ATV

Author: ATVLive

  • Djali hasret nga Peja që iku në Finlandë e u bë kampion në garat “Strong Man”

    Djali hasret nga Peja që iku në Finlandë e u bë kampion në garat “Strong Man”

    Në emisionin e mëngjesit ALARM në ATV, sot ishte mysafir Elbasan Prekaj nga Peja, emër mjaft i njohur në Finlandë për titullin e kampionit që mban në garat e “Strong man”.

    Ai në një lidhje të drejtpërdrejtë në këtë emision tregoi si kishte nisur të merret me këtë sport.

    “Për mua ka nisë gjithçka aksidentalisht. Ne vitin 2010 e pata një lëndim gjatë ushtrimeve të boksit, dy këputje të ligamenteve në supe dhe pas operacionit në rehabilitim u dashke me shku, dhe fillova me ngritë pesha me i forcua muskujt. Aty e vërejta se kam talentë të jashtëzakonshëm për ngritjen e peshave. Brenda një viti kam arritë me ngritë pesha që dikujt i duhen pesë apo dhjetë vite me e arrite. Një “Strong man” më sugjeroi, më tha “ti ke talent të lindur”, se deri në atë kohë nuk kam ditur asgjë, pra deri në vitet 2014-2015, asgjë nuk kam ditur për sportin “Strong man”. Shumë vonë, kam qenë 27 vjeçar kur ia kam fillu”, tregon Elbasani.

    Ai tregoi edhe për titujt që ka marrë në këtë sport, ku tha se ka thyer rekord në Federatën e “The World Strength Games”, si dhe është shpallur kampion bote tri herë në po të njëjtën federatë.

    “Kam tërhequr kamionin 10 tonë, në dy lloj disiplina, që është ulur dhe në këmbë. Makinat i kam rrotullu. Të peshat ‘Ecja e marinarit’, më e madhja ka qenë 400 kg, pa me peshën 400kg kam arritë me ecë me te. Specialiteti i im është “The World Strength Games”, kam rekord në këtë federatë, ku jam edhe tri herë kampion bote. E kam 155kg për dorë, 15 metra i kam arritë për 13 sekonda” tregon Elbasani. /atvlive.tv

    Emisionin e plotë e gjeni në videon më poshtë:

  • ​Të shtëna në Prishtinë, lëndohet një person

    ​Të shtëna në Prishtinë, lëndohet një person

    Një person është lënduar sot në rrugën “Bajram Bahtiri” në Prishtinë, gjatë një përleshjeje fizike, ndërsa ka pasur edhe të shtëna.

    Zëdhënësja e Policisë, Flora Ahmeti ka bërë të ditur për KosovaPress se rasti ka ndodhur rreth orës 12:30.

    “Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në të dhënat fillestare, në këtë rast gjatë përleshjes fizike është lënduar një person, i cili është dërguar për tretman mjekësor”, ka thënë ajo.

    Ajo ka thënë po ashtu se po ndërmarrin veprimet hetimore për arrestimin e personit të dyshuar dhe ndriçimin e plotë të rastit.

    “Hetuesit policor në koordinim me prokurorinë, po ndërmarrin veprimet hetimore për arrestimin e personit të dyshuar ( i cili është identifikuar) si dhe ndriçimin e plotë të rastit”, tregoi ajo.

  • Zgjerimi i shpeshtë i venave tek pacientet në Kosovë, kirurgu vaskular pse ndodh kjo

    Zgjerimi i shpeshtë i venave tek pacientet në Kosovë, kirurgu vaskular pse ndodh kjo

    Në emisionin e mëngjesit ALARM në ATV, sot ishte mysafir kirurgu vaskular, Bekim Ademi. Ai në këtë emision shpjegoi se cilat sëmundje vaskulare janë më të përhapura në Kosovë dhe cila është arsyeja sipas tij që shkakton këto probleme shëndetësore.

    “Dy patologjitë tek ne janë mjaftë të përfshira për arsye se ne si vend jemi në hemisferën pak më nxehtë se pjesa tjetër e Evropës dhe mënyra e të ushqyerit e bënë që ne të dallojmë nga bota perëndimore. Atëherë sëmundjet venozet tek ne janë më të shprehura se sa sëmundjet arteriale. Sëmundjet arteriale shprehen për shkak të shumë faktorëve, si mbi ushqyerja, çrregullimi i yndyrave, mos aktiviteti dhe stresi i madh, këto i dëmtojnë arteriet periferike dhe ato qendrore më tepër se sa te popullata që ushqehet më shëndetshëm dhe ka kujdes në jetën e tyre, zhvillimin e tyre”, tregon Ademi.

