Tag: Peter Stano

Bashkimi Evropian ka sqaruar gjatë ditës së sotme se reagimet gjatë fundjavës ndaj disa zhvillimeve në Kosovë kanë pasur për qëllim që t’i shmangin tensionet pas disa veprimeve të autoriteteve të Kosovës që BE-ja i ka quajtur “të njëanshme dhe shqetësuese”.

Këtë e ka thënë të hënën në një konferencë me gazetarë, Peter Stano, zëdhënës i BE-së për çështje të politikës së jashtme dhe sigurisë.

“Përgjatë javës së shkuar kemi parë së paku dy shembuj të veprimeve që kanë nxitur shqetësimin e Bashkimit Evropian. Njëri ishte rregullorja e Bankës Qendrore të Kosovës dhe tjetra operacionet policore ndaj disa entiteteve të udhëhequra nga Serbia. Këta hapa janë shqetësues për shkak se ata nuk kontribuojnë në shtensionimin e situatës“, ka thënë Stano.

Me vendimin e Bankës Qendrore të Kosovës që të përdorë vetëm euron për pagesa, nga 1 shkurti është hequr përdorimi i dinarit serb. Ky vendim i Kosovës u kundërshtua nga Serbia, ndërsa bashkësia ndërkombëtare kërkoi shtyrjen e zbatimit të tij me arsyetimin se ekziston shqetësimi se mund të ketë ndikim negativ te serbët e Kosovës.

Po ashtu, më 2 shkurt, në një aksion policor, autoritetet kosovare mbyllën tri komuna në Pejë, Istog dhe Klinë, të cilat funksiononin paralelisht në sistemin serb.

Stano ka theksuar se, “ato veprime, zakonisht, nuk janë të koordinuara, janë të njëanshme dhe pa nivelin e duhur të konsultimeve paraprake për të shmangur ndikimin negativ që mund të kenë ndaj njerëzve në terren. Prandaj, Bashkimi Evropian reagoi ndaj të dyja këtyre zhvillimeve“.

Sipas zëdhënësit të BE-së, këto deklarata ishin përforcuar edhe nga partnerët tjerë ndërkombëtarë si dhe nga ana e Komisionit Evropian.

“Natyrisht, se është shqetësuese kur shohim se një varg i hapave të njëanshëm mund të çojë deri te diçka që ne nuk do të donim të shihnim – përkeqësimi i situatës në terren. Sepse, një gjë është e qartë, ato veprime nuk japin kontribut për të qetësuar situatën dhe për të ndihmuar që njerëzit të ndihen se jeta e tyre po bëhet më e mirë. Krejt e kundërta. Prandaj është e rëndësishme të kthehen në dialog“, ka thënë ai.

Duke iu përgjigjur pyetjeve se a planifikohen takime të shpejta në kuadër të dialogut, zëdhënësi i BE-së ka thënë se po punohet në atë drejtim, porse nuk ka ndonjë datë të paraparë.

“Përfaqësuesi i posaçëm i BE-së, Mirosllav Lajçak, po punon me partnerët nga të dyja palët në rajon dhe në BE, si dhe me bashkësinë më të gjerë ndërkombëtare, në mënyrë që të mundësohet që të dyja palët të fillojnë të sillen në mënyrë konstruktive, të kthehen në tryezën e bisedimeve dhe të diskutojnë çështjet e rëndësishme pa hapa të njëanshëm“, është shprehur Stano.

“Nuk jam në gjendje të shpall ndonjë datë të ndonjë takimi të radhës. Përfaqësuesi i posaçëm po punon me një ritëm të përditshëm dhe shpresojmë se në një moment do të do të jemi në gjendje të caktojmë një takim të nivelit të lartë të presidentit nga Serbia dhe kryeministrit nga Kosova, ku do të bënim përpjekje për t’u ndihmuar t’i zgjidhin çështjet“, ka thënë ai, por ka përsëritur se “tash për tash nuk ka ndonjë afat kohor të caktuar”.

“Ne u bëjmë thirrje autoriteteve të Kosovës që të angazhohen në procesin e konsultimeve dhe të shmangin hapat tjerë të njëanshëm sepse ata hapa kanë vërtet një efekt kundërproduktiv”, ka tëhënë Stano.

