Author: ATVLive

Përforcimi dhe përmirësimi i bashkëpunimit mes Gjykatës Kushtetuese, medias dhe shoqërisë civile është i rëndësishëm, u tha të premten në tryezën e diskutimit të organizuar nga USAID-i dhe Gjykata Kushtetuese. Derisa u potencua se Qeveria e Shteteve të Bashkuara të Amerikës po përpiqet që të japë pavarësi të drejtësisë dhe transparencës.

Drejtori i Zyrës për Demokraci dhe Qeverisje në USAID, Noel Bauer tha se fuqia e vendimmarrjes së Gjykatës Kushtetuese varet nga besimi që i jep qytetari, derisa shtoi se fitimi i këtij besimi kërkon transparencë, dialog, bashkëpunim dhe llogaridhënie.

“Qeveria e Shteteve të Bashkuara përmes USAID-it, byrosë për narkotikë dhe linjës ligjore ndërkombëtare përpiqet që të japë pavarësi të drejtësisë dhe transparencës dhe jemi shumë të lumtur që po e mbështesim këtë pjesën e Gjykatës Kushtetuese që ta organizojmë këtë tryezë të rrumbullakët. Diskutimet e ditës së sotme kanë të bëjnë me sigurimin që lihet në mes të komunikimit dhe gjykatës dhe qytetarëve, përfaqësuesve dhe shoqërisë civile të mbesin të hapura. Të gjithë e dimë se fuqia dhe permanenca e vendimmarrjes të kushtetueses varet plotësisht prej besimit që i jep qytetari prej gjykatës, dhe fitimi i këtij besimi kërkon transparencë, dialog, bashkëpunim dhe llogaridhënie. Kjo nënkupton që të gjithë në këtë sallë kanë një rol për të luajtur për të siguruar që ka drejtësi, dhe të gjithë kanë perspektivë valide në lidhje me atë se si duhet të administrohet kjo drejtësi”, tha Bauer.

Ndërkaq, kryetarja e Gjykatës Kushtetuese të Kosovës, Gresa Caka potencoi se në kuadër të këtij diskutimi do të lansojnë një video që ka për qëllim përforcimin e bashkëpunimit reciprok si dhe përmirësimin e gjykatës në komunikim me publikun.

“Të dy këto aktivitete ngërthejnë një qëllim më të madh, qëllimin e përforcimit të bashkëpunimit reciprok mes Gjykatës Kushtetuese dhe medias dhe shoqërisë civile në anën tjetër. Me një qëllim të dyfishtë, qëllimin e Gjykatës që në mënyrë të vazhdueshme të përmirësojë dhe avancojë mekanizmat e saj të komunikimit me publikun dhe së dyti që përmes bashkëpunimit me median dhe shoqërinë civile të kontribuojë rreth rritjes së kuptimit të vendimeve të Gjykatës Kushtetuese në publik, si pasoj edhe rritjen e besimit të publikut në institucionet publike”, tha Caka.

Tutje, Caka tha se detyra e gjyqtarit dhe institucionit përkatës përfshinë ushtrimin e diskrecionit të plotë, vetëpërmbajtjes dhe moderimit në komunikim me publikun.

“Ndërtimi i këtij raporti është delikat jo vetëm për Gjykatën Kushtetuese të Kosovës, por për të gjitha gjykatat kushtetuese tradicionalisht. Kjo sepse balanca delikate e ndërveprimit në mes Gjykatës Kushtetuese dhe medias posaçërisht është rezultat i një parimi jashtëzakonisht të rëndësishëm kushtetues, ligjor dhe etik i cili është parimi i vetëpërmbajtjes gjyqësore… Në parim, përfshirë sipas rekomandimeve të Këshillit konsultativ të gjyqtarëve evropian të Këshillit të Evropës, ky parim përfshinë detyrën e gjyqtarit përfshirë institucionin përkatës për të ushtruar diskrecion të plotë, vetëpërmbajtje dhe moderim në komunikim me publikun. Përfshirë në të përgjigjurit nga sulmet e mundshme nga forcat politike, gjithnjë në mbrojte të parimit të pavarësisë e autonomisë institucionale dhe autoritetit të institucionit”, potencoi Caka.

Kryetarja e Gjykatës Kushtetuese, Gresa Caka shtoi se trendet e fundit kanë lëvizje në favor të bashkëpunimin të institucioneve si rezultat i përdorimit më të madh të teknologjisë.

Ndërkaq, të pranishëm në këtë tryezë diskutimi ishin edhe përfaqësuesit e medias. /kp

Ministri i Jashtëm serb, Ivica Daçiq nuk ka marrë pjesë në foton familjare të Ministerialit të MEPJ-ve të Ballkanit Perëndimor dhe Bashkimit Evropian që po mbahet sot (6 tetor) në Pallatin e Brigadave në Tiranë.

RTSH, nga burimet diplomatike, mësoi se ish-zëdhënësi i Millosheviqit, aktualisht ministër i Jashtëm i Serbisë, Daçiq përpara se të kryhej fotoja familjare ka patur një takim bilateral me ministren e Jashtme, Annalena Baerbock pas takimit me të cilën duket se ai nuk doli të ishte prezent në foton familjare.

