Author: A.M.

Interi ka hequr dorë nga transferimi i mbrojtësit argjentinas Cristian Romero, i cili ka zgjedhur t’i japë përparësi një kalimi te Atletico Madridi.

Sipas raportimeve, Romero ka arritur një marrëveshje personale me klubin spanjoll, duke preferuar La Ligën përpara një rikthimi në Serie A.

Pas largimeve të Nahuel Molinës, Thiago Almadës dhe Matteo Ruggerit, Atletico ka krijuar hapësirën e nevojshme në skuadër dhe bilancin financiar për të finalizuar transferimin e mbrojtësit të Tottenhamit.

Klubi madrilen tashmë ka nisur negociatat me Tottenhamin, edhe pse oferta e parë prej 30 milionë eurosh është refuzuar nga londinezët. Megjithatë, drejtuesit e Atleticos mbeten optimistë se marrëveshja mund të mbyllet për rreth 40 milionë euro.

Në anën tjetër, Interi mbeti jashtë garës pasi nuk arriti të krijojë hapësirën e nevojshme financiare. Zikaltrit nuk realizuan largimin e Benjamin Pavardit dhe as transferime të tjera të rëndësishme në dalje, si ai i Davide Frattesit, çka ndikoi në pamundësinë për të finalizuar operacionin.

Si pasojë, drejtuesit e Interit i kanë njoftuar përfaqësuesit e Romeros se janë tërhequr nga negociatat, pavarësisht se më herët kishin arritur një marrëveshje bazë me Tottenhamin.

Cristian Romero është pjesë e Tottenham Hotspur që nga viti 2022, pasi fillimisht u transferua në formë huazimi nga Atalanta, përpara se londinezët ta blinin përfundimisht. Mbrojtësi argjentinas konsiderohet një nga qendërmbrojtësit më të mirë në Evropë dhe prej javësh ka qenë në radarët e Interit dhe Atletico Madridit. Megjithatë, preferenca e lojtarit për të vazhduar karrierën në La Liga duket se i ka dhënë avantazh klubit të Diego Simeones

Mesfushori argjentinas i Chelseat, Enzo Fernandez, është shfaqur si objektivi kryesor i Manchester Cityt për përforcimin e mesfushës, në rast se Rodri largohet gjatë kësaj vere.

Sipas gazetarit Gianluca Di Marzio, trajneri i Cityt, Enzo Maresca, dëshiron të ribashkohet me Fernandezin, me të cilin kishte punuar më parë te Chelsea.

Megjithëse klubet nuk kanë nisur ende negociata zyrtare, interesimi i Manchester Cityt pritet të intensifikohet në ditët në vijim.

Chelsea ndodhet në një pozitë të fortë negociuese, pasi Fernandez ka kontratë deri në qershor të vitit 2032. Sipas raportimeve, londinezët e vlerësojnë kartonin e mesfushorit argjentinas rreth 120 milionë funte, ose afërsisht 140 milionë euro.

Interesi i Cityt lidhet ngushtë me dëshirën e Marescas, i cili e konsideron Fernandezin si profilin ideal për të forcuar repartin e mesfushës.

Situata varet edhe nga e ardhmja e Rodrit. Sipas raportimeve, mesfushori spanjoll ka autorizuar kontaktet me Barcelonën për të shqyrtuar mundësinë e një transferimi, edhe pse kontrata e tij me Manchester Cityn është e vlefshme deri në verën e vitit 2027.

Nëse Rodri largohet nga “Etihad”, drejtuesit e Cityt janë të gatshëm të investojnë fuqishëm për ta sjellë Enzo Fernandezin si zëvendësuesin e tij.

Enzo Fernandez iu bashkua Chelseat në janar të vitit 2023 nga Benfica, në një transferim rekord për klubin londinez. Që atëherë, ai është shndërruar në një nga mesfushorët më të rëndësishëm të ekipit dhe mbetet një nga lojtarët më të vlerësuar në rolin e tij. Ndërkohë, Manchester City është në kërkim të alternativave në mesfushë për shkak të pasigurisë rreth të ardhmes së Rodrit, i cili vazhdon të lidhet me një transferim të mundshëm te Barcelona.

