Author: ATVLive

Përgatiti: Driton Sadiku

Duket si armë e vërtetë, por në fakt është armë me gaz. Por me pak punë, ajo mund të konvertohet në armë zjarri.

“Duhet të përpunohet tyta për arsye se armët me gaz e kanë tytën të zënë me një pjesë që e lejon gazin, por jo predhën, është një proces i cili bëhet në mënyrë artizanale, por jo çdoherë bëhet në formën e duhur për arsye se ajo është e rrezikshme”, tha Fadil Kajtazi, ekspert i armëve.

Kjo praktikë tashmë është bërë e zakonshme në vend. Shkak për këtë thuhet të jetë çmimi i lirë për blerjen e këtyre armëve e gjithashtu edhe modifikimi.
Megjithatë, sipas Kajtazit, armët me gaz s’mund të përdoren gjatë. Por, shton se mund të jenë vdekjeprurëse.

“Nuk e ka efektin e armës standarde, për arsye se pas dy-tre fishekëve që shkrepen me atë armë, tyta hapet sepse nuk e ka cilësinë dhe predhat nuk e kanë efektin goditës që e kanë armët e vërteta”, tha Kajtazi.

Ndërkohë, policia nuk tregoi se sa armë të tilla ka konfiskuar deri tash, por sipas ish-drejtorit të policisë, Rashit Qalaj, kjo çështje ka qenë sfidë për institucionet e sigurisë kaherë.

“Fatkeqësisht në Kosovë ka një numër të madh të armëve meqë janë ilegalisht në duart e qytetarëve, ka armë të vërteta, por një numër i madh i tyre janë edhe me gaz e që po konvertohen në armë zjarri. Mendoj që këto janë sfida për policinë e Kosovës”, tha ish-drejtori i Policisë, Rashit Qalaj.

Pa bërë klasifikimin e armëve, policia tha se brenda një viti afërisht 1500 armë ilegale konfiskohen, derisa konsiderohet se rreth 260 mijë janë në duar të qytetarëve.

Sot nga Njësiti i Hetimeve të Fushë Kosovës, është arrestuar një person për veprën lajmërim apo kallëzim i rrejshëm.

Pas hetimeve lidhur me disa denoncime ndaj një personi, nga hetuesit është ngritur dyshimi i bazuar se personi i arrestuar, qe nga janari deri më 23 maj 2024, ka lajmëruar 20 raste rrejshëm.

B.G. (26), pas intervistimit, me vendim të prokurorit të shtetit, është dërguar në mbajtje për lajmërim apo kallëzim të rrejshëm.

Ish-ambasadorja e Serbisë në Meksikë, Vesna Peshiq, ka folur në lidhje me Rezolutën e OKB-së, që sipas saj e cilëson popullin serb si gjenocidal.

Sipas saj, Vuçiq mbulohet si një njeri që autorët e krimit dhe gjenocidit i konsideron si heronj serbë sikur në kohën e gjenocidit në Srebrenicë, njëjtë edhe tre dekada pas saj.

“Nuk e di pse Aleksandar Vuçiq mendon se ai është fituesi moral në lidhje me Rezolutën e OKB-së, të cilën e falsifikoi – që e cilëson popullin serb si gjenocid. Një fushatë e tillë është tashmë e pamoralshme në vetvete, sepse është e qartë se aktgjykimet për gjenocid janë shqiptuar ndaj individëve, jo ndaj popullit serb”, ka thënë ajo.

“Dhe kjo përkoi edhe me fushatën zgjedhore. Epo, ajo mashtrim ra në kohën e duhur. Ai vazhdon të pretendojë se Rezoluta gjithashtu “vë shenjën e një kombi gjenocidal mbi viktimat”. Ai në këtë mënyrë mbulohet si një njeri që autorët e gjenocidit i konsideron heronj serbë, si kur ndodhi gjenocidi në Srebrenicë dhe tre dekada pas tij, ashtu edhe në pozitën e Presidentes së Serbisë”, thotë Peshiq.

Sipas saj, nëse dikush është gjenocidal, ai është Aleksandar Vuçiq.

