ATV

Tag: Rusia

  • Kievi sulmohet me breshëri raketash nga Rusia

    Kievi sulmohet me breshëri raketash nga Rusia

    Zyrtarët e Kievit raportuan një sulm ajror jashtëzakonisht të ashpër nga Rusia në orët e para të së martës, duke përfshirë përdorimin e dronëve dhe raketave. Ky shënon sulmin e tetë ajror në kryeqytetin ukrainas këtë muaj.

    Sipas një deklarate të postuar në aplikacionin e mesazheve Telegram, Serhiy Popko, kreu i administratës ushtarake të qytetit të Kievit, e përshkroi sulmin e fundit ajror nga Rusia si të paprecedentë në intensitetin e tij, me numrin më të madh të raketave sulmuese të lëshuara për një kohë të shkurtë.

    “Sipas informacioneve paraprake, shumica dërrmuese e objektivave të armikut në hapësirën ajrore të Kievit u zbuluan dhe u shkatërruan”, tha Popko.

    Numri i objektivave të goditura dhe të shkatërruara gjatë sulmit ajror në Kiev nuk dihet për momentin.

    Rusia kishte pezulluar sulmet e saj me raketa me rreze të gjatë veprimi për disa javë, por rifilloi taktikën në fund të prillit, duke nisur sulme të shumta në ditët e fundit, me Kievin që ishte një objektiv i shpeshtë.

    Pavarësisht sulmeve, Ukraina i ka zmbrapsur me sukses shumicën e tyre.

    Sipas zyrtarëve, mbeturinat e raketave ranë në disa rrethe të Kievit, duke përfshirë Obolonski, Shevchenkivski, Solomyanski dhe Darnitski, të martën.

    Kryetari i bashkisë së Kievit Vitali Klitschko raportoi se mbeturinat që ranë dogjën shumë makina dhe shkaktuan dëmtime në një ndërtesë në lagjen Solomyanskyi në pjesën perëndimore të kryeqytetit.

    Nga ngjarja kanë mbetur të plagosur tre persona.

    Sipas Klitschkos, një sulm me dron u zmbraps nga sistemet e mbrojtjes ajrore në jug të Borispilit.

    Borispil ndodhet në juglindje të Kievit dhe është shtëpia e aeroportit kryesor civil të kryeqytetit, i cili aktualisht është i mbyllur.

    Administrata ushtarake raportoi se dëmet në rrethet e tjera nuk ishin të mëdha dhe nuk kishte informacion të menjëhershëm për viktima të mundshme.

    Sirenat e sulmit ajror u dëgjuan pothuajse në të gjithë vendin për më shumë se tre orë të martën, në Kiev dhe zonën përreth./REL/

  • BE-ja propozon rund të ri sanksionesh ndaj Rusisë

    BE-ja propozon rund të ri sanksionesh ndaj Rusisë

    Brukseli i ka propozuar shteteve anëtare të Bashkimit Evropian rundin e 11 të sanksioneve lidhur me luftën e Rusisë kundër Ukrainës, sanksione që synojnë të parandalojnë shmangien e ndëshkimeve paraprake.

    “Kjo paketë do të përqendrohet në zbatimin e sanksioneve, efektivitetin e tyre dhe si të parandalohet shmangia e sanksioneve”, tha zëdhënësi i Komisionit Evropian, Eric Mamer.

    Pjesë e paketës së sanksioneve që KE-ja ka propozuar synojnë ndaljen e eksporteve të teknologjisë së ndjeshme të tetë kompanive kineze, nën dyshimet se këto kompani po shesin teknologji të tillë në Rusi, raporton AFP, që ka parë një dokument të paketës së re të sanksioneve.

    Ambasadorët e BE-së të mërkurën do të takohen për të nisur bisedimet për rundin e ri të sanksioneve.