Paris Saint-Germain nuk ka hequr dorë nga transferimi i Mika Godts, edhe pse oferta e parë prej 40 milionë eurosh u refuzua nga Ajaxi.

Sipas De Telegraaf, kampionët e Evropës janë duke përgatitur një ofertë të përmirësuar me vlerë rreth 50-55 milionë euro, me synimin për të bindur klubin holandez që të lejojë largimin e talentit belg.

Raporti thekson se PSG është optimiste për arritjen e një marrëveshjeje, pasi tashmë ka rënë dakord me kushtet personale të 21-vjeçarit.

Nga ana tjetër, Ajaxi e ka bërë të qartë se Godts nuk do të largohet për një çmim më të ulët se ai që e konsideron të përshtatshëm, duke mbajtur një qëndrim të fortë në negociata.

Godts është identifikuar si zëvendësuesi ideal i Bradley Barcolës, i cili mund të largohet gjatë kësaj vere, me Liverpoolin që vazhdon të shfaqë interes për sulmuesin francez.

Mika Godts zhvilloi një sezon të shkëlqyer me Ajaxin në edicionin 2025/26 dhe e ka nisur në formë edhe sezonin e ri. Në ndeshjet kualifikuese të Ligës së Konferencës, sulmuesi belg ka realizuar një gol dhe ka dhuruar dy asistime në tri paraqitje, duke rritur edhe më shumë interesimin e klubeve të mëdha evropiane për shërbimet e tij.

Mesfushori shqiptar i Milanit, Ardon Jashari, ka dhënë një intervistë të gjatë për Gazzetta dello Sport, ku ka folur për pritshmëritë e tij për sezonin e ri, bashkëpunimin me Luka Modriçin dhe spekulimet për të ardhmen.

Jashari u shpreh optimist për sezonin e ri, duke theksuar se ndihet i motivuar dhe beson se skuadra mund të zbatojë stilin e lojës që kërkon trajneri Ruben Amorim.

“Pas Kupës së Botës dhe pushimeve kam një energji të re. Sapo kam mbërritur, por mendoj se e kam kuptuar të paktën pjesërisht stilin e lojës që ai dëshiron të luajë. Më pëlqen futbolli me intensitet të lartë dhe mendoj se mund ta vëmë në praktikë sepse kemi cilësinë. Milani duhet të luajë në këtë mënyrë dhe të fitojë”, deklaroi Jashari.

Ai theksoi se objektivi i skuadrës është të fitojë sa më shumë ndeshje.

“Duam të fitojmë çdo ndeshje, sepse ky është mentaliteti që duhet të kemi në fushë. Nëse e bëjmë këtë, do të jemi në krye të tabelës. Megjithatë, tani nuk është koha të flasim për Scudetton. Duhet të ndërtojmë një mentalitet fitues dhe të shijojmë futbollin. Nëse i kombinojmë këto dy elemente, do të kemi gjithçka që na duhet për të arritur sukses”, shtoi ai.

Duke folur për garat evropiane, Jashari tha se skuadra do ta trajtojë me seriozitet Ligën e Evropës.

“Sigurisht që do të donim të luanim në Ligën e Kampionëve, por tani duhet të përgatitemi sa më mirë për Ligën e Evropës. Edhe atje objektivi ynë është të fitojmë. Do të përballemi me skuadra shumë të forta, por duhet të përqendrohemi te vetja”, u shpreh mesfushori.

Jashari foli edhe për sezonin e kaluar, duke pranuar se nuk shkoi sipas pritshmërive të tij.

“Ishte sezoni im i parë me Milanin dhe në Itali. Për më tepër, pata një dëmtim në fibulë dhe nuk luajta aq sa kisha shpresuar. Tani dua vetëm të shpreh potencialin tim maksimal. Më duhet vazhdimësi dhe besim për të treguar se çfarë mund të bëj. Kur të jem në formën time më të mirë, jam i bindur se do t’i bëj tifozët të lumtur dhe do ta ndihmoj ekipin me cilësitë e mia”, deklaroi ai.

Mesfushori shqiptar u ndal edhe te partneriteti me Luka Modriçin, duke e cilësuar kroatin një vlerë të madhe për skuadrën.

