Author: ATVLive

Ministri i Financave, Hekuran Murati ka deklaruar se ligji për Tatimin mbi Vlerën e Shtuar (TVSh) është në procesin e përditësimit, dhe se grupet punuese janë duke punuar që deri në fund të këtij viti të jetë ligj i ri i cili do të marrë parasysh kërkesat, nevojat, përshtatjen me trendët, por gjithashtu edhe mbështetjen për bizneset dhe prodhuesit vendor.

Në konferencën e përbashkët për media me drejtorin e Doganës së Kosovës, në të cilën u prezantuan lehtësirat e krijuara për bizneset, Murati tha se për të mbështetur edhe prodhuesit vendor në tetorin e vitit të kaluar kanë miratuar edhe lirimin nga taksa doganore për disa prej lëndëve e gjithashtu edhe për pjesët rezervë të makinerive prodhuese ashtu që ta kenë më të lehtë të shtojnë vlerë në vendin tonë.

Në këtë drejtim, ai ka renditur edhe disa nga hapat tjerë që kanë ndërmarrë si qeveri për t’i dalë në ndihmë bizneseve.

“Disa prej hapave që janë marrë viteve të fundit janë edhe kthimi i terminaleve doganore, pra në pronësi apo në operim shtetëror në mënyrë që të hiqet edhe barra administrative, por edhe kostoja financiare që ka qenë për shumë biznese. Në anën tjetër kemi filluar zhdoganimin e plotë në portin e Durrësit që nga tetori i vitit të kaluar që po ashtu e ulë koston për bizneset, sepse mund të përfshihen apo unifikohen disa prej kontrolleve dhe të ulën kostot financiare për bizneset që kalojnë mallrat e tyre nëpër atë port…Për të mbështetur edhe prodhuesit vendor në tetorin e vitit të kaluar kemi miratuar edhe lirimin nga taksa doganore për disa prej lëndëve e gjithashtu edhe për pjesët rezervë të makinerive prodhuese ashtu që ta kenë më të lehtë të shtojnë vlerë në vendin tonë. Edhe ligji për TVSh-në është në procesin e përditësimit, tashmë kemi grupet punuese dhe jemi duke punuar që deri në fund të këtij viti ta kemi një ligj të ri, i cili do të marrë parasysh kërkesat, nevojat, përshtatjen me trendët por gjithashtu edhe mbështetjen për bizneset dhe prodhuesit vendor”, tha Murati.

Ai shtoi se me mbështetjen e Bankës Botërore kanë miratuar vitin e kaluar themelimin e dritares së vetme kombëtare, e cila do të jetë një platformë, ku të gjithë tregtarët, bizneset që merren me tregti do të mundësohet kryerja e të gjitha shërbimeve në mënyrë digjitale në kohë të shkurt dhe me efikasitet të lartë.

Mes tjerash, Murati tha se gjatë vitit të kaluar Dogana e Kosovës ka iniciuar mbi 1800 kundërvajtjeje dhe 83 kallëzime penale përmes të cilave është synuar mbrojtja tregtarëve në mënyrë që të respektohet rendi dhe ligji.

Ndërkaq, drejtori i përgjithshëm i Doganës së Kosovës, Agron Llugaliu tha se arritjet në këtë institucion do të ishin të pamundura pa partnerët e sektorit privat.

Lluagaliu derisa përmendi rritjen e të hyrave, ka theksuar se ka rritje të eksportit në sasi, ndonëse ka rënie në vlerë, për çfarë ka përmendur edhe faktorët që kanë ndikuar.

“Sa i përket eksportit të vitit të kaluar kemi vërejtur që kemi pas rritje në sasi për tre për qind, ndërsa në vlera vërehet që ka rënie, mirëpo kjo i atribuohet rënies së vlerave të produkteve në eksport, si dhe për shkak tregjet globale kanë qenë të ndryshueshme gjatë viteve që lamë pas. Kemi pasur disa rënie dhe kërkesa të tregut ndërkombëtar që nuk janë trende të zakonshme. Tek rryma si kërkesë që ka qenë eksport në vitin 2022, kemi rënie prej 45 milionë kur e krahasojmë me vitin 2023, në vitin 2022 ka qenë kërkesë e madhe për energjinë dhe çmimet kanë qenë të larta. Ngjashëm është tek një pjesë e mobilierisë, tek dyshekët. Përndryshe të gjitha industritë tjera shohim qe e kanë zgjeruar gamën e eksporteve dhe sasinë. Sa i përket lehtësirave kemi pas një qasje për të adresuar në gamë të përgjithshme, kemi punuar më shumë sa i përket menaxhimit të riskut si dhe avancimit të sistemit, por edhe në llogaridhënie”, tha Llugaliu.

Në fund ai tha se nga kjo pasqyrë vërehet se vit për vit, numri i dërgesave në tregtinë e jashtme rritet me 10 për qind përderisa kapacitetet pothuajse mbesin të njëjta, për çfarë tha se është e domosdoshme që të ngritin nivelin e efikasitetin për të siguruar që numri i dërgesave procedohet brenda kohës.

Sindikatat dhe punëtorët e kompanisë Operatori i Sistemit, Transmisionit dhe Tregut të energjisë elektrike të Kosovës (KOSTT), kanë protestuar të hënë para objektit të kësaj ndërmarrje, raporton EO.

