ATV

Author: K.B.

  • Ke flokë të hollë? Ky është gabimi që po i bën të duken edhe më pa formë!

    Ke flokë të hollë? Ky është gabimi që po i bën të duken edhe më pa formë!

    Shumë persona me flokë të hollë ose që po hollohen mendojnë se zgjidhja është t’i lënë të rriten gjatë, t’i presin drejt ose t’i shmangin fare prerjet dhe stilimin.

    Por ekspertët paralajmërojnë: kjo është pikërisht arsyeja pse flokët duken pa jetë dhe pa formë.

    Gabimi më i madh është dëshira për flokë “të rëndë” dhe “të plotë”, pa marrë parasysh dendësinë natyrale.

    Në realitet, forma e prerjes ka shumë më tepër rëndësi sesa gjatësia apo produktet e stilimit.

    Flokët e hollë kanë tendencë të humbasin shpejt strukturën.

    Prandaj, prerjet me shtresa të buta, fijet që rrethojnë fytyrën dhe majat e lehta krijojnë lëvizje natyrale, pa hequr volum.

    Edhe flokët e shkurtër me shtresa delikate janë një zgjedhje shumë e suksesshme, sepse ruajnë peshën në fund, por duken më të freskët dhe më të gjallë.

    Për ata që nuk preferojnë shtresat, vijat e drejta mbeten një opsion i sigurt.

    Ndërkohë, balluket e gjata dhe të buta rreth fytyrës ndihmojnë në krijimin e ndjesisë së trashësisë dhe lëvizjes, pa e rënduar pamjen.

    Përfundimi është i qartë: flokët e hollë nuk kanë nevojë për “magji” apo rregullime ekstreme.

    Ajo që u duhet është një prerje e zgjuar, një gjatësi e përshtatshme dhe stilim i balancuar.

    Me formën e duhur, flokët mund të duken më të plotë, më të kuruar dhe shumë më elegantë, pa produkte të tepërta.

  • A mund të rrisin tatuazhet rrezikun për kancer?

    A mund të rrisin tatuazhet rrezikun për kancer?

    Tatuazhet janë më të përhapura se kurrë, por hulumtimet e fundit po ngrenë pyetje rreth ndikimit të bojës së përhershme në shëndetin afatgjatë, përfshirë edhe një lidhje të mundshme me disa lloje kanceri.

    Sipas një studimi të publikuar në European Journal of Public Health, rreth 13–21% e popullsisë në Evropën Perëndimore kanë të paktën një tatuazh.

    Megjithatë, përkundër kësaj përhapjeje të madhe, dihet ende shumë pak për pasojat shëndetësore afatgjata të tatuazheve.

    Studime të mëhershme kanë treguar se boja e tatuazheve mund të grumbullohet në nyjet limfatike, duke shkaktuar inflamacion dhe, në raste shumë të rralla, limfomë, një formë e kancerit të gjakut.

    Një studim më i ri nga Universiteti i Danimarkës Jugore, i publikuar në vitin 2025 në revistën BMC Public Health, sugjeron se personat me tatuazhe mund të kenë rrezik më të lartë për kancer të lëkurës dhe limfomë.

    Studiuesit analizuan të dhënat e binjakëve, duke krahasuar ata që kishin zhvilluar kancer me ata që nuk kishin.

    Sipas rezultateve, binjakët me tatuazhe kishin gati katër herë më shumë rrezik për kancer të lëkurës, ndërsa rreziku për limfomë ishte 2.7 herë më i lartë.

    Po ashtu, studimi sugjeron se tatuazhet më të mëdha se madhësia e pëllëmbës së dorës mund të rrisin më tej këtë rrezik.

    “Sa më shumë bojë në trup, aq më i lartë duket të jetë rreziku,” ka deklaruar Signe Bedsted Clemmensen, bashkautore e studimit dhe profesoreshë e statistikës në universitetin danez.

    Megjithatë, ekspertët theksojnë se këto gjetje janë ende paraprake dhe nuk dëshmojnë një lidhje të drejtpërdrejtë shkak–pasojë.

    Faktorë të tjerë si lloji i bojës, vendi i tatuazhit, predispozitat gjenetike dhe mjedisi gjithashtu luajnë rol të rëndësishëm.

  • Gjykata e Apelit e Kosovës ka pranuar 2,548 lëndë, ka zgjidhur 1,761

    Gjykata e Apelit e Kosovës ka pranuar 2,548 lëndë, ka zgjidhur 1,761

    Gjykata e Apelit e Kosovës ka publikuar raportin e punës për muajin janar 2026, i cili përfshin të dhëna të detajuara mbi performancën e përgjithshme të gjykatës, si dhe raportet individuale të gjyqtarëve.

