Author: K.B.

Papa Leo i XIV ka bërë thirrje që priftërinjtë të mos mbështeten te inteligjenca artificiale (AI) për të përgatitur ligjëratën fetare, duke theksuar se AI nuk mund të ndajë besimin dhe nuk zëvendëson përvojën personale dhe reflekimin shpirtëror të predikuesit.

Gjatë një takimi me klerin e Dioqezës së Romës, Papa i paralajmëroi priftërinjtë për “tendencën për të përgatitur predikimet me AI” dhe i inkurajoi ata që të përdorin mendjen dhe reflektimin e tyre personal.

Ai tha se truri duhet të përdoret, ashtu si çdo muskul i trupit – nëse nuk punohet me të, dobësohet.

Papa gjithashtu nënvizoi se një ligjëratë fetare e vërtetë është ndarja e besimit, dhe se asnjë “chatbot” nuk mund ta bëjë këtë, pasi AI nuk mund të ndajë besimin e thellë personal që vjen nga meditimi, lutja dhe përvoja e jetuar shpirtërore.

Ai nuk e hodhi poshtë teknologjinë në përgjithësi, por kërkoi vigjilencë dhe dallim në përdorimin e saj, duke theksuar se shërbimet fetare duhet të vijojnë të reflektojnë besimin dhe përvojën personale të priftërinjve për komunitetet që shërbejnë.

Papa gjithashtu paralajmëroi për rrezikun e iluzioneve të botës digjitale, siç janë ndjekësit dhe pëlqimet në rrjetet sociale, duke kujtuar se predikimet shpirtërore nuk duhet të ngatërrohen me famën online.

Gjatë së enjtes, zëvendëskryeministri i parë dhe ministri i Punëve të Jashtme dhe Diasporës Glauk Konjufca mbajti takim me ambasadorin e Republikës së Francës në Kosovë Sh.T. Olivier Guerot në kuadër të takimeve të para pas formimit të qeverisë.

Në këtë takim ambasadori Guérot e uroi zëvendëskryeministrin Konjufca për detyrën dhe rikonfirmoi gatishmërinë e Francës për vazhdimin e partneritetit me Republikën e Kosovës.

Gjatë takimit, sipas MPJD-së u diskutua forcimi i marrëdhënieve dypalëshe dhe për thëllimin e bashkëpunimit në fusha me interes të përbashkët.
“Theks i veçantë iu kushtua mundësive për zgjerimin e bashkëpunimit ekonomik, rritjen e shkëmbimeve tregtare dhe nxitjen e investimeve, si dhe forcimit të lidhjeve kulturore dhe akademike ndërmjet dy vendeve”, thuhet në njoftimin e MPJD-së.

Ndërkaq, ministri Konjufca në takim theksoi rëndësinë e koordinimit me Francën për realizimin e objektivave ndërkombëtare të Kosovës, përfshirë avancimin e integrimit në Bashkimin Evropian dhe procesin e anëtarësimit në Këshillin e Evropës.

Agjencia e Statistikave të Kosovës (ASK) ka bërë të ditur se Indeksi i tërësishëm i Kostos së Ndërtimit (IKN) në Kosovë ka shënuar rritje për 0,5 për qind në tremujorin e katërt (TM4) 2025, krahasuar me tremujorin e tretë (TM3) 2025, raporton KP.

Sipas ASK-së, në këtë periudhë rritje është vërejtur te transporti (3,5%); pagat (1,2%); kostot e tjera (1,2%); materialet (0,3%) dhe energjia (0,2%). Ndërkohë, rënie është shënuar te makineritë (-0,1%).

Në krahasim me të njëjtën periudhë të vitit paraprak, përkatësisht TM4 2025 me TM4 2024, Indeksi i Kostos së Ndërtimit ka shënuar rritje për 3,5 për qind (sipas të dhënave detajuese 3,6%).

Rritje më e theksuar në këtë krahasim vjetor është regjistruar te energjia (9,8%); pagat (8,1%); kostot e tjera (5,3%); transporti (4,4%) dhe materialet (2,6%). Ndërsa, rënie është evidentuar te makineritë (-0,4%).

Presidenca ka reaguar pas takimit që presidentja Vjosa Osmani, ka pasur ditën e sotme me të ngarkuarën me punë të Shteteve të Bashkuara të Amerikës, Anu Prattipati. Në komunikatën për media, thuhet se gjatë takimi është diskutuar vizita e Osmanit në SHBA, dhe se, presidentja ka shprehur mirënjohje për ftesën që Kosova të jetë bashkëthemeluese e Bordit të Paqes.

