Author: ATVLive

Kryetari i Aleancës për Ardhmërinë e Kosovës (AAK), Ramush Haradinaj, ka thënë se faktet që po zbardhen dëshmojnë për implikimin e thellë të Serbisë në organizimin e akteve terroriste në veri.

Haradinaj përmes një postimi në Facebook ka thënë se shtimi i numrit të pjesëtarëve të KFOR-it, dëshmon vendosmërinë e NATO-s se terrorizmi nuk kalon.

“Shtimi i numrit të pjesëtarëve të KFOR-it, brenda mandatit që ka, dëshmon vendosmërinë e NATO-s se terrorizmi nuk kalon. Paqja në Kosovë e në Ballkan është vendosur me shumë dhimbje e tragjedi dhe prandaj nuk do të lejojmë askënd që ta rrezikojë atë”, ka thënë Haradinaj.

Ai ka shtuar se Kosova qëndron në mbështetje të të drejtave të të gjitha komuniteteve.

“Si Kosovë qëndrojmë fuqishëm në mbështetje të të drejtave politike të të gjitha komuniteteve, edhe të komunitetit serb, kjo në bazë të Kushtetutës, ligjeve të Kosovës dhe në bazë të planit Franko- Gjerman të përkrahur nga Amerika”, është shprehur Haradinaj.

Haradinaj ka ripërsëritur kërkesën për hetim ndërkombëtar.

“Faktet që po zbardhen përditë dëshmojnë për implikimin e thellë të Serbisë në organizimin e akteve terroriste në veri dhe shteti i Serbisë nuk mund t’i ikë përgjegjësisë. Prandaj kërkohet një hetim ndërkombëtar për të zbardhur skenarët e destabilizimit, jo vetëm të Kosovës por edhe të Ballkanit dhe për te nxjerrë para drejtësisë të gjithë ata që kanë qenë të përfshirë në këto sulme terroriste”, ka përfunduar Haradinaj.

Kryeministri i Shqipërisë, Edi Rama po zhvillon sot një vizitë zyrtare në Kroaci.

Rama u prit në Zagreb me ceremoni zyrtare nga kryeministri i Kroacisë, Andrej Plenkoviq.

Kryeministri Rama ka publikuar pamje në Facebook nga pritja zyrtare, ku u interpretuan fillimisht himnet e të dy vendeve, teksa më pas kryeministrat prezantuan dy delegacionet që i shoqëronin.

Shefi i ekzekutivit nga Shqipëria shoqërohet në këtë vizitë nga ministri i Financave dhe Ekonomisë, Ervin Mete dhe ministrja e Shëndetësisë dhe Mbrojtjes Sociale, Albana Koçiu.

Përfundon takimi i Kurtit me kryetarë të komunave, shqyrtohen e kërkesat e tyre

Ka përfunduar takimi i përbashkët mes kryeministrit, Albin Kurti dhe kryetarëve të komunave në vend.

Pas këtij takimi, ministri i Administrimit të Pushtetit Lokal, Elbert Krasniqi theksoi se kanë diskutuar tema të ndryshme me kryetarët e komunave, përfshirë edhe kërkesat e shqetësimet e tyre që kanë.

Sa i përket mospjesëmarrjes së kryetarit te Leposaviqit në këtë takim, Krasniqi tha se kanë koordinim të rregullt, porse nuk ka dhënë detaje tjera.

Ministri për Komunitete dhe Kthim në Qeverinë e Kosovës Nenad Rashiq, ka deklaruar se ai dhe familje e tij ndjehen më të sigurtë në Kosovë sesa në Serbi.

Ai e ka cituar edhe politikanin serb Oliver Ivanoviq i cili u vra në veriun e Mitrovicës më 6 janar 2018.

Ivanoviq kishte thënë se “Serbët në veri të Kosovës nuk e kanë asnjë problem me shqiptarët. Ata kanë problem me Listën Serbe dhe me qeverinë në Beograd.

“Unë si serb dhe familja ime serbe ndihem më i sigurt në Kosovë sesa në Serbi”, tha Rashiq për portalin boshnjak Istraga.ba.

Këto deklarime të Rashiqit, vijnë një javë pasi në fshatin Banjskë të Zveçanit, u krye sulm terrorist mbi policinë e Kosovës.

Në orët e para të 24 shtatorit, u vra rreshteri Afrim Bunjaku.

Serbia ka ta mbulojë ndërtimin e një baze ushtarake në afërsi të kufirit me Kosovës, kinse është ndërtesë për trajtimin e mineraleve në atë pjesë, por pamjet nga droni kanë konfirmuar burimin se bëhet fjalë për ndërtimin e zonës ushtarake.

