Author: A.M.

Ferizaj ka siguruar kualifikimin në finalen e Kupës së Kosovës, duke ruajtur rezultatin në ndeshjen kthyese gjysmëfinale ndaj Llapit dhe duke përfituar nga fitorja e ndeshjes së parë.

Ndeshja e kthimit, e zhvilluar në Ferizaj, u shoqërua me tensione dhe u ndërpre për më shumë se dhjetë minuta. Takimi u ndal në minutën e 55-të, pasi nga tribunat u hodhën sende në fushë. Nga gjuajtjet e tifozëve u godit mbrojtësi i Llapit, Ilir Blakqori. Në momentin e ndërprerjes, rezultati ishte 0-0.

Ndeshja rifilloi vetëm pasi shikuesit u larguan plotësisht nga stadiumi. Pas 18 minutash shtesë, Ferizaj krijoi më shumë raste dhe ishte afër golit, por rezultati nuk ndryshoi.

Ferizaj arriti të ruajë rezultatin deri në fund dhe, falë epërsisë nga ndeshja e parë (2-1), siguroi kalimin në finalen e madhe të Kupës së Kosovës.

Dukagjini ka shënuar fitore ndaj Ballkanit me rezultat 3-2 në stadiumin “18 Qershori”, në ndeshjen e kthimit të gjysmëfinales së Kupës së Kosovës, duke siguruar kualifikimin në finale.

Klinasit kishin fituar edhe ndeshjen e parë si mysafir bindshëm me rezultat 3-0, duke kaluar tutje me rezultat të përgjithshëm 6-2.

Elton Basri hapi serinë e golave në minutën e 25-të për Dukagjinin. Pas dhjetë minutash, Ballkani barazoi me golin e Bleart Tolajt. Në fillim të pjesës së dytë, Tolaj shënoi sërish për 2-1, duke i dhënë epërsinë Ballkanit.

Dukagjini nuk u ndal dhe arriti të barazojë rezultatin në minutën e 65-të përmes Mërgim Pefqelit. Në minutat e fundit, Dieni Isufi realizoi golin e fitores për 3-2, rezultat që mbeti deri në fund.

Me këtë fitore, Dukagjini arrin finalen e Kupës së Kosovës për herë të katërt në histori dhe do të kërkojë ta fitojë këtë trofe për herë të parë.

Pep Guardiola i është kundërpërgjigjur Wayne Rooneyt, pasi ish-sulmuesi i Manchester United vuri në pikëpyetje festimet e Manchester Cityt pas fitores së rëndësishme ndaj Arsenalit.

Trajneri i Cityt mbrojti të drejtën e lojtarëve të tij për të shijuar momentin pas një dueli me peshë të madhe në “Etihad Stadium”, fitore që rriti shanset e tyre për titullin në Ligën Premier. Rooney kishte pretenduar se reagimi i lojtarëve dhe tifozëve pas fitores 2-1 ishte “paksa i tepruar”, ndërsa ish-mesfushori i Liverpoolit, Danny Murphy, sugjeroi se skenat dukeshin “paksa shumë”, pasi Gianluigi Donnarumma u hodh në tribuna për të festuar me tifozët.

Guardiola i hodhi poshtë këto komente, duke theksuar se skuadra e tij e kuptonte rëndësinë e rezultatit në kontekstin e garës për titull. “Kur ata festuan, njerëzit mund të thonë çfarë të duan, edhe gjëra budallaqe, ata festuan sepse e dinë vlerën e kundërshtarit,” tha trajneri.

Ai foli edhe për rolin e tifozëve të Cityt, të cilët shpalosën një pankartë ku shkruhej: “Panik në rrugët e Londrës.” “Ata e dinin që nëse nuk fitonim, do të ishte lamtumirë. Ata fituan dhe prapë ne jemi aty. Si të mos festojnë?” shtoi Guardiola.

Trajneri theksoi se respekti për kundërshtarin dhe tifozët nuk pengon shprehjen e emocioneve. Ai refuzoi idenë se skuadrat duhet të presin për të shfaqur gëzimin deri në sigurimin e trofeut, duke nënvizuar se futbolli është për të jetuar momentin dhe për të njohur përpjekjen e madhe të ekipit për të mposhtur kundërshtarë të nivelit të lartë.

