ATV

Author: G.O.

  • Koreja e Veriut lëshon një raketë balistike ndërkontinentale

    Koreja e Veriut lëshon një raketë balistike ndërkontinentale

    Koreja e Veriut ka lëshuar ​një raketë balistike me rreze të gjatë.

    Ushtria e Koresë së Jugut “zbuloi një raketë balistike të lëshuar nga zona e Phenianit në drejtim të Detit Lindor”, tha shtabi i përgjithshëm i mbrojtjes kombëtare në Seul.

    Zyrtarët njoftojnë se ushtria ka ngritur nivelin e gatishmërisë dhe po ndan me autoritetet amerikane dhe japoneze informacione.

    Sipas të dhënave të publikuara, raketa arriti një lartësi prej më shumë se 7000 kilometrash dhe përshkoi një distancë prej 1000 kilometrash.

    Nisja erdhi disa orë pasi ministrat e mbrojtjes së SHBA-së dhe Koresë së Jugut kërkuan që Pheniani të tërheqë trupat që ka vendosur në Rusi, ku, sipas Uashingtonit, rreth 10,000 trupa të Koresë së Veriut janë vendosur tani dhe mund të luftojnë kundër saj.

  • Meloni: Më kërcënuan me vrasje sepse kam nënshkruar bashkëpunimin me Shqipërinë për emigrantët

    Meloni: Më kërcënuan me vrasje sepse kam nënshkruar bashkëpunimin me Shqipërinë për emigrantët

    Për herë të parë kam marrë kërcënime me vdekje sepse kam nënshkruar protokollin e bashkëpunimit me Shqipërinë për emigracionin”, tha kryeministrja italiane Giorgia Meloni në televizionin publik Rai.

    “Do të bëj gjithçka për të sjellë rezultate të prekshme në këtë bashkëpunim”, shtoi Meloni, duke iu referuar dy qendrave italiane për azilkërkuesit që janë ngritur në Shqipëri.

    “Disa i kanë vënë synim vetes të pengojnë luftën kundër emigracionit të parregullt”, theksoi shefja e qeverisë italiane.

    Sipas saj, vendimi i gjyqtarëve të Bolonjës për t’i kërkuar gjykatës së BE-së të vendosë mbi dekretin e qeverisë së Romës për vendet e sigurta të origjinës për emigrantët “duket më shumë si një pamflet propagandistik sesa një dokument gjyqësor”.

    Duke komentuar vendimin e dy nga tre sindikatave më të mëdha të vendit, CGIL dhe UIL, për të thirrur një grevë të përgjithshme kundër projektbuxhetit, Meloni akuzoi sindikatat për “sjellje paragjykuese”.

    Ajo shtoi në fund, se “njoftimi për grevë është bërë pak ditë para takimit të saj me qeverinë, në lidhje me projektbuxhetin e vitit 2025”.

  • Kosova dhe Serbia shkëmbejnë akuza në takimin e Këshillit të Sigurimit

    Kosova dhe Serbia shkëmbejnë akuza në takimin e Këshillit të Sigurimit

    Këshilli i Sigurimit i Kombeve të Bashkuara mbajti të mërkurën takimin e rregullt për Kosovën.

    Në këtë takim, Kosova u përfaqësua nga ministrja e Punëve të Jashtme, Donika Gërvalla, ndërsa Serbia nga ministri Marko Gjuriq.

    Takimi erdhi në një kohë kur procesi i dialogut i lehtësuar nga BE, ka ngecur me mospajtime të thella mes të palëve dhe kritikave të Uashingtonit dhe Brukselit se Serbia dhe Kosova po shkelin detyrimet nga marrëveshjet, duke u bërë thirrje të vazhdueshme të heqin dorë nga veprimet e njëanshme.

    Përballja e Kosovës dhe Serbisë para Këshillit të Sigurimit u karakterizua me akuza të ndërsjella dhe interpretime plotësisht të ndryshme të zhvillimeve në Kosovë.

    Gjuriq tha se situata në Kosovë gjatë dy viteve të fundit ka shënuar përkeqësim për shkak të veprimeve të njëanshme të Qeverisë së Kosovës, të cilën ai e akuzoi për krimin e një klime të frikës dhe mungesë të stabilitetit.

