Author: ATVLive

Komuna e Prishtinës e ka bllokuar një hapësirë në sheshin “Nënë Tereza”, pasi kulmi i një ndërtese rrezikon të bie për shkak të erërave së fuqishme, raporton EO.

Në vendin e ngjarjes, janë parë ekipe të zjarrfikësve dhe kamioni intervenues për heqjen e kulmit.

Komuna i ka ftuar qytetarët që të kenë kujdes për shkak të erërave.

“Ju lutemi keni kujdes gjatë ecjes në parqe, afër pemëve apo objekteve të larta, mos kaloni afër tyre për shkak të erërave të forta të cilat po fryjnë me shpejtësi 70km/h”, thuhet në njoftim.

Punëtorët teknikë dhe ata të sigurimit fizik të Universitetit të Prishtinës kanë protestuar sot para rektoratit, duke kërkuar paga më të larta, pasi siç thonë ata 250 euro nuk mjaftojnë për mbijetesë.

Kryetari i Shoqatës Sindikale të punëtorëve të Sigurimit Fizik të Universitetit të Prishtinës, Arsim Gjinovci tha se janë të gatshëm dhe se po presin të bashkëpunojnë me rektoratin.

“Siç e dimë po hyjmë në javën e katërt të grevës pa asnjë bisedim me rektorat. Këta janë ata që na kanë pru këtu. Ne nuk kemi ardhur me dëshirën tonë, por këta nuk dëshirojnë ta lëvizin pagën bazë, që do të thotë është paga bazë 322 euro. Ne jemi të gatshëm për të bashkëpunuar, këta nuk dëshirojnë të dëgjojnë për ne”, tha ai.

Kryetari i Shoqatës Sindikale të punëtorëve teknikë të Universitetit të Prishtinës, Riza Shala tha se iu kanë bllokuar pagat edhe në muajin e shenjtë të Ramazanit.

“Këta le se nuk po bëjnë rritje të pagës, por e kanë bllokuar pagën tonë minimale për ditën e shenjtë të Ramazanit, plus nuk kanë ardhur të bisedojnë asnjë moment me neve, të na i dëgjojnë hallet, kështu që ne jemi në hall me ta. Kjo është arma më e fortë e tyre, më e fortë se e armikut që po e zbrazin Kosovën. Numri i punëtorëve teknikë është afër 120”, tha ai.

E kryetari i Sindikatës së Pavarur të Punëtorëve të Sektorit Privat, Jusuf Azemi u shpreh se Qeveria e Kosovës është e gatshme që deputetëve serbë në Parlamentin e Kosovës t’u paguajë pagë mujore mbi 2 mijë euro, derisa siç tha ai, i sanksionon punëtorët teknikë e ata të sigurimit fizik të UP-së.

“Qeveria e Kosovës është e gatshme që deputetëve serbë në parlamentin e Kosovës t’u paguajë pagë mujore mbi 2 mijë euro pa kryer asnjë punë, pa marrë pjesë kurrë dhe ata nuk i sanksionon, por na sanksionon neve. Përderisa punëtorët në bazë të ligjit janë të garantuar se nuk guoxn t’u ndërprehet paga e punëtorëve që janë në grevë, rektorati e bëri atë të mirë dhe e bëri prerjen e disa punëtorëve të cilëve ua kanë ndalë pagën”, tha ai.

Punëtori Teknik në Fakultetin Filozofik të UP-së, Zeqir Krasniqitha se 250 eurot që i marrin nuk mjaftojnë as për mbijetesë.

“Unë personalisht varem prej kësaj rroge 250 euro. Nëse edhe një javë ditë nuk dalin pagat e mia për familjen time, unë do të mbes në mëshirën e atyre kolegëve mbrapa që janë policia sepse sot askush nuk mundet të mbijetojë me 250 euro. Do të dorëzohemi sepse nuk kemi ku të mbështetemi tjetër”, tha ai.

Ngritje të pagave kërkoi edhe punëtorja teknike në Fakultetin Juridik, Emine Gashi.

“Vetëm pagat, jo ndonjë ankesë diçka luks nuk e kemi, pagën me na e bë 400 euro asgjë më shumë. Sa e hanë këta një drekë ne e dëshirojmë një rrogë, nuk po kërkojmë diçka që nuk munden të na e plotësojnë, vetëm me na barazu me sektore të tjera”, tha ajo.

Si pasojë e erërave të forta, Komuna e Prishtinës u ka bërë thirje qytetarëve që të kenë kujdes gjatë ecjes në parqe, afër pemëve dhe objekteve të larta.

Lulëzim Fushtrica drejtor për Siguri dhe Emergjenca në Komunën e Prishtinës, ka kërkuar nga qytetarët që të kenë kujdes të shtuar për shkak të erërave të forta, të cilat po fryejnë me shpejtësi prej 70 km/h.

“Të nderuar qytetarë, ju lutemi keni kujdes gjatë ecjes në parqe, afër pemëve apo objekteve të larta, mos kaloni afër tyre për shkak të erërave të forta të cilat po fryjnë me shpejtësi 70km/h”, ka shkruar Fushtica në Facebook.

Ndërkohë, “Vrojtuesit e lagjes – Prishtinë”, kanë publikuar disa pamje nga kryeqyteti, ku për shkak të erërave të forta, rrezikohet jeta e qytetarëve.

Kjo faqe ka publikuar pamje të cilat kanë rrezikuar edhe aksidente në komunikacion. Një rast është te një mbikalim në Veternik, ku baneri “Heronj të luftës”, pasi është shkoqur nga ky mbikalim ku ishte vendosur, ka përfunduar mbi një veturë që po kalonte kësaj rruge.

