ATV

Tag: Vrasje

  • Vrasja e adoleshentit në Francë, 150 të arrestuar pas protestave të dhunshme

    Vrasja e adoleshentit në Francë, 150 të arrestuar pas protestave të dhunshme

    Policia e Francës ka arrestuar 150 persona në natën e dytë të protestave në Paris. Qytetarët e revoltuar ndaj vrasjes së 17-vjeçarit Nahel nga policia, kanë dalë mbrëmjen e së mërkurës në protesta të dhunshme.

    BBC raportoi se në Nanterre, ku u qëllua për vdekje 17-vjeçari, policia hodhi gaz lotsjellës ndaj grupeve që gjuanin gurë dhe dogjën kazanët e mbeturinave dhe automjetet.

    Në një tjetër periferi të Parisit, një autobus thuhet se u zbraz nga pasagjerët përpara se t’i vihej flaka.

    Ndërtesat publike u sulmuan edhe në Toulouse, Lyon dhe Lille, ndërsa policia u sulmua me gurë, shishe dhe fishekzjarre.

    Qeveria franceze e kupton rrezikun që kjo situatë mund të kalojë shpejt në trazira të përhapura, të nxitura nga zhgënjimet e gjata mbi pabarazinë dhe sjelljen e policisë.

    Vrasja e Nahel shkaktoi zemërim të madh te qytetarët, nga presidenti Emmanuel Macron deri te futbollisti Kylian Mbappe.

    Presidenti francez Emmanuel Macron reagoi fill pas ngjarjes, duke thënë se “asgjë nuk justifikon vdekjen e një të riu”.

    “Dëshiroj të shpreh ndjenjat e të gjithë kombit për atë që ka ndodhur dhe vdekjen e të riut Nahel, dhe t’i tregoj familjes së tij solidaritetin tonë dhe përzemërsinë e kombit. Ne kemi një adoleshent që është vrarë. Është e pashpjegueshme, e pafalshme,” tha ai, duke shtuar se çështja u referua menjëherë në gjykatë, ku ai shpreson që drejtësia “do të bëjë punën e saj shpejt”.

    Nahel M. Ishte ndaluar nga policia rrugore, derisa ai po ngiste një makinë të llojit Mercedes. Policia fillimisht kishte thënë se kishte qëlluar adoleshentin, pasi ai ishte nisur me makinë drejt tyre, por këto deklarata janë në kontradiktë me disa video që kanë qarkulluar në rrjetet sociale.

    Në videot e publikuara shfaqen dy policë duke qëndruar pranë makinës së tyre të parkuar, teksa njëri prej zyrtarëve i drejton armën shoferit. Më pas dëgjohet një e shtënë, teksa makina që po ngiste adoleshenti, lëvizë për një kohë të shkurtër dhe më pas përplaset.

  • Trazira në Paris pas vrasjes së një adoleshenti nga policia

    Trazira në Paris pas vrasjes së një adoleshenti nga policia

    Protesta dhe trazira shpërthyen në rajonin e Parisit, pasi policia qëlloi për vdekje një 17-vjeçar, i cili, siç u tha, nuk ndaloi kur u urdhërua nga policia rrugore.

    Një video që qarkullon në rrjetet sociale, tregon një oficer policie që i drejton armën shoferit të një makine, përpara se të dëgjohet një e shtënë. Makina më pas përplaset.

    Ministri i Brendshëm i Francës, Gerald Darmanin, tha se videoja e shpërndarë në mediat sociale, është “jashtëzakonisht tronditëse”.

    Adoleshenti, i identifikuar si Nael M., vdiq si pasojë e plagëve të plumbave në gjoks, pavarësisht ndihmës së urgjencës.

    Oficeri që dyshohet se qëlloi, u arrestua nën akuzën për vrasje.

    Nael M. është personi i dytë që vritet këtë vit në Francë nga të shtënat e policisë në trafik. Vitin e kaluar, 13 persona u vranë në këtë mënyrë.

    Vrasja e Nael M. nxiti një seri protestash mbrëmjen e së martës në Nantere – zonë në perëndim të Parisit, ku u vra adoleshenti.

    Disa makina dhe kosha plehrash u dogjën, ndërsa stacione të autobusëve u shkatërruan.

    Së paku 24 persona u arrestuan pas trazirave./REL/

  • Prishtinë: Vrau bashkëshorten me sëpatë, dënohet me 25 vjet burgim i akuzuari

    Prishtinë: Vrau bashkëshorten me sëpatë, dënohet me 25 vjet burgim i akuzuari

    Gjykata Themelore në Prishtinë, njoftoi se është dënuar me 25 vjet burgim I.G., i akuzuari për vrasjen e bashkëshortes së tij.

    I akuzuari kishte vrarë më sëpatë bashkëshorten e tij, derisa ajo ishte në gjumë.

