ATV

Author: ATVLive

  • ATV në Selinë e NATO-s në Bruksel: Po shqyrtohet një rritje më e qëndrueshme e kontingjentit paqeruajtës në Kosovë

    ATV në Selinë e NATO-s në Bruksel: Po shqyrtohet një rritje më e qëndrueshme e kontingjentit paqeruajtës në Kosovë

    Ministrat e Jashtëm të vendeve anëtare të NATO-s do të takohen nga sot deri me 29 nëntor në Bruksel dhe në qendër të bisedimeve do të jetë agresioni rus në Ukrainë dhe situata në Ballkanin Perëndimor.

    Gazetarja e ATV-së, Flaka Vitaku, në një lidhje të drejtpërdrejtë në emisionin A LIVE nga selia e NATO-s në Bruksel, tha se në këto takime të ministrave të Jashtëm të vendeve anëtare të NATO-s do të diskutohet edhe situata në Ballkanin Perëndimor.

    Këtë e përmendi edhe shefi i NATO-s, Jens Stoltenberg në fjalimin e tij, ku tha se është duke u shqyrtuar mundësia nëse duhet të shtohen më shumë trupa të NATO-s në Koosvë si dhe nëse këta trupa duhet të jenë për një kohë permanente në Kosovë.

    “Ai tha që edhe pas vizitës të cilët pati në Ballkanin Perëndimor, në Kosovë, Serbi dhe vendet e tjera, ai u takua me liderët e vendeve duke potencuar se diskutimet dhe dialogu mes Kosovës dhe Serbisë duhet të vazhdojë e gjithë kjo e fasilituar nga Bashkimi Evropian. Mirëpo, përmendi që NATO ka ndërmarrë pra shtimin e njëmijë trupave më shumë, prezenca e NATO-s është rritur në Kosovë në kuadër të misionit paqeruajtës të NATO-s, siç është KFOR-i dhe janë duke shqyrtuar ende mundësinë nëse duhet të shtohen më shumë trupa apo nëse këta trupa duhet të jenë për një kohë permanente në Kosovë. E gjithë kjo do të diskutohet edhe gjatë këtyre takimeve të cilat do t’i mbajnë ministrat e Punëve të Jashtme, pra të vendeve anëtare të NATO-s”, tregon Vitaku.

    Ajo tregon se Stoltenberg, në fjalimin e tij tha se Ballkani Perëndimor është një rajon shumë i rëndësishëm për NATO-n dhe se kjo e fundit do të sigurohet që ta ruajë sigurinë edhe paqen në këtë pjesë të Evropës.

    “Sipas Stoltenberg, e gjithë kjo mund të zgjidhet përmes dialogut dhe kërkon nga të dy vendet, nga Prishtina dhe nga Beogradi që të ruhen nga çfarëdolloj aksioni dhe veprimi, i cili mund të dërgojë tek tensionimi i situatës dhe ka bërë thirrje që të dy vendet, edhe gjatë takimeve të cilat i kanë mbajtur, ditëve të kaluara të cilat edhe ne jemi të informuar, nga liderët që situata të mos tensionohet, sepse është shumë e rëndësishme edhe për NATO-n edhe misionin të cilën e ka pra pjesën në Kosovë. Sidomos, ai përmendi edhe Bosnjë-Hercegovinën si një pjesë tjetër e brishtë e Ballkanit Perëndimor”, tregoi gazetarja e ATV-së.

    Ekipi i ATV-së është duke qëndruar në Selinë e NATO-s në Bruksel, ku për shikuesit do të ofrojë informacionet e fundit që do të dalin nga takimet e ministrave të jashtë të vendeve anëtare të NATO-s për gjatë dy ditëve të ardhshme.

  • Kërkohet anulimi i konkursit për kryeshefin ekzekutiv të “Trepçës”

    Kërkohet anulimi i konkursit për kryeshefin ekzekutiv të “Trepçës”

    Konsorciumi i organizatave të shoqërisë civile i përbërë nga Grupi për Studime Juridike dhe Politike (GLPS), Instituti GAP dhe Instituti për Politika Zhvillimore (INDEP), në kuadër të projektit: “Mbështetje për Shoqërinë Civile për të Rritur Mbikëqyrjen Publike dhe Llogaridhënien e Institucioneve Publike të Kosovës”, shpreh shqetësimin e thellë lidhur me konkursin për pozitën Kryeshef Ekzekutiv në Trepça Sh.A dhe kërkon anulimin e këtij konkursi.

