ATV

Tag: PDK

  • Shabani: Opozitë më e madhe e vetvetes ka qenë LV-ja, se sa opozita

    Shabani: Opozitë më e madhe e vetvetes ka qenë LV-ja, se sa opozita

    Gazetari dhe analisti Zekirja Shabani, në emisionin DIREKT në ATV, tha se është fatkeqësi që Kosova nuk ka një opozitë të fuqishme të aftë për ta mbajtur përgjegjëse Qeverinë e Kosovës.

    Sipas tij, opozitë e vetvetes ka qenë Lëvizja Vetëvendosje.

    “Ne nuk kemi pasur një opozitë të fuqishme as prej PDK-së, as prej LDK-së e as prej AAK-së, të aftë dhe të gatshme për ta mbajtur përgjegjëse Qeverinë e Kosovës. Prandaj, opozitë e vetvetes në njëfarë forme ka qenë Vetëvendosja me ato telashet e brendshme që i ka shpërfaqë kohë pas kohe dhe i ka dirigju vazhdimisht punët e opozitës në Kuvendin e Kosovës”, tha Shabani.

    Ai thotë se deklarimet në Kuvendin e Kosovës më shumë kanë qenë shou se sa deklarime të përfaqësuesve të partive politike në vend.

    “Prandaj e kemi edhe një qeveri arrogante, ndoshta shpesh herë të papërgjegjshme, pikërisht për shkak të mungesës së zërit të opozitës”, u shpreh Shabani.

    Intervistën e plotë të gazetarit Zekirja Shabani, në emisionin DIREKT në ATV e gjeni në videon më poshtë:

  • ​Krasniqi kërkon dakordim politik për zgjedhje të reja

    ​Krasniqi kërkon dakordim politik për zgjedhje të reja

    Kryetari i Partisë Demokratike të Kosovës, Memli Krasniqi, ka kërkuar dakordim politik mes partive parlamentare në Kuvend për organizimin e zgjedhje të reja.

    Ai në seancën e sotme plenare, tha se kjo legjislaturë e Kuvendit duhet të shpërbëhet dhe mandati t’iu kthehet qytetarëve, transmeton KP.

    “Ky kuvend, mandatin e juaj që nuk i punojnë as pajisjet, realisht s’duhet me vazhdu punën. Unë jam duke iu ftuar publikisht edhe si deputet, por edhe si kryetar i PDK-së, të merremi vesh, të bëjmë një mocion dhe të shpërndajmë Kuvendin e Kosovës. Kjo legjislaturë nuk është në gjendje me kalu asgjë. Ju jeni thirrë në 50 përqindsh, shumicë parlamentare dhe nuk jeni në gjendje me kalu ligje, mos të flasim për marrëveshje ndërkombëtare. Është një bllokim total i punës së brendshme, mos të flasim edhe për izolimin e jashtëm që edhe me sanksione i keni sjell Kosovës….T’ia kthejmë mandatin e qytetarëve dhe le të vendosin ata a janë të interesuar Kosova me vazhdu këtë rrugë që e keni ju apo kanë mendim tjetër. Pasi kur iu kanë votuar nuk iu kanë votuar për këtë rrugë të konfrontimit dhe politikës së theqafës”, tha ai.

    Mirëpo, kryetari i Kuvendit, Glauk Konjufca, sërish duke ironizuar tha se derisa të ndodh kjo, deputetët të votojnë ndonjë projektligj që është në rend të ditës sot.

    “Derisa të ndodh kjo, provojmë të votojnë ndonjë projektligj eventualisht”, tha ai.

  • ​PDK-ja kërkon shpërbërjen e Kuvendit, LVV thotë se kjo s’do të ndodh

    ​PDK-ja kërkon shpërbërjen e Kuvendit, LVV thotë se kjo s’do të ndodh

    Përfaqësues të Lëvizjes Vetëvendosje po akuzojnë opozitën për mos votimin e marrëveshjeve ndërkombëtare në Kuvendin e Kosovës, derisa përfaqësuesit e Partisë Demokratike të Kosovës, thanë se nuk ka kuptim të votohen marrëveshjet sepse vendi është i sanksionuar si pasojë e veprimeve të Qeverisë.

