Author: G.O.

Lideri i AAK-së, Ramush Haradinaj, ka reaguar pas paralajmërimeve për protestë të qytetarëve serbë në veri.

Haradinaj përmes një shkrimi në Facebook u kërkoi qytetarëve serbë të Kosovës të mos bien pre e politikave shkurtpamëse e të protestojnë kundër lëvizjes së lirë.

“Qytetarë serbë të Kosovës, Urat dhe rrugët duhet të na lidhin e jo të na ndajnë. Mos u bëni pre e politikave shkurtpamëse e të protestoni kundër lëvizjes së lirë. Ura e Ibrit duhet të jetë simbol i një jete të përbashkët e të pa alternativë.

Liria e lëvizjes si vlerë universale është e sotmja dhe e ardhmja. Ndarjet e përplasjet na rikthejnë në memorie të kaluarën e tragjeditë tona”, shkroi Haradinaj.

Ministrja e Drejtësisë Albulena Haxhiu ka nënshkruar kërkesën për ekstradim të reperit Rigels Rajku i njohur ndryshe si Noizy dhe DJ të tij, Crax, raporton Atvlive.tv.

Noizy dhe DJ Crax janë arrestuar në mesnatë në një klub nate në Lezhë.

Ata ishin shpallur prej disa ditësh në kërkim nga Policia e Kosovës, nën dyshimin për kryerjen e veprës penale ‘Lëndim i rëndë trupor’.

Noizy dyshohet se ditë më parë u përfshi në një përleshje në Pejë me një grup tjetër. Ai së bashku me grupin e tij dyshohet të kenë rrahur TikTok-erin e njohur, Medi Iseni.

Shërbimi Korrektues i Kosovës (SHKK) ka njoftuar se paraditen e së mërkurës i burgosuri L.XH. është arratisur nga reparti i Hematologjisë në Shërbimin Spitalor Klinik dhe Universitar.

Sipas njoftimit të SHKK-së, i arratisuri, L.XH. është i akuzuar për veprën penale “fajde”. Ai ishte arrestuar më 19 korrik në Prishtinë.

Hetimet se si ka ndodhur rasti kanë nisur, ndërsa SHKK-ja ka pezulluar nga puna dy zyrtarë korrektues.

Gjatë korrikut pati dy arratisje nga burgjet e Kosovës. Fillimisht u arratis Faton Hajrizi, që dyshohet se është vrarë në Serbi, nga burgu i Smrekonicës dhe Ujkan Metaj nga burgu i Dubravës, i cili u arrestua pas pak ditëve.

Prokuroria Themelore në Prishtinë ka dhënë detaje për rastin e plagosjes së gruas nga i dyshuari- bashkëshorti i saj.

Sipas Prokurorisë, ndaj I.A., më 4 gusht është ngritur aktakuzë për “Dhunë në familje” me propozimin për caktim të masës së paraburgimit, e në seancë fillestare ishte propozuar që t’i caktohet masa e arrestit shtëpiak, mirëpo gjykata e ka refuzuar këtë propozim dhe ndaj tij ka caktuar masën për t’iu afruar vendit apo personit të caktuar.

Fillimisht, Prokuroria njofton se i dyshuari më 2 gusht u ndalua nën dyshimin për “Dhunë në familje” e më pas iu ngrit aktakuza.

“Prokuroria Themelore në Prishtinë njofton opinionin publik se Departamenti i Përgjithshëm i kësaj prokurorie, më datë 02.08.2024 në ora 17:30, ka ndaluar të pandehurin I.A, për shkak të dyshimit se i njëjti ka kryer veprën penale ‘’Dhunë në familje’’ nga neni 248 të KPRK-së. Ju njoftojmë se më datë 04.08.2024, Prokurori i Shtetit ka ngritur Aktakuzë me kërkesë për caktimin e masës së paraburgimit kundër të pandehurit I.A.”, thuhet në njoftim, raporton “Betimi për Drejtësi”.