Bashkimi Evropian gjatë fundjavës kishte dhënë një deklaratë duke i kërkuar Kosovës që, çështjen e statusit të komunave që vazhdon t’i administrojë Serbia, t’a zgjidhë përmes dialogut. /rel

Përgatiti: Fatlum Jashari

Bashkimi Evropian është i palëkundur në qëndrimin se, për Kosovën dhe Serbinë, dialogu dhe anëtarësimi janë procese pashmangshëm dhe pandashëm të lidhura, nëpërmjet dokumenteve zyrtare, qëndrimeve politike dhe jo vetëm atyre.

Qëndrimi i BE-së përbën përgjigje ndaj kërkesës së kryeministrit Albin Kurti për t’i ndarë këto procese.

“Pa përparim në dialog nuk ka përparim në procesin e anëtarësimit në BE. Kjo është e shkruar në një numër dokumentesh, konkluzash të Këshillit, konkluzat e këshillit nga viti 2013, 2014 deri më 2022, në kornizën negociuese të Serbisë, në komunikimin për zgjerim këtë vit, raportet për Kosovën dhe Serbinë. Është shumë e qartë se çfarë pret BE-ja dhe shtetet anëtare, kur bëhet fjalë për anëtarësimin dhe dialogun. Në fakt është pjesë e procesit të njëjtë. Dialogu dhe anëtarësimi për Kosovën dhe Serbinë janë pashmangshëm dhe pandashëm të lidhura… Sigurisht nëse ka progres në njërën anë, do të reflektojë në procesin e anëtarësimit të partnerit në fjalë”, tha zëdhënësi për Politikë të Jashtme dhe Siguri i BE-së, Peter Stano.

Pa komentuar deklaratën e presidentit të Serbisë, Aleksandar Vucic, i cili mbrojti grupin terrorist-paramilitar të udhëhequr nga Milan Radojcic, BE-ja njoftoi se nuk mund të veprojë pa raportin përfundimtar hetimor nga institucionet e Kosovës.

“Është e qartë që BE-ja pret bashkëpunim të pakushtëzuar nga të gjithë që mund të kontribuojnë për të kuptuar se çfarë ka ndodhur, kush janë fajtorët, kush e organizoi, kush mori pjesë, etj. Pozicioni ynë është i qartë, por që të vihemi në lëvizje dhe të nxjerrim pasojat, duhet t’i shohim rezultatet përfundimtare dhe zyrtare të hetimit të kryer nga autoritetet kosovare”, tha Stano.

Katër muaj nga sulmi, institucionet e Kosovës nuk kanë treguar nëse raporti përfundimtar është gati dhe se kur do t’ia përcjellë Bashkimit Evropian.

Zëdhënësi i Bashkimit Evropian, Peter Stano tha sot se BE-ja mirëpret vendimin e Qeverisë së Serbisë për të lejuar lirinë e lëvizjes për automjetet me targa RKS, shkruan gazeta online Reporteri.net.

Nga Bashkimi Evropian thonë se tani presin hapa të ngjashëm nga Kosova, teksa e shohin këtë vendim si hap që tregon se “është e mundur të arrihet progres në procesin e normalizimit të raporteve mes Kosovës dhe Serbisë”.

“Ky vendim paraqet një hap pozitiv në zbatimin e Marrëveshjes për rrugën drejt normalizimit, si dhe angazhimet e mëparshme nga dialogu lidhur me lirinë e lëvizjes. Kjo tregon se është e mundur të arrihet progres në procesin e normalizimit të marrëdhënieve ndërmjet Kosovës dhe Serbisë. Ai gjithashtu përfaqëson një hap në drejtimin e duhur drejt një integrimi më të mirë rajonal dhe evropian të Ballkanit Perëndimor, nga i cili në fund përfitojnë qytetarët e rajonit. Ky vendim i hap rrugën heqjes së plotë të regjimit të stikerasve. BE-ja tani pret që Kosova të përgjigjet në mënyrë të ngjashme”, tha Peter Stano në një deklaratë për N1.

Qeveria e Serbisë ka vendosur të hënën që të lejojë që veturat me targa RKS të lejohen të qarkullojnë brenda territorit të saj.

Vendimin e ka shpalosur drejtori per Kosovë në Qeverinë e Serbisë Petar Petkoviq duke thënë se po e implementojnë një marrëveshje të nënshkruar nga Borko Stefanoviq, tani opozitar serb.

Petkoviq ka thënë se me këtë vendim Serbia nuk e njeh pavarësinë e Kosovës dhe se targat s’janë simbol i shtetësisë sipas tij. Ai ka përmendur edhe pajisjen me targa RKS kohëve të fundit duke thënë se përfaqësuesit e Kishës Ortodokse i përdorin ato.

