ATV

Author: ATVLive

  • Ministrat izraelitë kërcënojnë Netanyahun: Largohemi nëse pranon propozimin për armëpushim në Gaza!

    Ministrat izraelitë kërcënojnë Netanyahun: Largohemi nëse pranon propozimin për armëpushim në Gaza!

    Dy ministra izraelitë të ekstremit të djathtë kanë kërcënuar se do të largohen dhe do të rrëzojnë koalicionin qeverisës nëse kryeministri Benjamin Netanyahu bie dakord me propozimin e armëpushimit në Gaza, të prezantuar nga presidenti amerikan Joe Biden të premten.

    Ministri i Financave Bezalel Smotrich dhe Ministri i Sigurisë Kombëtare Itamar Ben-Gvir u shprehën kundër arritjes së ndonjë marrëveshjeje përpara se Hamasi të shkatërrohej. Por lideri i opozitës Yair Lapid është zotuar të mbështesë qeverinë nëse Netanyahu e mbështet planin.

    Vetë kryeministri këmbënguli se nuk do të ketë armëpushim të përhershëm derisa të shkatërrohen aftësitë ushtarake dhe qeverisëse të Hamasit dhe të lirohen të gjithë pengjet.

    Propozimi tre-pjesësh i Biden do të fillonte me një armëpushim gjashtë-javor, në të cilin Forcat e Mbrojtjes të Izraelit do të tërhiqeshin nga zonat e populluara të Gazës. Marrëveshja përfundimisht do të çonte në lirimin e të gjithë pengjeve, një “ndërprerje të përhershme të armiqësive” dhe një plan të madh rindërtimi për Gazën.

    Por në një postim në mediat sociale të shtunën, Smotrich tregoi se i tha Netanyahu se “nuk do të ishte pjesë e një qeverie që pajtohet me skicën e propozuar dhe i jep fund luftës pa shkatërruar Hamasin dhe pa i kthyer të gjithë pengjet”.
    “Marrëveshja do të thotë fundi i luftës dhe braktisja e qëllimit për të shkatërruar Hamasin. Kjo është një marrëveshje e pamatur, e cila përbën një fitore për terrorizmin dhe një kërcënim për sigurinë e shtetit të Izraeli”, shtoi më tej Ben-Gvir.

    Ai u zotua të “shpërndajë qeverinë” në vend që të pajtohet me propozimin.

    Koalicioni i krahut të djathtë të Netanyahut ka një shumicë të vogël në parlament, duke u mbështetur në një mori fraksionesh, duke përfshirë partinë Otzma Yehudit e Ben-Gvir, e cila ka gjashtë vende dhe partinë e Zionizmit Fetar të Smotrich, e cila ka shtatë vende, për të ruajtur pushtetin.

    Por Yair Lapid, një nga politikanët më me ndikim të opozitës izraelite, nxitoi t’i ofrojë mbështetjen e tij kryeministrit në konflikt. Partia e tij Yesh Atid ka 24 vende.

    Mosmarrëveshja erdhi pasi mijëra njerëz u mblodhën në Tel Aviv, duke i bërë thirrje qeverisë izraelite të pranojë planin e propozuar të Biden. Demonstruesit kërkuan gjithashtu dorëheqjen e Netanyahut./tch

  • Sot, zgjedhjet lokale në Kosovën Lindore

    Sot, zgjedhjet lokale në Kosovën Lindore

    Sot, më 2 qershor do të mbahen zgjedhjet lokale në Kosovën Lindore, Preshevë, Medvegjë dhe Bujanoc.

    Në kuadër të këtyre zgjedhjeve, së fundmi me sloganin “Me mendje dhe zemër” në Prishtinë u mbajt një tubim mbështetës, në të cilën morën pjesë kryeministri Albin Kurti, kandidatja për kryetare të Preshevës, Ardita Sinani, kandidati për kryetar të Bujanocit, Ragmi Mustafi, deputeti shqiptar në Kuvendin e Serbisë, Shaip Kamberi.

    Në këtë tubim u theksua nevoja për të mbështetur Kosovën Lindore për t’i tejkaluar pabarazitë që po i bëhen nga shteti serb.

    Në fjalën e tij, Kurti tha se zgjedhjet në Luginë janë mundësi unike për shqiptarët e atjeshëm, teksa sa i përket deklaratave të ndryshme se në këto zgjedhje po marrin pjesë vetëm dy deputetë, ai ka thënë se “shkon aty ku e thërrasin”.

    “Lugina është simbol i shpresës dhe qëndresës, bart një trashëgimi të pasur kulturore, por edhe një potencial të madh zhvillimor. Vazhdon të jetë një ndër zonat më të ndjeshme, kemi parë shumë sfida qe ka kaluar Lugina, diskriminimi i vazhdueshëm, mungesa e qasjes në dokumente janë vetëm disa nga problemet që ballafaqohen shqiptarët. Qeveria ka punuar pa ndalur për të ofruar mbështetje sociale e ekonomike. Kemi investuar dhe do të vijojnë të investojnë për të ndihmuar komunitetin tonë atje, për të siguruar një jetë më të mirë për qytetarët atje. Tani me zgjedhjet qe po afrohen në Luginë kemi mundësi unike për të çuar përpara këtë bashkëpunim.

    Qeveria do të jetë gjithmonë krah tyre duke mbështetur zhvillimin në çdo hap. Më kanë thënë se nuk bënë të marrin pjesë vetëm dy kandidatë, por unë shkoj aty ku më thërrasin”, tha Kurti.

    Pjesëmarrja e Kurtit në këtë tubim të Partisë për Veprim Demokratik, që u mbajt në Prishtinë, në përgjithësi u mirëprit, por kishte edhe nga ata që e kritikuan dhe e cilësuan si ndërhyrje të tij në zgjedhjet në Kosovën Lindore.

  • Moti sot me diell dhe vranësira të shpërndara, temperatura maksimale 28 gradë Celsius

    Moti sot me diell dhe vranësira të shpërndara, temperatura maksimale 28 gradë Celsius

    Moti sot parshihet të jetë me diell dhe vranësira të shpërndara.

    Vranësirat gjatë pjesës së dytë të ditës do të dendësohen duke krijuar kushte që vende-vende të sjellin shi.

    Temperaturat minimale parashihen të lëvizin ndërmjet 10-14 gradë Celsius, ndërsa ndërmjet 25-28 gradë Celsius.

    Do të fryjë erë kryesisht nga verilindja me shpejtësi 1-5m/s, njofton Instituti Hidrometeorologjik i Kosovës.

  • “Profesor nderi” nga Kolegji AAB për Prof.Dr Agim Vinca

    “Profesor nderi” nga Kolegji AAB për Prof.Dr Agim Vinca

    Fjala e Lulzim Tafës me rastin e nderimit me titullin “Profesor nderi” nga Kolegji AAB për Prof. Dr. Agim Vinca.

    Kur fola, më thanë: hesht!
    Kur heshta më thanë: fol!
    Folehesht, heshtefol qe jeta ime.

    Autori i këtyre vargjeve të bukura Poeti e miku im i madh Agim Vinca, as nuk ka fol kur i kanë thënë fol, e as nuk ka heshtë kur i kanë thënë hesht.

    Ai ka folur gjithmonë kur ka dashur të flas, ka folur me zë të lartë, për ta dëgjuar të gjithë.

    Ka fol kur ka qenë vështirë të flitet, ka fol në letërsi, por edhe në politikë e në jetën e përditshme.

    Zëri i tij ka qenë i lartë e i fuqishëm dhe është dëgjuar gjithmonë, mospajtues dhe jo konformist, kryengritës e rebel i prajshëm.

    Kjo e ka shquar atë që përbënë tanimë profilin e Agim Vincës.

    Kjo e ka bërë gjithmonë të veçantë, figurën e tij shumë dimensionale.