    Gjykata Themelore në Prishtinë njofton se I.G ka pranuar fajësinë për vrasjen e bashkëshortes së tij, transmeton Telegrafi.

    “Gjykata Themelore në Prishtinë – Departamenti për Krime të Rënda ka shpallur aktgjykimin në çështjen penale kundër të akuzuarit I.G për veprën penale Vrasje e rëndë, nga neni 173 paragrafi 1 pikat 1.3 dhe 1.4 të Kodit Penal të Republikës së Kosovës. Më datë 30.05.2023 gjykata ka mbajtur shqyrtimin fillestar në këtë çështje penale, në të cilin i akuzuari I.G ka pranuar fajësinë, ndërsa me datë 31.05.2023 gjykata ka shpallur aktgjykimin në çështjen penale kundër akuzuarit I.G. i cili është shpallur fajtor dhe është dënuar me dënim me burg në kohëzgjatje prej 25 (njëzet e pesë) vite, të akuzuarit i është vazhduar masa e paraburgimit”, thuhet në njoftim.

    Gjykata bën të ditur se, i akuzuari I.G me datë 25.11.2022 rreth orës 04:00, në shtëpinë e tij në Prishtinë, në mënyrë mizore dhe dinake, kishte privuar nga jeta bashkëshorten e tij, tani të ndjerën S.G, në atë mënyrë që derisa e ndjera kishte qenë duke fjetur, i akuzuari e kishte goditur me sëpatë disa herë në pjesën e majtë të kokës dhe si pasojë e këtyre goditjeve, e ndjera S.G kishte ndërruar jetë.

    “Kjo gjendje faktike është vërtetuar pas pranimit të fajësisë nga i akuzuari dhe provat materiale që gjenden në shkresat e lëndës”.

    Kundër këtij aktgjykimi palët kanë të drejtë ankese në Gjykatën e Apelit të Kosovës, përmes Gjykatës Themelore në Prishtinë.

    Ndryshe, rasti tragjik kishte ndodhur në nëntor të vitit 2022, viktima kishte qenë mësimdhënëse. Për vrasjen e saj ka pasur reagime të shumta.

  • Përleshje mes nxënësve në një shkollë në Gramsh, theret për vdekje një 13-vjeçar

    Përleshje mes nxënësve në një shkollë në Gramsh, theret për vdekje një 13-vjeçar

    Një 13-vjeçar në shkollën 9-vjeçare “Asllan Shahini” në Gramsh, dyshohet se është therur për vdekje.

    Ngjarja e rëndë raportohet të ketë ndodhur pak çaste më parë në ambientet e shkollës, ku janë përfshirë në konflikt me njëri tjetrin 4 nxënës të klasës së 9-të.

    Në konflikt e sipër është plagosur me thikë 13-vjeçari me iniciale F.B., i cili ka humbur jetën nga plagët e marra.

    Po ashtu një tjetër nga nxënësit e përfshirë në konflikt ka mbetur i plagosur, gjendja e të cilit nuk dihet ende.

    Policia ka mbërritur në vendngjarje për hetimin e rrethanave të ngjarjes tronditëse./TCh

  • 12 të vrarë në sulmet e fundit ajrore në Gaza

    12 të vrarë në sulmet e fundit ajrore në Gaza

    Izraeli ka vazhduar sulmet ajrore në Gaza, duke vrarë 12 persona dhe plagosur rreth 20 të tjerë, ndër ta edhe fëmijë.

    Zyrtarët e ministrisë palestineze të shëndetësisë thanë se nëntë prej të vrarëve ishin civilë. Xhihadi Islamik Palestinez ka thënë se sulmi izraelit “nuk do të kalojë pa u ndëshkuar”.

    Sulmi i natës së djeshme shënjestroi një ndërtesë banimi në mes të qytetit të Gazës dhe në Rafah në pjesën jugore të rripit.

    Forcat izraelite kanë vrarë tre anëtarë të lëvizjes së Xhihadit Islamik Palestinez në sulmet ajrore gjatë natës në Gaza.

    Zyrtarët e ushtrisë izraelite kanë këshilluar banorët izraelitë të komuniteteve brenda 40 km nga Gaza që të qëndrojnë pranë strehimoreve të përcaktuara për bomba në pritje të raketave palestineze.

  • Vuçiq: Vrasja masive afër Beogradit, akt terrorist

    Vuçiq: Vrasja masive afër Beogradit, akt terrorist

    Presidenti i Serbisë, Aleksandar Vuçiq, e ka quajtur akt terrorist sulmin e së enjtes afër Beogradit, ku u vranë tetë persona.

    “Është një akt në të cilin komunitetet tona speciale antiterroriste kishin për detyrë të arrestonin ose neutralizonin një terrorist. Ai është arrestuar dhe nuk do ta shohë më kurrë dritën e diellit. Ai nuk do të dalë nga burgu”, tha Vuçiq, në një konferencë për media, të premten.