Ata përmes kësaj proteste kanë shprehur pakënaqësinë me “rritjen e përshkallëzuar” prej 15% deri 3% të pagave, që e thellon dallimin mes punëtorëve dhe stafit menaxherial.

Deputeti i Aleancës për Ardhmërinë e Kosovës, Shemsedin Dreshaj ka hedhur kritika ndaj qeverisë Kurti për gjendjen në sektorin e shëndetësisë.

Në një konferencë për media, deputeti i AAK-së u shpreh se janë duke mbledhur nënshkrime lidhur me një seancë të jashtëzakonshme në të cilën do të diskutohet lidhur me gjendjen në këtë sektor.

Sipas Dreshaj, gjendja e shëndetësisë në Kosovë është e mjerueshme, pasi sipas tij listat me pritje po vazhdojnë të rriten.

“Ne si grup parlamentar i AAK-së kemi filluar mbledhjen e nënshkrimeve për një seancë të jashtëzakonshme parlamentare lidhur me gjendjen në shëndetësine dhe sigurimet shëndetësore. Arsyeja pse e kemi bërë këtë është një gjendje vërtetë e mjerueshme në shëndetësi me ç’rast vazhdojnë të jenë ende aktuale dhe në rritje listat për pritje, pastaj vazhdojnë problemet e njejta me listën esenciale të barnave në shërbimin klinik universitar të Kosovës.Pastaj vazhdonë që të mbetën problemet e njejta në lidhur me infrastrukturën e dobët në shëndetësi dhe njëkohësisht vazhdon që të perzistojë ikja e personelit shëndetësor jashtë vendit, pra atë që me shumë përvojë e shumë mund e kemi ngritur”, tha ai.

Tutje, ai bëri thirrje që shëndetësia të bëhet prioritet i qeverisjes, pasi që sipas tij nevojiten investime urgjente në këtë sektor, teksa bëri thirrje që të votohet ligji për sigurime shëndetësore sa më parë që është e mundur.

“Ne mund të konstatojmë se urgjent shëndetësia duhet të vëhet prioritet i qeverisjes së vendit. Nevojiten investime urgjente në shëndetësi. Ju e dini se në vitin që lamë pas deri në fund të shtatorit të vitit 2023, vetëm 8% e investimeve kapitale janë realizuar në shëndetësi, ndërsa deri në fund të vitit nuk kemi ndonjë shifër të saktë. Flitet që mund të jenë dikun të 40%. Urgjent duhet të hartohet strategjia për shëndetësi. Me veprime ad-hoc nuk menagjohet vendi dhe urgjent të aprovohet ligji për sigurime shëndetësore e jo të lihet për qershor, por të sillet nesër që grupi parlamentar dhe parlamenti i Kosovës ta përmbyllë një plagë e cila është duke përzistuar me vite në shëndetësi”, tha Dreshaj.

Një serb nga fshati Zebincë të Novobërdës është dërguar pa shenja jete të premten në Spitalin Rajonal të Gjilanit.

Vdekjen e tij e ka konstatuar mjeku kujdestar, ndërsa trupi i tij është dërguar në IML për obduksion, me vendim të prokurorit.

Rasti është cilësuar “Hetim i vdekjes”, njofton policia.

Klara Sanduloviq është vajza e politikanit serb, Nikola Sanduloviq i cili u rrah brutalisht nga agjentët e BIA, pasi kërkoi falje për krimet kundër shqiptarëve gjatë kohës që po bënte homazhe tek varrezat e Jasharajve.

Ajo tha se agjentët serb e kanë marrë në pyetje për tre orë dhe i kërkuan të tregonte me kë ishte takuar gjatë qëndrimit të saj në Prishtinë.

“Ata mendojnë se veprimi im është një veprim kundër qeverisë serbe, se unë po komplotoj kundër qeverisë serbe. Ata më pyetën me kë fola, nëse fola me kryeministrin Kurti, çfarë mesazhesh kishte ai për babin tim, pyetje të ndryshme për aktivitetin tonë politik. Më pyetën kush e mbështet babin dhe me kë jemi në kontakt, nëse njoha njerëz gjatë qëndrimit tim në Prishtinë. Unë nuk mund t’ju përgjigjesha këtyre pyetjeve pasi nuk takova askënd në Prishtinë, thjesht vendosa lule në varrin e Jasharajve dhe ata u acaruan me këtë përgjigje. Më pyetën ku punoj, cilat janë pasionet e mia dhe çfarë bëj në kohë të lirë. Më pyetën pse kam një pasaportë kroate dhe cili është emri i mamasë time”, tha Klara Sanduloviq.

Ajo pas kësaj ka thënë se po ndihet e rrezikuar pasi agjentët e shërbimit sekret tani dinë gjithçka në lidhje me të.

Ajo nënvizoi se ka frikë se e njëjta gjë i që ndodhi të atit pas homazheve në Prekaz mund t’i ndodhë dhe asaj.

“Për tre orë më akuzuan se po komplotoja kundër vendit tim. Ndihem e kërcënuar sidomos pas kësaj bisede 3-orëshe ku ata u përpoqën të mësonin çdo detaj të jetës sime, ku punoj, ku jetoj, ku shkoj dhe këto më duken kërcënime. Pas asaj që i ndodhi babait tim ata mund të përpiqen të bëjën të njëjtën gjë dhe me mua”, tha ajo për Euronew Albania.