Modelja Adrola Dushi, po ndan momente të shumta në rrjetet sociale.
Së fundmi ka postuar së fundmi një video në “Tik-Tok”, ku në sfond dëgjohet dueti i Capital T dhe Alban Skenderaj.
Teksa shijon ritmin e këtij super projekti, Adrola përballet me të papriturën.
Personi që e shoqëron (shihet që është Capital T) ia merr telefonin nga dora ndërsa modelja buzëqesh.
Behgjet Pacolli ka kujtuar ditëlindjen e 81-të të ish-presidentit historik, Ibrahim Rugova, përmes një fotoje të tyre, të shkrepur dekada më parë.
Në një postim në Facebook, ish-presidenti Pacolli tha se Rugova mbetet frymëzim i përhershëm për çdo njeri që e do Kosovën dhe që beson se rruga drejt së ardhmes ndërtohet me vizion, urtësi dhe punë.
“Sot, më 2 dhjetor, Presidenti historik Ibrahim Rugova do të mbushte 81 vite jetë. Kjo foto e vjetër, dekada më parë, më kujton takimet tona të shumta – të qeta, të urta dhe gjithmonë të përkushtuara ndaj Kosovës. Presidenti Rugova ishte simbol i mençurisë, i durimit dhe i paqes; njeri që me qetësinë e tij të hekurt ndërtoi themelet e shtetësisë sonë. Lavdi jetës dhe veprës së tij”, ka shkruar Pacolli.
Nënkryetari i Lidhjes Demokratike të Kosovës, Lutfi Haziri, ka deklaruar se partia e tij po hyn në zgjedhjet e jashtëzakonshme të 28 dhjetorit me unitet të plotë dhe me bindjen se qytetarët do t’i rikthejnë besimin LDK-së.
Ai ka bërë të ditur se kryetari i partisë, Dr. Lumir Abdixhiku, është nominuar për kandidat për kryeministër.
“Me unitet të plotë, kemi nderin që e nominuam për Kryeministër kryetarin tonë, Dr. Lumir Abdixhikun, që do të përkthehet me unitet qytetar në zgjedhjet e jashtëzakonshme të 28 dhjetorit,” tha Haziri.
Ai kritikoi gjendjen aktuale politike në vend, duke thënë se mungesa e bashkëpunimit ndërinstitucional dhe vullnetit politik ka çuar Kosovën në bllokadë të plotë.
“Është e thjeshtë. Mungoi bashkëpunimi e vullneti dhe vendi u bllokua në një krizë politike të planifikuar e të menaxhuar. Kosova sot as nuk është më e pavarur, as më e lirë e as më demokratike. Është pa Kuvend, pa Qeveri dhe shpejt edhe pa buxhet shteti,” u shpreh ai.
Sipas Hazirit, zgjedhjet e 28 dhjetorit janë mundësia për t’i dhënë fund, siç i quajti ai “territ politik” dhe për t’u rikthyer te vlerat tradicionale të vendit.
“Është mundësia që më 28 dhjetor të mos ecim edhe tutje nëpër terr politik, por t’i kthehemi familjes, atdheut e Zotit,” tha ai, duke shtuar se LDK përfaqëson shpresën për një të ardhme më të mirë.
Haziri theksoi se partia ka kontribuar vazhdimisht në proceset shtetformuese. Ish-kryetari i Gjilanit tha se vendi ka nevojë për rikthimin e LDK-së në qeverisje.
“Kosova ka nevojë për dashni. Kosova ka nevojë për LDK-në si asnjëherë më parë”, ka shkruar Haziri. /Telegrafi/
Dy të dyshuar për armëmbajtje pa leje janë arrestuar në Prizren të hënën.
Sipas njoftimit të Policisë, ata kishin postuar video në rrjetet sociale ku shiheshin duke shtënë me armë zjarri.
“Gjatë kontrollit në shtëpinë e tyre është gjetur dhe konfiskuar një armë zjarri automatike e kalibrit të panjohur. Pas intervistimit, me vendim të prokurorit të dyshuarit janë dërguar në mbajtje”, thuhet në njoftim.
Njëri nga bashkëpunëtorët më të afërt të ish-Presidentit të Kosovës, Ibrahim Rugova, Adnan Merovci e ka përshkruar urtësinë e tij, duke thënë se çdoherë mbante kokën ulur dhe shihte tokën.