    Ai akuzoi po ashtu se po refuzohet të respektohet marrëveshja e Brukselit dhe nuk po krijohet Asociacioni i komunave me shumicë serbe, duke thënë që veprimet e tilla të Kosovës janë një kundërshtim i drejtpërdrejt i Këshillit të Sigurimit dhe bashkësisë ndërkombëtare.

    Ndërkohë Gërvalla i hodhi poshtë akuzat e ministrit serb si “gënjeshtra të çmendura” duke u bërë thirrje anëtarëve të Këshillit të mos u besojnë atyre.

    Ajo mbrojti vendimet e Qeverisë së Kosovës duke thënë që asnjë shtet tjetër nuk do të pranonte që institucionet e jashtëligjshme të një shteti tjetër të lëshonin dokumente personale, ndërkohë që akuzoi Serbinë për shkelje të vazhdueshme të marrëveshjeve të ndërmjetësuara nga Bashkimi Evropian.

    Gërvalla tha se Serbia po vazhdon të mbrojë pjesëtarët e sulmit të armatosur në Banjskë dhe akuzoi Qeverinë e Serbisë se po luan rolin e aleates së Rusisë në rajon.

    “Problemi për njerëzit e Vuçiqit nuk është Asociacioni. Ata e kanë problem vet ekzistencën tonë. Për ta Asociacioni nuk është mjet për të lehtësuar jetën e qytetarëve, është vetëm edhe një përpjekje për të shkëputur një pjesë të territorit të shtetit tonë, sikur që Putini ka bërë me Ukrainën. Ata nuk duan asgjë më pak se zhdukjen e Republikës së Kosovës”, deklaroi ministrja Gërvalla.

    Përfaqësuesi amerikan, ambasadori Robert Wood, i bëri thirrje Këshillit të Sigurimit të rishqyrtojë mundësinë e mbylljes së misionit të OKB-së në Kosovë, të cilit tha ai i ka kaluar koha.

    Ai kërkoi që këto takime të Këshillit të Sigurimit të zvogëlohen në një takim të vetëm vjetor që do të zhvillohej me dyer të mbyllura.

    Shtetet e Bashkuara gjithashtu thanë se Serbia “nuk ka bërë përparim të konsiderueshëm” në mbajtjen përgjegjës të autorëve të sulmit serb në Banjskë vitin e kaluar, përfshirë Radoiçiqin.

    Në anën tjetër po ashtu shprehën shqetësimin “për veprimet e pa bashkërenduara” të Qeverisë së Kosovës që janë në kundërshtim me angazhimin e saj në procesin e dialogut.

  • Kuvendi sot mban seancë plenare, në rend dite janë 27 pika

    Kuvendi sot mban seancë plenare, në rend dite janë 27 pika

    Kuvendi i Kosovës sot do të mbajë seancë plenare ku në rend janë dite 27 pika.

    Seanca do të fillojë me deklarimet jashtë rendit të ditës, për të vazhduar me propozimin e Grupit Parlamentar të Lëvizjes Vetëvendosje për zëvendësimin e deputetëve në komisione parlamentare dhe propozim-Vendimin për hartimin e Nismës legjislative të qytetarëve nga Qeveria e Republikës së Kosovës.

    Do të bëhet shqyrtimi i dytë i Projektligjit nr.08/L-288 për mbrojtjen e konsumatorit, shqyrtimi i dytë i Projektligjit nr.08/L-295 për kripto-asetet, shqyrtimi i dytë i Projektligjit nr.08/L-265 për regjistrin e pronarëve përfitues, shqyrtimi i propozimit të gjashtë (6) deputetëve nga GP të PDK-së, për shkarkimin e anëtarëve të Bordit të Radiotelevizionit të Kosovë, zgjedhja e tre (3) drejtorëve të Bordit të Ndërmarrjes Publike Operatori i Sistemit, Transmisionit dhe Tregut.