    Nga të shtënat masive që ndodhën në disa fshatra të Mlladenovcit, në territorin e qytetit të Beogradit, mbetën të plagosur 14 persona, bëri të ditur Ministria e Punëve të Brendshme e Serbisë.

    Sipas njoftimit, sulmuesi i dyshuar U.B., i lindur në vitin 2002, u arrestua afër qytetit të Kragujevcit, pas disa orësh në arrati.

    Të shtënat ndodhën në fshatrat Dubona, Mallo Orashje dhe Shepshin, të enjten vonë.

    “Policia po vazhdon punën për zbardhjen e të gjitha fakteve dhe rrethanave të kësaj ngjarjeje”, thuhet në njoftimin e ministrisë serbe.

    Policia ende nuk ka bërë të ditur motivin e sulmit.

    Presidenti serb Vuçiq, pas këtij sulmi, përmendi disa masa sigurie që do t’i ndërmarrë qeveria përfshirë punësimin e 1.200 policëve të rinj dhe transferimin e 1.000 të tjerëve për të qëndruar afër shkollave.

    “(Kjo do të bëhet), në mënyrë që prindërit të ndjehen të sigurt. Do të ketë edhe polici e oficerë pothuajse gjithmonë në shkollë, derisa të arrijmë në atë nivel që polici të jetë gjithmonë në shkollë. Me këtë, jo vetëm që do të rrisim sigurinë për 90 për qind, por do të ulim edhe dhunën e bashkëmoshatarëve në shkollë me 80 për qind, besoj”, tha Vuçiq.

    Sipas disa mediave lokale, sulmuesi qëlloi mbi njerëz me një armë automatike, pasi pati një debat me një oficer të policisë, në një park në fshatin Dubona.

    Tre nga të plagosurit iu nënshtruan trajtimit urgjent mjekësor në një spital lokal, raportojnë korrespondentët e Radios Evropa e Lirë në terren.

    Instituti për Transfuzion të Gjakut në Serbi i tha REL-it se Ministria e Shëndetësisë u ka bërë thirrje qytetarëve që të dhurojnë gjak.

    Ministri i Brendshëm i Serbisë, Bratisllav Gashiq, e cilësoi incidentin si “akt terrorist”, shkruan portali serb i lajmeve, Telegraf.

    Forcat e xhandarmërisë me armë të gjata dhe patrulla të shumta policore janë në terren.

    Ministrja e Shëndetësisë e Serbisë, Danica Grujiçiç, dhe shefi i Shërbimit të Zbulimit, Aleksandar Vulin, raportohet se kanë udhëtuar në zonë.

    Këto janë të shtënat e dyta masive që ndodhën në Serbi këtë javë.

    Të mërkurën, një djalë 13 vjeç dyshohet se vrau tetë nxënës dhe një rojë të sigurisë në një shkollë në qendër të Beogradit./REL/

  • Tjetër sulm masiv në Serbi, arrestohet i dyshuari

    Tjetër sulm masiv në Serbi, arrestohet i dyshuari

    Autoritetet serbe kanë arritur që ta arrestojnë 21-vjeçarin e dyshuar për sulmin masiv të mbrëmshëm ku mbetën të vrarë tetë persona dhe u plagosën 13 të tjerë në fshatin Dubonë.

    Siç raporton RTS, i dyshuari është arrestuar në afërsi të fshatit Kragujevcit.

    Sulmi raportohet të ketë ndodh rreth orës 23:00, teksa sipas ministrisë së Brendshme të Serbisë, sulmuesi qëlloi një grup njerëzish me një armë automatike dhe u largua nga vendi i ngjarjes.

    Kujtojmë se sulmi i mbrëmshëm është i dyti i këtij lloji pasi të mërkurën një fëmijë 13-vjeç dyshohet se la të vdekur tetë fëmijë dhe rojen e një shkolle në Beograd.

    Tetë të vrarë nga të shtënat masive në disa fshatra të Serbisë

  • ​Sulmi tragjik në Serbi, Kurti shpreh ngushëllime për viktimat dhe familjet e tyre

    ​Sulmi tragjik në Serbi, Kurti shpreh ngushëllime për viktimat dhe familjet e tyre

    Kryeministri i Kosovës, Albin Kurti ka shprehur ngushëllime për viktimat dhe familjet e tyre, pas sulmit të armatosur në Beograd të Serbisë.

    Kurti po ashtu ka uruar shërim sa më të shpejtë për të lënduarit.

    “Dëshiroj të shpreh ngushëllimet e mia më të thella për viktimat e të shtënave në shkollë në Beograd dhe për familjet e tyre. Gjithashtu u uroj shërim sa më të shpejtë të lënduarve në këtë ngjarje tragjike”, ka shkruar ai në Twitter.