    Sipas njoftimit,gjatë muajit janar Gjykata e Apelit ka pranuar gjithsej 2,548 lëndë, ndërsa ka arritur të zgjidhë 1,761 lëndë. Kjo paraqet një shkallë efikasiteti prej 69.1 për qind.

    ““Publikimi i raportit synon të ofrojë një pasqyrë të qartë dhe transparente të punës së Gjykatës së Apelit, duke kontribuar në rritjen e llogaridhënies institucionale dhe forcimin e besimit të qytetarëve në sistemin gjyqësor të Kosovës”, thuhet në njoftim.

  • Luksi i Georgina-s, pozon mbi një “Ferrari”, vlera e tij marramendëse

    Luksi i Georgina-s, pozon mbi një “Ferrari”, vlera e tij marramendëse

    Georgina Rodriguez ka tërhequr vëmendjen e fansave duke postuar një album fotografish në Instagram, ku duket në udhëtime të ndryshme dhe momente të përditshme me fëmijët e saj.

    Në një nga fotot më të komentuar, ajo shihet e ulur mbi një supermakinë Ferrari, një model me vlerë rreth 440,000 paundë, duke mbajtur një buqetë me lule dhe duke dhënë një pasqyrë më personale të jetës së saj.

    Ajo udhëtoi për të parë piramidat në Egjipt dhe kaloi kohë me fëmijët e saj. Georgina, 42 vjeç, shkroi mbi postimin: “Shtëpi”. Në një foto ajo pozoi me një buqetë me lule në dorë, ndërsa ishte ulur sipër një supermakine Ferrari.

    Ferrari SF 90 Stradale Assetto Fiorano shitet me pakicë për rreth 440,000 paundë, me disa modele që shkojnë edhe më lart.

    Postimi vjen në një kohë kur Cristiano Ronaldo vazhdon të mungojë në detyrimet garuese të Al-Nasr. Superylli 41-vjeçar u la jashtë skuadrës për ndeshjen e dytë radhazi, ndërsa ekipi i tij mposhti Al-Ittihadin 2-0, duke rritur presionin mbi drejtuesit e klubit. Raportohet se Ronaldo është i pakënaqur me menaxhimin e klubit, sidomos me Fondin Publik të Investimeve (PIF) të Arabisë Saudite, i cili zotëron aksione në disa ekipe të ligës. Ai beson se klubet rivale janë trajtuar në mënyrë të favorshme gjatë afatit kalimtar, gjë që ka intensifikuar pasigurinë për të ardhmen e tij në Arabinë Saudite.

    Ndërkohë, Georgina ka ndjekur një itinerar luksoz, duke vizituar edhe piramidat në Egjipt dhe duke kaluar kohë me fëmijët, përfshirë Cristiano Junior, i cili luajti në një ndeshje për ekipin e të rinjve të Al-Nasri.

  • Shkaktuan dhunë ndaj femrave, tre burra në Fushë Kosovës shoqërohen në polici

    Shkaktuan dhunë ndaj femrave, tre burra në Fushë Kosovës shoqërohen në polici

    Policia e Kosovës, ka njoftuar për rast të dhunës në familje në Fushë Kosovë, ku tre persona nga tri raste të ndara, janë shoqëruar në polici.

    Nga policia theksohet edhe se të dyshuarit kanë shkaktuar dhunë ndaj viktimave femra.

    ‘’DHUNË NË FAMILJE

    Prishtinë, Fushe Kosove, Graqanice / 09.02.2026 Ne tri raste te ndara tre te dyshuar meshkuj kosovarë janë shoqëruar per intervistim pas dyshimeve per kryerje te veprës se lartcekur, ndaj viktimave femra kosovare. Me urdhër te prokurorit te tria rastet do te vazhdojnë te trajtohen ne gjendje te lire’’, ka njoftuar Policia.

  • Rreth 70 mijë vizitorë vetëm në një muaj vizituan Kosovën

    Rreth 70 mijë vizitorë vetëm në një muaj vizituan Kosovën

    Vetëm gjatë dhjetorit të vitit 2025, në hotelet e Kosovës janë regjistruar 68 293 vizitorë, çka paraqet një rritje prej 6,1 për qind krahasuar me të njëjtin muaj të vitit paraprak, kur numri i tyre ishte 64 380.

    Kosova po bëhet gjithnjë e më shumë destinacion i preferuar për vizitorë vendas dhe të huaj. Vetëm në muajin dhjetor të vitit 2025, në hotelet e vendit qëndruan gjithsej 68 293 vizitorë, duke shënuar një rritje prej 6,1 për qind krahasuar me të njëjtin muaj të vitit paraprak, kur numri i tyre ishte 64 380.

