ATV

Author: G.O.

  • Haxhiu gjatë takimit me Costan: Rruga drejt BE-së, interes strategjik i Kosovës

    Haxhiu gjatë takimit me Costan: Rruga drejt BE-së, interes strategjik i Kosovës

    Ushtruesja e detyrës së presidentit të Kosovës, Albulena Haxhiu, tha se rruga e vendit drejt Bashkimit Evropian është interes strategjik shtetëror.

    Këto deklarata ajo i bëri gjatë takimit në Prishtinë me presidentin e Këshillit Evropian, Antonio Costa, me të cilin tha se bisedoi për një sërë çështjesh, përfshirë për Planin e Rritjes të BE-së për Ballkanin Perëndimor si dhe stabilitetin rajonal.

    “Rruga e Kosovës drejt Bashkimit Evropian është interes strategjik shtetëror dhe zgjedhje demokratike e qytetarëve tanë”, tha Haxhiu përmes një postimi në Facebook, transmeton Radio Evropa e Lirë.

    Para nisjes së takimeve, Costa shkroi në X se inkurajon udhëheqësit politikë në Kosovë që ta bëjnë prioritet integrimin në BE, “dhe të punojnë së bashku drejt këtij qëllimi të përbashkët”.

    “Kosova ka nevojë për institucione të forta, stabile dhe të afta që të zbatojnë reforma, që përfitojnë nga ajo që ofron BE-ja dhe të zbatojnë zotimet që dalin nga dialogu Kosovë-Serbi”, shkroi Costa.

    Ndërkaq, sipas njoftimit të lëshuar nga Presidenca, Haxhiu ka kërkuar që të avancohet procesi i integrimit, teksa Kosova është vendi i vetëm në rajon që nuk ka as statusin e vendit kandidat.

    Kosova ka dorëzuar aplikimin për anëtarësim në BE në dhjetor të vitit 2022. Megjithatë, ky aplikim ende nuk ka kaluar as në fazën e parë formale, atë të shqyrtimit nga Këshilli i BE-së dhe më pas dërgimit për opinion në Komisionin Evropian.

    Haxhiu vlerësoi se Kosova ka shoqërinë më “proevropiane në rajon”, duke argumentuar se ky orientim është bazë për rrugën e shtetit drejt BE-së.

    Ndërkaq, sa i përket Planit të Rritjes, Haxhiu tha se Kosova atë e sheh si mundësi konkrete për zhvillim, “për afrim me tregun e përbashkët evropian dhe për përfitime të drejtpërdrejta për qytetarët”.

    Paketa financiare e BE-së për Ballkanin Perëndimor – për periudhën 2024-2027 – është në vlerë të 6 miliardë eurove. Fondet u ndahen vendeve të rajonit pjesërisht në formë grantesh dhe pjesërisht përmes kredive të favorshme.

    Gjatë qëndrimit në Prishtinë, Costa takohet edhe me kryeministrin në detyrë, Albin Kurti, si dhe me udhëheqësit e partive opozitare në Kosovë.

    Vizita e zyrtarit evropian në Kosovë është në kuadër të një turneu në vendet e rajonit të Ballkanit Perëndimor.

    “Turneu im i dytë në Ballkanin Perëndimor dërgon një sinjal të qartë: zotimi i Bashkimit Evropian për rajonin është i vërtetë, sikurse është e vërtetë edhe mundësia për zgjerim. Momentumi ekziston. Tani është koha që të japim rezultate”, tha ai përmes një njoftimi para nisjes së vizitave në rajon.

    Costa nisi turneun ballkanik në Sarajevë, ku u takua me anëtarët e Presidencës së Bosnje e Hercegovinës dhe udhëheqësen e Këshillit të Ministrave.

    Një ditë më vonë, ai qëndroi në Tiranë ku u takua me kryeministrin shqiptar, Edi Rama, dhe presdientin, Bajram Begaj. Më pas, në Shkup zhvilloi takim me kryeministrin maqedonas, Hristijan Mickoski.