    Po ashtu do të bëhet emërimi i anëtarit në Këshillin Shtetëror të Cilësisë të Agjencisë së Kosovës për Akreditim, nga radhët e studentëve, shqyrtimi i Projektligjit nr.08/L-317 për aderim në “Konventën për njohjen dhe ekzekutimin e vendimeve të huaja në çështje civile apo tregtare”, shqyrtimi i Projektligjit nr.08/L-318 për aderim në “Konventën për marrjen e provave jashtë vendit në çështje civile apo tregtare”,

    shqyrtimi i Projektligjit nr.08/L-319 për aderim në “Konventën për zgjedhjen e marrëveshjeve gjyqësore”, shqyrtimi i parë i Projektligjit nr.08/L-312 për ndalimin e përdorimit të pijeve energjike për personat e moshës nën tetëmbëdhjetë (18) vjeç,

    shqyrtimi i parë i Projektligjit nr.08/L-315 për banim social dhe të përballueshëm, shqyrtimi i parë i Projektligjit nr.08/L-320 për sigurimin e detyrueshëm të kujdesit shëndetësor, shqyrtimi i parë i Projektligjit nr.08/L-322 për Byronë Shtetërore për Verifikimin dhe Konfiskimin e Pasurisë së Pajustifikueshme.

    Deputetët do të bëjnë edhe shqyrtimin e parë të Projektligjit nr.08/L-316 për ndryshimin dhe plotësimin e Ligjit nr.08/L-036 për Dërgimin e Forcës së Sigurisë së Kosovës jashtë vendit, shqyrtimin e parë të Projektligjit nr.08/L-321 për ndryshimin dhe plotësimin e Ligjit nr.06/L-032 për Kontabilitet, Raportim Financiar dhe Auditim.

    Do të bëhet edhe shqyrtimi i raportit me rekomandime për mbikëqyrjen e zbatimit të Kodit nr.06/L-006 të Drejtësisë për të Mitur, shqyrtimi i raportit me rekomandime për mbikëqyrjen e zbatimit të Ligjit nr.05/L-049 për Administrimin e Pasurisë së Sekuestruar dhe të Konfiskuar, i ndryshuar dhe plotësuar me Ligjin nr.08/L-034y themelimi i Komisionit Ad-Hoc për përzgjedhjen e kandidatëve për anëtarë të Bordit të Radiotelevizionit të Kosovës, nga komuniteti shqiptar, shqyrtimi i Propozimit të shtatë (7) deputetëve nga radhët e komuniteteve tjera që nuk janë shumicë, për shkarkimin e nënkryetarit të Kuvendit të Republikës së Kosovës, Bahrim Shabaniy shqyrtimi i Raportit vjetor financiar të Buxhetit të Republikës së Kosovës, për vitin 2023, shqyrtimi i Raportit vjetor të Performancës së Zyrës Kombëtare të Auditimit për vitin 2023, shqyrtimi i Raportit vjetor të Fondit të Kursimeve Pensionale të Kosovës për vitin 2023 dhe miratimi i buxhetit të Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024, për periudhën kohore, prej 4 korrik 2024 deri në përfundim të mandatit të tij.

  • Rritja e pagave në sektorin publik – Jasharaj: Është fushatë e ulët dhe nënçmuese

    Rritja e pagave në sektorin publik – Jasharaj: Është fushatë e ulët dhe nënçmuese

    Kryetari i Sindikatës së Bashkuar të Arsimit dhe Shkencës, Rrahman Jasharaj, ka komentuar rritjen e pagave të punëtorëve të sektorit publik. Ai kritikoi Qeverinë duke thënë se kjo ngritje është e ulët dhe nënçmuese.

    Në një intervistë për Ekonomia Online, Jasharaj ka thënë se pagat e mësimdhënësve duhet të kenë rritje 30 për qind në kuadër të koeficientit 1. Tutje, ai shtoi se ende po vazhdohet praktika që të mos ketë komunikim ndërmjet sindikatave dhe nivelit qendror.

