Katër shtetas të Kosovës janë plagosur të martën në plazhin e Dhërmisë në Shqipëri, për shkak të shpërthimit të një motoskafi në det.
Policia e Shtetit ka thënë se dyshon se për shkak të vakumit dhe nxehtësisë ka shpërthyer bidoni me 28 litra benzinë në mjet.
Sipas autoriteteve, djegie kanë pësuar katër kosovarët dhe drejtuesi i motoskafit.
Të plagosurit nga Kosova janë tre djem të moshës 24 vjeç, dhe një vajzë 21 vjeçe, ndërsa drejtuesi i motoskafit është 32 vjeç, banor i Vlorës, qytet tjetër në Shqipëri.
Ata tashmë e kanë marrë ndihmën e parë mjekësore dhe është thënë të jenë lëshuar nga spitali.
Për këtë incident është krijuar një grup hetimor, me qëllim të zbulimit të shkakut të zjarrit.
Asamblisti i Lëvizjes Vetëvendosje në Kuvendin e Kryeqytetit, Besnik Mujeci, është një nga pesë të arrestuarit në flagrancë, në një aksion anti-drogë në Tiranë, që rezultoi me sekuestrimin e 5 kg lëndë narkotike ekstazi.
Për trafikim dhe shpërndarje droge, Policia e Shqipërisë prangosi edhe Mit’hat Ramadanin nga Prishtina, si dhe Kalem Picarin, Ambra Myftarin dhe Daniel Avdiajn, të tre nga Tirana.
“Shtetasit e arrestuar janë lokalizuar në kryqëzimin e rrugës “Myslym Shyri” dhe “Sami Frashëri”, së bashku me dërgesën me lëndë të dyshuar narkotike, prej 11300 tabletash ekstazi MDMA, me peshë 5.093 kg dhe vlerë tregu rreth 400 mijë euro”, tha drejtori i Policisë në Tiranë, Tonin Vocaj.
Rezultatet e hetimeve të Policisë tregojnë se të arrestuarit, duke shfrytëzuar fluksin turistik, bënin dërgesa të drogës nëpërmjet linjave të autobusëve Prishtinë-Tiranë, që më pas shpërndaheshin në qytete tjera të Shqipërisë me vetura të marra me qira.
“Tabletat e ekstazisë MDMA, së bashku me një sasi lënde narkotike kanabis, një automjet, si dhe 5 aparate celulare, u sekuestruan në cilësinë e provës materiale”, tha Vocaj.
Asamblisti i Lëvizjes Vetëvendosje, Besnik Mujeci, është edhe aksionar komunal në ndërmarrjen publike lokale “Stacioni i Autobusëve” në Prishtinë, nga 8 Qershori kur u emërua nga Kuvendi i Kryeqytetit.
Më 2021 ai fitoi mandatin e dytë në Kuvendin komunal.
Të martën, Lëvizja Vetëvendosje inicioi procedurë disiplinore ndaj Mujecit.
I arrestuari tjetër nga Kosova, Mit’hat Ramadani, është reper lokal në kryeqytet – i njohur ndryshe si DesPoti. /atvlive.tv
Edicionin Qendror të lajmeve në ATV e gjeni në videon më poshtë:
Largimi nga Kosova nuk është i lehtë për mërgimtarët që qëndruan në Kosovë për pushime. Kjo jo vetëm nga malli për atdheun, por edhe nga pritjet e gjata posaçërisht në pikë-kalimin kufitar në Merdare.
Pritjet në kolona për të dalë nga Kosova përmes pikë kalimin kufitar në Merdare, zgjasin deri në rreth katër orë, kurse rreshti i kolonës është rreth një kilometër i gjatë.
Alban Dautaj i cili po udhëton bashkë me fëmijë të vegjël, nuk është fare i kënaqur me kapacitetet operuese që momentalisht ofron pika kufitare në Merdare.
“Faktikisht vetëm një sportel po punon, duhet që kur vijmë ne mërgimtarët të jenë funksionale edhe sportelet e tjera. Për vete se kam problem, por, jemi me fëmijë”, tha Dautaj.