    Përmes një reagimi publik, CorrWatch apelon të anulohet procesi rekrutues për kryeshef ekzekutiv në “Trepça” për shkak të paligjshmërisë.

    CorrWatch konsideron që kërkesat e përgjithshme të paraqitura në konkurs janë në kundërshtim me Ligjin për Ndërmarrjet Publike.

    Në komunikatë thuhet se CorrWatch konsideron se kërkesa për dokumentin “Certifikatën (dëshminë) nga gjykata kompetente që dëshmon se nuk është nën hetime jo më të vjetër se gjashtë muaj” është në kundërshtim me këtë ligj duke qenë se ligji përcakton që kandidati do të duhet të mos jetë i dënuar nga një gjykatë kompentente. Pra, do të duhej të kërkohej dokumenti që e vërteton këtë gjë dhe jo dëshmia që nuk është nën hetime.

    “Në kriteret e kualifikimit, nuk është cekur niveli i shkollimit, vetëm fusha/drejtimi i kërkuar. Në të njëjtën kohë, kërkesa për ndërlidhje mes veprimtarisë biznesore të ndërmarrjes me drejtimet duhet të specifikohet pasi kjo lë hapësirë për interpretim të gjerë gjatë vlerësimit të kandidatëve. Te pjesa ku është cekur se “preferohet kandidatët me përvojë pune në ndërmarrjet/korporatat tjera të mëdha dhe me kompleksitet të lartë”, një kriter i tillë nuk është theksuar se si mund të vlerësohet, e përderisa nuk është kriter obligativ është dashur të ketë sqarime shtesë për vlerësimin e këtij kriteri”, thuhet në reagim.

    Në të njëjtën kohë, CorrWatch ka identifikuar se te kriteri lidhur me përvojën e punës, është bërë vetëm referimi në nenin 17 të Ligjit për Ndërmarrjet Publike por jo edhe zbërthimi i këtij neni në aspektin e kritereve që duhet të plotësohet nga kandidatët. Aq më tepër, kur ky nen bën referencë te një nen tjetër (neni 21) e që mund të shkaktojë huti te kandidatët.

    Sipas njoftimit, të njëjtat shqetësime janë ndarë me menaxhmentin e Trepça Sh.A, por që nuk janë adresuar. Përmes këtij reagimi, CorrWatch kërkon që ndërmarrja të anulojë konkursin për shkak të shkeljeve ligjore si dhe i njëjtit të rishpallet në bazë të kritereve të përcaktuara me legjislacionin në fuqi të cilat garantojnë proces transparencë dhe të bazuar në meritokraci.

  • Kjo është agjenda e festës së 28 Nëntorit nesër në kryeqytet

    Kjo është agjenda e festës së 28 Nëntorit nesër në kryeqytet

    Për nder të festës së 28 Nëntorit, komuna e Prishtinës ka organizuar disa aktivitete të rëndësishme.

    Më poshtë është agjenda e ngjarjeve në kryeqytet:

    10:00 Seanca solemne në Kuvendin Komunal

    Respektimi i himneve

    – Himni i Kosovës – Himni i Shqipërisë

    – Dy pika muzikore

    10:10 Hapja e seancës nga kryesuesi i Kuvendit Komunal, Pëllumb Bajçinovci

    10:15 Fjala e ambasadorit të Shqipërisë në Kosovë, Petrit Malaj 10:30 Fjala e kryetarit të Kryeqytetit, Përparim Rama

    10:45 Foto në grup 10:50 Përfundimi i seancës 12:00 Libri dhumëngjyrësh- teatri “Dodona” Shfaqje për fëmijë. 12:30 Ecje e kryetarit përgjatë sheshit në festimet e Kryeqytetit 13:00 Koncerti në sheshin “Zahir Pajaziti” dhe shpalosja e flamurit – Performansë nga Nusret Muçiqi – Shpalosja e flamurit te hoteli “Grand” – Performansë nga grupi “Çamëria” – Performansë nga grupi “Labëria”.

  • A do ta marrë drejtimin e Kosovës? Përgjigjet De Biasi

    A do ta marrë drejtimin e Kosovës? Përgjigjet De Biasi

    Ish-trajneri i Kombëtares Shqiptare, Gianni De Biasi, ka dhënë një intervistë ekskluzive për Euronews Albania, ku foli në lidhje me kalimin e Kombëtares shqiptare në kampionatin europian të Gjermanisë.

    Gjatë intervistës, ai u ndal te kombëtarja e Kosovës duke thënë se lojtarët janë shumë të mirë dhe se kanë vlera e cilësi.

    Sipas tij, Kosova ka shumë lojtarë që luajnë nëpër Evropë.

    “Përfaqësuesja e Kosovës është një skuadër që ka vlera, cilësi, ka shumë lojtarë që luajnë nëpër Europë dhe besoj se janë kushtet për të punuar mirë. Pastaj çdo gjë varet nga ngritja e një grupi kompakt lojtarësh që mendojnë se arritja e objektivave në jetë është e mundur”-tha ai.

    I pyetur se a është i gatshëm që të bëjë një bashkëpunim me Kosovën dhe të jetë trajner i skuadrës së saj, De Biasi theksoi: “Për momentin jo nuk jam kontaktuar”.

  • Izraeli thotë se i ka dhënë Hamasit opsionin për të zgjatur armëpushimin

    Izraeli thotë se i ka dhënë Hamasit opsionin për të zgjatur armëpushimin

    Një zëdhënës i qeverisë izraelite ka thënë se Hamasit i është dhënë opsioni për të zgjatur armëpushimin.

    “Hamasi është në njoftim – ai opsion për një zgjatje është i hapur”, tha Eylon Levy.

    “Ne duam të marrim edhe 50 pengje të tjera përtej natës së sotme, në rrugën tonë për t’i sjellë të gjithë në shtëpi. Sapo të përfundojë kjo kornizë, Izraeli do të vazhdojë me forcë të plotë”.

    Zëdhënësi tha se 392 ushtarë izraelitë “ranë në betejë” deri më tani. Ndërsa më shumë se 9 mijë izraelitë janë plagosur që nga fillimi i luftës.

  • Parashikimi i motit për shtatë ditët e ardhshme

    Parashikimi i motit për shtatë ditët e ardhshme

    Besim Aliu nga Instituti Hidrometeorologjik i Kosovës, për emisionin e mëngjesit ALARM në ATV, tha se temperaturat e ulëta do të vazhdojnë të mbretërojnë në vendin tonë edhe gjatë kësaj jave.

    Ai tha se nga e marta, reshjet e borës do të kalojnë në reshje shiu në vise të ulëta, ndërsa në vise të larta, sërish do të bie borë.

    “Gjatë ditës së sotme do të kemi rreze dielli, pak vranësira, por që nesër, ditën e marte pas dite, do të kemi sërish kushte të tjera atmosferike, me që këto masa polare kanë ardhur që para 3 apo 4 ditëve në vendin tonë, ato paksa do të jenë pak më pak të qëndrueshme. Reshjet e borës që ishin do të kalojnë në reshje shiu në vise të ulëta, kurse në viset të larta, prapë do të kemi reshje bore për shkak të temperaturave më të ulëta”, tha Aliu.

    Ai tregoi se vikendin që lamë pas, kishte reshje bore në pothuajse gjithë territorin e Kosovës, me përjashtim të qytetit të Pejës.

    Sasia e borës më e madhe u regjistrua në qytetin e Ferizajt me mbi 25 centimetra trashësi.

