Kandidatët për kryetar të Vushtrrisë pinë kafe bashkë para nisjes së fushatës, i mbledh kryetari aktual

Kandidatët për kryetar të Vushtrrisë në një gjest të rrallë janë mbledhur për të pirë kafe bashkë pak para nisjes së fushatës për zgjedhjet lokale.

Nikoqir i ngjarjes u bë kryetari aktual, Ferit Idrizi, kandidat i PDK-së që po e synon edhe një mandat, i cili tha se para nisjes së aktiviteteve zgjedhore, “detyra e parë” e tyre ishte të shpërndanin një mesazh qytetarie.

“Na ndajnë vetëm edhe pak orë nga nisja e fushatës. Këtë mëngjes në Vushtrri u takuam miqësisht me kundërkandidatët për kafe. Na pret një muaj plot aktivitete, por për ne mbetet detyrë e parë të përcjellim mesazhin e qytetarisë dhe të bëjmë një fushatë të ndershme.

“Vushtrria është mbi çdo garë”, shkroi Idrizi, i cili i falënderoi kundërkandidatët e tij që e pranuan ftesën për kafe.

“Faleminderit të gjithëve që pranuat ftesën. Na priftë e mbara!”.