    Të nderuar miq,

    Jemi në një moment shumë të bukur, jo vetëm për Profesor Agim Vincën, por për të gjithë ne.

    Profesor Vincës pikërisht sot i shtohet edhe një 7-shte pas asaj shtatëshes së parë së femijerisë.

    Tani mosha natyrore e tij përbehet prej dy shtatësheve, bëhet 77, janë dy shtatëshe kushtuar letërsisë, kushtuar Kosovës, kushtuar Kombit.

    Profesor Vincën ka më shumë se tri dekada qe e njoh dhe e kam takuar, dhe ajo që e mbaj mend është se para se ta njoh dhe ta takoj personalisht Agim Vicen, e kam takuar një pjesë të krijimtarisë së tij, sidomos të poezisë.

    Unë isha shumë i ri e student, e Agim Vinca ishte ky që është tani, poet e Profesor i respektuar i letërsisë, letërsisë së sotme.

    Ai këtu e 31 vite me parë u be recensent i librit tim të parë, i gëzimit tim të parë, ishte lexuesi i parë profesionist i vargjeve të mija.

    Tani me lejoni ta përgëzoj vetën që në atë kohë kam guxuar që me një tufë poezish në dorë, të shkruara me makinë shkrimi t’i drejtohem studiuesit më të njohur të poezisë, poetit Vinca, për tu bërë recensent i librit tim të parë.

    Nga ajo kohë Profesor Vinca dhe unë jemi miq.

    Unë dhe gjenerata ime e brezit emergjent të poeteve të viteve të 90-ta, Agim Vincën, ashtu si dhe Ali Podrimjen, Azem Shkrelin, Din Mehmetin, Mirko Gashin, Rrahman Dedajne dhe krejt ketë brez të poetëve i idealizonim, gati sa edhe i adhuronim.

    Prof. Vinca banonte në Ulpianë, ashtu edhe si Podrimja dhe disa poetë të tjerë të shquar dhe unë së bashku me mikun tim Poetin Sali Beqiraj sa herë kalonim rreth banesës ku banonte Profesori, thoshim “Këtu digjet Agim Vinça”.

    Koha nuk ishte poetike, por ne ishim shumë Poetik dhe siç do ta thoshte vete Profesor Vinca, nganjëherë kemi “Nostalgji për kohërat e vështira”.

    Përveç artit të tij të mirëfilltë, Vinca ashtu siç edhe tani kishte edhe një pamje impresive, të një shkrimtari me stil.

    Më kujtohet një rast ne vitin 1995 një zotëri në rrugë më pyeti, a është Ky Rexhep Qosja i Malit të Zi, unë instinktivisht i thash, Ky është Rexhep Qosja i Maqedonisë, ngase Prof. Vinca e Prof. Qosja përngjanin bukur shume në dukje.

    Natyrisht qe as Rexhep Qosja as Agim Vinca nuk i përkasin vetëm vendlindjeve të tyre por na përkasin të gjithë neve, i përkasin Kombit.

    Vinca ishte model për mua dhe gjeneratën time.

    Detajist deri në perfeksion, jo i lehtë në bashkëbisedim, i pa kompromise me vlera, por kurrë askujt pa i hyrë në hak.

    Këto cilësi e përbëjnë personalitetin e Agim Vincës, të cilit sot i uroj nga zemra edhe shumë datëlindje të tjera bashkë me familjen e tij të mrekullueshme, që edhe unë i kam miq, Zonjën Flutura, Drilonin, Shpëtimin dhe Doruntinën.

    Profesor të dëshiroj jetë të gjatë e të lumtur, të falënderoj për bashkëpunimin korrekt që kemi për tri dekada, të falënderoj për modelin e intelektualit e mësimdhënësit të pakrahasueshëm.

    Dua ta falënderoj edhe AAB-në që gjithmonë është e vëmendshme për këto data të rëndësishme, siç është kjo sot për këtë personalitet të madh të artit kulturës.

    Faleminderit!