Sipas Prokurorisë, në seancë fillestare prokurori duke marrë parasysh gjendjen shëndetësore të të pandehurit dhe faktin se nuk jetonte bashkë me bashkëshorten, ka propozuar masën e arrestit shtëpiak.

“Po ashtu, më datë 04.08.2024, në Gjykatën Themelore në Prishtinë – dega në Fushë Kosovës, është mbajtur shqyrtimi fillestar në këtë çështje penale, ku Prokurori i Shtetit gjatë kësaj seance, duke marrë parasysh gjendjen shëndetësore të të pandehurit si dhe faktin se i pandehuri ka edhe një adresë tjetër të vendbanimit, ka propozuar masën e arrestit shtëpiak. Gjykata ka refuzuar propozimin e Prokurorit të Shtetit për caktimin e masës së arrestit shtëpiak, ashtu që ndaj të pandehurit I.A, është caktuar masa e ndalimit për t’iu afruar vendit apo personit të caktuar”, thuhet në njoftim.

Të martën, I.A., u ndalua nën dyshimin për “Vrasje të rëndë në tentativë” ndaj bashkëshortes së tij në Bresje të Fushë-Kosovës, si dhe “Mbajtje në pronësi, kontroll ose posedim të paautorizuar të armëve” dhe “Mospërfillje të gjykatës”.

“Ndërkaq, sot, më datë 06.08.2024, i pandehuri I.A, është arrestuar në fshatin Bresje, në Fushë Kosovë, me dyshimin për kryerjen e veprave penale ‘’Vrasje e rëndë në tentativë’’ nga neni 173 lidhur me nenin 28 të KPRK-së, ‘’Mbajtja në pronësi, kontroll ose posedim të paautorizuar të armëve’’ nga neni 366 i KPRK-së dhe ‘’Mospërfillja e gjykatës’’ nga neni 393 të KPRK-së. Në vendin e ngjarjes ka dal Prokurori i Shtetit, me qëllim të sigurimit të provave materiale, si dhe, ka vizituar të dëmtuarën e rastit, e cila është në trajtim në SHSKUK në Prishtinë, ndërsa ndaj të pandehurit IA, ka lëshuar Aktvendim mbi ndalim. Prokurori i Shtetit në bashkëpunim me Policinë e Kosovës, janë duke punuar intensivisht me qëllim të ndriçimit të rrethanave të cilat i kanë paraprirë kryerjes së këtyre veprave penale”, thuhet në njoftim.

Nga QKUK, të martën njoftuan se gjendja shëndetësore e viktimës është stabile.

Ministria ruse e Mbrojtjes tha se mbrojtja e saj ajrore ka rrëzuar 11 dronë të lëshuar nga Ukraina në katër rajone ruse mëngjesin e 7 gushtit.

“Sistemet e mbrojtjes ajrore penguan dhe shkatërruan tre dronë mbi rajonin e Belgorodit, katër mbi atë të Kurskut, dy dronë në rajonin e Voronezhit dhe dy në rajonin e Rostovit”, tha Ministria e Mbrojtjes në një postim në Telegram.

Edhe një ditë më parë, zyrtarët lokalë në Kursk kishin raportuar për sulme me dronë dhe granata të Ukrainës.

Ndërkaq, Forcat Ajrore të Ukrainës raportuan se kanë zmbrapsur kërcënimet ruse me dronë në disa rajone ukrainase.

Administrata ushtarake e rajonit të Kievit tha se sistemet e mbrojtjes ajrore të kryeqytetit ukrainas u aktivizuan ndaj dronëve rusë. Rusia, që nisi pushtimin e paprovokuar të Ukrainës, sulmon shtetin fqinj me lloje të ndryshme armësh, përfshirë dronë dhe raketa. Pavarësisht dëshmive të shumta, Moska mohon se sulmon infrastrukturën civile.