    “Kishim reshje në pothuajse në gjithë territorin e Kosovës, përjashtuar qytetin e Pejës, ku atje nuk kemi pasur reshje të borës, vetëm reshje të shiut. Sasi të reshjeve të regjistruara në qytetin e Ferizajt, ishin 22 centimetra, do të thotë trashësia e borës ka qenë 22 centimetra, në viset e larta kemi mbi 25 centimetra, do të thotë reshje të borës, atje kemi pasur edhe më herët reshje të borës. Temperaturat më të ulëta ishin -7 gradë Celsius, kurse gjatë ditës do të kalojmë edhe në vlerat pozitive diku 3 apo 4 gradë Celsius në rrafshin e Kosovës dhe diku 5 gradë Celsius në rrafshin e Dukagjinit”, tregoi Aliu. /atvlive.tv

    Parashikimin e plotë të motit për shtatë ditët e javës e gjeni në videon më poshtë:

  • Varka me 573 emigrantë zbarkon në Lampedusa të Italisë

    Varka me 573 emigrantë zbarkon në Lampedusa të Italisë

    Një varkë peshkimi me 573 emigrantë zbarkoi në Lampedusa të hënën e cila ishte nisur nga Libia.

    Grupi, i cili përfshin katër gra dhe dy të mitur, u dërgua në pikën e emigrantëve në Lampedusa. Zona kishte qenë bosh që nga e premtja pasi zbarkimi i fundit me varkë me emigrantë ishte më 22 nëntor, shkruan ANSA, transmeton KosovaPress.

    Ditë më parë, një grua 26-vjeçare dhe një vajzë dy-vjeçare vdiqën dhe tetë persona u raportuan të zhdukur në dy raste të fundosjes së anijeve jashtë ishullit.

    Lampedusa ka qenë në qendër të vëmendjes ndërkombëtare muajt e fundit për shkak të rritjes së madhe të numrit të anijeve me emigrantë që zbarkojnë atje.

    Që nga 21 nëntori, 150,777 migrantë dhe refugjatë kanë mbërritur në Itali me rrugë detare që nga fillimi i vitit, 60% më shumë se të njëjtën periudhë në vitin 2022, sipas shifrave të ministrisë së brendshme. Nga të ardhurit, rreth 70% kanë zbritur në Lampedusa.

  • ​‘Ato janë ne’, thirrje për sensibilizim me të mbijetuarat e dhunës në familje

    ​‘Ato janë ne’, thirrje për sensibilizim me të mbijetuarat e dhunës në familje

    Rreth dy mijë raste të dhunës në familje janë raportuar gjatë këtij viti, ku 90 për qind prej tyre janë ndaj grave dhe vajzave. Kështu u tha në hapjen e fushatës globale “16 Ditët e Aktivizimit Kundër Dhunës me Baza Gjinore me aktivitetin “Ato janë ne”. Presidentja e Kosovës, Vjosa Osmani, ministrja e Drejtësisë, Albulena Haxhiu dhe ministrja e Arsimit, Arbërie Nagavci kanë ngjyrosur duart me ngjyrë portokalli dhe më pas kanë lënë shenjat në banerin e vendosur pranë sheshit të kryeqytetit.

    Presidentja Vjosa Osmani tha se ky aktivizëm kundër dhunës në familje duhet të jetë çdo ditë të vitit.

    “Do të jenë 16 ditë përplot aktivitete ku synojmë që të ngrisim vetëdijen kundër dhunës mbi baza gjinore, dhunës në familje, dhunës ndaj grave në përgjithësi në çdo moment, qoftë ai ambient në shtëpi, në punë, në rrugë apo kudo tjetër. Siç e dini për fat të keq në Kosovë ka pasur raste të shumta të dhunës mbi baza gjinore dhe bashkë me ministren e Drejtësisë kemi punuar përgjatë këtij viti që jo vetëm që të ashpërsohen dënimet ndaj atyre që kryejnë këto vepra të tmerrshme penale, por në të njëjtën kohë që të punojmë së bashku me të gjitha institucionet në mënyrë që të kemi edhe parandalim të këtij krimi, jo vetëm dënim të tij pasi që të ndodhë… Dua të ju bëjë thirrje institucioneve të drejtësisë që ta luftojnë patriarkatin, që të luftojnë këto fenomene dhe t’i japin prioritet këtij luftimi, të këtij fenomeni duke dënuar ata që kryejnë dhunë mbi baza gjinore, duke respektuar edhe ligjin që është në fuqi, por njëkohësisht edhe udhëzuesit për këto dënime”, deklaroi Osmani.