E për mërgimtarë të tjerë pritja nuk është fare problem.
“Kur shkon në vendlindje ja vlen edhe të presësh…ka pasur raste kur kemi pritur edhe nga tetë orë në pika të tjera kufitare”, tha Sefi Morina, mërgimtar.
“Jo nuk jemi mërzitur. Jemi kënaq kemi qesh, kemi bërë muhabet dhe kemi dëgjuar muzikë”, tha Ledion Cakaj, mërgimtar.
Ndërkaq, pos Merdares kolona relativisht të gjata pati edhe në Mutivodë dhe Dheu i Bardhë.
Ndërkohë policia e Kosovës Për shkak të pritjeve të gjata në Merdar, nëpërmjet një njoftimi ka kërkuar nga bashkatdhetarët që të shfrytëzojnë edhe pikat e tjera me Serbinë siç janë Muqibab, Jarinje, Bernjak dhe Mutivodë në të cilat pika ka më pak pritje e ndërsa në orët e mbrëmjes nuk ka pritje fare në të shumtën e rasteve. /atvlive.tv
Edicionin Qendror të lajmeve në ATV e gjeni në videon më poshtë:
Rreth 100 punonjës të Policisë së Kosovës përgjatë orarit të punës këtë të martë kanë protestuar.
Tash e një kohë punëtorët e Flotës Operative dhe ata të Departamentit Mbështetës Operativ janë të pakënaqur me pagat respektivisht me mosrregullimin e vlerës së koeficienteve sipas pozitave.
Derisa ende nuk ka reagim nga ekzekutivi të punësuarit në polici paralajmëruan se do të vazhdojnë të protestojnë deri në realizim të kërkesave.
“Nuk janë vetëm këta, janë shumica e punonjësve të policisë. Unë e kam paralajmëruar ekzekutivin për protest por deri më tani nuk ka ndonjë reagim. Me protestë nënkuptohet edhe bojkot i punës”, tha kryetari i Sindikatës së Policisë së Kosovës, Imer Zeqiri.
Përveç tyre pakënaqësi kanë pothuajse të gjithë punonjësit e Policisë.
Sipas njohësve të sigurisë kushtet e punës e pagat po e ulin edhe motivin për punë e krejt këto mund të ndikojnë edhe në siguri.
“ministri i punëve të brendshme është më së miri të jap dorëheqje. Shkak i politikave të kësaj qeverie do të ketë edhe ndikim në sigurinë e vendit. Motivi për punë është zero”, tha Drizan Shala, njohës i sigurisë.
Ligji për pagat ka hyrë në fuqi më shumë se 6 muaj më parë ndërsa që nga ajo kohë pjesëtarët e policisë nuk kanë marrë as shtesat për rrezikshmëri.
Ndërkohë që nga fillimi i vitit deri më tani sipas Sindikatës jo më pak se 50 zyrtarë e staf civilë kanë dhënë dorëheqje vullnetare. /atvlive.tv
Edicionin Qendror të lajmeve në ATV e gjeni në videon më poshtë:
Informacionet e publikuara në media rreth dyshimeve për keqpërdorime me rezervat shtetërore të mallrave, nga Ministria e Industrisë dhe Tregtisë, është duke i trajtuar Prokuroria Speciale e Kosovës, një nga prokuroritë më të rëndësishme, juridiksioni i së cilës shtrihet në tërë territorin e vendit.
Por burime të ATV, i kanë thënë televizionit se ende janë duke grumbulluar prova, e informacione, dhe deri këtë të martë nuk ka një vendim për nisjen e hetimeve, të cilat nuk përjashtohen.
Sipas juristëve organi i akuzës fillimisht duhet të bëjë mbledhjen e provave, e pastaj të vendos nëse ka bazë për nisjen e hetimeve. Sipas tyre nëse vërtetohen dyshimet e raportuara duhet të ketë hetime për ndërmarrjen e veprimeve që janë në kundërshtim me ligjin për rezervat shtetërore të mallrave.
