Author: G.O.

Në Stacionin Policor në Vushtrri, dje (e enjte) rreth orës 19:40 është pranuar informata për të shtëna me armë zjarri në rrugën ,, Dëshmorët e kombit” në Vushtrri, me ç’rast i arrestuar ka mbetur një 38-vjeçar.

Njësitë policore kanë arritur ta identifikojnë lokacionin ku kishte një aheng familjar, ku kanë konfiskuar edhe armën e zjarrit.

“Në cilësi të provave materiale nga i dyshuari është konfiskuar një arma e llojit ‘Zoraki’. Në cilësi të të dyshuarit është intervistuar i dyshuari S.Ll., 38 vjeçar, shtetas i Republikës së Kosovës”, thuhet në njoftim.

Pas intervistimit, me urdhër të prokurorit, i dyshuari është liruar në procedurë të rregullt, ndaj tij është iniciuar rast për veprën penale “Mbajtje në pronësi, kontroll ose posedim të paautorizuar të armëve” dhe “ Përdorim i armës”.

Një person është arrestuar nga Policia e Kosovës në Kaçanik, pasi i njëjti kishte postuar në rrjete sociale një video ku shihej duke përdorur një armë.

Në njoftimin e Policisë bëhet e ditur se 29-vjeçari pas intervistimit nga policët hetues është liruar për procedurë të mëtejme hetimore, ndërsa arma është konfiskuar.

“Stacioni i Policisë në Kaçanik ka pranuar një informacion se një person në rrjetin social ‘TikTok’, ditë më parë kishte shpërndarë një video, ku shihej duke e përdorur një armë. Policët hetues të stacionit në Kaçanik i kanë marrë veprimet e menjëhershme dhe nën autorizim të prokurorit kujdestar nga Prokuroria Themelore në Ferizaj i kanë nisur hetimet, ndërsa kanë arritur që me datën 24.08.2023 rreth orës 23:00 të identifikojnë personin e dyshuar F.M (M/K) i moshës 29 vjeçar, i cili është shoqëruar në stacionin e policisë në Kaçanik dhe pas intervistimit nga policët hetues, me vendim të prokurorit është liruar për procedurë të rregullt të mëtejme hetimore, ndërsa arma ( pistoletë) është konfiskuar”, thuhet në njoftim.

Rasti është cilësuar “Mbajtja ne pronësi, kontroll ose posedim i pa autorizuar i armëve – përdorimi armës”.

Autoritetet greke kanë bërë 79 arrestime për zjarrvënie, pasi flakët kanë shkatërruar vendin.

Ministri i Mbrojtjes Civile Vassilis Kikilias tha se kishte pasur disa përpjekje nga zjarrvënësit për të ndezur zjarre të reja në malin Parnitha, në veriperëndim të Athinës.

Zjarret në Greqi kanë vrarë të paktën 20 njerëz këtë javë.

“Ju jeni duke kryer një krim kundër vendit,” tha ministri Kikilias në një deklaratë.

“Zjarrvëniet po ndezin zjarre që kërcënojnë pyjet, pronat dhe mbi të gjitha jetët njerëzore. Nuk do të ikni, do të’ju gjejmë, do të mbani përgjegjësi”, u tha zoti Kikilias grekëve gjatë një konferencë urgjente televizive të enjten.

Zjarret e verës janë të zakonshme në Greqi dhe shkencëtarët kanë lidhur frekuencën dhe intensitetin në rritje të ngjarjeve ekstreme të motit, duke përfshirë valët e të nxehtit, me ndryshimet klimatike.

Stefan Doerr, i cili drejton Qendrën për Kërkimin e Zjarrit në Universitetin Sëansea, thotë se më shumë peizazhe të ndezshme, për shkak të motit të nxehtë ose menaxhimit të dobët të bimësisë, do të thotë se zjarrvënia dhe incidentet e tjera mund të shndërrohen lehtë në zjarre me lëvizje të shpejtë.

Policia dhe shërbimi grek i inteligjencës EYP po hetojnë incidentet, raportoi AFP.

Zëdhënësi i qeverisë Pavlos Marinakis, tha për median ERT se nga 140 arrestime të lidhura me zjarret, 79 kishin të bënin me zjarrvënie.

Qindra zjarrfikës në të gjithë Greqinë janë duke luftuar me zjarret vdekjeprurëse.

