Author: K.B.

Sekretari Organizativ i Lidhjes Demokratike të Kosovës tha se Kosova po shkon drejt zgjedhjeve, pasi Albin Kurti dëshiron t’i ketë të gjitha pozitat për vete.

“Për 53 ditë e mbajtën peng gjetjen e një zgjidhje për Presidentin e vendit”

Azemi shtoi se Kurti nuk kërkon marrëveshje politike për shtetin, “por nënshtrim për pushtetin e tyre.”

“Pushteti absolut nuk është kompromis. Është arrogancë politike”, shkroi ai.

Kosova pritet të humbë përgjithmonë shumën prej 68,8 milionë euro nga Plani i Rritjes për Ballkanin Perëndimor nëse deri në fund të qershorit të këtij viti nuk i përmbush hapat në reforma të cilat kanë pasur afat deri në mesin e vitit 2025 me një periudhë gri deri më 30 qershor të këtij viti. KOHA mëson nga burimet në Bruksel se edhe vendet tjera do të humbasin shuma të konsiderueshme nëse deri në këtë afat nuk i përmbushin obligimet të cilat ishin caktuar me Agjendën e reformave që është kusht për shfrytëzimin e këtyre mjeteve.

Një burim i BE-së tha se Komisionerja për zgjerim Marta Kos u ka dërguar në fund të javës së shkuar një letër të gjitha gjashtë vendeve të rajonit të Ballkanit Perëndimor të cilat janë përfituese të mjeteve nga Plani i Rritjes, ku ajo ua tërheq vërejtjen se do të humbin këto mjete nëse deri në afatin e caktuar nuk i përmbushin kushtet.

“Komisionerja u ka tërhequr vërejtjen partnerëve për nevojën që të përshpejtojnë reformat në mënyrë që të përfitojnë nga fondet e parapara nga ky Plan. Rikujtojmë se afati gri për hapat të cilat është dashur të përmbushen në mesin e vitit 2025 skadon më 30 qershor të këtij viti. Ndërsa për hapat të cilat është dashur të përmbushen deri në fund të vitit 2024 përfundon nga fundi i vitit 2026. Nëse afatet nuk respektohen, partnerët rrezikojnë që të humbin mbi 700 milionë euro së bashku”, ka thënë një burim i Komisionit Evropian.

Kosova sapo kishte nisur javën e shkuar të marrë pagesat e para nga parafinancimi nga Plani i rritjes për Ballkanin Perëndimor. Këto mjetet e para Kosovës nisën t’i paguhen pas shumë vonesave të shkaktuara nga ngërçi politik në vitin 2025, kur nuk kishte mundësi për ratifikim të marrëveshjeve për kredi dhe mjete mes Kosovës dhe BE-së.

Sipas një përllogaritjeje, Kosova në qershor do të humbë 68,8 milionë euro. Më së shumti mjete do të humbë Bosnja e Hercegovina, e cila nuk ka përfituar akoma asnjë cent nga ky plan. Ajo do t’i humbë edhe 373,9 milionë euro.

Këto mjete të përmendura do të humben në qershor, ndërsa deri në fund të vitit humbjet do të mund të jenë edhe më të mëdha nëse nuk përmbushen detyrimet. Sipas një tabele për monitorimin e përmbushjes së kushteve nga Plani i rritjes, Kosova nuk e ka përmbushur asnjë nga 11 hapa të paraparë. Pra 0 nga 11 hapa. Prandaj rreziku që Kosova të humbë mjete të mëdha është i madh nëse nuk veprohet shpejt.

Albert Krasniqi nga Demokracia Plus, ka reaguar pas takimit Kurti-Abdixhiku. Sipas Krasniqit, qëllimi i Kurtit nuk ka qenë gjetja e një zgjidhjeje për çështjen e presidentit.

“Ai tashmë e kontrollon këtë post dhe synimi i tij është ta mbajë sa më gjatë, përmes prodhimit të krizave politike dhe zvarritjes së proceseve.”

Krasniqi thotë se që nga shpallja e aktgjykimit të Kushtetueses, strategjia ka qenë të amortizohet efekti politik që një afrim i Osmanit me LDK-në mund të sillte.

“Që nga shpallja e aktgjykimit të Kushtetueses, strategjia ka qenë të amortizohet efekti politik që një afrim i Osmanit me LDK-në mund të sillte. Rrjedhja e votave synohej të ndalej përmes “negociatave” të fokusuara vetëm me LDK-në. Duke rënë në këtë kurth politik, LDK jo vetëm që i mundësoi Kurtit të blejë kohë, por edhe të zbehte efektin politik që Osmani mund të prodhonte”.

Lëvizja Vetëvendosje dhe Lidhja Demokratike e Kosovës (LDK) nuk kanë arritur marrëveshje për Presidentin.

Pas kësaj, Berat Rukiqi nga LDK-ja, ka thënë se LVV asnjëherë nuk ka pasur qëllim një marrëveshje për Presidentin.

Sipas tij, qëllimi ka qenë i qartë, presidenti nga LVV ose zgjedhje.

“Asnjëherë nuk ka qenë qëllimi arritja e konsensusit apo një marrëveshje për presidentin. Qëllimi ka qenë i qartë: ose president nga VV, ose vendi shkon në zgjedhje”, ka shkruar Rukiqi.

Më 28 prill skadon afati kushtetues për zgjedhjen e Presidentit, që nëse dështon vendi automatikisht shkon në zgjedhje.

Deputeti i LDK-së, Alban Zogaj përmes një postimi në Facebook ka shkruar në lidhje me situatën e krijuar për çështjen e Presidentit.

Për situatën e krijuar, ai fajtor e ka lënë kryeministrin Albin Kurti që ka thënë se sipas tij po i kërkon të gjitha pozicionet shtetërore.

“Kurti, sikurse e kemi thene ne vazhdimesi, po i kerkon te gjitha pozicionet shteterore! Presidentin, Kuvendin, Qeverine, Gjykaten Kushtetuese, Prokurorine, Ambasadat, AKI-ne, Ushtrine … me nje fjale te gjitha!!! Dhe, po e dergon vendin ne zgjedhje, sepse nuk i mjaftojne keto qe i ka, por i do te gjitha”, ka shkruar Zogaj në Facebook.

Ky reagim vjen pas takimit midis Kurtit edhe Abdixhikut për çështjen e presidentit por që nuk pati ndonë marrëveshje.

Armend Zemaj i Lidhjes Demokratike të Kosovës e ka quajtur qeverinë e Albin Kurtit “qeveri mashtruese” pas mungesës së Ministrit të Shëndetësisë, Arben Vitisë, në mbledhjen e Komisionit Parlamentar për shëndetësi ku do të shqyrtohet projektligji për sigurmet shëndetësore.

“Mungesa e ministrit Arben Vitia në komision, kur shqyrtohet një ndër ligjet më të rëndësishme në sektorin e shëndetësisë, Ligji për Sigurimin e Detyrueshëm Shëndetësor, tregon joseriozitetin dhe populizmin e kësaj qeverie mashtruese.

Kjo formë e trajtimit, pa konsultim, pa debat dhe pa analizë, e dëmton vetë sektorin, si dhe interesin e pacientit dhe të qytetarit,” shkroi Zemaj.