    Tetë nxënës dhe një roje sigurie u vranë të mërkurën nga të shtënat me armë zjarri në Shkollën Fillore “Vlladisllav Ribnikar” në Beograd. Sipas njoftimit, gjashtë nxënës të tjerë dhe një mësues u plagosën dhe aktualisht ndodhen në trajtim mjekësor.

    Në oborrin e shkollës është arrestuar nxënësi i kësaj shkolle, K. K. 14-vjeçar, i cili ka plagosur edhe gjashtë nxënës dhe një mësuese.

    Shefi i Policisë së Beogradit, Veselin Miliq ka deklaruar se janë duke u bërë hetime për ndriçimin e rastit.

    Sipas njohurive, siç ka treguar Miliq, 14-vjeçari veprën penale e kishte planifikuar që një kohë të gjatë.

  • Tetë nxënës dhe një roje vriten nga të shtënat në një shkollë në Beograd

    Tetë nxënës dhe një roje vriten nga të shtënat në një shkollë në Beograd

    Tetë nxënës dhe një roje sigurie u vranë nga të shtënat me armë zjarri në Shkollën Fillore “Vlladisllav Ribnikar” në Beograd, bëri të ditur Policia e Serbisë.

    Sipas njoftimit, gjashtë nxënës të tjerë dhe një mësues u plagosën dhe aktualisht ndodhen në trajtim mjekësor.

    Në oborrin e shkollës u gjet dhe u arrestua nxënësi i kësaj shkolle, K. K. (14), i cili dyshohet se ka kryer këtë vepër, tha po ashtu policia, por pa dhënë detaje për motivin e sulmit.

    Ministria e Punëve të Brendshme e Serbisë tha më herët se i dyshuari, nxënës i klasës së shtatë, ka qëlluar disa herë nga arma e të atit në drejtim të nxënësve dhe sigurimit të shkollës.

    Millan Nedelkoviq, kryetar i komunës së Vraçarit, ku ndodhet shkolla, u tha gazetarëve se nxënësi ka sjellë një armë në çantën e shpinës dhe se të shtënat kanë ndodhur në korridorin e shkollës.

    Ai tha se shkolla ka kamera sigurie, por se nuk ka detektorë metalikë.

    Të gjitha rrugët përreth shkollës, që ndodhet në qendër të Beogradit, janë të bllokuara, raporton Shërbimi i Ballkanit i Radios Evropa e Lirë.

    Në vendin e ngjarjes kanë dalë ministri i Arsimit i Serbisë, Branko Ruzhiq, dhe ministrja e Shëndetësisë, Danica Grujiçiq.

  • Beograd: Nxënësi vret rojën e shkollës, plagosë edhe mësuesen e shokët e klasës

    Beograd: Nxënësi vret rojën e shkollës, plagosë edhe mësuesen e shokët e klasës

    Në shkollën fillore “Vladislav Ribnikar” në Vraçar të Beogradit sot në mëngjes rreth orës 8:00 ka pasur të shtëna me armë zjarri, kur njëri nga nxënësit ka qëlluar disa herë në drejtim të shokëve të klasës dhe personelit të sigurisë.

    Sipas informacioneve të para nga mediat serbe, ka mbetur i vrarë roja i shkollës si dhe është plagosur rëndë mësuesja e historisë dhe ka disa nxënës të lënduar të tjerë.

    RTS shkruan se mësuesja dhe tre fëmijët janë pranuar në Qendrën Emergjente në Beograd dhe të gjithë kanë plagë me armë zjarri në zonën e gjoksit.

    Nxënësit e tjerë janë evakuuar dhe shumica e fëmijëve ndodhen jashtë të cilët po kontaktojnë me prindërit e tyre përmes telefonit.

    Policia ka arrestuar të miturin e dyshuar, nxënës i klasës së shtatë, i cili siç dyshohet ka qëlluar disa herë me armën e babait të tij.

    Siç mësohet jozyrtarisht, fëmijët fillimisht kanë menduar se dikush ka hedhur fishekzjarre dhe sipas pretendimeve të nxënësve të pranishëm, autori i ngjarjes i identifikuar si K.K. që qëlloi kurrë nuk kishte problem me askënd.

    Nxënësit thonë se ka qenë i qetë dhe i tërhequr dhe se pesë minuta para përfundimit të orës së mësimit ka hyrë dhe ka nisur të qëllojë.

    Sipas raporteve, jo të gjithë fëmijët e braktisën shkollën sepse disa mësues i mbyllën fëmijët në klasa.

    Te shkolla ka një prezencë të shtuar të policisë si dhe të autoambulancave.Horror në Beograd, nxënësi vret rojën e shkollës dhe plagos mësuesen e shokët e klasës