    Mbledhja e kryesisë së Kuvendit të Kosovës sërish ka dështuar në mungesë të koriumit, pasi aty nuk kanë marrë pjesë nënkryetarët e Kuvendit nga PDK dhe LDK, të cilët po bojkotojnë punën e Kuvendit.

    Ndërkohë, u tha se sot ose nesër presin që kryetari i Kuvendit të Kosovës, Glauk Konjufca të caktojë seancë për ditën e enjte.

    Shefja e grupit parlamentar të Lëvizjes Vetëvendosje, Mimoza Kusari-Lila tha se sot ose nesër presin që kryetari i Kuvendit të Kosovës, Glauk Konjufca të caktojë seancë për ditën e enjte, derisa është pyetur se deri kur do të vazhdojnë me mungesë kuorumi dhe moskordinim me opozitën.

    “Besoj që kjo është pyetje për përfaqësuesit e opozitës, ne do të vazhdojmë me atë që na lejon rregullorja dhe Kushtetuta, që të sigurohemi që në veçanti disa ligje që janë tepër me rëndësi të miratohen gjatë kësaj periudhe kohore, edhe tri javë të mbetura që janë të sesionit pranveror. Jemi mobilizuara maksimalisht në mbajtje të korumit dhe votim të suksesshëm në seanca. Sa i përket marrëveshjeve ndërkombëtare, është fakt i ditur se pa qenë 80 deputetë, ato nuk mund të hedhen në votim, prandaj si të tilla mbesin në obligim dhe përgjegjësi të opozitës. Arsyet siç i keni parë nuk kanë qenë të artikuluara në formën që mund të ketë qartësi se kur mund të kryhet kjo. Fillimisht kanë mohuar zgjedhjet, pastaj kanë kërkuar zgjedhjet tjetri grup… ne i konsiderojmë totalisht të pa pranueshme, totalisht të paarsyeshme dhe natyrisht që ndoshta dëmi më i madh që i bëhet vendit“, tha ajo, derisa ka mohuar se mund të shpërbëhet kuvendi.

    “Jo absolutisht, Kuvendi për shpërbërje duhet t’i ketë dy të tretat. Ne nuk shohim që ka telashe në Kuvendit përveç që ato që po i krijon opozita të paqena por puna jonë me pozitën do të vazhdojë. Sesioni pranveror vazhdon punën deri në fund të korrikut dhe pastaj në gusht shkohet në pushim siç është paraparë”, tha ai.

    Shefi i grupit parlamentar të Partisë Demokratike të Kosovës, Abelard Tahiri ka thënë se ky Kuvendi nuk meriton asnjë ditë të vetme të shpenzojë taksat e qytetarëve kur është kaq jofunksional.

    “Duhet të shpërbëhet sa më parë. I kemi dhënë mundësi edhe kryeministrit nga java e kaluar ose ta shpërbëj Kuvendit ose të jap dorëheqje dhe koha është që vendi ynë të shkoj në zgjedhje të parakohshme. Ju e shihni që çdo ditë e më shumë po thellohet kriza, ju e shihni edhe marrëzitë që i bëjnë qeveritarët tanë karshi partnerëve tanë, ju e shini që çdo ditë e më shumë vendi ynë po sanksionohet nga ShBA, BE dhe nga vendet e BE-së veç e veç, çdo ditë kemi lajme që vendet veç e veç siç ishte Gjermania para dy dite po marrin masa ndaj Republikës së Kosovës. Ne nuk të mbijetojmë të izoluar dhe as që e kemi ndërmend që ta ndihmojmë në izolimin e vendit…ne nuk do të votojmë. Tani e tutje nuk do t’i votojmë as marrëveshjet ndërkombëtare, as projektligjet dhe asgjë, me qëllimin e vetëm që sa më shpejt ta qojmë vendin në zgjedhje, që sa më shpejt ta largojmë një qeveri të paaftë, që tashmë ka krijuar një krizë jashtëzakonisht të madhe, një krizë që mundet me ardhë Republika jonë për të pas sanksione nga ShBA dhe BE“, tha ai, duke shtuar se njerëzit që fusin një vend në krizë, nuk janë më kredibil që ta nxjerr vendin nga kriza, prandaj, si në Kuvend, ashtu edhe jashtë do të angazhohen për zgjedhje të reja.