    Sipas Osmanit, një ndër prioritetet është që të ketë institucione të drejtësisë më efikase në luftimin e dhunës mbi baza gjinore. Ajo u bëri thirrje të gjitha grave dhe vajzave që të ngrisin zërin kundër dhunës.

    Ministrja e Drejtësisë, Albulena Haxhiu u shpreh se në kuadër të kësaj fushate kanë paraparë mbi 80 aktivitete kudo në Kosovë.

    “Aktiviteti i sotëm ‘Ato janë ne’, është një thirrje dhe sensibilizim me të mbijetuarat e dhunës mbi baza gjinore dhe dhunës në familje, është po ashtu një thirrje për institucionet e Republikës së Kosovës, sidomos për policinë, prokurorinë dhe për gjykatat që rastet e dhunës mbi baza gjinore, rastet e dhunës në familje të mos i injorojnë, të mos i neglizhojnë, të mos i paragjykojnë por që të marrin veprime serioze në raport me adresimin e tyre dhe përgjegjësit, dhunuesit t’i vendosin para përgjegjësisë penale. Po ashtu është thirrje që qytetarët e Republikës së Kosovës kudo dhe kurdo që janë në dijeni që po ndodhë dhuna ndaj një vajze, ndaj një gruaje që të mos heshtin por që ta ndihmojnë viktimën dhe në anën tjetër është thirrje edhe për viktimat që një asnjë rrethanë të mos i lënë pa raportuar rastet e dhunës në familje”, tha Haxhiu.

    Haxhiu u zotua se po angazhohen që të ofrojnë ndihmë juridike falas dhe në kuadër të kësaj fushate

    Ministrja e Drejtësisë shtoi se gjatë këtyre ditëve do të lansohet programi i parë për trajtimin e dhunuesve.

    “Nga janari deri më tani kemi pasur rreth dy mijë raste të dhunës në familje, ku 90 për qind e tyre janë ndaj vajzave dhe grave. Dhe në anën tjetër përqindja tjetër ndaj djemve dhe burrave. Por edhe kur ndodhë në familje dhuna ndaj djemve dhe burrave, është djali ndaj babait, apo babai ndaj djalit. Shohim se dhunën në familje e kemi fenomen në Republikën e Kosovës”, shtoi ministrja e Drejtësisë.

    Në kuadër të 16 ditëve të aktivizmit, ministrja e Arsimit, Arbërie Nagavci theksoi se kanë filluar aktivitetet vetëdijësuese në të gjitha shkollat e Kosovës.

    “Sot në të gjitha shkollat e Republikës së Kosovës kanë filluar një varg aktivitetesh vetëdijuese për nxënësit, për mësimdhënësit dhe stafin tjetër në shkolla në mënyrë që të gjithë fëmijët, vajzat e djemtë jo vetëm të njihen me të drejtat e tyre por edhe të jenë të gatshëm të adresojnë shkeljen e të drejtave të tyre. Jo vetëm dhunën që mund të ushtrohet mbi baza gjinore por edhe format tjera të dhunës. Po ashtu kemi përgatitur dhe shpërndarë informator për të gjithë mësimdhënësit tanë, i cili do t’i ndihmojë dhe lehtësojë ata edhe në identifikimin e shenjave të nxënësve që mund të kenë përjetuar dhunë, por edhe adresimin e këtyre rasteve tutje”, përfundoi Nagavci.

    Tutje, Nagavci tha se kanë lansuar edhe fushatën për kujdesin shëndetësor.

    16 ditët e aktivizimit kundër dhunës me bazë gjinore do të zgjas deri më 10 dhjetor.

  • ​Dhëndri tajlandez vret katër persona në dasmë, përfshirë nusen

    ​Dhëndri tajlandez vret katër persona në dasmë, përfshirë nusen

    Një para-atlet dhe ish-ushtar tajlandez qëlloi nusen e tij dhe tre të tjerë përpara se të vriste veten në ditën e dasmës, tha policia për BBC.

