ATV

Author: ATVLive

  • Ministrisë së Infrastrukturës nuk i mjafton 1 vit për ta nënshkruar një kontratë

    Ministrisë së Infrastrukturës nuk i mjafton 1 vit për ta nënshkruar një kontratë

    Përgatiti: Arton Hamiti

    Shoferi i këtij kamioni e ka të pamundur ngasjen vetëm në korsinë e tij.

    Për shkak të rrëshqitjes së dheut, në vendin e njohur si “Kërrshi i Kajushës” përgjatë magjistrales Mitrovicë – Leposaviq, lëvizja në një pjesë të rrugës tash e 1 vit, vazhdon të jetë e kufizuar.

    Pavarësisht ndarjes së mjeteve nga Ministria e Financave dhe njoftimit për kontratë të publikuar më 31 tetor të vitit të kaluar, tenderi për rregullimin e kësaj pjese të rrugës akoma nuk është nënshkruar.

    Në thirrjen e hapur nga Ministria e Infrastrukturës për sanimin e rrëshqitjes së gurëve, kishin aplikuar gjithsej 13 kompani.

    Edhe pse ishin paraparë të shpenzohen 300 mijë euro, kompanitë e interesuara kishin ofertuar me çmime prej 120 mijë, deri në 288 mijë euro.

    Pas vlerësimit të ofertave në nëntor të 2022-tës, Autoriteti Kontraktues, në këtë rast, MI-ja kishte rekomanduar kompaninë ERST BAU, për kryerjen e punimeve. Por, pas ankesave kompania në fjalë ishte eliminuar nga gara.

    Ndërkohë, pas 4 muajve, Ministria e Infrastrukturës ia dha tenderin dy kompanive që kishin garuar së bashku: Eurokod dhe Mirusha COMPANY.

    Edhe ndaj këtij vendimi pati ankesa. Në kundërshtim me afatet ligjore, Organi Shqyrtues i Prokurimit e kishte aprovuar ankesën e kompanisë “Sallahu” dhe kështu më 27 qershor vendosi për anulimin e dhënies së kontratës.

    Me vendimin e Gjykatës së Tenderëve, përfaqësues të kompanisë “Eurokod” nuk po pajtohen assesi.

    “Vendimi ka qenë skandaloz. Shikojeni vendimin. Nuk e di nëse ka ndonjë bazë”, thuhet në përgjigjen e “Eurokod”.

    Në platformën e prokurimit publik të Kosovës, e-prokurimi, Ministria e Infrastrukturës ende nuk ka publikuar ndonjë njoftim pas vendimit të OSHP-së, të muajit qershor, për ta kthyer tenderin në rivlerësim.

    Kontakti me Ministrinë e Infrastrukturës në lidhje me këtë çështje, ka qenë i pamundur gjatë dy javëve tentim.

  • Konkursi i “dyshimtë”, Graçanica punëson 28 mësimdhënës të cilët nuk shkojnë në punë

    Konkursi i “dyshimtë”, Graçanica punëson 28 mësimdhënës të cilët nuk shkojnë në punë

    Përgatiti: Nora Luta

    Kjo kërkesë e zëvendëskryesuesit të Kuvendit Komunal të Graçanicës, Granit Gashi, ka hasur në vesh të shurdhër. Gashi i ka kërkuar Drejtorisë së Arsimit që t’i kthejë procedurat për punësimin e 28 arsimtarëve dhe profesorëve në pikën zero.

    Nga konkursi i shpallur në prill të këtij viti janë pranuar ky numër i personave dhe paguhen nga buxheti i shtetit për punën që s’e bëjnë.

    Igor Rasic figuron në listën e pagave nga konkursi i kaluar si i punësuar në pozitën e profesorit në gjimnazin e Llapnasellës, por të martën ai nuk ishte aty. Punonjës të gjimnazit i thanë televizionit se nuk njohin profesor me këtë emër.

    Gashi thotë se njësoj kanë vepruar edhe 28 persona të tjerë, që, sipas tij, disa janë sistemuar nëpër drejtori të Komunës.

    Sipas Gashit, Komuna në konkursin e fundit ka vepruar në kundërshtim me rregulloren për rekrutimin e mësimdhënësve, dhe ka bërë shkelje në formimin e Komisionit për përzgjedhjen e të punësuarve.

    “Një përfaqësues i komunitetit pakicë, komuna asnjëherë nuk e ka respektu”, tha Gashi.

    ATV-ja ka provuar për disa ditë rresht të marrë përgjigje nga Komuna e Graçanicës, por as të martën nuk dha qëndrim.