    Ai thotë se për shkak të nxehtësisë, në vendin tonë janë të shprehura më shumë sëmundjet venoze sipërfaqësore.

    “Kurse te ne për shkak të nxehtësisë që kemi, sëmundjet venoze sipërfaqësore janë pak më të shprehura. Sistemi i venave sipërfaqësore është si një lloj klime e organizmit të lëkurës dhe gjatë temperaturave të nxehta, venat sipërfaqësore zgjerohen më shpesh se sa në vendet e ftohta”, shpjegon Ademi. /atvlive.tv

    Emisionin e plotë e gjeni në videon më poshtë:

  • ​Rama: Padrejtësia ndaj luftës çlirimtare të Kosovës dhe Thaçit nisi në Këshillin e Evropës

    ​Rama: Padrejtësia ndaj luftës çlirimtare të Kosovës dhe Thaçit nisi në Këshillin e Evropës

    Kryeministri i Shqipërisë, Edi Rama në Samitin e kryetarëve të shteteve dhe Qeverive të Këshillit të Evropës, që po mbahet në Islandë sot deklaroi se është e pamundur për të që të shmangë heqjen e paraleleve midis Ukrainës e presidentit Zelensky dhe Kosovës e presidentit Thaçi.

    Rama u shpreh se padrejtësia kundrejt luftës çlirimtare të Kosovës dhe udhëheqësit të saj, Hashim Thaçit ka filluar në Këshillin e Europës nën ndikimin e ish-anëtarit të asaj kohe të këtij këshilli, Federatës Ruse.

    “Si shqiptar është e pamundur për mua të shmang heqjen e paraleleve midis Ukrainës e Presidentit Zelensky dhe Kosovës e presidentit Thaçi. Sot në këtë samit të Këshillit të Europës nuk rri dot pa kujtuar se padrejtësia kundrejt luftës çlirimtare të Kosovës dhe udhëheqësit të saj Hashim Thaçit, nisi saktësisht në Këshillin e Europës nën ndikimin dashakeq të ish-anëtarit të asaj kohe të këtij këshilli, Federatës Ruse. Presidenti i Kosovës ose si dikush i quajtur Joe Biden iu referua si George Uashingtoni i Kosovës, gjykohet tanimë nga një gjykatë e veçantë e ngritur dhe e themeluar nga bota demokratike, por e mbështetur në një raport të 2011 të Këshillit të Europës i cili në mënyrë djallëzore u sponsorizua nga përfaqësuesit e partisë së Vladimir Putinit në asamblenë e Këshillit të Europës. Akuza tërësisht të pabazuara të trafikimit të organeve njerëzore u ngritën atëherë si pikënisja e një fushate kriminale njollosjeje të Shqipërisë dhe të Kosovës dhe kur dëgjova propagandën e Kremlinit të flasë për trafikimin e organeve njerëzore nga neo-nazistët në Donbas, mu duk sikur pashë presidentin Zelensky 10 vjet më vonë gjykuar nga një gjykatë e veçantë ngritur mbi të njëjtat akuza absurde.”, tha Rama.

    Ai tha se është tejet shkurajuese të dish që situata shqetësuese ku përfshihet presidenti Kosovës dhe Ushtria Çlirimtare e Kosovës e ka pasur zanafillën brenda Këshillit të Europës.

    Kryeministri i Shqipërisë u shpreh se asambleja e Këshillit të Europës ka detyrimin t’i hapë rrugën tërheqjes mbrapshtë të raportit që në mënyrë të rreme etiketoi Shqipërinë si bazë për trafikimin e dyshuar të organeve lehtësuar nga UÇK.

