Author: A.M.

Real Madridi po vazhdon përpjekjet për transferimin e Rodrit nga Manchester City dhe tashmë ka përcaktuar shumën që është i gatshëm të paguajë për mesfushorin spanjoll.

Sipas gazetares Arancha Rodríguez, drejtuesit e klubit madrilen janë të bindur se 30-vjeçari dëshiron t’i bashkohet Real Madridit gjatë kësaj vere.

Raportohet se “Los Blancos” e vlerësojnë Rodrin mes 40 dhe 70 milionë eurove, duke besuar se marrëveshja me Manchester Cityn mund të arrihet brenda këtij diapazoni financiar. Megjithatë, bisedimet mes dy klubeve janë ende në vazhdim.

Rodri ka qenë një nga objektivat kryesorë të Real Madridit gjatë këtij afati kalimtar. Sipas raportimeve, trajneri Jose Mourinho e konsideron spanjollin përforcimin ideal për mesfushën në prag të sezonit të ri.

Edhe pse ende nuk është arritur një marrëveshje përfundimtare me Manchester Cityn, optimizmi në kampin madrilen mbetet i lartë. Besohet se dëshira e vetë lojtarit për t’u transferuar në “Santiago Bernabéu” mund të jetë vendimtare në finalizimin e marrëveshjes.

Negociatat pritet të vazhdojnë edhe në ditët në vijim, ndërsa Real Madridi synon të sigurojë një nga transferimet më të bujshme të kësaj vere.

Mesfushori i Kosovës, Valon Berisha, ka befasuar të gjithë me supergolin e realizuar nga goditja e lirë në fitoren e Zurichut ndaj Servette, por pas ndeshjes ka pranuar se nuk kishte tentuar të shënonte.

Me një goditje spektakolare, Berisha e la të shtangur portierin kundërshtar, ndërsa topi përfundoi në këndin e rrjetës.

Duke folur për mediat zvicerane pas ndeshjes, veterani kosovar e pranoi me buzëqeshje se synimi i tij ishte krejtësisht tjetër.

“Kjo është pyetja e ditës, apo jo? Jo, thjesht doja të harkoja dhe më pas topi përfundoi në rrjetë. Sigurisht që jam shumë i lumtur për golin, por edhe më i lumtur për këtë fitore të luftuar”, deklaroi Berisha.

Ai u shpreh gjithashtu i kënaqur me rolin që ka marrë te Zurichu, duke theksuar se gjithmonë ka pasur dëshirë të jetë lider në mesfushë.

“Gjithmonë më ka pëlqyer të drejtoj ekipin dhe të marr përgjegjësi. Jemi në rrugën e duhur, por ende kemi hapësirë për t’u përmirësuar”, shtoi ai.

Pas ndeshjes foli edhe kapiteni i Zurichut, Lindrit Kamberi, i cili e cilësoi fitoren shumë të rëndësishme për ekipin.

“Pas paraqitjes ndaj St. Gallenit, mendoj se e meritonim këtë fitore. Dhamë gjithçka në fushë dhe këto tri pikë kanë rëndësi të madhe për moralin tonë. Kur fiton tri pikë, do të thotë se i ke merituar”, u shpreh Kamberi.

Chelsea ka konfirmuar transferimin e sulmuesit anglez Danny Welbeck nga Brighton.

Ish-sulmuesi i Manchester Unitedit dhe Arsenalit ka nënshkruar një kontratë dyvjeçare me klubin londinez. Të dy klubet nuk kanë bërë publike vlerën e transferimit.

Welbeck vjen te Chelsea pas një sezoni të suksesshëm me Brightonin, ku shënoi 13 gola në 37 ndeshje të Ligës Premier, duke regjistruar sezonin më produktiv të karrierës së tij. Vetëm tre futbollistë anglezë realizuan më shumë gola se ai në elitën e futbollit anglez gjatë edicionit të kaluar.

Sulmuesi 35-vjeçar bëhet përforcimi i tretë i Chelseat gjatë këtij afati kalimtar, pas transferimeve të Morgan Rogers nga Aston Villa dhe Marco Palestra nga Atalanta.

Afrimi i Welbeckut paraqet një ndryshim në strategjinë e klubit londinez, pasi pronarët e Chelseat, që nga marrja e klubit në vitin 2022, kanë preferuar kryesisht transferimin e futbollistëve të rinj me potencial afatgjatë.