    Ndërkohë Ministria e Arsimit ka thënë se punësimi i mësimdhënësve është në kompetencë të komunave. Sipas përgjigjes nga MASHT-i, e cila thotë të mos ketë pranuar ankesë lidhur me konkursin, ankesat e mësimdhënësve drejtohen tek komisionet e ankesave në nivel të komunave përkatëse.

    Por zv.kryesuesi i Kuvendit Komunal thotë se e kishin rekomanduar ta raportojë rastin në Polici.

    “Ministria e Arsimit paguan mbi një milion euro në vit, që shumica e tyre rrinë në shtëpi. Kam bërë disa ankesa, MASHT-i na ka sugjeru që me iu drejtu Policisë…”, tha Gashi.

    Aktualisht, Komuna e Graçanicës, sipas regjistrit të tabelës së shpërndarjes së granateve për paga nga Ministria e Arsimit, ka të punësuar rreth 240 mësimdhënës.

  • Kërkohet rritja e numrit të psikologëve dhe profesionistëve të shëndetit mendor

    Kërkohet rritja e numrit të psikologëve dhe profesionistëve të shëndetit mendor

    Përgatiti: Sara Shehu

    Me fillimin e javës në kuadër të shëndetit mendor, Drejtoria e Arsimit në Prishtinë, me moton “Është okej të mos ndihesh okej”, ka organizuar një tryezë diskutimi me panelistë të fushave profesionale, që lidhen me shëndetin mendor, kushtuar nxënësve.

    Shëndeti mendor konsiderohet çështje e gjerë për të cilën psikologët e shkollave duhet të angazhohen më shumë.

    “Shëndeti mendor është i rëndësishëm në çdo fazë të jetës. Zhvillimi i programeve, krijimi i një kulture shkollore, shkollë – familje dhe komunitet duhet t’i jepet një rëndësi. Kemi me punu ma shumë që çerdhet dhe shkollat të mësojnë më shumë në promovimin e shëndetit mendor”, tha shefi i DKA-së në Prishtinë, Lulzim Vrapça.

    Por, psikologët e shkollave thonë se në punën e tyre nuk kanë sistem adekuat për trajtimin e nxënësve me probleme të kësaj natyre.

    “Është një çështje komplekse dhe faktor të shumtë janë që çojnë deri në këtë situatë, por mundësitë e tona lënë për të dëshiruar në përmirësimin e kësaj gjendjeje”, tha Valdet Pakolli, psikolog në shkollën “Hasan Prishtina”.

    Edhe Mimoza Shahini, psikiatre në QKUK, e cila trajton rastet më të rënduara, tha se çdo shkollë duhet të këtë programe të veçanta që funksionojnë për nxënësit që vuajnë nga shëndeti mendor.

    “Shkollat urgjent të marrin masa se fëmijët duhet të evidentohen në parashkollor e jo para se të bëhet vonë, harroni vjershat që i kemi maltretu fëmijët me lexu poezi para neve. Kjo është absurde për shëndetin mendor të fëmijëve, shkolla duhet ta ketë vendin ku duhet, me u socializu, çka është hierarkia këto gjëra duhet me i ba në shkollë. Psikologu shkollor ka të bëjë me promovimin e shëndetin mendor të fëmijëve nëse fëmija nuk është i lidhur me shkollën atëherë është e rëndë”, tha Shahini.

    Pjesë e debatit ishin edhe përfaqësuesit e prindërve së bashku me nxënësit, të cilët thanë se rrjetet sociale janë ndër faktorët kryesorë që po ndikojnë në shëndetin mendor të fëmijëve.

    “Prindërit të kenë një komunikim më të hapur me fëmijët, meqë ka faktorë të shumtë që duhet të diskutohen, bullizmi në rrjetet sociale, që është një realitet në të cilin po jetojnë. Si shoqëri duhet të kemi një alarm se ku po shkojnë fëmijët tanë”, tha Fisnik Durguti, përfaqësues i prindërve.

    “Mënyra se si na vinë problemet me shëndetin mendor janë të ndryshme. Rrjetet sociale, stresi shkollor, bullizmi po ndikojnë në përkeqësimin e shëndetit mendor. Psikologët duhet të punojnë me shëndetin mendor tek adoleshentët”, tha Anita Asllani, nxënëse.

    Njëkohësisht Dita Botërore e Shëndetit Mendor ka bashkuar rreth 450 psikologë nga Kosova e Shqipëria, të cilët kanë organizuar edicionin e pestë të Kongresit Ndërkombëtar me moton “Shëndeti mendor, sfidat dhe e ardhmja”.