Sekretari i Përgjithshëm i NATO-s, Jens Stoltenberg, ka thënë se Ukraina është më afër se kurrë anëtarësimit në Aleancë, duke thënë se “pyetja nuk është nëse, por kur”.

Ai ka thënë të hënën në një konferencë për media se ka besuar që Suedia, që të enjten u anëtarësua zyrtarisht në NATO, është aleate e përkushtuar.

“Ukrainë do të bëhet aleate e NATO-s. Pyetja nuk është nëse, por kur. Ukraina tash është më afër se kurrë më parë anëtarësimit në NATO…Suedia do të jetë një aleate e përkushtuar…”, është shprehur Stoltenberg.

Ai ka theksuar se dorëzimi për Ukrainën nuk është paqe, duke potencuar se “vetëm presidenti rus ka fuqinë për t’i dhënë fund luftës”.

Komentet e sekretarit të NATO-s erdhën pasi flamuri suedez u vendos në selinë e NATO-s, duke u radhitur si shteti i 32-të anëtar.

Presidenti i Serbisë, Aleksandër Vuçiq ka reaguar pas publikimit të fotografisë së ambasadorit serb në ShBA, Marko Gjuriq me të sanksionuarin e ShBA-së dhe Britanisë së Madhe, Milan Radoiçiq.

Derisa ka deklaruar se nuk e ka pyetur Gjuriqin për takimin me Radoiçiqin, i cili e ka marr përgjegjësinë për organizimin e sulmit terrorist në Banjskë, Vuçiq ka thumbuar kryetarin e Partisë Republikane të Serbisë, Nikola Sanduloviq, për homazhet që ky i fundit ka bërë tek varri i Blerina Jasharit në Prekaz, shkruan KosovaPress.

“S’e kam pyetur Marko Gjuriqin nëse është takuar këtu apo atje, as nuk e pyeta kur, ku dhe pse, ose nëse është ngrit nga tavolina për tu parë me Milan Radoçiqin, për t’u ulur për dy minuta apo ka ardh me të, asgjë nuk e kam pyetur, po vetëm i kam shikuar të gjithë denoncuesit dhe injorantët tjerë sipas modelit te vitit 1943, si do ta raportojnë dikë diku, ‘imagjinoni me kriminelin serb është takuar’, me të vërtetë, ndërsa do t’i lavdëroni të gjithë ata që shkojnë tek varri i Adem Jasharit që vrau policët dhe ushtarët serbë të ligjshëm, dhe prapë do të luani rolin e viktimës”, ka thënë ai për mediat serbe.

Një fabrikë është përfshirë nga zjarri sot në Parkun e Biznesit në Korroticë të Epërme të Drenasit.

Lajmin e ka konfirmuar zëdhënësja e Policisë për rajonin e Prishtinës, Flora Ahmeti.

“Sot rreth orës 11:00, kemi pranuar informatën për një incident zjarri në një fabrikë në fshatin Korroticë e Epërme të Drenasit. Në vendngjarje janë zjarrfiksit dhe policia të cilët po merren me rastin. Për detaje njoftoheni me kohë”, tha Ahmeti.

Pas zjarrit të madh që ka përfshirë një fabrikë në Parkun e Biznesit në Drenas, ka reaguar kryetari i kësaj komune, Ramiz Lladrovci.

Lladrovci ka kërkuar edhe ndihmën e KFOR-it për që “me helikopterë me ardhë me gjuajt ujë dhe me zvogëlu sa ma pak këtë zjarr”.

Ai ka përmendur edhe dëmin ekologjik që po i bëhet ambientit nga ky zjarr.

“Iu shprehi keqardhje pronarëve të fabrikës të cilëve u është bërë një dëm i madh. Por, siç po e shihni dëmi është më i madhe spse është një dëm ekologjik. Tashmë ne kemi marrë ankesat e parë prej fshatrave, ku fshatarët po dëmtohen nga ky tym që po del nga kjo fabrikë. Unë i kam njoftu edhe institucionet qendrore, e kam njoftu edhe ministrin e Brendshëm, i cili po i ndërmerrë të gjitha masat për të ardhë edhe forca tjera. Por kam kërkuar që edhe KFOR-in nëse kanë mundësi, me helikopterë me ardhë me gjuajt ujë edhe me zvgoëlu sa ma pak kit zjarr. Zjarin nuk mund të fik askush, pasi është plastik”, ka thënë Lldarovci.

Këtë e ka konfirmuar Policia e Kosovës, e cila ka bërë të ditur se zjarrfikësit dhe njësitet e policisë janë në vendngjarje.

“Sot rreth orës 11:00, kemi pranuar informatën për një incident zjarri në një fabrikë në fshatin Korroticë e Epërme të Drenasit. Në vendngjarje janë zjarrfikësit dhe policia të cilët po merren me rastin. Për detaje njoftoheni me kohë”, ka thënë Flora Ahmeti, zëdhënëse e Policisë për rajonin e Prishtinës.

Shtetet në Evropë pothuajse e kanë dyfishuar importin e armëve, teksa në anën tjetër Shtete e Bashkuara të Amerikës e kanë rritur eksportin.

Kjo u bë e ditur në raportin e Institutit Ndërkombëtar për Kërkim të Paqes, ku thuhet se SHBA-ja ka arritur eksportet e saj të armëve për 17 për qind mes viteve 2014-2018 dhe 2019-2023.

Pas SHBA-së është Franca, teksa sipas raportit, Rusia për herë të parë është eksportuesja e tretë më e madhe e armëve.

Mbi 50 për qind të armëve që janë importuar nga shtetet në Evropë prej vitit 2019 deri në 2023 raportohet se ishin nga SHBA, shifër kjo shumë më e lartë krahasuar me 35 për qind sa ishte në periudhën paraprake.