Ballkani do të luajë përballë Astanës në transfertë, në kuadër të raundit të katërt të fazës së grupeve të Conference League.
Ndeshja e parë e zhvilluar në stadiumin “Fadil Vokrri” përfundoi me rezultatin 1-2 në favor të kazakëve, teksa në këtë sfidë ekipi shqiptar kërkon me doemos 3 pikëshin.
Ilir Daja ka zgjedhur titullarët që do të luftojnë në këtë sfidë. Më poshtë do të njiheni me formacionet zyrtare të ndeshjes Astana – Ballkani.
Irani refuzoi sot thirrjen e G7-ës që i bën thirrje Teheranit të ndalojë mbështetjen e grupit palestinez Hamas dhe të marrë masa që “destabilizojnë” Lindjen e Mesme.
Thirrja erdhi pasi Izraeli ka bombarduar pa ndalur Rripin e Gazës për një muaj, me synimin për të eliminuar Hamasin pas sulmit të paprecedentë që filloi kundër vendit më 7 tetor.
Ministrat e Jashtëm të G7 në takimin e tyre në Tokio i kërkuan Iranit të mos mbështesë Hamasin dhe Hezbollahun dhe të mos bëjë asgjë që mund të “destabilizojë” Lindjen e Mesme.
Sot Nasser Kanani, përfaqësuesi i Ministrisë së Jashtme iraniane, e “dënoi ashpër” këtë njoftim.
Ai tha se Irani po bën “përpjekje të pandërprera për t’i dhënë fund sulmeve ushtarake të regjimit agresiv sionist kundër qytetarëve të pambrojtur” të Rripit të Gazës të kontrolluar nga Hamasi.
“Gjithçka që prisnim nga takimi i ministrave të jashtëm të G7 në Tokio ishte që ata të merrnin përgjegjësinë e tyre ndërkombëtare, kryesisht duke dënuar veprimet e regjimit sionist që shkelin të drejtat e njeriut dhe ligjin ndërkombëtar në Gaza”, shtoi ai.
Grupi i shtatë vendeve të industrializuara (SHBA, Japonia, Franca, Britania, Gjermania, Italia dhe Kanadaja) gjithashtu bëri thirrje për shpalljen e “pauzave humanitare” dhe krijimin e “korridoreve humanitare” në Gaza për të mbrojtur civilët.
Të paktën 1,400 njerëz u vranë në Izrael në sulmin e 7 tetorit nga Hamasi, ndërsa rreth 240 janë rrëmbyer nga grupi palestinez.
Bombardimet e Izraelit kanë vrarë më shumë se 10,500 njerëz në Gaza, duke përfshirë më shumë se 4,300 fëmijë, sipas ministrisë së shëndetësisë të Hamasit./abcnews.al
Puna fleksibile mund të zvogëlojë rrezikun e dikujt për të pasur një atak në zemër ose goditje në tru, ka zbuluar një studim i ri amerikan.
Të kesh një ekuilibër më të mirë punë-jetë është aq e dobishme për shëndetin, saqë disa punonjës që punojnë në mënyrë fleksibile përfundojnë me shëndetin e zemrës ekuivalent me atë që kishin 10 vjet më parë.
Gjetjet e studimit ka të ngjarë të shtojnë debatin nëse puna nga shtëpia më shpesh, siç kanë bërë më shumë njerëz që nga Covid, përmirëson shëndetin e tyre.
Ato sugjerojnë gjithashtu se puna në një mjedis stresues rrit rrezikun e një ataku në zemër ose goditje në tru, të cilat mes tyre shkaktojnë rreth 160.000 vdekje në vit në Britani të Madhe – 460 në ditë.
“Kur kushtet stresuese në vendin e punës dhe konflikti punë-familje u zvogëluan, ne pamë një reduktim të rrezikut të sëmundjeve kardiovaskulare në mesin e punonjësve më të cenueshëm, pa ndonjë ndikim negativ në produktivitetin e tyre”, tha bashkautorja Lisa Berkman, një profesoreshë e politikave publike dhe epidemiologjisë në shkollën e shëndetit publik TH Chan të Harvardit.
“Këto gjetje mund të jenë veçanërisht të rëndësishme për punëtorët me paga të ulëta dhe të mesme, të cilët tradicionalisht kanë më pak kontroll mbi oraret dhe kërkesat e tyre të punës dhe janë subjekt i pabarazive më të mëdha shëndetësore”, shtoi ajo.
Për projektin, akademikët përdorën një program në vendin e punës, të cilin e projektuan për të përmirësuar ekuilibrin punë-jetë. Menaxherët u trajnuan në “strategji për të treguar mbështetje për jetën personale dhe familjare të punonjësve krahas performancës së tyre në punë”.
