Author: K.B.

Policia e Kosovës ka njoftuar se si pasojë e reshjeve të shiut, në disa zona të vendit nëpër rrugë të ndryshme janë evidentuar vështirësi në qarkullim përfshirë dëmtime të rrugëve, rrëshqitje dheu e dëmtime në ura të caktuara.

Policia u ka bërë thirrje shoferëve që të tregojnë kujdes dhe vigjilencë të shtuar, si dhe të respektojnë rregullat e trafikut.

Tutje, policia ka bërë të ditur se po monitoron vazhdimisht situatën dhe ka rritur praninë policore në terren.

“Si pasojë e reshjeve të shiut, në disa zona të vendit nëpër rrugë të ndryshme janë evidentuar vështirësi në qarkullim, përfshirë dëmtime të rrugëve, rrëshqitje dheu e dëmtime në ura të caktuara. Policia e Kosovës po monitoron vazhdimisht situatën dhe ka rritur praninë policore në terren. U bëjmë thirrje të gjithë shoferëve që të tregojnë kujdes dhe vigjilencë të shtuar, të respektojnë rregullat e trafikut dhe ta përshtatin vozitjen me kushtet aktuale të rrugës dhe dukshmërinë e reduktuar, n mënyrë që të shmangin aksidentet e mundshme. Siguria fillon nga ju. Kur kushtet në rrugë ndryshojnë, kujdesi duhet të rritet”, thuhet në njoftimin e policisë.

Procesi i numërimit të votave të ardhura me postë për zgjedhjet e parakohshme për Kuvendin e Kosovës 2025 po shkon drejt përmbylljes, ndërsa kanë mbetur edhe 25 kuti për t’u numëruar.

Sipas të dhënave të fundit të publikuara nga Komisioni Qendror i Zgjedhjeve (KQZ), deri tani janë numëruar 120 nga gjithsej 145 kuti, që përbëjnë 82.76 për qind të votave me postë.

Rezultatet aktuale tregojnë se Lëvizja Vetëvendosje, kryeson me 73.18 për qind të votave, apo 25,828 vota.

Pas saj renditet Lidhja Demokratike e Kosovës (LDK) me 10.02 për qind ose 3,536 vota, ndërsa Partia Demokratike e Kosovës (PDK) ka 8.77 për qind apo 3,096 vota.

Aleanca për Ardhmërinë e Kosovës (AAK) ka marrë 3.91 për qind të votave.

Nga KQZ është bërë e ditur se numërimi po vazhdon sipas planit dhe se rezultatet përfundimtare do të publikohen pas përfundimit të plotë të procesit dhe verifikimeve përkatëse.

Presidenca e Bosnje e Hercegovinës – e cila mbikëqyr Forcave e Armatosura të Bosnjës – është pajtuar në parim për vendosjen e trupave boshnjake në Rripin e Gazës si pjesë e misionit paqeruajtës të Forcës Ndërkombëtare të Stabilizimit.

Ministri i Mbrojtjes i Bosnjës duhet t’i njoftojë Shtetet e Bashkuara për gatishmërinë e Bosnjës për të dërguar anëtarë të Forcave të Armatosura të Bosnjës në misionin e Forcës Ndërkombëtare të Stabilizimit në Gazë, sapo të ketë përfunduar procedura ligjore lidhur me këtë vendim.

“Ministri i Mbrojtjes i Bosnje e Hercegovinës është i ngarkuar me kryerjen e procesit të emërimit të përfaqësuesit ushtarak të Bosnje e Hercegovinës në misionin e Forcës Ndërkombëtare të Stabilizimit në Gazë dhe paraqitjen e një propozimi për vendim për emërimin e tij në Presidencën e Bosnje e Hercegovinës”, thuhet në vendimin e Presidencës së Bosnjës.

Këshilli i Ministrave i Bosnjës është gjithashtu i ngarkuar me detyrën që t’ia paraqesë Presidencës së Bosnjës një vlerësim mbi arsyen e pjesëmarrjes së anëtarëve të Forcave të Armatosura të Bosnjës në misionin e paqeruajtës në Gazë.

Më 17 nëntor të vitit të kaluar, Këshilli i Sigurimit i Kombeve të Bashkuara e miratoi një rezolutë të hartuar nga SHBA-ja, e cila mbështet planin e presidentit Donald Trump për t’i dhënë fund luftës në Rripin e Gazës.