Ai e ka quajtur Rugovën “njeriu i tokës”.
“Njeriu i Tokës! Çdoherë mbante kokën ulur, shihte tokën, unë herë para, herë mbrapa afër tij mbaja kokën lartë duke dashur ta pushtoj qiellin derisa u binda se ai me kokë ulur shihte më shumë se të gjithë të tjerët! Folte për toke! Fjalitë i kishte të shkurta dhe të thella që flisnin më shumë ndaj frazave të gjata të tjerëve! Luftoi për tokën! Një Kosovë e pavarur dhe…, do të ishte zgjedhja më e mirë, ishte kauza e tij që nga utopia u bë realitet! Po thojnë se sot ai ka ditëlindjen, Njeriu i Tokës!”, ka shkruar Merovci.
Ish-Presidenti Ibrahim Rugova lindi më 2 dhjetor 1944 në Cërcë të Istogut, ndërsa vdiq më 21 janar 2006 në Prishtinë dhe u varros në Bregun e Diellit me nderimet më të mëdha të popullit të Kosovës.
Ari ka qenë në rritje për katër muaj rresht, i udhëhequr nga ndryshimet gjeopolitike, optimizmi për uljet e normave të interesit nga Rezerva Federale dhe blerjet e vazhdueshme të arit nga banka qendrore.
Ari e filloi vitin me 2,623 dollarë për ons dhe ndoqi një trend kryesisht rritës gjatë gjithë vitit 2025. Kërkesa nga bankat qendrore, pritjet për ulje të mëtejshme të normave të interesit nga Rezerva Federale dhe zhvillimet gjeopolitike mbështetën rritjen e çmimeve të arit.Ari u rrit me 6.67% nga muaji në muaj në janar, 2.17% në shkurt, 9.26% në mars dhe 5.26% në prill, shkruan Anadolu Agency.
Metali i çmuar u tregtua në një vijë horizontale në maj, qershor dhe korrik, dhe më pas fitoi 4.8% në bazë mujore në gusht, 11.9% në shtator, 3.7% në tetor dhe 5.4% në nëntor.
Ai arriti një rekord prej 4,381.6 dollarë për ons këtë vit, ndërsa u fitoi investitorëve deri në 60% që nga fillimi i vitit.
Kursi i sheshtë i arit lë pas një moment rritës
Zafer Ergezen, një ekspert i tregjeve të ardhshme dhe mallrave, i tha Anadolu se ari hyri në një lloj periudhe pushimi përpara se të rritet përsëri.
“Arsyeja kryesore për rritjen e arit është probabiliteti në rritje i uljes së normës së interesit nga Rezerva Federale,” tha ai. “Ndërsa prirja e kryetarit të Rezervës Federale drejt uljes së normës së interesit tërhoqi Indeksin e Dollarit Amerikan, kjo shkaktoi një rritje të metaleve të çmuara.”
Ergezen deklaroi se mbyllja e arit në mbi 4,000 dollarë mund të nënkuptojë që metali i çmuar mund të testojë përsëri nivelin e tij rekord, por ky moment mund të ngadalësohet në një farë mase në këtë pikë.
Ai shtoi se rekorde të reja mund të jenë në horizont nëse pozicionet e arit të mbyllura më parë në tetor do të rihapeshin.
Ethet diplomatike për t’i dhënë fund luftës në Ukrainë vazhdojnë me takimin e të dërguarit të posaçëm të Presidentit Trump, Steve Witkoff, me Presidentin rus Vladimir Putin këtë pasdite.
Takimi do të zhvillohet “në gjysmën e dytë të ditës”, tha zëdhënësi i Kremlinit Dmitry Peskov, duke refuzuar të përmendte vijat e kuqe të Rusisë dhe duke thënë se diplomacia me megafon nuk është e dobishme.
Udhëtimi i Witkoff vjen pas bisedimeve që ai kryesoi në Florida me delegacionin ukrainas.
SHBA-të janë shfaqur optimiste në lidhje me perspektivat e arritjes së një marrëveshjeje për t’i dhënë fund luftës, teksa sekretarja e shtypit të Shtëpisë së Bardhë Caroline Levitt u tha gazetarëve të hënën: “Mendoj se administrata ndihet shumë optimiste”.
