ATV

Author: K.B.

  • Krasniqi: Çdo shqiptar duhet të ndihet i fyer dhe i kërcënuar nga pretendimet e ZPS-së ndaj ish-krerëve të UÇK-së

    Krasniqi: Çdo shqiptar duhet të ndihet i fyer dhe i kërcënuar nga pretendimet e ZPS-së ndaj ish-krerëve të UÇK-së

    Analisti Milazim Krasniqi ka komentuar pretendimin e ZPS rreth dënimit të ish-krerëve të UÇK-së.

    Ai ka bërë me dije se kërkesa e kryeprokurorës së Speciale për 45 vite burgim për Hasim Thaçin, Kadri Veselin, Jakup Krasniqin dhe Rexhep Selimin është fyerje për çdo shqiptar.

    “Cdo shqiptar ne bote duhet te ndihet i fyer dhe i kercenuar nga pretendimi i kryeprokurores se Speciales, qe kreret e UCK-se e te shtetit tone, te denohen me nga 45 vite burg. Fyhet sakrifica per liri e nje populli/kombi te tere dhe kercenohet me inkriminim nje shtet i tere”, ka shkruar ai.

  • SBASHK i vendos ultimatum autoriteteve: Lirojeni mësuesin shpejt ose përshkallëzim

    SBASHK i vendos ultimatum autoriteteve: Lirojeni mësuesin shpejt ose përshkallëzim

    Sindikata e Bashkuar e Arsimit (SBASHK) ka vendosur ultimatum ndaj autoriteteve për lirimin e mësimdhënësit Abaz Kadriu, të ndaluar për 48 orë si i dyshuar për sulm fizik, në të kundërtën kërcënoi me përshkallëzim të grevës së mësimdhënësve në nivel vendi.

    Përfaqësuesi i SBASHK-ut, Ymer Ymeri, i cili iu bashkua grevës dy orëshe të kolektivit të shkollës “Pavarësia” të martën, tha se mësimdhënësi Kadriu është sulmuar në vendin e punës.

    Ai tha se gjoja sulmi ndaj mësimdhënësit në shkollën “Pavarësia” në Prishtinë, nuk është i pari i këtij lloji.

    “Ne menjëherë e kemi përkrahur dhe sot jemi në mesin e mëdimdhënësve këtu që ta përkrahim veprimin e tyre. Kjo nuk është ngjarje që po ndodh për herë të parë. Ka raste kur mësimdhënësit janë sulmuar fizikisht, edhe nga ana e prindërve”, tha Ymeri.

    “Organet e drejtësisë, sa më shpejt të marrin masa për zbardhjen e të vërtetës dhe lirimin e arsimtarit”, tha ai. “Nëse ngjarjet nuk sqarohen shpejt dhe nuk lirohen mësimdhënësit, mund të përshkallëzohet kjo formë e veprimit sindikal”.

    “Organet e drejtësisë të marrin masa ndaj prindërve që sjellin këso fëmijësh në shkollë, të cilët hyjnë në sallë dhe sulmojnë arsimtarin”, vazhdoi Ymeri.

    Kolektivi i shkollës fillore të mesme të ulët “Pavarësia” ka zhvilluar një grevë dy-orëshe të martën në mëngjes në përkrahje të mësimdhënësit Abaz Kadriu.

    Kadriu, i arrestuar të hënën rreth orës 12:00, është ndaluar për 48-orë me urdhër të Prokurorit të Shtetit si i dyshuar për veprën penale “sulm fizik”.

  • Nis procesi i intervistimit për kandidatët për 15 pozita për gjyqtarë në gjykatat themelore

    Nis procesi i intervistimit për kandidatët për 15 pozita për gjyqtarë në gjykatat themelore

    Në objektin e Këshillit Gjyqësor të Kosovës (KGJK) kanë nisur intervistat për 15 pozita të lira për gjyqtarë në gjykatat themelore.

    Procesit të intervistimit pritet t’i nënshtrohen 36 kandidatë të cilët me sukses kanë kaluar fazën e testit me shkrim nga fusha penale dhe ajo civile.