“Nëse dikush është gjenocid, është vetë Aleksandar Vuçiq dhe miqtë e tij radikalë, partia të cilës i ka shërbyer me përkushtim”, ka përfunduar ajo.

Kuvendi komunal i Prishtinës me 36 vota për, asnjë kundër e ka miratuar propozim-vendimin për kompensimin e Elza Ujkanit, e cila ishte lënduar nga rënia e kulmit të objektit të komunë së re të kryeqytetit, raporton EO.

Ujkani do të kompensohet me 110 mijë euro për lëndimet e marra në këtë rast.

Kryetari i komunës, Përparim Rama, ka thënë se kjo është për shëndetin e Elzës.

“Ka të bëj rreth përmirësimit të shëndetit të zonjushës Ujkani e cila sot është me ne, kështu që propozimi është për të vazhduar shërimi”, ka thënë Rama.

Ndërsa, shefi i asamblistëve të Vetëvendosjes, Gëzim Sveçla, tha se e përkrahin propozimin.

“Ashtu siç e ka potencuar kryetari, ku propozimi për paradhënie nuk e ndalon asnjë proces, çoftë të organeve të hetuesisë për gjetjen e fajtorit të rastit, e në një situate të tillë, ne e mbështesim dhe përkrahim ketë propozim”, theksoi ai.

Edhe asamblistët e PDK-së i kanë dhënë mbështetje këtij propozimi.

“Edhe ne si grup përkrahim këtë ndihmë financiare e cila do shkoj tek Elza Ujkani. Më e rëndësishme është që të bëhet sigurimi i kulmeve të objekteve të vjetra, edhe banorët e lagjes Ulpiana kanë kërkuar ndihmë për një kulm, pas një lëvizje të madhe. Andaj kërkojmë nga kryetari dhe organet të merren me rastet e tilla të mos përsëriten”, tha asamblistja e PDK-së, Gresa Lahu.

Rritja ekonomike dhe zhvillimi i qëndrueshëm në Kosovë, bashkëpunimi ekonomik dhe mbështetja në transformimin e burimeve të energjisë dhe fuqizimi i rolit të SHBA-së në Ballkanin Perëndimor, ishin temë diskutimi në takimin e shefes së diplomacisë kosovare Donika Gërvalla me kongresistin demokrat William Keating.

Ministrja Gërvalla e njoftoi kongresistin amerikan rreth veprimeve të Kosovës në luftimin e krimit dhe korrupsionit, informalitetit dhe shtrirjen e sovranitetit në gjithë territorin e vendit.

Gërvalla dhe Keating diskutuan edhe mbi propagandën ruso-serbe, dezinformimin dhe veprimet destabilizuese të Serbisë në Ballkanin Perëndimor.

Shefja e diplomacisë kosovare ndodhet për vizitë zyrtare në Uashington, ku gjatë ditëve të kaluara ka takuar edhe kongresistë të tjerë amerikan, si dhe ka marrë pjesë në inaugurimin e objektit të ri të Ambasadës së Kosovës në Uashington.

Me rastin e Ditës së Presidentit, sot është promovuar libri “Liria si imanencë njerëzore“ me përmbledhje të fjalimeve të ish-presidentit Ibrahim Rugova gjatë periudhës 1976-2005.

Ideja për botimin e këtij libri, u tha se ishte e presidentja e Kosovës, Vjosa Osmani, i cili është edhe botimi i parë i Bibliotekës Presidenciale “Dr. Ibrahim Rugova”.

Në një fjalë rasti, e para e vendit tha se presidenti Rugova ishte dhe vazhdon të mbetet udhërrëfyesi dhe ndërtuesi i aleancave strategjike të Kosovës me perëndimin dhe Shtetet e Bashkuara të Amerikës.

Ajo potencoi se libri “Liria si një imanencë njerëzore” ofron një njoftim gjithëpërfshirës me idetë, por edhe vizionin për studiuesit dhe udhëheqësit politikë e shtetërorë të presidentit Rugova. Osmani tha se presidenti Rugova kultivoi dhe mbrojti pa frikë fjalën dhe mendimin e lirë.