Welbeck e nisi karrierën te Manchester Unitedi, ndërsa në vitin 2014 u transferua te Arsenali për rreth 18 milionë euro. Pas pesë sezonesh në Londrën veriore, ai iu bashkua Watfordit, përpara se në vitin 2020 të transferohej te Brightoni, ku u shndërrua në një nga lojtarët më të rëndësishëm të skuadrës.

Me Kombëtaren e Anglisë, Welbeck ka zhvilluar 42 ndeshje dhe ka shënuar 16 gola. Paraqitja e tij e fundit me “Tre Luanët” daton në vitin 2018, ndërsa nuk u përfshi në listën e përzgjedhur nga Thomas Tuchel për Kupën e Botës 2026.

Përfaqësuesja e Kosovës në xhudo ka regjistruar një tjetër sukses të madh në arenën ndërkombëtare, duke fituar gjithsej nëntë medalje në Kampionatin Ballkanik për Seniorë, i cili u mbajt në Tiranë të Shqipërisë.

Xhudistët kosovarë zhvilluan paraqitje mbresëlënëse, duke siguruar pesë medalje të arta, tri të argjendta dhe një të bronztë, çka e renditi Kosovën ndër ekipet më të suksesshme të turneut.

Përveç medalistëve, paraqitje të mira patën edhe Arba Hasanaj në kategorinë deri në 70 kilogramë dhe Andi Reshitaj në kategorinë deri në 66 kilogramë, të cilët e përfunduan garën në vendin e pestë.

Ekipi i Kosovës u drejtua nga trajnerët Majlinda Kelmendi, Fatos Tabaku dhe Kushtrim Gashi, ndërsa drejtësinë në tatami e ndau gjyqtari ndërkombëtar Zymer Zeka.

Në Kampionatin Ballkanik ishte i pranishëm edhe Driton Kuka, në cilësinë e delegatit të Federatës Ballkanike të Xhudos (BJA).

Ky sukses konfirmon edhe një herë nivelin e lartë të xhudos kosovare, e cila vazhdon të korrë rezultate të rëndësishme në garat ndërkombëtare.

Medalistët e Kosovës në Kampionatin Ballkanik:

• Erza Muminoviq – 48 kg
• Laurina Gashi – 52 kg
• Flaka Loxha – 57 kg
• Elvira Ukaj – 70 kg
• Dardan Cena – 73 kg
• Fatjona Kasapi – 52 kg
• Enise Zijade – 57 kg
• Shpati Zekaj – 100 kg
• Furkan Kelmendi – 60 kg

Milani po kërkon të përforcojë repartin ofensiv, ndërsa po përgatitet për një ndryshim të mundshëm në skuadër në rast të largimit të Rafael Leaos.

Sipas gazetës italiane Corriere della Sera, “Rossonerët” e kanë vendosur mesfushorin ofensiv të Real Madridit, Brahim Diaz, në krye të listës së objektivave për të forcuar repartin e krijimit të lojës.

Klubi kuqezi humbi garën për talentin grek Konstantinos Karetsas, i cili u transferua nga Genk te Borussia Dortmundi për 33 milionë euro. Si pasojë, drejtuesit e Milanit kanë zhvendosur vëmendjen te alternativa të tjera.

Përveç Brahim Diazit, Milani po monitoron edhe talentin e Arsenalit, Ethan Nwaneri, si dhe mesfushorin ofensiv të Romës, Matias Soulé.

Një rikthim i Diazit në “San Siro” do të shënonte një ribashkim me klubin ku ai la gjurmë gjatë periudhës 2020–2023. Gjatë huazimit te Milani, reprezentuesi i Marokut zhvilloi 124 ndeshje, shënoi 18 gola dhe regjistroi 15 asistime, duke kontribuar në fitimin e titullit të Serie A në sezonin 2021/22.

Kontrata e Brahim Diazit me Real Madridin është e vlefshme deri në verën e vitit 2027. Për shërbimet e tij kishte shfaqur interes edhe Juventusi, por klubi torinez më pas ndryshoi objektiv, duke u fokusuar te Karim Alajbegovic i Bayer Leverkusenit.

Ndërkohë, çështja më e rëndësishme për Milanin mbetet e ardhmja e Rafael Leaos. Sulmuesi portugez ka lënë të kuptohet se aventura e tij shtatëvjeçare në “San Siro” mund të jetë drejt fundit.