Fronti i madh i zjarrit që shpërtheu të shtunën pranë qytetit port të Alexandroupolis, është bërë më i madhi në histori në BE, sipas komisionerit evropian Janez Lenarcic.

Ndërkohë, në malin Parnitha pranë Athinës, zjarret kanë shpërthyer në një pyll ngjitur me kryeqytetin, duke kërcënuar një park kombëtar.

Në fillim të kësaj jave, trupat e 18 personave që besohet se ishin emigrantë, me fëmijë mes tyre, u gjetën pranë rajonit Evros në Greqinë verilindore. Nga zjarret në rajonin e Boeotias të hënën humbi jetën edhe një bari.

Kikilias tha të mërkurën se vendi po kalonte verën më të keqe që nga prezantimi i hartave të rrezikut nga zjarri në 2009.

Vetëm muajin e kaluar, mijëra njerëz u detyruan të largoheshin nga zjarret në ishullin grek të Rodosit, pasi zjarret shpërthyen atje dhe në pjesë të tjera të vendit.

Top Channel

Agjencia e Statistikave të Kosovës (ASK), ka njoftuar se ka rënë numri i përfituesve nga skema e pensioneve invalidore në korrik 2023, krahasuar me korrik 2022.

“Në muajin korrik 2023, nga skema e ndihmës sociale kanë përfituar 20 937 familje me gjithsej 82 621 anëtarë, ku krahasuar me periudhën e njëjtë të vitit paraprak që ishte 25 088 familje me gjithsej 98 832 anëtarë, vërehet një rënie e numrit të familjeve përfituese nga kjo skemë për 4 151 ose 16,5%”, njofton ASK-ja.

Në muajin korrik 2023, krahasuar me muajin korrik 2022, kishte rënie të numrit të përfituesve nga:skema për pensionet invalidore (-20,6%); skema për pensionet e Trepçës (-18,2%);skema për pensionet familjare (-8,9%); skema e pensioneve kontribut-paguese të moshës (-3,1%); skema e pensioneve bazike të moshës (-2,0%); skema për familjet e dëshmorëve dhe invalidët e luftës(-1,7%); skema për veteranët e luftës(-0.2%).

“Në muajin korrik 2023, krahasuar me muajin korrik 2022 kishte rritje të numrit të përfituesve nga: Skema për mbështetje materiale familjeve që kanë fëmijë me aftësi të kufizuara (14,8%); skema e pensioneve për Forcën e Sigurisë së Kosovës (10,6%);skema për pensionet e personave paraplegjik dhe tetraplegjik (7,6%); skema e pensioneve për personat me aftësi të kufizuara (5,3%);skema e kompensimit për punëtorët e arsimit që punuan gjatë vitit shkollor 1990/91 deri në vitin shkollor 1998/99 (4,9%);skema e kompensimeve për personat e verbër (4,3%); skema e pensioneve të Trupave Mbrojtëse të Kosovës (TMK)(3,4%)”, thuhet në komunikatën e ASK-së.

Qendra Kombëtare për Menaxhim Kufitar njoftoi se pritjet për dalje nga pika kufitare në Merdarë janë shkojnë deri në një orë.

Ndërkaq, në dalje të pikës kufitare te Dheu i Bardhë pritjet janë deri në 40 minuta, derisa kolona në këtë pikë kufitare është 150 metra.

Në pikat e tjera kufitare, pritjet janë deri në pesë minuta.

Komuna e Mitrovicës Veriore, me anë të një vendimi ka kërkuar që të bëhet lirimi i një objekti komunal, që aktualisht është në shfrytëzim nga institucionet e Serbisë. Kjo, kërkesë sipas komunës vije për shkak të disa punime të parashikuara që do të kryhen në objekte të caktuara komunale.

E ky vendim i autoriteteve lokale në Mitrovicën e Veriut, ka ngjallur reagimin e Shteteve të Bashkuara të Amerikës dhe Bashkimit Evropian.

Në një reagim të Ambasadës Amerikane në Kosovës, thuhet se vendimet e tilla mund të qojnë në tensionim të situatës në veri.

“Ne vlerësojmë se këto veprime, të cilat nuk janë bashkërenduar me bashkësinë ndërkombëtare, janë në kundërshtim me kërkesat tona për shmangien e veprimeve të cilat mund t’i përshkallëzojnë tensionet, apo mund të perceptohen si përshkallëzuese”, thuhet ndër të tjera në reagimin e ambasadës amerikane.

