahiti duhet të ndryshojë qëndrim dhe të mos shpreh pakënaqësi në publik, pas deklaratave që sulmuesi i Hamburgut kishte dhënë në mediat gjermane, ku ishte ankuar se meritonte më shumë minuta në fushë me Kosovën.

“Te Emiri është situatë ndryshe, sepse nuk lejoj që askush të flasë keq për bashkëlojtarët. E pashë intervistën e tij në media – mund të ketë pakënaqësi nëse luan apo jo, por duhet të pranojë vendimet e trajnerit”, deklaroi Foda.

Ai shtoi se nuk ka asnjë problem personal me Sahitin, por se për të është thelbësore që çdo futbollist të respektojë vendimet dhe të mos krijojë tensione brenda grupit.

“Nuk është intervista arsyeja pse nuk është ftuar, por për mua ka rëndësi që në publik të mos flitet për lojtarët e tjerë. Sahiti luan në një pozitë ku kemi konkurrencë të madhe dhe këtë herë kemi vendosur për këtë ekip”, tha ai.

Ndërkohë, për Bersant Celinën, Foda konfirmoi se ka zhvilluar një bisedë me mesfushorin e AIK-ut dhe se ai mbetet në planet e tij për të ardhmen.

“Me Celinën kisha një bisedë të këndshme para dy javësh. Është gati të luajë për Kosovën dhe nëse vazhdon me paraqitje të mira, ftesa mund të vijë shumë shpejt”, tha tekniku gjerman.

Kombëtarja e Kosovës zhvillon këtë muaj dy sfida të rëndësishme në kuadër të kualifikimeve për Kampionatin Botëror 2026 — më 10 tetor ndaj Sllovenisë në “Fadil Vokrri”, dhe më 13 tetor në udhëtim ndaj Suedisë.

Sulmuesi shqiptar, Arbër Hoxha, ka marrë titullin e lojtarit më të mirë të muajit në kampionatin kroat, sipas gazetës së njohur kroate “index.hr”. Hoxha shkëlqeu gjatë muajit të kaluar, duke kontribuar me dy gola dhe një asistim ndaj Hajduk Splitit dhe Slaven Belupos.

Tifozët e gazetës e votuan masivisht, duke i dhënë Hoxhës 102 vota, duke e lënë pas emra të njohur të futbollit kroat si Naim Omerovic (Osijek) dhe Iuri Tavares (Varazdin).

Hoxha ishte gjithashtu në garë për çmimin “Goli më i mirë i muajit”, por këtë herë çmimin e mori bashkëlojtari i tij, Monsef Bakrar, me 100 vota, ndërsa Hoxha mori 58 vota.

Sulmuesi shqiptar pritet të startojë titullar edhe në përballjen e sotme ndaj Maccabi Tel Aviv, para se t’i bashkohet Kombëtares së Shqipërisë për ndeshjen e rëndësishme ndaj Serbisë.

Real Madrid do të luajë këtë fundjavë pa disa nga lojtarët e tyre kryesorë. Carvajal, Rudiger, Trent Alexander-Arnold dhe Ferland Mendy nuk do të jenë në dispozicion për trajnerin, duke e detyruar skuadrën të ndryshojë formacionin dhe strategjinë.

Trent Alexander-Arnold, i transferuar këtë sezon te Real Madrid për 100 milion euro, do të mungojë për shkak të dëmtimit, ndërkohë që mungesa e Carvajal dhe Mendy-s dobëson mbrojtjen e skuadrës. Rudiger gjithashtu nuk do të jetë pjesë e ekipit, duke i shtuar sfidat në përgatitjen për ndeshjen e ardhshme.

Kjo situatë pritet të testojë thellësinë e skuadrës dhe aftësinë e trajnerit për të menaxhuar mungesat, ndërsa fansat presin me padurim se si do të performojë ekipi pa disa nga yjet kryesorë.

Ylli francez i Real Madridit, Kylian Mbappé, është shpallur zyrtarisht “Lojtari i Javës” nga UEFA për javën e dytë të fazës së grupeve në Ligën e Kampionëve.