    Sipas të dhënave zyrtare të Agjencisë së Statistikave të Kosovës, 27 776 prej tyre ishin vizitorë vendorë, ndërsa 40 517 erdhën nga jashtë vendit — një dëshmi se turizmi i huaj po merr gjithnjë e më shumë hov.

    Numri i net-qëndrimeve gjatë dhjetorit arriti në 132 148, nga të cilat 71 624 (ose 54,2%) u realizuan nga vizitorët e jashtëm, ndërsa 60 524 (45,8%) nga vendorët. Kjo tregon se vizitorët e huaj, përveç se janë më të shumtë, qëndrojnë edhe më gjatë në vend.

    Në mesin e rajoneve të Kosovës, Peja vazhdon të mbetet destinacioni më i frekuentuar për vizitorët vendorë. Gjatë dhjetorit 2025, në këtë rajon janë regjistruar 9 655 vizitorë të brendshëm dhe 26 550 net-qëndrime, duke reflektuar potencialin turistik të zonave malore dhe resorteve dimërore në Rugovë.
    Ndërsa për vizitorët e huaj, viti i kaluar shënoi një rritje prej 2,5 për qind krahasuar me dhjetorin e vitit 2024. Nga gjithsej 40 517 vizitorë të jashtëm, shumica erdhën nga Shqipëria, Gjermania, Zvicra dhe Turqia, ndërsa janë shënuar vizita edhe nga shtete të tjera evropiane dhe më gjerë.

    Dhjetori 2025 e mbylli vitin me bilanc pozitiv për sektorin e turizmit dhe hotelerisë në Kosovë. Kombinimi i vizitorëve vendorë dhe atyre të huaj dëshmon një interes të shtuar për vendin, ndërsa trendi i rritjes pritet të vazhdojë edhe gjatë vitit 2026.

    Gjatë ditës edhe e përditshmja britanike The Guardian i ka kushtuar një artikull vendeve që duhet vizituar gjatë vendit.

    Në këtë artikull kanë arritur të renditen edhe Kosova e Shqipëria të cilat sipas medias britanike patjetër që duhet të vizitohen.

    Librat e historisë ofrojnë kontekst thelbësor për ecje në këmbë në Kosovë, por nuk ju përgatisin për bukurinë e maleve, thuhet në artikull.

    “Gjatë verës kalova një javë në Via Dinarica të Kosovës, e cila u ripërcaktua së fundmi. Ne ecëm pranë luleve të edelëeiss në kreshtën kufitare me Malin e Zi; e thepisur dhe e pjerrët nga njëra anë dhe e gjelbër e gjallë nga ana tjetër, duke zbritur drejt livadheve me lule të egra rozë dhe të verdha”, u tha ndër tjera..

    Bletët fluturonin rreth shkëmbinjve të lartë, ndërsa bletëngrënësit me ngjyra të ndezura uleshin në degë më poshtë.

    Kafshët e egra të humbura në pjesën më të madhe të Evropës ende lulëzojnë këtu (arinj, ujqër, rrëqebull) në një mozaik me pemë lisi dhe ahu, boronica dhe shkurre, lugina të thella dhe pllaja të larta.

    Liqenet malore krijojnë vende ëndrrash për not nën majat e larta pranë Shqipërisë.

  • Posta e Kosovës përjetëson Uta Ibrahimin dhe Mrika Nikqi në pulla postare

    Posta e Kosovës përjetëson Uta Ibrahimin dhe Mrika Nikqi në pulla postare

    Posta e Kosovës, përmes Filatelisë së saj, ka lëshuar sot në qarkullim emisionin e ri të pullave postare “Alpinistet e Kosovës – Uta Ibrahimi dhe Mrika Nikqi”.

    Ky emision i pullave postare i kushtohet alpinizmit kosovar dhe grave që, me guxim, përkushtim dhe arritje historike, kanë ngritur emrin dhe flamurin e Kosovës në majat më të larta të botës.

    Motivet e dy pullave postare prezantojnë dy alpinistet kosovare të rangut botëror: Uta Ibrahimi, e cila arriti të bëhet gruaja e parë nga Ballkani që ka ngjitur 14 majat mbi 8.000 metra, si dhe Mrika Nikqi, alpinistja më e re kosovare që po ashtu preku majat më të larta të botës, përfshirë majën Everest.

    Me guxim, përkushtim dhe vizion, Uta dhe Mrika e kanë vendosur Kosovën në hartën globale të alpinizmit. Dy sportistet e jashtëzakonshme janë simbole të ambicies së pakufishme dhe dëshmi se ëndrrat e mëdha nuk njohin moshë. Shembulli i tyre mbetet frymëzim për alpinistët e të gjitha brezave.

