Author: ATVLive

EULEX-i ka mbajtur ceremoninë e ndarjes së medaljeve për shërbim në Politikën e Përbashkët për Siguri dhe Mbrojtje për Njësinë e tij Policore të Specializuar Rezervë.

Kjo njësi përbëhet prej 49 pjesëtarëve të Forcës së Xhandarmerisë Evropiane (EUROGENDFORCE) nga Italia, Lituania dhe Franca. Xhelal Sveçla, ministër i Punëve të Brendshme në këtë ceremoni tha se siguria po rrezikohet për shkak të etjeve për luftë, ambicieve për pushtim e tendencave për destabilizim e minim të paqes.

Sveçla tha se edhe siguria e Republikës së Kosovës është sfiduar shumë herë në dy vitet e fundit nga sateliti i Rusisë në rajonin tonë, Serbia.

Sipas tij brenda kësaj periudhe, kemi pasur 112 sulme ndaj pjesëtarëve dhe aseteve të Policisë së Kosovës.

“Këto sfida me të cilat vazhdojmë të ballafaqohemi akoma, kulmuan me kidnapimin e tre zyrtarëve tanë policor thellë brenda territorit të Republikës së Kosovës, me sulmet brutale ndaj ushtarëve të KFOR-it e me sulmin terrorist të 24 shtatorit ku mbeti i vrarë zyrtari policor, rreshter Afrim Bunjaku”, deklaroi Sveçla.

Nderkohë, Giovanni Pietro Barbano, shef i Misionit EULEX në Kosovë tha se ky mision ka për qëllim ofrimin e sigurisë pa dallim përkatësie etnike dhe llogaridhënies pa ndërhyrje politike dhe në përputhje të plotë me standardet ndërkombëtare të të drejtave të njeriut dhe praktikat më të mira evropiane./RTK/

Ministri i Financave, Punës dhe Transfereve, Hekuran Murati, dhe Shefi i Grupit Parlamentar të AAK’së, Besnik Tahiri, janë përplasur lidhur me pagën minimale, raporton EO.

Murati tha se është pikërisht partia e Tahirit që ka bllokuar rritjen e pagës minimale, duke e çuar ligjin në Gjykatën Kushtetuese

“Sa i përket pagës minimale, më lejoni t’ua rikujtojë se paga minimale ka një vit e ca që ne e kemi sjellë në Kuvend si qeveri dhe është vonuar pikërisht në Kuvend sepse opozita ka penguar votimin e pagës minimale. Megjithatë, vitin e kaluar, në muajin korrik, Projektligji që mundëson rritjen e pagës minimale ka kaluar në kuvend. Mirëpo është një subjekt politik që e ka dërgu në Gjykatë Kushtetuese për me blloku rritjen e pagës minimale dhe është pikërisht subjekti politik i deputetit Besnik Tahiri që e ka bë këtë gjë, pra dhjetë deputetë kanë mbledh nënshkrimet për ta dërguar në Gjykatë Kushtetuese dhe prej asaj kohe, ligji që mundëson rritjen e pagës minimale është i bllokuar në Kushtetuese”, tha Murati.

Sipas Muratit, nga rritja e pagës minimale do të përfitonin edhe të gjithë të punësuarit meqë do të rritej pragu i pagës që lirohet nga tatimi.

“Prandaj, para se të kërkojë deputeti Besnik Tahiri që të rritet paga minimale dhe para se ta akuzojë qeverinë pse spo e rrit pagën minimale, duhet t’ju tregojë qytetarëve se është pikërisht ai që ka nënshkruar për me dërgu në Kushtetuese dhe me i lanë mbi 100 mijë qytetarë që përndryshe kishin përfitu nga rritja e pagës minimale dhe të gjithë të punësuarit do të kishin përfitu për shkak se rritet pragu i pagës që lirohet nga tatimi”, tha ministri.