    “Nga komunikimi i parë që kemi bërë me kryetarët e nivelit komunale dhe universiteteve shihet dhe është e arsyeshme. Jemi të zhgënjyer me deklaratën para mediave dhe kryeministrit Kurti dhe ministrit Murati, ne kemi bërë kërkesë tash e dy muaj drejtuar kryeministrit që të ketë një lëvizje të vlerës së koeficientit për së paku 30 % duke e argumentuar me ngritjen e vazhdueshme të çmimeve dhe duke bërë përpjeke që punëtorët e arsimit por edhe sektorët e tjerë ta kenë një mbështetje që të përballen më lehtë me çmimet që po ngrite. Ishte i befasishëm deklarimi i djeshëm ngase Kurti e Murati po vazhdojnë me atë praktikën që të mos komunikojnë fare me sindikatat por të sjellin vendime ashtu siç ju teket”, ka thënë Jasharaj.

    Kryesindikalisiti i arsimit ka theksuar se ky vendim në këtë kohë, mund të lexohet si deklarim për fushatë elektorale. Sipas tij, Qeveria ka qasje të gabuar, dhe nuk ka disponim për të bashkëpunuar me sindikatat.

    “Kemi një premtim se në janar do të ketë lëvizje brenda koeficienteve që dyshojmë që nuk është e mundur ngase që ligji për pagat e ka prodhuar Parlamenti dhe vetëm ai ka të drejtë të ndërhyjë në ligje, ndërsa Murati ka mundur të bëjë më lehtë lëvizjen e ta ngrit koeficientit por ta ngrit tani e jo në janar, sepse janari ka disa muaj dhe nuk dihet se çfarë do të ndodh, nga disa mund të lexohet si një deklarim pranë fushatës sidoqoftë, punëtorët e arsimi dhe jo vetëm janë tepër të pa kënaqur ngase me këtë lëvizje nëse e kthejmë në euro i bie diku 50 euro, ngritje që është tepër e ulët dhe është nënçmuese dhe kam frikë që kjo do të reflektojë tek anëtarësia jonë”, theksoi ai.

    “Ne e kemi shpërndarë një formularë në të gjitha institucionet arsimore dhe po presin se çfarë po na thonë anëtarësia. Sepse ata e dinë që ne jemi angazhuar shumë por kemi hasur në problem me qasjen e gabuar të Qeverisë, sidomos është tek ngritja e koeficientit por edhe tek kontrata kolektive, ku siç duhet zonja Nagavci nuk ka disponim që të ulet me ne e të bisedojmë as për çështjet tjera e as për kontratën që është tejet e rëndësishme për sektorin e arsimit por kontrata janë të rëndësishme edhe për kontratat tjera”, deklaroi ai.

    “Nëse vazhdohet kështu ne do ta analizojmë vullnetin e anëtarësisë, dhe pastaj do të shohim çfarë do të bëjmë tutje, kam frikë se anëtarësia e zhgënjyer edhe më këtë vendim, do të jetë edhe më kategorike që ne të fillojmë me veprime sindikale dhe do të angazhohemi sa ma pak të bllokohet procesi mësimor, ngase nxënësit nuk janë fajtor pse është kjo situatë e tillë”, shtoi ai.

    Tutje, ai ka ritheksuar se kjo rritje, nuk është e mjaftueshme, madje krahasoi pagën e punëtorëve të arsimit në Shqipëri me atë të Kosovës.

    Sipas Jasharaj, një mësimdhënës se Shqipëri ka pagën mbi 900 euro, ndërsa lëvizja e pagës për 55 euro në Kosovë, shkakton irritim për punëtorët, raporton EO.

    “Nuk është e mjaftueshme sepse është një lëvizje që nuk ndikon shumë, nuk i ndihmon as punëtorëve të arsimit, as policisë e të tjerëve, përballje me inflacionin përballje me ngritjen e vazhdueshme të çmimeve, e aq më tepër kur edhe mësimdhënësit e tjerë kanë komunikim me shqiptarët e Shqipërisë, dihet publikisht se Qeveria e Shqipërisë, bëri një lëvizje të dukshme të pagave, paga në Shqipëri tek arsimi kanë shkuar në 900 e më shumë euro, kjo lëvizje me 50 euro më tepër i irriton sesa që do t’i gëzojnë punëtorët e arsimit e të tjerët”, përfundoi ai.

    Qeveria e Kosovës të mërkurën ka njoftuar se pagat për punëtorët e sektorin publik do të rriten nga janari i vitit 2025.