“Për mua nuk është aspak problem. Përkundrazi, është një lajm shumë i mirë. Të gjithë duhet të jemi krenarë që kemi një lojtar si Luka në ekip. Kam një marrëdhënie shumë të mirë me të edhe jashtë fushës dhe shpresoj të luajmë më shumë së bashku këtë sezon. Në minutat që luajtëm bashkë ndjeva sinjale shumë pozitive”, tha Jashari.

I pyetur për spekulimet që e lidhnin me Atalantën dhe Juventusin gjatë verës, ai e bëri të qartë se dëshira e tij ka qenë të vazhdojë te Milani.

“E realizova një ëndërr kur iu bashkova Milanit, sepse gjithmonë kam qenë tifoz i këtij klubi. Doja ta vishja këtë fanellë dhe të tregoja cilësitë e mia në ‘San Siro’. Në futboll je vërtet i lumtur kur luan, ndaj këtë sezon shpresoj ta ndihmoj ekipin dhe të jap maksimumin. Jam i bindur se edhe klubi mendon njësoj”, përfundoi Jashari.

Ardon Jashari iu bashkua Milanit verën e kaluar dhe sezoni i tij i parë u ndikua nga një dëmtim në fibulë, si dhe nga konkurrenca e madhe në repartin e mesfushës. Përpara nisjes së sezonit të ri, emri i tij u lidh me një kalim të mundshëm te Atalanta dhe Juventusi, por mesfushori ka bërë të qartë se dëshiron të vazhdojë karrierën te klubi ku, sipas tij, ka ëndërruar gjithmonë të luajë.

Juventusi ka zyrtarizuar transferimin e talentit boshnjak Kerim Alajbegovic, i cili ka nënshkruar kontratë me klubin torinez deri më 30 qershor 2031.

Klubi italian njoftoi se ka arritur marrëveshje me Bayer Leverkusen për transferimin e përhershëm të sulmuesit anësor 19-vjeçar, duke siguruar një nga talentet më premtues të futbollit evropian.

I lindur në Këln, por me kombësi boshnjake, Alajbegovic mbërrin në Torino pas një sezoni mbresëlënës me Red Bull Salzburgun, ku zhvilloi 44 ndeshje në të gjitha garat, shënoi 13 gola dhe regjistroi katër asistime.

Në komunikatën zyrtare, Juventusi e përshkruan 19-vjeçarin si një futbollist dinamik dhe shumë të gjithanshëm, i aftë të luajë në të dy krahët e sulmit falë përdorimit të shkëlqyer të të dyja këmbëve.

Klubi bardhezi vlerëson gjithashtu aftësitë e tij në kontrollin e topit në hapësira të ngushta, shpejtësinë dhe cilësinë për të krijuar epërsi numerike në situatat një kundër një.

Alajbegovic e nisi karrierën në akademinë e Këlnit, përpara se t’i bashkohej Bayer Leverkusenit, ku hodhi hapat më të rëndësishëm në zhvillimin e tij si futbollist. Ai debutoi edhe me ekipin e parë, duke regjistruar paraqitje në Bundesliga dhe në Ligën e Kampionëve.

Pavarësisht moshës së re, Alajbegovic ka fituar tashmë vend edhe në Kombëtaren e Bosnjë e Hercegovinës. Pas paraqitjeve me grupmoshat, ai debutoi me ekipin A dhe deri më tani ka zhvilluar 11 ndeshje, duke shënuar dy gola, njëri prej tyre në fazën finale të Kupës së Botës 2026.

Trajneri i Real Madridit, Jose Mourinho, ka komentuar situatën e Vinicius Junior, i cili vazhdon të lidhet me një transferim të mundshëm te Arsenali gjatë afatit kalimtar të verës.

Sulmuesi brazilian ka qenë në qendër të spekulimeve javët e fundit, pasi negociatat për rinovimin e kontratës me klubin madrilen thuhet se kanë ngecur. Sipas raportimeve, Arsenali po e ndjek me vëmendje situatën dhe është i gatshëm të bëjë një ofertë rekord për ta transferuar.

Mediat raportojnë se drejtuesit e klubit londinez janë të gatshëm të thyejnë strukturën e pagave dhe t’i ofrojnë Viniciusit kushte të favorshme edhe sa i përket të drejtave të imazhit, me synimin për ta bindur të transferohet në “Emirates Stadium”.