Muratit i replikoi Tahiri, i cili tha se paga minimale duhet të jetë së paku 450 euro. Në fillim të replikës, ai iu drejtua ministrit duke i thënë “Ministër nuk ke nevojë me u bë nërvoz”.

“Te paga minimale, ne s’kemi pas rrugë tjetër sepse s’kemi si ju ballafaqojmë juve si ministër dhe qeverinë përveç shfrytëzimit të dokumenteve demokratike. Ju e keni hjek nenin për veteranët UÇK’së dhe keni vendos pagë minimale, pagë e cila nuk ka pagë më të vogël se 250 euro në sektorin privat. Paga minimale duhet me qenë së paku 450 euro, siç ka propozu AAK’ja dhe mbi këtë bazë ka qenë ankimimi jonë në Kushtetuese. Te shohim çfarë vendimi do të merr Gjykata Kushtetuese”, tha Tahiri.

Murati e mori fjalën sërish ku tha se AAK’ja gjatë fushatës kishte premtuar pagë minimale 1 mijë euro, por se kur e kishin marrë pushtetin i kishin ngritur pagat e tyre.

“Sa i përket pagës mimimale e propozimit të juaj për 400, mua edhe më kujtohet që ju në fushatë patët premtu pagë minimale 1 mijë euro, por kur keni ardh në pushtet ia keni rrit vetës e jo pagën minimale”, tha Murati.

Deputeti i Partisë Demokratike të Kosovës, Bekim Haxhiu ka ngritur alarmin për ikjen nga vendi të profesionistëvese shëndetësorë.

Në seancën e sotme të Kuvendit të Kosovës, Haxhiu ka thënë se për tri vite, mbi tre mijë profesionistë shëndetësorë kanë lëshuar vendin.

Në fjalën e tij, Haxhiu tha se nëse vazhdon ky trend, sistemi shëndetësor do të kolapsojë.

“Për tri vite, mbi 600 mjekë, mbi 2500 infermierë, fizioterapeutë, teknikë të radiologjisë, teknikë mjekësorë, kanë ikur. Pra, janë më shumë se 3100 profesionistë shëndetësorë që kanë ikur nga Kosova në tri vitet e fundit. Kjo është shumë shqetësuese. Nëse ky trend vazhdon me këto shifra alarmante të ikjes së profesionstëve shëndetësorë, sistemi ynë shëndetësor do të kolapsojë. Prandaj është koha që koka të kthehet nga shëndetësia jonë, sa nuk është bërë tepër vonë”, ka thënë ai.

Ai gjithashtu kritikoi Qeverinë për mosndarjen e buxhetit për riparim të protezave të invalidëve të luftës, teksa bëri thirrje për reflektim nga ana e deputetëve.

Kur për 4 vitë qeveria nuk ndanë buxhet për riparim të protezave të invalidëve të luftës, kur një sistem shëndetësor nuk ofron shërbim të kujdesit ndaj invalidëve të luftës për riparim të protezave, cfarë mund tjetër të presim nga kjo qeveri. Qeveria është vonuar, por është detyrë e deputetëve për të reflektuar që gjendja në shëndetësinë tonë për ta përmirësuar”, tha ai.

Ish-ministrja e Punëve të Jashtme të Kosovës, Meliza Haradinaj ka reaguar pasi deputetët e Listës Serbe u panë sot në Kuvendin e Kosovës për t’u nënshkruar vetëm sa për të vazhduar mandatin.

Ajo tha se kjo po ndodh pasi ende ka mungesë të aktakuzës për terroristin Milan Radojiçiq dhe pasi Komisioni Qendror i Zgjedhjeve (KQZ) i ka ndarë 360 mijë euro këtij subjekti politik, përmes të cilit Serbia planifikoi agresionin në Banjskë të Zveçanit.