Në njoftim shtohet edhe se, në takim është diskutuar edhe për zhvillimet e fundit politike në vend, ku theksi është vendosur mbi rëndësinë e përmbylljes së ‘’ proceseve kushtetuese dhe konsolidimit të plotë institucional’’.

Po ashtu, bëhet e ditur se, Osmani ka veçuar edhe çështjet e diskutuara në takimin me Sekretarin e Shtetit, Marco Rubio, duke theksuar diskutimet e fokusuara në avancimin e partneritetit strategjik Kosovë–SHBA, me theks në sigurinë rajonale, diplomacinë, ekonominë dhe mbrojtjen.

‘‘Duke folur për zhvillimet e fundit në vend, Presidentja Osmani vuri në pah edhe përmirësimet e dukshme në fushën e sigurisë dhe sundimit të ligjit në veri të vendit, të reflektuara në raportet e fundit të Policisë së Kosovës për rendin dhe ligjin gjatë vitit 2025. Sipas këtyre të dhënave, konfirmohet një situatë dukshëm më e qetë dhe më e sigurt për të gjithë qytetarët në atë pjesë të vendit’’, thuhet mes tjerash në komunikatë.

Postimi i plotë:

Presidentja Osmani priti në takim të ngarkuarën me punë të Shteteve të Bashkuara të Amerikës në Kosovë, znj. Anu Prattipati

Presidentja e Republikës së Kosovës, Vjosa Osmani, priti në takim të ngarkuarën me punë të Shteteve të Bashkuara të Amerikës në Kosovë, znj. Anu Prattipati, me të cilën diskutoi për vizitën e saj të fundit në SHBA dhe takimet me zyrtarë të lartë të administratës amerikane, zhvillimet e fundit në vend, si dhe çështje të ndryshme me interes të përbashkët.

Presidentja Osmani shprehu edhe njëherë mirënjohje për ftesën e Presidentit amerikan, Donald Trump, që Kosova të jetë shtet bashkëthemelues i Bordit të Paqes, si dhe për garancat e dhëna për paqen dhe stabilitetin në rajon, duke rikonfirmuar përkushtimin e Kosovës për angazhim dhe kontribut të vazhdueshëm.

Ajo veçoi po ashtu çështjet e diskutuara në takimin me Sekretarin e Shtetit, Marco Rubio, duke theksuar diskutimet e fokusuara në avancimin e partneritetit strategjik Kosovë–SHBA, me theks në sigurinë rajonale, diplomacinë, ekonominë dhe mbrojtjen. Presidentja ritheksoi rëndësinë e pranisë ushtarake amerikane dhe të aleatëve në kuadër të NATO-s si faktor kyç për stabilitetin, si dhe theksoi se anëtarësimi i Kosovës në NATO mbetet objektiv strategjik për paqe afatgjatë.

Me këtë rast, Presidentja Osmani nënvizoi sërish rëndësinë e vijimit të dialogut strategjik bilateral, duke theksuar se partneriteti me SHBA-të është interes jetik dhe ekzistencial për Republikën e Kosovës.

Gjatë takimit u diskutua edhe për zhvillimet e fundit politike në vend, me theks në rëndësinë e përmbylljes së proceseve kushtetuese dhe konsolidimit të plotë institucional, në funksion të stabilitetit demokratik, zhvillimit të vendit dhe adresimit të nevojave të qytetarëve.

Duke folur për zhvillimet e fundit në vend, Presidentja Osmani vuri në pah edhe përmirësimet e dukshme në fushën e sigurisë dhe sundimit të ligjit në veri të vendit, të reflektuara në raportet e fundit të Policisë së Kosovës për rendin dhe ligjin gjatë vitit 2025. Sipas këtyre të dhënave, konfirmohet një situatë dukshëm më e qetë dhe më e sigurt për të gjithë qytetarët në atë pjesë të vendit.

Ministri për Punë, Familje dhe Vlerat e Luftës Çlirimtare, Andin Hoti, ka listuar projektligjet që do të procedohen këtë vit, bashkë me ligjet që parashikohet t’i nënshtrohen procesit të vlerësimit.

Përmes një njoftimi, Hoti u shpreh se këto ligje dhe projektligje prekin drejtpërdrejt kategoritë më të ndjeshme dhe shtyllat kryesore të drejtësisë sociale në vend.

Në mesin e projektligjeve për procedim është ai për skemën e ndihmës sociale, për personat e zhdukur, për punën, sigurinë dhe shëndetin në punë.

“Vlerësimi ex-post ka për qëllim të analizojë zbatimin praktik të ligjeve, efektet e tyre në terren, si dhe nevojën eventuale për ndryshime apo plotësime” deklaroi Hoti.