Megjithatë, Mourinho nuk është shfaqur i shqetësuar nga këto spekulime.

Pas ndeshjes miqësore ndaj Fiorentinës, tekniku portugez konfirmoi se Viniciusi do t’i bashkohet skuadrës në ditët në vijim, pasi ka përfunduar pushimet pas Kupës së Botës.

“Jam i shqetësuar që nuk i kam të gjithë lojtarët në dispozicion dhe do të doja të kisha tri javë punë me ta. Fatkeqësisht, kjo nuk është e mundur.

Të hënën do të vijnë Vini Jr, Brahim dhe Bernardo. Gradualisht do të bashkohen edhe futbollistët që luajtën në gjysmëfinale dhe finale të Kupës së Botës, ndërsa i fundit do të jetë Cucurella”, deklaroi Mourinho për faqen zyrtare të Real Madridit.

Deklaratat e trajnerit portugez lënë të kuptohet se Viniciusi vazhdon të jetë pjesë e planeve të Real Madridit për sezonin e ri, pavarësisht interesimit të raportuar nga Arsenali. Megjithatë, çështja e rinovimit të kontratës së brazilianit mbetet ende e pazgjidhur dhe pritet të jetë një nga temat kryesore të merkatos deri në mbylljen e saj.

Juventusi ka arritur marrëveshje me Paris Saint-Germain për transferimin e përhershëm të Randal Kolo Muanit, ka bërë të ditur eksperti i merkatos, Fabrizio Romano.

Sulmuesi francez pritet të nënshkruajë kontratë me klubin torinez deri në verën e vitit 2031, pasi dy klubet kanë finalizuar detajet e marrëveshjes.

Sipas Romanos, Juventusi do t’i paguajë PSG-së 38 milionë euro si shumë fikse, ndërsa marrëveshja përfshin edhe deri në 12 milionë euro të tjera në formë bonusesh, të lidhura me paraqitjet dhe sukseset e lojtarit.

Me këtë marrëveshje, Juventusi ka hequr dorë nga formula e huazimit që ishte diskutuar më herët, duke siguruar transferimin e përhershëm të 27-vjeçarit.

Kolo Muani pritet të përfitojë një pagë prej pak më shumë se pesë milionë euro neto në sezon me fanellën bardhezi.

Ky transferim i jep fund një sage të gjatë të merkatos, pasi sulmuesi francez kishte qenë një nga objektivat kryesorë të Juventusit, pas paraqitjeve pozitive që kishte treguar gjatë periudhës së kaluar me klubin.

Me afrimin e Kolo Muanit, Juventusi përforcon ndjeshëm repartin ofensiv, duke siguruar një sulmues me përvojë ndërkombëtare dhe një element të rëndësishëm për projektin afatgjatë të klubit torinez.

Trajneri i Arsenalit, Mikel Arteta, ka bërë të ditur se klubi do të vazhdojë të jetë aktiv në afatin kalimtar të verës, duke theksuar se “Topçinjtë” synojnë ta përforcojnë edhe më shumë skuadrën para nisjes së sezonit të ri.

Pas fitores bindëse 4-1 ndaj Gironas në një ndeshje miqësore, tekniku spanjoll u pyet për planet e Arsenalit në merkato, në një kohë kur klubi vazhdon të lidhet me emra të njohur si Bruno Guimaraes i Newcastle United dhe Vinicius Jr i Real Madridit.

Megjithatë, Arteta shmangu komentet për futbollistë të veçantë, duke theksuar se fokusi i klubit mbetet forcimi i skuadrës.

“Presim të ketë lëvizje në javët e ardhshme, natyrisht.

Ne duam të bëhemi më të fortë, ashtu si çdo skuadër tjetër. Mjafton të shikoni tregun e transferimeve dhe atë që po bëjnë kundërshtarët tanë, por edhe ne. Nuk do të rrimë duarkryq dhe jemi shumë ambiciozë në atë që po bëjmë.

Dallimet janë shumë të vogla. Ne duam të përmirësohemi, sepse niveli do të rritet. Duhet ta rrisim konkurrencën brenda skuadrës dhe të identifikojmë ato gjëra që ende na mungojnë”, deklaroi Arteta.

