ATV

Author: ATVLive

  • Lulzim Tafa zgjidhet anëtar i jashtëm i Akademisë së Shkencave të Shqipërisë

    Lulzim Tafa zgjidhet anëtar i jashtëm i Akademisë së Shkencave të Shqipërisë

    Përgatiti: Haris Ademi

    Profesori dhe poeti, Lulzim Tafa, si dhe inxhinierja Mira Murati, janë zgjedhur anëtarë të jashtëm të Akademisë së Shkencave të Shqipërisë.

    Ata morën votat e Asamblesë së Përgjithshme të kësaj akademie, në mbledhjen e së hënës, në Tiranë. Rekomandimet për votimin e Tafës i dhanë akademikët Xhevahir Spahiu e Shaban Sinani. Ndërsa, u veçuan tre përbërës të profilit të tij akademik e letrar.

    “Kandidati ka një veprimtari botuese të pandërprerë prej më shumë se tri dekadash si poet, që cilësohet me të drejtë përfaqësues i brezit letrar shqiptar të pas 1990-ës në Kosovë. Është autor i 10 vëllimeve poetike, të cilët kanë merituar çmime ndërkombëtare të mirënjohura si Neruda e Eminescu, duke përfshirë urdhrin presidencial francez “Ordre des Arts et de literature”. Këtij certifikimi i shtohet numri i madh i gjuhëve në të cilat është përkthyer vepra e tij. Numri i gjuhëve në të cilat lexohet poezia e tij është rreth 30″, tha kryetari i Akademisë së Shkencave të Shqipërisë, Skender Gjinushi.

    Ndërsa, u çmua edhe roli i shqiptares Mira Murati, e cila është një nga njerëzit kryesorë në kompaninë “Open AI”, që ka bërë revolucion në teknologji së fundmi, përmes inteligjencës artificiale.

    “Me emrin e saj lidhen arritje nga më të rëndësishmet në zhvillimin e disa prej produkteve më të shquara të “Open AI”, duke përfshirë serinë e modeleve gjuhësore të “Transformerit të Paratrajnuar Gjenerues” (GPT)”, tha Gjinushi.

    Poeti Lulzim Tafa është i njohur për artin e tij, si njëri ndër poetët shqiptarë më të përkthyer në botë, njëherësh laureat i shumë çmimeve ndërkombëtare. Ai ka fituar dhjetëra çmime prestigjioze ndërkombëtare për letërsi, ndërsa mban shumë tituj nderi në akademi e universitete botërore. Së fundmi, Lulzim Tafa u dekorua edhe nga presidenti francez, Emanuel Macron, me dekoratën “Oficer i Urdhrit Kombëtar të Letrave dhe Arteve”, që është dekorata më e lartë të cilën shteti francez e ndan në fushën e artit dhe letërsisë.

    Është profesor universiteti, ligjërues e profesor i ftuar, anëtar i Akademisë Evropiane të Shkencës dhe Arteve dhe i Akademisë së Shkencave të Bosnjës.

    “Është themelues e mundësues i pesë çmimeve e mirënjohjeve në letërsi, duke përfshirë çmimin “Ali Podrimja”; është aktivist për vokacion në lëvizje emancipuese, që nga lëvizjet letrare, nismat në favor të studentëve. Është themelues i “The British School of Kosova”, i Universitetit AAB (prej 8 vjetësh dhe rektor i tij), i televizionit jopublik ATV dhe gjithashtu i një teatri jopublik shqiptar në Prishtinë”, tha Gjinushi.

    Në mbledhjen e së hënës u tha se votimi i suksesshëm për anëtarët e rinj të jashtëm, i bën nder vetë akademisë.

    Përveç Tafës dhe Muratit, si anëtarë të jashtëm në Akademinë e Shkencave të Shqipërisë, të hënën u votuan edhe Lea Ypi, Gëzim Alpion dhe Angjelin Preljocaj.

  • Sylejman Selimi e Jahir Demaku thonë se e vuajtën dënimin pa qenë fajtorë

    Sylejman Selimi e Jahir Demaku thonë se e vuajtën dënimin pa qenë fajtorë

    Përgatiti: Nora Luta

    Më shumë se një dekadë pas ngritjes së aktakuzës për krime lufte, Sylejman Selimi e Jahir Demaku po vazhdojnë ballafaqimin me drejtësinë.