Sipas një incizimi të publikuar, vaji i porositur nga Polonia nuk kishte ardhur edhe pse për të ishin paguar qindra mijëra euro, ndërsa në një tjetër ngritën dyshimet që një sasi e grurit në sasi prej 9 ton grurë nuk ishte transportuar, dhe për presionet për të nënshkruar pranimin e grurit.
Ndërsa Ministria ka mohuar raportimet se kishte pasur manipulime gjatë procesit të furnizimit me rezervat shtetërore, duke thënë se janë ndjekur të gjitha procedurat ligjore. Përmes një reagimi në Facebook, kishte thënë se audio incizimet e publikuara janë tendencioze më qëllim denigrimin e figurës së ministres Rozeta Hajdari, e cila disa ditë më pas edhe dorëzoi padi për shpifje ndaj gazetës Nacionale. /atvlive.tv
Edicionin Qendror të lajmeve në ATV e gjeni në videon më poshtë:
Vizita e kryeministrit Albin Kurti, në Maqedoni të Veriut, ngjalli reagime të shumta.
Madje, presidenti maqedonas, Stevo Pendarovski, bëri thirrje që organizatorët e dy ngjarjeve në Çair dhe Tetovë, të sanksionohen. Mirëpo, presidentja Vjosa Osmani, mendon që vizita e kryeministrit kosovar është keqkuptuar.
“Kjo besoj që është një keqkuptim i vogël, që kur kemi vullnet të dyja palët, siç e kemi dëshmuar gjithnjë, tejkalohet, duke e ditur që të gjitha institucionet e Kosovës janë të interesuara vetëm për relacione pozitive gjithnjë në rritje me Maqedoninë e Veriut”, tha Osmani.
Presidentja foli edhe për masat ndëshkuese të Bashkimit Evropian ndaj Kosovës, që vazhdojnë të mbesin në fuqi, pavarësisht që sipas Osmanit, pala kosovare e ka respektuar marrëveshjen e Bratislavës plotësisht.
“Nuk është përgjigje që nxitë bashkëpunimin dhe koordinimin , përkundrazi është përgjigje e cila më së shumti i bën dëm procesit të dialogut që e qet komplet jashtë binarëve ku të dyja palët do të duhej të trajtoheshin në mënyrë të barabartë. Serbia ka pasur njerëz të saj që kanë sulmuar ushtarët e NATOS-. Për këta njerëz ka dëshmi të sakta. Ata njerëz janë në video, dihet kush janë, disa prej tyre janë policë të Serbisë dhe nuk ka asnjë masë të vetme në raport me Serbinë”, tha Osmani.
Teksa përmendi faktin se institucionet përkatëse po punojnë për të krijuar bazën ligjore për mbajtjen e zgjedhjeve të jashtëzakonshme, presidentja beson se serbët e veriut dëshirojnë të shfrytëzojnë të drejtën për të votuar.
“Unë jam e bindur që qytetarët dëshirojnë ta shfrytëzojnë këtë të drejtë, dhe për këtë jam e bindur nga komunikimet që kemi çdo ditë. Ata dëshirojnë të shfrytëzojnë këtë të drejtë, në mënyrë që të kenë zgjedhje të jashtëzakonshme dhe të zgjedhin kryetarët e komunave që e marrin votën e qytetarëve në zgjedhje të lira e demokratike. Mirëpo, deri më tani, unë nuk shoh ndonjë vullnet nga presidenti Vuçiq, që të ndërpresë agresionin institucional që vazhdimisht e kryen në raport me fqinjët”, tha Osmani.
Këto qëndrime, presidentja Vjosa Osmani i shpalosi gjatë një konference të përbashkët me kryetarin e komunës së Dragashit, Bexhet Xheladini. /atvlive.tv
Edicionin Qendror të lajmeve në ATV e gjeni në videon më poshtë:
Me mistri e fshesa të vogla, arritën të zbulojnë një mbishkrim të rëndësishëm historik. Arkeologët që punuan në parkun arkeologjik të Ulpianës, zbuluan një mbishkrim romak që daton nga shekulli i 6-të.
Mbishkrim monumental i është dedikuar Theodores, bashkëshortes së Perandorit romak, Justinian i qytetit Justiniana Secunda, ndryshe dëshmi e rrallë e lidhjes së tij me Dardaninë, vendin e tij të origjinës.