    Ai shtoi se do t’i përdorin të gjitha masat e mundshme, të nevojshme që t’ia pamundësojnë punën Kuvendit, duke mos dhënë detaje nëse kjo i bije edhe në pengimin e mbarëvajtjes së seancave.

    “Ne në ditët në vijim do t’ua bëjmë me dije për secilin hap që do të ndërmarrim. Tani për tani nuk do të votojmë asnjë projektligj, asnjë marrëveshje ndërkombëtare. Çfarë kuptimi ka kur jemi të sanksionuar të votojmë marrëveshje ndërkombëtare, edhe ashtu këto janë të fundit sepse kjo qeveri nuk mund të sjellë më marrëveshje ndërkombëtare, nuk ka asnjë shtet, asnjë organizatë ndërkombëtare që nënshkruan marrëveshje me këtë qeveri të sanksionuar”, tha ai.

    Sipas tij, është detyrë e PDK-së për ta nxjerr vendin nga kjo krizë që ka shkaktuar pozita. /kp

  • PDK denoncon ndërhyrjen e qeverisë në hetimet e Policisë

    PDK denoncon ndërhyrjen e qeverisë në hetimet e Policisë

    Dy ditë pas shkarkimit të shefit të ekipit që udhëhiqte hetimet ndaj Martin Berishajt e Nagip Krasniqit, Partia Demokratike e Kosovës e ka quajtur ndërhyrje të pastër politike shkarkimin e Shemsi Hazirit.

    Koordinatori i Departamentit për Drejtësi në kuadër të Kabinetit për Qeverisje të Mirë të PDK-së, Përparim Gruda, ka thënë se Qeveria ka për qëllim të parandaloj hetimet ndaj zyrtarëve të partisë në pushtet.

    “Shkarkimi i Drejtorit të Njësisë së Veçantë të Hetimeve tregon se kjo Qeveri dëshiron të mbroj më çdo kusht njerëzit e saj që janë nën hetime për korrupsion, dhe këtë po e bënë duke ndërhyrë në mënyrë të papranueshme në procesin e hetimit ndaj tyre. Ky shkarkim shpjegon arsyen dhe motivet e vërteta pse Kryeministri Kurti dhe kjo Qeveri sulmonte prokurorin e shtetit me aq brutalitet pak ditë pas arrestimit në Nagip Krasniqit”, tha Gruda.

    Derisa thotë që ky rast tregon që premtimet për luftë kundër korrupsionit kanë qenë një mashtrim, Gruda u bënë thirrje Qeverisë të heqin dorë nga ndërhyrjet politike.

    “Po ashtu, i bëjmë thirrje Qeverisë së Kosovës që të heq dorë nga ndërhyrjet politike në organet që po zhvillojnë hetimet dhe t’i hap rrugë zbardhjes së kësaj afere. Më lejoni të jem i qartë për të gjithë, nuk ka forcë që mund të mbyllë dhe heshtë aferën korruptive të Martin Berishajt dhe Nagip Krasniqit. Qytetarët e Kosovës do të marrin vesh herët apo vonë të vërtetën e këtij skandali korruptiv”, tha Gruda.

    Se nuk është hera e parë që partitë në pushtet tentojnë të parandalojnë hetimet ndaj zyrtarëve të tyre, e thotë edhe nga Instituti i Kosovës për Drejtësi.