    Dëshmia e dëshmitarit A, është e vetmja provë në të cilën e mbështetet Prokuroria Speciale pikën e aktakuzës së përpiluar nga EULEX-i ndaj ish pjesëtarëve të Ushtrisë Çlirimtare të Kosovës, e cila u kthye në rigjykim nga Supremja.

    Në fjalën përfundimtare, PSRK-ja argumentoi pse sipas saj gjykata duhet t’ia falë besimin kësaj prove.

    Për Selimin kërkesa e PSRK-së që ai dhe Demaku të dënohen është tragjike dhe e bazuar në një dëshmitar që, sipas tij, ka shpifur.

    Duke folur për angazhimin e tij gjatë luftës si komandant i Zonës Operative të Drenicës, Selimi mohoi të ketë rrahur civilë, për çka e ngarkon organi i akuzës.

    Ndërsa, Demaku, i cili para trupit gjykues të kryesuar nga gjyqtari Ngadhnjim Arrni, u thirr në fjalët e ish-gjyqtarit të EULEX-it, Malkom Simons, tha se rasti ndaj tyre ka qenë i politizuar.

    Rasti ndaj Demakut e Selimit u kthye në rigjykim nga Supremja në vitin 2018 për vetëm një pikë të aktakuzës.

    Procesi nisi pas gjashtë vjetësh, në fillim të këtij muaji, kur lënda u bart në Departamentin Special, nga Gjykata e Mitrovicës.

    Mbrojtja teksa theksoi se me zgjatjen e procedurave palëve iu shkelën të drejtat, vuri në pikëpyetje besueshmërinë e dëshmitarit A.

    Sipas aktakuzës, ata keqtrajtuan disa civilë në Likoc të Skenderajt gjatë periudhës së luftës së fundit.

    Selimi ishte dënuar me tetë vjet burgim, ndërsa Demaku me shtatë, pasi ishin shpallur fajtor në rastin “Drenica 1” dhe “Drenica 2”.

  • Zyrtare: Marrëveshja me Kosovën, kusht për anëtarësimin e Serbisë në BE

    Zyrtare: Marrëveshja me Kosovën, kusht për anëtarësimin e Serbisë në BE

    Përgatiti: Fatlum Jashari

    Përfundimisht, 13 muaj pas dakordimit në Ohër, Bashkimi Evropian kushtëzoi rrugën e anëtarësimit të Serbisë me zbatimin e marrëveshjes bazë dhe shtojcës me Kosovën.

    Në mbledhjen e së hënës, Këshilli për Punë të Jashtme i bllokut 27-anëtarësh miratoi ndryshimet në Kapitullin 35 të negociatave me shtetin fqinj.

    “Ndryshimet (në Kapitullin 35) janë miratuar sot nga Këshilli për Punë të Jashtme. Përditësimi do t’i transmetohet Serbisë nëpërmjet një letre. Dokumenti nuk është bërë publik”, tha Liss Jaansalu nga Këshilli i BE-së.

    Referuar Shtojcës së Ohrit, BE-ja konfirmoi se obligimi i njëjtë do të zyrtarizohet së shpejti edhe për Kosovën.

    “Ne mirëpresim vendimin e sotëm të Këshillit për përditësimin e kritereve, duke përshirë marrëveshjen në Kapitullin 35 të negociatave për anëtarësim me Serbinë. Në këtë kontekst, do të përditësohet edhe agjenda e mbledhjes së radhës të Grupit Special të Normalizimit për Kosovën. Ne presim që të dyja palët të zbatojnë marrëveshjen dhe të gjitha detyrimet e tjera të dialogut të mbetura pezull – pasi kjo është çelës për rrugët përkatëse evropiane”, ka thënë zëdhënësi i Bashkimit Evropian për Politikë të Jashtme dhe Siguri, Peter Stano.

    Këtë vendim, hulumtuesi i lartë në IKD, Naim Jakaj, e vlerësoi formë detyrimi në mungesë të vullnetit të palëve për zbatim të obligimeve.

    “Kosova dhe as Serbia nuk mund t’i ikin në asnjë moment marrëveshjeve për të cilat janë dakorduar, veçanërisht në Ohër dhe në Bruksel. Kjo është parë sot me kushtëzimin e Serbisë për Kapitullin 35. Ndërkohë edhe për Kosovën do të jenë detyrime të reja. Nuk do të duhej obligimet të cilat i ke marrë përsipër vetë t’i zbatosh, të detyrohesh të zbatohen në rrugë të tjera, në atë që quhet rrugë drejt BE-së”, tha Jakaj.