    Komisioni për rekrutim ka këtë përbërje:

    Albert Zogaj- kryesues i KGJK-së;
    Arjeta Sadiku- zëvendeskryesuese;
    Besnik Bislimaj- gjyqtar në Gjykatën e Apelit, njëherësh anëtar i KGJK-së;
    Mustafë Tahiri- kryetar i Gjykatës Themelore në Ferizaj, dhe
    Ivanka Millenoviq- nënkryetare dhe gjyqtare në Gjykatën e Apelit.
    Anëtarë rezervë janë:

    Teuta Ibrahimi- anëtare e KGJK-së, si dhe
    Bekim Veliqi- U.D i kryetarit të Gjykatës Themelore në Mitrovicë.
    Në procesin e intervistimit, sipas Rregullores 03/2021 për rekrutim të gjyqtarëve, kandidatët mund të marrin më së shumti 20 pikë dhe se në ditën e intervistës kandidati paraprakisht i nënshtrohet edhe hartimit të një eseje, për çka kandidati mund të marrë më së shumti katër pikë, shkruan Betimi për Drejtësi.

    Pas përfundimit të fazës së intervistimit publikohen rezultat përfundimtare, duke përfshirë pikët e arritura nga testi kualifikues, testi me shkrim nga fusha penale dhe civile, eseja dhe intervista me gojë.

    Konkursi u shpall për 15 pozita të lira për gjyqtarë në nivel të Gjykatave Themelore të Republikës së Kosovës.

    Instituti i Kosovës për Drejtësi ka monitoruar procesin e testit me shkrim nga fusha penale dhe civile.

  • Prokuroria: Të akuzuarit patën rol të fortë kolektiv në Shtabin e UÇK-së

    Prokuroria: Të akuzuarit patën rol të fortë kolektiv në Shtabin e UÇK-së

    Prokuroria e ka nisur fjalën e vet duke thënë se të akuzuarit kanë pasur rol të fortë kolektiv si anëtarë kryesorë të Shtabit të Përgjithshëm të Ushtrisë Çlirimtare të Kosovës (UÇK).

    “Në rolet që kishin, ishin në gjendje të shpërndanin qëllimin e përbashkët kriminal, të koordinonin veprimet e tyre dhe mohuan veprat penale në mënyrë që t’i gënjenin ndërkombëtarët”.

    Hashim Thaçi përshkruhet si njëri prej themeluesve të UÇK-së, duke cituar disa deklarata të Azem Sylës.

    Hashim Thaçi, Kadri Veseli, Jakup Krasniqi dhe Rexhep Selimi janë në sallën e gjyqit.

    Sot është dita e dytë e shpalosjes së deklaratave përmbyllëse në rastin gjyqësor kundër ish-presidentit të Kosovës, Hashim Thaçi, ish-kryeparlamentarëve, Kadri Veseli dhe Jakup Krasniqi, dhe ish-deputetit, Rexhep Selimi në Gjykatën Speciale, me seli në Hagë.

    Prokurorët kanë paralajmëruar se sot do t’iu duhen diku rreth 2 orë për t’i shpalosur përgjegjësitë penale të të akuzuarve dhe në fund, prokurorja e specializuar Kimberly West do të mbajë një fjalë përmbledhëse.

    Më pas fjalën do ta ketë mbrojtësi i viktimave./REL/

  • Si duket mashkulli dhe femra “i përsosur” sipas brezave

    Si duket mashkulli dhe femra “i përsosur” sipas brezave

    Një sondazh i fundit zbuloi tiparet fizike që britanikët nga brezat e ndryshëm i konsiderojnë më tërheqës, duke treguar ndryshimin e preferencave me moshën.

    Hulumtuesit e CREO Clinic intervistuan 1,000 persona mbi tiparet e partnerit ideal, duke përfshirë sy, flokë, lartësi, formë trupi dhe fytyre.

    Boomers (1946–1964)

    Mashkulli ideal: 1.70–1.75 m, trup klasik ose trapezoidal, sy blu, flokë kafe të errët, fytyrë drejtkëndëshe.