Wolfsburgu ka siguruar nënshkrimin e tij të parë për sezonin e ardhshëm. Reprezentuesi kosovar, Elvis Rexhbeçaj, kthehet te klubi gjerman si lojtar i lirë pas katër vitesh te Augsburgu.

Mesfushori 28-vjeçar ka nënshkruar një kontratë me klubin e ri deri më 30 qershor 2030.

“Me Elvisin, po rikthejmë një lojtar që ka lidhje të ngushta me Wolfsburgun dhe qytetin. Jemi të kënaqur që ai është i përkushtuar ndaj klubit gjatë kësaj periudhe sfiduese,” tha drejtori sportiv Pirmin Schwegler.

“Përtej cilësive të tij futbollistike, ai zotëron një personalitet të fortë, i dukshëm si në fushë ashtu edhe jashtë saj. Ai jep gjithçka nga vetja në çdo ndeshje dhe merr përgjegjësi. Jemi të bindur se Elvisi do të jetë një aset i madh për ekipin me këto cilësi dhe mezi presim kthimin e tij në verë.”

Rexhbeçaj shprehu lumturinë për rikthimin:
“Kthimi në Wolfsburg do të jetë shumë i veçantë për mua. U rrita këtu dhe e nisa karrierën time në Bundesligë. Do të jem gjithmonë mirënjohës për këtë.”

Ai shtoi: “Kur më erdhi përsëri mundësia, e kuptova shpejt se doja ta bëja. Por një gjë është gjithashtu e qartë: Do të jap gjithçka për Augsburgun deri në ndeshjen e fundit.”

Barcelona ka arritur një marrëveshje paraprake me mbrojtësin e Interit, Alessandro Bastoni, për një transferim të mundshëm gjatë merkatos së verës.

Sipas La Gazzetta dello Sport, palët kanë rënë dakord për një kontratë pesëvjeçare deri në vitin 2031, ndërsa lojtari ka dhënë dritën jeshile për t’u transferuar në “Camp Nou”, duke e parë këtë si hapin e radhës në karrierën e tij. Barcelona pritet të nisë së shpejti negociatat zyrtare me Interin, me synimin për të finalizuar marrëveshjen përpara Kupës së Botës 2026.

Megjithatë, pengesa kryesore mbetet çmimi i kërkuar nga klubi italian, i cili e vlerëson kartonin e Bastonit rreth 70 milionë euro — një shifër e konsiderueshme për kushtet aktuale financiare të katalanasve.

Nga ana e tij, Bastoni është i gatshëm të bashkëpunojë për të lehtësuar transferimin, duke qenë i hapur për të diskutuar me Interin për një ulje të mundshme të tarifës. Megjithatë, mbrojtësi italian ka bërë të qartë se, nëse nuk arrihet një marrëveshje mes klubeve, ai do të vazhdojë të qëndrojë te Inter.

Operacioni i Guardia di Finanza shtrihen në Milano, ku sekuestruan mbi 1.2 milionë euro dhe zbuluan ngjarje luksoze që ofronin shërbime seksuale për klientët e pasur.

Autoritetet italiane kanë realizuar një operacion të gjerë për shkatërrimin e një rrjeti të dyshuar për shfrytëzim prostitucioni dhe organizimin e ngjarjeve të jetës së natës. Sipas hetimeve të Guardia di Finanza, ky rrjet ka ofruar shërbime për klientë të pasur, përfshirë futbollistë të Serie A dhe një pilot të Formula 1. Autoritetet sekuestruan mbi 1.2 milionë euro dhe zbuluan që ngjarjet e organizuara përfshinin oferta luksoze për darka, akomodime dhe shoqërimin e grave, duke përfshirë edhe përdorimin e substancave të dëmshme si oksidi i azotit. Hetimi vazhdon nën udhëheqjen e Prokurorisë së Milanos.

Arsenali ka hyrë në një fazë vendimtare të sezonit, ku presioni mbi trajnerin Mikel Arteta është rritur ndjeshëm dhe e ardhmja e tij në “Emirates” po shihet me më shumë pikëpyetje se më parë.

