Author: K.B.

Policia e Kosovës ka njoftuar se ka pranuar informacione lidhur me shpërndarjen e një e-maili jozyrtar dhe të rremë, i cili pretendohet se është dërguar në emër të drejtorit të Përgjithshëm të Policisë së Kosovës.

Sipas Policisë, në disa adresa elektronike është dërguar një shkresë mashtruese, përmes së cilës kërkohet përgjigje urgjente ndaj një “urdhri të gjykatës” të pretenduar, i cili thuhet se është bashkëngjitur në e-mail.

Në mesazhin e rremë thuhet: “Me këtë rast, na duhet përgjigjja juaj urgjente ndaj Urdhrit të Gjykatës së pretenduar të bashkangjitur kundër jush”, ndërsa në bashkëngjitje ndodhet një tjetër dokument, i cili po ashtu është fals.

Policia e Kosovës ka bërë të ditur se është duke trajtuar rastin dhe po punon për të identifikuar burimin nga i cili është dërguar kjo shkresë.

Autoritetet u kanë bërë thirrje qytetarëve që ta injorojnë këtë e-mail dhe të mos e hapin dokumentin e bashkëngjitur, pasi përmbajtja e tij është mashtruese.

“Policia e Kosovës, ashtu siç ka njoftuar edhe më parë lidhur me mesazhet mashtruese, njofton sërish qytetarët se: KY MESAZH NUK ËSHTË ZYRTAR”, thuhet në njoftim.

Policia u ka bërë thirrje qytetarëve që të mos klikojnë në linqe të dyshimta, të mos japin të dhëna personale apo bankare dhe të mos hapin faqe që kërkojnë pagesa përmes SMS-ve.

Në rast se pranojnë mesazhe të tilla, qytetarët këshillohen që t’i fshijnë menjëherë, t’i raportojnë te autoritetet përkatëse dhe, nëse kanë ndarë të dhëna bankare, të kontaktojnë menjëherë bankën e tyre.

Rastet e tilla mund të raportohen përmes aplikacionit “Lajmëro Policinë” ose duke telefonuar në numrin 192.

Policia e Kosovës ka apeluar te qytetarët që të tregojnë kujdes të shtuar ndaj mashtrimeve online dhe të mos bien pre e mesazheve të dyshimta që mund të përdoren për vjedhjen e të dhënave personale ose financiare.

Kreu i Komunës së Prishtinës, Përparim Rama, ka dhënë disa sqarime për shtëpinë në Rrugën A e cila është në rrezik për t’u shembur.

Rama ka thënë se prona në fjalë është e komunës dhe ka kërkuar nga personi i cili të martën s’ka lejuar shembjen e shtëpisë që të mos rrezikojë jetën duke hyrë në atë zonë.

Ai ka treguar gjithashtu se nga ajo zonë janë evakuuar disa familje para dy vitesh, të cilave po vazhdohet t’iu paguhet qiraja.

Reagimi i plotë i Ramës:

Evakuimi i familjeve që banonin në këto objekte është bërë para 2 vitesh, për shkak të punimeve në “Rrugën A” dhe ❌ rrezikut të rrëshqitjes së dheut.

Edhe pse këto objektet kanë qenë të ndërtuara pa leje në pronë komunale, Kryeqyteti ka paguar dhe vazhdon të paguaj shpenzimet e qirasë për familjet e evakuuara.

Lusim personin në fjalë që të mos rrezikojë jetën e tij dhe të ekipeve tona duke hyrë në këtë zonë, e cila mbetet e rrezikshme për shkak të punimeve ❌ dhe është pronë komunale.

Gjithashtu, pajtohem me personat publik që po prononcohen për këtë çështje duke thënë se “Prona është e shenjtë”. E tillë është edhe kjo pronë, pronë komunale, në pronësi të Komunës dhe si e tillë meriton të njëjtin respekt dhe mbrojtje sipas ligjit!

Inspektorati Qendror i Punës ka njoftuar se ka realizuar inspektime në gjashtë kantiere ndërtimi në komunat e Prishtinës dhe Fushë Kosovës.

Gjatë inspektimeve, IQP njofton janë konstatuar shkelje të rënda të dispozitave ligjore, të cilat paraqisnin rrezik serioz për jetën dhe shëndetin e punëtorëve.