Megjithatë, aleatët europianë të Kievit kanë shprehur shqetësim se plani i paqes i SHBA-së i plotëson shumë kërkesat maksimaliste të Moskës. Karakteristikë e klimës është deklarata e shefes së politikës së jashtme të BE-së, Kaia Kallas, se ajo ka frikë se bisedimet Putin-Witkoff do të ushtrojnë presion mbi Ukrainën për të bërë lëshime. Dhëndri i Donald Trump, Jared Kushner, udhëtoi gjithashtu në Rusi me Witkoff, megjithatë Kremlini nuk sqaroi nëse ai do të jetë i pranishëm në takimin me Putin.
Ndërkohë, presidenti ukrainas, Volodymyr Zelensky tha të hënën se Rusia nuk duhet të shpërblehet për pushtimin e saj.
“Ne gjithashtu duhet të sigurohemi që vetë Rusia të mos perceptojë asgjë që mund ta konsiderojë si shpërblim për këtë luftë”, tha ai në një konferencë shtypi me Presidentin Francez, Emmanuel Macron.
Presidenti ukrainas zhvilloi gjithashtu telefonata me disa udhëheqës, përfshirë Kryeministrin e Mbretërisë së Bashkuar Keir Starmer dhe Kancelarin Gjerman Friedrich Merz, ndërsa kërkoi të mblidhte mbështetje nga aleatët europianë.
“Paqja duhet të bëhet vërtet e qëndrueshme. Lufta duhet të përfundojë sa më shpejt të jetë e mundur”, shkroi ai në media sociale.
Të paktën 12 persona kanë vdekur dhe rreth 50 të tjerë rezultojnë të zhdukur pasi një rrëshqitje dheu goditi dy anije të ankoruara në një port lumor në rajonin e pyjeve tropikale të Amazonës në Peru.
Rrëshqitja e tokës fundosi një traget dhe dëmtoi rëndë një tjetër anije pasagjerësh që kishte dhjetëra njerëz në bord, sipas një raporti policor të cituar nga agjencia e lajmeve Andina, shkruan BBC.
Ngjarja ndodhi rreth orës 05:00 sipas orës lokale, ndërsa pasagjerët po përgatiteshin të zbrisnin në Iparia, në rajonin qendror Ucayali të vendit të hënën.
Të plagosurit janë dërguar në spital, ndërsa policia kombëtare dhe Marina Peruviane kërkojnë të mbijetuar të tjerë. Frikësohet se midis të zhdukurve ka edhe fëmijë.
Sekretari i Përgjithshëm i NATO-s, Mark Rutte, zhvilloi një takim në Bruksel me Këshilltarin Federal zviceran Martin Pfister nga Departamenti Federal për Mbrojtjen, Mbrojtjen e Popullsisë dhe Sportin (VBS/DDPS).
“Ishte mirë të takoja Këshilltarin Federal Martin Pfister dhe ta falënderoja për kontributin e Zvicrës në misionin paqeruajtës të NATO-s, KFOR, në Kosovë. Diskutuam gjithashtu mënyrat për të thelluar bashkëpunimin tonë me Zvicrën”, shkroi Rutte në X.
Që nga tetori i vitit 1999, Forcat e Armatosura Zvicerane kontribuojnë në misionin ndërkombëtar paqeruajtës të NATO-s, Kosovo Force (KFOR), përmes Kompanisë Zvicerane dhe kontingjenteve Swisscoy. Aktualisht, numri maksimal i personelit zviceran në mision është 215, ndërsa mandati aktual parashikohet të zgjasë deri në fund të vitit 2026.
Sot shënohet 81-vjetori i lindjes së ish-presidentit të Kosovës, Ibrahim Rugova.
Ibrahim Rugova është lindur më 2 dhjetor 1944 në fshatin Cercë, komuna e Istogut. Më 10 janar 1945 komunistët jugosllavë ia kanë pushkatuar të atin, Ukën dhe gjyshin Rrustë Rugova, që kishte qenë luftëtar i njohur kundër çetave çetnike që kishin depërtuar në Kosovë gjatë Luftës së Dytë Botërore.
Ibrahim Rugova shkollën fillore e ka kryer në Istog, të mesmen në Pejë, më 1967. Fakultetin Filozofik – Dega Gjuhë e Letërsi Shqipe e ka kryer në Prishtinë.
