Author: G.O.

Shqiptarë nga të gjitha trevat kanë nisur të mblidhen në Shkup, ku sot nga ora 13:00 do të mbahet protesta e radhës kundër Gjykatës Speciale.

Qytetarë të shumtë, duke mbajtur në duar flamuj kombëtarë dhe flamuj të UÇK-së, kanë filluar të mblidhen në vendin ku do të mbahet protesta.

Në hapësirën ku do të mbahen fjalimet është vendosur një fotografi e madhe me mbishkrimin “Çlirimtarët duhet të nderohen, jo të gjykohen”.

Ky mbishkrim është vendosur poshtë fotografive të katërshes së Ushtrisë Çlirimtare të Kosovës (UÇK) – Hashim Thaçi, Kadri Veseli, Jakup Krasniqi dhe Rexhep Selimi – të cilët po gjykohen padrejtësisht nga Gjykata Speciale në Hagë tash e më shumë se pesë vjet.

Kjo protestë është e katërta që po organizohet me kërkesën për drejtësi për ish-krerët e UÇK-së. Fillimisht protesta u mbajt në Prishtinë, më pas në Tiranë, pastaj në Strasburg të Francës, ndërsa tani po mbahet në Shkup.

Më 12 dhjetor 2025, Bashkimi Evropian ka miratuar një vendim për të ndaluar përkohësisht (por në praktikë pa afat të caktuar) çdo transferim të aseteve të ngrira të Bankës Qendrore Ruse drejt Rusisë.

Kjo do të thotë se rreth 210 miliardë euro asete ruse do të mbeten të bllokuara derisa Rusia të ndërpresë luftën agresore kundër Ukrainës dhe të kompensojë dëmet e shkaktuara.

Presidenti i Këshillit Evropian, António Costa, e ka konfirmuar përmes një postimi në platformën X (ish-Twitter), duke thënë se “në tetor, liderët e BE-së u angazhuan të mbajnë asetet ruse të immobilizuara derisa Rusia të ndërpresë luftën e saj agresore kundër Ukrainës dhe të kompensojë dëmet e shkaktuara. Sot ne e mbajtëm këtë premtim”.

Ai shtoi se hapi tjetër është sigurimi i nevojave financiare të Ukrainës për vitet 2026–2027 (përmes një kredie reparacioni të mbështetur nga këto asete).

Në sheshin “Skënderbeu” në Shkup, të shtunën, po bëhen përgatitjet e fundit për protestën në mbrojtje të ish-krerëve të Ushtrisë Çlirimtare të Kosovës.

Kryetari i OVL-UÇK, Hysni Gucati, njoftoi se qytetarët nga Kosova, përfshirë veteranët e luftës, po kalojnë kufirin drejt Maqedonisë së Veriut pa asnjë problem.

“Deri tash kufiri është i lirë dhe nuk ka ndonjë problem, qytetarët dhe veteranët po vijnë pa pengesa deri në këto momente”, deklaroi Gucati para fillimit të protestës.

Një aksident trafiku raportohet se ka ndodhur në autostradën “Ibrahim Rugova”.

Aksidenti ka ndodhur në afërsi të vendit ku një ditë më parë u shënua një aksident tragjik, ku humbën jetën dy gra, shtetase të Shqipërisë.

Raportohet se në aksidentin e sotëm dyshohet se janë përfshirë tri automjete.

Kjo pjesë e autostradës konsiderohet e rrezikshme për shkak të rrëshqitjes së dheut që ka ndodhur disa muaj më parë, e cila ende nuk është pastruar.

Udhëheqësi i Koresë së Veriut, Kim Jong Un, mori pjesë në mirëpritjen e një njësiti të ushtrisë koreanoveriore, pas kthimit të tij në atdhe pasi kishte kryer detyra në Rusi, raportoi të shtunën agjencia shtetërore e lajmeve, KCNA.

Në një fjalim të transmetuar nga KCNA, Kim vlerësoi oficerët dhe ushtarët e Regjimentit të 528-të të Inxhinierëve të Ushtrisë Popullore Koreane (KPA) për sjellje “heroike” dhe “heroizëm të madh” në përmbushjen e urdhrave të dhëna nga Partia e Punëtorëve të Koresë në pushtet gjatë një dislokimi 120-ditor jashtë vendit.

Në videon e publikuar nga Koreja e Veriut shihen ushtarë me uniformë duke zbritur nga një avion, Kimi duke e përqafuar një ushtar të ulur në karrocë invalidi, si dhe ushtarë dhe zyrtarë të mbledhur për të mirëpritur trupat.

KCNA tha se njësiti ishte dërguar në fillim të gushtit dhe kishte kryer detyra luftarake dhe inxhinierike në rajonin e Kurskut në Rusi gjatë luftës së Moskës në Ukrainë.

Muajin e kaluar, Ministria e Mbrojtjes e Rusisë tha se trupat e Koresë së Veriut, të cilët ndihmuan Rusinë ta zmbrapste një inkursion të madh ukrainas në rajonin perëndimor të Kurskut, tani po luajnë rol të rëndësishëm në pastrimin e zonës nga minat.

Sipas një pakti të ndërsjellë për mbrojtje mes dy vendeve, Koreja e Veriut vitin e kaluar dërgoi rreth 14.000 ushtarë për të luftuar përkrah Rusisë në Kursk, dhe më shumë se 6.000 prej tyre u vranë, sipas burimeve nga Koreja e Jugut, Ukraina dhe Perëndimi.

Kim tha se nëntë ushtarë u vranë gjatë misionit, duke e përshkruar vdekjen e tyre si “humbje që ta copëton zemrën”, dhe njoftoi se regjimenti do të nderohej me Urdhrin e Lirisë dhe Pavarësisë.

Ceremonia e pritjes u mbajt të premten në Phenian dhe u ndoq nga zyrtarë të lartë ushtarakë, udhëheqës të partisë në pushtet, familjarë të ushtarëve dhe turma të mëdha njerëzish, sipas KCNA, raporton rel.

Në fjalimin e tij, Kim tha se regjimenti kishte pastruar zona të rrezikshme në kushte luftarake dhe kishte demonstruar “besnikëri absolute” ndaj partisë dhe shtetit. Ai gjithashtu lavdëroi indoktrinimin politik, disiplinën dhe unitetin mes trupave, duke e quajtur paraqitjen e tyre shembull për forcat e armatosura.

Koreja e Veriut i ka nderuar haptazi trupat e saj që luftuan për Rusinë në luftën në Ukrainë.

Në gusht, Kim i lavdëroi ata në një takim me oficerë të përfshirë në operacione jashtë vendit, ndërsa më herët mediat shtetërore e shfaqën atë duke mbuluar arkivole me flamurin kombëtar në atë që dukej të ishte riatdhesimi i ushtarëve të vrarë përkrah forcave ruse.

Një burrë është gjetur i vdekur në banesën e tij dje në Prizren.

Në vend të ngjarjes shkuan edhe zjarrfikësit, të cilëve iu desh ta hapnin derën me forcë në prani të familjarëve të të ndjerit.

”Është raportuar se viktima mashkull kosovar, në banesën e tij është gjetur pa shenja jete, vdekjen e të cilit e ka konstatuar mjeku. Në vendin e ngjarjes përveç njësive relevante policore kanë dalë edhe zjarrfikësit të cilët në prezencë të familjarëve me forcë e kanë hapur derën e banesës ku është gjetur viktima. Me urdhër të prokurorit trupi i pajetë i viktimës është dërguar në IML për obduksion, rasti është duke u hetuar”, tha policia