Edhe Kievi shpesh thotë se sulmon caqet e ushtrisë ruse, infrastrukturën e energjisë, për të penguar luftën që Rusia nisi kundër saj në shkurt të vitit 2022./REL

Është arrestuar edhe një person tjetër për rastin e rëndë që ka ndodhur dje në Bresje të Fushë Kosovës, ku mbeti e plagosur një grua pas të shtënave me armë zjarri që dyshohet se u shkrep nga bashkëshorti i saj.

Përmes raportit 24 orësh të Policisë së Kosovës, ka njoftuar se i arrestuari i dytë dyshohet se ka marrë armën që dyshohet se u përdor në rastin e plagosjes dhe e ka larguar nga vendi i ngjarjes.

Arma më pas është sekuestruar bashkë me tre fishekë dhe me tri gëzhoja, ndërsa i dyshuari është ndaluar për 48 orë.

“Lidhur me rastin janë arrestuar dy të dyshuar kosovarë njëri nën dyshimin se ka shtënë me armë zjarri në drejtim të viktimës kosovare, ndërsa i dyshuar tjetër pas dyshimeve se ka marrë armën e cila është përdorur, për ta larguar nga vendi i ngjarjes. Viktima është dërguar në QKUK për tretman mjekësor dhe sipas mjekëve është jashtë rrezikut për jetë. Pistoleta me tre fishekë dhe tri gëzhoja janë sekuestruar. Me vendim të prokurorit të dyshuarit janë dërguar në mbajtje”, thuhet në raport.

Një 12 vjeçar nga Komuna Skenderaj ka gjetur një portofol dhe e kishte dorëzuar në Stacionin Policor, raporton Ekonomia Online.

Policia e Kosovës ka bërë të ditur se 12 vjeçari, portofolin e ka gjetur gjatë mbrëmjes së djeshme, ndërsa janë verifikuar dokumentacionin në portofol dhe ka konstatuar se përpos dokumentacioneve të rëndësishme, në portofol gjendej një shumë e parave prej 2500 euro.

Tutje. policia ka identifikuar dhe verifikuar personin të cilit i përkiste portofoli dhe i kishte kthyer atij portofolin me paratë dhe dokumentacionin.

Mbi trembëdhjetë orë ka zgjatur një operacion që është kryer për herë të parë në Klinikën e Kirurgjisë Maksillofaciale, në QKUK.

Lajmin e ka dhënë Shërbimi Spitalor Klinik dhe Universitar i Kosovës.

Operacioni është kryer tek një 28 vjeçar nga ekipi i mjekëve nga Turqia, atyre vendorë nga kjo klinikë dhe Klinika e Anesteziologjisë.

“Intervenimi mikrokirurgjik për rikonstruksionin e nofullës së poshtme, pas largimit të tumorit dhe largimit subtotal të nofullës e cila ishte e dëmtuar”, thotë njoftimi.

“Kjo procedurë kirurgjike- Fibula free flap që nënkupton marrjen e një pjese të lëkurës, muskujve dhe kockës nga këmba dhe transferimin e këtyre indeve në nofullën e poshtme, duke bërë anastomosis (ngjitje) të enëve të gjakut, me enët e gjakut në kokë dhe qafë”.

Intervenimet e tilla nuk janë kryer më parë në QKUK.

Një aksident i rëndë ka ndodhur në mesnatë, ku ka mbetur i vdekur një 29-vjeçar nga Divjaka.

Aksidenti ka ndodhur në fshatin Zhym të qarkut të Fierit.

Nga pamjet e siguruara, shihet makina në kanal, ndërkohë që forcat zjarrfikëse po mundohen ta nxjerrin.

I riu ka humbur jetën në vendngjarje për shkak të goditjeve të forta që ka marrë, ndërkohë makina është shkatërruar plotësisht.

Makina fillimisht është përplasur me shtyllën elektrike e më pas ka përfunduar në kanal.