    Të 27 shtetet e bllokut evropian kanë goditur Moskën me sanksione të paprecedentë që kur presidenti rus, Vladimir Putin, nisi pushtimin e Ukrainës shkurtin e vitit të kaluar.

    Por, shumë diplomatë evropianë kanë thënë se blloku evropian është afër arritjes së limitit, sa i përket masave të gjera që të gjitha anëtarët mund të pajtohen që t’i vendosen Moskës.

    Brukseli tani po përqendrohen që të mbyllen zbrazëtirat ligjore në paketat e sanksioneve që veçse janë vendosur.

    BE-ja dëshiron që të godasë eksportet e teknologjisë së ndjeshme që bëhen nga shtetet e treta për në Rusi. Ky lloj i teknologjisë mund të përdoret për fushëbetejë, sikurse janë mikroçipat.

    Zyrtarët evropianë janë ankuar se shtetet, përfshirë Turqinë dhe Emiratet e Bashkuara Arabe, por edhe ish-shtetet sovjetike në Kaukaz dhe Azinë Qendrore, po përballen me sanksione ndaj disa mallrave që ata importojnë.

    Në listën e sanksioneve të propozuara nga blloku, për kufizim të eksporteve, janë edhe Armenia, Irani, Uzbekistani dhe Emiratet e Bashkuara Arabe.

    Si pjesë e propozimit të ri, BE-ja po synon që të përmirësojë mënyrën se si ndëshkon shtetet që tentojnë të shmangin sanksionet.

    Blloku po synon që të krijojë një mekanizëm që do të lejonte kufizimin e eksporteve të disa mallrave nga shtetet e treta, që dyshohen se i shërbejnë Rusisë./REL/

  • ​Si po planifikon Rusia sabotazh në Detin e Veriut

    ​Si po planifikon Rusia sabotazh në Detin e Veriut

    Rusia ka një program për të sabotuar fermat e erës dhe kabllot e komunikimit në Detin e Veriut, sipas akuzave të reja. Detajet vijnë nga një hetim i përbashkët nga transmetuesit publik në Danimarkë, Norvegji, Suedi dhe Finlandë.

    Sipas hetimit, Rusia ka një flotë anijesh të maskuara si anije peshkimi dhe anije kërkimore në Detin e Veriut, shkruan BBC.

    Ata mbajnë pajisje mbikëqyrjeje nënujore dhe po hartojnë vendet kryesore për sabotim të mundshëm.

    BBC kupton se zyrtarët e Mbretërisë së Bashkuar janë në dijeni të anijeve ruse që lëvizin nëpër ujërat e Mbretërisë së Bashkuar si pjesë e programit.

    E para nga një seri raportesh do të transmetohet të mërkurën nga DR në Danimarkë, NRK në Norvegji, SVT në Suedi dhe Yle në Finlandë.

  • ​G7: Rusia të paguajë për dëmin që i ka shkaktuar Ukrainës

    ​G7: Rusia të paguajë për dëmin që i ka shkaktuar Ukrainës

    Çdo zgjidhje e konfliktit në Ukrainë duhet të sigurojë që Rusia të paguajë për dëmin që ka shkaktuar, sipas një deklarate të përbashkët të vendeve të G7, në Japoni.

    Aty thuhet se G7 mbetet e përkushtuar për të shtuar sanksionet kundër Rusisë, shkruan ANSA.

    “Ne zotohemi të mbështesim Ukrainën për aq kohë sa është e nevojshme, dhe të ofrojmë mbështetje të vazhdueshme ushtarake, ekonomike dhe institucionale për të ndihmuar Ukrainën të mbrohet, të sigurojë të ardhmen e saj të lirë dhe demokratike, dhe të pengojë agresionin e ardhshëm rus”, thuhet në deklaratë.

  • Opozitari i njohur rus, Kara-Murza, dënohet me 25 vite burg për tradhti

    Opozitari i njohur rus, Kara-Murza, dënohet me 25 vite burg për tradhti

    Kritiku i njohur i Kremlinit, Vladimir Kara-Murza u dënua të hënën nga një gjykatë në Moskë me 25 vjet burg për tradhti.