    “Do të isha fajtor po të mbetesha i heshtur e të mos flisja sot këtu e të thoja sa vijon, se asambleja e Këshillit të Europës ka detyrimin moral të korrigjojë çdo gabim dhe në këtë rast duhet t’i hapë rrugën tërheqjes mbrapshtë raportit që në mënyrë të rreme etiketoi Shqipërinë si bazë për trafikimin e dyshuar të organeve lehtësuar nga UÇK. Të refuzosh të përballesh me të vërtetën sot do të ishte më keq sesa të bëhej ky gabim i rëndë 12 vjet më parë kur shumë votuan mes sy mbyllur atë raport të turpshëm në mirëbesim. Sigurisht sot situata ka ndryshuar. Rusia nuk është më një anëtare e këtij Këshilli edhe pse numri i rusëve që vazhdojnë të punojnë për Këshillin e Europës është mjaft mbresëlënës dhe falë Zotit uniteti i bashkësisë demokratikë të Këshillit në mbështetje të luftës çlirimtare të Ukrainës dhe presidenti Zelensky është i jashtëzakonshëm. Shqipëria kurrë nuk ka pasur iluzione për natyrën e regjimit të Moskës dhe marrëdhënia jonë me Moskën ka qenë joekzisutese qysh prej vdekjes se Josif Visarionoviç Stalin.”, shtoi ai.

    Në ditën e parë të Samitit të kryetarëve të shteteve dhe Qeverive të Këshillit të Evropës, kryeministri i Shqipërisë, Edi Rama ishte bashkëkryesues i tryezës së rrumbullakët me temë “Përballja me sfidat e reja dhe në zhvillim të të drejtave të njeriut – e ardhmja është këtu”, së bashku me presidentin e Letonisë, Egils Levits./KP

  • Gjykata Supreme e lë në paraburgim Nagip Krasniqin

    Gjykata Supreme e lë në paraburgim Nagip Krasniqin

    Gjykata Supreme e ka refuzuar kërkesën e mbrojtjes së kryeshefit të suspenduar të Korporatës Energjetike të Kosovës (KEK), Nagip Krasniqi, për lirimin e tij.

    Sipas njoftimit të Supremes, kjo gjykatë e ka vlerësuar si të pabazuar kërkesën e mbrojtjes për lirimin nga paraburgimi të Krasniqit.

    “Kolegji i Gjykatës Supreme e ka refuzuar si të pabazuar kërkesën për mbrojte të ligjshmërisë ndaj të pandehurit N.K., të paraqitur kundër aktvendimit të Gjykatës Themelore në Prishtinë dhe aktvendimit të Gjykatës së Apelit të Kosovës. Në çështjen penale ndaj të pandehurit N.K., për shkak të veprave penale: keqpërdorimi i pozitës apo autoritetit zyrtar, ushtrimi i ndikimit, keqpërdorimi i pozitës apo autoritetit zyrtar, konflikti i interesit, duke vendosur përkitazi me kërkesën për mbrojtje të ligjshmërisë të mbrojtësve të pandehurit, avokatët Virtyt Ibrahimaga dhe Taulant Ferizi, në seancën e mbajtur më datë 16.05.2023, kolegji i Gjykatës Supreme vendosi për refuzimin e kësaj kërkese”, thuhet në njoftimin e Gjykatës Supreme.

    Më 20 prill, Prokuroria Speciale ka arrestuar kryeshefin ekzekutiv të KEK-ut, Nagip Krasniqi. Krasniqi sipas Prokurorisë, është arrestuar për shkak të dyshimit se ka kryer “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”. Pas arrestimit, Gjykata Themelore në Prishtinë i ka caktuar masën e paraburgimit prej një muaji për Nagip Krasniqit.

  • Veliaj: Ky është mandati im i fundit në bashkinë Tiranë

    Veliaj: Ky është mandati im i fundit në bashkinë Tiranë

    Kryebashkiaku Erion Veliaj tha se ky është mandati i tij i fundit në bashkinë Tiranë.

    I njëjti ka treguar edhe për ndryshimet që ai dëshiron t’i bëjë gjatë këtij mandati.

    “Bashkia e re do të jetë tek Bulevardi i ri. Vendim i gjykatës për kopshtin botanik, shkollat i kemi në proces, do të marrim një vendim për vendosjen dizajnin e Gjykatës së Lartë, kemi dy grupe finaliste”.

    Ndërsa një nga arritjet e qeverisjes së tij deri tash, Veliaj e konsideron dhjetë fishimin e taksës për ndërtuesit.

    “10 fishuam taksën për ndërtuesin. Unë s’po them që shijon taksa, ka hequr spekulantë nga tregu. Ai ishte një treg bizare, çdo lloj zdromsi që s’merrte vesh fare mjaft të kishte lidhje me një kryebashkiak hapte gropë, 100 mijë leja, bëmë 10 fishim të shumës, ai nuk e bën më me lek xhepi, kur taksa shkon 10 fish, kur merr nga banka është banka që siguron, është formalizuar, ikën këta amatorë, ka vetëm ndërtues vërtet, vetëm ata që dinë të bëjnë”, tha tutje.