Spanjolli po e mbyll kampanjën me vazhdimësinë në lojë, në një situatë që brenda pak javësh ka kaluar nga entuziazmi në shqetësim. Skuadra londineze mbërriti në këtë etapë të edicionit me mundësi reale për një sezon historik, por rezultatet e fundit kanë sjellë dyshime dhe kanë bërë që gjithçka të varet nga përfundimi i sezonit, i cili pritet të ndikojë jo vetëm në projektin e klubit, por edhe në fatin e vetë trajnerit. Në Ligën Premier, Arsenali ka parë se si një avantazh i rëndësishëm është shkrirë me kalimin e javëve.

Ajo që dukej si një rrugë relativisht e qetë drejt titullit është kthyer në një garë të vështirë, ku mungesa e vazhdimësisë në momentet kyçe i ka dhënë mundësi rivalëve të afrohen dhe të vënë në rrezik objektivat. Ndërkohë, Liga e Kampionëve paraqitet si mundësia kryesore për ta “shpëtuar” sezonin. Arsenali ndodhet në gjysmëfinale, një fazë ku nuk kishte mbërritur prej vitesh, por përballja e radhës kërkon maksimumin.

Ekipi duhet të tregojë karakter dhe personalitet në një sfidë me nivel shumë të lartë, ku nuk mjafton vetëm konkurrimi, por kërkohet edhe një hap përpara në objektiv dhe rezultat. Për Artetën, Liga e Kampionëve shihet si një provë vendimtare: arritja në finale mund ta ndryshojë perceptimin rreth punës së tij, ndërsa një eliminim do ta linte në një pozicion të ndërlikuar.

Nëse bashkëpunimi me Artetën do të marrë fund, sipas raportimeve, emri që po fiton terren si alternativë për stolin e Arsenalit është Cesc Fabregas. Ish-mesfushori i “Topçinjve”, që aktualisht drejton Como 1907, po vlerësohet për ecurinë e tij, duke ndërtuar një projekt tërheqës dhe ambicioz. Përvoja e tij me Arsenalin dhe profili i një trajneri të ri me ide ofensive e bëjnë një opsion tërheqës për disa prej tifozëve.

Arsenali pritet të përballet me një vendim të madh në javët e ardhshme. Qëndrimi i Artetës ose një ndryshim drejtimi do të varet nga rezultati final i sezonit, teksa çdo ndeshje mund të ndikojë drejtpërdrejt në të ardhmen e stolit dhe të gjithë projektit sportiv. Skuadra ka shfaqur pasiguri në ndeshje vendimtare, duke lëshuar pikë që tani peshojnë shumë.

Ky kontekst ka bërë që në klub të shtohet shqetësimi për drejtimin e projektit, pasi në një ekip me ambicie si Arsenali, kërkesa është të luftohet deri në fund në të gjitha frontet, dhe ndjesia e një mundësie të humbur ka rritur tensionin.

Pas një edicioni emocionues në ProCredit Superligën e Basketbollit dhe çerekfinaleve të “Play-off”-it, ka ardhur momenti për gjysmëfinalet, ku katër skuadrat më të mira do të luftojnë për trofeun më të rëndësishëm të vitit.

Të mërkurën në orën 19:30, ekipi i Bashkimit do të ndeshet me Borën në një duel shumë tërheqës. Në garat e rregullta të Superligës, Bashkimi përfundoi i dyti, ndërsa Bora ishte e treta. Në çerekfinale, Bora shkëlqeu duke eliminuar Sigal Prishtinën, ndërsa kjo edicion është historik për ta, pasi për herë të parë kanë arritur në fazën e “Play-off”-it.

Një tjetër ndeshje tepër interesante do të luhet të enjten, po ashtu në orën 19:30, ku do të përballen Trepça dhe Peja. Trepça, ekipi më i suksesshëm i viteve të fundit, është kampioni aktual dhe fitues i Kupës, ndërsa Peja, një nga skuadrat më të njohura dhe me shumë histori, do të kërkojë të rikthehet në majat e basketbollit kosovar.

Trepça ka fituar gjashtë herë titullin, ndërsa Peja pesë herë, duke përfshirë titullin e fituar vitin e kaluar, në vitin 2023.