Reagim të ngjashëm për këtë rast ka pasur edhe Bashkimi Evropian. Në një përgjigje për tëvë1, zëdhënësi i BE-së, Peter Stano, thotë se ky vendim bjen në kundërshtim me përpjekjet për deeskalim mes Kosovës dhe Serbisë.

“Ne jemi të shqetësuar për implikimet në situatën e sigurisë të vendimeve të fundit të marra nga administrata e komunës së Mitrovicës Veriore për shfrytëzimin e hapësirave dhe ndërtesave publike dhe komunale, të cilat, ndër të tjera, kërkojnë nga subjektet e drejtuara nga Serbia të lirojnë objektet e tyre, nuk ofrojnë dokumentacionin e kërkuar brenda një afati të shkurtër. Ky vendim bie ndesh me përpjekjet e vazhdueshme për të de-përshkallëzuar tensionet mes Kosovës dhe Serbisë”, ka thënë Stano.

Deputeti i Lëvizjes Vetëvendosje, Agon Batusha, në emisionin “Ditari” në tëvë1 ka thënë se ndërkombëtarët po e drejtojnë presionin vetëm nga Kosova, përderisa ka folur edhe për kërkesën e ndërkombëtareve për koordinim të veprimeve.

Në pikën e parë të marrëveshjes së Bratisllavës ndër të tjera thuhet se Qeveria e Kosovës nuk do të ndërmarr veprime që mund të përshkallëzoi situatën në komunat veriore.

Një pacientë me meningjiti po trajtohet në Infektivë të Qendrës Klinike Universitare të Kosovës. Ndërkaq edhe një pacient tjetër është prekur nga sindroma veshkore ose ethet e minjve, raporton Ekonomia Online.

Drejtori i Klinikës Infektive në QKUK, Arben Vishaj, ka treguar për Ekonomia Online, se pacientët janë në gjendje të mirë, teksa në fillim të kësaj jave janë liruar edhe dy të tjerë.

“Për momentin ne në Klinikën Infektive e kemi një pacient të shtrirë me menigjit seroz. Kemi pasur edhe dy pacientë tjerë por në fillim të kësaj i kemi lëshuar këta pacientë sepse kanë qenë me gjendje të mirë shëndetësore dhe për momentin e kemi vetëm një pacient me këtë sëmundje”, tha Vishaj, teksa tregoi edhe për simptomat që i ka kjo sëmundje.

“Simptomat me të cilët ne i vërejmë tek këta pacientë janë; lodhja, temperatura e lartë, kokëdhëmbja e plogështia. Kurse si shenja klinike janë të vjellat, shtrëngimi i qafës, pastaj këta pacientë kanë edhe frikë nga rrezet e diellit e kanë pagjumësi”, tha tutje Vishaj.

Vishaj ka deklaruar se pacientja me ethe të minjve kishte ardhur para një jave me ethe dhe temperaturë të lartë.

Sipas tij, aktualisht gjendja e pacientes është stabile dhe është duke e marrë trajtimin e nevojshëm.

“E kemi një pacient të spitalizuar me ethe hemoragjike me sindrom rajonal ose me ethe të minjve që i themi. Gjendja e saj është stabile. Kosova është zonë endemike e etheve hemorragjikeve me sindrom bashkëhor por në krahasim me vitet që i kemi pasur më para, tashmë kemi shumë sporadike e pak, krahasuar me vitet më herët”, u shpreh Vishaj.

Ndonëse pandemia Covid-19 nuk ka përfunduar, rastet që trajtohen në këtë klinikë janë të vogla. Vishaj tha se aktualisht në Infektivë i kanë dy pacientë.

“Covid-19 më nuk paraqet emergjencë globale dhe nuk është më sëmundje emergjente nacionale por Covid-19 është në mesin tonë, duhet kohë shumë e gjatë që të eliminohet si tërësi dhe ndoshta nuk eliminohet fare, është i pranishëm te popullata jonë por me shifër shumë të vogël. I kemi dy pacientë të spitalizuar me Covid-19 dhe janë duke i zhvilluar formën mesatare të sëmundjes”, tha Vishaj, teksa shtoi se gjendja e tyre është mesatarisht e mirë.