“Për shkak të mungesës së masave të nevojshme të sigurisë dhe shëndetit në punë, Inspektorati Qendror i Punës ka marrë vendim për ndalimin e menjëhershëm të punimeve në gjashtë kantiere ndërtimi – tre në Fushë Kosovë dhe tre në Prishtinë – deri në eliminimin e plotë të të gjitha parregullsive të evidentuara”, thekson njoftimi.

“Masat e ndërmarra kanë për qëllim parandalimin e aksidenteve në vendin e punës dhe garantimin e kushteve të sigurta për të gjithë punëtorët. Subjektet e inspektuara janë obliguar të ndërmarrin të gjitha veprimet e nevojshme për përmbushjen e kërkesave ligjore, ndërsa rifillimi i punimeve do të lejohet vetëm pasi inspektorët të konstatojnë se janë eliminuar rreziqet dhe janë përmbushur standardet e sigurisë dhe shëndetit në punë”, thotë IQP.

“Inspektorati Qendror i Punës mbetet i përkushtuar në zbatimin e ligjit dhe do të vazhdojë kontrollet intensive në të gjithë territorin e Republikës së Kosovës, duke ndërmarrë masa ndaj çdo subjekti që cenon sigurinë dhe shëndetin e punëtorëve.Njëkohësisht, Inspektorati Qendror i Punës u bën thirrje të gjithë punëdhënësve që të respektojnë me rigorozitet dispozitat ligjore dhe të sigurojnë kushte të sigurta pune, pasi mbrojtja e jetës dhe shëndetit të punëtorëve mbetet prioritet i panegociueshëm”, përfundon njoftimi.

Këshilli Gjyqësor i Kosovës (KGJK) ka njoftuar se ka caktuar takimin e radhës për të premten e 24 korrikut 2026, në të cilin në rend dite është edhe shqyrtimi i kërkesës së Ushtrueses së Detyrës së Presidentes së Republikës së Kosovës, Albulena Haxhiu dhe i njoftimeve të gjyqtarëve dhe stafit nga komuniteti serb për tërheqje të dorëheqjeve.

Kjo pikë e rendit të ditës është renditur e nënta nga 16-të sa janë gjithsej, raporton “Betimi për Drejtësi“.

Kujtojmë se u.d Presidentja Albulena Haxhiu përmes një letre të dërguar më 19 qershor 2026 tek kryesuesi i KGJK-së, Rrustem Thaqi, kishte kërkuar që Këshilli t’i japë epilog çështjes së dorëheqjeve të ofruara nga gjyqtarët dhe stafi mbështetës i komunitetit serb brenda sistemit gjyqësor të Kosovës.

“Mbajtja pezull e këtyre pozitave për një periudhë kaq të gjatë cenon sigurinë juridike, pengon funksionimin e plotë të sistemit të drejtësisë dhe ndikon në efikasitetin e institucioneve përgjegjëse”, thuhej ndër të tjera në letër.

Në anën tjetër, Këshilli Prokurorial i Kosovës në takimin e mbajtur më 20 korrik 2026 ka refuzuar tëheqjen e dorëheqjeve të prokurorëve dhe stafit mbështetës serb brenda sistemit prokurorial, duke i dërguar tek u.d Presidentja për lirim nga detyra.

Haxhiu një ditë më pas (21 korrik) njoftoi se ka nënshkruar dekretet për lirim nga detyra të shtatë prokurorëve serb, të cilët kishin ofruar dorëheqjet më 2022.

Vendimi i KPK-së dhe Haxhiut, Bashkimi Evropian ka vlerësuar se janë në kundërshtim me ligjin.