  • Ish-banorët e “BBVK” me akuza, kundërshtime dhe të qeshura në “The Elite Way”

    Ish-banorët e “BBVK” me akuza, kundërshtime dhe të qeshura në “The Elite Way”

    Këtë të diel, “The Elite Way” sjell përballjen më interesante të banorëve të “Big Brother VIP Kosova”. Emisioni do të ofrojë një atmosferë të gjallë në studio, me shumë të qeshura dhe përballje si asnjëherë më parë nga figurat më të dashura për publikun.

    Në “The Elite Way” do të rikthehen diskutimet, momentet dhe të qeshurat e banorëve të reality show-it “Big Brother VIP Kosova”. Shikuesit e televizionit ATV do të kenë mundësinë të ndjekin një prime të vërtetë me Edona James, Meti Alshiqi, Lumbardh Salihu, Monika Salihu dhe Azem Gagica.

    Kush me kë flet e nuk flet, trazirat pas përfundimit të Reality Show-it do të kuptohen në emisionin The Elite Way.

    Në tema dhe diskutime madje në konfrontime mendimesh e në lojëra, do të mund të shijoni mbrëmjen e vikendit nga ora 21:30 në ATV.

  • Poeti Lulzim Tafa nderohet në Ditën Ndërkombëtare të Frymëzimit në Tel Aviv të Izraelit

    Poeti Lulzim Tafa nderohet në Ditën Ndërkombëtare të Frymëzimit në Tel Aviv të Izraelit

    Në Ditën Ndërkombëtare të Frymëzimit të mbajtur në Tel Aviv të Izraelit, poeti kosovar me famë botërore, Lulzim Tafa, u nderua për kontributin e tij të rëndësishëm për paqen dhe humanizmin përmes veprës së tij letrare.

    Kjo ngjarje, e cila mblodhi së bashku figura të shquara nga komuniteti botëror i artit dhe kulturës, vlerësoi ndikimin e thellë të Tafës në botën e poezisë dhe përkushtimin e tij për kauzat humanitare.

    Njëri nga organizatorët e Ditës Ndërkombëtare të Frymëzimit në Tel Aviv, në fjalën e tij e çmoi punën e poetit Lulzim Tafa, duke vënë në dukje lidhjet e thella që ai ka krijuar me poetët izraelitë.

    “I nderuar profesor Lulzim Tafa, sot po zhvillojmë një aktivitet të rëndësishëm të poezisë nën titullin Dita Ndërkombëtare e Frymëzimit dhe kemi nderin të përfshijmë poezinë tuaj në të, pas lidhjeve që janë krijuar mes jush dhe poetëve izraelitë që vlerësojnë shumë poezinë e juaj dhe aktivitetet tuaja humanitare”, tha në fjalën e tij njëri ndër organizatorët e kësaj ngjarjeje.

    Ai përmendi rolin e dyfishtë të Tafës si një poet i dalluar dhe një humanist të përkushtuar.

    Në fjalën e tij, para të pranishmëve në këtë ngjarje, ai lexoi edhe një nga poezitë e Lulzim Tafës, “I fuqishmi”, të përkthyer në hebraisht.

    Lidhur me këtë ngjarje, poeti Lulzim Tafa, shprehu mirënjohjen dhe krenarinë për nderin që iu bë nga komuniteti i artit dhe kulturës në Tel Aviv.

    Ai, përmes një postimi në facebook, tha se u ndje i nderuar që në sallën e mbushur përplot me figura eminente botërore të artit dhe kulturës, emri i tij dhe i Kosovës u lartësua në këtë nivel.

    “Një nderim i madh qenka bërë për mua dhe poezinë time, në ditën ndërkombëtare të inspirimit, në Tel Aviv. U ndjeva i nderuar që në sallën e mbushur përplot me figura eminente botërore të artit dhe kulturës, emri im dhe i Kosovës u lartësua në këtë nivel”, shkroi poeti Tafa.