    Femra ideale: sy blu të rrumbullakët, hundë e vogël, buzë të plota, flokë të drejtë bjonde, trup orë xhami.

    Gen X (1965–1980)

    Mashkulli ideal: sy kafe, hundë e vogël, buzë zemër, flokë kafe të errët me stil fade të shkurtër, trup trapezoid, lartësi 1.78–1.83 m.

    Femra ideale: sy kafe, hundë e vogël, buzë të plota, fytyrë rrumbullakët, flokë të drejtë bjonde mesatare, trup orë xhami, lartësi 1.63–1.68 m.

    Millennials (1981–1996)

    Mashkulli ideal: sy kafe, hundë e vogël, buzë të plota, fytyrë trekëndëshe të kthyer, flokë kafe të errët valëzuar, trup atletik, lartësi 1.78–1.83 m.

    Femra ideale: sy kafe, hundë e vogël, buzë të plota, fytyrë rrumbullakët, flokë kafe të errët valëzuar mesatare–gjata, trup orë xhami, lartësi 1.63–1.68 m.

    Gen Z (1997–2012)

    Mashkulli ideal: sy kafe, hundë e vogël, buzë të plota, fytyrë trekëndëshe të kthyer, flokë kafe të errët valëzuar me stil fade të shkurtër, trup atletik, lartësi 1.70–1.75 m.

    Femra ideale: Sy kafe, hundë e vogël, fytyrë zemër, buzë të plota, flokë të gjatë të zezë të drejtë, trup orë xhami, lartësi 1.70–1.75 m.

    Sondazhi tregon se me brezat e rinj preferenca kalon nga flokë të hapura te të errëta, nga sy blu te sy kafe, dhe nga trupa klasik te trupa atletik për meshkujt, ndërsa figura “orë xhami” mbetet tipari më i kërkuar për femrat.

    CREO Clinic përdori gjithashtu AI për të vizualizuar partnerin ideal sipas secilit brez, duke reflektuar trendet moderne të bukurisë dhe kozmetikës.

  • Peticioni online kërkon njohjen e plisit shqiptar nga UNESCO

    Peticioni online kërkon njohjen e plisit shqiptar nga UNESCO

    Një peticion online ka nisur të qarkullojë duke i bërë thirrje UNESCO-s që plisi shqiptar të njihet zyrtarisht si pasuri kulturore dhe të përfshihet në Listën e Trashëgimisë Kulturore Jomateriale.

    Nënshkruesit argumentojnë se një hap i tillë do të ishte një vlerësim i merituar për një simbol të lashtë të identitetit kombëtar.

    Sipas nismëtarëve, njohja ndërkombëtare e plisit do të ndihmonte jo vetëm në ruajtjen dhe përcjelljen e trashëgimisë kulturore te brezat e ardhshëm, por edhe në rritjen e ndërgjegjësimit për vlerat shqiptare në arenën globale.

    Ata theksojnë se plisi rrezikon të margjinalizohet për shkak të mungesës së përfaqësimit zyrtar në institucionet ndërkombëtare të trashëgimisë.

    Plisi, i përdorur nga shqiptarët prej shekujsh, përfaqëson vazhdimësinë historike, traditën dhe lidhjen mes brezave. Ai shihet si një element që forcon ndjenjën e unitetit dhe krenarisë kombëtare, duke qenë pjesë e pandashme e identitetit kulturor shqiptar.

    Peticioni u bën thirrje qytetarëve që të bashkohen me nënshkrimin e tyre, në mënyrë që kërkesa për njohjen e plisit nga UNESCO të marrë mbështetje sa më të gjerë dhe të kontribuojë në mbrojtjen e kësaj trashëgimie për shqiptarët dhe për komunitetin global.

  • Publikohet video e gjetjes së trupit të Jeffrey Epstein

    Publikohet video e gjetjes së trupit të Jeffrey Epstein

    Gazeta britanike The Telegraph ka publikuar pamje të papara më parë nga kamerat e sigurisë që tregojnë momentin kur rojet e burgut gjetën trupin e Jeffrey Epstein në qelinë e tij më 10 gusht 2019.