  • Deliu Kodra shkarkohet nga pozita e anëtares së Komisionit për kompensimin e viktimave të krimit

    Deliu Kodra shkarkohet nga pozita e anëtares së Komisionit për kompensimin e viktimave të krimit

    Përgatiti: Driton Sadiku

    Paratë i mori e në mbledhjet e komisionit u tha që shkoi rrallë fare.

    Nga 16 mbledhjet që kishte komisioni për kompensimin e viktimave, deputetja e PDK-së Blerta Deliu-Kodra shkoi në vetëm 7, ndonëse u pagua për të gjitha.

    Kjo edhe qe arsyeja që Deliu-Kodra u shkarkua nga pozita e anëtares në këtë komision. Shkarkimi i saj u përcoll me debat të ashpër mes Deliu-Kodrës dhe Ministres së Drejtësisë, Albulena Haxhiu, e cila edhe paraqiti këto pretendime.

    Për këtë çështje dhe për disa etiketime që u tha se Ministrja Haxhiu kishte bërë drejt Deliu-Kodrës, të dyja do të përballen në gjykatë.

    Megjithatë, vendimi për shkarkim nga komisioni u konsiderua i padrejtë nga deputetja e opozitës.

    Emra s’u përmendën, por u tha se Ka Edhe Të Tjerë Anëtarë Që Janë Paguar Pa Shkuar Nëpër Komisione.

  • Komuna e Istogut lanson linjën “Konsultohu me Psikologun”

    Komuna e Istogut lanson linjën “Konsultohu me Psikologun”

    Kryetari i Komunës së Istogut, Ilir Ferati të martën ka lansuar linjën e ndihmës psikologjike, përmes së cilës të gjithë ata që kanë nevojë për të folur me psikologun mund ta bëjnë në numrin 0800 110 09.

    Në njoftimin e komunës thuhet se linja “Konsultohu me Psikologun” është një platformë telefonike ku qytetarët e Istogut, të cilët kanë shqetësime me shëndetin mendor, ankth, depresion, mendime për vetëvrasje e probleme të tjera të cilat lidhen me shëndetin mendor mund të telefonojnë në numrin pa pagesë 0800 110 09.

    “Bisedat nuk regjistrohen dhe mbahen anonime ndërsa në regjistrat e “Konsultohu me Psikologun” mund të shohësh vetëm orën e saktë në sa është pranuar një telefonatë. Ata që thërrasin në këtë linjë nuk janë të obliguar të tregojnë identitetin e tyre por në anën tjetër të njëjtëve u mundësohet të vazhdojnë trajtimin psikologjik edhe në institucione të tjera”, thuhet në njoftim.

  • Putin: Amerika ka dështuar në Lindjen e Mesme, nuk i mori parasysh interesat e popullit palestinez

    Putin: Amerika ka dështuar në Lindjen e Mesme, nuk i mori parasysh interesat e popullit palestinez

    Presidenti rus, Vladimir Putin, tha se konflikti mes Izraelit dhe militantëve palestinezë të Hamasit në Gaza, shfaq “dështimin” e politikës së Uashingtonit në Lindjen e Mesme dhe bëri thirrje për krijimin e “një shteti sovran palestinez” që tha se është gjë “e domosdoshme”.

    Lideri rus i bëri këto komente gjatë takimit me kryeministrin irakian, Mohammed Shia al-Sudani, në Moskë, disa ditë pasi Hamasi nisi një sulm masiv në Izrael.

    “Mendoj se shumë njerëz do të pajtoheshin me mua se ky është një shembull i qartë i dështimit të politikës amerikane në Lindjen e Mesme”, tha Putin.

    Ai foli për “nevojën e zbatimit të vendimeve të Këshillit të Sigurimit të Kombeve të Bashkuara për krijimin e një shteti të pavarur dhe sovran palestinez”.

    Putin tha se SHBA-ja “ka tentuar të monopolizojë zgjidhjen e konfliktit, por fatkeqësisht ata nuk ishin të preokupuar në gjetjen e kompromiseve që do të ishin të pranueshme për të dyja palët”.

    Perëndimi “nuk ka marrë parasysh interesat thelbësore të popullit palestinez”, tha ai.

    Një ditë më herët, ministri i Jashtëm rus, Sergei Lavrov, tha se krijimi i një shteti palestinez është “zgjidhja më e qëndrueshme” për paqe me Izraelin.

    Grupi militant i Hamasit nisi një sulm masiv ndaj Izraelit mëngjesin e 7 tetorit. Izraeli u kundërpërgjigj me sulme në Gaza.

    Të paktën 900 persona në Izrael dhe mbi 700 në Gaza janë vrarë që kur shpërtheu dhuna.