    Aktivisti i opozitës ka kritikuar luftën e Rusisë kundër Ukrainës dhe njihet si një ndër kritikët më të ashpër të presidentit rus, Vladimir Putin.

    Prokurorët kishin kërkuar dënimin e gjatë në fillim të prillit, shkruan BBC.

    Sipas avokates së Kara-Murza, Maria Eismont, politikani është në gjendje të keqe shëndetësore.

    Ish-gazetari dhe politikani ruso-britanik është i fundit nga disa kundërshtarë të Putinit që janë arrestuar ose janë detyruar të largohen nga Rusia.

    Ai i ka mohuar të gjitha akuzat.

    Javën e kaluar, ai tha në një deklaratë: “Unë pajtohem për çdo fjalë që kam thënë… Jo vetëm që nuk pendohem për asgjë, por jam krenar për këtë. Unë e di se do të vijë dita kur errësira që ka përfshirë vendin tonë do të pastrohet… Shoqëria jonë do të hapë sytë dhe do të dridhet kur të kuptojë se çfarë krimesh janë bërë në emër të saj”.

    Dënimi 25-vjeçar i Kara-Murza ishte maksimumi i kërkuar nga prokurorët dhe është dënimi më i gjatë që një figurë opozitare ka marrë që nga fillimi i luftës në Ukrainë.

    U deshën vetëm pak minuta që gjyqtari të vendoste për çështjen e tij – një proces që ndonjëherë mund të zgjasë shumë në gjykatat ruse.

    Dënimi i ashpër është një shenjë se në Rusinë e sotme autoritetet janë të vendosura jo vetëm të mbyllin gojën e kritikëve, por edhe të neutralizojnë çdo gjë ose cilindo që ata besojnë se përfaqëson një kërcënim për sistemin politik.

    BBC-së nuk iu lejua hyrja në gjykatë dhe vetëm një pjese të vogël të gazetarëve nga media shtetërore ruse iu dha akses, së bashku me nënën dhe avokatin e të pandehurit.

    Në vend të kësaj, gazetarët dhe ambasadorët e huaj u grumbulluan në një dhomë të veçantë për të parë punimet në dy ekrane televizive.

    Duke folur jashtë gjykatës pas dënimit, avokatja e Kara-Murza, Maria Eismon, tha se dënimi i ashpër ishte “i tmerrshëm”, por gjithashtu një “vlerësim i lartë” i punës së klientit të saj.

    “Kur [Z. Kara-Murza] dëgjoi se ishin 25 vjet, ai tha: vetëvlerësimi im madje u rrit; kuptova se kisha bërë gjithçka siç duhet!”, tha ajo.

    Vitin e kaluar, Kara-Murza fitoi çmimin për të drejtat e njeriut ”Vaclav Havel”.

    Ai ua dedikoi çmimin të gjithë atyre në Rusi që janë kundër luftës në Ukrainë.

  • G7 i bën thirrje Rusisë të tërhiqet nga Ukraina

    G7 i bën thirrje Rusisë të tërhiqet nga Ukraina

    Ministrat e Jashtëm të G7-ës, apo grupit të vendeve më të industrializuara, përsëritën përkushtimin e tyre për të mbështetur fuqishëm Ukrainën, duke “intensifikuar, koordinuar dhe zbatuar plotësisht sanksionet kundër Rusisë”.

    Gjatë një takimi në Japoni, ministrat e G7-ës thanë se “Rusia duhet t’i tërheqë të gjitha forcat dhe pajisjet nga Ukraina, menjëherë dhe pa kushte”, transmeton një deklaratë e lëshuar nga Ministria e Jashtme e Japonisë.