    Lulzim Tafa është njëri ndër poetët e spikatur jo vetëm në Kosovë por edhe në skenën ndërkombëtare. Ai ka shërbyer për vite si profesor në fushën e drejtësise dhe si rektor në Kolegjin AAB, një nga institucionet më të mëdha arsimore jo publike në rajon.

    Arritjet letrare të Tafës janë të njohura në mbarë botën. Në fund të vitit 2023, Lulzim Tafa është nderuar me titullin “Oficer i Urdhrit Kombëtar të Letrave dhe Arteve” nga shteti francez, çmimi më i lartë në fushën e artit dhe letërsisë, i dhënë nga Franca. Këtë titull prestigjioz ia ka dhënë ambasadori francez në Kosovë, Olivier Guérot, në emër të presidentit Emmanuel Macron.

    Poezia e Tafës, e njohur për temat e saj të thella dhe rrezonimin emocional, është përkthyer në shumë gjuhë, duke përfshirë frëngjishten, anglishten, gjermanishten, hebraishten, italishten, serbishten, kroatishten, malazezishten, boshnjakishten, rumanishten, arabishten, greqishten, turqishten dhe suedishten. /atvlive.tv

  • Lirohet Gani Geci

    Lirohet Gani Geci

    Të premtes pasdite është liruar nga burgi i Smrekonicës ish-deputeti i LDK-së, Gani Geci.

    Geci ishte shpallur fajtor pasi në gusht të vitit 2014, në Skenderaj, e kishte privuar nga jeta, Ruzhdi Shaqirin me të cilin kishte pasur një konflikt të mëhershëm.

    Geci u dënua me 3 vite burgim për vrasje të rëndë, kurse me 10 muaj burgim për armëmbajtje pa leje. Ndaj tij u shqiptua dënimi unik prej 3 vite e 6 muaj burgim efektiv.

  • Prokuroria Speciale i reagon Kurtit: Jemi të indinjuar ndaj qasjes së vazhdueshme joproduktive

    Prokuroria Speciale i reagon Kurtit: Jemi të indinjuar ndaj qasjes së vazhdueshme joproduktive

    Prokuroria Speciale e Republikës së Kosovës ka reaguar ashpër ndaj deklaratave të djeshme të Kryeministrit Kurti, lidhur me rastet e krimeve të luftës.

    Në reagim thuhet se komentet e Kurtit janë në kundërshtim të plotë me parimet kushtetuese të ndarjes së pushteteve dhe standardeve ndërkombëtare për pavarësinë e Gjyqësorit.

    “Prokuroria Speciale e Republikës së Kosovës shpreh indinjatë të thellë ndaj qasjes së vazhdueshme joproduktive të Kryeministrit Kurti ndaj Prokurorisë Speciale të Republikës së Kosovës, lidhur me rastet e krimeve të luftës.

    Prokuroria Speciale potencon fuqishëm se komentet e vazhdueshme të Kryeministrit të Kosovës për punën e Prokurorisë Speciale janë në kundërshtim të plotë me parimet kushtetuese të ndarjes së pushteteve dhe standardeve ndërkombëtare për pavarësinë e Gjyqësorit. Andaj, si të tilla e minojnë besimin e publikut në punën e Prokurorit të Shtetit në përgjithësi dhe të Prokurorisë Speciale në veçanti.

    Prokuroria Speciale e Republikës së Kosovës e njofton opinionin publik se në pesë vitet e fundit, që nga koha kur kjo prokurori ka marrë kompetencat për hetimin e krimeve të luftës, ka bërë punë jashtëzakonisht të madhe në bashkëpunim të plotë me institucionet ligj zbatuese. Për më tepër, kjo është bërë me kapacitete të pamjaftueshme të kuadrove, profesionale dhe financiare, si pasojë e buxhetit të pamjaftueshëm. KPK sjell në vëmendje të opinionit publik se në 20 vjetët e fundit, asnjëherë nuk është miratuar kërkesa buxhetore e plotë (në lartësinë 100% të kërkesës).

    Gjithashtu, korniza ligjore për hetimin e krimeve të luftës ka ndryshuar shumë në pesë vjetët e fundit.