    Pas qëndrimit në Prishtinë, Costa do të udhëtojë drejt Serbisë, për takime me presidentin serb, Aleksandar Vuçiq, kryetaren e Parlamentit, Ana Bërnabiq, dhe përfaqësuesit e organizatave të shoqërisë civile.

    Vizitat në rajon, Costa do t’i përmbyllë në Mal të Zi, ku përveç takimeve me zyrtarët malazezë, ai do të jetë bashkëudhëheqës i samitit BE-Ballkani Perëndimro në Tivat.

    Tema e samitit të sivjetshëm, sipas BE-së, është “Prosperiteti i përbashkët dhe stabiliteti i BE-së dhe Ballkanit Perëndimor”.

    Vitin e kaluar, ky samit u mbajt në Bruksel dhe Kosova u përfaqësua me tashmë ish-presidenten Vjosa Osmani, ndërkaq Serbia nuk mori pjesë. Në deklaratën e samitit të vitit të kaluar, u tha se “mungesa e normalizimit të raporteve mes Prishtinës dhe Beogradit po mban të dy shtetet të bllokuara në rrugën evropiane”.

    Kosova dhe Serbia kanë nisur negociatat, nën ndërmjetësimin e Brukselit, mbi një dekadë më parë.

    Gjatë procesit janë arritur një sërë marrëveshjesh, por jo të gjitha janë zbatuar në terren.

    Dy vendet nuk kanë zhvilluar takim të nivelit të lartë politik që nga shtatori i vitit 2023, disa ditë para sulmit të armatosur në Banjskë të Zveçanit.

    Një grup i serbëve të armatosur sulmoi Policinë e Kosovës, duke vrarë një reshter. Gjatë këmbimit të zjarrit që pasoi, u vranë edhe tre sulmues serbë.

    Kosova fajëson Serbinë për sulmin, por Beogradi mohon përfshirjen.

    Për sulmin në Banjskë, autoritetet në Kosovë kanë dënuar tre të akuzuar, teksa dhjetëra të tjerë gjenden në arrati.

    Millan Radoiçiq, ish-nënkryetari i Listës Serbe – partisë kryesore të serbëve në Kosovë që gëzon mbështetjen e Beogradit – ka marrë përgjegjësinë për organizimin e sulmit, teksa Kosova kërkon vazhdimisht që Serbia ta ekstradojë atë./RE

  • Shefja e BE-së: Kosova ka nevojë për institucione funksionale

    Shefja e BE-së: Kosova ka nevojë për institucione funksionale

    Ushtruesja e detyrës së shefes së Zyrës së Bashkimit Evropian në Kosovë, Eva Palatova, ka bërë të ditur se Presidenti i Këshillit Evropian, Antonio Costa, ka mbërritur në Prishtinë për vizitën e tij zyrtare.

    Gjatë qëndrimit në Kosovë, Costa pritet të zhvillojë takime me përfaqësuesit më të lartë të institucioneve shtetërore, si dhe me drejtues të subjekteve politike.

    Palatova ka vënë theksin te perspektiva e zgjerimit të Bashkimit Evropian, duke nënvizuar gjithashtu rëndësinë që Kosova të ketë institucione funksionale dhe efektive.

    “Mundësia e zgjerimit të BE-së është reale. Kosova ka nevojë për institucione plotësisht funksionale sa më shpejt të jetë e mundur”, ka shkruar Palatova në rrjetin social X.

  • Presidenti i KE-së në Prishtinë: Kosova ka nevojë për institucione të forta, të qëndrueshme dhe funksionale

    Presidenti i KE-së në Prishtinë: Kosova ka nevojë për institucione të forta, të qëndrueshme dhe funksionale

    Presidenti i Këshillit Evropian, Antonio Costa, ka deklaruar se ndodhet në Prishtinë për të riafirmuar mbështetjen e vazhdueshme të Bashkimit Evropian për Kosovën.