“BE-ja është e shqetësuar nga vendimi i djeshëm i Këshillit Prokurorial të Kosovës (KPK) për të pranuar dorëheqjet që ishin tërhequr tashmë dhe nga vendimi i sotëm i ushtrueses së detyrës së Presidentes, që dekretoi dorëheqjet. Kjo duket se nuk është në përputhje me ligjin, me procedurën e rregullt ligjore dhe me kërkesat e përgjithshme të sundimit të ligjit në Kosovë. BE-ja u bën thirrje të gjitha institucioneve përkatëse që të përmbahen nga veprimet që synojnë pengimin e riintegrimit të personelit gjyqësor serb të Kosovës”, thuhej në reagim. /BetimipërDrejtësi/

Forca e Sigurisë së Kosovës (FSK) ka angazhuar njësitë e saj për ndërhyrje në fshatin Sferkë të Komunës së Pejës, pas shpërthimit dhe përhapjes së një zjarri me përmasa të mëdha në deponinë e mbeturinave të kësaj zone.

Sipas njoftimit të FSK-së, pas pranimit të kërkesës nga Qendra e Situatave e Sekretariatit të Këshillit të Sigurisë së Kosovës, Qendra Operative e FSK-së ka bërë vlerësimin e menjëhershëm të rrezikut dhe kapaciteteve për reagim.

“Pas analizës përkatëse, me urdhër të Komandantit të FSK-së, Gjenerallejtënant Bashkim Jashari, janë mobilizuar dhe kanë zbarkuar në terren njësitë e specializuara të Gardës Kombëtare me kapacitetet e saja për intervenim në këtë situatë”, thuhet në njoftimin e FSK-së.

Operacioni, sipas FSK-së, ka nisur menjëherë me qëllim të izolimit të vatrës së zjarrit, parandalimit të ndotjes toksike të mjedisit dhe shmangies së pasojave për shëndetin publik.

“Njësitë tona po punojnë në koordinim të ngushtë me autoritetet qendrore, lokale, shërbimet e emergjencave civile dhe popullatën lokale për të kthyer situatën në normalitet në kohën më të shpejtë të mundshme”, ka bërë të ditur FSK-ja.

Forca e Sigurisë së Kosovës ka theksuar se mbetet e angazhuar për t’u shërbyer qytetarëve të Kosovës, në përputhje me detyrat dhe misionin e saj.

Stuhitë e fuqishme që kanë përfshirë vendin, e veçanërisht territorin e Komunës së Malishevës, kanë shkaktuar dëme materiale edhe në objektin e Xhamisë së Temeqinës.

Përmes një njoftimi, Këshilli i Bashkësisë Islame në Malishevë bëri të ditur se objekti i xhamisë ka pësuar dëmtime si pasojë e motit të lig, ndërsa theksoi se nuk ka pasur të lënduar.

“Si pasojë e motit dhe stuhive të fuqishme që kanë goditur vendin tonë, e në veçanti territorin e Komunës së Malishevës, janë shkaktuar dëme materiale edhe në objektin e Xhamisë së Temeqinës”, thuhet në njoftim.

Këshilli i Bashkësisë Islame shprehu keqardhje për dëmet e shkaktuara, duke falënderuar që ngjarja nuk pati pasoja për qytetarët.

“Këshilli i Bashkësisë Islame në Malishevë shpreh keqardhje për këto dëme dhe falënderon Zotin që, pavarësisht vështirësive të shkaktuara nga kushtet atmosferike, nuk pati pasoja në njerëz”, thuhet më tej.

Nga BIK-u në Malishevë u bë e ditur se do të qëndrojnë pranë xhematit të Xhamisë së Temeqinës dhe do të angazhohen për evidentimin dhe sanimin e dëmeve.

“Ne jemi pranë xhematit të kësaj xhamie dhe do të angazhohemi që dëmet e shkaktuara të evidentohen dhe, me mundësitë tona, të sanohen sa më shpejt nga organet kompetente”, thuhet në reagim.

Në fund të njoftimit, Këshilli i Bashkësisë Islame ka lutur për mbrojtjen e vendit nga fatkeqësitë natyrore dhe ka shprehur shpresën që ngjarje të tilla të mos përsëriten.

“Lusim Allahun e Madhëruar që ta ruajë vendin dhe popullin tonë nga çdo fatkeqësi, t’i mëshirojë ata që janë prekur nga këto ngjarje dhe të na dhurojë siguri, begati e qetësi. Urojmë që këto stuhi e dëme të mos përsëriten më dhe që Zoti të na mbrojë nga çdo e keqe”, përfundon njoftimi i Këshillit të Bashkësisë Islame në Malishevë.