“Presidenti Rugova ishte dhe vazhdon të mbetet udhërrëfyesi ynë, ora e mirë e Kosovës dhe ndërtuesi i aleancave tona strategjike me perëndimin e në veçanti me aleatin tonë kryesor e të pazëvendësueshëm, Shtetet e Bashkuara të Amerikës. Ky libër është vetëm një dedikim i vogël për kontributin e tij të jashtëzakonshëm të Kosovës dhe është botimi i parë i bibliotekës presidenciale “Dr. Ibrahim Rugova”. Këto fjalime të përmbledhura në libër nga Hyseni janë jo vetëm histori personale e presidentit historik, por edhe historia e vetë rrugëtimit të Kosovës deri në ikjen e presidentit në amshim. Libri “Liria si një imanencë njerëzore” ofron një njoftim gjithëpërfshirës me idetë, por edhe vizionin për studiuesit, udhëheqësit politikë e shtetërorë të presidentit Rugova. Nëpërmjet fjalimeve të tij mund të kuptohet qartë lidhka e lirisë krijuese me lirinë politike siç bëri presidenti Rugova vazhdimisht. Ai e kultivoi dhe mbrojti pa frikë fjalën e lirë, mendimin e lirë,” tha Osmani.

Ndërkaq, autori i këtij libri, Munish Hyseni tha se ndër çështjet fundamentale që dominojnë diskursin e këtyre teksteve janë liria dhe identiteti në krijimtari dhe shoqëri. Ai citoi presidentin Rugova duke thënë se liria është kërkesë e njeriut.

“Dy janë çështjet fundamentale që dominojnë diskursin e këtyre teksteve: liria dhe identiteti në krijimtari dhe shoqëri. Të dy këto çështje janë të lidhura ngushtë njëra-tjetrën. ‘Liria është element dhe fenomen i njeriut i kërkesave dhe realizimit të tij si në planin e veprimit ashtu edhe në atë të ekzistencën dhe in-ekzistencës së tij’ thotë Rugova. Duke u marrë me konceptin e përgjithshëm të teorisë pohon se shikuar nga praktika historike del se liria është e lidhur ngushtë me lirinë sociale, kulturore dhe nacionale. Duke njohur realitetin historik, identitetin individual, kolektiv, përkatësisht një kategori mjaft të gjerë që përmban në vete të gjitha aspektet kombëtare, sociale dhe intelektuale,” tha Hyseni.

Në kuadër të këtij organizimi, presidentja Vjosa Osmani, i dorëzoi kopjen e parë të librit Fanë Rugovës, bashkëshortes së ish-presidentit Ibrahim Rugova. /kp

Zyrtarët policor të Njësitit të Hetimeve të Përgjithshme në asistim të Njësitit për Reagim të Shpejtë, kanë arrestuar dy persona të dyshuar për veprën rrëmbim.

Arrestimi i të dyshuarve: A. K., 18-vjeç , shtetas i Republikës së Kosovës dhe Y. S., i mitur, shtetas i Republikës së Kosovës, ka ardhur si rezultat i një pune intenzive hetimore, të cilën zyrtarët policor e kanë nisë menjëherë pas denoncimit të rastit.

Pjesë e aksionit policor në Prishtinë ka qenë edhe bastisja në dy lokacione, ku është sekuestruar një armë e ftohtë (thikë) e cila dyshohet se është përdorë në rast.

Aktualisht hetuesit policor në koordinim me prokurorin e shtetit, janë duke kryer veprimet e nevojshme procedurale.

Lideri i Aleancës për Ardhmërinë e Kosovës (AAK), Ramush Haradinaj, ka kujtuar të rënët e 24 majit të Batalionit Gardist “Shkelzen Haradinaj”, duke thënë se ata u bënë mburojë e vëllezërve të tyre prej arme, të plagosur në beteja.

“Batalioni Gardist “Shkelzen Haradinaj” i udhëhequr nga komandanti Abdyl Mushkolaj, përbëhej nga luftëtarë të dalluar të Ushtrisë Çlirimtare të Kosovës në Dukagjin, trimërinë e të cilëve e njoha në frontet e luftës. Ata u bënë mburojë e vëllezërve të tyre prej arme, të plagosur në beteja”, ka thënë Haradinaj.