    Në një postim në rrjetin social “X”, Costa ka bërë të ditur se është takuar me ushtruesen e detyrës së presidentes, Albulena Haxhiu, kryeministrin në detyrë, Albin Kurti, si dhe me liderët e partive opozitare.

    Ai ka theksuar se, në prag të zgjedhjeve të kësaj fundjave, partneriteti me BE-në nënkupton edhe përgjegjësi nga ana e institucioneve dhe aktorëve politikë në Kosovë.

    Costa ka inkurajuar liderët politikë që integrimin në Bashkimin Evropian ta vendosin si prioritet mbi ndarjet politike dhe të bashkëpunojnë drejt këtij qëllimi të përbashkët.

    Po ashtu, ai ka theksuar nevojën për institucione të forta, të qëndrueshme dhe funksionale në Kosovë, të afta për të zbatuar reforma, për të shfrytëzuar mundësitë që ofron BE-ja dhe për të përmbushur zotimet në kuadër të dialogut Kosovë–Serbi.

    “Sot jam në Prishtinë për të riafirmuar mbështetjen e vazhdueshme të BE-së për Kosovën. U takova me ushtruesen e detyrës së presidentes, Albulena Haxhiu, ushtruesin e detyrës së kryeministrit Albin Kurti dhe me liderët e partive opozitare. Ndërsa Kosova shkon drejt zgjedhjeve këtë fundjavë, mesazhi im është i thjeshtë: partneriteti ynë vjen me përgjegjësi. I kam inkurajuar liderët politikë që ta vendosin integrimin në BE si prioritet, përtej ndarjeve politike, dhe të punojnë së bashku drejt këtij qëllimi të përbashkët. Kosova ka nevojë për institucione të forta, të qëndrueshme dhe funksionale, të afta për të zbatuar reforma, për të shfrytëzuar mundësitë që ofron Bashkimi Evropian dhe për të përmbushur të gjitha zotimet në kuadër të dialogut”, ka shkruar Costa.

  • Hovenier: Marrëdhëniet ShBA-Kosovë 16 muajt e fundit kanë marrë goditje serioze

    Hovenier: Marrëdhëniet ShBA-Kosovë 16 muajt e fundit kanë marrë goditje serioze

    Ish-ambasadori amerikan në Kosovë, Jeff Hovenier, ka komentuar zhvillimet politike në vend dhe marrëdhëniet mes Kosovës dhe Shteteve të Bashkuara, duke theksuar se këto raporte nuk janë në nivelin më të mirë si më parë.

    Ai është shprehur se gjatë 16 muajve të fundit, imazhi dhe reputacioni i Kosovës në Uashington janë dëmtuar ndjeshëm.

    Sipas tij, proceset e vështira politike, përfshirë dështimin për zgjedhjen e presidentit dhe përsëritjen e zgjedhjeve, kanë ndikuar në uljen e besimit për aftësinë e Kosovës që të përmbushë detyrimet e saj institucionale.

    Hovenier ka lënë të kuptohet se SHBA-ja bashkëpunon me partnerë që janë të besueshëm, të qëndrueshëm dhe të aftë për të realizuar zotimet e tyre.

  • Rusia rrëzoi 754 dronë ukrainas gjatë natës

    Rusia rrëzoi 754 dronë ukrainas gjatë natës

    Ministria ruse e Mbrojtjes ka njoftuar se ka rrëzuar 754 dronë ukrainas gjatë 24 orëve të fundit, sipas agjencisë së lajmeve Interfax.

    Më herët ishte raportuar se Rusia kishte rrëzuar 50 dronë mbi rajonin veriperëndimor të Leningradit gjatë natës, sipas guvernatorit të rajonit, Alexander Drozdenko.