Rezoluta autorizon gjithashtu këtë Forcë Ndërkombëtare të Stabilizimit për enklavën palestineze.

Izraeli dhe grupi palestinez Hamas – i cili është i shpallur organizatë terroriste nga SHBA dhe fuqi të tjera – kanë rënë dakord për fazën e parë të planit 20-pikësh të Trumpit për Gazën, një armëpushim në luftën e tyre dyvjeçare dhe një marrëveshje për lirimin e pengjeve.

Megjithatë, rezoluta e OKB-së shihet si thelbësore për legjitimimin e organit të përkohshëm qeverisës dhe ofrimin e garancive për vendet që po shqyrtojnë dërgimin e trupave në Gazë.

Teksti i rezolutës thotë se shtetet anëtare mund të marrin pjesë në Komitetin e Paqes të kryesuar nga Trumpi, i cili është menduar si një organ kalimtar që do të mbikëqyrë rindërtimin dhe rimëkëmbjen ekonomike të Gazës.

Ndërsa, detyra e Forcës Ndërkombëtare të Stabilizimit është të sigurojë procesin e demilitarizimit të Gazës, duke përfshirë shkatërrimin e armëve dhe infrastrukturës ushtarake.

Rezoluta është pjesë e fazës së dytë të planit të paqes të administratës Trump për Gazën.

Faza e dytë parashikon krijimin e një administrate kalimtare (Komiteti i Paqes), fundin e sundimit të Hamasit në Gazë dhe demilitarizimin e plotë të enklavës, të cilën Hamasi ende nuk e ka pranuar.

Forca Ndërkombëtare e Stabilizimit do të vendoset në marrëveshje me Izraelin dhe Egjiptin, dhe SHBA-ja është në bisedime me disa vende për pjesëmarrjen në mision, pa dërguar trupa amerikane.

Vendet e përmendura deri më tani përfshijnë Indonezinë, Emiratet e Bashkuara Arabe, Egjiptin, Katarin dhe Turqinë.

Rezoluta gjithashtu ofron mbështetje financiare për rindërtimin e Gazës përmes Bankës Botërore dhe një fondi të posaçëm.

Forcat e Armatosura të Bosnjës kanë marrë pjesë më parë në misione paqeruajtëse në të gjithë botën dhe aktualisht tre anëtarë janë në Republikën e Afrikës Qendrore. /REL/

Kryetari i Drenasit, Ramiz Lladrovci ka deklaruar për vërshimet dhe përmbytjet të cilat Drenasi u përball të martën, duke rrezikuar jetën e shumë familjeve dhe duke shkaktuar dëme në biznese të ndryshme.

Ai ka treguar se ekipet emergjente kanë qenë të përgatitura që nga mëngjesi për t’i dalë në ndihmë familjarëve të shumtë, ku siç tha ai 20 familje janë evakuuar pasi iu është rrezikuar jeta e tyre.

Sipas kryetarit, pasojat të cilat kanë sjell këto vërshime kanë qenë dëme në ekonomi familjare, në biznese si dhe në bujqësi.

“Familje të ndryshme janë rrezikuar nga reshjet, sigurisht ne kemi pasur shtabin me kohë të përgatitur dhe mëngjes kemi filluar me veprimet tona, kemi evakuuar qytetarë të shumtë si dhe 20 familje i kemi larguar nga shtëpitë e tyre që është rrezikuar jeta e tyre, jemi duke shkuar drejt normalizimit, më e goditura për momentin Qendra Tregtare, shumë biznese janë dëmtuar, s’ka fshat që nuk kemi pasur dëme, qoftë dëme në ekonomi familjare, biznese, por edhe në bujqësi ”, ka deklaruar Lladrovci për media pas situatës së vërshimeve në Drenas.

Zëvendëskryeministri në detyrë i Kosovës, Besnik Bislimi, ka reaguar ndaj lajmeve që u plasuan dje në disa media vendase, lidhur me një artikull të gazetës zvicerane “Neue Zurcher Zeitung”.

Ai ka theksuar se artikulli i përmendur nuk përmend asnjë takim të fshehtë, dhe se keqinterpretimi i tij është bërë qëllimisht nga media joprofesionale.