Fillimisht, Leao preferonte një transferim në Ligën Premier ose në La Liga, por mungesa e ofertave konkrete nga këto kampionate e ka shtyrë të shqyrtojë edhe opsione të tjera.

Sipas raportimeve, Galatasaray është klubi më i interesuar për transferimin e portugezit. Kampioni i Turqisë pritet të bëjë një ofertë, duke shpresuar të përfitojë edhe nga fakti se sezonin e ardhshëm do të luajë në Ligën e Kampionëve.

Një fund dramatik dhe i diskutueshëm shoqëroi duelin në UFC Beograd, ku Bogdan Grad u shpall fitues ndaj Dennis Buzukjas pas një vendimi që shkaktoi reagime të shumta. Luftëtari shqiptar kundërshtoi menjëherë ndërprerjen e ndeshjes, duke këmbëngulur se nuk kishte dhënë dorëzim.

Të dy luftëtarët hynë në oktagon në kërkim të rikthimit te fitoret, pas një serie rezultatesh negative në UFC. Grad kishte një bilanc prej 1-2, ndërsa Buzukja 1-4, me të dy që vinin pas dy humbjeve radhazi.

Buzukja e nisi më mirë duelin në këmbë, duke goditur me disa kombinime të sakta. Megjithatë, Grad e bëri të qartë strategjinë e tij, duke kërkuar vazhdimisht ta zhvendoste luftën në tokë. Ai realizoi një rrëzim të hershëm, por nuk arriti ta mbante gjatë kundërshtarin në dysheme.

Pas rikthimit në këmbë, lufta u zhvillua me ritëm të lartë. Grad ushtroi presion të vazhdueshëm dhe kërkoi kombinime goditjesh, ndërsa Buzukja u përgjigj me goditje të pastra, veçanërisht me shkelma në këmbë dhe goditje në trup.

Një tjetër tentativë për rrëzim nga Grad u neutralizua fillimisht, por ai arriti ta rrëzonte sërish Buzukjan dhe mori kontrollin në tokë. Më pas tentoi ta detyronte kundërshtarin të dorëzohej, ndërsa Buzukja u mbrojt dhe riktheu pozicionin në gjysmë-gardë.

Raundi i dytë nisi me Gradin që vazhdoi të kërkonte kontrollin pranë kafazit, por kësaj radhe Buzukja u mbrojt më mirë dhe arriti ta kthente luftën në qendër të oktagonit.

Momenti vendimtar erdhi pak më vonë, kur gjyqtari ndërpreu duelin, duke vlerësuar se Buzukja kishte sinjalizuar dorëzim me “tap-out”.

Luftëtari shqiptar reagoi menjëherë ndaj vendimit, duke pretenduar se nuk kishte bërë asnjë shenjë dorëzimi.

Pamjet e përsëritura ngritën dyshime se lëvizja e dorës së Buzukjas mund të ishte keqinterpretuar si “tap”, ndërsa ai në fakt po përpiqej të shtynte gjurin e kundërshtarit dhe të përmirësonte pozicionin e tij.

Pavarësisht polemikave, vendimi nuk u ndryshua dhe Bogdan Grad u shpall fitues i duelit me dorëzim teknik.

Gazetari i njohur sportiv, Rodra, ka zbuluar detajet financiare të transferimit të mundshëm të sulmuesit të RB Leipzigut, Yan Diomande, te Real Madridi.

Sipas tij, kampionët e Evropës do të paguajnë 122 milionë euro si shumë fikse për kartonin e lojtarit. Marrëveshja parashikon edhe 10 milionë euro bonuse të lidhura me performancën, duke e çuar vlerën totale të transferimit në 132 milionë euro.

Rodra bën të ditur gjithashtu se kanë përparuar ndjeshëm edhe negociatat mes Real Madridit dhe Manchester Cityt për transferimin e mesfushorit spanjoll, Rodri.

Sipas raportimit, marrëveshja pritet të kushtojë rreth 65 milionë euro, por do të finalizohet vetëm pasi Manchester City të sigurojë zëvendësuesin e Rodrit, Ayyoub Bouaddi.

Sa i përket të ardhmes së Vinicius Juniorit, bisedimet për rinovimin e kontratës vazhdojnë dhe ende nuk është arritur një marrëveshje mes palëve.