    Shën Petersburgu ndodhet në rajonin e Leningradit, ndërsa presidenti ukrainas Volodymyr Zelensky ka konfirmuar se dronët ukrainas kanë goditur një terminal nafte në këtë qytet.

    Kievi ka bërë të ditur gjithashtu se gjatë natës ka kryer një sulm ndaj një anijeje luftarake ruse në bazën detare të Kronstadtit në Shën Petersburg, sipas Shtabit të Përgjithshëm të Ushtrisë së Ukrainës.

    Këto zhvillime vijnë në ditën e parë të Forumit Ndërkombëtar Ekonomik të Shën Petersburgut, i cili do të zgjasë deri më 6 qershor.

    Ky forum shpesh cilësohet si “Davos-i rus”.

  • Mbyllen përkohësisht disa segmente të autostradave më datat 5,6 dhe 7 qershor

    Mbyllen përkohësisht disa segmente të autostradave më datat 5,6 dhe 7 qershor

    Ministria e Infrastrukturës dhe Transportit ka bërë të ditur se në Kosovë do të zhvillohet Gara Ndërkombëtare e Çiklizmit në datat 5, 6 dhe 7 qershor 2026, e cila do të përfshijë disa akse rrugore në mbarë vendin, përfshirë autostradat “Arbën Xhaferi” dhe “Ibrahim Rugova”.

    Sipas njoftimit zyrtar, gjatë zhvillimit të kësaj gare do të ketë kufizime të përkohshme në qarkullim, ku në segmente të caktuara do të mbyllet njëra korsi, në përputhje me itineraret e përcaktuara për secilën ditë të aktivitetit.

    Më 5 qershor, duke filluar nga ora 13:00, një korsi e autostradës “Arbën Xhaferi” do të jetë e mbyllur përkohësisht. Gara do të nisë nga sheshi “Metush Krasniqi” në Kamenicë dhe do të përfundojë në kilometrin 28 në drejtim të Prishtinës.

    Më 6 qershor, kufizime të përkohshme të trafikut do të aplikohen në disa segmente rrugore, përfshirë rrugën Ferizaj (Bibaj) – Lipjan – Hani i Elezit. Këto ndërprerje do të jenë të shpërndara gjatë ditës, nga ora 09:00 deri në 16:00.

    Ndërsa më 7 qershor, gara do të shtrihet në një itinerar më të gjerë që përfshin disa qytete, përfshirë Ferizajn, Podujevën, Lipjanin, Fushë Kosovën, Llapushnikun dhe Duhlin, ku gjithashtu do të ketë mbyllje të pjesshme të një korsie në orare të ndryshme.

    Për organizimin dhe sigurinë gjatë ngjarjes, Federata e Çiklizmit e Kosovës do të bashkëpunojë me Policinë e Kosovës dhe institucionet përkatëse.

    Ministria ka apeluar tek qytetarët për mirëkuptim, si dhe për respektim të udhëzimeve të Policisë, stafit organizativ dhe sinjalizimit rrugor përgjatë gjithë itinerarit të garës.

  • Tetë të vrarë në Liban, pavarësisht marrëveshjes për uljen e tensioneve mes Izraelit dhe Hezbollahut

    Tetë të vrarë në Liban, pavarësisht marrëveshjes për uljen e tensioneve mes Izraelit dhe Hezbollahut

    Të paktën tetë persona, mes tyre një baba me dy fëmijët e tij, u vranë të martën në jug të Libanit nga sulmet izraelite, vetëm një ditë pasi presidenti amerikan Donald Trump deklaroi se Izraeli dhe Hezbollahu, i mbështetur nga Irani, kishin rënë dakord të ulnin intensitetin e luftimeve.

    Megjithatë, pavarësisht deklaratave për de-përshkallëzim, Hezbollahu ka vazhduar të lëshojë dhjetëra predha dhe dronë ndaj ushtarëve izraelitë në jug të Libanit dhe ndaj zonave civile në Izrael.