    “Të gjithë të punësuarve në sektorin publik, pagat do t’u rriten për 55 euro nga janari, dhe për 55 euro tjera nga muaji korrik i vitit të ardhshëm”- u shpreh ai, duke bërë të ditur se rritja e përgjithshme e pagave brenda vitit 2025 do të jetë gjithsej 110 euro bruto”, ka njoftuar Kurti në konferencë.

  • Të shtëna me armë zjarri në Shkodër, 3 të vdekur dhe 1 i plagosur rëndë

    Të shtëna me armë zjarri në Shkodër, 3 të vdekur dhe 1 i plagosur rëndë

    Një ngjarje e rëndë ka ndodhur pasditen e kësaj të mërkure në Dobraç të Shkodrës.

    Tre persona janë vrarë me armë zjarri ndërsa dy të tjerë sipas informacioneve të Euronews Albania, një tjetër është në gjendje të rënduar shëndetësore.

    Sipas informacioneve, ngjarja e rëndë e ndodhur në zonën e njohur si “5 heronjtë e Vigut”, ka qenë një atentat që ka pasur në shënjestër anëtarë të familjes Lici.

    EuronewsAlbania raporton se ende nuk mund të flitet për identitetin e viktimave, trupat e të cilëve tashmë janë larguar nga vendngjarja, por sipas informacioneve jozyrtare, një prej tyre ka qenë anëtar i fisit Lici.

  • ​Ritet bilanci i viktimave nga përmbytjet katastrofike në Spanjë

    ​Ritet bilanci i viktimave nga përmbytjet katastrofike në Spanjë

    Përmbytjet katastrofike në Spanjën lindore kanë lënë të vdekur të paktën 72 persona, njoftoi transmetuesi publik spanjoll RTVE të mërkurën pasdite.

    Të paktën 70 njerëz vdiqën në rajonin e Valencias dhe dy të tjerë në Castile-La Mancha. Në Paiporta, një nga qytetet më të goditura, kryebashkiaku foli për “dhjetëra vdekje” për shkak të stuhisë.

    Autoritetet ende nuk kanë ofruar një vlerësim të numrit të të zhdukurve.

    Numri i fundit i vdekjeve vjen pas një nate torturuese me përmbytje shkatërruese, të shkaktuara nga stuhia më e keqe e shekullit, e krahasueshme vetëm me dy të tjera në vitet 1980, sipas agjencisë meteorologjike të Spanjës.

    Kryeministri Pedro Sanchez u bëri thirrje njerëzve që të qëndrojnë vigjilentë pasi stuhitë vazhdojnë të godasin Gadishullin Iberik, duke paralajmëruar se fronti i motit është “ende duke bërë kërdi” dhe se urgjenca nuk ka përfunduar.

    Të mërkurën pasdite, qeveria e Katalonisë aktivizoi një alarm të kuq në disa pjesë të provincës së Barcelonës. Agjencia meteorologjike e Spanjës aktivizoi gjithashtu një alarm të kuq për zonat në Cadiz.

    Sanchez bëri thirrje për unitet dhe solidaritet, duke paralajmëruar banorët në rajonet e prekura, përfshirë Valencia, Andaluzia dhe Extremadura, që të shmangin udhëtimet pranë përrenjve dhe brigjeve të lumenjve dhe të ndjekin këshillat e urgjencës.

    Qeveria gjermane ofroi gjithashtu mbështetje për Madridin, ndërsa presidentja e Komisionit të BE-së Ursula von der Leyen shprehu ngushëllimet e saj, duke aktivizuar mbështetjen satelitore dhe duke mobilizuar burimet e Mbrojtjes Civile të BE-së nëse është e nevojshme.

    Duke folur me gazetarët në Ishujt Kanarie, Mbreti Felipe i Spanjës iu drejtua fatkeqësisë së përmbytjeve, duke shprehur shqetësimin për shkatërrimin e gjerë dhe sfidat e vazhdueshme.

    Të mërkurën pasdite, qeveria spanjolle njoftoi se do ta shpallte zonën e prekur një “zonë katastrofike”.