    Financieri po mbahej në Qendrën Korrektuese Metropolitan të Nju Jorkut me akuza për trafikim qeniesh njerëzore për qëllime shfrytëzimi seksual, raporton The Telegraph.

    Rrethanat e vdekjes së Epstein, zyrtarisht të cilësuara si vetëvrasje, si dhe lidhjet e tij me një numër figurash të fuqishme dhe të famshme, duke përfshirë presidentë, manjatë të medias dhe anëtarë të familjes mbretërore, kanë nxitur teori të shumta konspiracioni se ai në të vërtetë është vrarë.

    Deri më tani, pamjet e zbulimit të trupit nuk janë bërë kurrë publike.

    The Telegraph e gjeti videon midis tre milionë dokumenteve të deklasifikuara të publikuara nga Departamenti i Drejtësisë i SHBA-së. Pamjet tregojnë një roje burgu që i afrohet tavolinës së sigurisë në repartin e izolimit ku ndodhej qelia e Epstein në orën 6:30 të mëngjesit.

    Rreth dhjetë sekonda më vonë, roja ecën drejt qelisë ku u gjet trupi. Pak më shumë se një minutë më vonë, një roje nxiton midis banakut dhe qelisë, dhe dy të tjerë i bashkohen atij. Vdekja e Epstein u deklarua zyrtarisht në orën 6:39 të mëngjesit.

    Sipas versionit zyrtar të FBI-së, Epstein i mori jetën vetes, siç konfirmohet nga një autopsi e kryer nëntë ditë pas vdekjes së tij.

    Hetuesit gjithashtu pohuan se midis kohës kur Epstein ishte i mbyllur në qelinë e tij në orën 22:40 të mbrëmjes më 9 gusht dhe kohës kur trupi i tij u gjet rreth orës 6:30 të mëngjesit të nesërmen, “askush nuk hyri në katet e njësisë speciale” ku ai mbahej.

    Megjithatë, ky pretendim vihet në dyshim nga pamjet e tjera të zbuluara rishtazi nga dosjet e Epstein, të cilat tregojnë një figurë portokalli që ngjitet shkallët për në qelinë e tij në orën 22:39.

    Zyra e Inspektorit të Përgjithshëm të Departamentit të Drejtësisë dhe FBI-ja e kanë interpretuar pamjet në fjalë ndryshe. Raporti i FBI-së e përshkruan figurën e turbullt si një “të burgosur të mundshëm”.

    Nga ana tjetër, kryeinspektori vuri në dukje se ishte një roje që mbante “mbrojtëse shtrati ose të brendshme” portokalli dhe e shënoi atë si një “oficer gjyqësor të paidentifikuar” në raportin përfundimtar.

  • U shtrua pas problemeve me zemrën, ish-presidenti Alfred Moisiu del nga spitali

    U shtrua pas problemeve me zemrën, ish-presidenti Alfred Moisiu del nga spitali

    Ish-presidenti i vendit Alfred Moisiu ka dalë nGa spitali Nënë Tereza, pasi u shtrua pak ditë më parë.

    Lajmin e ka bërë me dije vetë QSUT përmes një reagimi në rrjetet sociale ku shkruan “faleminderit President Moisiu për besimin e treguar ndaj mjekëve të QSUT! Ju urojmë shëndet të plotë dhe jetë të gjatë!”.

    Më 5 shkurt, mjekët e ekipit të aritmologjisë, pas konsultës i kanë vendosur një pacemaker me dy dhoma. Pacemaker është një pajisje mjekësore që ndihmon zemrën të rrahë rregullisht, kur ritmi i saj është shumë i ngadalshëm ose i çrregullt.

    Moisiu vuante nga rrahjet e ngadalta, ose bllok atrioventrikular, që lidhet me moshën. Aktualisht gjendja e tij është e qëndrueshme dhe në përmirësim.

  • Gjendet e vdekur një grua në banesën e saj në Prizren, policia nis hetimet

    Gjendet e vdekur një grua në banesën e saj në Prizren, policia nis hetimet

    Një grua është gjetur të hënën pa shenja jete në banesën e saj në Prizren.