    Tensionet u rritën edhe më tej pasi Izraeli kërcënoi të hënën me sulme ndaj periferive jugore të Bejrutit, duke shkaktuar panik në kryeqytetin libanez dhe duke detyruar mijëra banorë të largohen nga zona. Forcat izraelite po zhvillojnë inkursionin e tyre më të thellë në Liban në 26 vjetët e fundit, ndërsa Bejruti deri më tani është kursyer kryesisht nga sulmet.

    Më vonë, Trump njoftoi se, pas një bisede telefonike me kryeministrin izraelit Benjamin Netanyahu dhe kontakteve me grupin militant libanez përmes ndërmjetësve, ishte arritur mirëkuptimi që “nuk do të hyjnë trupa në Bejrut”.

    Megjithatë, zhvillimet në terren tregojnë pak ndryshim, pasi të dyja palët kanë vazhduar sulmet me intensitet të lartë.

    Ministri izraelit i Mbrojtjes, Israel Katz, deklaroi të martën gjatë një konference për sigurinë se Izraeli ishte përmbajtur më herët nga goditjet ndaj Bejrutit për shkak të negociatave mes Shteteve të Bashkuara dhe Iranit. Sipas tij, Teherani po kërkon një marrëveshje armëpushimi në konfliktin me Izraelin, e cila do të ndalte edhe përplasjet në Liban.

    Katz tha se Netanyahu i ka bërë të qartë Trumpit, gjatë një telefonate të zhvilluar të hënën në mbrëmje, se Izraeli do të godasë periferitë jugore të Bejrutit nëse Hezbollahu vazhdon sulmet ndaj veriut të Izraelit.

    Ndërkohë, një rund i dytë bisedimesh mes Izraelit dhe Libanit pritet të mbahet të martën dhe të mërkurën në Uashington. Negociatorët libanezë do të kërkojnë një armëpushim të plotë që do të parandalonte sulme të tjera në të ardhmen.

    Këto bisedime, të nisura në prill, janë të parat mes dy vendeve pas më shumë se tri dekadash, duke pasur parasysh se Izraeli dhe Libani nuk kanë marrëdhënie formale diplomatike. Hezbollahu ka refuzuar negociatat e drejtpërdrejta, duke u mbështetur në ndikimin dhe mbështetjen e Iranit.

    Luftimet në Liban mbeten një pengesë serioze për marrëveshjen që po diskutohet për zgjatjen e armëpushimit mes Iranit dhe Izraelit. Edhe pse në prill u arrit një armëpushim i ndërmjetësuar nga Uashingtoni, Izraeli dhe Hezbollahu kanë vazhduar shkëmbimin e sulmeve, ndërsa Izraeli argumenton se vepron në kuadër të vetëmbrojtjes.

  • Arrestohen tre të dyshuar për disa vjedhje në Prishtinë

    Arrestohen tre të dyshuar për disa vjedhje në Prishtinë

    Sektori i Hetimeve të Kryeqytetit ka arrestuar tre persona, të cilët dyshohet se kanë kryer vjedhje të rënda në Prishtinë.

    Sipas një njoftimi për media thuhet se puna e zyrtarëve policorë ka rezultuar me arrestimin e të dyshuarve: E.P., mashkull, 18 vjeç, shtetas i Republikës së Kosovës, E.H., mashkull, 26 vjeç, shtetas i Republikës së Kosovës, E.P., mashkull, 16 vjeç, shtetas i Republikës së Kosovës.

    “Sektori i Hetimeve të Kryeqytetit ka vazhduar me veprimet e mëtejme lidhur me personat e dyshuar dhe, në koordinim me Prokurorin e Shtetit, është marrë vendimi për ndalimin e tyre”.