Deputetja e PDK-së, Ganimete Musliu tha se e vetmja pikë ishte informimi për ngjarjet që kanë ndodhur më 24 shtator dhe më pas në veri

“Dua të theksoj me bindje të plotë se AKI, bashkë me forcat e Policisë së Kosovës kanë qenë në krye të detyrës gjatë gjithë kohës dhe në kohë reale iu janë përgjigjur çdo provokimi të situatës në veri, prandaj dua t’i falënderoj për punën dhe angazhimin e tyre që kanë bërë në terren dhe me këtë rast t’i ofroj mbështetjen e time të plot si kryetare e komisionit dhe të gjithë komisionit parlamentar”, tha ajo duke shtuar se janë të gjithë unik kur bëhet fjalë për sigurinë e Kosovës dhe në asnjë rrethanë mos ta dëmtojnë punën e tyre në terren.

“E kemi të qartë se grupi terroristë i mbështetur nga shteti serb kishte pretendime territoriale përmes veprimeve hibride, agresive dhe sabotuese. Po ashtu, kishte për pretendim mbajtjen e situatën nën tension të vazhdueshëm të ndërlidhur me interesat serbo-ruse në rajon dhe të krijonte destabilitet. Gjithashtu, qëllim kishte edhe dëmtimin e imazhit të Kosovës në arenën ndërkombëtarë përmes dezinformatave dhe propagandës që e bën në vazhdimësi. Anëtarët e AKI-së edhe një herë e kanë dëshmuar profesionalizmin e tyre. Prandaj në bazë të dhënave dhe fakteve të prezantuara grupi terroristë është nisur në mesnate duke shfrytëzuar rrugët ilegale në afërsi të pikës kufitare Izvor, e cila është pika më e afërt me qytetin e Novi Pazarit në Serbi dhe pika më e afërt me vijën kufitare në Banjskë në Komuna e Zveçanit në Kosovë”, tha ajo.

Musliu dha detaje edhe për rritjet e pranisë së ushtrisë serbe në kufirin me Kosovën.

“Nga pamjet e siguruara me dronë të datës 27.09 është arritur të konfirmohet informata se në zonën e njohur si Rogazin, në afërsi të Izvorit, është duke u ndërtuar një bazë ushtarake e forcave të armatosura serbe me mbules nga ana serbe kinse në atë pjesë po bëhet trajtimi i mineraleve të zonës, por pamjet me dronë e kanë konfirmuar burimet dhe tashmë është e qartë se atje është duke u bërë një zonë ushtarake serbe, pra në afërsi të kufirit me Kosovën…ajo çka vlen të theksohet është se gjendja e sigurisë në vend është e brishtë dhe e tensionuar, prandaj secilit prej neve na mbetet që të jemi të kujdesshëm ndaj çdo provokimi të mundshëm“, tha ajo.

Sipas saj, shteti i Kosovës ka qenë i koordinuar me partnerët ndërkombëtar në të gjitha veprimet që ka ndërmarrë gjatë këtyre ditëve në veri.

Kryetarja e Komisionit për Mbikëqyrjen e AKI-së, Ganimete Musliu, ka deklaruar se në takim me drejtorin e Agjencisë së Kosovës për Inteligjencë Petrit Ajeti, është biseduar siguria në vend pas sulmeve terroriste në Banjskë, raporton Ekonomia Online.

Sipas Musliut, siguria e vendit do të jetë mbi interesat partiake, duke shtuar se AKI-ja së bashku me forcat e rendit kanë qenë në krye të detyrës në mbrojte të vendit.

“Dua të theksoj me bindje të plotë se AKI së bashku me forcat e rendit në krye të detyrës në mbrojte të vendit. E kam potencuar se siguria e vendit është mbi interesat partiake. Kishte pretendim të mbajtjes së tensioneve dhe të krijonte tensione në Kosovë”, tha Musliu.

“Anëtarët e AKI e kanë dëshmuar profesionalizmin dhe në bazë të fakteve që janë paraqitur, grupet terroriste kanë hyrë përmes rrugëve ilegale”.

Musliu para mediave konfirmoi se Serbia është duke ndërtuar një bazë ushtarake në afërsi me kufirin e Kosovës.

“Janë vërejtur ushtri në kufi, është konfirmuar se në zonën e njohur e Izovorit, po ndërtohet një bazë ushtarake. Por, kjo po ndërtohet në afërsi me kufirin me Kosovën. Pamjet me dronë kanë konfirmuar këtë. Gjendja e sigurisë është e brishtë dhe e tensionuar, duhet të jemi të kujdesshëm ndaj çdo provokimi të mundshëm”.

Poseduesit e pasaportave të Kosovës duke filluar nga 1 janari 2024 do të mund të udhëtojnë drejt Zonës Shengen pa viza për qëndrime afatshkurtër.

Ky është lajmi që tani më është publikuar edhe nga faqja e ambasadës gjermane në Kosovë.

Ndër të tjera janë dhënë edhe detaje të qëndrimit dhe shtetet që mund të vizitoni pa viza nga 1 janari kur fillon zyrtarisht liberalizimi i vizave për Kosovën.

Njoftimi i plotë:

“Poseduesit e pasaportave të Kosovës duke filluar nga 1 janari 2024 do të mund të udhëtojnë drejt Zonës Shengen pa viza për qëndrime afatshkurtëra.