    Kryebashkiaku Erion Veliaj të martën zyrtarisht ka fituar mandatin e tretë në Bashkinë e Tiranës.

    Ai e mposhti bindshëm kundërshtarin e tij të “Bashkë Fitojmë”, Belind Këlliçi.

    Sipas Komisionit Qendror Zgjedhor, i ka fituar 158 mijë e 688 vota, derisa Këlliçi mori 100 mijë e 351 vota. /tch

  • Çfarë po pret BE-ja nga raundi i dytë i zgjedhjeve në Turqi, flet Borrell

    Çfarë po pret BE-ja nga raundi i dytë i zgjedhjeve në Turqi, flet Borrell

    Shefi i politikës së jashtme në Bashkimin Evropian, Josep Borrell, e ka mirëpritur procesin zgjedhor që u zhvilluar në Turqi të dielën e javës së kaluar.

    Ai, me anë të një cicërime në Tëitter, ka deklaruar se BE-ja e pret edhe rezultatin nga zgjedhor që do të bëhet nga raundi i dytë i zgjedhjeve presidenciale në Turqi.

    “Pjesëmarrja e lartë në zgjedhjet e përgjithshme në Turqi tregoi përkushtimin e popullit turk ndaj institucioneve demokratike”.

    “BE-ja e pret me padurim raundin e dytë të zgjedhjeve presidenciale më 28 maj”, ka thënë Borrell.

    Kreu i Këshillit Suprem Zgjedhor (YSK) në Turqi, Ahmet Yener, duke njoftuar rezultatet e para jozyrtare dje, tha se në raundin e parë të votimit asnjë kandidat presidencial nuk arriti të kalonte pragun e kërkuar prej 50 për qind, me çka Erdogan, kandidat i përbashkët i Aleancës Popullore dhe Kemal Kılıçdaroglu, kandidati i cili u radhit i dyti, do të përballen në raundin e dytë të zgjedhjeve më 28 maj.

    Yener njoftoi se pjesëmarrja e votuesve në zgjedhjet e djeshme ishte 88,92 për qind, ndërsa pjesëmarrja e qytetarëve turq jashtë vendit ishte 52,69 për qind.

    Ai po ashtu njoftoi se në zgjedhjet e djeshme Erdogan radhitet i pari duke fituar 49,51 për qind të votave, ndërsa Kılıçdaroglu fitoi 44,88 për qind të votave. Sinan Ogan nga Aleancës ATA mori 5,17 për qind, ndërsa Muharrem Ince, i cili u tërhoq nga gara presidenciale në fund të javës së kaluar pasi fletëvotimet ishin shtypur, mori 0,44 për qind.

    Miliona votues iu drejtuan kutive të votimit të dielën për të zgjedhur presidentin e vendit dhe 600 deputetët e parlamentit turk.

    Më shumë se 64,1 milionë njerëz kishin të drejtë vote, duke përfshirë mbi 1,76 milionë që votuan jashtë vendit dhe 4,9 milionë persona që votuan për herë të parë.

    Gjithsej 192.214 kuti votimi u vendosën për votuesit në vend.

    Çdo votues kishte mundësi të hedh dy vota, një për presidentin dhe një për 600 vendet e parlamentit, të cilët do të shërbejnë për një mandat 5-vjeçar.

  • SHBA-ja sërish kritika Qeverisë që s’po e zbaton vendimin për Manastirin e Deçanit

    SHBA-ja sërish kritika Qeverisë që s’po e zbaton vendimin për Manastirin e Deçanit

    Departamenti Amerikan i Shtetit ka publikuar raportin e vitit 2022 për Liritë Fetare.

    Në raportin për Kosovën, ka kritika të mëdha ndaj vendit, ku thotë ndër të tjera se Qeveria e Kosovës sërish ka dështuar në zbatimin e vendimit të Gjykatës Kushtetuese të vitit 2016 që i njihte Kishës Ortodokse Serbe pronësinë e tokës rreth Manastirit të Deçanit.

    Në këtë raport përmendet se Kisha Ortodokse Serbe (KOS) ka kritikuar zyrtarët e lartë të qeverisë, përfshirë presidenten Vjosa Osmani dhe kryeministrin Albin Kurti, që kundërshtonin meritat e vendimit të gjykatës duke i cilësuar si “politikisht të papërgjegjshme dhe të rrezikshme”.