Dhe si menaxherët ashtu edhe stafi iu nënshtruan trajnimeve “për të identifikuar mënyra të reja për të rritur kontrollin e punonjësve mbi oraret dhe detyrat e tyre”.
Ata e testuan këtë qasje me një firmë IT, e cila kishte 555 punëtorë të të dy gjinive, të cilët zakonisht fitonin një pagë të moderuar, dhe një kompani kujdesi, e cila kishte një fuqi punëtore prej 973, kryesisht femra, me paga të ulëta.
Bashkautori Orfeu Buxton, një profesor i shëndetit të sjelljes në Penn State, tha se përfundimet e tyre duhet të inkurajojnë punëdhënësit që t’i japin stafit të tyre një ekuilibër më të madh punë-jetë.
Rreth 7.6 milionë njerëz në Britaninë e Madhe kanë një problem me zemrën ose qarkullimin e gjakut, gjë që i vë ata në rrezik më të madh për të pësuar një kolaps potencialisht fatal, sipas Fondacionit Britanik të Zemrës. /The Guardian
Agjencia e Statistikave të Kosovës (ASK) publikoi sot statistikat afatshkurtra të shërbimeve për muajin gusht 2023.
Krahasuar me gushtin e vitit 2022, në muajin gusht 2023, indeksi i qarkullimit të shërbimeve kishte rritje më të madhe te agjencitë e udhëtimit me 25,06% dhe hotelet me 16,76%.
Aktivitetet ekonomike sipas NACE Rev-2
Indeksi i qarkullimit të shërbimeve
Indeksi i numrit të të punësuarve
Në gusht 2023, indeksi i numrit të të punësuarve kishte rritje te transporti dhe magazinimi me 0,58% krahasuar me muajin e njëjtë të vitit paraprak.
Në Dhomat e Specializuara të Kosovës (DhSK) në Hagë, ka mbaruar dëshminë dëshmitari i Zyrës së Prokurorit të Specializuar, Dragan Ivanisheviq në gjykimin ndaj Hashim Thaçit, Kadri Veseli, Rexhep Selimi dhe Jakup Krasniqi.
Gjatë dëshmisë së tij, dëshmitari Ivanisheviq, shkurtimisht është marrë në pyetje nga avokati i Jakup Krasniqit, Victor Baiesu, i cili këto pyetje i quajti më shumë sqaruese lidhur me deklaratat e dhëna sot nga dëshmitari, raporton “Betimi për Drejtësi”.
Fokusi i pyetjeve të avokatit Baieșu ishte tek njohja që kishte dëshmitari me Velko Markoviqin.
I pyetur se a mund të konfirmonte se personi që kishte parë kur e rrëmbyen ishte Velko Markoviq, dëshmitari Ivanisheviq tha se nuk mund të thoshte atëherë me siguri që ishte ai.
“Nuk mund të thoja atëherë me siguri që ishte Velko Markoviq, thjesht e përshkrova mbështetur në përshkrime dhe karakteristikat e tij, pastaj më vonë kur erdhi i ati për të më takuar mbërrita në përfundimin që bëhej fjalë për Velko Markoviq”, deklaroi Ivanisheviq.
Dëshmitarit iu prezantua një hartë nga ZPS ku iu kërkua që të shënjezonte disa vende të cilat i kishte përmendur gjatë dëshmisë së tij. Pas shënjezimit ky dokument u pranua si provë materiale.
Ivanisheviq u mor në pyetje edhe nga trupi gjykues nëpërmjet gjyqtarëve, Christoph Barthe, Guenaël Mettraux dhe Fergal Gaynor.
Gjyqtari Barthe e pyeti dëshmitarin se lidhur me deklaratën ku kishte thënë se ka pirë alkool në një lokal në Milloshevë, para se të rrëmbehej.
“Kam pirë 4-5 gota raki. Nuk e di se si e quani ju këtë por janë gota që përdorin zakonisht për raki. Janë gota të vogla për raki… Unë gotën e fundit e kam pirë mbase nga gjysmë ore deri në 15 minuta para se të largohesha. Do kish qenë më mirë të thuhet gjysmë ore para se të largohesha. Kisha ngrënë më përpara. Kisha shkuar në shpi, kam ngrënë në shpi, jam larguar nga shtëpia dhe kam shkuar që të takohem me disa shokë”, tha dëshmitari Ivanisheviq.
Ivanisheviq tha se e ndjente se ishte nën ndikim të alkoolit, por që nuk kishte problem që të ngiste makinën apo që të ecte.
“Thjesht ndjeja pak ndikim alkooli, por nuk kisha problem që të ecja apo të ngisja makinën. Thjesht mund të kisha pak ndikim në trup”, tha Ivanisheviq.