Sulmuesi 26-vjeçar dha një paraqitje spektakolare në fitoren kundër Kairat Almaty, ku realizoi hat-trick, duke udhëhequr madrilenët drejt një fitoreje bindëse dhe duke treguar edhe një herë pse konsiderohet si një nga lojtarët më të mirë në botë.

Me këtë arritje, Mbappé jo vetëm që e ndihmoi Real Madridin të marrë tre pikë të rëndësishme, por gjithashtu kaloi shifrën e 60 golave personale në Ligën e Kampionëve, duke vazhduar të shkruajë histori në këtë kompeticion elitar.

UEFA vlerësoi kontributin e tij vendimtar, ndërsa tifozët në rrjetet sociale e cilësuan performancën e francezit si “të paharrueshme”.

UEFA ka shpallur sot zyrtarisht Ekipin e Javës për javën e dytë të fazës së grupeve në Ligën e Kampionëve. Në këtë formacion janë përfshirë futbollistë nga 11 skuadra të ndryshme, të cilët kanë spikatur me paraqitjet e tyre gjatë ndeshjeve të kësaj jave.

Portieri më i vlerësuar është Uğurcan Çakır i Galatasarayt, i cili shkëlqeu me pritjet e tij kundër Liverpool-it. Në mbrojtje janë përzgjedhur Denzel Dumfries (Inter), Federico Gatti (Juventus), Eric Dier (Monaco) dhe Nuno Mendes (PSG), të gjithë me paraqitje vendimtare si në fazën defanzive, ashtu edhe në ndihmë të sulmit.

Mesfusha përbëhet nga lojtarë që udhëhoqën skuadrat e tyre me vizion dhe efikasitet. Martin Ødegaard (Arsenal) dha asistin vendimtar, Marcel Sabitzer (Dortmund) kontribuoi me kontrollin e lojës, ndërsa Jens Petter Hauge (Bodø/Glimt) u dallua me dy gola.

Në sulm, ylli i Real Madridit, Kylian Mbappé, realizoi një hat-trick duke kaluar kuotën e 60 golave në Ligën e Kampionëve, ndërsa Rasmus Højlund (Napoli) ishte efikas me dy gola nga dy goditje.

Ky formacion i përzgjedhur nga UEFA ka ngjallur edhe debate në mesin e tifozëve, të cilët diskutojnë nëse disa lojtarë të tjerë meritonin të ishin pjesë e ekipit. Megjithatë, zgjedhjet e kësaj jave tregojnë balancën dhe nivelin e lartë të konkurrencës në garën më prestigjioze evropiane për klube.

Bashkimi i Prizrenit ka përfunduar rrugëtimin e tij në kualifikimet e FIBA Europe Cup pas humbjes së thellë në ndeshjen e dytë kundër skuadrës polake Anwil me rezultat 93-71.

Pjesa e parë ishte e barabartë, me çerekun e parë dhe të dytë të mbyllur 21-21 dhe 25-21, duke i dhënë Anwil një avantazh të lehtë 46-42. Bashkimi rezistoi edhe në çerekun e tretë, 18-17, por çereku i fundit ishte vendimtar, ku polakët dominuan 29-12 dhe siguruan fitoren e tyre të thellë.

Te Bashkimi, më i dalluari ishte Isaiah Cousins me 16 pikë, ndërsa Da’Quon Lake shtoi 15 pikë. Jeremiah Bailey dhe Jan Palokaj kontribuan me nga 9 pikë secili. Te Anwil, kapiteni Michal Michalak ishte lider me 18 pikë.

Megjithëse Bashkimi kishte fituar ndeshjen e parë 80-75, humbja me diferencë të madhe në takimin e dytë e eliminoi nga gara, duke lejuar Anwil të kualifikohet në Grupin F të sezonit të rregullt, ku do të jetë edhe kampionia e Kosovës, Trepça, si dhe PAOK-u i Selanikut dhe Braunschweig nga Gjermania.

Tashmë, ekipi prizrenas do të fokusojë energjitë te Superliga e Kosovës, ku xhiroja e parë nis këtë fundjavë.