    Ministri i Jashtëm japonez, Hayashi Yoshimasa, tha se është e rëndësishme që të ruhet uniteti në zbatimin e sanksioneve kundër Rusisë.

    Duke komentuar njoftimin e presidentit rus, Vladimir Putin, se Rusia do të vendosë armë taktike bërthamore në Bjellorusi, ministrat e G7-ës thanë se “retorika e papërgjegjshme bërthamore e Rusisë është e papranueshme”.

    Rusia dikur ka qenë pjesë e asaj që është njohur si G8, por është dëbuar pasi ka aneksuar Gadishullin ukrainas të Krimesë në vitin 2014.

    Me urdhër të Putinit, ushtria ruse ka nisur pushtimin në shkallë të gjerë të Ukrainës në shkurt të vitit të kaluar.

    Perëndimi ka ndërmarrë sanksione të ashpra kundër Moskës, ndërsa Kievin është duke e ndihmuar me armatim dhe logjistikë./REL/

  • ​HRW: Rusia ka hapur qendër të torturës në Herson

    ​HRW: Rusia ka hapur qendër të torturës në Herson

    Forcat ruse që pushtuan qytetin jugor ukrainas të Hersonit dhe e patën nën kontroll nga marsi deri në nëntor të vitit 2022, udhëhoqën një “qendër të torturës” dhe ndërtesa të ngjashme ku ndaloheshin paligjshëm dhe torturoheshin civilë ukrainas, u tha në raportin e publikuar më 13 prill nga Human Rights Watch (HRW).

    Kjo organizatë për të drejtat e njeriut tha se qendra e supozuar e torturës gjendej në rrugën Teploenerhetikiv. Ndërkaq qendrat e tjera të ndalimit pretendohet se gjendeshin në ndërtesën e komunës, në një shkollë lokale dhe në hangarin e një aeroporti.

    Forcat ruse arrestuan dhe torturuan në mënyrë të paligjshme banorët e qytetit Herson dhe rrethinave të tij gjatë pushtimit të zonës nga marsi deri në nëntor 2022, tha sot Human Rights Watch.

    Viktimat dhe anëtarët e familjeve të tyre i thanë Human Rights Watch për torturën dhe keqtrajtimet e tjera në një qendër paraburgimi në rrugën Teploenerhetykiv në Herson, të cilën banorët vendas e quanin si “vrimë”, si dhe një objekt paraburgimi në rrugën Perekopska dhe objekte të improvizuara në ndërtesën e administratës komunale, një shkollë fshati dhe një hangar aeroporti.

    “Ish-të burgosurit raportuan vazhdimisht forma të ngjashme abuzimi, duke përfshirë rrahje të rënda me shkopinj dhe shkopinj gome, goditje elektrike, kërcënime me vdekje ose gjymtim dhe përdorim të pozicioneve të dhimbshme stresi. Nuk iu ofrua kujdesi i duhur mjekësor për të paraburgosurit”, thuhet nw raport.

    “Forcat pushtuese ruse kryen tortura të tmerrshme dhe abuzime të tjera kundër banorëve të Hersonit në qendrën e torturës në rrugën Teploenerhetykiv dhe shumë objekte të tjera paraburgimi”, tha Yulia Gorbunova, studiuese e lartë në Ukrainë në Human Rights Watch.

    “Ata që janë përgjegjës për këto akte të tmerrshme nuk duhet të mbeten pa u ndëshkuar dhe viktimat dhe familjet e tyre duhet të marrin dëmshpërblim për vuajtjet e tyre dhe informacion për ata që ende janë të zhdukur.”

    Sipas viktimave, që janë intervistuar nga HRW, forcat pushtuese kanë rrahur të burgosurit, i kanë torturuar me elektroshok, i kanë detyruar që të qëndrojnë në pozicione që iu shkaktonin dhimbje si dhe i kanë kërcënuar me vdekje dhe gjymtim.

    Moska nuk ka reaguar menjëherë për këtë raport të HRW.