UEFA ka bërë reagim pasi presidenti i FIFA-s, Gianni Infantino, konfirmoi tërheqjen e projektit të diskutueshëm “FIFA Forward Enterprise”, i cili parashihte shitjen e një pjese të aksioneve të garave të FIFA-s, përfshirë Kupën e Botës, tek investitorët privatë.

Në një deklaratë zyrtare, shtëpia evropiane e futbollit e mirëpriti vendimin e FIFA-s, por njëkohësisht theksoi se udhëheqja aktuale e organizatës ka humbur besimin e UEFA-s dhe të shumë anëtarëve të tjerë të familjes së futbollit.

“UEFA mirëpret vendimin e FIFA-s për të tërhequr planin e saj për të shitur aksione në garat e saj, përfshirë Kupën e Botës, tek investitorët privatë. Propozimi u refuzua unanimisht nga federatat anëtare të UEFA-s, si dhe nga shumë federata dhe konfederata të tjera në mbarë botën, misioni i të cilave është mbrojtja e futbollit”, thuhet në deklaratë.

UEFA falënderoi tifozët, ligat, klubet, lojtarët, federatat, konfederatat, si dhe drejtues të shteteve dhe figura publike që kundërshtuan planin, duke theksuar se “futbolli nuk është në shitje”.

Sipas UEFA-s, nuk mund të pranohen më iniciativa të hartuara në mënyrë të fshehtë dhe të shtyra për miratim përmes procedurave të përshpejtuara.

“Nuk mund të vazhdojmë kështu, me plane sekrete të hartuara nga individë anonimë, përfitimi i të cilave për futbollin është, në rastin më të mirë, i dyshimtë. Duhet të zbulojmë se kush është përgjegjës dhe t’i mbajmë ata njerëz përgjegjës”, vijon deklarata.

UEFA njoftoi se në ditët dhe javët e ardhshme do të zhvillojë konsultime me federatat e saj anëtare dhe konfederatat e tjera për të analizuar mënyrën se si lindi ky projekt dhe për të parandaluar përsëritjen e situatave të ngjashme.

Në deklaratë rikujtohen edhe premtimet që Gianni Infantino kishte bërë në vitin 2016, kur kandidoi për president të FIFA-s, duke premtuar transparencë dhe përdorimin e fondeve të organizatës vetëm për zhvillimin e futbollit.

Sipas UEFA-s, këto premtime nuk janë mbajtur.

“Plani i fshehtë dhe jo transparent që u përpoq të shtynte përpara ishte gjithçka, përveçse transparent. Me rezerva që tejkalojnë 5 miliardë dollarë, FIFA nuk ka arritur t’i përdorë këto fonde për të mirën e futbollit”, thekson UEFA.

Në fund, organizata evropiane bëri të ditur se do të punojë me partnerët e saj për të propozuar një model të ri të shpërndarjes së fondeve përmes programit ekzistues FIFA Forward, duke kërkuar që rezervat financiare të FIFA-s të përdoren për zhvillimin e futbollit bazë në të 211 federatat anëtare.

“Kjo është një fitore për të gjithë futbollin. Megjithatë, kjo nuk duhet të jetë fundi i historisë. Plani është tërhequr, por rindërtimi i besimit te FIFA sapo ka filluar”, përfundon deklarata e UEFA-s.

Trajneri i Real Madridit, Jose Mourinho, po i bën presion drejtuesve të klubit që të transferojnë një qendërmbrojtës të nivelit botëror gjatë afatit kalimtar të verës, raporton gazeta Marca.

Teksa skuadra po përgatitet për miqësoren e parë të fazës përgatitore ndaj Fiorentinës, Mourinho po përballet me mungesa të shumta në repartin defensiv.

Blerja e re, Ibrahima Konate, ndodhet ende me pushime, ndërsa Eder Militao, Antonio Rudiger, Dean Huijsen dhe Raul Asencio nuk janë në dispozicion për shkak të lëndimeve ose mungesës së formës së duhur fizike.

Për këtë arsye, tekniku portugez e konsideron të domosdoshëm afrimin e një mbrojtësi qendror me përvojë dhe cilësi të larta, në mënyrë që skuadra të jetë konkurruese në të gjitha garat gjatë sezonit të ri.