I pyetur se cila ishte arsyeja e rrëmbimit të tij, Ivanisheviq tha se për shkaqe etnike.
“Nuk them dot gjë, thjesht e di që ka pasur raste rrëmbimesh edhe para se të rrëmbehesha unë dhe kanë ndodhur raste rrëmbimesh edhe pas i rrëmbeva unë. Janë kryer edhe raste vrasjes, arsyet ishin për shkaqe etnike. Këto kanë qenë arsyet. Përpara se më ndodhi ky rast mua, ka pasur vrasje, ka pasur rrëmbime edhe pas rastit tim kanë pasur raste kur janë vrarë njerëzit. Këto janë bërë për arsye etnike, për shkaqe etnike”, tha Ivanisheviq.
Dëshmitari tha se nga kushëriri i tij kishte dëgjuar që eshtrat e Velko Markoviqit ishin gjetur dhe se për vendin e tyre kishte treguar UÇK-ja.
“Dëgjova se ishin gjetur. E dëgjova nga kushëriri im i cili qëlloi që takoi një të afërm të Markoviqit dhe kur e dëgjoi mbiemrin nga kushëriri im, ai bëri lidhjen dhe e pyeti nëse kishte lidhje me mua dhe kështu e kuptuan që në fakt isha i afërmi i tij dhe i tha kushëririt tim që eshtrat e tij (Markoviqit) u gjetën dhe se UÇK-ja kishte treguar vendin ku ndodheshin eshtrat të cilat pastaj u dërguan në një qendër midis Merdares dhe Koshares”, tha dëshmitari.
Sipas tij, më 200 apo 2001 u gjetën eshtrat dhe u dërguan në një qendër mjeko-ligjore.
“Më 2000 apo 2001 u gjetën, shumë nga eshtrat që u gjetën i quan aty sepse aty kishin qendër mjeko-ligjore dhe aty vinin të afërmit për t’i identifikuar”, tha dëshmitari Ivanisheviq.
Ndryshe, sesioni i pasdites i seancës së sotme do të vazhdojë me fillimin e dëshmisë së dëshmitarit të 35-të në çështjen ndaj Hashim Thaçit, Kadri Veselit, Jakup Krasniqit dhe Rexhep Selimit./BetimipërDrejtësi/
Kancelari gjerman, Olaf Scholz, ka folur për situatën në Kosovë gjatë një konferencë të përbashkët për media me Sekretarin e Përgjithshëm të NATO-s, Jens Stoltenberg, në Berlin.
Ai tha se tensionet e fundit e dëshmojnë sa e rëndësishme është prezenca e NATO-s në Kosovë dhe se misioni i KFOR-it duhet të jetë në pozicion për të reaguar.
“NATO po ashtu është një garancion i sigurisë në Ballkanin Perëndimor, në Kosovë, përmes KFOR-it. Gjermania po merr pjesë në këtë mision përmes forcave të armatosura. Tensionet e ditëve të fundit tregojnë sa e rëndësishme është prezenca aty. KFOR-i duhet të jetë në pozicion për të reaguar si duhet në të gjitha zhvillimet atje”.
Nxjerrja e litiumit dhe mineraleve të tjera që na duhen për bateritë po sjell një dëm në rritje për mjedisin.
Megjithatë, ka materiale alternative rreth nesh. Por në një rrugë në Indi, ka një bankomat që ende është në funksion, falë, pjesërisht, pambukut të djegur. Për këtë makinë parash ka një bateri rezervë brenda saj – një bateri që përmban karbon nga pambuku i djegur.
“Procesi i saktë është sekret, të jem i sinqertë me ju,” thotë Inketsu Okina, shefi i inteligjencës në PJP Eye, firma japoneze që prodhoi baterinë.
“Temperatura, atmosfera dhe presioni janë sekrete”, vazhdon ai me hezitim.
Në bateritë e zhvilluara nga kompania, së bashku me studiuesit në Universitetin Kyushu në Fukuoka, Japoni, karboni përdoret për anodën – një nga dy elektrodat midis të cilave rrjedhin jonet, grimcat e ngarkuara në bateri.
Jonet lëvizin në një drejtim kur bateria është duke u ngarkuar dhe në drejtimin tjetër kur lëshon energji në një pajisje.
Shumica e baterive përdorin grafit si anodë, por PJP Eye argumenton se qasja e tyre është më e qëndrueshme, pasi ato mund të bëjnë anoda duke përdorur pambuk të mbetur nga industria e tekstilit.
Me kërkesën e madhe për bateri që pritet në vitet e ardhshme, e nxitur nga rritja e automjeteve elektrike dhe sistemeve të mëdha të ruajtjes së energjisë, disa studiues dhe biznese po zhvillojnë furishëm alternativa të mundshme ndaj baterive të litiumit dhe grafitit që janë të zakonshme sot.