Gjatë vitit akademik 1976-77 ka qëndruar në Paris, në Ecole Pratique des Hautes Etudes, nën mbikëqyrjen e Prof. Roland Barthes-it, ku ka ndjekur interesimet e veta shkencore në studimin e letërsisë, me përqendrim në teorinë letrare. Ai ka doktoruar në fushën e letërsisë në Universitetin e Prishtinës, më 1984.
Në vitin 1996 Dr. Ibrahim Rugova është zgjedhur anëtar korrespondent i Akademisë së Arteve dhe Shkencave të Kosovës. Në fillim ishte redaktor në gazetën e studentëve Bota e re dhe në revistën shkencore Dituria (1971-72), që botoheshin në Prishtinë. Një kohë ka punuar edhe në revistën Fjala.
Mandej, për afro dy dekada, Dr. Ibrahim Rugova veprimtarinë e vet shkencore e ka zhvilluar në Institutin Albanologjik si hulumtues i letërsisë. Një kohë ishte kryeredaktor i revistës Gjurmime albanologjike të këtij Instituti. Me krijimtari letrare është mar rëqë nga fillimi i viteve gjashtëdhjetë.
Dr. Ibrahim Rugova më 1988 është zgjedhur kryetar i Shoqatës së Shkrimtarëve të Kosovës, që është bërë bërthamë e fuqishme e lëvizjes shqiptare, e cila ka kundërshtuar sundimin komunist serb dhe jugosllav në Kosovë.
Si intelektual me nam që i ka dhënë zë kësaj lëvizjeje intelektuale e politike, Dr. Ibrahim Rugova është zgjedhur, më 23 dhjetor 1989, nga themelimi kryetar i Lidhjes Demokratike të Kosovës, partisë së parë politike në Kosovë që ka sfiduar drejtpërdrejt regjimin komunist në fuqi. LDK, nën udhëheqjen e Dr. Ibrahim Rugovës,është bërë shpejt forca politike prijëse në Kosovë, duke mbledhur shumicën e popullit rreth vetes.
Në bashkëpunim me forcat e tjera politike shqiptare në Kosovë si dhe me Kuvendin e atëhershëm të Kosovës, Dr. Ibrahim Rugova dhe LDK-ja kanë përmbyllur kornizën ligjore për institucionalizimin e pavarësisë së Kosovës.
Deklarata e pavarësisë (2 korrik 1990), shpallja e Kosovës Republikë dhe miratimi i kushtetutës së saj (7 shtator 1990), referendumi popullor për pavarësinë dhe sovranitetin e Kosovës, mbajtur në fund të shtatorit 1991, kanë qenë prelud për zgjedhjet e para shumëpartiake për Kuvendin e Kosovës, mbajtur më 24 maj 1992.
Dr. Ibrahim Rugova është zgjedhur President i Republikës së Kosovës. Dr. Ibrahim Rugova është rizgjedhur President i Republikës së Kosovës në zgjedhjet e mbajtura në mars të vitit 1998.
Nën udhëheqjen e Dr. Ibrahim Rugovës LDK-ja ka fituar shumicën e votave në zgjedhjet e para lokale të sponsorizuara ndërkombëtarisht në Kosovën e pasluftës në tetor të vitit 2000 si dhe në zgjedhjet e para nacionale në vitin 2001 dhe në zgjedhjet e dyta lokale të vitit 2002. LDK ka fituar edhe zgjedhjet nacionale më 2004.
Dr. Ibrahim Rugova është zgjedhur President i Kosovës në mars të vitit 2002 dhe është rizgjedhur edhe më 2004.
Dr. Ibrahim Rugova ka vdekur më 21 janar 2006 në Prishtinë dhe është varros në Bregun e Diellit me nderimet më të mëdha të popullit të Kosovës.
Në përvjetorin e vdekjes së Ibrahim Rugovës, më 21 janar 2007, Presidenti i Kosovës, Dr. Fatmir Sejdiu e ka dekoruar Presidentin historik të Kosovës me Urdhrin “Hero i Kosovës”, titulli më i lartë në vendin tonë që u jepet figurave historike shqiptare dhe të Kosovës që kanë bërë “vepra trimërie për lirinë dhe pavarësinë e Kosovës”.