    “Nuk është hera e parë që Task Forca kundër Korrupsion e Policisë së Kosovës është subjekt i vendimeve politike për shkak të punës dhe performancës së tyre në luftimin e korrupsionit. Njëjtë kishte vepruar edhe LDK me përpjekjen për të shpërbërë të njëjtën në kohën e kryeministrit Hoti kur kjo Task Forcë kishte filluar me arrestime dhe hetime të zyrtarëve të lartë të LDK. Të njëjtën qasje po e zbaton edhe VV, duke shkarkuar drejtorin e kësaj Task Force kur ky mekanizëm po heton rastet e ambasadorit Martin Berishaj dhe drejtorit të KEK Nagip Krasniqi. Fatkeqësisht, politika në publik bën propagandë për luftimin e korrupsionit derisa në praktikë ushtron ndërhyrje politike për të mbrojtur të dyshuarit për korrupsion duke vazhduar kulturën e pandëshkueshmërisë”, tha Ehat Miftaraj nga IKD.

    Ambasadori Martin Berishaj është nën hetime në Kosovë për mosdeklarim të pasurisë, kurse procedura ndaj tij janë paralajmëruar ose po zhvillohen edhe në vende tjera të rajonit.

    Ndërkaq, ish-drejtori i KEK-ut, Nagip Krasniqi, i cili ndodhet në paraburgim, akuzohet për keqpërdorim të detyrës zyrtare dhe korrupsion. /atvlive.tv

    Edicionin Qendror të lajmeve në ATV e gjeni në videon më poshtë:

  • Hisen Berisha: PDK është e vetmja parti që ka punu për këtë shtet

    Hisen Berisha: PDK është e vetmja parti që ka punu për këtë shtet

    Deputeti Hisen Berisha, në emisionin CONTEXT në ATV, tha se PDK-ja është e gatshme për zgjedhje nacionale dhe sipas tij, është e vetmja parti që ka punuar për Kosovën.

    “Kryetari i PDK-së është kryetari më i mirë që e ka një parti politike. Është njeriu që për pak muaj, ka arritur me i fitu zgjedhjet lokale, ky është realitet. Sot jemi të gatshëm me hy në zgjedhje nacionale dhe jam i bindur se do të shënojmë fitore dhe jemi e vetmja parti që sot populli po beson se është e vetmja që ka punu për këtë shtet, dhe nga dita që është ndalë nga viti 2014. Prej vitit 2014, përjashto rrugën e arbrit që është ndërtua, prej 2014 ma tregoni një lëvizje zhvillimore pozitive që e ka bërë dikush tjetër. Ma thoni veç një investim, a në paga, a në çështje ekonomike, a sociale, a politike”, u shpreh Hiseni. /atvlive.tv

    Emisionin e plotë CONTEXT në ATV e gjeni në videon më poshtë:

  • LV-ja krenohet me liberalizimin e vizave – Opozita thonë s’e kjo Qeveri s’ka merita

    LV-ja krenohet me liberalizimin e vizave – Opozita thonë s’e kjo Qeveri s’ka merita

    Lëvizja Vetëvendosje po e konsideron si meritë të kësaj Qeverie dhe aplikimin e Kosovës në Këshillin e Evropës. Ndërkohë, të kundërtën e thonë dy partitë opozitare, Partia Demokratike e Kosovës dhe Lidhja Demokratike e Kosovës.

    Sipas PDK-së e LDK-së, me fajin e mazhorancës ka humbur momentumi që Kosova ta fitojë liberalizimin qysh në vitin 2016, pasi kjo parti sa ishte në opozitë e kundërshtonte demarkimin e kufirit me Malin e Zi.

    Deputetja e Grupit Parlamentar të Lëvizjes Vetëvendosje, Jeta Statovci konsideron se Kosova ka më shumë stabilitet se çdo vend tjetër i rajonit. Ajo thotë se heqja e regjimit të vizave ka ardhur si rezultat i përmirësimit në raport me sundimin e ligjit dhe luftën kundër korrupsionit.