“Kemi identifikua një kishe një bazilikë të përmasave të mëdha që është e përmasave te katedrales Nënë Tereza, kemi zbulua mbishkrim që ka rëndësi të madhe historike, është mbishkrim që tregon që ishte perandori Justinian ai që kishte marr vendimin për me u ndërtua qyteti. Me këtë rast pra kanë ndërtua edhe kisha, në këtë mbishkrim qyteti përmendet si Dardani, që tregon që dardanët në mesjetë kanë dalë si një etnitet i konsilidum dhe është agrumet që tregon se dardanët nuk janë romanizuar dhe kanë ruajtur identitetin e tyre ky mbishkrim, është agrumet më rëndësishëm që e vërteton atë”, tha arkeologu, Arben Hajdari.
Christoph Goddard, udhëheqës i gërmimeve, tha se në asnjërën prej gërmimeve që ka bërë deri më sot nuk ka hasur në gjetje kaq të veçantë.
“Për mua dhe për kolegët e mi ky zbulim, ka një kuptim të veçantë dhe një jetëgjatësi. Ne kemi gërmuar edhe në Pompei dhe në Romë, por kurrë nuk e kemi bërë një zbulim të tillë. Çfarë është më e çuditshmja është fakti që mbishkrimin e të madhit Justinian dhe gruas së tijë Theodores, e gjetëm në një ndërtim kaq të madh. Plani jonë nuk është që të mbajmë të fshehtë ndonjë gjë, por të bëjmë publike çdo gjë, derisa ne ende do të vazhdojmë me gërmime”, tha Christoph Goddard, udhëheqës i gërmimeve.
Edhe për arkeologen, Tringa Berbatovci, zbulimi i një mozaiku të tillë është fakt që dëshmon antikitetin e vonë në Kosovë.
“Kisha fatin me qenë pjesë e këtyre gërmimeve, ky mozaik tregon shumë, kjo tregon edhe një fakt tjetër sjellë një dritë ku dëshmon antikitetin e vonë në Kosovë, që qyteti i Dardanisë vazhdon të përmendet edhe në kohën e Justiniatit në shekullin e pestë”, tha Tringa Berbatovci, arkeologe.
Pas zbulimit të madh arkeologët janë pritur të martën nga kryeministri, Albin Kurti, i cili i falënderoi për punën.
Për zbulimin e këtij mozaiku në Ulpianë reagime ka pasur edhe nga personalitetet të tjera. Presidentja, Vjosa Osmani përmes një postimi në rrjete sociale tha se “Ulpiana është udhëtim nëpër kohë që zbulon thesaret e fshehura të së kaluarës sonë”.
Ndërkaq, ministri i Kulturës, Hajrullah Ceku i cili tha se mbishkrimi dëshmon afërsinë e perandorit ndaj provincës së origjinës. /atvlive.tv
Edicionin Qendror të lajmeve në ATV e gjeni në videon më poshtë:
Pavarësisht përpjekjeve, Policia nuk kishte mundur ta arrestonte Tush Frrokun, të dyshuarin për vrasjen e Anton Prelës në Klinë.
Për gjetjen e tij, punë nuk kreu as droni i Prokurorisë, derisa Frroku, gjatë ditës është dorëzuar në stacionin e Policisë në Pejë.
“Tush Frroku gjendet ne Stacion Policor, ku me urdhër te prokurorit te shtetit do ndalohet fillimisht për 48 orë dhe brenda afati ligjor ndaj tij do parashtrohet kërkesa për caktimin e masës se paraburgimit”, ka njoftuar Shkodran Nikçi, zëdhënës i Prokurorisë në Pejë.
Ndërkohë, përpjekjet e policisë nuk kanë rezultuar të suksesshme në gjetjen e autorit të vrasjes së 39 vjecarit në një kafene të Prishtinës para 11 ditësh, e as për atë të vrasjes në Runik të Skenderajt.
Pavarësisht se dy vrasjet u kryen në hapësira publike e në sy të shumë dëshmitarëve, autorët janë ende në arrati.