Udhëtimi pa viza ju mundëson të udhëtoni pa vizë për qëndrime të shkurtra, për shembull, si turist, për të vizituar miqtë ose familjen, për të marrë pjesë në ngjarje kulturore ose sportive, takime afariste, trajtim mjekësor, për programe arsimore afatshkurtra si seminare, konferenca, punëtori, shkolla verore dhe çdo aktivitet të ngjashëm.

Ju mund të qëndroni deri në 90 ditë në çdo periudhë 180-ditore brenda zonës Shengen. Nëse udhëtoni disa herë, duhet të llogaritni me kujdes numrin e ditëve të qëndrimit tuaj, pasi periudha e përgjithshme e qëndrimit nuk duhet të tejkalojë totalin prej 90 ditësh brenda periudhës 180 ditore. Periudha e qëndrimit llogaritet nga data e parë e hyrjes në çdo zonë Shengen.

Me një pasaportë biometrike të vlefshme të Kosovës mund të udhëtoni pa viza në vendet e mëposhtme të BE-së: Austri, Belgjikë, Bullgari, Kroaci, Qipro, Republikën Çeke, Danimarkë, Estoni, Finlandë, Francë, Gjermani, Greqi, Hungari, Itali, Letoni, Lituani , Luksemburg, Maltë, Holandë, Poloni, Portugali, Rumani, Sllovaki, Slloveni dhe Suedi. Gjithashtu mund të udhëtoni në vendet e Shengenit: Zvicër, Norvegji, Lihtenstein dhe Islandë. Ju nuk mund të udhëtoni në Spanjë.

Duhet të keni gjithmonë informacion për qëllimin e vizitës suaj, vendin e akomodimit/ku do të qëndroni gjatë vizitës, biletat kthyese, dëshmitë e mjeteve të mjaftueshme financiare për të mbuluar qëndrimin (para dhe/ose kartë krediti). Rekomandohet fuqimisht të keni një sigurim udhëtimi. Nëse synoni të qëndroni me të afërmit ose miqtë tuaj të familjes, duhet të keni adresën e saktë dhe numrat e telefonit të tyre. Zyrtarët kufitarë mund të kërkojnë dokumente mbështetëse që arsyetojnë qëllimin dhe kushtet e qëndrimit të synuar.
Udhëtimi pa viza nuk ju mundëson të punoni në Zonën Shengen. Nëse synoni të punoni në një nga vendet e BE-së, duhet të aplikoni për vizë pune të kategorisë D në shërbimin përkatës të konsulatës së këtij vendi të BE-së.

Udhëtimi pa viza nuk synohet për studime që kalojnë 90 ditë në Zonën Shengen brenda një periudhe prej 180 ditësh. Për studime më afatgjata, duhet të aplikoni për vizë studentore dhe rregullat për këtë ndryshojnë nga vendi në vend.

Kur arsyetohet siç duhet, udhëtimi pa viza ju mundëson të kërkoni trajtim mjekësor për sa kohë që ky qëndrim është brenda kufijve të 90 ditëve maksimale. Në këtë rast, ju duhet të keni një dëshmi (dokument zyrtar) të pranimit të institucionit mjekësor dhe dëshmi për trajtimin tuaj shëndetësor të planifikuar ose ekzaminimet mjekësore.

Heqja e vizave nuk jep një të drejtë të pakushtëzuar hyrjeje dhe qëndrimi. Shtetet anëtare kanë të drejtë të refuzojnë hyrjen dhe qëndrimin në territoret e tyre, nëse nuk plotësohen një ose më shumë nga kushtet e hyrjes, si p.sh.

Posedimi i një pasaporte biometrike të vlefshme (e vlefshme për të paktën tre muaj pas datës së synuar të nisjes nga zona Shengen),

Arsyetimi i qëllimit dhe kushteve të qëndrimit të synuar, duke pasur mjete të mjaftueshme financiare, si për kohëzgjatjen e qëndrimit të synuar ashtu edhe për kthimin;
Të mos jetë një person për të cilin është lëshuar një sinjalizim në Sistemin e Informacionit Shengen (SIS) për qëllime të refuzimit të hyrjes;

Të mos konsiderohet si kërcënim për politikën publike, sigurinë e brendshme, shëndetin publik ose marrëdhëniet ndërkombëtare të ndonjë prej shteteve anëtare.
Udhëtimi pa viza nuk ju jep të drejtën për të kërkuar azil në shtetet e BE-së, ose të Shengenit.

Keqpërdorimi mund të çojë në refuzimin e hyrjes në të ardhmen në raste të tilla si: qëndrimi përtej 90 ditësh në periudhë prej 180 ditësh, punësimi pa leje, nëse përbëni kërcënim për sigurinë publike ose përfshiheni në aktivitete kriminale. Keqpërdorimi dhe qëndrimi përtej periudhës së mund të çojnë në gjobë financiare dhe të rezultojnë në dëbim dhe ndalim të hyrjes në Zonën Shengen deri në 5 vjet” thuhet në njoftimin e Ambasadës Gjermane në Prishtinë.