Ndaj, kjo është një mundësi e shkëlqyer për tifozët që të shijojnë dy ndeshje me shumë emocion dhe rivalitet. Kjo fazë e “Play-off”-it premton spektakël dhe shumë sfida të forta për të arritur në finalen e madhe.

Programi i ndeshjeve të gjysmëfinaleve:

• E mërkurë, 19:30 – Bashkimi vs Bora
• E enjte, 19:30 – Trepça vs Peja

Planet e Real Madrid për afatin kalimtar të verës kanë nisur të marrin formë.Mes ideve për përforcimin e repartit defensiv, emri i Jon Martin është shfaqur si një nga prioritetet kryesore.

Qendërmbrojtësi 19-vjeçar i Real Sociedad po kalon një sezon mbresëlënës, duke tërhequr vëmendjen e disa klubeve të mëdha evropiane. Depërtimi i tij në elitë ka qenë i shpejtë dhe bindës, aq sa drejtuesit madrilenë e konsiderojnë si një investim strategjik si për të tashmen, ashtu edhe për të ardhmen.

Martin ka dëshmuar se zotëron cilësitë e nevojshme për të konkurruar në nivelet më të larta. Ai spikat për forcën në duele, aftësinë për të lexuar lojën dhe dominimin në ajër. Po ashtu, qetësia e tij me topin dhe aftësia për të ndërtuar aksione nga prapavija përputhen me stilin e një skuadre që synon të dominojë përmes posedimit.

Te Real Sociedad, ai ka gjetur ambientin ideal për t’u zhvilluar. Klubi nga San Sebastiani ka besuar te talenti i tij, duke i dhënë minuta në ndeshje të rëndësishme, çka ka përshpejtuar rritjen e tij dhe e ka shndërruar në një nga premtimet më të mëdha të futbollit spanjoll.

Pengesa kryesore për Real Madridin mbetet çmimi i lojtarit. Jon Martin ka një klauzolë lirimi prej 50 milionë eurosh, një shumë e konsiderueshme për një futbollist kaq të ri, por që reflekton potencialin e tij të madh. Nga ana tjetër, Real Sociedad nuk është i gatshëm të negociojë nën këtë shifër dhe e konsideron mbrojtësin pjesë kyçe të projektit të tyre.

Në këtë situatë, Real Madridi po shqyrton disa opsione: pagesën e plotë të klauzolës ose gjetjen e formulave alternative, si bonuse të lidhura me performancën apo kushte më fleksibile pagese, për të realizuar transferimin.

Federata e Futbollit e Kosovës, në bashkëpunim me sponsorin zyrtar të Superligës, Albi Mall, vazhdon ndarjen e çmimit tradicional “Ylli i Javës”, i cili i dedikohet futbollistit më të dalluar të javës në Superligën e futbollit kosovar.

Për javën e njëzet e nëntë të këtij edicioni, çmimi i “Yllit të Javës” i është ndarë për herë të dytë futbollistit të KF Dukagjini, Dienit Isufi, i cili shënoi një gol dhe, nga ndërhyrja ndaj tij, skuadra e tij fitoi penallti në ndeshjen kundër SC Gjilani, e cila përfundoi me rezultatin 2:3, duke i siguruar ekipit të tij tre pikë shumë të rëndësishme.

Vlerësimi është bërë nga Komisioni i Veteranëve të Futbollit.

Pas marrjes së çmimit, Isufi u shpreh i lumtur që u vlerësua si lojtari më i mirë i javës: “E kemi pasur një ndeshje të rëndësishme kundër Gjilanit dhe këto tri pikë na kanë dhënë vetëbesim që ta presim Ballkanin në mesjavë për kupë, po ashtu na japin edhe qetësi në vijim të kampionatit.”

“Synimi ynë është fitimi i Kupës së Kosovës, në mënyrë që të dalim në Evropë, dhe shpresoj që do ta arrijmë këtë qëllim. Loja akoma nuk ka mbaruar dhe kemi koncentrim maksimal”, shtoi ai.

“Për vlerësimin si më i miri i javës, falënderoj familjen time, bashkëlojtarët dhe gjithë stafin e KF Dukagjinit, sepse pa ta performanca ime individuale do të ishte e pamundur”, tha Isufi për faqen zyrtare të FFK-së.