Ai po ashtu bëri me dije se ligjet që gjatë këtij viti do t’i nënshtrohen vlerësimit janë: luigji për skemat pensionale, ligji për veteranët e luftës së UÇK-së, si dhe ai për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, viktimave civile dhe familjeve të tyre./EO/

Për herë të parë, qyteti i Ghentit në Belgjikë ka ndriçuar dy nga rrugët e tij më të ngarkuara tregtare me drita festive të Ramazanit, duke hedhur një shkëlqim të ngrohtë mbi muajin e agjërimit.

Iniciativa, e udhëhequr nga Shoqata e Xhamive të Ghentit (VGM) në bashkëpunim me shitësit vendas, ka transformuar Bevrijdingslaan-Phoenixstraat në lagjen Brugse Poort dhe Wondelgemstraat në lagjen Rabot në korridore ndriçuese që shënojnë Ramazanin.

Të vendosura në ditët para muajit të shenjtë, dritat do të qëndrojnë në vend deri në festën e Fitër Bajramit që shënon fundin e Ramazanit.

“Kjo është një iniciativë që është e para e këtij lloji në të gjithë Belgjikën, askund tjetër nuk janë varur dritat në Belgjikë”, tha Mohamed Abd El Motleb Omar, kryetar i VGM.

Koncepti mori formë katër vjet më parë pasi dekorime të ngjashme të Ramazanit u shfaqën në Londër.

Tregtarët vendas më vonë i dhanë mandat shoqatës që të merrej me aspektet procedurale dhe operacionale të sjelljes së dritave në Belgjikë, përfshirë sigurimin e lejeve.

“Nuk u financua nga këshilli bashkiak. U financua 100 për qind nga tregtarët vendas”, theksoi Omar.

VGM përfaqëson 23 xhami në të gjithë Ghentin dhe punon për të mbështetur komunitetin mysliman, duke nxitur bashkëpunimin midis kongregacioneve të ndryshme, përfshirë ato me origjinë turke, marokene, afgane dhe pakistaneze. /AA/

Ish-ministri i Arsimit, Arsim Bajrami ka shprehur gatishmëri për të qenë njëri nga kandidatët konsensual për president të vendit.

Ai i ka publikuar në Facebook një letër të gjatë drejtuar liderëve të katër partive kryesore politike në vend.

“Shpreh gatishmërinë time për të vënë veten në dispozicion të institucioneve dhe të spektrit politik dhe të qytetarëve të vendit si njëri prej kandidatëve konsensual për President të Republikës së Kosovës, me përkushtim të plotë ndaj unitetit kombëtar, forcimit të rendit kushtetues, stabilitetit institucional dhe përmbylljes të procesit të shtetndërtimit, në shërbim të qytetarëve dhe të perspektivës evropiane të Republikës së Kosovës”, thuhet ndër tjerash në letrën publike të Bajramit.

Profesori ka bërë thirrje për “unitet politik” për zgjedhjen e Presidentit.

Ai ka përmendur momentin e rëndësishëm për stabilitet institucional, sfidat gjeopolitike, përvojën e tij, si arsye se i plotëson “kushtet profesionale, politike dhe morale” për këtë pozitë.

Letra e plotë e Arsim Bajramit:

Thirrje për unitet politik për zgjedhjen e Presidentit të Republikës së Kosovës

I nderuar Z. Albin Kurti, Kryetar i Lëvizjes Vetëvendosje,

I nderuar Z. Bedri Hamza, Kryetar i Partisë Demokratike të Kosovës,

I nderuar Z. Lumir Abdixhiku, Kryetar i Lidhjes Demokratike të Kosovës,

I nderuar Z. Ramush Haradinaj, Kryetar i Aleancës për Ardhmërinë e Kosovës,

Në këtë moment të rëndësishëm për stabilitetin institucional dhe funksionimin kushtetues të Republikës së Kosovës, ju drejtohem me thirrjen që, përtej dallimeve politike dhe interesave partiake, të ndërtohet një unitet politik konsensual për zgjedhjen e Presidentit të Republikës së Kosovës, me qëllim të shmangies së krizave të panevojshme institucionale, rrezikut të shpërndarjes së Kuvendit dhe mbajtjes së zgjedhjeve të parakohshme.