“Organizata kriminale ‘Lista Serbe’ mbetet e papenguar ligjërisht dhe e pasfiduar politikisht! Mungesa e aktakuzës për (tani-ish) nënkryetarin e organizatës kriminale ‘Lista serbe’ Millan Radojçiq, dhe vazhdimi i financimit të shtetit të Kosovës me 360 mijë euro për këtë organizatë përmes së cilës Serbia planifikoi e ekzekutoi agresionin terrorist në Banjskë (ku mbet i vrarë rreshteri Afrim Bunjaku) – mundësoi që kjo organizatë kriminale të rikthehet në Kuvendin e Kosovës sot e papenguar ligjërisht dhe e pasfiduar politikisht!”, ka shkruar ajo në X.

Drejtori i Press Assocation, Alan Marshall ka deklaruar se keqinformimi dhe përmbajtja e rreme janë një sfidë e madhe me të cilën po ballafaqohen mediat.

Në konferencën ndërkombëtare “Kufijtë e Lirisë së Fjalës”, për nder të 25-vjetorit të themelimit të Agjencisë së Lajmeve KosovaPress, Marshall ka thënë se janë duke u munduar të shikojnë kë kanë audiencë në mënyrë që të verifikohen lajmet.

“Në Mbretërinë e Bashkuar sikurse në vendet tjera, nuk jemi imun ndaj sfidave, modeleve të bizneseve që dalin çdo ditë dhe kemi parë shumë ndryshime në tregun tonë, sidomos këto ndryshme në lidhje me konsolidimin. Ka pasur një kufizim në lidhje me lajmet e nivelit lokal dhe vendor, por e kemi edhe këtë pjesë të modelit digjital që nuk është akoma një bazë stabile dhe këtë e kemi parë këto viteve të fundit ku e kemi rritjen e modeleve të abonimeve online, rritjen në numrin e abonueseve të klientëve, por akoma nuk është ajo pjesa e konfidencës e mjaftueshme të stabilitetit që ajo pjesa bazë, pastaj inteligjenca artificiale që ndryshon çdo ditë, e kemi Facebook, Google dhe është mjaft e lehtë qe të ketë ndikim në një model të tillë të biznesit. Pra, janë sfida të vazhdueshme, si për klientët tanë por gjithashtu edhe për ne. Çfarë po mundohemi të bëjmë është të mendojmë kënd e kemi audiencë për të verifikuar përmbajtjen e lajmeve dhe si mund ta kemi një produkt i cili përshtatet me këto dhomat e lajmeve”, deklaroi Marshall.

Mes tjerash, Marshall tha se janë duke shikuar mundësitë që njerëzit të sjellin informacione të sakta dhe të besueshme për audiencën, në këtë formë të luftohen përmbajtjet e rreme.

“Ne aktualisht kemi edhe klientë që janë jo mediatik si agjenci të lajmeve (flet për AP-në), ku keqinformimi është një sfidë e madhe, përmbajtja e rreme po ashtu, më pas është problem verifikimi i lajmeve për këto organizatat jo mediatike, mund të jetë qeveria, organizatat, korporatat, mund të jenë edhe kompanitë e ndryshme. Kjo për ne është shumë e rëndësishme si treg në shënjestër në lidhje me përmbajtjen, sepse ndryshe nuk kemi me pas mundësi të bëjmë verifikimin dhe të kemi mundësi të ngritim edhe besimin. Mendoj se jemi duke shikuar këto mundësitë, gjithmonë duhet shikuar edhe nga pikëpamja sa mund të sjell para inteligjencës artificiale, ku janë këto mundësi të përfitimeve financiare, dhe nëse besojmë në vlerat e përmbajtjes së besimit, ne atëherë çfarëdo tjetër që po ndodh në botën digjitale, njerëzit akoma do të mundohen të japin informatë të besueshme, të saktë dhe të paanshme”, shtoi ai.

Ndërsa ka shtuar se sfidë mbeten edhe rekrutimi me gazetarë të rinj.