    “Qeveria përsëri dështoi në zbatimin e një vendimi të Gjykatës Kushtetuese të vitit 2016 që i njihte KOS-it pronësinë e tokës rreth Manastirit të Deçanit. KOS kritikoi vërejtjet e zyrtarëve të lartë të qeverisë, përfshirë Presidenten Vjosa Osmani dhe Kryeministrin Albin Kurti, që kundërshtonin meritat e vendimit të gjykatës si ‘politikisht të papërgjegjshme dhe të rrezikshme’”, thotë mes tjerash ky raport.

    Më tej, përmendet edhe rasti i muajit qershor 2022 kur “policia pengoi klerin e Kishës Ortodokse Serbe (KOS) të kryente një liturgji me rastin e Ngjitjes së Shenjtë Ortodokse në kishën e kontestuar Krishti Shpëtimtar”.

    Në pjesën për myslimanët, raporti thotë se disa shkolla vazhduan të zbatonin një direktivë të qeverisë që ndalonte veshjen fetare, duke ua mohuar kështu qasjen në shkollë nxënëseve myslimane që mbanin hixhab.

    “Pati gjithashtu raporte për diskriminim ndaj grave myslimane që mbanin veshje fetare në punë publike dhe private”, thekson raporti i DASh-it.

    Po ashtu, në raport janë trajtuar edhe ankesat e Kishës Protestante Ungjillore të Kosovës (KPEC), përfaqësuesit e Dëshmitarëve të Jehovait dhe laikët, të cilët “thanë se mungesa e mbështetjes institucionale për vendet e dedikuara të varrimit i pengonte ata të kryenin shërbimet e varrimit sipas bindjeve të tyre”.

    DASh-i përmend edhe rastin e korrikut 2022 ku tre persona sulmuan imamin e fshatit Lupç në xhaminë e tij në Podujevë, duke shtuar se policia arrestoi tre personat e dyshuar për tentativë vrasje.

    Më tej, thuhet se KOS-i është ankuar se “në shtator një individ ndaloi një autobus nga Serbia me pelegrinë, duke përfshirë fëmijë, pastaj u bërtiti pelegrinëve dhe vendosi një flamur të Kosovës në xhamin e përparmë të autobusit”.

    Po ashtu, “përfaqësuesit e Unionit të Tarikateve të Kosovës (UKT) raportuan shqetësime rreth antisufizmit dhe portretizimeve negative në media”.

    Raporti tregon se në polici janë raportuar 64 incidente që për cak kishin objektet fetare – 42 myslimane, 21 të KOS-it dhe një katolik – në nëntë muajt e parë të vitit 2022.

    “KOS-i raportoi raste të vandalizmit kundër kishave të saj, duke deklaruar se disa ishin të motivuara fetarisht dhe etnikisht dhe duke ia atribuuar ato retorikës politike anti-serbe”.

    Sipas këtij raporti, zyrtarët e ambasadës amerikane kanë vazhduar të inkurajojnë qeverinë që të miratojë legjislacionin që lejon grupet fetare të fitojnë status ligjor, të zbatojë mekanizmat për të mbrojtur lirinë e fesë, të zbatojë ligjet dhe vendimet gjyqësore që kanë të bëjnë me objektet fetare të KOS-it dhe të zgjidhë mosmarrëveshjet pronësore të KOS-it.

    “Ambasadori dhe përfaqësues të tjerë të ambasadës diskutuan çështjet e lirisë fetare, duke përfshirë mbrojtjen e barabartë dhe shqetësimet e të drejtave pronësore, me udhëheqës fetarë dhe të shoqërisë civile dhe inkurajuan tolerancën fetare dhe përmirësimin e dialogut ndërfetar”.

    “Në mars, ambasada organizoi një diskutim ndërfetar me udhëheqës fetarë – i pari që përfshin udhëheqës nga komunitetet Tarikat, Bektashi dhe Kisha e Jezu Krishtit e Shenjtorëve të Ditëve të Mëvonshme (Kisha e Jezu Krishtit) – mbi pluralizmin fetar, dialogun ndërfetar, mbrojtjen të drejtave dhe lirive individuale, si dhe ndryshimet ende në pritje të ligjit për lirinë fetare”.