    Dokumenti për të cilin Kosova dhe Serbia u pajtuan më 18 Mars 2023, në Ohër, saktëson që zbatimi i Marrëveshjes bazë dhe Shtojcës do të bëhet pjesë integrale e procesit të anëtarësimit në BE për të dyja shtetet.

  • Osmani në KS të OKB-së: Terroristët enden të lirë në Serbi

    Osmani në KS të OKB-së: Terroristët enden të lirë në Serbi

    Përgatiti: Armand Hoti

    Së bashku me katër gra të mbijetuara nga krimet e luftës, Presidentja Vjosa Osmani, u paraqit në Këshillin e Sigurimit të Kombeve të Bashkuara.

    Në fjalën e saj, Presidentja e Kosovës, renditi të bëmat nga Serbia, përfshirë këtu sulmin e Banjskës, kidnapimin e policëve në veri, presionin ndaj serbëve në Kosovë por edhe sulmin ndaj gazetarëve.

    “Përpjekjet nga Serbia për destabilizim janë aktive. E ka eskaluar agresionin fillimisht me kidnapinimin e policëve, sulmin ndaj gazetarëve e sulmin terrorist ndaj Kosovës në shtator. Serbët që ishin integruar në institucionet e Republikës së Kosovës u detyruan të japin dorëheqje për shkak të presionit të ushtruar nga strukturat ilegale të Serbisë. Sulmet ndaj pronave të tyre, shkatërrimi dhe rreziqet për jetën e tyre, me qëllim që t’i detyrojnë ata të largohen nga institucionet e Kosovës, janë skenarë të shpeshtë që thirren ndaj atyre që refuzuan të japin dorëheqje nga institucionet e Kosovës. Pra, po, serbët janë nën presion, por jo nga Qeveria e Kosovës por nga Qeveria e Serbisë”, tha Osmani.

    Veç kësaj, Osmani foli edhe për heroinat që ishin bashkë me të në sallë, se cfarë ato kanë kaluar gjatë luftës.

    “Ata donin ta shkatërronin dhe t’i vrisnin shpresën. Kjo është arsyeja pse ata zgjodhën pa mëshirë një nga mjetet më mizore të luftës – përdhunimin. ‘Do të vuash më shumë nëse të lëmë të jetosh’, i thanë, ndërsa ajo i lutej ta vrisnin”, tha Osmani.

    Mirëpo prezenca e tyre, i pengoi presidentit serb.

    “Keni sjellë njerëz që nuk e kanë vendin këtu në korrin diplomatik apo në ekipin këshilldhënës të zonjës Osmani, është një lloj teatri politik dhe një kurth për delegacionin serb”, tha presidenti i Serbisë, Aleksandar Vucic.

    I menjëhershëm ka qenë reagimi i Presidentës së Kosovës, e cila tha se të katër gratë janë pjesë e kabinetit të saj.

    Vucic, u ankua se kryeministri Albin Kurti po i diskriminon serbët.

    “Serbia i paraqiti Këshillit të Sigurimit të OKB-së gjithçka që ndodhi, dhunë ligjore, dhunë fizike dhe shënjestrim selektiv të serbëve në Kosovë. Të gjithë anëtarët e Këshillit të Sigurimit të OKB-së vlerësuan se argumentet dhe ankesat tona të dorëzuara ishin në përputhje me faktet. Lëvizjet e pushtetarëve të Prishtinës prekin të gjithë në mënyrë të barabartë, pavarësisht moshës dhe gjinisë, dhe të gjitha brenda agjendës shoviniste që synon krijimin e Shqipërisë së Madhe”, tha Vucic.

    Këto akuza, i quajti totalisht të rreme presidentja Osmani.

    Delegacionet e shteteve njohëse të Kosovës, deklaruan se dialogu i lehtësuar nga Bashkimi Evropian është rruga e vetme për normalizimin e marrëdhënieve mes Kosovës dhe Serbisë.

    Ndërkaq, në raportimin e saj për periudhën kohore 19 shtator- 15 mars, shefja e UNMIK-ut, shprehur të hënën pakënaqësinë e saj për mungesën e përparimit të arritur mes Kosovës dhe Serbisë në muajt e fundit, drejt normalizimit të marrëdhënieve.