    Stuhia filloi të martën, duke lëshuar shi të një viti në orë, duke shkaktuar që lumenjtë të shpërthejnë shpejt brigjet e tyre dhe madje të krijojnë tornado.

    Rrugët dhe qytetet filluan të përmbyten, duke bërë që autoritetet të ndërpresin shërbimin hekurudhor rreth Valencias, të anulojnë fluturimet dhe përfundimisht t’u kërkojnë banorëve të qëndrojnë brenda natës së së martës.

    Megjithatë, në kohën kur qeveria dërgoi alarme emergjente duke u kërkuar njerëzve të qëndronin brenda ose të kërkonin terrene të larta, shumë nga dëmet tashmë ishin bërë.

    Ndërsa lumenjtë vërshonin nëpër qytete, rrugë dhe lagje, qindra njerëz u bllokuan në çatitë e shtëpive, automjeteve, qendrave tregtare ose zonave industriale; disa ishin ngjitur pas pemëve.

    Banorët e dëshpëruar iu drejtuan mediave sociale për të kërkuar shpëtim pasi linjat lokale të emergjencës u shembën për shkak të një kombinimi të ndërtesave të përmbytura dhe vëllimit të madh të thirrjeve.

    Në Valencia, shpëtimi ka vazhduar edhe pasditen e së mërkurës. Ministria e Mbrojtjes e Spanjës vendosi rreth 1000 anëtarë të forcave të armatosura për të ndihmuar në përpjekjet.

    Banorëve u kërkohet ende të shmangin çdo udhëtim në autostradë dhe shumica e shkollave në rajonin autonom mbeten të mbyllura.

    Ndërkohë, sistemi i stuhive vazhdon të lëvizë nëpër Gadishullin Iberik, me pjesën më të madhe të Spanjës verilindore dhe jugperëndimore në alarme moti për shira të dendur. /AA

  • Haxhiu kërkoi hetim të pronës në Veternik, Prokuroria Speciale: Deklarim i pavërtetë, tendencioz dhe qëllimkëqija

    Haxhiu kërkoi hetim të pronës në Veternik, Prokuroria Speciale: Deklarim i pavërtetë, tendencioz dhe qëllimkëqija

    Prokuroria Speciale e Republikës së Kosovës ka shprehur indinjatë të thellë ndaj qasjes së vazhdueshme joproduktive të Ministres së Drejtësisë, Albulena Haxhiu, ndaj Prokurorisë Speciale të Republikës së Kosovës.

    Përmes një komunikate për media, Prokuroria Speciale, demanton deklarimin e Ministres së Drejtësisë, Albulena Haxhiu, të bërë sot, duke u shprehur se “është e shqetësuar pasi Prokuroria Speciale ka mbyllur hetimet për rastin e pronës milionëshe në Veternik”.

    Prokuroria Speciale informon opinionin publik se rasti për të cilin është deklaruar ministrja në fjalë, nuk është hetuar dhe nuk ka qenë në punë asnjëherë në Prokurorinë Speciale, sipas prokurorisë deklarimi i tillë i ministres Haxhiu, është i pavërtetë dhe tendencioz.

    “Prokuroria Speciale, deklarimet e tilla të pavërteta, fatkeqësisht nga ministrja e drejtësisë, i konsideron të qëllimshme dhe tendencioze në drejtim të Prokurorisë Speciale dhe punës se suksesshme të udhëheqësit të saj, duke vlerësuar se këto deklarime të pasakta, përveç tjerash kanë për qëllim edhe dezinformimin e opinionit publik, pengimin në punë dhe dëmtimin e imazhit të kësaj prokurorie”, thuhet në komunikatë.

    Prokuroria Speciale, i bën thirrje ministres së drejtësisë dhe të gjithë personave tjerë që kanë synim pengimin e kësaj prokurorie në realizimin e mandatit të saj, që të përmbahen nga ‘deklarime të tilla të pavërteta, tendencioze dhe qëllimkëqija’.

    “Për më tepër, Prokuroria Speciale siguron opinionin publik, se veprimet e tilla të ministres së drejtësisë dhe të kujtdo tjetër, në asnjë moment dhe rrethanë nuk do të ndikojnë që kjo prokurori ta ushtroj mandatin e saj në drejtim të luftimit të kriminalitetit dhe ndjekjen e kryesve të veprave penale, pavarësisht se kush janë ata”, thuhet tutje.