    “Mund të them se aktualisht përqendrimi dhe fokusi në këtë demokracinë tonë të re po e përcjell edhe elementet tjera që flasin për forcimin e demokracisë si demokracia më e fortë në gjithë rajonin, duke e marrë për bazë edhe çështjen e qëndrueshmërisë financiare dhe performancës ekonomike të cilat japin një stabilitet më të lartë se sa pjesa tjetër e rajonit, përmirësimi në raport me sundimin e ligjit dhe luftën kundër korrupsionit, janë sinjale shumë pozitive të cilat janë mirëpritur edhe nga ana e eurodeputetëve, besoj që tani janë përcjellë edhe tutje në mekanizmat të cilët janë në kuadër të BE-së, andaj këtu shohim edhe suksese të cilat përfshijnë edhe liberalizimin e vizave edhe hapin e parë karshi Këshillit të Evropës, i cili në pilar ka çështjen e të drejtave të njeriut, sundimit të ligjit si dhe demokracisë”, thotë Statovci.

    Por të kundërtën e thotë deputetja e Partisë Demokratike të Kosovës, Blerta Deliu-Kodra. Hapin e parë drejt anëtarësimit në Këshill të Evropës, Deliu-Kodra e quan lajm të mirë, por që kërkon më shumë punë drejt anëtarësimit në KiE.

    “Natyrisht që aplikimi për Këshill të Evropës dhe fakti që Kosova e ka kaluar një raund të parë, është lajm i mirë për Kosovën dhe natyrisht duhet t’i gëzohemi të gjithë edhe pse është vetëm fillimi i një angazhimi. Ju e keni parë edhe angazhimin e shteteve dhe na mbetet ende punë për të bërë që ne ta mbërrijmë anëtarësimin në këtë mekanizëm të rëndësishëm”, u shpreh Deliu-Kodra, teksa fajëson VV-në për vonesat në liberalizimin e vizave.

    “Ndërkohë për çështjen e vizave, unë konsideroj që ka qenë një padrejtësi e madhe që iu është bërë Kosovës. Ne në vitin 2016 i kemi përmbushur të gjitha kriteret. Nuk është çështje e meritave, sa që është e dhimbshme që qytetarët e Kosovës për kaq vite kanë jetuar të izoluar nga një e drejtë e cila padrejtësisht iu është mohuar Kosovës. Në vitin 2016. vendimi ka qenë politik, arsyetimi i BE-së ka qenë që është marrë nga Këshilli i Ministrave, dhe natyrisht që zhvillimi i rrethanave të reja, fakti që ne për tri vite e kemi humbur një momentum që e kemi prolonguar demarkimin e kufirit me Malin e Zi, dhe për këtë ka një përgjegjësi por po e them se nuk mund të bëhet fjalë për merita sepse padrejtësisht janë privuar nga një e drejtë qytetarët e Kosovës”, thotë Deliu-Kodra.

    Ndërsa deputetja e Lidhjes Demokratike të Kosovës, Rrezarta Krasniqi, vonesat për liberalizimin e vizave për kosovarët ka ardhur si pasojë e kundërshtive të Demarkacionit me Malin e Zi.

    Thotë se Vetëvendosja e ka shtyrë edhe më shumë procesin e liberalizimit.

    “Jo aspak nuk ka merita e sidomos sa i përket liberalizimit të vizave, sepse në vitin 2015-16, Kosova ka qenë në pak me Gjeorgjinë dhe Ukrainën në çështjen e liberalizimit të vizave, ndërsa në atë kohë ka qenë marrëveshja e Demarkacionit ku kjo parti sa ka qenë në opozitë ka bërë protesta të dhunshme, gjithashtu në Kuvend ka hedhur gaz lotsjellës kundër kësaj marrëveshje. Pra kjo (VV) vetëm e ka shtyrë procesin e liberalizimit të vizave, mirëpo tani ka ardhë një momentum tjetër duke e ditur luftën në Ukrainë dhe pak a shumë edhe marrëveshja e cila është dakorduar në Ohër, pra këto dy procese siç duke kanë lidhje me marrëveshjen”, thotë Krasniqi. /EO

  • Arrestimi i drejtorit të KEK-ut, PDK kërkon raportimin e ministres Rizvanolli

    Arrestimi i drejtorit të KEK-ut, PDK kërkon raportimin e ministres Rizvanolli

    Partia Demokratike e Kosovës ka kërkuar që në seancën e sotme të raportojë ministrja e Zhvillimit Ekonomik, Artane Rizvanolli. Pas arrestimit të djeshëm të kryeshefit të KEK-ut, Nagip Krasniqi, kjo parti ka kërkuar që ministrja të japë informacione mbi këtë situatë. Këtë mocion nuk e ka mbështetur shumica parlamentare, Lëvizja Vetëvendosje.