“Dezinformata të shumta dhe propagandë nga portale në Kosovë u përhapën dje duke keqinterpretuar qëllimshëm një artikull të gazetës zvicerane NZZ. Është për keqardhje me sa lehtësi dhe shpejtësi krijohen dhe shpërndahen dezinformatat me synim informimin e rrejshëm ndaj opinionit publik dhe çorientim të së vërtetës.”, ka shkruar Bislimi.

Postimi i plotë;

Dezinformata të shumta dhe propagandë nga portale në Kosovë u përhapën dje duke keqinterpretuar qëllimshëm një artikull të gazetës zvicerane NZZ. Është për keqardhje me sa lehtësi dhe shpejtësi krijohen dhe shpërndahen dezinformatat me synim informimin e rrejshëm ndaj opinionit publik dhe çorientim të së vërtetës.

Si Zëvendëskryeministër i Qeverisë së Republikës së Kosovës apo në kapacitet tjetër, asnjëherë nuk kam pasur takime “të fshehta e sekrete”, e aq më pak me personazhe si Marko Gjuriq. As gazeta serioze zvicerane NZZ nuk aludoi në shkrimin e saj që nga publikimi në asnjë moment për një takim të tillë, por ishin portalet joprofesionale dhe gazetarë joprofesionalë që raportuan rrejshëm në atë mënyrë, duke keqpërdorur artikullin nga NZZ.

Dezinformatat e shumta të shpërndara në mënyrë të qëllimshme do t’i adresoj përmes ankesës/padisë në institucionet relevante.

Agjencia e Menaxhimit Emergjent (AME) njofton se situata me vërshime në territorin e Kosovës paraqitet dinamike, me raste të lokalizuara në disa komuna si pasojë e reshjeve të shumta.

Një nga zonat më të prekura është Anadrinisa në Komunën e Prizrenit, ku uji i Drinit të Bardhë ka dalë mbi rrjedhën normale dhe ka përmbytur dy anët e rrjedhës.

Sipas policisë, rruga Gjonaj-Krajk është e bllokuar pasi uji ka arritur mbi 1.5 metra në rrugë, duke pamundësuar qarkullimin.

“Në pjesën tjetër të vendit, gjendja mbetet stabile dhe nën monitorim të vazhdueshëm,” njofton AME.

Njësitë Profesionale të Zjarrfikjes dhe Shpëtimit, në koordinim me strukturat komunale dhe Qendrën Operative të Agjencisë, janë angazhuar për pompim të ujit dhe largim të përmbytjeve, sigurimin e objekteve të rrezikuara dhe monitorimin e pikave kritike.

Numri unik emergjent 112 është funksional dhe në shërbim të qytetarëve. AME thekson se nuk raportohet për humbje jete, ndërsa dëmet materiale janë të kufizuara dhe po vlerësohen nga autoritetet lokale.

“Ekziston mundësi për përkeqësim të situatës në rast të reshjeve të reja, por rreziku aktual vlerësohet i menaxhueshëm,” thonë nga AME.

AME ka apeluar te qytetarët që të shmangin zonat e rrezikuara, të ndjekin njoftimet zyrtare dhe çdo rast emergjent ta raportojnë në 112.

AME konfirmon se situata mbetet nën monitorim aktiv dhe është e përkushtuar të informojë publikun 24/7 për çdo zhvillim të ri.

120 mijë shoferë kamioni janë mungesë në Gjermani, ka thënë zëdhënësi i Shoqatës Gjermane të Transportit Rrugor, Logjistikës dhe Asgjësimit të Mbeturinave (BGL), Dirk Englehardt, për “Reuters”. Paga është rreth 3048 euro bruto.

Në Gjermani, nga 30 deri në 35 mijë shoferë dalin në pension çdo vit. Megjithatë, ka vetëm 15 deri në 20 mijë zëvendësime. Prandaj, pritet që hendeku të zgjerohet më tej. Tetëdhjetë për qind e mallrave në Gjermani transportohen me rrugë tokësore.

“Po dëgjojmë nga shumë kompani transporti se po heqin gjithnjë e më shumë kamionë nga rruga dhe po anulojnë porositë sepse thjesht nuk kanë shoferë të mjaftueshëm”, ka treguar Engelhardt.

Shumë ofrues logjistike nuk po marrin më pjesë në tendera sepse të ardhurat e pritura nga transporti i mallrave, të kombinuara me rritjen mbi mesataren e kostove të personelit për shkak të mungesës së shoferëve, nuk janë të mjaftueshme për të mbuluar shpenzimet.