  • Qeveria e miraton projektligjin për buxhetin e vitit 2025

    Qeveria e miraton projektligjin për buxhetin e vitit 2025

    3 miliardë e 600 milionë euro është buxheti për vitin 2025, i cili u miratua të mërkurën në mbledhjen e Qeverisë. Projektligji për buxhetin do të dërgohet në Kuvendin e Kosovës për shqyrtim dhe miratim, raporton Ekonomia Online.

    Gjatë prezantimit të këtij buxheti nga ministri i Financave, Hekuran Murati, tha se i njëjti është 9 për qind më i lartë se buxheti i vitit paraprak dhe është “buxhet më gjithëpërfshirës”.

    “Mund të them se në shumicën e ekonomive në botë njëra prej shqetësimeve është rritja e çmimeve, ne kemi arritur që ta stabilizojmë inflacionin. Tani që kemi uljen e normës së inflacionin mund të them që ekonomia e vendit po i kthehet ritmit të rritjes ekonomike, e që për vitin e ardhshëm pritet që të jetë 5.6 ne terma real. Sektorët kryesor qe kanë pasur prioritete në buxhetim kanë qenë sektori i mbrojtjes, sigurisë, shëndetësisë, infrastrukturës e të tjera. Është një buxhet gjithëpërfshirës”, tha Murati.

    Duke folur gjatë një mbledhjes së Qeverisë për buxhetin e vitit të ardhshëm, kryeministri i Kosovës, Albin Kurti, ka deklaruar se 105 milionë euro janë ndarë për nevoja të shëndetësisë, me qëllim që të sigurohen barnat esenciale, ndërsa 87 milionë euro janë ndarë për nevoja të sigurisë e mbrojtjes, municion e pajisje furnizime të nevojshme “që Policia e ushtria t’i kryejë detyrat me efikasitet”.

    Kryeministri Kurti bëri të ditur se janë ndarë 930 milionë euro për investime infrastrukturore e 60 milionë euro për skema të shtesave për fëmijë.

    Për premtimet e partive opozitare, Kurti u shpreh se ato janë boshe, duke shtuar se “emisionet humoristike dhe qeverisja e përgjegjshme nuk duhet të ngatërrohet”.

    “Ndërkohë, për shkak se tashmë zgjedhjet po afrohen, po dëgjojmë edhe shumë premtime boshe opozitare sikundër vlerë e vendimeve të mira të Qeverisë. Mirëpo, për një gjë duhet të jemi të sigurt se emisionet humoristike dhe qeverisja e përgjegjshme nuk duhet ngatërruar”, ka thënë ai.

  • ‘Trepça’ pezullon 13 punëtorë nga puna, iu ngritet aktakuzë

    ‘Trepça’ pezullon 13 punëtorë nga puna, iu ngritet aktakuzë

    Ndërmarrja “Trepca” ka lëshuar disa njoftime gjatë ditës së sotme, ka pezulluar 13 punëtorë nga puna.

    Kështu kanë bërë të ditur përmes njoftimeve në Facebook, ku në postimin e tyre thuhet se arsyeja e pezullimit të 12 punëtorëve, është ngritja e aktakuzës.

    “Me datën 30.10.2024 z.B.S, z.B.I, z.SH.R, z.Z.I, z.Sh.O, z.P.B, z.B.H, z.D.H, z.F.B, z.R.B, z.B.H dhe z.Rr.L, janë larguar përkohësisht nga puna. Me vendim me nr.prot:6584 të Kryeshefit Ekzekutiv të Trepça Sh.A., pasi është ngritur aktakuza, duke u bazuar në nenin 73 par.1, nën paragrafi 1.1 i Ligjit nr. 03/L-212 të Punës si dhe nenit 19 par.1, nën paragrafi 1.1 i Rregullores nr.prot: 2906 të datës 30.7.2020 për përgjegjësinë disiplinore dhe materiale të punëtorëve të Trepça Sh.A”, thuhet në njoftim.