Deri më tani, Arsenali ka siguruar shërbimet e portierit Illan Meslier dhe sulmuesit Christos Tzolis, ndërsa qendërmbrojtësi Piero Hincapie është transferuar përfundimisht, pasi sezonin e kaluar e kaloi në huazim në “Emirates Stadium”.

Arsenali do ta nisë mbrojtjen e titullit në Ligën Premier më 21 gusht, kur në “Emirates Stadium” do të presë Coventry Cityn, skuadrën e sapongjitur në elitën e futbollit anglez.

Liverpooli ka vendosur një çmim të lartë për Cody Gakpon, mes interesimit të vazhdueshëm të Tottenhamit për sulmuesin holandez gjatë afatit kalimtar të verës.

Sipas Anfield Watch, drejtuesit e Liverpoolit kërkojnë rreth 72 milionë funte për 26-vjeçarin, i cili vazhdon të jetë në listën e dëshirave të klubit londinez.

“The Reds” e arsyetojnë këtë vlerësim duke iu referuar edhe transferimit të Anthony Gordonit te Barcelona për 69 milionë funte, duke besuar se Gakpo ka më shumë përvojë dhe e ka dëshmuar veten në nivelin më të lartë të futbollit evropian.

Tottenhami është lidhur me Gakpon prej javësh, madje muajsh, por kërkesa e lartë financiare e Liverpoolit ka bërë që ai të mos jetë më prioriteti kryesor i klubit.

Aktualisht, Spurs janë duke zhvilluar bisedime për transferimin e Savinhos nga Manchester City, megjithatë nuk përjashtohet mundësia që skuadra londineze të afrojë dy anësorë gjatë kësaj vere.

Mbetet të shihet nëse Tottenhami do të rikthehet me një ofertë konkrete për Gakpon apo do ta përqendrojë vëmendjen te objektiva të tjerë në merkato.

Mirlind Daku ishte protagonisti kryesor në fitoren 2-1 të Rubin Kazanit ndaj Akron Tolyattit në javën e dytë të Ligës Premier të Rusisë, por skenat pas ndeshjes morën edhe më shumë vëmendje sesa goli i tij.

Sulmuesi shqiptar realizoi golin e fitores për Rubin Kazanin, ndërsa pas vërshëllimës përfundimtare u përqafua nga bashkëlojtarët, të cilët e ngritën në krahë dhe e hodhën disa herë në ajër, në një moment mjaft emocional.

Vetë Daku nuk arriti t’i përmbante emocionet dhe u pa me lot në sy. Sipas raportimeve, reagimi i tij lidhet me largimin e mundshëm nga Rubin Kazani gjatë këtij afati kalimtar.

Së fundmi është raportuar se Spartaku i Moskës ka aktivizuar klauzolën e lirimit të sulmuesit shqiptar, duke e afruar ndjeshëm transferimin e tij. Klubi rus thuhet se është i gatshëm të paguajë 11 milionë euro, shumë e paraparë në kontratën e Dakut.

Pas ndeshjes, trajneri i Rubin Kazanit, Javi Artiga, u pyet nëse kjo ishte ndeshja e fundit e Dakut me fanellën e skuadrës.

“Nuk e di, do ta shohim. Unë jam trajneri dhe të gjitha lajmet na kanë gjetur këtu në Samara”, tha fillimisht Artiga për “Match TV”.

Më pas ai nuk i kurseu fjalët e mëdha për sulmuesin shqiptar.

“Në çdo rast, i urojmë Mirlindit shumë fat dhe e falënderojmë për gjithçka. Përveçse është një futbollist i shkëlqyer, Mirlindi është edhe një njeri i jashtëzakonshëm që gjithmonë jep gjithçka për skuadrën. Ju kujtohet sezoni kur Rubini u rikthye nga Liga e Parë dhe, në masë të madhe falë Dakut, arriti një tjetër nivel”, u shpreh trajneri.

Ndërkohë, sipas raportimeve, Daku pritet të nënshkruajë një kontratë shumëvjeçare me Spartakun e Moskës, ku do të përfitojë rreth 3.3 milionë euro në sezon, pagë që do ta rendiste ndër tre futbollistët më të paguar në kampionatin rus.