    Posta e Kosovës vazhdon të promovojë vlerat sportive të vendit në botë, duke ftuar koleksionistët, institucionet, bizneset dhe qytetarët ta pasurojnë koleksionin e tyre me këtë emision të veçantë filatelik, i cili do të jetë në qarkullim postar deri në konsumim të plotë.

  • Humb jetën tragjikisht një kosovar gjatë skijimit në Çikago

    Humb jetën tragjikisht një kosovar gjatë skijimit në Çikago

    Një shtetas shqiptar nga Kosova, me inicialet G.D., ka ndërruar jetë pas një aksidenti tragjik gjatë skijimit në Çikago, Shtetet e Bashkuara të Amerikës, shkruan albinfo.

    G.D. kishte emigruar në SHBA gjatë periudhës së luftës në Kosovë (1998–1999), ku ndër vite arriti të ndërtojë jetën dhe karrierën e tij profesionale. Pas përfundimit të studimeve, ai u angazhua në administratën shtetërore të Illinoisit, ku u dallua për profesionalizëm dhe përkushtim në punën e tij.

    Ai kujtohet nga komuniteti shqiptar si një person me vlera të larta njerëzore, i përkushtuar ndaj ruajtjes së traditës dhe promovimit të aktiviteteve kombëtare në diasporë.

  • Studimi amerikan: Pirja e kafesë dhe çajit me kafeinë ndihmon në uljen e rrezikut të demencës

    Studimi amerikan: Pirja e kafesë dhe çajit me kafeinë ndihmon në uljen e rrezikut të demencës

    Studimi, i bazuar në përgjigjet e 132,000 të rriturve në Shtetet e Bashkuara gjatë katër dekadave, tregoi se njerëzit me konsumin më të lartë ditor të kafesë me kafeinë kishin një rrezik 18 për qind më të ulët për të zhvilluar demencë krahasuar me ata me konsumin më të ulët, raporton Reuters.

    Gjithashtu, këta individë kishin një shkallë më të ulët të problemeve të vetëperceptuara me kujtesën ose të menduarit, me pothuajse dy pikë përqindjeje.

    Rezultate të ngjashme u vunë re tek subjektet që konsumuan çaj me kafeinë, ndërsa pijet pa kafeinë nuk treguan të njëjtin efekt.

    Autorët e studimit, të botuar në revistën “JAMA”, paralajmërojnë se rezultatet nuk vërtetojnë se kafeina mbron drejtpërdrejt trurin.

    “Efekti i kafeinës, nëse ka ndonjë, është i vogël, dhe ka mënyra të tjera të dokumentuara mirë për të mbrojtur funksionin njohës gjatë plakjes, duke përfshirë aktivitetin fizik, një dietë të shëndetshme dhe gjumë të mjaftueshëm”, tha Dr. Daniel Wang i Shkollës Mjekësore të Harvardit.

    Efektet më të theksuara u vunë re te pjesëmarrësit që konsumuan dy deri në tre filxhanë kafe me kafeinë ose një deri në dy filxhanë çaj me kafeinë në ditë.

    Ata gjithashtu arritën rezultate më të mira në testet objektive të funksioneve njohëse. Hulumtimi u financua nga Institutet Kombëtare të Shëndetit të SHBA-së.

    Dr. Yu Zhang nga Shkolla e Shëndetit Publik të Harvardit shtoi se rezultate të ngjashme u panë te njerëzit me predispozita të ndryshme gjenetike ndaj demencës, duke sugjeruar që kafeja ose kafeina mund të jenë po aq të dobishme për të gjithë.

  • Municion dhe pajisje ushtarake me emblemë të Serbisë zbulohen në një shtëpi të pabanuar në Leposaviq

    Municion dhe pajisje ushtarake me emblemë të Serbisë zbulohen në një shtëpi të pabanuar në Leposaviq

    Policia e Kosovës ka gjetur fishekë, helmetë ushtarake, xhaket me emblemë të Serbisë e karikatorë në një shtëpi të pabanuar në Leposaviq.

    Në këtë shtëpi, pronë e një mashkulli shtetas serb, janë kapur edhe kuti metali, pjesë të antiplumbit dhe çantë ushtarake.

    Lidhur me këtë rast është njoftuar prokurori.

    “Gjatë kontrollit në një shtëpi të pabanuar, pronë e një mashkulli shtetas serb, janë gjetur dhe konfiskuar : 59 fishekë kalibri i panjohur, një kuti metali, një helmete ushtarake, një jakne me emblemë të serbisë, një futrollë për thikë, një pjesë e antiplumbit, një çantë ushtarake, dy karikatorë të AK-47, dhe një karikator tjetër me një fishek. Është njoftuar prokurori i cili ka urdhëruar të iniciohet rasti”, njoftoi policia në raport.