“Ka qenë sfidë në perceptimin e publikut sa i përket vlerës së gazetarisë, dhe kjo dallon prej vendit në vend, mirëpo gjithashtu është e ndërlidhur me çështjen e besueshmërisë…Kuotat kanë që të rekrutojnë gazetarë të rinj, sepse gazetaria nuk shihet si diçka që është me vlerë të madhe shoqërore, është diçka anësore, dhe kjo është sfidë”, tha mes tjerash Marshall.

Në konferencën ku nikoqire është KosovaPress, po marrin pjesë anëtarët e rrjetit më të madh evropian të agjencive të lajmeve EANA (ëëë.neësalliance.org), si dhe atij të Evropës juglindore ABNA SE (ëëë.abnase.com), rrjete këto ku KosovaPress-i, është anëtar.

Ky panel është drejtuar nga Branka Gabriela Vojvodic nga Agjencia e Lajmeve Kroate HINA dhe përbëhet nga: Alan Marshall – drejtori PA Media Group të Mbretërisë së Bashkuar, Camille Bouissou nga Agjencia Franceze e Lajmeve AFP, Natalia Kostina nga Agjencia Ukrainase e Lajmeve UKRINFORM, Aimilios Perdiakris nga Agjencia Greke e Lajmeve ANA-MPA.

Në panelin e dytë, folës do të jenë presidenti i Bordit të Prishtina MALL, Fatmir Zymeri, udhëheqësi i Kolegjit UBT Edmond Hajrizi, profesoresha universitare Besa Luzha, Kushtrim Krasniqi nga Komiteti Olimpik i Kosovës dhe Tualant Hodaj nga Federata e Futbollit të Kosovës, të cilët do të paraqesin pikëpamjet rreth mundësisë së krijimit të sinergjive për mbështetje të iniciativave inovative që avancojnë prosperitetin shoqëror. /KP

Kryeministri i Republikës së Kosovës, Albin Kurti dhe zëvendëskryeministrja dhe ministrja e Punëve të Jashtme dhe Diasporës, Donika Gërvalla-Schwarz, kanë udhëtuar mbrëmë për në Shtetet e Bashkuara të Amerikës.

Kryeministri Kurti pritet të marrë pjesë në seancën e Këshillit të Sigurimit të Kombeve të Bashkuara, që do të mbahet sonte në orën 21:00 sipas orës lokale të Kosovës.

Camille Boissou nga agjencia franceze e lajmeve AFP, ka deklaruar se sfidat për lirinë e mediave po rriten çdoherë e më shumë por agjencitë e lajmeve duhet të përpiqen të jenë imune deri në qetësimin e polarizimeve.

Ajo në panelin e parë me temën “Cilat janë sfidat për Agjencitë e Lajmeve në periudhën e fundit?”, si funksionojnë dhe kujdesen për klientët e tyre besnik.

Boissou: tha se për të përfituar të holla dhe që t’i bëjnë njerëzit të paguajnë, duhet të bëhet kontrollimi i fakteve, daljen në terren dhe të jenë të pa zëvendësuar.

“Askush nuk do t’i paguaj produktet tona nëse nuk jemi të shkëlqyer në punën tonë dhe kjo është e para për të përfituar të hollat, që kurrë mos të dorëzohemi në terren, qoftë ky terreni në Ukrainë, Gaza apo edhe ai virtual ku shfaqen dezinformatat. Duhet të përshtatemi dhe mos të ikim prej mënyrës se si gjeneratat e vjetra i marrin lajmet sepse nëse mbetemi të bllokuar në gazeta dhe varemi prej klientëve me rëndësi të lartë, do të na ikë ky trend dhe mendoj që nuk duhet ta lejojmë që ky trend të na ikë dhe për këtë arsye para disa viteve se kemi ide të reja se si t’i transmetojmë lajmet dhe klientët tanë që të rinjtë të kenë qasje në lajmet tona sepse duam të jemi aty dhe t’i tregojmë klientëve tonë se po mendojmë për këtë dhe po mendojmë se si të jemi aty dhe t’i ndihmojmë klientëve atyre, kështu që na besojnë dhe mbesin klientë besnik”, tha ajo.