Haradinaj ka shtuar se me dhembje e krenari kujton sakrificën e të rënëve.

“Me dhembje e krenari, sot dhe përgjithmonë kujtojmë dhe nderojmë sakrificën tyre, flijimin dhe vetëmohimin. Të skalitur në histori emrat e tyre: Arton Mehmetaj, Fehmi Demiqi, Hajrush Demaj, Hysen Mehmeti, Islam Krasniqi, Liman Morina, Metë Krasniqi, Nuredin Gërvalla, Nazmi Gradina, Nimon Musaj, Naim Berisha, Përparim Ferizi, Sali Ferizi, Valiant Ferizi, Përparim Shala dhe Xhavit Islami. Heroizmi i tyre u trashëgoftë”, ka shkruar Haradinaj në Facebook.

Shefi i Grupit Parlamentar të AAK Besnik Tahiri ka thënë se Kryeministri Kurti duhet të dorëzohet. Ai ka krijuar një pozicion për të negociuar kushtet e dorëzimit me opozitën mirëpo ne këto kushte nuk i pranojmë, është shprehur ai, raporton EO.

“E patë edhe vet kërkesën që kemi adresu para dy muajve. Siç e tha kryetarja e grupit parlamentar të LVV-së nuk pat deputet për të diskutuar dhe ballafaquar me një Qeveri e cila është kampione e dështimeve të vendit. Kjo Qeveri nuk ka pse ti del qytetarëve përpara, nuk ka pse ti del pensionistëve përpara nuk ka si t’ ju del 80 mijë shërbyesve civilë përpara, nuk ka si t’ ju del përpara pagës minimale, ma e ulëta në Ballkan, nuk ka si t’ ju del përpara zyrtareve publikë që ju rrezikohet siguria juridike, nuk ka ai si t’ ju del përpara as vëllezërve dhe motrave tanë në diasporë që nga korriku i vitit 2023, nuk ka arritur të bëjë një marrëveshje për të ndodhë votimi në ambasada. Kryeministri Kurti duhet dorëzu ka kriju një pozicion për të negociuar kushtet e dorëzimit me opozitën. Mirëpo në këto kushte nuk i pranojmë. Do të presim herët apo vonë kapitullimin e tij përmes dorëheqjes, pra është vetëm vonim se shpëtim nuk ka prej ballafaqimit të kryeministrit me opozitën e të gjithë këto tema. Debati do të ndodhë nuk ka qysh ik protokollit në kryesi dhe ai debat do të jetë ballafaqimi i të vërtetës që ka ndodhur tash e tre vjet e gjysëm. Sot ka qenë një ngjarje për herorin e kombit Shkelzen Haradinaj në Gllogjan, dy deputet kanë mungu nuk ka qenë kryetari Ramush Haradinaj dhe Time Kadrijaj mirëpo unë e kam thirr unë e kom pas fjalën në emër të grupit inicues dhe në emër të grupit parlamentar fjalën e ka pasur Bekë Berisha”, ka thënë ai.

Shefja e Grupit Parlamentar të Lëvizjes Vetëvendosje (LVV), Mimoza Kusari-Lila ka folur pas dështimit të mbajtjes së seancës së Kuvendit të Kosovës, ku pritej të diskutohej për tri vjet të qeverisjes Kurti, raporton EO.

Në fjalën e saj, Kusari ka vlerësuar se Kuvendi mund të shpërndahet nëse ka vullnet të grupeve parlamentare që janë pjesë e Kuvendit.

“Është e paimagjinueshme të shpërndahet Kuvendi, për një debat për 3 vjet qeverisje ka kaq pak interesim nga deputetët. Jemi në dinamikën e ritmin e mirë të përmbushjes së agjendës legjislative. Vet AAK-ja nuk e kishte kryetarin e partisë, vetëm 3 deputetë ishin prezentë”, ka deklaruar Kusari-Lila.

Kusari-Lila tha se Kuvendi shpërndahet vetëm nëse ka vullnet të grupeve parlamentare që janë pjesë e Kuvendit.