    Hamasi – që njihet si organizatë terroriste nga Shtetet e Bashkuara, Bashkimi Evropian dhe fuqitë e tjera botërore – udhëheq me Gazën që nga viti 2007.

    Izraeli ka urdhëruar rrethimin e plotë të Gazës dhe autoritetet kanë thënë se kjo masë nënkupton ndërprerjen e ujit, ushqimit dhe energjisë për këtë territor.

    Izraeli dhe Gaza deri më tani kanë zhvilluar katër luftëra, teksa palestinezët vazhdimisht kërkojnë të krijojnë një shtet të tyre me Jerusalemin Lindor si kryeqytet.

    Bregu Perëndimor dhe Gaza, të cilat njihen si territore palestineze, si dhe Jerusalemi Lindor dhe Izraeli kanë qenë pjesë e tokës së njohur si Palestinë që nga koha romake.

    Këto ishin gjithashtu tokat e mbretërive hebraike në Bibël dhe shihen nga hebrenjtë si atdhe i tyre i lashtë.

    Izraeli u shpall shtet në vitin 1948, megjithëse toka ende quhet Palestinë nga ata që nuk e njohin të drejtën e Izraelit për të ekzistuar.

    Palestinezët përdorin gjithashtu emrin Palestinë si një term ombrellë për Bregun Perëndimor, Gazën dhe Jerusalemin Lindor.

  • Shkarkohet Deliu-Kodra, insiston se Haxhiu e quajti “hajneshë” – ministrja e mohon

    Shkarkohet Deliu-Kodra, insiston se Haxhiu e quajti “hajneshë” – ministrja e mohon

    Me katër vota për e dy abstenime Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit ka votuar për shkarkimin e Blerta Deliu-Kodrës, si anëtaren e Komisionit për Kompensimin e Viktimave të Krimit, raporton EO.

    Deliu-Kodra, tha se ministrja Albulena Haxhiu e ka bërë një linçim publike në lidhje më të kur ka folur në një televizion duke e quajtur “hajneshë”.

    “Ky diskutim nuk do të kishte me ndodh nëse ministrja nuk do të dilet në një linçim publik para së me sjell një raport në kuvend. Ministrja ka zgjedhur e para të ju drejtohet mediave për të më linçuar si hajneshë në opinionin publikë dhe pastaj të vije raportimi në Komision. Më vjen keq kjo po shihet së është vetëm tendencë personale. Nëse sot vini dhe thoni që Rozeta Hajdari nuk është fajtore, ti je fajtore. Unë jam turpëruar prej një interviste”, tha ajo.

    Ministrja Haxhiu tha se duhet që t’i vije turp deputetes dhe të kërkoj falej për këtë, sipas saj, ajo duhet që të kthej ato para që ka marr pa shkuar në Komision fare.

    Haxhi po ashtu tha se nuk e ka përdorur termin “hajneshë” në atë intervistë.

    “Unë mendoj që ajo as një cent se ka keqpërdoru për dallim prej teje. Turpërohu për veprimet tuaja, po të isha ne vendin tënd do të deklarohesha publikisht. Për besë nuk besoj kurrë që e kam përdoru termin hajn apo hajneshë. E vazhdoj debatin ne gjykatë mediat i ftoj që të jenë edhe në seancën gjyqësore. Po të isha ne vendin ënde do të kërkoja do ta ktheja buxhetin që është i shteti dhe jo i joti”, tha ajo.

  • Rritet prodhimi i industrisë përpunues, bie numri i punësimit në këtë sektor

    Rritet prodhimi i industrisë përpunues, bie numri i punësimit në këtë sektor

    Në muajin korrik të këtij viti, numri të punësuarve kishte rënie në sektorin e industrisë nxjerrëse (minierat dhe guroret) me 15. 2 për qind.

    Ndërsa, sipas Agjencisë së Statistikave të Kosovës (ASK) gjatë këtij muaji, indeksi i vëllimit të industrisë kishte rritje në sektorin e industrisë përpunuese për 6.2 për qind.

    “Në muajin korrik 2023, indeksi i numrit të të punësuarve kishte ulje në sektorin e: industrisë nxjerrëse (minierat dhe guroret) 15. 2 për qind, furnizimit me ujë, veprimtari të menaxhimit dhe trajtimit të mbeturinave 4 për qind, furnizimit me rrymë, gaz, avull dhe ajër të kondicionuar 3,8 për qind, si dhe në sektorin e Industrisë përpunuese 1,2 për qind, krahasuar me muajin e njëjtë të vitit paraprak korrik 2022”, thuhet në raportin e ASK-së për Statistikat Afatshkurtra të Industrisë për muajin korrik 2023.