    Organizata HRW ka intervistuar 34 banorë lokalë lidhur me abuzimet e pretenduara të civilëve, pasi paraprakisht kishte lëshuar një raport të ngjashëm në korrik të vitit 2022.

    Të intervistuarit thanë se civilët ishin rrëmbyer nën dyshimet se po ofronin apo po shprehnin mbështetje për ushtrinë apo Qeverinë ukrainase, dhe se po luftonin kundër separatistëve të mbështetur nga Rusia në disa pjesë në lindje të Ukrainës.

    Një grua raportohet se është mbajtur peng derisa burri i saj, që ishte në arrati, u vetëdorëzua.

    Gardistët rusë gjithashtu poshtëruan të burgosurit duke i detyruar ata të bërtisnin slogane pro-ruse, të dëgjonin dhe këndonin himnin kombëtar rus dhe këngët patriotike dhe të duartrokisnin këngëtarët, nën kërcënimin e rrahjeve.

    “Trajtimi i të gjithë shtetasve ukrainas në zonat e pushtuara u përkeqësua jashtëzakonisht shumë”, tha Gorbunova.

    HRW tha se shumë prej akteve, që pretendohet se janë kryer, përbëjnë krime lufte. Në raport u theksua se “të gjitha palët në konfliktin e armatosur në Ukrainë janë të obliguara që t’i përmbahen ligjit ndërkombëtar humanitar”, përfshirë edhe Konventat e Gjenevës.

    Më 4 prill, Këshilli për të Drejtat e Njeriut i OKB-së votoi për zgjatjen dhe zgjerimin e mandatit të një trupi hetues, që po heton krimet e luftës që mund të jenë kryer në Ukrainë.

  • Vuçiq: Serbia nuk i ka shitur armë Ukrainës dhe Rusisë

    Vuçiq: Serbia nuk i ka shitur armë Ukrainës dhe Rusisë

    Presidenti serb, Aleksandar Vuçiq, më 5 mars ka deklaruar se asnjë armë, pajisje apo municion serb nuk i është shitur Rusisë apo Ukrainës dhe se ata që pretendojnë të kundërtën janë “gënjeshtarë, sinjalizues dhe duhet të kenë turp, sepse po i sjellin dëme Serbisë”.

    “Për Serbinë, në përputhje me ligjet ndërkombëtare, ekzistojnë të ashtuquajturit përdorues të lejuar dhe Serbia mund të eksportojë vetëm në vende të tilla. Ne kemi bërë gjithçka në përputhje me ligjin, jemi të pastër si loti”, tha Vuçiq në Doha, ku po merr pjesë në një konferencë të organizuar nga Kombet e Bashkuara.

    Në fund të shkurtit, disa media ruse njoftuan se 3.500 raketa nga fabrika serbe “Krushik” iu dorëzuan forcave të armatosura të Ukrainës, përmes Turqisë dhe Sllovakisë, ndërkaq Ministria e Punëve të Jashtme të Rusisë njoftoi se ky informacion shkakton “shqetësim të thellë”.

    Më herët, demanti ka ardhur nga “Krushik” dhe Ministria e Mbrojtjes e Serbisë.

    Lidhur me pretendimin se armët janë eksportuar në Ukrainë nga Serbia, përmes Turqisë, Vuçiq tha se Serbia “e ka mbrojtur veten në mënyrë shtesë” duke ditur se ekziston mundësia që një pjesë e mallit të përfundojë diku tjetër.

    “Ne theksuam se është e pamundur që pa pëlqimin tonë të eksportohen municionet që i kemi dhënë Turqisë”, tha Vuçiq, duke shtuar se Serbia “nuk e ka detyruar askënd të luftojë”.

    Portali rus “Mash” njoftoi mbi dyshimet se 3.500 copë raketa “M-21 GRAD” 122 milimetra të Krushikut iu dorëzuan forcave të armatosura të Ukrainës.