  • Pesë ditë fushatë, DnV: 56 raste të gjuhës së urrejtjes, dezinformimit dhe keqinformimit

    Pesë ditë fushatë, DnV: 56 raste të gjuhës së urrejtjes, dezinformimit dhe keqinformimit

    Organizata joqeveritare Demokracia në Veprim (DnV) ka shprehur shqetësim lidhur me vendimin e Qeverisë për të ndarë mjete financiare në prag zgjedhjesh, ku sipas tyre e bën një garë të pabarabartë zgjedhore, raporton Ekonomia Online.

    Violeta Haxholli nga DnV, në një konferencë për media ka thënë se ky është një shqetësim i vazhdueshëm për ta.

    “Shqetësim i vazhdueshëm që ne, si Demokracia në Veprim, e kemi evidentuar është përdorimi i resurseve publike që ka filluar qysh para fillimit zyrtar të fushatës, kryesisht e karakterizuar me vendimet e qeverisë për shpërndarje të përfitimeve financiare për qytetarët, gjë që ka krijuar pra një garë të pabarabartë zgjedhore”, ka deklaruar ajo.

    Kurse, duke folur për pjesëmarrjen e grave në këto zgjedhje Haxholli tha se pjesëmarrja e tyre është vetëm 34%, pak më e lartë se sa në zgjedhjet e kaluara.

    “Theksojmë që në këto zgjedhje apo gjatë fushatës, pra, po garojnë gjithsej 21 subjekte politike me gjithsej 902 kandidatë. Përbërja e grave është 34%, pra, vetëm pak më e lartë se në zgjedhjet e vjetshme dhe vetëm pak mbi minimumin sa kërkon ligji, pra kuotën që kërkohet me ligj. Subjektet politike që po garojnë në këto zgjedhje kanë rifreskuar në masë të madhe listat për dallim nga zgjedhjet e vjetshme, ku në përgjithësi mbi 50% e listave të subjekteve po janë të reja. Pra, janë hequr kandidatë, ndërsa janë shtuar kandidatë të rinj për këto zgjedhje. Nëse e shohim në nivel vendi apo komunat se nga po vijnë kandidatët që po garojnë në zgjedhje, prin Prizreni, i cili ka numrin më të madh të kandidatëve me gjithsej 157, pasuar nga Prishtina, nga ku vijnë 153 kandidatë që kanë garuar, Peja me 58 kandidatë, Ferizaji me 77 dhe Fushë Kosova, edhe pse një komunë relativisht e vogël, ka 55 kandidatë”, tha Haxholli.

    Sa i përket programeve, Haxholli tha se më shumë janë reciklim i programeve të vjetra.

    “Nëse flasim për programet, partitë politike së fundmi kanë filluar t’i publikojnë programet e tyre të reja për këto zgjedhje, dhe nëse e shikon përmbajtjen e tyre, ato janë më shumë riciklim i programeve të kaluara politike, por që tani janë, me një fjalë, riambalazhuar në formë të zotimeve”, tha ajo.

    Haxholli ka folur edhe për përdorimin e fëmijëve në tubimet e partive politike, duke treguar se tashmë janë dorëzuar edhe ankesa në Panelin Zgjedhor për Ankesa dhe Parashtresa (PZAP).

    “Një fenomen tjetër që po e vërejmë dhe që është në rritje, fatkeqësisht, është përdorimi i fëmijëve në tubimet e subjekteve politike. Këtë e kemi vërejtur te disa subjekte politike. Ne si DnV, do të thotë, kemi kritikuar qasjen e subjekteve politike në këtë drejtim dhe gjithashtu tanimë edhe në PZAP janë dorëzuar ankesa sa i përket përdorimit të fëmijëve në fushatë, dhe shfrytëzoj rastin këtu që t’iu bëjmë thirrje subjekteve politike që ta ndërprejnë pra një praktikë të tillë të shfrytëzimit të fëmijëve për qëllime elektorale. Sa i përket ecurisë së fushatës kur flasim pra për aktivitetet e subjekteve politike, vërehet një intensifikim i aktiviteteve në pesëditëshin e fushatës. Kemi parë që tubimet e hapura janë mbajtur në kryeqendrat kryesore të Kosovës. Përveçse në terren, edhe në hapësirën online e vërejmë këtë intensifikim të aktiviteteve. Çfarë po shohim është një centralizim i fushatës kryesisht tek liderët e partive, pra ata po marrin hapësirën më të madhe. Dhe duke parë këtë trend, atëherë kandidatët kanë filluar të shfrytëzojnë më shumë platformat online, siç është rrjeti social Facebook dhe rrjetet e tjera sociale, ku po i shohin si mundësi e mirë për të promovuar pra programin apo qëndrimet e tyre”, tha Haxholli.