Duke pasur parasysh sfidat komplekse gjeopolitike dhe të sigurisë me të cilat përballet Republika e Kosovës, të cilat kërkojnë maturi shtetërore, unitet politik dhe përgjegjësi të lartë institucionale;

Duke marrë në konsideratë nevojën imperative për përmbylljen e qëndrueshme të procesit të shtetndërtimit, në përputhje me Kushtetutën e Republikës së Kosovës, parimin e sovranitetit shtetëror dhe orientimin euroatlantik të vendit;

Duke çmuar rolin kushtetues të Presidentit të Republikës si figurë unifikuese, mbi-partiake dhe përfaqësuese e unitetit politik dhe qytetar të popullit të Kosovës;

Duke u bazuar në përvojën time shumëvjeçare në të gjitha fazat kyçe të shtetndërtimit të Kosovës që nga viti 1990, përfshirë rezistencën institucionale, ndërtimin e rendit kushtetues dhe proceset vendimtare të tranzicionit politik;

Duke qenë njëri ndër hartuesit e të gjitha akteve themelore kushtetuese të Kosovës, si dhe duke dhënë kontributin tim politik, juridik dhe institucional gjatë luftës çlirimtare të Ushtrisë Çlirimtare të Kosovës, në funksion të realizimit të së drejtës së popullit të Kosovës për liri, vetëvendosje dhe shtet të pavarur;

Duke pasur përvojë të drejtpërdrejtë në negociatat ndërkombëtare për lirinë e Kosovës në Rambuje dhe për pavarësinë e saj në procesin e bisedimeve të Vjenës;

Duke njohur në mënyrë të thelluar sistemin kushtetues, juridik dhe institucional të Republikës së Kosovës, si dhe mekanizmat e funksionimit të institucioneve në plan vendor dhe ndërkombëtar;

Duke ndërtuar ndër vite bashkëpunim institucional korrekt, dialog politik konstruktiv dhe respekt reciprok me të gjitha subjektet politike;

Me bindje se i plotësoj kushtet profesionale, politike dhe morale për një kandidaturë konsensuale në funksion të unitetit politik dhe funksionimit kushtetues të institucioneve të Republikës së Kosovës,

Shpreh gatishmërinë time për të vënë veten në dispozicion të institucioneve dhe të spektrit politik dhe të qytetarëve të vendit si njëri prej kandidatëve konsensual për President të Republikës së Kosovës, me përkushtim të plotë ndaj unitetit kombëtar, forcimit të rendit kushtetues, stabilitetit institucional dhe përmbylljes të procesit të shtetndërtimit, në shërbim të qytetarëve dhe të perspektivës evropiane të Republikës së Kosovës.

Njëkohësisht, vlerësoj lartë qëndrimin dinjitoz, parimor dhe shtetformues të kolegut dhe mikut tim të fakultetit,Prof.dr.Murat Jashari dhe të familjes Jashari, të cilët, në frymën e përgjegjësisë kombëtare dhe respektit për sakrificën historike të familjes heroike dëshmuan edhe njëherë vigjilencen e lartë kombëtare.

Ju, shpreh gatishmërinë time për angazhim të vazhdueshëm institucional, akademik dhe publik në mbrojtje të karakterit çlirimtar dhe të drejtë të luftës së Ushtrisë Çlirimtare të Kosovës, si dhe, kundër çdo përpjekjeje për demonizimin e saj apo për rishikimin selektiv e diskriminues të historisë nga Dhomat e Specializuara, në kundërshtim me parimet themelore të drejtësisë dhe të së vërtetës historike.

Me respekt të veçantë institucional,

Prof. Dr. Arsim Bajrami

Anëtar i rregullt i Akademisë së Shkencave dhe Arteve të Kosovës

Anëtar i rregullt i Akademisë Shqiptare të Arteve dhe Shkencave

Anëtar i rregullt i Akademisë Evropiane të Shkencave dhe Arteve

Kryeministri i Kosovës, Albin Kurti ka përkujtuar figurat e Adem Demaçin dhe Astrit Deharin, të cilët po të ishin gjallë do të festonin ditëlindjen më 26 shkurt.

Përmes një mesazhi publik, ai theksoi rolin dhe kontributin e tyre në rrugëtimin për liri, drejtësi dhe Republikën e Kosovës.

Duke vlerësuar figurën e Adem Demaçit, kryeministri e cilësoi atë si emrin më të shquar të përpjekjes së gjatë të popullit shqiptar për organizim të gjerë në funksion të lirisë dhe bashkimit kombëtar, për drejtësi dhe për Kosovën Republikë.

“Adem Demaçi është emri më i shquar i përpjekjes së gjatë të popullit shqiptar rreth organizimit të gjerë për liri e bashkim kombëtar, për drejtësi dhe Kosovën Republikë. Astrit Dehari është emri më i dalluar ndër aktivistët e rinj të vazhdimit të së njëjtës përpjekje për Republikën e Kosovës, për emancipim e shqiptari, për barazi e përkujdesje për të gjithë. Ditëlindja e tyre nuk është veç një numër kalendarik (26 shkurt), por shifër domethëniesh të thella që vijojnë të na frymëzojnë dhe tregojnë me bindje rrugën tonë përpara”, ka shkruar kreu i qeverisë.