Shoqata e industrisë nuk pret ndonjë lehtësim nga e ashtuquajtura drejtim autonom, ku kamionët përdorin sensorë, kamera dhe inteligjencë artificiale (IA) për të lëvizur pa shofer. Shoferët e kamionëve ka të ngjarë të mbeten të domosdoshëm, duke vepruar si shoqërues dhe roje të mallrave që u janë besuar.

“Ata janë përgjegjës për dorëzimin e ngarkesës te marrësi në përputhje me ligjin, si dhe për transportin dhe sigurimin e ngarkesës”, theksoi Engelhardt. Edhe në të ardhmen, vetëm njerëzit do të jenë në gjendje të ndërhyjnë në ngjarje të paparashikuara.

Sipas Atlasit të Pagave të Agjencisë së Punësimit, paga mesatare bruto për shoferët e kamionëve është 3,048 euro, që është dukshëm nën të ardhurat mesatare vjetore të të gjithë popullsisë, të cilat janë 4,346 euro. Paga mesatare përfaqëson të ardhurat me të cilat saktësisht gjysma e të gjithë punëtorëve fitojnë më shumë dhe gjysma tjetër fiton më pak.

Presidenti i Republikës së Kroacisë, Zoran Milanoviq, shkroi në Facebook se ushtria kroate nuk do të dërgojë trupa në Ukrainë , duke komentuar takimin e të ashtuquajturit “Koalicion i të Vullnetshmëve” në Paris.

“Dje në Paris, u shpreh zyrtarisht qëllimi i Francës, Britanisë së Madhe dhe disa vendeve të tjera për të dërguar njësi ushtarake në Ukrainë në rast të një marrëveshjeje paqeje me Rusinë. Për të hequr çdo dyshim në lidhje me rolin e Ushtrisë Kroate në të ashtuquajturin koalicion të të vullnetshmëve, si Komandant Suprem i Forcave të Armatosura Kroate, po u them qytetarëve kroatë – Kroacia nuk do të dërgojë ushtarët e saj në Ukrainë”, shkroi Milanoviq.

Presidenti theksoi se Kroacia, si anëtare e Bashkimit Evropian dhe NATO-s, ka detyrime që rrjedhin ekskluzivisht nga anëtarësimi në këto aleanca dhe se vendimet e “Koalicionit të Vullnetit” nuk e detyrojnë në asnjë mënyrë Kroacinë ose ushtrinë e saj.

“Në rendin e ri global që po krijohet, në të cilin forca dhe e drejta e më të fortit po bëhen rregull në marrëdhëniet ndërkombëtare, detyra kryesore e Forcave të Armatosura Kroate është mbrojtja e sovranitetit dhe pavarësisë dhe mbrojtja e integritetit territorial të Republikës së Kroacisë”, tha Milanoviq.

Ndihmë financiare për Ukrainën

Presidenti shtoi se të gjitha investimet e mëparshme dhe të shpallura në Forcat e Armatosura, përfshirë futjen e trajnimit bazë ushtarak, duhet të shërbejnë për të rritur gatishmërinë dhe aftësitë e Forcave të Armatosura Kroate. Ai theksoi gjithashtu se ndihma financiare për Ukrainën, për të cilën është zotuar Qeveria Kroate, nuk duhet të rrezikojë pajisjen e Ushtrisë Kroate ose standardin e jetesës së qytetarëve kroatë.

“Detyra e të gjitha institucioneve qeveritare kroate është të kujdesen për interesat kombëtare kroate dhe interesat e qytetarëve tanë”, përfundoi Milanoviq.

Policia e Kosovës e ka gjobitur me 300 euro ngasësin e kamionit mikser që është incizuar sot duke derdhur çimenton nëpër rrugë në Prishtinë.

Shoferi është gjobitur për mos sigurim të ngarkesës teksa është gjobitur edhe kompania.

“Sipas ligjeve në fuqi, ndalohet dalja në rrugë nga vendpunishtet apo rrugët e ndotura pa u siguruar paraprakisht që mjeti është i pastër dhe nuk shkakton ndotje të sipërfaqes rrugore. Në rastin konkret, mjeti ka qarkulluar duke ndotur rrugën, si pasojë e mos sigurimit të ngarkesës”, thuhej në njoftim.