    Përmbledhja ekzekutive e raportit përfundon duke përmendur se ambasadori amerikan ka vizituar objektet fetare të KOS-it dhe Bashkësisë Islame të Kosovës (BIK) për të mbajtur marrëdhënie pozitive dhe dialog me liderët fetarë për të promovuar lirinë universale fetare pa diskriminim.

  • Kaq është numri i popullsisë shqiptare në Serbi sipas regjistrimit të fundit

    Kaq është numri i popullsisë shqiptare në Serbi sipas regjistrimit të fundit

    Regjistrimi i popullsisë dëshmoi se pakica kombëtare shqiptare në Serbi është diskriminuar në 12 vjetët e fundit, thotë kryetari i Këshillit Kombëtar të Shqiptarëve në këtë vend, Ragmi Mustafi.

    Duke folur për Radion Evropa e Lirë, ai thotë se rezultatet përfundimtare të regjistrimit të vitit 2022, treguan se shqiptarët në këtë vend janë pakica e katërt më e madhe kombëtare.

    Ndryshe nga të dhënat e regjistrimit të vitit 2011, që tregonin se në Serbi jetojnë gjithsej 5.809 shqiptarë, të dhënat e regjistrimit të fundit tregojnë se popullsia e këtij komuniteti përbëhet prej 61.687 banorësh.

    Shqiptarët e bojkotuan regjistrimin e mëparshëm, andaj edhe nuk dihej numri real i tyre.

    Vendimi për bojkotim ishte marrë pasi formularët për regjistrim ishin shtypur vetëm në gjuhën serbe, me alfabet cirilik.

    Si arsye shtesë, përfaqësuesit e shqiptarëve përmendën problemet e pazgjidhura dhe obligimet e paplotësuara të shtetit të Serbisë në zonën ku jetojnë ata.

    Por, përfaqësuesit e shqiptarëve bënë thirrje për regjistrim në procesin që u organizua nga autoritetet e Serbisë, vitin e kaluar.

    Mustafi thotë se numri i pjesëtarëve të pakicave kombëtare përcakton dhe ndikon drejtpërdrejt në realizimin e të drejtave të tyre.

    “Në rastin e pakicës kombëtare shqiptare në Serbi, kjo nënkupton pjesëmarrjen e duhur të shqiptarëve në organet dhe institucionet shtetërore, përkatësisht përfaqësimin e tyre proporcional në polici, gjyqësor, arsim, shëndetësi, doganë, ndërmarrje publike… gjë që nuk po ndodh tani”, thotë Mustafi.

    Përfaqësuesit politikë të shqiptarëve, prej vitesh, ankohen për diskriminim, por autoritetet serbe e mohojnë një gjë të tillë.

    Para fillimit të regjistrimit të popullsisë në vitin 2022, kryetari i Komunës së Preshevës, Shqipërim Arifi, paralajmëroi për pasivizimin e adresave të shqiptarëve në Luginën e Preshevës, në jug të Serbisë, ku edhe jeton numri më i madh i shqiptarëve.

  • Serbia rrezikon liberalizimin e vizave

    Serbia rrezikon liberalizimin e vizave

    Komisioni Evropian ka pranuar se është i shqetësuar për ekzistimin e disa procedurave të lehtësuara për dhënien e shtetësisë të huajve nga ana e vendeve, të cilat gëzojnë liberalizimin e vizave me Bashkimin Evropian.

    Në këtë mënyrë, sipas një zëdhënësi të Komisionit Evropian, personat nga vendet e treta fitojnë mundësinë që të shmangin procedurat e Schengenit për t’u pajisur me viza dhe paraqesin edhe rrezik për sigurinë e vendeve të BE-së. Në mënyrë të veçantë Komisioni përmend Serbinë, e cila ka pasur një skemë të tillë.

    “Komisioni ka një shqetësim të përgjithshëm për versionet e ndryshme të skemave të dhënies së shtetësisë, siç është procedura e thjeshtëzuar për dhënien e shtetësisë pas një periudhe të shkurtër qëndrimi. Kjo mund të paraqesë rrezik publik dhe të sigurisë për BE-në, pasi Serbia gëzon lëvizje pa viza në BE. Komisioni do t’i monitorojë politikat e tilla të natyralizimit dhe dhënies së shtetësisë nga ana e shteteve që kanë liberalizim vizash në kuadër të mekanizmave për suspendimin e vizave”, i ka thënë Radios Evropa e Lirë një zëdhënës i Komisionit Evropian.