    Më shumë detaje i gjeni në Edicionin Qendror të lajmeve në videon më poshtë:

  • Nis “Java e imunizimit”, në rritje vaksinimi i qytetarëve

    Nis “Java e imunizimit”, në rritje vaksinimi i qytetarëve

    Përgatiti: Sara Shehu

    Për një jetë më të shëndetshme institucionet e shëndetësisë u kanë apeluar qytetarëve për vaksinim.

    Në njërën nga aktivitetet e të hënës, me rastin e shënimit të javës së imunizimit, u potencua se vaksinimi është i një rëndësie të lartë për ruajtjen e shëndetit të shoqërisë.

    Me këtë rast, ministri Arben Vitia ka thënë se gjatë viti 2023 mbulueshmëria me vaksina ishte në shkallën 90%.

    Edhe sipas drejtorit të IKShKP-së, Naser Ramadani, imunizimi është njëri prej investimeve më të mira të MSh-së.

    Kurse, kryesuesja e Komisionit të shëndetësisë, Fatmire Kollçaku, tha se ende duhet kohë për të kuptuar shoqëria se vaksinimi është një nga shtyllat kryesore për parandalimin e sëmundjeve të ndryshme.

    Pjesë e këtij organizimi ishin edhe partnerët ndërkombëtarë nga UNICEF-i, të cilët u shprehën të kënaqur me punën e profesionistëve shëndetësorë në vend.

    Ndërkaq, gjatë këtij diskutimi, nëpërmjet një video-lidhje, Oleksandr Martynenko, shef i zyrës së Organizatës Botërore të Shëndetësisë në Kosovë, ka bërë të ditur se për shkak të vaksinimit të rregullt në vitin 2023 janë shpëtuar 4 milionë vdekje në botë.

  • Kryetarët e PDK-së në veri s’e përfillin kërkesën e Kurtit

    Kryetarët e PDK-së në veri s’e përfillin kërkesën e Kurtit

    Përgatiti: Driton Sadiku

    Kryetarët e katër komunave veriore do të mund ta vazhdojnë mandatin të paktën edhe për një vit.

    Por nga maji i vitit të kaluar kur morën zyrtarisht mandatin, dy nga ta, respektivisht ai i Zubin Potokut e ai i Zveçanit, detyrën e ushtruan në zyra alternative.

    Por tash kur procesi për shkarkimin e tyre dështoi, kryeministri Albin Kurti ua çoi një selam që të dalin në objekte të komunave.

    Por, para kërkesës së kryeministrit, kryetari i Zveçanit Ilir Peci preferon të veprojë në koordinim me ndërkombëtarët.

    “Do të vazhdojmë prej këtu, por të shohim, ne me këshillat e miqve ndërkombëtarë kemi qëndruar këtu dhe me këshillat e tyre do të vendosim se a do të qëndrojmë apo do të shkojmë në objekt zyrtar”, tha Peci.

    Megjithatë, disa zyra tashmë janë aktive në komunën e Zveçanit. Njashtu edhe në atë të Zubin Potokut, por aty mund të shkojë edhe kryetari.

    Izmir Zeqiri tha se fillimisht duhet rinovuar një pjesë të objektit e më pas të vendosen aty.

    “Së shpejti do të jem aty, një pjesë e kabinetit tim gati çdo ditë është aty, qoftë këshilltari apo drejtorët, por së pari duhet të përgatiten zyrat për të funksionuar me tërë stafin. Unë kam mundur të shkoj edhe para një muaji edhe tash por kur të shkoj duhet të jetë teknikisht e gatshme”, tha Zeqiri.

    Zeqiri, Peci, Hetemi e Atici do mund të vazhdojnë të qëndrojnë në krye të komunave veriore, të paktën dhe për 12 muaj, pasi nisma për shkarkimin e tyre nga detyra dështoi të dielën meqë nuk u mblodhën votat e mjaftueshme.

  • ASK: Mbi gjysmë milioni banorë rezidentë janë regjistruar deri tash

    ASK: Mbi gjysmë milioni banorë rezidentë janë regjistruar deri tash

    Përgatiti: Pranvera Krasniqi

    Për 17 ditë, zyrtarët e Agjencisë së Statistikave i kanë regjistruar mbi 530 mijë banorë rezidentë në Kosovë.