Kryetari i Partisë Socialdemokrate (PSD), Dardan Molliqaj, ka deklaruar se përfshirja e familjes Jashari në diskutimet për emrin e presidentit ka qenë, sipas tij, shantazh i Lëvizja Vetëvendosje ndaj presidentes aktuale Vjosa Osmani, raporton Ekonomia Online.

Molliqaj ka bërë thirrje që, siç u shpreh ai, të mos ndiqet agjenda e Qeverisë së Kosovës nga partitë që nuk pajtohen me të.

Ai shtoi se opozita nuk duhet të bjerë, sipas tij, në skenarët që i përcakton pushteti.

“Unë bëj thirrje që kontributin më të madh që mundem me e bë për Kosovën – kushdo që ndan bindje përafërsisht të njëjta ose s’pajtohet me qeverinë aktuale – është mos me e ndjekë agjendën e Qeverisë së Kosovës. Përndryshe, vazhdimisht ju e dini, një “Kosovë u çu” tha “nuk e voton Lista Serbe Albin Kurtin”, “po don me shku në zgjedhje”. I shtyni me i votu krejt. Prej tute, këta që s’e votuan Albinin, këta u bënë bashkë me i votu në pako. Tash, jo familja Jashari, hajde le t’i respektojmë secilin veç e veç, mos t’ua përfolim emrat atyre të cilët nuk po duan. Ky ka qenë shantazh ndaj Vjosa Osmanit, ky ka qenë me i afru partitë politike si LDK-ja e PDK-ja, që sot kur duan mos me e zgjedh tash presidentin, tash këta janë fajtorë. Pse i shkove në takim pa e ditë askush kush osht kandidat, as çfarë kriteresh ke? “Po shkoj po të veta”. PDK-ja del thotë “s’kam kandidat”, LDK-ja thotë “s’kam kandidat”, e çka ke lyp aty? Po prit t’ia qet kandidatin e mbaje mendimin pastaj. Prandaj nuk guxojmë ne me hy në atë që ata po duan. Ajo çka ata po duan është me e drejtu diskursin publik drejt tyre. Dhe mos harroni, opozitarët po dëmtohen më së shumti, sepse po thonë deklarata naive: një natë “s’e votojmë Listën Serbe”, nesër “e votojmë”; një natë “familja Jashari”, tjetrën “jo familja Jashari”. Kjo është për me i shërby hegjemonistit”, tha ai.

Kryetari i Prishtina, Përparim Rama, ka bërë publik nënshkrimin e Deklaratës së Përbashkët për Projektin e Varrezave të Kryeqytetit, duke e cilësuar atë si një hap historik drejt rregullimit institucional dhe të barabartë të shërbimeve të varrimit në kryeqytet.

Sipas njoftimit, prej disa muajsh Kryeqyteti ka zhvilluar një proces të strukturuar pune dhe koordinimi me përfaqësuesit e komuniteteve fetare, me qëllim inicimin e projektit për rregullimin dhe zhvillimin e Varrezave të Kryeqytetit si hapësirë e përbashkët qytetare.

Deklarata është nënshkruar nga Hetem Sopjani, Kryetar i Këshillit të Bashkësisë Islame në Prishtinë, Agim Qerkini, Famullitar në Famullinë e Prishtinës, si dhe Pastor Driton Krasniqi nga Kisha Protestante Ungjillore e Kosovës.

Sipas Ramës, kjo marrëveshje përfaqëson pajtimin dhe vullnetin e përbashkët për ndërtimin e një modeli që:

• garanton funksionimin e varrezave si hapësirë publike në shërbim të të gjithë banorëve dhe rezidentëve, pa dallim;

• siguron respektimin e riteve dhe praktikave fetare sipas traditave përkatëse;

• garanton administrim profesional, institucional dhe në përputhje me standardet e dinjitetit dhe respektit publik.

Kryetari Rama theksoi se procesi është karakterizuar nga dialog i hapur, bashkëpunim konstruktiv dhe mirëkuptim ndërmjet Komunës së Prishtinës dhe komuniteteve fetare, duke reflektuar frymën e bashkëjetesës dhe respektit që e karakterizon kryeqytetin.

Ky projekt pritet të hapë rrugë për një organizim më të rregullt, transparent dhe gjithëpërfshirës të shërbimeve të varrimit në Prishtinë.