Petkoviq theksoi se një njoftim se Serbia nuk e njeh Kosovën do të vendoset në të gjitha pikat kufitare dhe administrative.

Sipas tij, ky vendim “nuk paragjykon përcaktimin e statusit përfundimtar dhe nuk mund të interpretohet si pëlqim i Beogradit për të devijuar nga të drejtat e garantuara me Rezolutën 1244 të Këshillit të Sigurimit të Kombeve të Bashkuara”, thuhet në tekstin e mohimit.

Zëdhënësi i BE-së, Peter Stano, tha se draft-statuti i Asociacionit të komunave me shumicë serbe që i është paraqitur palëve në proces të dialogut në Bruksel (Kosovës dhe Serbisë) është i balancuar dhe evropian.

“Lidhur me draft-statutin e Asociacionit të Komunave Serbe, mund të kujtojmë vetëm se një propozim i ri i balancuar evropian për themelimin e Asociacionit të Komunave iu paraqit partnerëve përkatës nga EUSR për dialogun e Beogradit në Prishtinë gjatë vizitës së tij në rajon në fund. të muajit tetor dhe më pas u diskutua me të dyja palët gjatë takimit të liderëve në margjinat e Këshillit Evropian”, tha ai.

Stano ka bërë të ditur arsyet se përse BE-ja nuk po e bënë publik përmbajtjen e draft-statutit të Asociacionit.

“Propozimi i BE-së nuk është bërë publik pasi përpjekjet diplomatike janë në vazhdim. Ne kurrë nuk i zbulojmë dokumentet zyrtare publikisht dhe as nuk marrim pjesë në shkëmbime publike për to, ndërkohë që ato diskutohen. Të njëjtën gjë presim edhe nga partnerët, pasi është praktikë normale në ndërmjetësimin ndërkombëtar që procesi të zhvillohet në konfidencialitet”, tha tutje Stano.

Por, ai nuk ka dhënë qëndrim të qartë nëse BE-ja ka një vlerësim se cila palë në proces të dialogut nuk po e zbaton marrëveshjen e Brukselit dhe Ohrit.

“Në pyetjen tuaj të fundit, zbatimi është përgjegjësi e Palëve dhe deri më tani ato nuk kanë qenë në gjendje të ecin përpara dhe të përmbushin detyrimet e tyre” tha zëdhënësi i BE-së, Peter Stano, për RTV21.

Zëdhënësi i Bashkimit Evropiane për Politikë të Jashtme, Peter Stano, në një bisedë për gaztën zvicerane Le Canton27.ch ka dhënë detaje rreth draft-statutit të Asociacionit të Komunave me Shumicë Serbe që po përfolët ditëve të fundit në mediat shqiptare dhe serbe.

“Lidhur me draft-statutin e Asociacionit të Komunave me Shumicë Serbe, mund të kujtojmë vetëm se një propozim i ri i balancuar evropian për krijimin e Asociacionit të Komunave iu paraqit partnerëve përkatës nga Përfaqësuesi Special i BE-së për Dialogun në Beograd në Prishtinë gjatë vizitës së tij në rajon, në fund të tetorit, ku edhe u diskutua më pas me të dyja palët në takimin e « liderëve » në margjinat e Këshillit Evropian” ka thënë fillimisht zëdhënësi i BE-së, Peter Stano për gazetën zvicerane Le Canton27.ch.

Palët po respektojnë konfidencialitetin

Në pyetjen se për çfarë arsye po mbahet sekret ky dokument, Stano u përgjigj: “Propozimi i BE-së nuk është bërë publik, ndërsa përpjekjet diplomatike vazhdojnë. Ne kurrë nuk transmetojmë dokumente zyrtare që janë objekt diskutimi dhe presim të njëjtën gjë nga partnerët tanë, siç është praktika e zakonshme në ndërmjetësimin ndërkombëtar, që ta zhvillojnë procesin në mënyrë konfidenciale”.

“Është gjithashtu politika jonë e kahershme që të mos komentojmë rrjedhjet e supozuara ose raportet e mediave që pretendojnë se e kanë parë ose publikuar dokumentin”, ka shtuar Stano.

Ai tregoi se për çdo hap të ardhshëm lidhur me dialogun, do të ketë njoftime me kohë, ndërsa la të kuptohet se sivjet nuk pritet ndonjë takim Kurti-Vuçiq, për shkak të zgjedhjeve që do të mbahen në Serbi.