    Ndërsa, sipas ASK-së kishte rënie të prodhimit në sektorët: furnizim me rrymë, gaz, avull dhe ajër të kondicionuar 6,5%, industri nxjerrëse (minierat dhe guroret) 5,6 për qind dhe furnizim me ujë, veprimtari të menaxhimit dhe trajtimit të mbeturinave 3,2 për qind, krahasuar me muajin e njëjtë të vitit paraprak, korrik 2022.

  • Serbi, aktakuzë penale kundër prindërve të të miturit që vrau 9 nxënës

    Serbi, aktakuzë penale kundër prindërve të të miturit që vrau 9 nxënës

    Prokuroria e Lartë publike në Beograd ka ngritur sot aktakuzë prej 267 faqesh kundër Vladimir Kecmanoviqit, babait të të miturit K.K. i cili më 3 maj 2023 vrau 9 nxënës dhe një roje të sigurisë në shkollën fillore “Vladislav Ribnikar” në Beograd, raporton Anadolu.

    Prokuroria kërkoi dënimin me 12 vjet dhe vazhdimin e paraburgimit për Kecmanoviqin, i cili akuzohet për vepër të rëndë kundër sigurisë së përgjithshme.

    Kryeprokurori publik i Prokurorisë së Lartë Publike në Beograd, Nenad Stefanoviq në konferencën për media tha se Kecmanoviq dyshohet se e ka trajnuar djalin e tij të përdorë armë zjarri dhe armë ajrore, dhe se e ka trajnuar atë se si të qëndrojë dhe të marrë frymë gjatë përdorimit të armës dhe për të qëlluar në objektiv.

    Kecmanoviq po ashtu dyshohet se armët i ka ruajtur në mënyrë të paligjshme në valixhe për transferim, e jo në çantë për ruajtje të armëve. Stefanoviq ka deklaruar se K.K. mbushi gjashtë karikatorë me 92 fishekë dhe i mori në shkollë.

    Fillimisht qëlloi rojën e sigurisë, dy nxënëse në tavolinë dhe një vajzë tjetër dhe më pas shkoi në klasë ku qëlloi 6 nxënës dhe mësuesen e historisë.

    Menjëherë pas incidentit u akuzua nëna e K.K. për armëmbajtje pa leje, pasi në një gëzhojë në kabinetin e historisë u gjet ADN-ja e saj. Prokuroria kërkon që ajo të dënohet me 2 vjet e gjysmë burg.

    Dënim me 3 vjet burg është kërkuar edhe për kreun e klubit të qitjes dhe instruktorin për dëshmi të rreme se nuk e kanë parë stërvitjen e djalit në poligonin e qitjes ku K.K. ushtronte me të atin.

  • Konjufca takon homologen gjermane, e falënderon për qëndrimet e qarta për sulmin në Banjskë

    Konjufca takon homologen gjermane, e falënderon për qëndrimet e qarta për sulmin në Banjskë

    Kryetari i Kuvendit Glauk Konjufca ka takuar presidenten e Bundestagut Gjerman, Barbel Bas.

    Në një postim në Facebook Konjufca ka shkruar se në këtë takim kanë diskutuar për çështje të rëndësishme.

    Ai ka theksuar se e ka falënderuar homologen e ti për mikpritjen dhe për mbështetjen që Gjermania i ka dhënë gjithnjë Republikës së Kosovës që nga themelimi i saj, por edhe më herët.

    “Në veçanti, shpreha mirënjohjen time dhe të vendit tonë për qëndrimet e qarta të Gjermanisë, sa i përket sulmit terrorist në Banjskë”, ka shkruar Konjufca.

    “Në frymën e raporteve të ngushta mes vendeve tona aleate dhe mike, diskutuam për çështje të rëndësishme, me orientim në kahjen që partneritetin tonë të ngushtë e të palëkundur nëpër vite ta thellojmë edhe më tej në drejtim të zhvillimit të interesave dhe synimeve tona të përbashkëta”, ka shkruar Konjufca.

    Ai ka thënë se e ka njoftuar presidenten e Bundestagut se Kosova “ka arritur suksese të rëndësishme sa i përket treguesve të demokracisë në vend”. “Megjithatë, shpreha nevojën e shtetit tonë për shkëmbimin e mëtejshëm të përvojave parlamentare dhe ekstraparlamentare sa i përket rritjes së kapaciteteve demokratike. Nga zj. Bas mora konfirmimin se mbështetja diplomatike, partneriteti dhe bashkëpunimi i gjithanshëm mes nesh do të vazhdojë edhe më tutje”, ka shkruar Konjufca.