    Shefi i Grupit Parlamentar të PDK-së, Abelard Tahiri ka propozuar një mocion për ndryshim të rendit të ditës, që të mundësohet raportimi i Rizvanollit.

    “Si GP i PDK-së bazuar në rregulloren e kuvendit, në pikën 94 të shqyrtimit të çështjeve urgjente, kërkojmë që tashmë të vendoset si pikë e parë të rendit të ditës, raportimi i ministres së Zhvillimit Ekonomik mbi arrestimet e djeshme që kanë ndodhur në Korporatën Energjetike të Kosovës. Ne e dimë që KEK drejtohet nga një bord i emëruar nga Qeveria e Kosovës, ky bord e ka emëruar një kryeshef, i cili ka qenë zyrtar i lartë i partisë në pushtet, zyrtar i lartë i LVV-së. Dhe ditën e djeshme një zyrtar i tillë është arrestuar nga Prokuroria Speciale e Kosovës”, ka thënë ai, raporton KP.

    Tahiri ka theksuar se së shpejti do të dorëzojnë dosje në prokurori për abuzimet, siç ka thënë ai, që janë bërë nga kryeshefi i KEK-ut.

    “Si Grup Parlamentar tash e një vit e gjysmë i kemi ngritur shqetësimet tona rreth abuzimeve që kanë ndodhur dhe keqmenaxhimeve dhe krizës energjetike në Republikën e Kosovës. Pra, kemi themeluar edhe një komision hetimor, ku tashmë kemi përgatitur edhe një dosje për ta dorëzuar në prokurori, për shkeljet që ka bërë pikërisht kryeshefi i KEK-ut. Ne kemi parë që atë ka ndodhur një abuzim jashtëzakonisht i madh, prej subvencionimit të tarifave, pastaj tenderat një burimor dhe shumë çështje të tjera që lidhen me punësime”, ka shtuar Tahiri.

    Por, ky mocion nuk ka marrë votat e mjaftueshme të deputetëve të Kuvendit të Kosovës.

    “77 deputetë votuan, morën pjesë në votim, për mocionin ishin 32. Kurse kundër mocionit ishin 45. Prandaj mocioni nuk mund të kalojë”, ka njoftur kryeparlamentari Glauk Konjufca.

    Drejtori i KEK-ut, Nagip Krasniqi është arrestuar dje për shkak të dyshimit se ka kryer “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”.

  • ​Krasniqi: Kërkojmë nga Qeveria angazhim maksimal për mbarëvajtjen e procesit zgjedhor

    ​Krasniqi: Kërkojmë nga Qeveria angazhim maksimal për mbarëvajtjen e procesit zgjedhor

    Kryetari i Partisë Demokratike të Kosovës, Memli Krasniqi, ka kërkuar nga Qeveria dhe institucionet e sigurisë angazhim maksimal për mbarëvajtjen e rregullt të procesit zgjedhor në veri të vendit.

    Ai ka takuar kandidatet e PDK-së për kryetarë të komunave në veri të vendit, për zgjedhjet e 23 prillit, dhe u ka bërë thirrje qytetarëve që të shfrytëzojnë të drejtën e tyre të votës.

    “Në këtë takim diskutuam për përgatitjet në lidhje me këtë proces që do të mbahet të dielën, më 23 prill, dhe për gatishmërinë e kandidatëve të PDK-së për të marrë përgjegjësi udhëheqëse dhe për të qeverisur për të gjithë qytetarët, pa dallim, përkundër sfidave për shkak të tensioneve në këtë pjesë të vendit. Ata janë të vendosur që ta kryejnë punën e tyre me përkushtim të paepur dhe për këtë e kanë mbështetjen e plotë timen dhe të PDK-së”, ka shkruar Krasniqi në Facebook.