“Ndaj drejtuesit të mjetit është shqiptuar gjobë për mos sigurim të ngarkesës, ndërsa po ashtu është shqiptuar edhe gjobë ndaj firmës, në emër të personit juridik”, thuhej më tej.

Policia e Kosovës do të vazhdojë kontrollet dhe masat ndaj të gjithë atyre që shkelin rregullat e qarkullimit dhe rrezikojnë sigurinë në trafik apo ndotin ambientin, duke apeluar për respektim të ligjit dhe përgjegjësi gjatë pjesëmarrjes në trafik.

Komisioni Qendror i Zgjedhjeve (KQZ) është në përfundim të procesit të numërimit të të gjitha fletëvotimeve që i takojnë zgjedhjeve të parakohshme të 28 dhjetorit për Kuvendin e Kosovës.

Aktualisht është duke vazhduar numërimi i fletëvotimeve nga votimi përmes postës. Kështu ka bërë të ditur zëdhënësi i KQZ-së, Valmir Elezi, në një konferencë për media. Ai tha se në Kosovë pritet të arrijnë edhe më shumë se 3 mijë pako me fletëvotime.

“Në vazhdim të procesit të numërimit do të përfshihen fletëvotimet nga votimi përmes postës të tërhequra më 2 dhe 5 janar 2026 nga kutitë postare jashtë Kosovës dhe që deri më tani janë sjellur në Kosovë. Më 2 janar, nga 9 kutitë postare në Pragë, Londër, Paris, Zagreb, Stokholm, Stamboll, Neë York, Kanbera dhe Kopenhagë, janë tërhequr 8,180 pako të tjera me fletëvotime, ndërkaq më 5 janar, nga 13 kutitë postare, në: Tiranë, Berlin, Vjenë, Bernë, Bruksel, Hagë, Podgoricë, Oslo, Shkup, Otavë, Ljublanë, Romë dhe Prishtinë, janë tërhequr 11,867 pako me fletëvotime. Deri më tani, pjesa më e madhe e këtyre pakove janë sjellur në Kosovë dhe i janë nënshtrur verifikimit dhe vlerësimit. Prej tyre, janë aprovuar rreth 16 mijë dhe ato janë duke u numëruar. Ende nuk janë sjellur në Kosovë edhe 3,185 pako me fletëvotime, që janë tërhequr më 2 dhe 5 janar nga kutitë postare në Paris (1,962), Berlin (633), Hagë (61), Podgoricë (125), dhe Otavë (404)”, tha Elezi.

I pyetur për çështjen e rezultateve përfundimtare, Elezi ka shpjeguar se me përfundimin e numërimit të këtyre fletëvotimeve, KQZ është e gatshme për të shpallur rezultatin përfundimtar, por sipas ligjit për zgjedhjet e përgjithshme, ky institucion duhet të presë për ndonjë ankesë eventuale në administrimin e numërimit në QNR, para se të shpall rezultatet përfundimtare.

“Me përfundimin e numërimit të këtyre fletëvotimeve, KQZ është e gatshme për të shpallur rezultatin përfundimtar të zgjedhjeve të parakohshme të mbajtura më 28 dhjetor. Por, sipas Ligjit për Zgjedhjet e Përgjithshme, palët mund të parashtrojnë ndonjë ankesë në PZAP lidhur me administrimin e numërimit në QNR brenda 48 orëve nga ndodhja e shkeljes së supozuar”, tha Elezi.Ai përmendi se rruga që ndjek Komisioni Qendror i Zgjedhjeve për shpalljen e rezultateve përfundimtare, përfshin disa hapa të rëndësishëm, pjesë më e madhe e të cilëve janë kaluar.“KQZ shpall rezultatet përfundimtare vetëm pasi të përfundojnë këto procese: (1) verifikimi dhe numërimi i rezultateve në Qendrat Komunale të Numërimit, i cili tashmë është përmbyllur; (2) numërimi në Qendrën e Numërimit dhe Rezultateve i fletëvotimeve nga votimi me kusht dhe i personave me nevoja të veçanta, që gjithashtu është përmbyllyr, (3) numërimi i fletëvotimeve nga votimi jashtë Kosovës, i cili është në pjesën e fundit të tij si dhe (4) pasi të përfundojë shqyrtimi i ankesave të mundshme nga PZAP ose Gjykata Supreme për administrimin e numërimit”, tha tutje Elezi.