    “Sa i përket PZAP-së, siç u cek, dy ankesa janë dorëzuar për keqpërdorim të fëmijëve në fushatë, dhe një ankesë është dorëzuar për gjuhë nxitëse apo të urrejtjes. Përveç këtyre fenomeneve që i kemi hasur gjatë këtyre pesë ditëve, ndonëse për dallim nga zgjedhjet e kaluara gjuha nxitëse dhe e urrejtjes e përdorur nga liderët apo edhe subjektet politike në këtë fushatë zgjedhore është më e ulët, sërish është shqetësuese dhuna online që po nxitë pra nga përkrahësit e subjekteve politike”, tha Haxholli.

    Ajo, ka thënë se sa i përket Komisionit Qendror të Zgjedhjeve (KQZ) ajo që i shqetëson është se përse u është lënë në diskrecion partive të vendosin për komisionerët të cilët kanë qenë nën hetim për keqpërdorime në zgjedhjet e kaluara.

    “Në kontekstin e administrimit të zgjedhjeve, Komisioni Qendror i Zgjedhjeve ka vazhduar me planifikimin dhe organizimin e këtij procesi zgjedhor. Çfarë kemi parë është që në një vendim të fundit të KQZ-së ka qenë më shqetësues, ku sa i përket komisionerëve të cilët kanë qenë nën hetim në lidhje me keqpërdorimet zgjedhore në zgjedhjet e kaluara, u është lënë në diskrecion partive që ato të rregullojnë pra komisionerët apo të mos i dërgojnë ata. Pra, duke përjashtuar KQZ-në veten  nga ky vendim, gjë që e shohim që nuk është në frymën e parimeve të integritetit zgjedhor”, ka shtuar ajo.

    Kurse, Rrezarta Krasniqi tha se kanë evidentuar 56 shkelje të përdorimit të gjuhës së urrejtjes, dezinformim apo keqinformim, të cilat sipas saj atakojnë kryesisht gratë.

    “Gjatë fushatës zgjedhore me hapësirën online, për zgjedhjet e 7 qershorit, po zhvillohen në dy drejtime. E para është tek monitorimi sistematik që përfshin faqet zyrtare të subjekteve politike, faqet zyrtare të kandidatëve për kryeministër, si dhe faqet e profileve zyrtare të kandidatëve për deputetë apo deputete. Gjatë kësaj kohe dhe gjatë monitorimit të javës së parë të fushatës, jemi fokusuar kryesisht në rrjetet sociale siç janë: Facebook-u, Instagrami dhe TikTok-u, që kanë më së shumti përdorues kohëve të fundit, sidomos gjatë fushatës zgjedhore, për 21 subjekte politike’, tha ajo.

    “Jemi fokusuar kryesisht në analizën e gjuhës së përdorur dhe postimeve të ndërveprimeve prej kandidatëve, ku gjatë monitorimit sistematik kemi identifikuar 56 raste ku ka shkelje dhe tregohen si paraqitje si gjuhë e urrejtjes, dezinformim, keqinformim, përmbajtje jashtë kontekstit apo gjuhë shpifëse. Nga ky numër prej 56 rastesh 35 përbëjnë raste të gjuhës së urrejtjes të kandidatëve për deputetë dhe deputete: 19 raste të gjuhës përçmuese apo shpifëse dhe 2 raste të dezinformimit.