Ndërkohë pak më parë nisi dhe sesioni i dytë i Ministeriali i Ministrave të Punëve të Jashtme të BE dhe Ballkanit Perëndimor dhe rreth orës 12:30 pritet të mbahet dhe konferenca e përbashkët për shtyp mes Berbok, komisionerit për zgjerim i KE-së dhe ministrit të jashtëm shqiptar Igli Hasani.

Ministrja për Punët e Jashtme të Republikës Federale të Gjermanisë, Annalena Baerbock deklaroi sot (6 tetor) në Tiranë se tensionet e ditëve të fundit mes Serbisë dhe Kosovës po rrezikojnë edhe Procesin e Berlinit.

Baerbock i bëri këto deklarata në prononcimin për median në nisje të takimit të ministrave të Jashtëm të Procesit të Berlinit në Tiranë.

Ajo theksoi se “duhet të ecim drejt BE-së më shpejt dhe për këtë arsye Procesi i Berlinit është vendimtar lidhur me ndërlidhjen në rajon, bashkëpunimin dhe marrëveshjet e tjera mbi lëvizshmërinë”.

Megjithatë, sipas kryediplomates gjermane, në themel qëndron siguria.

“Prandaj, ne nëvizojmë se tensionet e ditëve të fundit mes Serbisë dhe Kosovës po rrezikojnë edhe Procesin e Berlinit. Unë i bëj një thirrje të fortë, së bashku me përfaqësuesit e Bashkimit Evropian, por dhe të SHBA-së, Serbisë e cila duhet të reduktojë forcat që kemi parë së fundmi. Por, edhe NATO nëpërmjet KFOR-it duhet të tregojë një angazhim më të madh në rajon”, theksoi Baerbock.

Kryediplomatja gjermane po merr pjesë në punimet e samitit të Ministrave të Jashtëm të vendeve të Procesit të Berlinit.

Ish-kryetari i Odës Ekonomike të Kosovës (OEK), Safet Gërxhaliu tha se dëmshpërblimi prej 20 milionë euro që Kosova do të detyrohet t’ia paguajë konsorciumit “Contour Global”, në bazë të vendimit të Gjykatës së Arbitrazhit Ndërkombëtar, është goditje e rëndë për ekonominë e vendit.

Gërxhaliu i tha Ekonomi Online se kundërshtimi i marrëveshjes për ndërtimin e Termocentralit kishte ngjyrime politike, dhe se ata që e kanë përgatitur këtë skenar kanë pritur se do të fitojnë më shumë. Sipas tij, kjo nuk është hera e parë që Kosova dëmtohet në këtë mënyrë nga veprime të papërgjegjshme të politikanëve.

Ai pohoi se po të realizohej projekti, Kosova jo vetëm që do të siguronte energji për vete, por edhe do të mund të eksportonte. Gërxhaliu thotë se edhe ato pak investime që kanë qenë ta parapara tash do të tkurren për shkak të kësaj gjobe, ngase do të rëndohet buxheti.

Madje shton se do të frikësohen dhe investitorët seriozë që të investojnë në Kosovë.

“Ky informacion nuk është befasi për mua ngase më kujtohet që në vitin 2020 kur ka ndodhur një kundërshtim i tillë, kam komentuar që ka pasur ngjyrë politike dhe kam thënë që do të adresohet drejtpërdrejt në Gjykatën e Arbitrazhit. Pritjet e atyre që e kanë përgatitur gjithë këtë skenar kanë qenë që do të fitojnë shumë më tepër… Kosova në këtë drejtim nuk dëmtohet vetëm në aspektin ekonomik po dëmtohet edhe në aspektin integrues, social mbi të gjitha në aspektin emocional”.

“Nuk është hera e parë, e dini çka ka ndodhur edhe me Telekomin. Ky është vetëm dëshmi e një katrahure që e ka kapluar Kosovën vitet e kaluara që shumë më tepër ka dominuar interesi i grupeve i partive politike sesa interesi i shtetit. Sot kur bota ballafaqohet me krizë energjetike, Kosova kishte pasur mundësi me eksportuar energji. Mirëpo ky është eksperimenti i quajtur Republika e Kosovës. Është koha për reagim është koha kur drejtësia ta thotë verdiktin e vet”.

“Definitivisht do të jetë një goditje për buxhetin e Kosovës, do të jetë goditje për ekonominë, për qytetarin. Në fund të fundit duhet të kuptojmë që buxheti i Kosovës nuk bëhet nga politikanë po bëhet nga bizneset dhe qytetarët dhe do të ketë tkurrje të investimeve. Vërtet kjo po e dëmton shumë Kosovë, shumë kompani në të ardhmen do të ketë paragjykim se çka mund të ndodh në Kosovë, dhe do të jetë vështirë që të priten investitorë serioz”.

Përderisa ministrja e Drejtësisë, Albulena Haxhiu, tha se vendimi do të kontestohet. Pas humbjes së arbitrazhit, Kosova do të detyrohet t’ia paguaj “Contour Globalit” mbi 20 milionë euro.

Kontrata me “Contour Global” ishte nënshkruar gjatë vitit 2017 për ndërtimin e termocentralit “Kosova e Re”, për të cilin planifikohej të ishte investimi më i madh i huaj në vlerë 1.3 miliard euro.