Ashtu si PJP Eye, ata argumentojnë se ne mund të përdorim materiale shumë më të qëndrueshme dhe të disponueshme gjerësisht për prodhimin e baterive. /BBC
Aktorët amerikanë pritet të rifillojnë punën pasi sindikata e tyre ra dakord për një marrëveshje paraprake me studiot e Hollywoodit për t’i dhënë fund një greve katërmujore.
“Sag-Aftra” arriti marrëveshje me Aleancën e Prodhuesve të Filmit dhe Televizionit (AMPTP) në një votim unanim. Mbyllja – e kombinuar me një grevë të veçantë të shkrimtarëve – paralizoi industrinë e argëtimit dhe ndërpreu shumë filma dhe shfaqje televizive të mëdha. Aktorët kanë bërë thirrje për paga më të mira dhe masa mbrojtëse për përdorimin e inteligjencës artificiale.
Aktorët e kanë mirëpritur marrëveshjen, me Zac Efron që e përshkroi atë si “të pabesueshme” në premierën e filmit të tij “The Iron Caw”.
Sindikata tha se marrëveshja vlerësohej në më shumë se 1 miliard dollarë (814 milionë funte) dhe përfshinte rritje të pagave minimale, një bonus të ri “pjesëmarrjeje në transmetim” dhe më shumë mbrojtje kundër imazheve dhe zërave të tyre që replikohen nga inteligjenca artificiale.
Dhuna ndaj grave është një “bar helmues” që duhet të zhduket nga shoqëria, tha Papa Françesku të enjten.
“Dhuna ndaj grave është një bar helmues që prek shoqërinë tonë dhe duhet çrrënjosur”, tha Papa në një mesazh për fushatën kundër dhunës ndaj grave të organizuar nga Rai Radio1 dhe Cadmi D.I.Re.
“Dhe këto rrënjë janë kulturore dhe mendore, ato rriten në tokën e paragjykimit, të zotërimit, të padrejtësisë”, shtoi ai.
“Sa gra janë të pushtuara nga pesha dhe tragjedia e dhunës! Sa të keqtrajtuara, të skllavëruara, viktima të arrogancës së atyre që mendojnë se mund të kenë në dispozicion trupin dhe jetën e tyre”, tha Papa.
Në mesazhin e tij Françesku i bëri thirrje shoqërisë që “të mos qëndrojë indiferente”, të “veprojë menjëherë, në të gjitha nivelet, me vendosmëri, urgjencë dhe guxim” për t’i dhënë zë “motrave tona pa zë”.
“Si e trajtojmë një grua tregon shkallën tonë të humanizmit”, vazhdoi ai. Françesku theksoi gjithashtu rolin e paqartë që luan masmedia dhe përsëriti nevojën urgjente për edukim, “duke nisur nga familja, që e vendos individin me dinjitetin e tij në qendër” dhe promovon “marrëdhënie të drejta dhe të balancuara të bazuara në respektin dhe njohjen reciproke”. /ANSA
Çmimet e naftës u rimëkëmbën të enjten pasi ranë me më shumë se 2.3% për shkak të marrjes së moderuar të fitimeve nga investitorët dhe rreziqeve të furnizimit nga tensioni i përshkallëzuar midis Izraelit dhe Palestinës.
Nafta e papërpunuar ndërkombëtare Brent u tregtua me 80,11 dollarë për fuçi në orën 10:24 të mëngjesit me orën lokale , një rritje prej 0,71% nga çmimi i mbylljes prej 79,54 dollarë për fuçi në seancën e mëparshme tregtare të mërkurën.
Standardi amerikan West Texas Intermediate (WTI) tregtohej në të njëjtën kohë me 75,82 dollarë për fuçi, 0,65% më shumë nga mbyllja e së mërkurës prej 75,33 dollarë për fuçi.
Intensifikimi i konfliktit izraelito-palestinez ka ngritur shqetësime për furnizimin, të cilat po vazhdojnë të bëjnë presion mbi çmimet dhe mbartin rrezikun e destabilizimit të rajonit dhe sabotimit të rrugëve të furnizimit me naftë.
Ndërkohë, ndryshe nga parashikimet e tregut për një humbje prej 300,000 fuçi në rezervat e naftës së papërpunuar të SHBA, Instituti Amerikan i Naftës (API) njoftoi të martën se inventarët ishin rritur me rreth 11.9 milionë fuçi.
Kjo tregoi një rënie të konsumit të naftës në vendin më të madh në botë që konsumon naftë, i cili nga ana tjetër kufizoi presionet në rritje të çmimeve./AA