    Policia ka bërë të ditur se vdekja e saj është konstatuar nga mjeku kujdestar, ndërsa që kanë nisur hetimet për rastin.

    “Është raportuar se viktima femër kosovare është gjetur në banesën e saj pa shenja jete. Njësitet relevante kanë dalë në vendin e ngjarjes ku mjeku kujdestar ka konstatuar vdekjen e viktimës. Me vendim të prokurorit trupi i pa jetë është dërguar në IML për obduksion”, thuhet në raportin 24-orësh.

  • Musk ndryshon planet, në vend të Marsit tani synon Hënën

    Musk ndryshon planet, në vend të Marsit tani synon Hënën

    Ambicia e Elon Musk për t’u vendosur një ditë në Mars duket se është lënë në plan të dytë për shkak të një qëllimi mjaft më të afërt dhe më të arritshëm – dërgimin e njerëzve për të jetuar në Hënë.

    Në një deklaratë, miliarderi tha se kompania e tij SpaceX tani i ka zhvendosur prioritetet e saj në ndërtimin e “një qyteti që rritet vetë në Hënë”, duke argumentuar se kjo mund të arrihet në më pak se një dekadë, krahasuar me më shumë se 20 vjet për një plan të ngjashëm në Mars.

    “Prioriteti kryesor është sigurimi i së ardhmes së qytetërimit dhe Hëna është më e shpejtë”, tha Musk.

    “Është e mundur të udhëtosh në Mars vetëm kur planetët rreshtohen çdo 26 muaj (kohëzgjatja e udhëtimit gjashtëmujor), ndërsa ne mund të nisemi për në Hënë çdo 10 ditë (kohëzgjatja e udhëtimit 2-ditor)”, shtoi ai.

    Nuk është menjëherë e qartë se çfarë nënkuptonte Musk me një “qytet që rritet vetë” ose nëse planet e tij janë në përputhje me një plan të ngjashëm hënor që propozon NASA.

    Musk deklaroi se kompania mbetet e përkushtuar për të ndërtuar një qytet në Mars dhe do të fillojë ta bëjë këtë brenda rreth pesë deri në shtatë vjetësh.

    Kohët e fundit, miliarderi kishte thënë se SpaceX po punonte për të ulur anijen e saj të parë kozmike pa pilot në Mars, që në fund të vitit 2026 .

    Ulja e parashikimeve të tij të mëparshme për udhëtimet në hapësirë nga Musk vjen pasi SpaceX bleu XAI javën e kaluar, në një veprim që do të bashkojë dy nga kompanitë e tij më ambicioze në firmën private më të vlefshme në botë.

    Për më shumë se një dekadë, Musk e ka bërë të qartë fokusin e tij të madh në krijimin e një vendbanimi në Mars, duke thënë se ky ka qenë qëllimi kryesor i SpaceX që nga themelimi i kompanisë në vitin 2002.

    Në fjalimet e mbajtura në konferenca dhe ngjarje hapësinore për punonjësit e SpaceX, ai ka detajuar plane ambicioze për krijimin e një pranie të përhershme njerëzore në Planetin e Kuq, duke thënë se një hap i tillë është i nevojshëm për të siguruar që një koloni njerëzish të mund të mbijetojë një apokalips të mundshëm.

    NASA, në të kundërt, është përqendruar në ambiciet e saj hënore, veçanërisht që nga mandati i parë i presidentit Donald Trump, kur zëvendëspresidenti i atëhershëm Mike Pence deklaroi papritur se SHBA-të do t’i kthenin astronautët e tyre në hënë deri në vitin 2024.

    Plani i guximshëm nuk funksionoi dhe NASA aktualisht po punon për të rikthyer astronautët në sipërfaqen hënore deri në vitin 2028 – afati kohor për të cilin agjencia kishte punuar në epokën e Obamës.

    Ky kthim do të shënojë herën e parë që njerëzit kanë shkelur në Hënë që nga përfundimi i programit Apollo në vitin 1972.