    Chaturong Suksuk, 29 vjeç dhe Kanchana Pachunthuek, 44 vjeç, u martuan të shtunën në Tajlandën verilindore.

    Sipas raportimeve, ai u largua befas nga dasma dhe u kthye me armë, duke qëlluar gruan e tij, nënën e saj 62-vjeçare dhe motrën 38-vjeçare.

    Plumbat kanë goditur edhe dy të ftuar, të cilët janë dërguar në spital. Njëri prej tyre vdiq.

    Policia tha për BBC Chaturong “ishte mjaft i dehur në atë kohë”, por motivi i tij mbetet i paqartë. Ai kishte blerë armën dhe municionet legalisht vitin e kaluar, shtuan ata.

    Mediat tajlandeze, duke cituar atë që të ftuarit në festë i thanë policisë, thanë se çifti pati një debat gjatë festës. Ai gjithashtu raportoi se Chaturong ishte ndjerë i pasigurt për hendekun e moshës midis tij dhe Kanchana.

    Por policia tha se ky ishte ende spekulim, duke shtuar se ata kishin mbledhur prova dhe pritej që të mbyllnin çështjen “së shpejti”.

    Chaturong dhe Kanchana kishin jetuar së bashku për tre vjet para se të martoheshin, sipas mediave tajlandeze.

    Chaturong kishte fituar një medalje argjendi në not në Lojërat Asean Para në Indonezi vitin e kaluar. Ai gjithashtu besohej të ishte në listën e atletëve që konkurrojnë në Lojërat Botërore të Sportit të Aftësive në Tajlandë muajin e ardhshëm.

    Ai kishte humbur këmbën e djathtë ndërsa ishte në detyrë me forcën paraushtarake të këmbësorisë së lehtë, e cila patrullon kufijtë e Tajlandës.

    Ndërsa të shtënat masive janë të rralla, posedimi i armëve është i zakonshëm në Tajlandë.

    Muajin e kaluar, tre persona u vranë nga të shtënat në një qendër luksoze në Bangkok. Dhe tetorin e kaluar, një ish-polic vrau 37 fëmijë në një sulm me armë dhe thikë në një çerdhe në veri-lindje të Tajlandës.

  • Tahiri: Nëse votohet Projektligji për Fondin Sovran, e dërgojmë në Kushtetuese

    Tahiri: Nëse votohet Projektligji për Fondin Sovran, e dërgojmë në Kushtetuese

    Shefi i Grupi Parlamentar të PDK-së Abelard Tahiri, tha se në seancën e radhës do të diskutohen për Projektligjin për Fondin Sovran, ku sipas tij, nëse votohet PDK-ja do ta dërgojë në Gjykatën Kushtetuese, raporton Ekonomia Online.

    Kjo sipas tij, ngase ky fond do të jetë një strukturë burokratike.

    “Ditën e enjte po ashtu në kuadër të seancës së re do ta kemi Projektligjin për fondin sovran, ne si PDK e kundërshtojmë. Është një strukturë burokratike. Konsiderojmë që është një strukturë ekonomikë shumë e pa dobishme”.

    “Si e tillë konsiderojmë që nëse kalon në leximin e dytë ne si PSK do ta dërgojmë në Gjykatën Kushtetuese, kjo mund të ndërtohet vetëm me ndryshime Kushtetuese. Jemi të bindur që Gjykata Kushtetuese do ta rrëzoj. Ky ligj do të jetë në kundërshtim me Kushtetutën”, tha ai.

    Ai shtoi se Asociacioni do të jetë një institucion paralel i dëmshme për shtetin. Sipas tij, në bazë të këtij drafti Mitrovica e veriut do të jetë kryeqyteti i serbëve të Kosovës, raporton EO.

    “Ky është një pushtet paralel. Këtu nuk po flitet më për Asociacionin, në kompetenca është një institucion paralel në institucionet e Kosovës. Vetmenaxhimi është rregulluar shumë mirë me draft statusin aktual që është e dëmshme”, tha ai.