    Ky ndryshim ka paraqitur sfidë për një proces efikas dhe efektiv në hetimin e krimeve të luftës. Këtë sfidë nuk e kanë shtetet e tjera në regjion. Shtetet si Kroacia dhe Bosnja e Hercegovina kanë miratuar strategjitë nacionale në nivel të qeverive dhe parlamenteve të vendeve të tyre për adresimin e krimeve të luftës. Ne ende nuk e kemi një strategji të tillë në nivel nacional.

    Përkundër kësaj, me iniciativën e Prokurorisë Speciale të Republikës së Kosovës , Këshilli Prokurorial i Kosovës ka miratuar Strategjinë e Krimeve të Luftës, mbi bazën e së cilës janë duke u zhvilluar hetimet e krimeve të luftës

    Edhe me këto resurse të pamjaftueshme, si ligjore ashtu edhe financiare, njoftojmë opinionin publik se Prokuroria Speciale, aktualisht, ka të regjistruara gjithsej 60 aktakuza për krime të luftës për 56 raste, ndaj 165 personave.

    Po ashtu ju informojmë se ka përfunduar proceduara e avancimit të prokurorëve, nga ana e Këshillit Prokurorial dhe duke filluar nga data 1 qershor 2024, në Departamentin për Hetimin e Krimeve të Luftës në Prokurorinë Speciale do të shtohen edhe dy (2) prokurorë, ku numri total i prokurorëve në këtë departament do të jetë pesë (5), të cilët do të merren ekskluzivisht me hetimin e krimeve të luftës.

    Prokuroria Speciale i bënë thirrje publike Kryeministrit dhe çdo zyrtari tjetër shtetëror që të shmangë deklarimet publike, të cilat nuk përkojnë me gjendjen reale dhe i fton qytetarët për bashkëpunim me organet e rendit, në mënyrë që të gjithë ata individ që kanë kryer vepra penale të krimeve të luftës të vihen para drejtësisë.

    Krimet e luftës nuk parashkruhen (vjetërsohen), andaj edhe ne nuk do të ndalemi duke punuar në të gjitha rastet qe i kemi lidhur me këto vepra penale” thuhet në reagim.

  • Komuna e Prishtinës, PDK-së: Akuzat bosh nuk e ndalin transformimin e Kryeqytetit

    Komuna e Prishtinës, PDK-së: Akuzat bosh nuk e ndalin transformimin e Kryeqytetit

    Komuna e Prishtinës ka reaguar pas deklaratave që gjatë ditës së premte iu bënë nga Partia Demokratike.

    “Gjatë ditës së sotme, përfaqësues të Partisë Demokratike të Kosovës kanë bërë akuza tërësisht të pabaza dhe me qëllime puro politike për të penguar një proces të transformimit të Kryeqytetit, Planin Rregullues për Lagjen Kalabria. Veprime të tilla ka pasur edhe në të kaluarën kur Partia Demokratike e Kosovës ka tentuar përmes sabotimit të shumë proceseve të ndalin punën tonë”, thuhet në reagim.

    Prandaj, duam të sqarojmë për publikun, si vijon:

    Plani Rregullues për Lagjen Kalabria ka kaluar nëpër të gjitha procedurat e parapara ligjore për dokumentet e tilla. Dokumenti është hartuar nga një grup punues me ekspertë të drejtorive përkatëse, përfshirë edhe ekspertë ndërkombëtar të planifikimit urban. Plani ka kaluar nëpër periudhën 30 ditore të konsultimeve publike me banorët e Lagjes Kalabria për të informuar ata rreth detajeve të Planit si dhe për të marrë parasysh sugjerimet e tyre.

    Janë mbajtur shumë konsultime publike grupore me banorë dhe pronarë të tokave në Lagjen Kalabria. Po ashtu, kemi pritur në dhjetëra raste qytetarë individual të Lagjes Kalabria të cilët kanë kërkuar informata dhe detaje rreth Planit. Pra, përpos takimeve publike grupore, dera e institucionit të Kryeqytetit ka qenë e hapur gjatë gjithë procesit. Drejtorët përkatës kanë qenë në dispozicion dhe kanë takuar të gjithë banorët e Lagjes që kanë kërkuar informata për këtë çështje.