    Sipas ASK-së, që organizoi konferencë të hënën, në këto shifra hyjnë edhe qytetarë të komunitetit serb, në komunat veriore të vendit.

    “Deri më tani procesi ka kaluar sipas planit dhe parashikimeve që kemi bërë që në fillim. Deri dje janë regjistruar mbi 530 mijë qytetarë në Kosovë, janë regjistruar mbi 36 për qind e objekteve që janë në Kosovë. Nuk kemi sfida madhore ne terren. Regjistruesit tani kanë arritur atë kuotën që kemi parashikuar, nëse vazhdon kështu”, tha u.d. i kryeshefit ekzekutiv të ASK-së, Avni Kastrati.

    Nëse regjistrimi vazhdon sipas kësaj dinamike, sipas Kastratit, nuk do të ketë nevojë për shtyrje të afatit.

    Por, që ky proces të shkojë edhe më mirë, drejtori i ASK-së, pati një kërkesë për kryetarët e komunave.

    “Të jenë më komunikues dhe të krijojnë bashkëbisedime me banorët e tyre për t’ua treguar rëndësinë e regjistrimit…”, tha Kastrati.

    Kryeshefi u përgjigj edhe në pyetjet rreth ankesave për formularin e regjistrimit, ku veçoi atë për përkatësinë fetare.

    Ndërsa, sa i përket diasporës, u tha se janë regjistruar 180 mijë pjesëtarë.

    “Deri tani nga java e kaluar kemi filluar me një intensitet për platformën për diasporën. Në kuadër të platformës mund të gjeni dhe pyetjet më të shpeshta. Kjo platformë na jep një pasqyrë se ku gjenden bashkatdhetarët tanë. Deri më tani, 180 mijë pjesëtarë të diasporës janë regjistruar dhe mbi 50 mijë direkt në platformën e-diaspora”, tha zv. ministrja e Punëve të Jashtme dhe Diasporës, Liza Gashi.

    Regjistrimi i Popullsisë, Ekonomive Familjare dhe Banesave në Kosovë ka filluar nga data 5 prill dhe do të zgjasë deri më 17 maj 2024.

  • “Task forca e gjelbër”, zgjidhja e Ministrisë për mbrojtje të ambientit

    “Task forca e gjelbër”, zgjidhja e Ministrisë për mbrojtje të ambientit

    Përgatiti: Kastriot Tahiri

    Materiale ndërtimore e orendi shtëpie, ka po thuajse në çdo cep të rrugës kryesore në fshatin Bërnicë, të komunës së Prishtinës.

    Por jo shumë larg këtij fshati, diku rreth 7 kilometra më në qendër, Ministria e Mjedisit, Planifikimit Hapësinor dhe Infrastrukturës themeloi “task-forcën e gjelbër”, përmes së cilës synohet grumbullimi i atyre materialeve, por edhe mbrojtja në tërësi e ambientit.

    Kemi më se një muaj që përgatitemi për themelimin e kësaj Task-Force dhe sot pas nënshkrimit të këtij vendimi presim që brenda javës të mbajmë mbledhjen që do të miratohet edhe agjenda e veprimeve konkrete, e cila do të fillojë menjëherë. Muaji maj do të jetë i ngjeshur me aktivitete në të cilat do të përfshihen inspektoratet e këtyre ministrive, Policia e Kosovës dhe do të ndërmerren masa konkrete kundër degradueseve gjithandej në vendin tonë”, tha ministri i Infrastrukturës, Liburn Aliu.

    Një task-forcë e tillë, sipas ambientalistit Besnik Shabiu, do të duhej të bëhej kohë më parë e jo në fund të mandatit.

    “Në fund të mandatit të iniciohet një task-forcë e tillë, për mua është shumë e mirë, por sa është për t’u marrë seriozisht lë shumë për të dëshiruar, kisha dashtë mos me pas të drejtë unë, por ministria. Mobilizimi i kësaj ka të bëjë edhe me rehabilitimin e ujit në gjithë Kosovën. Kur iniciativa të tilla të qeverisë bëhen në fund të mandatit ta japin një shije të hidhur, marrin më shumë konotacion të fushatës”, tha Shabiu.

    Që vendimi është i vonuar e thotë edhe profesori universitar, Behxhet Mustafa.