Sipas saj, e veçantë në agjencinë e tyre është puna e tyre me platformat madhore google, meta tiktak dhe Microsoft, tani janë klient si çdo klient tjetër dhe bashkëpunojnë me ta dhe kontrollimi i fakteve është diçka që kanë nis që nga 2017, dhe tanimë kanë mbi 140 kontrollues të fakteve.

E derisa për lirin e shprehjes, Boissou theksoi se shijojnë lirin e gazetarëve por sfidat po zmadhohen çdoherë e më shumë me privatizimin e mediave.

“Mendoj që gjëja më e vështirë është që të mbetemi qendror, nëse jo neotral, të përpiqemi të jemi imun ndaj këtyre sepse janë klientët tonë këto media që po polarizohen më shumë, që të mos ndikohemi ndoshta është tepër por thjeshtë ta themi që ta mbajmë gjakftohtësinë dhe të përpiqemi që të mos ndikohemi nga kjo, mendoj që është ajo që do të na shpëtoj deri në kohën kur do të qetësohet paska polarizimi “, tha ajo.

Ajo theksoi se shpreson të qëndrojnë të përditësuar dhe atë që ka mësuar nëAFP, është që kur bëjnë gabime, e përmirësojnë dhe këtë e lexojnë klientët.

Ky u drejtua nga Branka Gabriela Vojvodic nga Agjencia e Lajmeve Kroate HINA dhe përbëhet nga: Alan Marshall – drejtori PA Media Group të Mbretërisë së Bashkuar, Camille Bouissou nga Agjencia Franceze e Lajmeve AFP, Natalia Kostina nga Agjencia Ukrainase e Lajmeve UKRINFORM, Aimilios Perdiakris nga Agjencia Greke e Lajmeve ANA-MPA.

Ndërsa në panelin e dytë, folës do të jenë presidenti i Bordit të Prishtina MALL, Fatmir Zymeri, udhëheqësi i Kolegjit UBT Edmond Hajrizi, profesoresha universitare Besa Luzha, Kushtrim Krasniqi nga Komiteti Olimpik i Kosovës dhe Tualant Hodaj nga Federata e Futbollit të Kosovës, të cilët do të paraqesin pikëpamjet rreth mundësisë së krijimit të sinergjive për mbështetje të iniciativave inovative që avancojnë prosperitetin shoqëror.

Deputetja e Partisë Demokratike të Kosovës, Blerta Deliu tha se Qeveria po kërcënon mediat online me kontroll, duke iu referuar ndryshimeve që Ekzekutivi synon t’i bëjë në projektligjin që parasheh rregullimin e mediave online.

Deliu tha në Kuvend se kjo “i hap rrugë autoritarizmit dhe cenzurës”.

“Këto ndryshime dekurajojnë gazetarët të raportojnë për çështje me interes publik nga frika e hakmarrjes shtetërore të cilën e kemi pa disa herë. Për më tepër, kontrolli shtetëror i medias minon edhe aspiratën e Kosovës për integrim në Bashkimin Europian”, tha ajo.

Deliu kërkoi që Qeveria “ta rishikojë e ta rishqyrtojë prpozimin e saj për ta kontrolluar median online”.

“I bëj po ashtu thirrje që të dëgjohen zërat e gazetarëve dhe të respektohen parimet e demokracisë. Të tërheqin këtë projektligj të rrezikshëm para se të bëhet vonë”, tha ajo.

Asociacioni i Gazetarëve të Kosovës (AGK) dhe Këshilli i Mediave të Shkruara të Kosovës (KMSHK) para pak ditësh i kanë bërë thirrje Qeverisë së Kosovës që të heqë dorë menjëherë prej ndryshimeve në projektligjin që parasheh rregullimin e mediave online.

Projektligj për Komisionin e Pavarur të Mediave, është miratuar nga Qeveria më 27 dhjetor të vitit të kaluar, dhe është dërguar për miratim në Kuvendin e Kosovës.