Stoni, edhe nuk deshi të flasë për masat e BE-së të cilat i janë vendosur Kosovës, si dhe për mos ndëshkimin e Serbisë për sulmin terrorist të 24 shtatorit në Banjskë të Zveçanit. /atvlive.tv

Përgatiti: Fatlum Jashari

Bashkimi Evropian ka përgatitur një propozim-model evropian për Asociacionin e komunave me shumicë serbe në Kosovë.

BE-ja, po ashtu, u ka bërë ftesë kryeministrit të Kosovës, Albin Kurti, dhe presidentit të Serbisë, Aleksandar Vuçiq, për një takim në Bruksel në margjina të punimeve të Këshillit Evropian këtë javë.

Propozime të ndryshme janë diskutuar – disa prej tyre në formë të shkruar – dhe këto diskutime do të vazhdojnë. Kjo përfshinë një propozim modern evropian për (statutin) e Asociacionit të Komunave me Shumicë Serbe. Ne presim veprim të shpejtë nga palët, që ato të dëshmojnë se janë të përkushtuara për vazhdimin e procesit të normalizimit – duke përmbushur obligimet respektive të dialogut nga Marrëveshja për rrugë drejt normalizimit, e po ashtu, marrëveshjet e kaluara pa asnjë parakusht ose vonesë. Liderët e Kosovës dhe Serbisë janë ftuar në takime në mbështetje të dialogut në margjina të takimit të Këshillit Evropian më vonë këtë javë”, tha për ATV-në zëdhënësi i BE-së për Politikë të Jashtme, Peter Stano.

Ky njoftim vjen tri ditë pas vizitës së pesë emisarëve euro-amerikanë në Prishtinë dhe Beograd.

Pa dhënë detaje, mundësinë e takimit e konfirmoi presidenti i Serbisë.

“Pres që brenda 2 apo 3 ditëve të ardhshme unë e Kurti të shkojmë serish në Bruksel. Është detyrë e jona që të ruajmë Serbinë nga shkelja e interesave tonë. Se çfarë do të jetë agjenda besoj do të jetë në kuadër të asaj që biseduam me Pesëshen, e për çka tani s’mund të flasë sepse marrëveshja ishte e atillë që asnjëra palë të mos deklarohet. Pas kësaj do të kemi më shumë informata dhe do ta dimë më mirë për çfarë bëhet fjalë. Ne do ta ruajmë Serbinë nga masat e mundshme dhe besoj se do t’ia dalim”, tha Vuçiq.

Por, Qeveria e Kosovës, nuk konfirmoi nëse kryeminsitri Kurti do të shkojë në Bruksel.

Në fundjavë, pesë emisarët prezantuan një plan të ri për rrugën përpara në dialog, përmbajtja e të cilit nuk është bërë ende publike.

Të enjten dhe të premten, liderët e shteteve anëtare të Bashkimit Evropian, në takimet e Këshillit, do të shqyrtojnë draft-konkluzionet për raportet Kosovë-Serbi.

Mes tjerash, në draftin e përpiluar nga ministrat e jashtëm të BE-së dënohen sulmet e dhunshme ndaj Policisë së Kosovës, kërkohet që përgjegjësit të vihen para drejtësisë dhe që “Serbia të bashkëpunojë plotësisht”.

Në draft kërkohet shtensionim i plotë i gjendjes në veri, organizim i zgjedhjeve të reja dhe pjesëmarrje e aktive e komunitetit serb në to – ndërsa theksohet se dështimi për diçka të tillë do të përcillet me pasoja.

Këshilli Evropian, po ashtu, shpreh keqardhje për, siç thuhet, mungesën e vullnetit nga të dyja palët për zbatimin e marrëveshjes së Brukselit dhe shtojcës së Ohrit.

Më shumë detaje i gjeni në Edicionin Qendror të lajmeve në ATV, në videon e më poshtme:

Të dërguarit e BE-së dhe SHBA-së, si dhe këshilltarët e sigurisë të liderëve të Francës, Gjermanisë dhe Italisë, do të vijnë në Prishtinë dhe Beograd të shtunën me qëllim të “bërjes së përparimit të prekshëm” në zbatimin e Marrëveshjes së Ohrit dhe uljen e tensioneve, veçanërisht pas ngjarjet në Banjskë në veri të Kosovës.

Kështu i tha agjencisë së lajmeve Beta zëdhënësi i Komisionit Evropian Peter Stano.