    Portali publikoi dokumente, autenticitetin e të cilave Radio Evropa e Lirë nuk ka mundur ta konfirmojë, të cilat pretendohet se tregojnë që kompania kanadeze “JNJ Export Import” ka porositur raketa nga “Krushik”.

    Media ruse ka pohuan se arkat kanë fluturuar nga Serbia në Turqi, ku si ndërmjetës ka kryer transitin kompania turke “Arca Savunma Sanayi Ticaret”, përmes së cilës ngarkesa ka shkuar në Sllovaki, e më pas në Ukrainë.

    Kompania “Krushik” nga Valeva, në perëndim të Serbisë, më 28 shkurt ka njoftuar se nuk ka pasur shitje të raketave në këtë treg dhe as nuk ka pasur kontrata për sasitë dhe shenjat e specifikuara.

    Në deklaratë thuhet se “i gjithë ‘rasti’ mediatik bazohet në shfrytëzimin e informacioneve jo të plota dhe të pandërlidhura”, të cilat, siç thuhet, janë vendosur “në një kontekst negativ”.

    Paraprakisht, më 27 shkurt, reagoi ministri serb i Mbrojtjes, Millosh Vuçeviq, i cili mohoi se Serbia eksporton armë në Ukrainë.

    Kjo nuk është afera e parë, në të cilën Serbia akuzohet për shitjen e armëve në luftën ruse-ukrainase.

    Më 16 korrik 2021, në veri të Greqisë u rrëzua një aeroplan ukrainas dhe u konstatua se po transportonte për në Bangladesh mina për stërvitje, të cilat kompania serbe “Valir” i bleu nga fabrika shtetërore “Krushik”.

    Në mars të vitit 2022, në portalet dhe rrjetet sociale ruse u publikua një fotografia e një ushtari të të ashtuquajturës “Republika Popullore e Donjeckut”, i cili në duar po mbante një minë të pashpërthyer.

    Në bazë të shenjave që ndodheshin në minë, Radio Evropa e Lirë konstatoi se është prodhuar në tremujorin e tretë të vitit 2016. Mina të tilla prodhohen nga fabrika shtetërore serbe e armëve “Krushik”. /REL

  • Osmani: Serbia synon ta marrë Kosovën ashtu siç bëri Rusia me Krimenë

    Osmani: Serbia synon ta marrë Kosovën ashtu siç bëri Rusia me Krimenë

    Presidentja e Kosovës, Vjosa Osmani, ka thënë se Serbia po i përdor taktikat ruse për ta frikësuar Kosovën.

    Në një intervistë për “The Sun Online”, ajo ka thënë se një situatë e rrezikshme po krijohet në Ballkan.

    Sipas saj, presidenti serb, Aleksander Vuçiq, është “thellësisht i lidhur” me Putinin, duke shtuar se Serbia synon ta marrë territorin e Kosovës, ashtu siç bëri Rusia me Krimenë.

    Ajo ka thënë se Serbia po armatos dhe po financon grupe paraushtarake. “Të gjitha këto tregojnë se është pikërisht i njëjti plan si ai i Putinit për Krimenë”, ka thënë ajo.

    Osmani i kërkoi Perëndimit të vazhdojë t’i mbështesë ata, duke paralajmëruar se konflikti në Ballkan do të destabilizojë më tej një Evropë tashmë të brishtë.

    Derisa ka folur për Planin Evropian, ajo ka thënë se janë absolutisht të zhgënjyer që njohja reciproke nuk përfshihet në mënyrë eksplicite në këtë marrëveshje.

    Sipas saj, njohja reciproke është zgjidhja e vetme që mund të garantojë paqe dhe stabilitet afatgjatë.

    Ajo ka shtuar se partnerët evropianë duhet t’ia rikujtojnë vazhdimisht Serbisë se Kosova është e pavarur dhe e tillë do të mbetet gjithmonë.