    Një informacion tjetër mjaft relevant gjatë kësaj jave të monitorimit është se, prej 56 rasteve, 27 raste ata u takojnë grave. Pra, kanë target gratë kandidate të subjekteve politike”, tha Krasniqi.

  • Ferizaj: Njëri tejkaloi shpejtësinë, tjetri përdori telefonin – shoferët gjobiten me nga 500 euro

    Ferizaj: Njëri tejkaloi shpejtësinë, tjetri përdori telefonin – shoferët gjobiten me nga 500 euro

    Dy shoferë janë gjobitur për kundërvajtje të rënda në trafik në rajonin e Ferizajt.

    Në komunikatën e policisë thuhet se në rastin e parë, policia ka ndaluar një 26-vjeçar në fshatin Babush, ku në zonën 50 km/h ai po voziste me shpejtësi 85 km/h. Gjatë verifikimit ai kishte pasur masë mbrojtëse në fuqi deri në gusht të këtij viti. Të njëjtit i është shqiptuar gjobë 500 euro dhe pesë pike negative, si dhe i është vazhduar masa mbrojtëse edhe për gjashtë muaj tjerë.

    Në rastin e dytë, policia ka ndaluar një 21 vjeçar i cili gjatë vozitjes ka përdorur telefonin. Edhe ndaj tij gjithashtu ishte në fuqi masa mbrojtëse e ndalimit të drejtimit të automjetit deri në korrik të këtij viti. Ndaj tij është shqiptuar gjobë 500 euro, pesë pikë negative si dhe i është vazhduar masa mbrojtëse edhe për gjashtë muaj.

    Në të dyja rastet janë konfiskuar veturat e të shoferëve.

    KOMUNIKATË PËR MEDIA:

    Ndëshkohen dy shoferë për kundërvajtje të rënda në komunikacionin rrugor në rajonin e Ferizajt

    Njësia Rajonale e Komunikacionit Rrugor në Ferizaj ka vazhduar zbatimin e masave për rritjen e sigurisë në trafik, duke ndërmarrë veprime ndaj dy shoferëve që kanë kryer kundërvajtje të rënda në komunikacionin rrugor.

    Rasti i parë:

    Me datën 01.06 2026, në rrugën magjistrale në fshatin Babush, policët e komunikacionit kanë ndaluar shoferin me inicialet A.F. (26 vjeç), i cili drejtonte një automjet të tipit BMW 320 me targa vendore. Gjatë kontrollit është konstatuar se ai po lëvizte me shpejtësi 85 km/h në një zonë ku kufizimi i shpejtësisë është 50 km/h.

    Pas verifikimit të dokumentacionit, është konstatuar se ndaj tij ishte në fuqi masa mbrojtëse e ndalimit të drejtimit të automjetit për periudhën 08.05.2026 – 05.08.2026. Për këtë arsye, ndaj tij është shqiptuar gjobë në vlerë prej 500 euro, 5 pikë negative, është vazhduar masa mbrojtëse edhe për gjashtë muaj, si dhe i është konfiskuar automjeti.

    Rasti i dytë:

    Po ashtu, më 01.06 2026, rreth orës 18:10, në rrugën magjistrale në Ferizaj, policët kanë ndaluar shoferin E.M. (21 vjeç), i cili drejtonte një automjet të tipit VW Golf me targa vendore, duke përdorur telefonin mobil gjatë ngasjes.

    Gjatë verifikimit të dokumentacionit është konstatuar se edhe ndaj tij ishte në fuqi masa mbrojtëse e ndalimit të drejtimit të automjetit për periudhën 28.04.2026 – 27.07.2026. Si rezultat, ndaj tij është shqiptuar gjobë prej 500 euro, 5 pikë negative, është vazhduar masa mbrojtëse edhe për gjashtë muaj, si dhe i është konfiskuar automjeti.