    Ai, po ashtu, ka theksuar se politika e vizave e vendeve fqinje ka një ndikim të madh në lëvizjen e imigrantëve drejt Bashkimit Evropian.

    “Në rastin e Serbisë, përshtatja me regjimin e vizave të BE-së është e rëndësishme për të vazhduar përmbushjen e kritereve për liberalizim vizash. Serbia ka bërë një hap të rëndësishëm në përshtatjen e regjimit të saj të vizave me atë të BE-së. Komisioni inkurajon Serbinë që t’i vazhdojë përpjekjet në këtë drejtim për të pasur një përshtatje të plotë”, ka thënë Komisioni Evropian.

    Edhe më herët nga qarqet diplomatike në BE janë dëgjuar Kritika ndaj Serbisë për heqjen e vizave për disa shtete të treta. Kryesisht kjo është bërë për shtetet, të cilat nuk e kanë njohur pavarësinë e Kosovës apo e kanë tërhequr një njohje të tillë. Disa shtete të BE-së kanë raportuar rritje të shpejtë të numrit të imigrantëve ilegalë dhe azilkërkuesve pikërisht nga këto shtete.

    Ndër vendet prej nga vijnë më së shumti migrantët janë përmendur Burundi, Kuba dhe Tunizia.

    Shtetas të këtyre vendeve kanë hyrë në Serbi pa viza dhe nga atje kanë kaluar në territorin e BE-së. Serbia është detyruar t’ua kthejë vizat këtyre shteteve sepse ishte kërcënuar se BE-ja do të suspendojë liberalizimin e vizave për Serbinë që është në fuqi që nga viti 2009.

    Por, vërejtje BE-ja u ka dërguar edhe disa vendeve të tjera të rajonit, përfshirë edhe Shqipërinë.

    Një shqetësim tjetër për BE-në është edhe skema e ashtuquajtur “pasaportat e arta” përmes së cilave disa vende të rajonit u japin shtetësi atyre që investojnë shuma të caktuara në këto vende. Skema të tilla kanë pasur edhe disa vende anëtare të bashkimit Evropian dhe Komisioni Evropian është shprehur se ato janë ilegale sipas ligjeve të BE-së. Prandaj Komisioni Evropian kërkon edhe nga vendet e rajonit që të përmbahen nga skema të tilla.

    “Komisioni vazhdimisht u ka rekomanduar partnerëve nga rajoni i Ballkanit Perëndimor që t’i japin fund, apo të përmbahen nga vendosja e skemave ‘shtetësi për investitorët’, që njihet me termin ‘pasaportat e arta’, pasi ato paraqesin një varg rreziqesh për rendin publik dhe sigurinë e BE-së. Në veçanti këto skema u mundësojnë qytetarëve të vendeve të treta që të marrin shtetësinë e një vendi që gëzon liberalizimin e vizave dhe në këtë mënyrë të fitojnë mundësinë për lëvizje pa viza në BE”, ka thënë një zëdhënësi i Komisionit Evropian.

    Disa diplomatë të vendeve të BE-së i kanë thënë Radios Evropa e Lirë se liberalizimi i vizave është bërë për t’u ndihmuar qytetarëve nga rajoni i Ballkanit Perëndimor për të udhëtuar në vendet e BE-së, e jo për të mundësuar keqpërdorime me qëllime politike apo financiare për qeveritë e vendeve të rajonit.

    “Duhet të punojmë së bashku që të evitojmë shndërrimin e rajonit të Ballkanit Perëndimor në një derë për hyrje ilegale në BE”, ka thënë një zyrtar i BE-së.

    Komisioni Evropian vazhdimisht monitoron zbatimin e kritereve për liberalizim e vizave nga ana e vendeve të rajonit.

    Përshtatja me regjimin e vizave të BE-së është një prej kushteve, në të cilat Brukseli insiston gjithnjë e më shumë. Në rast të refuzimit të vendeve të rajonit për t’i përmbushur kriteret, edhe pasi të ndodhë liberalizimi, BE-ja mban të drejtën për të suspenduar liberalizimin e vizave.

    Deri tash nuk ka ndodhur një gjë e tillë, por në BE thonë se vendet e rajonit nuk do të duhej të rrezikonin me heqjen e liberalizimin për qytetarët e tyre për përfitime politike apo financiare.