Ky hap i ekzekutivit është konsideruar përpjekje e re e Qeverisë aktuale që t’i sulmojë mediat.

Shefi i grupit parlamentar të AAK-së, Besnik Tahiri, ka kritikuar Qeverinë Kurti për mungesë të investimeve kapitale.

Ne seancën e sotme parlamentare, Tahiri tha se tashmë po bahën gati 3 vjet që nga 14 shkurti i vitit 2021 kur Lëvizja Vetëvendosje ka ardhë në pushtet, por që sipas tij, ka mungesë të projekteve.

Ai tha se Qeveria nuk ka arritur t’i ekzekutojë mbi 1 miliardë e 125 milionë euro në investime kapitale, teksa tha se investimi i vetëm i këtij pushteti është ura e Saradranit.

“Tani jemi vetëm 6 ditë para 14 shkurtit kur Lëvizja Vetëvendosje, pra tri vjet qeverisje. Në secilin vend normal do të bëhet një bilanc dhe në secilën demokraci funksionale do të ishte një llogaridhënie se cka ka ndodhur për tri vjet nga një pushtet që i ka mbi 50 për qind. Më lejoni që sot t’i bëj tri bilance në rrafshin e brendshëm. Po e nisi me shpenzimet kapitale. A mund të besoni që për dy vjet e nëntë muaj, kjo qeveri nuk ka arritur të ekzekutojë 1 miliardë e 125 milionë euro investime kapitale që nënkupton për shumën 1 miliardë e 125 milionë euro kemi më pak rrugë, më pak shkolla dhe gjithcka që ka qenë në platformën “Krejt dhe Drejt” ka qenë një mashtrim i madh. “E keni marrë Kosovën me celësa në dorë. Tri vjet pas vetëm një investim kapital e keni që mund të thoni ky është investimi. Ajo është ura që e lidh fshatin e Bekë Berishës dhe Arben Gashit”, tha Tahiri.

Tahiri gjithashtu foli edhe për pagat e sektori publik për të cilat tha janë të gjendje të mjerueshme dhe se sipas tij, pagat e vetme që janë rritur në këtë sektor është ajo e kryeministrit dhe ministrave.

“Pagat në sektorin publik janë tmerri i tmerrit. Realisht rritje tek 80% te administrata e shërbyesve civilë ka rritje vetëm prej 20 deri 40 euro. Pra 80 për qind e administratës e kanë këtë rritje me këtë ligj. Rritja më e madhë është tek kryeministri, tek ministrat, tek të emëruarit politik. Aty është bërë rritja më e madhe, mbi 50 për qind. A po e shihni se kush po i ngritë pagat?”, tha Tahiri.

Një tren i lehtë që lidh Prishtinën me Aeroportin Ndërkombëtar të Prishtinës në Sllatinë.

Ky është projekti i radhës i Ministrisë së Infrastrukturës, i cili është aprovuar për financim nga Bashkimi Evropian, tha sot ministri i Infrastrukturës, Liburn Aliu.

Aliu tha se treni do të kalojë nga Prishtina në Fushë Kosovë dhe i njëjti mundëson shkarkimin e trafikut në rrugën Prishtinë-Fushë Kosovë.

“E kemi projektin e hekurudhës, nga Prishtina në aeroportin e Prishtinës, e që është linjë hekurudhore që sapo është aprovu. Është apovu nga BE për financim, e kemi shty si projekt i cili lidh Prishtinën me aeroportin e që kalon edhe në Fushë Kosovë. Mundëson shkarkimin e trafikut nga Fushë Kosova në Prishtinë. Po ashtu projektet tjera ndërlidhse, jemi në fazë të komunikimit me Komunën e Prishtinës për unazën e Prishtinës. Kjo mbase do të filloj të realizohet me segmente, është në fazë të përfundimit. Projekti i tillë është i rëndësishëm për shkarkimin e trafikut në kryeqytet”, tha ai.