    “Masakrimi më i madh i Kosovës, ka ndodh në këtë periudhë, është betonua është shkatërrua tokat pjellore, s’kanë mbetë pa u prekë as ekosistemet pyjore. Të gjithë këto problem ndonjë një zgjidhje por është hap i vonuar”, tha Mustafa.

    Përveç këtyre problemeve me betonim, problem tjetër thonë të jetë edhe ndotja e ujërave e degradimi i lumenjve.

    “Problematika e ndotjes së ujërave vazhdon të jetë e njëjtë, ujërat vazhdojnë me u ndot në masë të madhe nga kanalizimet. Kemi probleme edhe me mbeturinat e po ashtu edhe natyrën e problematikave të pesticideve, kur bujqit duke hedhë preparate me i trajtua kulturat bujqësore ndotja po bëhet edhe tek ujërat”, tha Shabiu.

    Më 22 prill, në ditën ndërkombëtare të tokës, në shumë komuna u mbollën fidanë të rinj e u morën aksione vullnetare për pastrimin e hapësirave të gjelbra e shtretërve të lumenjve.

  • Katër heroinat e Kosovës nuk u lejuan të futeshin në takimin e KS të OKB-së, Osmani refuzoi pjesmarrjen derisa lëshoi pe protokolli

    Katër heroinat e Kosovës nuk u lejuan të futeshin në takimin e KS të OKB-së, Osmani refuzoi pjesmarrjen derisa lëshoi pe protokolli

    Takimi në seancën e Këshillit të Sigurimit të OKB-së New York ka nisur me vonesë, pasi duhej të prisnin delegacionin e Kosovës.

    Kryesuesja e takimit, e cila vjen nga Malta, tha se “E di se po më shihni çuditshëm, por është çështje protokolli i Kombeve të Bashkuara të presim derisa të vijë edhe delegacioni i Kosovës.

    “ Pra, duhet të presim, sipas protokollit. Duket se erdhën. Mund të vazhdojmë me takimin”, tha ajo, ndërkohë që Osmani me delegacionin e saj hynë në sallë.

    Siç ka mësuar Telegrafi, vonesa kishte ndodhur pasi Osmani kishte marrë me vete edhe Fahrije Hoti, Vasfije Krasniqi, Elhame Muçollin dhe Shyrete Tairin – një e mbijetuar e masakrave të kryera nga forcat jugosllave në Kosovë, një grua që ka familjarë të zhdukur në luftë, si dhe dy gra të mbijetuara të dhunës seksuale gjatë luftës në Kosovë.

    Edhe pse të katërtat kishin qenë në listë të regjistruar për pjesëmarrje si pjesë e delegacionit të Kosovës, zyrtarë të KS të OKB-së nuk i kishin lejuar të hynin në sallë.

    Ndërsa, presidentja Osmani, ka refuzuar të futet pa to në sallën e takimit.

    Gjatë senacës, Vuçiq është ankuar pse ato gra kanë marrë pjesë në takim.

    Ai tha se ato nuk janë pjesë e stafit diplomatik, dhe pse është diskutuar për të kaluarën, sidomos për kohën e luftës, duke pretenduar se në kohën e luftës ka pasur edhe gra serbe të dhunuara seksualisht në Kosovë.

    Edhe përfaqesuesi rus, kishte kundërshtuar pjesëmarrjen e tyre brenda sallës.

    Osmani, në anën tjetër, ka thënë se gratë pjesëmarrëse janë edhe pjesë e kabinetit të saj.

  • Maqedonci pret në takim lamtumirës këshilltarin bilateral nga Forcat e Armatosura të Italisë, kolonel Mario di Girolamo

    Maqedonci pret në takim lamtumirës këshilltarin bilateral nga Forcat e Armatosura të Italisë, kolonel Mario di Girolamo

    Ministri i Mbrojtjes, Ejup Maqedonci sot priti në takim lamtumirës këshilltarin bilateral nga Forcat e Armatosura të Italisë, kolonel Mario di Girolamo.

    Me këtë rast, për shërbimin e tij dhe kontributin e dhënë në zhvillimin e kapaciteteve të FSK-së, ministri Maqedonci e dekoroi kolonelin Mario di Girolamo me Medalje për Shërbim të Shquar, duke i dëshiruar suksese në detyrën dhe misionin e ri të tij.