Kryetari i Prishtinës, Përparim Rama dhe këngëtari i mirënjohur, Yll Limani kanë dhuruar disa instrumente si donacion për shkollënë e muzikës “Prenk Jakova” në Prishtinë.

Rama tha se komuna po investon edhe në art e kulturë dhe se e ardhmja do të jetë më e ndritshme për brezat e rinj, duke falënduar këngëtarin për kontributin e bërë.

“Po unë veç dua me e falënderu shumë Yllin për kontributin e mrekullueshëm që ia ka bërë shkollës Prenk Jakova. Edhe tash me iniciativën e fundit kemi pasur koncertin e mrekullueshëm të Yllit, pra në këtë muaj. Po ashtu me i treguar që kryeqyteti, përveç shtrimit të asfaltit, rregullimit të kanalizimit e shumë e shumë të tjera që duhet me i kry komuna, po ashtu investon edhe në art e kulturë. Edhe jemi shumë krenarë që në këtë aspekt e kemi një bashkëpunim të mrekullueshëm me Yllin për me i ndihmuar edhe talentët e rinj në kryeqytet. Pra që e ardhmja jonë të jetë edhe më e ndritshme për brezat e rinj”, tha Rama.

Ndërsa, artisti Yll Limani tha se kjo nuk do të jetë mbëhtetja e vetme për këtë shkollë, duke u shprehur optimist se do të krijohen më shumë kushte dhe mundësi për talentët e rinj.

“Ajo ka qenë më e pakta që kemi mundur me bërë. Atë çka kemi mundur me gjetë, me i sistemu gjërat rregullisht për atë sallë të shkollës, e kemi bërë. S’ka me qenë ajo gjëja e fundit që kemi me bërë për shkollën Prenk Jakova. Unë besoj që sa më shumë krijohen kushte dhe mundësi që talentët e rinj që po na përcjellin tash me ardhur edhe me u arsimuar e me u edukuar, është më mirë për Prishtinën, për vendin, Kosovën”, shtoi Limani.

E drejtori i shkollës së muzikës “Prenk Jakova”, Driton Saqipi tha se ky institucion arsimor ka arritur në nivel artistik shumë të lartë.

“Jemi e vetmja shkollë artistike në kryeqytet edhe e kemi dëshmuar sidomos viteve të fundit. Kori, orkestra, baleti domethënë kanë arritur në nivel artistik shumë të lartë, kështu që ju falënderojmë për kryetarin, faleminderit edhe për Yllin, sepse me të vërtetë artistët e rinj e meritojnë. Kështu shpresoj që edhe artistët e tjerë kanë me shkuar rrugës njëjtë si Ylli, sepse me të vërtetë kemi nevojë për mbështetje”, tha ai.

Në mungesë të objektit të vet, shkolla “Prenk Jakova”, ka disa vite që funksionin në hapësirat e ndara ndara nga shkolla e mesme e mjekësisë “Ali Sokoli”

Këshilli i Ministrave ka miratuar projektvendimin për dërgimin e një toge nga Forcat e Armatosura të Shqipërisë në përbërje të brigadës shumëkombëshe në Rumani.

Lajmin e bëri të ditur ministri i Mbrojtjes, Ermal Nufi, i cili theksoi se ky hap përbën një angazhim shtesë të qeverisë shqiptare në kuadër të sigurisë kolektive të NATO-s.

Sipas ministrit, prania e trupave shqiptare do të shërbejë për forcimin e sigurisë në territorin rumun dhe vjen në vazhdën e pjesëmarrjes së vazhdueshme të Shqipërisë në misionet ndërkombëtare të Aleancës…

“Sot në Këshillin e Ministrave u miratua projektvendimi për dërgimin e një toge nga Forcat e Armatosura te brigada shumëkombëshe që ndodhet në Rumani.

Ky projektvendim është një angazhim shtesë i qeverisë shqiptare në misionet kombëtare. Jam i bindur që ky mision shtesë është në vazhdën e gjithë misioneve të tjera që ne kemi. Angazhimi i trupave tanë do të jetë i tillë që do të forcojë sigurinë në territorin e Rumanisë, është gjithnjë në kuadër të sigurisë kolektive të Aleancës…”, tha Nufi.