    Përveç rregullimit të shumë problemeve që kanë banorët e Lagjes, ky Plan parasheh rritjen e vlerës së ndërtimit në pronën komunale. Kjo është bërë në mënyrë tërësisht transparente dhe ligjore. Qëllimi i ngritjes së kësaj vlere të ndërtimit është që investitorët potencial që shprehin interes për investim në këtë pronë komunale, do të kushtëzohen me ndërtimin e Unazës së Kryeqytetit dhe Fshatit Olimpik. Pra, rritja e vlerës së ndërtimit në këto prona do të sigurojë ndërtimin e Unazës së Kryeqytetit dhe Fshatit Olimpik pa e ngarkuar buxhetin e Kryeqytetit dhe pa ngarkuar qytetarët. Unaza e Kryeqytetit kap një vlerë prej rreth 350 milion Euro (rreth 150 milion eksproprijim të pronave private dhe rreth 200 milion ndërtim) ndërsa Fshati Olimpik rreth 200 milion Euro.

    Pra, me miratimin e këtij Plani Rregullues mund të financohen këto dy projekte madhore të Kryeqytetit që arrijnë vlerën totale rreth 550 milion Euro.

    Prandaj, sigurojmë qytetarët se miratimi i këtij Plani Rregullues nuk do të dëmtojë pronën publike, nuk do të rëndojë qytetarët e buxhetin e Kryeqytetit, por përkundrazi do të rezultojë me ndërtimin e Unazës së Kryeqytetit dhe Fshatit Olimpik e cila do të jetë në dobi të qytetarëve të gjithë Republikës së Kosovës. Kjo masë është ndërmarrë për shkak se ndërtimi i Unazës së Kryeqytetit është duke u vonuar tash e sa kohë si rrjedhojë e mungesës së mbështetjes dhe bashkëpunimit nga Qeveria e Republikës së Kosovës dhe nevojës për ndërtimin e Fshatit Olimpik.

  • OBSH: Të alarmuar nga numri i lartë i rasteve të etheve tropikale

    OBSH: Të alarmuar nga numri i lartë i rasteve të etheve tropikale

    Numri i rasteve të etheve tropikale në mbarë botën është rritur gjatë pesë viteve të fundit, me një situatë veçanërisht alarmante këtë vit në kontinentin amerikan, sipas një raporti të ri të publikuar nga Organizata Botërore e Shëndetësisë (OBSH).

    Sipas raportit, më shumë se shtatë milionë raste të etheve tropikale janë raportuar në Amerikë që nga prilli i këtij viti, duke tejkaluar ndjeshëm 4,5 milionë rastet e raportuara në të gjithë vitin 2023.

    “Duke pasur parasysh shkallën aktuale të shpërthimeve, rrezikun e mundshëm të përhapjes së mëtejshme ndërkombëtare dhe kompleksitetin e faktorëve që ndikojnë në transmetim, rreziku i përgjithshëm global vlerësohet ende si i lartë dhe për këtë arsye ethet tropikale mbeten një kërcënim global për shëndetin publik”, thuhet në raportin e OBSH-së.

    Ethet tropikale janë një sëmundje virale kërcënuese për jetën e përhapur nga mushkonjat në rajonet tropikale dhe subtropikale.

    Deri në fund të prillit, OBSH kishte marrë raporte për 7,6 milionë raste nga 90 vende, duke përfshirë pjesë të Evropës Jugore.

    Sipas OBSH-së, më shumë se 16 000 nga këto raste rezultuan në sëmundje të rënda dhe 3 000 ishin fatale.

    Disa njerëz nuk shfaqin simptoma, ndërsa në raste të rënda dengoja mund të shkaktojë gjakderdhje të rëndë dhe dëmtim të organeve.