    Për zgjedhjet e jashtëzakonshme lokale të 23 prillit, në veri të Mitrovicës PDK garon me Taulant Kelmendin, në Leposaviq me Albulena Behluli-Hetemi, me Izmir Zefirin në Zubin Potok dhe me Ilir Pecin në Zveqan.

    “Ndonëse procesi i votimit do të organizohet kryesisht nëpër qendra alternative të votimit, ne ftojmë të gjithë qytetarët e Mitrovicës së Veriut, Leposaviqit, Zubin Potokut dhe Zveçanit, të dalin dhe ta shfrytëzojnë të drejtën e tyre të votës për një të ardhme më të mirë për vete dhe familjet e tyre. Po ashtu, kërkojmë nga Qeveria e Kosovës dhe institucionet përkatëse të sigurisë, angazhim maksimal për mbarëvajtjen e rregullt të procesit zgjedhor”, ka shkruar ai.

  • Vetëvendosja fajësohet për vonesën e liberalizimit

    Vetëvendosja fajësohet për vonesën e liberalizimit

    Hedhjen e këtij gazi lotsjellës për ta penguar votimin e Demarkacionit me Malin e Zi, në vitin 2016, opozita e tanishme e konsideron arsye kryesore për zvarritjen e liberalizimit të vizave.

    Fajin për këtë, partitë opozitare po ia lënë Lëvizjes Vetëvendosje.

    “Kosova ka humbur një momentum historik në vitin 2015-2016, kur partia sot në pushtet, nuk e ka votuar çështjen e demarkacionit me Malin e Zi, ku ka pasur protesta të dhunshme, ka pasur hedhje të gazit lotsjellës. Dhe partia në pushtet e ka penguar, sepse Kosova ka qenë në pako me Gjeorgjinë dhe Ukrainën”, tha në një intervistë për ATV-në, deputetja e LDK-së, Rrezarta Krasniqi.

    Por, duke i hedhur poshtë këto akuza, deputetët e Lëvizjes Vetëvendosje thonë se arsyeja kryesore përse kosovarët mbetën pa viza gjatë këtyre viteve, është korrupsioni.
    “Këtu nuk ka të bëjë me faktin që është penguar prej një subjekti politik për veprime të caktuara, të cilat janë bërë për të ndalur një të keqe shumë të madhe, por ka të bëjë, le të themi, me joseriozitetin që e kanë treguar vazhdimisht qeverisjet e kaluara, që kanë hapur shampanja, kanë dhënë tokë në emër të liberalizimit të vizave. Korrupsioni ka qenë njëra prej arsyeve që e ka penguar procesin e liberalizmit të vizave, në veçanti ka pasur skepticizëm tek shtetet anëtare të cilat i kanë pasur dyshime e veta”, tha deputetja e LV-së, Arbëresha Kryeziu.

    Vendimi i sotëm i Parlamentit Evropian është hapi i parafundit për liberalizimin e vizave për qytetarët e Kosovës. Kështu nga 1 janari kosovarët do të kenë të drejtë të njëjtë të lëvizjes së lirë, sikur popuj e tjerë evropianë. /atvlive.tv

  • Krasniqi uron heqjen e vizave: Vendim shumë i vonuar por i mirëseardhur

    Krasniqi uron heqjen e vizave: Vendim shumë i vonuar por i mirëseardhur

    Kryetari i Partisë Demokratike të Kosovës, Memli Krasniqi ka reaguar për vendimin e Parlamentit Evropian për liberalizimin e vizave.

    Krasniqi shkroi vendim shumë i vonuar por i mirëseardhur, “Shpresoj që ky vendim të hyjë në fuqi sa më parë”, ka shkruar ai, pëcjell IndeksOnline.

    Postimi i plotë:

    Vendimi i Parlamentit Evropian për liberalizimin e vizave për qytetarët e Kosovës, edhe pse shumë i vonuar, është mëse i merituar e i mirëseardhur. Prandaj, para se gjithash, sot urimet i meritojnë qytetarët tanë. Shpresoj që ky vendim të hyjë në fuqi sa më parë.