Stano tha se Miroslav Lajcak, Gabriel Escobar dhe këshilltarët e sigurisë së presidentit të Francës, kancelarit gjerman dhe kryeministrit të Italisë, Emmanuel Bon, Jens Pletner dhe Francesco Talo, do të shkojnë në bisedime me kryeministrin e Kosovës Albin Kurti dhe Presidenti serb Aleksandar Vuçiq “me pritshmëri të qarta se të dyja palët do të vazhdojnë procesin e normalizimit të marrëdhënieve dhe do të zbatojnë detyrimet e tyre pa vonesë dhe pa kushte”.

“Në të njëjtën kohë, autoritetet serbe duhet të bëjnë gjithçka për të zbardhur sfondin, autorët dhe organizatorët e dhunës në Banjskë”, tha zëdhënësi i Përfaqësuesit të Lartë të BE-së, Josep Borrell.

Sepse, sipas tij, Prishtina dhe Beogradi duhet të kenë parasysh se Bashkimi Evropian, anëtarët e tij dhe SHBA-të vazhdojnë të ofrojnë mbështetje të fuqishme për zgjidhjen e marrëdhënieve ndërmjet Kosovës dhe Serbisë dhe të ardhmes evropiane të gjithë rajonit.

Në të njëjtën kohë, burime diplomatike evropiane i thanë Beta-s se zyrtarë të lartë të vendeve kryesore perëndimore po shkojnë në Prishtinë dhe Beograd me kërkesën që jo vetëm të ndalet përshkallëzimi në Kosovë, por edhe “fjalë për fjalë, sa më shpejt të jetë e mundur, të organizohen zgjedhjet komunale në veri me pjesëmarrjen e serbëve të Kosovës dhe konkretisht të fillojë zbatimin e Marrëveshjes së Brukselit për Themelimin e Bashkësisë së Komunave Serbe”.

Diplomatët në selinë e BE-së theksuan veçanërisht se pesë zyrtarët e lartë perëndimorë po kërkojnë nga kryeministri i Kosovës Albin Kurti që të organizojë sa më parë zgjedhjet e reja komunale në veri të Kosovës, mënyra më e lehtë të jetë dorëheqja e kryetarëve aktualë dhe pa kushte, si dhe ti pranojnë obligimin për themelimin e Asociacionit

Beogradi, në të njëjtën kohë, duhet të dëshmojë se nuk ka qenë i përfshirë në mënyrë të drejtpërdrejtë apo të tërthortë në ngjarjet në Banjskë, “dhe deri më tani nuk ka asnjë provë se autoritetet serbe ishin, por as nuk dinin se çfarë po përgatitej atje”, bënë të ditur burime në Bruksel.

“Vuçiq duhet ta bëjë shpejt, sepse nuk ka durim të pafund në Bashkimin Evropian dhe disa masa tashmë po diskutohen në qarqet evropiane në rast se Beogradi nuk e bën atë që pritet”, thanë burime diplomatike evropiane.

Serbia do të duhet të tërhiqet nga të gjitha marrëveshjet dypalëshe me palët e treta si Kina, në ditën e pranimit në Bashkimin Evropian, tha sot zëdhënësi i BE-së, Peter Stano.

Stano shpjegoi se Serbia mund të lidhë marrëveshje tregtare me vende apo organizata të tjera përpara se të anëtarësohet në BE, me kusht që ato të mos bien ndesh me dispozitat e Marrëveshjes së Asociimit dhe Stabilizimit.

Në kuadër të negociatave për anëtarësim në BE, Serbia mori përsipër të tërhiqet nga të gjitha marrëveshjet bilaterale për tregtinë e lirë në ditën e anëtarësimit në Bashkimin Evropian” – tha Stano për Radio Evropën e Lirë, me rastin e nënshkrimit të marrëveshjes tregtare ndërmjet Serbisë dhe Kinës.

Ai shtoi se tërheqja e Serbisë nga marrëveshjet tregtare me palët e treta nuk është “një kusht i ri, por një rregull i përgjithshëm që zbatohet për të gjitha vendet kandidate që duan të anëtarësohen në BE”.

Serbia dhe Kina nënshkruan sot në Pekin një sërë marrëveshjesh në prani të presidentit serb Aleksandar Vuçiq dhe presidentit kinez Xi Jinping, ndër të cilat më e rëndësishmja është Marrëveshja e Tregtisë së Lirë.