Sipas njohësve të drejtësisë, duhet të bëhet më shumë për arrestimin e tyre.
“Organet e drejtësisë, në rastin konkret Policia, duhet që me intensitetin më të madh t’i kryejnë hetimet, në mënyrë që autorët të sillen para drejtëisë. Cdo moment që kalon, ofron pasiguri për qytetarët tjerë”, tha Lavdim Makshana nga Instituti i Kosovës për Drejtësi.
Në rast se autorët kanë arritur të largohen nga Kosova, tentimi për arrestimin e tyre vështirësohet edhe më shumë.
“Ndodh që vendet që nuk kanë bashkë punim me Kosovën, edhe nëse e arrestojnë, refuzojnë ta esktratojnë meqë kosova nuk është pjesë e Interpolit…”, tha Makshana.
I dyshuari për vrasjen në Klinë, Tush Frroku ishte dënuar me 11 muaj burgim për tri vepra penale “vjedhje e rëndë”, ndërsa në vitin 2012, ishte akuzuar për armëmbajtje pa leje. /atvlive.tv
Edicionin Qendror të lajmeve në ATV e gjeni në videon më poshtë:
Stadiumi i qytetit në Gjilan, tash e gjashtë vite shfrytëzohet vetëm nga fëmijët, derisa klubet si Drita e Gjilani detyrohen të luajnë në fusha ndihmëse.
Sot ekipi i ATV-së ishte në këtë stadium, ku gjendja infrastrukturore ishte e mjerueshme, sa që në disa pjesë të stadiumit, ujërat e zeza kundërmonin jashtë zakonisht shumë.
Ndërsa sot ata që e vuajnë më së shumti për një stadium janë tifozët e futbollit.
Ekipi ynë ka tentuar që të marrë edhe një prononcim nga kryetari i komunës, Alban Hyseni si dhe nga Drejtoria e Kulturës rinisë dhe sportit në Gjilan, megjithatë nuk ishin të gatshëm të flasin për këtë çështje.
Kur jemi te i pari i Gjilanit, ai në vitin 2021, kishte deklaruar që stadiumi do të rregullohet.
“Sot u zhvillua derbi lokal në Superligën e Kosovës ndërmjet Gjilanit dhe Dritës. Loja e bukur në fushë dhe atmosfera në tribuna e bën këtë derbi më të veçantë. Në një stadium si ky, pa plotësimin e asnjë kushti, nuk do të zhvillohet më një derbi i këtij niveli. Intelektualët dhe Skifterat do ta kenë shtëpinë e tyre me standarde të FIFA-s dhe UEFA-s”, kishte shkruar Hyseni.
Megjithatë deri sot nuk është bërë pothuajse asgjë.
Kujtojmë që deri me tani për stadiumin e qyteti janë shpenzuar mbi 20 milionë euro, por punë nuk është bërë aspak.
Për dallim nga kryetari i komunës dhe drejtuesit e klubeve të cilët nuk u prononcuan tifozi i Dirtës Zenun Jurliu nuk ngurroi të flas.
Përndryshe se gjendja e sportit në Gjilan lë shumë për të dëshiruar tregon edhe rasti i fundit, kur Klubi me traditë SC Gjilani tashmë ka mbetur pa donator dhe rrezikon shuarjen.
Tush Frroku, i dyshuar për vrasjen e Anton Prelës më 7 gusht në Klinë është dorëzuar në Polici.
Këtë për Express e ka konfirmuar zëdhënësi i Prokurorisë Themelore në Pejë, Shkodran Nikçi.
“Tush Frroku gjendet ne Stacion Policor, ku me urdher te prokurorit te shtetit do ndalohet fillimisht per 48 ore dhe brenda afati ligjor ndaj tij do parashtohet kerkesa per cakitimin e mases se paraburgimit”, tha ai.
Frroku dhe Prela ishin familljarë mes vete.
“Viktima ishte i martuar me motren e të akuzuarit. Ndërsa edhe ky i fundit, ishte i martuar me motrën e viktimës”, kishte thënë Nikçi disa ditë më parë për Express.
