AKK-ja kërkon themelimin e Fondit Emergjent për Komuna

Vërshimet tragjike të ditëve të fundit, në Pejë shkaktuan vdekje, kurse në komuna tjera dëme materiale. Derisa komunat janë duke verifikuar dëmet nga këto vërshime, nga asociacioni i komunave bëjnë të ditur se nuk ka kompensime as për vërshimet e janarit.

“Ne si asociacion edhe më herët kemi kërkuar një Fond Emergjent për Komuna. Kur kemi dukuri të tilla, institucionet e Republikës së Kosovës, edhe autoritetet lokale e jo vetëm institucionet qendrore, t’u dalin në ndihmë qytetarëve të komunave përkatëse sa më shpejt”. Me këtë burokraci e cila është e paraparë me legjislacionin në fuqi, qytetarët e prekur nga vërshimet e muajit janar të këtij viti ende nuk kanë marrë ndonjë propozim nga niveli qendror dhe kjo është për të ardhur keq. Në bazë të informatave që kemi, në bazë të komunikimeve ditore që kemi me kryetarët, del që bujqit nuk janë kompensuar për dëmet e shkaktuara nga reshjet e vitit të kaluar, në veçanti në komunën e Rahovecit, ku kryetari Smajl Latifi e ka ngritur këtë shqetësim”, tha kryetari i AKK-së, Sazan Ibrahimi.

Sipas Ibrahimit, Komunat nuk kanë kapacitet financiare që të mbulojnë dëmet e shkaktuara nga vërshimet apo nga fenomenet natyrore. Sipas tij në bazë të legjislacionit komunat e kanë obligim ligjor që vetëm t’i mbajnë shënime sa i përket dëmeve të shkaktuara në ekonomi familjare, në bujqësi, në infrastrukturë dhe pastaj të procedojnë për nivel qendror.

Por nga Instituti Hidrometeorologjik i Kosovës kanë thënë se krejt këto vërshime janë shkaktuar si rezultat i lumenjve por si rezultat i infrastrukturës së dobët.

Tahir Ahmeti, nga Qendra Kërkimore për Politika të Sigurisë, pohon se ngjarjet e këtilla janë sfidë për institucionet shtetërore

“Institucionet shtetërore gjithmonë duhet të jenë të përgatitura në mënyrë që nëse kemi ndonjë fatkeqësi natyrore të përmasave më të mëdha të jenë të gatshëm që t’u dalin në ndihmë qytetarëve në mënyrë të plotë, efikase dhe profesionale. Reaguesit e parë në rast të fatkeqësive natyrore janë zjarrfikësit e Kosovës, Policia e Kosovës dhe shërbimet mjekësore emergjente”, tha Ahmeti.

Punësimi i më shumë zjarrfikësve dhe modernizimi i pajisjeve të tyre nuk bëhet tash e sa vite për shkak të telasheve në komunikim ndërmjet Ministrisë së Brendshme dhe komunave. Zjarrfikësit janë kompetencë e ministrisë së brendshme. /atvlive.tv

Edicionin Qendror të lajmeve në ATV e gjeni në videon më poshtë: